1, 2. Afta Jizɔs bin go na ɛvin, wetin di apɔsul dɛn go dɔn de tink?

JIZƆS in apɔsul dɛn bin tinap na Mawnt Ɔliv de wach as dɛn masta ɛn padi de go ɔp na ɛvin, sote di klawd kɔba am. (Di Apɔsul Dɛn Wok [Akt] 1:9, 10) Fɔ lɛk tu ia so, Jizɔs bin dɔn de tich, ɛnkɔrej, ɛn lid dɛn. Bɔt naw i dɔn go. Wetin dɛn go du?

² Bifo Jizɔs go na ɛvin, i bin tɛl in disaypul dɛn se, una go “tɔk bɔt mi na Jerusɛlɛm, na Judia, na Sameria ɛn ɔlɔbɔt na [di] wɔl.” (Di Apɔsul Dɛn Wok [Akt] 1:8) Aw dɛn go ebul du dis wok? Jizɔs bin prɔmis dɛn se Gɔd in oli spirit go ɛp dɛn. (Di Apɔsul Dɛn Wok [Akt] 1:5) Bɔt udat go dayrɛkt dɛn ɛn ɔganayz di prichin wok we dɛn go du ɔlsay na di wɔl? Di apɔsul dɛn bin no se Jiova bin dɔn yuz sɔm man dɛn fɔ lid di Izrɛlayt dɛn trade. So dɛn go dɔn de tink if Jiova go pik nyu lida naw.

3. (a) Afta Jizɔs go na ɛvin, us impɔtant tin in apɔsul dɛn bin disayd fɔ du? (b) Us kwɛstyɔn dɛn wi go ansa insay dis atikul?

³ Jɔs afta Jizɔs go na ɛvin, in disaypul dɛn bin stɔdi di  skripchɔ dɛn, pre to Gɔd fɔ ɛp dɛn, ɛn dɛn bin pik Matayas fɔ tek Judas Iskariɔt in ples fɔ bi di apɔsul we mek 12. (Di Apɔsul Dɛn Wok [Akt] 1:15-26) Wetin mek di pik we dɛn pik Matayas bin rili impɔtant to dɛn ɛn to Jiova? Di disaypul dɛn bin kam fɔ no se na 12 apɔsul dɛn fɔ de. * (Luk di futnot.) Jizɔs bin pik di apɔsul dɛn ɛn tren dɛn fɔ wan impɔtant wok we dɛn go du fɔ Gɔd in pipul dɛn. Wetin na bin da wok de, ɛn aw Jiova ɛn Jizɔs bin mek dɛn rɛdi fɔ da wok de? Us sem arenjmɛnt de tide? Ɛn aw wi go de “mɛmba di wan dɛn we de bifo” wi, mɔ “di slev we fetful ɛn gɛt sɛns”?—Di Ibru Pipul Dɛn 13:7, NW; Matyu 24:45, NW.

4. Us wok we di apɔsul dɛn ɛn ɔda ɛlda dɛn na Jerusɛlɛm bin gɛt?

⁴ Pɛntikɔst insay di ia 33, di apɔsɔl dɛn bin bigin fɔ tek di lid na di Kristian kɔngrigeshɔn. Di Baybul se “Pita ɛn di ɔda ilɛvin apɔsul dɛn tinap” ɛn dɛn bin tich bɔku pipul dɛn di tru tin bɔt Gɔd we go sev dɛn layf. (Di Apɔsul Dɛn Wok [Akt] 2:14, 15) Bɔku pan dɛn pipul dɛn de bin bi Kristian. Afta dat, dɛn nyu Kristian dɛn ya bin “kɔntinyu fɔ put dɛn maynd pan wetin di apɔsul dɛn bin de tich dɛn.” (Di Apɔsul Dɛn Wok 2:42, NW) Di apɔsul dɛn bin gɛt di wok fɔ kia fɔ di mɔni na di kɔngrigeshɔn. (Di Apɔsul Dɛn Wok [Akt] 4:34, 35) Dɛn bin de tich Gɔd in pipul dɛn bak ɛn pre fɔ dɛn, ɛn tɛl dɛn se “Wi, we na di apɔsul dɛn, go jɛs de fɔ pre ɛn fɔ tɛl pipul bɔt Gɔd.” (Di Apɔsul Dɛn Wok [Akt] 6:4) Ɛn dɛn bin sɛn machɔ Kristian dɛn fɔ go prich na dɛn nyu say dɛn. (Di Apɔsul Dɛn Wok [Akt] 8:14, 15) Leta, ɔda ɛlda dɛn we na bin anɔyntɛd bin jɔyn di apɔsul dɛn fɔ lid di kɔngrigeshɔn. Na dɛn bin mekɔp di gɔvnin bɔdi we bin de dayrɛkt ɔl di kɔngrigeshɔn dɛn.—Di Apɔsul Dɛn Wok [Akt] 15:2.

