1, 2. (a) Aw Jiova Witnɛs dɛn difrɛn frɔm ɔda rilijɔn dɛn? (b) Wetin wi go lan na dis atikul ɛn di nɛks wan?

BƆKU tɛm pipul dɛn kin aks Jiova Witnɛs dɛn se, “Udat na una lida?” Dɛn kin aks dis kwɛstyɔn bikɔs bɔku rilijɔn dɛn gɛt man ɔ uman we na dɛn lida. Bɔt wi gladi fɔ se wi Lida nɔto mɔtalman we de sin. Wi Lida na Jizɔs Krays! Ɛn i de obe Jiova we na in Papa ɛn Lida.—Matyu 23:10.

² Wan grup de we dɛn de kɔl “di slev we fetful ɛn gɛt sɛns.” Na dis grup de bifo Gɔd in pipul dɛn we de na di wɔl tide. (Matyu 24:45, NW) Bɔt aw wi rili no se na Jiova de yuz in pikin fɔ lid wi? Wi go si tri rizin dɛn we mek wi shɔ se na Jiova de yuz in pikin fɔ lid wi. Ivin we Jiova dɔn de yuz sɔm mɔtalman dɛn fɔ lid in pipul dɛn, wi go si klia wan se na Jiova bin de lid in pipul dɛn trade ɛn na in stil de lid dɛn tide.—Ayzaya 58:11.

3. Wetin ɛp Mozis fɔ lid di Izrɛlayt dɛn?

³ Oli spirit bin ɛp di wan dɛn we Gɔd bin pik. Gɔd bin pik Mozis fɔ lid di Izrɛlayt dɛn. Wetin ɛp am fɔ du dis impɔtant wok? Jiova gi Mozis “in oli Spirit.” (Rid  Ayzaya 63:11-14.) So na Jiova bin de rili lid in pipul dɛn, bikɔs na in spirit bin de ɛp Mozis.

4. Wetin sho se Mozis bin gɛt Gɔd in spirit? (Luk di pikchɔ nia dis atikul in taytul.)

⁴ Yu tink se pipul dɛn bin de si se Mozis gɛt Gɔd in spirit? Yɛs! Jiova in oli spirit bin mek Mozis ebul fɔ pafɔm mirekul dɛn ɛn mek Fɛro, we na di rula na Ijipt, sabi Jiova in nem. (Ɛksodɔs 7:1-3) Di oli spirit bin ɛp Mozis bak fɔ bi lida we gud ɛn we gɛt peshɛnt. I bin rili difrɛn frɔm dɛn bad lida dɛn we bin de na ɔda kɔntri dɛn, we bin jɔs de tink bɔt dɛnsɛf! (Ɛksodɔs 5:2, 6-9) So wi dɔn si klia wan se na Jiova bin pik Mozis fɔ bi lida fɔ In pipul dɛn.

5. Udat dɛn bak Jiova bin gi oli spirit fɔ lid in pipul dɛn?

⁵ Udat dɛn bak Jiova bin gi oli spirit fɔ lid in pipul dɛn? Di Baybul se Gɔd in spirit bin mek “Jɔshwa we na Nɔn in pikin, . . . gɛt plɛnti sɛns.” (Ditarɔnɔmi 34:9) “PAPA GƆD [“Jiova,” NW] in spirit kam pan Gidiɔn.” (Di Jɔj Dɛm 6:34) Ɛn “PAPA GƆD [“Jiova,” NW] in spirit fɔdɔm gud gud wan pan Devid.” (Fɔs Samiɛl 16:13) Dɛn ɔl bin abop pan Gɔd in spirit fɔ ɛp dɛn fɔ du tin dɛn we dɛnsɛf nɔ bin ebul fɔ du. (Jɔshwa 11:16, 17; Di Jɔj Dɛm 7:7, 22; Fɔs Samiɛl 17:37, 50) Wi dɔn si klia wan se na Jiova bin de gi dɛn di pawa fɔ du dɛn wɔndaful tin dɛn de, so na in nɔmɔ dɛn fɔ prez.

