1, 2. (a) Wetin Jiova dɔn sho wi? (b) Us prɔmis dɛn de na Ayzaya 46: 10, 11 ɛn 55:11?

“NA DI biginin Gɔd mek di ɛvin ɛn di wɔl.” Dis na di fɔs wɔd dɛn na di Baybul. (Jɛnɛsis 1:1, NW) Pan ɔl di bɔku bɔku tin dɛn we Gɔd dɔn mek na di wɔl na smɔl nɔmɔ wi de si, ɛn na smɔl tin nɔmɔ wi ɔndastand bɔt tin dɛn lɛk spes, layt, ɛn graviti we de mek ɛnitɛm we sɔntin go ɔp i de kam dɔŋ. (Ɛkliziastis 3:11, NW) Bɔt Jiova dɔn sho wi wetin i want fɔ di wɔl ɛn fɔ mɔtalman. I mek mɔtalman lɛk aw i tan, ɛn i want dɛn fɔ ɛnjɔy fɔ de na di wɔl. (Jɛnɛsis 1:26) Dɛn go bi in pikin dɛn, ɛn in go bi dɛn Papa.

² Na di tɔd chapta na Jɛnɛsis, wi lan se dɛn chalenj Jiova fɔ mek wetin i want nɔ bi. (Jɛnɛsis 3:1-7) Bɔt no prɔblɛm nɔ de we Jiova nɔ ebul sɔlv. Nɔbɔdi nɔ ebul stɔp am we i want fɔ du sɔm tin. (Ayzaya 46:10, 11; 55:11) Wi shɔ se wetin Jiova want, go bi di rayt tɛm!

3. (a) Us impɔtant tin dɛn go ɛp wi fɔ ɔndastand di mɛsej we de na di Baybul? (b) Wetin mek na naw wi go tɔk bɔt dɛn tin ya? (c) Us kwɛstyɔn dɛn wi go tɔk bɔt?

 ³ Wi dɔn no wetin Gɔd want fɔ di wɔl ɛn fɔ mɔtalman, ɛn us wok Jizɔs de du fɔ lɛ dat apin. Dɛn tin ya rili impɔtant na di Baybul, ɛn sɔntɛm na dɛn fɔs wi lan we wi bigin fɔ stɔdi Gɔd in Wɔd. Naw wi want fɔ ɛp ɔda pipul dɛn fɔ lan dɛn impɔtant tin ya. Wan fayn tɛm fɔ du dis insay dis ia na we wi de invayt pipul dɛn fɔ kam di Mɛmorial fɔ mɛmba Krays in day wan. (Lyuk 22:19, 20, NW) If dɛn kam na dis impɔtant program, dɛn go lan mɔ bɔt di wɔndaful tin we Gɔd want. So naw na fayn tɛm fɔ lɛ wi tink bɔt sɔm kwɛstyɔn dɛn we wi go yuz fɔ ɛnkɔrej pipul dɛn fɔ atɛnd. Insay dis atikul, wi go tɔk bɔt tri kwɛstyɔn dɛn: (1) Wetin Gɔd want fɔ di wɔl ɛn fɔ mɔtalman? (2) Us bad tin bin apin? (3) Wetin mek Jizɔs in day wan na di men tin we go mek wetin Gɔd want bi?

4. Aw di tin dɛn we Gɔd mek “de sho PAPA GƆD in glori”?

⁴ Na Jiova mek ɔltin ɛn in na Gɔd we rili wɔndaful. Ɔl wetin i mek rili fayn ɛn na di bɛst. (Jɛnɛsis 1:31; Jɛrimaya 10:12) Wetin wi go lan frɔm di we aw ɔltin we Gɔd mek fayn ɛn ɔganayz? Wi lan se ɔl di tin dɛn we Jiova mek, frɔm di smɔl wan to di big wan, dɛn ɔl de bɛnifit wi. Apat frɔm dat, we yu tink bɔt wan wɔndaful tin insay mɔtalman bɔdi we dɛn kɔl sɛl, ɔ we yu si pikin we dɛn jɔs bɔn, ɔ yu wach aw di klawd kin fayn fɔ wach we di san de go dɔŋ, aw yu de fil? Wi kin kɔle dɛn tin ya bikɔs Jiova mek wi wan kayn we we mek wi ebul fɔ no wetin rili fayn.—Rid Sam 19:1; 104:24.

