1. Us gud tin Jizɔs in day wan du fɔ wi?

DI DAY we Jizɔs day mek am pɔsibul fɔ mek wi gɛt bɔku blɛsin dɛn. Fɔ ɛgzampul, di day we Jizɔs day mek we fɔ lɛ Adam in pikin dɛn we lɛk fɔ du wetin rayt jɔyn Gɔd in famili. Wan ɔda blɛsin na dat wi go gɛt layf sote go wit gladi at. Apat frɔm dat, Jizɔs in day gɛt sɔntin fɔ du wit tin dɛn we rili impɔtant to ɔlman na ɛvin ɛn na dis wɔl.—Di Ibru Pipul Dɛn 1:8, 9.

2. (a) Us impɔtant tin dɛn na ɛvin ɛn dis wɔl we Jizɔs bin tɔk bɔt insay in prea? (Luk di pikchɔ nia dis atikul in taytul.) (b) Wetin wi go tɔk bɔt insay dis atikul?

² Tu ia bifo Jizɔs day, i tɛl in disaypul dɛn fɔ pre se: “Wi Papa we de na ɛvin, mek ɔlman ɔnɔ yu nem. Lɛ yu Kiŋdɔm kam. Mek wetin yu want, bi na di wɔl lɛk aw yu want am na ɛvin.” (Matyu 6:9, 10, NW) Lɛ wi tɔk bɔt aw di day we Jizɔs day fɔ wi gɛt sɔntin fɔ du wit di ɔnɔ we wi fɔ ɔnɔ Jiova in nem, di we aw Gɔd in Kiŋdɔm go rul, ɛn wetin Gɔd want.

3. Wetin Jiova in nem tinap fɔ? Aw Setan briŋ badnem pan Jiova?

³ Fɔs, Jizɔs bin pre fɔ mek ɔlman ɔnɔ Jiova in nem, ɔ tek am as sɔntin we oli. Jiova in nem tinap fɔ Jiova insɛf sɛf, ɛn i de sho udat i bi. I gɛt pawa ɛn i de du wetin rayt pas ɔlman na di wan ol wɔl. Jizɔs in bak bin kɔl am Papa we “nɔ gɛt natin fɔ du wit sin.” (Jɔn 17:11) Bikɔs Jiova nɔ gɛt natin fɔ du wit sin, ɔltin we i de du ɛn ɛni lɔ dɛn we i mek oli. Bɔt na di gadin we bin de na Idɛn, Setan bin yuz kɔni we fɔ aks Iv if Gɔd gɛt rayt fɔ tɛl mɔtalman wetin fɔ du. I bin lay pan Jiova ɛn briŋ badnem pan am.—Jɛnɛsis 3:1-5.

4. Aw Jizɔs bin ɔnɔ Gɔd in nem?

⁴ Bɔt Jizɔs in bin rili lɛk Jiova in nem, ɛn i bin du ɔl wetin i ebul fɔ ɔnɔ Gɔd in nem. (Jɔn 17:25, 26) Aw i bin du dat? Na bay di we aw i bin de biev ɛn wetin i bin de tich. Jizɔs bin ɛp pipul dɛn fɔ si se Jiova in lɔ ɔ advays dɛn nɔ gɛt wan bɔt ɛn ɔl wetin i de tɛl wi fɔ du na fɔ wi yon bɛtɛ wan. (Rid Sam 40:8-10.) Pan ɔl we Setan bin mek i sɔfa bad bad wan ɛn day, Jizɔs bin kɔntinyu fɔ de biɛn Jiova. Jizɔs bin sho se i pɔsibul fɔ lɛ pafɛkt pɔsin obe Jiova wit ɔl in at.

5. Aw wi go ɔnɔ Jiova in nem?

⁵ Aw wi go sho se wi lɛk Jiova in nem? Na bay di we aw wi de biev. Jiova want wi fɔ oli. (Rid Pita In Fɔs Lɛta 1:15, 16.) Dis min se na in nɔmɔ wi fɔ wɔship ɛn obe wit ɔl wi at. Ivin we dɛn de mek wi sɔfa, wi de du ɔl wetin wi ebul fɔ liv wi layf di we aw Jiova de tich wi. We wi de du wetin Jiova tɛl wi, wi de briŋ prez to in nem. (Matyu 5:14-16) Wi de sho se Jiova in lɔ dɛn gud fɔ wi ɛn Setan na layman. Bikɔs wi nɔ pafɛkt, wi go mek mistek. Bɔt we wi mek mistek, wi de chenj ɛn du ɔl wetin wi ebul fɔ stɔp fɔ du di tin dɛn we de briŋ badnem pan Jiova.—Sam 79:9.