6. Wetin mek Gɔd bin want lɛ in pipul dɛn rɛspɛkt di lida dɛn na Izrɛl?

⁶ Wetin di Izrɛlayt dɛn bin fɔ dɔn du we dɛn si se Gɔd in oli spirit de ɛp Mozis, Jɔshwa, Gidiɔn, ɛn Devid? Dɛn bin fɔ dɔn rɛspɛkt dɛn. We di pipul dɛn bin de grɔmbul pan Mozis, notis wetin Gɔd bin se: “Dɛn pipul ya jɛs de trit mi ɛniaw.” (Di Nɔmba Dɛm 14:2, 11) Wi dɔn si klia wan se na Jiova bin pik dɛn man dɛn ya fɔ lid di Izrɛlayt dɛn. We di pipul dɛn bin de obe dɛn man ya, dɛn bin de fala Jiova we na dɛn Lida.

7. Aw di enjɛl dɛn bin de ɛp Mozis?

⁷ Enjɛl dɛn bin de ɛp di wan dɛn we Gɔd bin dɔn pik. (Rid Di Ibru Pipul Dɛn 1:7, 14.) Gɔd bin yuz enjɛl dɛn fɔ sho Mozis wetin fɔ du. Fɔs, wan enjɛl bin “go mit Mozis na di faya we bin de kɔmɔt pan di smɔl tik,” ɛn i gi am di wok fɔ go fri di Izrɛlayt dɛn ɛn lid dɛn. (Di Apɔsul Dɛn Wok [Akt] 7:35) Sɛkɔn, Gɔd yuz enjɛl dɛn fɔ gi Mozis di Lɔ so dat i go tich di Izrɛlayt dɛn. (Lɛta Fɔ Galeshya 3:19) Tɔd, Jiova tɛl am se: “Lɛ i lid di pipul dɛn go na di ples we i dɔn tɛl am fɔ go. I se in enjɛl go de bifo am.” (Ɛksodɔs 32:34) Di Baybul  nɔ tɔk se di Izrɛlayt dɛn bin si wan enjɛl de du dat. Bɔt frɔm di we aw Mozis bin de tich ɛn gayd di pipul dɛn, dis sho klia wan se enjɛl dɛn bin de ɛp am.

8. Aw enjɛl dɛn bin ɛp Jɔshwa ɛn Ɛzikaya?

⁸ Udat dɛn bak di enjɛl dɛn bin ɛp? Di Baybul se wan enjɛl we na “di kɔmanda” fɔ Jiova in ami bin ɛp Jɔshwa fɔ win di Kenanayt dɛn pan wan fɛt. (Jɔshwa 5:13-15; 6:2, 21) Leta, we Kiŋ Ɛzikaya bin de lid Gɔd in pipul dɛn, di bɔku bɔku sojaman dɛn we di Asirian dɛn bin gɛt bin want fɔ dɔnawe wit Jerusɛlɛm. Bɔt insay wan nɛt, Jiova “in enjɛl go na di Asirian dɛn kamp ɛn kil wan ɔndrɛd ɛn eti-fayv tawzin man dɛn.”—Sɛkɛn Kiŋ 19:35.

9. Pan ɔl we di wan dɛn we Gɔd bin pik nɔ pafɛkt, wetin di Izrɛlayt dɛn fɔ dɔn du?

⁹ Di enjɛl dɛn pafɛkt. Bɔt di man dɛn we dɛn bin de ɛp nɔ pafɛkt. Fɔ ɛgzampul, wan tɛm Mozis nɔ bin ɔnɔ Jiova. (Di Nɔmba Dɛm 20:12) Jɔshwa nɔ bin aks Gɔd wetin fɔ du we di Gibyɔnayt dɛn bin want fɔ mek arenjmɛnt wit am. (Jɔshwa 9:14, 15) Wan tɛm, Ɛzikaya nɔ bin put insɛf dɔŋ. (Sɛkɛn Kronikul 32:25, 26) Pan ɔl we dɛn man ya nɔ pafɛkt, di Izrɛlayt dɛn fɔ du wetin dɛn lida dɛn ya de tɛl dɛn. Di Izrɛlayt dɛn bin de si se Jiova de yuz di enjɛl dɛn fɔ sɔpɔt dɛn man dɛn ya. So wi dɔn si klia wan se na Jiova bin de lid in pipul dɛn.