5, 6. (a) Aw di oli spirit bin ɛp di gɔvnin bɔdi? (Luk di pikchɔ nia dis atikul in taytul.) (b) Aw di enjɛl dɛn bin ɛp di gɔvnin bɔdi? (c) Aw Gɔd in Wɔd bin gayd di gɔvnin bɔdi?

⁵ Di Kristian dɛn we bin de insay di apɔsul dɛn tɛm bin no se na Jizɔs Jiova bin de yuz fɔ dayrɛkt di gɔvnin bɔdi. Wetin bin mek dɛn biliv dat? Di fɔs rizin na dat di oli spirit bin de ɛp di gɔvnin bɔdi. (Jɔn 16:13) Ɔl di Kristian dɛn we na bin anɔyntɛd bin gɛt di oli spirit, but di oli spirit bin de ɛp di apɔsul ɛn di ɛlda dɛn we bin de na Jerusɛlɛm mɔ fɔ du dɛn wok as ovasia dɛn. Fɔ ɛgzampul, insay di ia 49, di oli  spirit bin ɛp di gɔvnin bɔdi fɔ disayd if ɔlman fɔ sakɔmsayz ɔ nɔ fɔ sakɔmsayz. Ɔl di kɔngrigeshɔn dɛn bin du wetin di gɔvnin bɔdi tɛl dɛn. “Dat bin mek di kɔngrigeshɔn dɛn biliv mɔ ɛn mɔ ɛn kɔntinyu fɔ go bifo.” (Di Apɔsul Dɛn Wok 16:4, 5, NW) Frɔm di lɛta we di gɔvnin bɔdi bin rayt to di kɔngrigeshɔn dɛn, wi si se Gɔd in spirit bin de ɛp dɛn ɛn dɛn bin sho kwaliti dɛn lɛk lɔv ɛn fet.—Di Apɔsul Dɛn Wok [Akt] 15:11, 25-29; Lɛta Fɔ Galeshya 5:22, 23.

⁶ Di sɛkɔn rizin na dat enjɛl dɛn bin de ɛp di gɔvnin bɔdi. Fɔ ɛgzampul, wan enjɛl bin tɛl Kɔnilyɔs fɔ fɛn apɔsul Pita. Afta Pita prich to Kɔnilyɔs ɛn in fambul dɛn, di oli spirit bin kam pan dɛn ivin we di man dɛn nɔ bin sakɔmsayz. Kɔnilyɔs na bin di fɔs man we nɔto Ju we bi Kristian pan ɔl we i nɔ bin sakɔmsayz. We di apɔsul dɛn ɛn ɔda brɔda dɛn yɛri bɔt dis, dɛn bin gri wit dis tin we Gɔd du ɛn dɛn bin wɛlkɔm dɛn pipul dɛn ya na di Kɔngrigeshɔn pan ɔl we dɛn nɔto Ju ɛn dɛn nɔ sakɔmsayz. (Di Apɔsul Dɛn Wok [Akt] 11:13-18) Dis ɛp wi fɔ si se enjɛl dɛn bin de rili sɔpɔt di prichin wok we di gɔvnin bɔdi bin de dayrɛkt. (Di Apɔsul Dɛn Wok [Akt] 5:19, 20) Di tɔd rizin na dat Gɔd in Wɔd bin de gayd di gɔvnin bɔdi. Dɛn bin de yuz di Skripchɔ dɛn fɔ disayd fɔ du impɔtant tin dɛn we gɛt fɔ du wit wetin Kristian dɛn biliv ɛn fɔ dayrɛkt di kɔngrigeshɔn.—Di Apɔsul Dɛn Wok [Akt] 1:20-22; 15:15-20.