6. Wetin mek Jiova de si wi as pipul dɛn we de du wetin rayt pan ɔl we wi nɔ pafɛkt?

⁶ Ilɛksɛf wi na anɔyntɛd ɔ wi na wan pan di “ɔda ship” dɛn, Jiova de fɔgiv wi sin dɛn if wi sho se wi gɛt fet pan di day we Jizɔs day fɔ wi. Na di wan dɛn we dɔn gi dɛn layf to am i de tek as in savant dɛn we de wɔship am. I kɔl di anɔyntɛd Kristian dɛn as in pikin dɛn we de du wetin rayt ɛn di “ɔda ship” as in padi dɛn we de du wetin rayt. (Jɔn 10:16; Lɛta Fɔ Rom 5:1, 2; Jems 2:21-25) So, ivin naw, di day we Jizɔs day fɔ wi dɔn mek am pɔsibul fɔ lɛ wi gɛt tayt padi biznɛs wit wi Papa ɛn ɔnɔ in nem.

7. Us blɛsin dɛn Jizɔs in day go mek wi gɛt?

⁷ We Jizɔs bin de sho wi aw fɔ pre, i bin se: “Lɛ yu Kiŋdɔm kam.” Aw Jizɔs in day gɛt sɔntin fɔ du wit Gɔd in Kiŋdɔm? Na Jizɔs ɛn 144,000 mɔtalman dɛn we Jiova pik na dis wɔl mekɔp Gɔd in Kiŋdɔm ɔ gɔvmɛnt. Na Jizɔs in day mek am pɔsibul fɔ lɛ dɛn mɔtalman ya gɛt layf bak fɔ go de na ɛvin. (Rɛvɛleshɔn 5:9, 10; 14:1) Dɛn go bi kiŋ ɛn prist dɛn ɛn dɛn go rul di wɔl wit Jizɔs fɔ wan tawzin ia. Insay da tɛm de, Jiova go yuz di Kiŋdɔm fɔ tɔn di wan ol wɔl to Paradays ɛn ɛp ɔlman fɔ pafɛkt. Jiova in savant dɛn na ɛvin ɛn  dis wɔl go bi wan famili. (Rɛvɛleshɔn 5:13; 20:6) Jizɔs go dɔnawe wit Setan ɛn pul ɔl di prɔblɛm dɛn we i dɔn bring kam.—Jɛnɛsis 3:15.

8. (a) Aw Jizɔs bin ɛp in disaypul dɛn fɔ ɔndastand se Gɔd in Kiŋdɔm impɔtant? (b) Aw wi go sɔpɔt di Kiŋdɔm tide?

⁸ Jizɔs bin ɛp in disaypul dɛn fɔ ɔndastand se Gɔd in Kiŋdɔm impɔtant. Aw i bin du dat? Jɔs afta i baptayz, i bigin fɔ prich di “gud nyus bɔt Gɔd in Kiŋdɔm” ɛnisay we i go. (Lyuk 4:43, NW) I tɛl in disaypul dɛn bak fɔ prich bɔt am “ɔlɔbɔt na [di] wɔl.” (Di Apɔsul Dɛn Wok [Akt] 1:6-8) Tide, di prichin wok de gi pipul dɛn di chans fɔ lan bɔt Jizɔs in day ɛn kam ɔnda Gɔd in Kiŋdɔm. Wi go sho se wi de sɔpɔt di Kiŋdɔm we wi de ɛp di anɔyntɛd dɛn fɔ prich ɔlsay na di wɔl.—Matyu 24:14; 25:40.

9. Wetin mek wi fɔ biliv se Jiova go du wetin i want fɔ mɔtalman?

⁹ Wetin Jizɔs bin min we i tɔk bak se: “Mek wetin yu want, bi”? Ɛnitɛm we Jiova se sɔntin go apin, i go apin. (Ayzaya 55:11) Di tɔn we Setan tɔn in bak pan Jiova nɔ go stɔp Am fɔ du wetin i want. Wetin Jiova bin want fɔ di wɔl? I bin want mek Adam ɛn Iv fulɔp di wɔl wit dɛn pafɛkt pikin dɛn. (Jɛnɛsis 1:28) If Adam ɛn Iv bin day we dɛn nɔ bɔn pikin dɛn, di fulɔp we Gɔd bin want mek dɛn fulɔp di wɔl wit dɛn pikin dɛn nɔ fɔ dɔn bi. Na dat mek Jiova bin alaw dɛn fɔ bɔn pikin dɛn. Jizɔs in day mek ɔl di wan dɛn we de sho se dɛn gɛt fet pan am gɛt di chans fɔ bi pafɛkt ɛn gɛt layf sote go. Jiova lɛk mɔtalman dɛn ɛn i want wi fɔ ɛnjɔy di wɔndaful layf we i want fɔ wi.