10. Aw Gɔd in Lɔ bin de gayd Mozis?

¹⁰ Gɔd in Wɔd bin de gayd di wan dɛn we Gɔd dɔn pik. Insay di Baybul, dɛn kɔl di Lɔ we dɛn gi di Izrɛlayt dɛn “di lɔ we Mozis gi.” (Fɔs Kiŋ 2:3) Bɔt di Baybul sho klia wan se na Jiova gi di Izrɛlayt dɛn di Lɔ. Ɛn Mozis insɛf fɔ obe di Lɔ. (Sɛkɛn Kronikul 34:14) Fɔ ɛgzampul, afta we Jiova bin dɔn tɛl Mozis aw fɔ bil di tabanakul, “Mozis du ɔl wetin PAPA GƆD [“Jiova,” NW] tɛl am fɔ du.”—Ɛksodɔs 40:1-16.

11, 12. (a) Wetin Jɔshwa ɛn di kiŋ dɛn we bin de rul Gɔd in pipul dɛn fɔ du? (b) Aw Gɔd in Wɔd bin de gayd di man dɛn we bin de lid di pipul dɛn?

¹¹ Jɔshwa bin gɛt smɔl pat pan Gɔd in Wɔd we i bin de lid di pipul dɛn, ɛn Jiova tɛl am se: ‘I fɔ de rid am de ɛn nɛt, so dat i go no wetin de de ɛn ebul du ɔl wetin di lɔ se.’ (Jɔshwa 1:8) Di kiŋ dɛn we go kam leta dɛnsɛf nid fɔ rid di Lɔ ɛvride, rayt am fɔ dɛnsɛf, ɛn obe ‘ɔl wetin i se.’—Rid Ditarɔnɔmi 17:18-20.

¹² Aw Gɔd in Wɔd bin de gayd di man dɛn we bin de lid di Izrɛlayt dɛn? Tink bɔt Kiŋ Josaya in ɛgzampul. Afta we dɛn bin dɔn fɛn di Lɔ we Gɔd bin gi Mozis, Kiŋ Josaya in sɛktri bigin fɔ rid di Lɔ to am. * (Rid di futnot.) “We di kiŋ yɛri wetin rayt na di Buk, i chɛr chɛr in klos.” Gɔd in Wɔd bin mek Josaya dɔnawe wit ɔl di aydɔl dɛn na di land ɛn arenj fɔ mek dɛn gɛt wan big big Pasova we dɛn nɔ wande mek. (Sɛkɛn Kiŋ 22:11; 23:1-23) Bikɔs Josaya ɛn ɔda fetful lida dɛn bin de du wetin Gɔd in Wɔd se, dɛn bin rɛdi fɔ ajɔst di tin dɛn we dɛn de tɛl Gɔd in  pipul dɛn fɔ du. Ɛn dat bin ɛp in pipul dɛn fɔ obe Gɔd.

13. Aw di wan dɛn we bin de lid Gɔd in pipul dɛn bin difrɛn frɔm di lida dɛn na ɔda neshɔn dɛn?

¹³ Di lida dɛn na ɔda neshɔn dɛn bin de fala mɔtalman sɛns we nɔ bɛtɛ. Fɔ ɛgzampul, di Kenanayt lida dɛn ɛn dɛn pipul dɛn bin du bad bad tin dɛn. Dɛn bin de du mami ɛn dadi biznɛs wit dɛn fambul dɛn, wit dɛn kɔmpin man ɔ uman dɛn, ɛn wit animal dɛn. Dɔn dɛn bin de sakrifays dɛn pikin dɛn ɛn wɔship aydɔl. (Lɛvitikɔs 18:6, 21-25) Di Babilonian ɛn di Ijipshian lida dɛn nɔ bin gɛt di sem lɔ dɛn we Gɔd in pipul dɛn gɛt fɔ klin dɛnsɛf. (Di Nɔmba Dɛm 19:13) Bɔt Gɔd in pipul dɛn bin de si aw dɛn fetful lida dɛn bin de ɛnkɔrej dɛn fɔ kɔntinyu fɔ wɔship Gɔd klin wan, fɔ klin dɛn bɔdi dɛn, ɛn nɔ fɔ du mami ɛn dadi biznɛs di we we Gɔd nɔ want. Dis sho klia wan se na Jiova bin de lid dɛn.

14. Wetin mek Jiova bin kɔrɛkt sɔm lida dɛn?

¹⁴ Nɔto ɔl di kiŋ dɛn we bin de lid Gɔd in pipul dɛn bin de du wetin Gɔd bin de tɛl dɛn. Dɛn trangayes kiŋ dɛn de nɔ bin gri fɔ alaw Gɔd in oli spirit, in enjɛl dɛn, ɛn in Wɔd fɔ gayd dɛn. Sɔntɛnde, Jiova kin kɔrɛkt ɔ pul di lida kɔmɔt ɛn put ɔda wan de. (Fɔs Samiɛl 13:13, 14) Leta, Jiova bin pik sɔmbɔdi we go bi pafɛkt lida fɔ in pipul dɛn.