5. Wetin Jiova dɔn du so dat ɔl wetin i mek go de togɛda fayn fayn wan?

⁵ Jiova put lɔ fɔ ɔl wetin i dɔn mek. I mek lɔ fɔ di animal dɛn, di tin dɛn we nɔ gɛt layf, ɛn i mek lɔ fɔ mɔtalman dɛn. I mek dɛn lɔ ya so dat ɔl wetin de na di wɔl go de togɛda fayn fayn wan. (Sam 19:7-9) Ɔl wetin de na di wɔl gɛt in ples ɛn wok we i de du. Fɔ ɛgzampul, di lɔ we dɛn kɔl graviti we de mek ɛnitin we go ɔp kam dɔŋ, na in de mek di difrɛn difrɛn gas dɛn de nia di wɔl, ɛn i na in de kɔntrol di si, ɛn na in de mek sɔntɛnde wi gɛt ay-wata ɛn sɔntɛnde wi nɔ kin gɛt am. If dis lɔ nɔ bin de, i nɔ fɔ dɔn pɔsibul fɔ liv na dis wɔl. Di lɔ dɛn we Jiova put fɔ animal ɛn tin dɛn we nɔ gɛt layf mek di wɔl ɔganayz. Dis sho se sɔm tin de we Jiova want fɔ di wɔl ɛn fɔ mɔtalman. We wi de prich, i go fayn fɔ lɛ wi ɛp pipul dɛn fɔ no di Pɔsin we mek di wan ol wɔl.—Rɛvɛleshɔn 4:11.

6, 7. Wetin na sɔm tin dɛn we Jiova gi Adam ɛn Iv?

⁶ Wetin Jiova want na fɔ mek mɔtalman de sote go na di wɔl. (Jɛnɛsis 1:28; Sam 37:29) Jiova gɛt fri-an, ɛn i gi Adam ɛn Iv fayn fayn gift dɛn. (Rid Jems 1:17.) Jiova  gi dɛn fridɔm fɔ disayd wetin dɛn want ɛn mek dɛn go ebul tink, sho lɔv, ɛn ɛnjɔy padi biznɛs. Jiova tɔk to Adam ɛn tich am aw fɔ du gud. Ɛn Adam lan aw fɔ kia fɔ insɛf, di animal dɛn, ɛn di land. (Jɛnɛsis 2:15-17, 19, 20) Jiova mek Adam ɛn Iv ebul fɔ test, tɔch, si, yɛri, ɛn smɛl di gud tin dɛn we i mek fɔ dɛn, so dat dɛn go ɛnjɔy layf na di fayn ples we i dɔn gi dɛn. Adam ɛn Iv bin gɛt bɔku fayn wok fɔ du. Dɛn bin fɔ kɔntinyu fɔ lan ɛn no nyu tin dɛn sote go.

⁷ Wetin igen Gɔd bin want? Jiova bin mek Adam ɛn Iv pafɛkt, so dɛn bin fɔ ebul fɔ bɔn pafɛkt pikin dɛn. Ɛn dɛn pikin dɛnsɛf go ebul bɔn pikin dɛn te dɛn ful-ɔp di wan ol wɔl. Jiova want mek mama ɛn papa dɛn lɛk dɛn pikin dɛn, jɔs lɛk aw i bin lɛk in fɔs pafɛkt mɔtalman pikin dɛn, we na Adam ɛn Iv. I gi mɔtalman di wɔl ɛn ɔl di fayn fayn tin dɛn we de de. Na di wɔl dɛn go de, ɛn nɔbɔdi nɔ go ɛva pul am na dɛn an.—Sam 115:16.