10. Aw Jizɔs in day go bɛnifit di wan dɛn we dɔn day?

¹⁰ Wetin wi go se bɔt di bɔku bɔku pipul dɛn we dɔn day ɛn we nɔ ɛva gɛt di chans fɔ no Jiova? Jiova want lɛ pipul dɛn liv. So i go gi layf bak to di wan dɛn we dɔn day. Na Jizɔs in day mek am pɔsibul fɔ mek dɛn gɛt layf bak. Dɔn dɛn go ebul fɔ lan bɔt Jiova ɛn de sote go. (Di Apɔsul Dɛn Wok [Akt] 24:15) Na Jiova de gi layf. I go bi Papa to ɔl di wan dɛn we dɔn day, we i gi dɛn layf bak. (Sam 36:9) We Jizɔs bin de tich in disaypul dɛn fɔ pre, i bin se “wi Papa we de na ɛvin.” (Matyu 6:9, NW) Jiova dɔn gi Jizɔs di impɔtant wok fɔ gi layf bak to di wan dɛn we dɔn day. Jizɔs bin se: “Na mi de mek pipul rayz frɔm dɛn grev ɛn na mi de gi dɛn layf.”—Jɔn 6:40, 44; 11:25.

11. Wetin Gɔd want fɔ di “bɔku bɔku pipul” dɛn we pɔsin nɔ ebul kɔnt?

¹¹ Jizɔs bin tɔk bak se: “Ɛnibɔdi we du wetin Gɔd want, na da pɔsin de na mi brɔda, mi sista ɛn mi mama.” (Mak 3:35) Gɔd want mek pipul dɛn we de tɔk difrɛn langwej na ɔl di neshɔn ɛn trayb dɛn fɔ wɔship am. Di Baybul kɔl dɛn di “bɔku bɔku pipul we pɔsin nɔ ebul kɔnt.” Dɛn gɛt fet pan di day we Jizɔs day ɛn dɛn want fɔ obe Gɔd. Dɛn de prez am ɛn tɔk se: “Na Gɔd we sidɔm na di ay chia ɛn di Ship dɔn sev wi!”—Rɛvɛleshɔn 7:9, 10.

12. Frɔm Jizɔs in prea, wetin wi lan bɔt wetin Jiova want fɔ mɔtalman?

 ¹² Frɔm Jizɔs in prea, wi dɔn lan bɔku tin bɔt Jiova ɛn wetin i want fɔ mɔtalman. Fɔs, wi fɔ du ɔl wetin wi ebul fɔ ɔnɔ Jiova in nem ɛn nɔ bring badnem pan am. (Ayzaya 8:13) Jizɔs in day we go mek wi sev, de ɔnɔ Gɔd in nem. Infakt, di nem Jizɔs min “Na Jiova de sev.” Sɛkɔn, Jiova go yuz in Kiŋdɔm fɔ bring ɔl di bɛnifit dɛn we Jizɔs in day wan kam wit to mɔtalman dɛn we de obe am. Ɛn tɔd, wi biliv se natin nɔ go stɔp Jiova fɔ mek i nɔ du wetin i want.—Sam 135:6; Ayzaya 46:9, 10.

13. Wetin mek wi de baptayz?

¹³ Wan impɔtant we we wi go sho se wi gladi fɔ di day we Jizɔs day fɔ wi na we wi pre ɛn gi wi layf to Jiova ɛn baptayz. We wi du so, wi de sho se wi gɛt fet pan Jizɔs in day ɛn “wi na Jiova in yon.” (Lɛta Fɔ Rom 14:8, NW) We wi baptayz, wi de aks Jiova fɔ gi wi “gud kɔnshɛns.” (Pita In Fɔs Lɛta 3:21, NW) Jiova de ansa wi prea bay we i de mek wi bɛnifit frɔm Jizɔs in day. Ɛn wi rili biliv se i go gi wi ɔl wetin i dɔn prɔmis.—Lɛta Fɔ Rom 8:32.