7. Wetin mek wi go se na Jizɔs bin de lid di Kristian dɛn we bin de trade?

⁷ Pan ɔl we na di gɔvnin bɔdi bin de tɛl di kɔngrigeshɔn wetin fɔ du, ɔlman na di kɔngrigeshɔn bin no se na Jizɔs na dɛn Lida. Aw wi no dat? Apɔsul Pɔl bin se na Krays bin pik sɔm fɔ “bi apɔsul.” I bin tɔk bak se na Krays “na wi edman,” ɔ Lida na di kɔngrigeshɔn. (Lɛta Fɔ Ɛfisɔs 4:11, 15) Di kɔngrigeshɔn dɛn nɔ bin gi dɛnsɛf di apɔsul dɛn nem, bifo dat, dɛn bin de “kɔl dɛn pipul we biliv pan Jizɔs, Kristiɛn.” (Di Apɔsul Dɛn Wok [Akt] 11:26) Pɔl bin no se i impɔtant fɔ du wetin di apɔsul ɛn ɔda man dɛn we de bifo na di kɔngrigeshɔn de tich frɔm di Baybul. Pan ɔl dat, Pɔl bin se: “Bɔt a want mek una ɔndastand sɔntin: Na Krays de oba ɔlman,” ivin di wan dɛn we de na di gɔvnin bɔdi. Dɔn Pɔl bin tɔk bak se: “Na Gɔd in wangren de oba Krays.” (Fɔs Lɛta Fɔ Kɔrint 11:2, 3) Wi si klia wan se Jiova dɔn pik in Pikin we na Krays Jizɔs fɔ lid di kɔngrigeshɔn.

8, 9. Us impɔtant wok brɔda Rɔsɛl bin gɛt?

⁸ Frɔm 1870, Chals Tez Rɔsɛl ɛn sɔm pan in padi dɛn bin bigin fɔ tray fɔ wɔship Gɔd di we aw di Baybul se ɛn ɛp ɔda pipul dɛn fɔ du di sem tin. Dɛn bin want fɔ ɛp pipul dɛn bak we bin de tɔk difrɛn langwej dɛn. So insay di ia 1884, dɛn bin gi dɛn di rayt fɔ mek Zion’s Watch Tower Tract Society, ɛn na brɔda Rɔsɛl bin bi di prɛsidɛnt. * (Luk di futnot.) Brɔda Rɔsɛl bin tek tɛm stɔdi di Baybul ɛn i nɔ bin de fred fɔ tɛl ɔda  pipul dɛn se wetin di chɔch dɛn de tich nɔ de insay di Baybul. Fɔ ɛgzampul, di Baybul nɔ sɔpɔt triniti ɔ se we pɔsin day i sol de grap. I bin lan se we Krays de kam bak, no mɔtalman nɔ go si am. Ɛn i lan bak se “di patikyula tɛm fɔ di neshɔn dɛn” go dɔn insay 1914. (Lyuk 21:24, NW) Brɔda Rɔsɛl bin yuz in tɛm, mɔni, ɛn trɛnk fɔ tich dɛn tru tin ya to ɔda pipul dɛn. Wi si klia wan se Jiova ɛn Jizɔs bin yuz Brɔda Rɔsɛl fɔ lid Gɔd in pipul dɛn trade.

⁹ Brɔda Rɔsɛl nɔ bin want pipul dɛn fɔ gi am spɛshal atɛnshɔn. Insay 1896, i bin rayt se in ɛn ɔda man dɛn nɔ want ɛnibɔdi fɔ ɔnɔ dɛn atɔl. Dɛn nɔ bin want lɛ ɛnibɔdi gi dɛn spɛshal taytul, ɛn dɛn nɔ bin want mek ɛni grup tek dɛn nem. Leta, i bin rayt se: “Dis nɔto mɔtalman in wok.”

10. (a) Ustɛm Jizɔs pik “di slev we fetful ɛn gɛt sɛns”? (b) Ɛksplen aw wi no klia wan se di Gɔvnin Bɔdi bin difrɛn frɔm di Watch Tower Society.