15. (a) Aw di prɔfɛt dɛn bin sho se wan pafɛkt lida gɛt fɔ kam? (b) Udat na dis pafɛkt lida?

¹⁵ Fɔ lɔng lɔng tɛm, Jiova dɔn prɔmis se i go pik wan pafɛkt lida fɔ in pipul dɛn. Fɔ ɛgzampul, Mozis bin tɛl di Izrɛlayt dɛn se Jiova “go mek wan pan dɛn bi prɔfɛt, ɛn dɛn fɔ lisin to am ɛn du ɔl wetin i go tɛl dɛn fɔ du.” (Ditarɔnɔmi 18:15) Ayzaya bin tɔk se da pɔsin de go bi “lida ɛn kɔmanda.” (Ayzaya 55:4) Ɛn Daniɛl bin rayt se di Mɛsaya go bi “di Lida.” (Daniɛl 9:25, NW) Leta Jizɔs Krays sho se na in na di “Lida” fɔ Gɔd in pipul dɛn. (Rid Matyu 23:10, NW.) Jizɔs in disaypul dɛn bin rɛdi fɔ fala am, ɛn dɛn bin biliv se in na di wan we Jiova dɔn pik. (Jɔn 6:68, 69) Wetin mek Jizɔs Krays in disaypul dɛn bin biliv se na in Jiova go yuz fɔ lid in pipul dɛn?

16. Wetin pruf se na di oli spirit bin de ɛp Jizɔs?

¹⁶ Oli spirit bin ɛp Jizɔs. We Jizɔs bin de baptayz, Jɔn bin si “di klawd opin ɛn i si Gɔd in Spirit de kam dɔŋ te i kam pan am.” Jɔs afta dat “Gɔd in Spirit mek Jizɔs go na di dɛzat wantɛm.” (Mak 1:10-12) Di tɛm we Jizɔs bin de prich na dis wɔl, Gɔd in spirit bin de ɛp am fɔ prich ɛn fɔ du bɔku wɔndaful tin dɛn. (Di Apɔsul Dɛn Wok [Akt] 10:38) Dɔn, di oli spirit bin de ɛp Jizɔs fɔ sho lɔv, fɔ gladi, ɛn fɔ gɛt strɔng fet. (Jɔn 15:9; Di Ibru Pipul Dɛn 12:2) No ɔda lida nɔ de we bin gɛt  dɛn pruf ya fɔ sho se i gɛt Gɔd in oli spirit. So wi dɔn si klia wan se na Jiova bin pik Jizɔs fɔ bi lida.

17. Wetin enjɛl dɛn bin du fɔ ɛp Jizɔs?

¹⁷ Enjɛl dɛn bin ɛp Jizɔs. Jɔs afta we Jizɔs baptayz, “enjɛl dɛn kam ɛp Jizɔs.” (Matyu 4:11) Smɔl tɛm bifo Jizɔs day, “wan enjɛl kɔmɔt na ɛvin kam mit Jizɔs fɔ kɔrej am.” (Lyuk 22:43) Jizɔs bin no se Jiova go sɛn in enjɛl dɛn fɔ ɛp am ɛnitɛm we i nid dɛn.—Matyu 26:53.

18, 19. Aw Gɔd in Wɔd bin de gayd Jizɔs ɛn di we aw i bin de tich?

¹⁸ Gɔd in Wɔd bin gayd Jizɔs. Frɔm di tɛm we Jizɔs bigin fɔ prich te i day na di stik, i bin de du wetin di Skripchɔ dɛn se. Ivin we i bin de day, i bin tɔk bɔt sɔm tin dɛn we di Baybul bin tɔk bɔt di Mɛsaya. (Matyu 4:4; 27:46; Lyuk 23:46) Bɔt di edman dɛn pan Gɔd biznɛs da tɛm de bin difrɛn frɔm Jizɔs. Dɛn kin disayd nɔ fɔ fala Gɔd in Wɔd ɛnitɛm we i nɔ gri wit wetin dɛn de tich. We Jizɔs bin de tɔk bɔt dɛn pipul ya, i bin kot na Gɔd in Wɔd se: “Dɛn pipul ya de rɛspɛkt mi wit dɛn mɔt, bɔt dɛn nɔ want du wetin a tɛl dɛn fɔ du, bikɔs dɛn at nɔ de fɔ mi. Di pre we dɛn de pre to mi nɔ min natin, bikɔs dɛn de lan pipul dɛn lɔ we nɔto mi yon.” (Matyu 15:7-9) Jiova nɔ go ɛva pik pipul dɛn we nɔ de du wetin in Wɔd se fɔ lid in pipul dɛn.