8. Wetin mek Gɔd gi Adam ɛn Iv di lɔ we de na Jɛnɛsis 2:16, 17?

⁸ Wetin Jiova bin want nɔ apin kwik kwik wan lɛk aw i bin want am. Wetin apin? Jiova gi Adam ɛn Iv simpul lɔ so dat dɛn go no wetin fɔ du ɛn wetin nɔ fɔ du. I tɛl dɛn se: “Yu kin it frɔm ɔl di tik dɛn we de na di gadin te yu satisfay. Bɔt as fɔ di sɛns tik we de sho gud ɛn bad, yu nɔ fɔ it frɔm am, bikɔs di de we yu it frɔm am, natin nɔ go pwɛl am, yu go day.” (Jɛnɛsis 2:16, 17, NW) Dis lɔ nɔ bin at fɔ ɔndastand. Ɛn i nɔ bin at fɔ obe, bikɔs bɔku ɔda tin dɛn bin de na di gadin fɔ it.

9, 10. (a) Aw Setan bin lay pan Jiova? (b) Wetin Adam ɛn Iv disayd fɔ du? (Luk di pikchɔ nia dis atikul in taytul.)

⁹ Setan yuz wan snek fɔ ful Iv, so dat i nɔ go obe in Papa, we na Jiova. (Rid Jɛnɛsis 3:1-5; Rɛvɛleshɔn 12:9) Setan bin se Gɔd nɔ alaw in pikin dɛn fɔ it ‘pan ɛni stik na di gadin.’ I tan lɛk se i bin de tɔk se: ‘Fɔ se yu nɔ go ebul du wetin yu want?’ Ɛn i tɛl Iv bak se: ‘Yu nɔ go day.’ Dat na lay. Dɔn i tray fɔ mek Iv biliv se i nɔ nid fɔ lisin to Gɔd. Setan se: “PAPA GƆD bin se so bikɔs i no se if una it am, una yay go opin.” Setan bin de tray fɔ se Jiova nɔ want dɛn fɔ it di frut, bikɔs dis go mek dɛn go no spɛshal tin dɛn. Ɛn i lay to am se: ‘Yu go tan lɛk am; dɔn yu go no wetin gud frɔm wetin bad.’

¹⁰ Adam ɛn Iv bin gɛt fɔ disayd wetin fɔ du. Dɛn go obe Gɔd, ɔ dɛn go lisin to di snek? I sɔri fɔ no se, dɛn nɔ obe Gɔd. Dɛn lɛf Jiova we na dɛn Papa ɛn jɔyn Setan. Dɛn de fɔ dɛnsɛf, ɛn Jiova nɔ bin de protɛkt dɛn.—Jɛnɛsis 3:6-13.

11. Wetin mek Jiova nɔ bin jɔs fɔgɛt bɔt Adam ɛn Iv dɛn sin?

¹¹ We Adam ɛn Iv pwɛl Gɔd in lɔ, dɛn nɔ bin pafɛkt igen. So dɛn bi Gɔd in  ɛnimi bikɔs, Gɔd et wetin bad. Gɔd in “yay tu gud fɔ de luk” wetin “bad.” (Abakɔk 1:13) If Jiova nɔ bin du natin bɔt Adam ɛn Iv dɛn sin, dat fɔ dɔn ambɔg ɔl wetin i mek. Ivin di enjɛl dɛn ɛn mɔtalman fɔ dɔn dawt if dɛn fɔ lisin in wɔd. Bɔt Jiova de du wetin i se ɔltɛm; i nɔ de ɛva kɔmɔt biɛn in wɔd. (Sam 119:142) Pan ɔl we Adam ɛn Iv bin gɛt fridɔm fɔ disayd wetin dɛn want fɔ du, dɛn nɔ bin ebul fɔ avɔyd di pɔnishmɛnt we dɛn fɔ gɛt bikɔs dɛn pwɛl Jiova in lɔ. As tɛm de go, Adam ɛn Iv day ɛn dɛn go bak na di dɔti we Jiova tek mek dɛn.—Jɛnɛsis 3:19.