¹⁰ Insay 1919, tri ia afta brɔda Rɔsɛl day, Jizɔs bin pik “di slev we fetful ɛn gɛt sɛns.” Fɔ du wetin? Fɔ gi di wan dɛn we de fala am “it di rayt tɛm.” (Matyu 24:45, NW) Ivin insay dɛn tɛm dɛn de, sɔm anɔyntɛd brɔda dɛn we bin de na di edkwata na Bruklin, insay Nyu Yɔk, bin de ɛp di wan dɛn we de fala Jizɔs fɔ gɛt tayt padi biznɛs wit Jiova. Di wɔd “gɔvnin bɔdi” bigin fɔ de na wi buk ɛn magazin dɛn afta 1940. Da tɛm de, di gɔvnin bɔdi bin de wok tranga wan wit di dayrɛktɔ dɛn fɔ di Watch Tower Bible and Tract Society. Bɔt insay 1971, dɛn bin mek wi no klia wan se di Gɔvnin Bɔdi difrɛn frɔm di Watch Tower Society. Di Watch Tower Society dɛn wok na fɔ mek wi gɛt rayt fɔ fɔ du plɛnti tin dɛn. Frɔm da tɛm de, anɔyntɛd brɔda dɛn kin bi wan pan di Gɔvnin bɔdi mɛmba dɛn bɔt dɛn nɔ go bi dayrɛktɔ dɛn fɔ di Watch Tower Society. Dɛn biɛn tɛm ya, na brɔda dɛn we de pan di “ɔda ship” dɛn de dayrɛkt di Sosayti ɛn ɔda ɔganayzeshɔn dɛn we Gɔd in pipul dɛn de yuz. Ɛn dis dɔn mek di Gɔvnin bɔdi ebul fɔ pe atɛnshɔn fɔ tich wi wetin de na di Baybul ɛn dayrɛkt wi. (Jɔn 10:16; Di Apɔsul Dɛn Wok [Akt] 6:4) Di Julay 15, 2013, Wachtawa bin ɛksplen se “di slev we fetful ɛn gɛt sɛns” na sɔm anɔyntɛd brɔda dɛn we mekɔp di Gɔvnin Bɔdi.

11. Aw di Gɔvnin Bɔdi kin disayd fɔ du sɔntin?

¹¹ Di Gɔvnin Bɔdi mɛmba dɛn kin mit ɛni wik ɛn disayd togɛda fɔ du tin dɛn we impɔtant. Dis kam we dɛn kin kam togɛda kin ɛp dɛn fɔ tɔk ɛn kɔntinyu fɔ gɛt wanwɔd. (Prɔvabs 20:18) Nɔn pan di Gɔvnin Bɔdi mɛmba dɛn nɔ  impɔtant pas in kɔmpin, na dat mek ɛni ia na difrɛn brɔda de lid na di mitin dɛn we dɛn kin gɛt. (Pita In Fɔs Lɛta 5:1) Na so bak i de apin na ɔl di siks kɔmiti dɛn we de ɔnda di Gɔvnin Bɔdi. Nɔn pan di Gɔvnin Bɔdi mɛmba dɛn nɔ de fil se in na di lida fɔ in brɔda dɛn. Dɛn ɔl na savant dɛn bak ɛn dɛnsɛf de bɛnifit frɔm di buk, magazin ɛn ɔda tin dɛn we di slev we fetful de gi ɛn dɛn de du wetin di slev we fetful tɛl dɛn fɔ du.

12. Us ɔda kwɛstyɔn dɛn wi de kam ansa?

¹² Di Gɔvnin Bɔdi nɔ pafɛkt. Dɛn kin mek mistek we dɛn de ɛksplen di Baybul ɔ we dɛn de dayrɛkt di ɔganayzeshɔn. Fɔ ɛgzampul, di Watch Tower Publications Index gɛt wan sɔbjɛkt we nem “Beliefs Clarified,” we sho aw dɛn ajɔst di we aw wi ɔndastand sɔm tin dɛn na di Baybul frɔm 1870. Jizɔs  nɔ bin se di slev we fetful go tich wi bɔt Jiova pafɛkt wan. So aw wi go ansa Jizɔs in kwɛstyɔn we i aks se: “Udat rili na di slev we fetful ɛn gɛt sɛns?” (Matyu 24:45, NW) Wetin sho se di Gɔvnin Bɔdi na di slev we fetful? Lɛ wi tɔk bɔt di sem tri tin dɛn we bin ɛp di gɔvnin bɔdi we bin de insay di apɔsul dɛn tɛm.