¹⁹ Jizɔs bin de yuz Gɔd in Wɔd bak we i bin de tich ɔda pipul dɛn. We di edman dɛn pan Gɔd biznɛs bin de  chalenj Jizɔs, i nɔ bin de yuz in yon sɛns ɛn wetin i sabi fɔ ansa dɛn. Bifo dat, i bin de tich pipul dɛn frɔm Gɔd in Wɔd. (Matyu 22:33-40) Jizɔs bin fɔ dɔn mek pipul dɛn kɔle am bay we i de tɛl dɛn plɛnti tin dɛn bɔt in layf na ɛvin ɔ di we aw dɛn mek di wan ol wɔl. Bɔt bikɔs i bin lɛk Gɔd in Wɔd, i bin rili want fɔ tɛl ɔda pipul dɛn bɔt am, ɛn i “opin dɛn ed fɔ mek dɛn ɔndastand wetin dɛn rayt na Gɔd in Buk.”—Lyuk 24:32, 45.

20. (a) Aw Jizɔs bin ɔnɔ Jiova? (b) Aw di we we Jizɔs biev bin difrɛn frɔm Ɛrɔd Agripa Wan?

²⁰ Pan ɔl we di pipul dɛn we bin de lisin to Jizɔs bin de kɔle di we aw i bin de tɔk, na Jiova we na in Ticha i bin de gi di ɔnɔ ɔltɛm. (Lyuk 4:22) We wan jɛntriman bin tɔk se Jizɔs na ‘ticha we gud,’ Jizɔs bin put insɛf dɔŋ ɛn se: “Wetin du yu se a gud? Nɔbɔdi nɔ de we gud, na Gɔd in wangren gud.” (Mak 10:17, 18) Bɔt leta afta et ia, Ɛrɔd Agripa Wan bin bi di lida fɔ Judia. Di we aw i bin de biev bin rili difrɛn frɔm Jizɔs. Wan de we dɛn bin gɛt wan spɛshal mitin, Ɛrɔd bin wɛr fayn fayn klos we kiŋ dɛn de wɛr ɛn we rili dia. We di pipul dɛn si am ɛn yɛri wetin i de se, dɛn bigin fɔ ala se: “I nɔ de tɔk lɛkɛ mɔtalman, i de tɔk lɛkɛ wan gɔd!” Ɛrɔd na pɔsin we lɛk fɔ lɛ dɛn de prez am. Bɔt wetin bin apin? Wantɛm wantɛm Jiova “in enjɛl kam put sik pan Ɛrɔd bikɔs i nɔ rɛspɛkt Gɔd; wɔrɔm it in bɔdi ɛn i day.” (Di Apɔsul Dɛn Wok [Akt] 12:21-23) Dis sho klia wan se Jiova nɔ bin pik am fɔ bi lida. Bɔt Jizɔs bin pruv se na Gɔd dɔn pik am, ɛn i bin de ɔnɔ Jiova ɔltɛm as di Lida we de pantap ɔlman we de lid in pipul dɛn.

21. Wetin wi go tɔk bɔt na di nɛks atikul?

²¹ Jiova nɔ bin want mek Jizɔs bi Lida fɔ jɔs smɔl tɛm. Afta we Jizɔs bin gɛt layf bak, i bin tɛl in disaypul dɛn se: “Gɔd dɔn gi mi ɔl di pawa fɔ rul na ɛvin ɛn dis wɔl.” I kɔntinyu fɔ tɔk se: “A go de wit una ɔltɛm sote di wɔl dɔn.” (Matyu 28:18-20) Bɔt aw Jizɔs go lid Gɔd in pipul dɛn na dis wɔl we in na spirit pɔsin na ɛvin? Udat Jiova go yuz fɔ tinap fɔ Jizɔs na dis wɔl? Ɛn aw Kristian dɛn go no udat Gɔd dɔn pik? Di nɛks atikul go ansa dɛn kwɛstyɔn dɛn ya.