12. Wetin apin to Adam in pikin dɛn?

¹² We Adam ɛn Iv dɛn it di frut, Jiova nɔ gri lɛ dɛn de na in famili igen. I drɛb dɛn kɔmɔt na di gadin we bin de na Idɛn ɛn dɛn nɔ bin ɛva ebul fɔ kam de bak. (Jɛnɛsis 3:23, 24) Jiova mek dɛn gɛt di pɔnishmɛnt fɔ dɛn sin. (Rid Ditarɔnɔmi 32:4, 5.) Dis bin mek dɛn nɔ ebul falamakata Jiova in kwaliti dɛn pafɛkt wan. Adam nɔ bin gɛt op fɔ liv tumara bambay, ɛn i mek in pikin dɛnsɛf nɔ gɛt op. Na sin ɛn day nɔmɔ i gi in pikin dɛn, ɛn dɛn nɔ pafɛkt igen. (Lɛta Fɔ Rom 5:12) Adam bin mek dɛn nɔ gɛt di chans fɔ de sote go. Adam ɛn Iv nɔ bin ebul gɛt pafɛkt pikin, ɛn dɛn pikin dɛn nɔ go ebul gɛt pafɛkt pikin dɛn. Frɔm we Setan tɔn Adam ɛn Iv agens Gɔd, Setan dɔn de tray fɔ mek ɔlman du di sem tin.—Jɔn 8:44.

13. Wetin Jiova want fɔ mɔtalman dɛn?

¹³ Jiova stil lɛk mɔtalman. Ivin we Adam ɛn Iv bin lɛf am, i stil want mek mɔtalman dɛn gɛt tayt padi biznɛs wit am. Ɛn i nɔ bin want lɛ ɛnibɔdi day. (Pita In Sɛkɛn Lɛta 3:9, NW) So Gɔd mek arenjmɛnt kwik kwik wan so dat mɔtalman go bi in padi bak. Aw i go du dis ɛn stil nɔ kɔmɔt biɛn in wɔd? Mek wi si.

14. (a) Frɔm wetin Jɔn 3:16 tɔk, wetin Gɔd du fɔ pul mɔtalman pan sin ɛn day? (b) Us kwɛstyɔn wi kin tɔk bɔt we wi de tɔk wit pipul dɛn?

¹⁴ Rid Jɔn 3:16. Bɔku pipul dɛn we wi de invayt na di Mɛmorial no dis vas ɔfɛd. Bɔt aw Jizɔs in sakrifays mek am pɔsibul fɔ lɛ wi gɛt layf we go de sote go? Wi gɛt di chans fɔ ɛp pipul dɛn fɔ ɔndastand di ansa to dis kwɛstyɔn we wi invayt dɛn na di Mɛmorial, we wi de na di Mɛmorial wit dɛn, ɛn we wi go to dɛn bak leta. Di mɔ we dɛn ɔndastand di day we  Jizɔs day fɔ wi, na di mɔ dɛn go no aw Jiova lɛk mɔtalman ɛn aw i gɛt sɛns. Wetin-ɛn-wetin wi fɔ tɛl dɛn bɔt di day we Jizɔs day fɔ wi?

15. Aw Jizɔs bin difrɛn frɔm Adam?

¹⁵ Jiova fɛn wan pafɛkt man we go gi in layf fɔ mɔtalman. Da pafɛkt man de nɔ fɔ kɔmɔt biɛn Jiova. I fɔ rɛdi fɔ gi in layf fɔ mɔtalman. (Lɛta Fɔ Rom 5:17-19) Jiova sɛn in fɔs Pikin we na Jizɔs na dis wɔl. (Jɔn 1:14) So Jizɔs kam fɔ bi pafɛkt mɔtalman, jɔs lɛk Adam. Bɔt Jizɔs bin difrɛn frɔm Adam, i du wetin Jiova want fɔ mek pafɛkt pɔsin du. Ivin we siriɔs prɔblɛm dɛn bin de mit am, i nɔ ɛva pwɛl Gɔd in lɔ.