13. Aw di oli spirit dɔn ɛp di Gɔvnin Bɔdi?

¹³ Oli spirit de ɛp di Gɔvnin Bɔdi. Di oli spirit dɔn ɛp di Gɔvnin Bɔdi fɔ ɔndastand tru tin dɛn na di Baybul we dɛn nɔ bin ɔndastand trade. Fɔ ɛgzampul, tink bɔt di beliefs clarified we wi bin jɔs dɔn tɔk bɔt. Nɔ mɔtalman nɔ fɔ dɔn ebul fɔ ɔndastand ɛn ɛksplen dɛn “dip tin dɛn bɔt Gɔd” if i lɛf to in wan! (Rid Fɔs Lɛta Fɔ Kɔrint 2:10, NW.) Di Gɔvnin Bɔdi de fil lɛk apɔsul Pɔl we bin rayt se: “Nɔto di we we mɔtalman sho wi, wit dɛn yon sɛns, fɔ tɔk dɛn tin ya, wi de tɔk dɛn, na bay aw Gɔd in spirit sho wi.” (Fɔs Lɛta Fɔ Kɔrint 2:13) Afta i dɔn tek lɔng tɛm we lay lay tichin dɔn de, wetin mek wi dɔn rili ɔndastand bɔku tin dɛn na di Baybul frɔm 1919? Di wangren rizin na bikɔs Gɔd dɔn de ɛp wit in oli spirit!

14. Frɔm wetin de na Rɛvɛleshɔn 14:6, 7, aw di enjɛl dɛn de ɛp di Gɔvnin Bɔdi ɛn Gɔd in pipul dɛn tide?

¹⁴ Enjɛl dɛn de ɛp di Gɔvnin Bɔdi. Di Gɔvnin Bɔdi gɛt di big wok fɔ dayrɛkt pas et milyɔn publisha dɛn fɔ du di prichin wok ɔlsay na di wɔl. Wetin mek dis wok de rili go bifo? Wan rizin na dat di enjɛl dɛn de sɔpɔt. (Rid Rɛvɛleshɔn 14:6, 7.) Bɔku tɛm di enjɛl dɛn dɔn dayrɛkt pɔblisha dɛn to pɔsin we jɔs dɔn pre to Gɔd fɔ mek i ɛp am! * (Luk di futnot.) Di prichin wok de go bifo ivin na say dɛn we dɛn de tray fɔ stɔp di wok. Dis bak de apin bikɔs di enjɛl dɛn de ɛp.

15. Aw di Gɔvnin Bɔdi difrɛn frɔm di bigman dɛn na chɔch? Gi wan ɛgzampul.

¹⁵ Gɔd in Wɔd de gayd di Gɔvnin Bɔdi (Rid Jɔn 17:17.) Tink bɔt wetin bin apin insay di ia 1973. Di Jun 1 Wachtawa bin aks if “pipul dɛn we nɔ lɛf fɔ smok sigrɛt kin baptayz.” Di ansa we dɛn bin gi fɔ da kwɛstyɔn de bin kɔmɔt frɔm di Baybul, ɛn di ansa na bin nɔ! Di Wachtawa bin sho bɔku skripchɔ dɛn ɛn ɛksplen wetin mek dɛn fɔ disfɛloship pɔsin we nɔ stɔp fɔ smok. (Fɔs Lɛta Fɔ Kɔrint 5:7; Sɛkɛn Lɛta Fɔ Kɔrint 7:1) Dis Wachtawa bin se dis advays ya nɔ kɔmɔt frɔm mɔtalman, bɔt i kɔmɔt “frɔm Gɔd we de yuz in Wɔd, di Baybul, fɔ tɛl wi wetin i want.” No ɔda rilijɔn nɔ de we rɛdi fɔ abop pan Gɔd in Wɔd wit ɔl dɛn at pan ɔl we dɛn no se dis nɔ go rili izi fɔ sɔm pan dɛn mɛmba dɛn. Wan nyu buk we dɛn jɔs pul na Amɛrika we de tɔk bɔt rilijɔn se: “Di lida dɛn na dɛn Kristian rilijɔn dɛn kin chenj di tin dɛn we dɛn de tich ɔltɛm, fɔ lɛ wetin dɛn de tich go gri wit wetin dɛn mɛmba dɛn ɛn wetin bɔku ɔda pipul dɛn biliv.” Bɔt di Gɔvnin Bɔdi nɔ de jɔs du sɔntin bikɔs bɔku pipul dɛn go lɛk dat. Bɔt, na  Gɔd in Wɔd de gayd ɔl di Gɔvnin Bɔdi mɛmba dɛn, we sho se na Jiova de rili gayd in pipul dɛn tide.