14. Wetin mek Jiova tɛl wi fɔ lɛk ɔda pipul dɛn?

¹⁴ Na di lɔv we Jiova gɛt de mek i du ɛnitin. I want mek ɔl di wan dɛn we de wɔship am fɔ falamakata am ɛn lɛk dɛnsɛf. (Jɔn In Fɔs Lɛta 4:8-11) We wi lɛk pipul dɛn, wi de sho klia wan se wi want fɔ bi wi “Papa, we de na ɛvin, in pikin dɛn.” (Matyu 5:43-48) Di tu lɔ dɛn we pas ɔl na, wan, wi fɔ lɛk Jiova, ɛn tu, wi fɔ lɛk ɔda pipul dɛn. (Matyu 22:37-40) Wan we aw wi de sho se wi lɛk ɔda pipul dɛn na we wi de tich dɛn di gud nyus bɔt Gɔd in Kiŋdɔm. If wi lɛk ɔda pipul dɛn, mɔ wi brɔda dɛn, lɛk aw Jiova tɛl wi fɔ du, wi go lɛk am “mɔ ɛn mɔ.”—Jɔn In Fɔs Lɛta 4:12, 20.

15. (a) Us blɛsin dɛn Jiova de gi wi naw? (b) Us blɛsin dɛn wi go gɛt tumara bambay?

¹⁵ Jiova mek wi no se bikɔs wi gɛt fet pan di day we Jizɔs day, i ‘go padin wi  fɔ ɔl wi sin’ dɛn. I go fɔgiv wi ɛn nɔ mɛmba wi sin dɛn igen. (Rid Di Apɔsul Dɛn Wok [Akt] 3:19-21.) Lɛk aw wi bin dɔn tɔk, Jizɔs in day mek am pɔsibul fɔ mek Jiova pik sɔm pipul dɛn fɔ bi in pikin dɛn na ɛvin. Dɛn pipul ya na di anyɔntɛd Kristian dɛn. (Lɛta Fɔ Rom 8:15-17) I de kɔl di “ɔda ship” dɛn fɔ jɔyn in famili na dis wɔl. Afta dɛn go dɔn pafɛkt, dɛn go tɛst dɛn fɔ di las tɛm. If dɛn nɔ kɔmɔt biɛn Jiova, i go tek dɛn as in pikin dɛn. (Lɛta Fɔ Rom 8:20, 21; Rɛvɛleshɔn 20:7-9) Jiova go lɛk ɔl in pikin dɛn ɔltɛm. Jizɔs in day go kɔntinyu fɔ kam wit blɛsin dɛn sote go. (Di Ibru Pipul Dɛn 9:12) Jiova dɔn gi wi dis gift we valyu pas ɔl ɔda gift dɛn, ɛn nɔbɔdi nɔ go pul am na wi an.

16. Aw Jizɔs in day dɔn ɛp fɔ fri wi?

¹⁶ If wi lɛf di bad tin dɛn we wi de du ɛn chenj, natin nɔ de we Setan go du we go mek wi nɔ de na Jiova in famili. Jizɔs bin day fɔ “di fɔs ɛn las tɛm.” Jizɔs in day dɔn pe fɔ wi sin dɛn sote go. (Di Ibru Pipul Dɛn 9:24-26) Na Adam mek wi de day, bɔt Jizɔs in sakrifays go mek wi gɛt layf we go de sote go. Jizɔs in day kin fri wi frɔm Setan in wɔl ɛn mek wi nɔ fred day.—Di Ibru Pipul Dɛn 2:14, 15.

17. Wetin Jiova in lɔv min to yu?

¹⁷ Ɔl wetin Gɔd dɔn prɔmis go apin. Jɔs lɛk we di lɔ dɛn we Jiova mek fɔ kɔntrol sɔntin dɛn na di wɔl nɔ de chenj, Jiova insɛf nɔ go ɛva chenj. I nɔ go ɛva disapɔynt wi. (Malakay 3:6) Jiova nɔ jɔs gi wi layf. I gi wi in lɔv bak. Wi “biliv se Gɔd lɛk wi, ɛn wi dɔn fil di lɛk na wi layf. Gɔd na di wan we nɔ de tap fɔ lɛk ɔltɛm ɛn nain lɛk aw pɔsin fɔ lɛk fɔ tru.” (Jɔn In Fɔs Lɛta 4:16) Di tin dɛn we i kin prɔmis kin apin ɔltɛm. I nɔ go te igen, di wɔl go tɔn to Paradays. Ɔlman we go de alayf go falamakata Jiova ɛn lɛk dɛn kɔmpin dɛn. Ɛn ɔl Jiova in savant dɛn we de na ɛvin ɛn dis wɔl go se: “Na wi Gɔd gɛt prez, nain wɔndaful, nain gɛt sɛns, nain gɛt ɔna, nain gɛt pawa ɛn nain na kiŋ sote go; wi de tɛl am tɛnki! Emɛn!”—Rɛvɛleshɔn 7:12.