16. Wetin mek di day we Jizɔs day fɔ wi na fayn gift?

¹⁶ We Jizɔs day as pafɛkt mɔtalman, i ebul sev mɔtalman frɔm sin ɛn day. I du ɔl wetin Adam fɔ bin dɔn du. Jizɔs na bin pafɛkt man, i nɔ bin ɛva kɔmɔt biɛn Gɔd, ɛn i bin de du wetin Gɔd want ɔltɛm. (Fɔs Lɛta To Timoti 2:6) I day fɔ wi, ɛn in day gi man dɛn, uman dɛn, ɛn pikin dɛn di chans fɔ de sote go. (Matyu 20:28) Di day we i day na di men tin we go mek wetin Gɔd want bi.—Sɛkɛn Lɛta Fɔ Kɔrint 1:19, 20.

17. Di day we Jizɔs day fɔ wi, wetin i du fɔ wi?

¹⁷ Jiova bin mek Jizɔs day fɔ wi, pan ɔl we i nɔ bin izi fɔ Am. (Pita In Fɔs  Lɛta 1:19) Di valyu we Jiova valyu wi mek i sɛn in wangren Pikin fɔ kam day fɔ wi. (Jɔn In Fɔs Lɛta 4:9, 10) So Adam nɔto wi papa igen, na Jizɔs dɔn bi wi papa naw. (Fɔs Lɛta Fɔ Kɔrint 15:45) Jizɔs nɔ jɔs mek am pɔsibul fɔ mek wi gɛt layf sote go, bɔt i mek we bak fɔ mek wi jɔyn Jiova in famili wande. Di day we Jizɔs day fɔ wi go mek mɔtalman pafɛkt, ɛn Jiova go alaw dɛn fɔ jɔyn in famili bak ɛn nɔ stil pwɛl in yon lɔ dɛn. Tink bɔt aw i go rili fayn we ɔl di wan dɛn we nɔ kɔmɔt biɛn Jiova go pafɛkt! Ɛn ɔl di wan dɛn we de na ɛvin ɛn na dis wɔl go de togɛda as wan famili. Wi ɔl go bi Gɔd in pikin dɛn.—Lɛta Fɔ Rom 8:21.

18. Ustɛm Jiova go bi ɔltin to ɔlman?

¹⁸ Pan ɔI we wi fɔs mama ɛn papa lɛf Jiova, Jiova stil lɛk wi, ɛn i sɛn in Pikin fɔ kam day fɔ wi. Ivin we wi nɔ pafɛkt, Setan nɔ ebul mek wi kɔmɔt biɛn Jiova. Di day we Jizɔs day fɔ wi, go mek Jiova ɛp wi fɔ du wetin rayt. Tink bɔt aw layf go tan lɛk we ɔlman “we no in Pikin ɛn biliv pan am” go gɛt layf we go de sote go! (Jɔn 6:40) Wi Papa we lɛk wi ɛn we gɛt sɛns go du wetin i want fɔ du, ɛn i go ɛp mɔtalman fɔ pafɛkt. Jiova go “de oba dɛn ɔl,” ɛn bi ɔltin to ɔlman.—Fɔs Lɛta Fɔ Kɔrint 15:28.

19. (a) Wetin wi fɔ du fɔ sho se wi gladi fɔ di day we Jizɔs day fɔ wi? (Luk di bɔks we se “ Mek Wi Kɔntinyu fɔ ‘Fɛn Pɔsin’ We Want fɔ No Mɔ.”) (b) Wetin wi go tɔk bɔt na di nɛks atikul?

¹⁹ Fɔ sho se wi gladi fɔ di day we Jizɔs day fɔ wi, wi fɔ tɛl ɔda pipul dɛn bɔt dis gift we wi nɔn nɔ ebul pe fɔ. Pipul dɛn gɛt fɔ no se na di day we Jizɔs day fɔ wi na in Jiova de yuz fɔ gi ɔlman di chans fɔ de sote go. Bɔt nɔto dis nɔmɔ Jizɔs in day du fɔ wi. I sɔlv di prɔblɛm we Setan bigin na di gadin we bin de na Idɛn. Mek wi si aw i du dis na di nɛks atikul.