16. Sho wan we aw wi kin mɛmba di Gɔvnin Bɔdi.

¹⁶ Rid Di Ibru Pipul Dɛn 13:7, NW. Di Baybul se “Una mɛmba di wan dɛn we de bifo una.” Wan we aw wi go du dis na bay we wi de pre fɔ di Gɔvnin Bɔdi. (Lɛta Fɔ Ɛfisɔs 6:18) Dɛn gɛt bɔku wok fɔ du, lɛk fɔ gi wi tin dɛn we go ɛp wi fɔ lan mɔ bɔt Jiova, fɔ dayrɛkt di prichin wok we de bi ɔlsay na di wɔl, ɛn fɔ kia fɔ di kɔntribyushɔn dɛn we pipul dɛn de gi to di ɔganayzeshɔn. So dɛn rili nid wi fɔ de pre fɔ dɛn ɔltɛm!

17, 18. (a) Aw wi go du wetin di Gɔvnin Bɔdi tɛl wi? (b) Aw di prich we wi de prich de sɔpɔt di Gɔvnin Bɔdi ɛn Jizɔs?

¹⁷ Wi go mɛmba di Gɔvnin Bɔdi bak we wi du wetin dɛn tɛl wi. Di Gɔvnin Bɔdi kin tɛl wi wetin fɔ du na wi buk ɛn magazin dɛn, wi mitin, wi asɛmbli, ɛn kɔnvɛnshɔn dɛn. Dɛn de pik sakit ovasia dɛn bak, ɛn di sakit ovasia dɛnsɛf de pik ɛlda dɛn. We di sakit ovasia dɛn ɛn di ɛlda dɛn de tek tɛm du wetin di Gɔvnin Bɔdi de tɛl dɛn, dɛn de sho se dɛn de mɛmba di Gɔvnin Bɔdi. Ɛn wi ɔl go sho se wi de rɛspɛkt wi Lida we na Jizɔs bay we wi de obe di man dɛn we i de yuz tide.—Di Ibru Pipul Dɛn 13:17.

¹⁸ Wan ɔda we we wi kin mɛmba di Gɔvnin Bɔdi na we wi de du wi bɛst na di prichin wok. Di Ibru Pipul Dɛn 13:7 tɛl Kristian dɛn se dɛn fɔ falamakata di kayn fet we di wan dɛn we de bifo gɛt. Di Gɔvnin Bɔdi dɔn sho se dɛn rili gɛt fet bay we dɛn de prich di gud nyus wit zil. Wi de sɔpɔt dɛn pan dis impɔtant wok? If wi de du dat, wi go gladi we wi yɛri Jizɔs tɛl wi se: “Ɛnitɛm we una bin du dɛn tin ya fɔ ɛni wan pan dɛn pipul ya we pipul nɔ tek mek natin, we tan lɛkɛ brɔda to mi, na fɔ mi una bin du dɛn.”—Matyu 25:34-40.

19. Wetin mek yu dɔn mekɔp yu maynd fɔ fala wi Lida we na Jizɔs?

¹⁹ We Jizɔs bin go bak na ɛvin, i nɔ bin fɔgɛt di wan dɛn we bin de fala am. (Matyu 28:20) I bin no se di oli spirit, di enjɛl dɛn, ɛn Gɔd in Wɔd bin ɛp am fɔ lid di tɛm we i bin de na di wɔl. Na dis sem we i de ɛp di slev we fetful tide. Di Gɔvnin Bɔdi de kɔntinyu fɔ “fala di ship” we na Jizɔs “ɛni say i go.” (Rɛvɛleshɔn 14:4) So we wi du wetin di Gɔvnin Bɔdi de tɛl wi, wi de fala wi Lida we na Jizɔs. I nɔ go te igen, i go lid wi na di say we wi go gɛt layf we go de sote go. (Rɛvɛleshɔn 7:14-17) Ɛn no mɔtalman lida nɔ go ebul fɔ du dat!