1, 2. Wetin wan brɔda bin kam fɔ no bɔt insɛf? Wetin i bin du?

RƆBƆT bin ol 15 ia we i baptayz, bɔt di trut nɔto bin di tin we impɔtant to am. I tɔk se: “A nɔ bin ɛva du bad tin, ɛn a jɔs bin de du di tin dɛn we Jiova Witnɛs fɔ du bɔt nɔto wit ɔl mi at. I bin tan lɛk se mi na pɔsin we de mɛmba Gɔd pan ɛnitin we a de du bikɔs a bin de atɛnd ɔl di mitin dɛn ɛn a kin ɔgzilari payɔnia wan wan tɛm insay di ia. Bɔt i bin tan lɛk se a de mis sɔntin na mi layf.”

² Rɔbɔt nɔ bin ɔndastand wetin i de mis na in layf pas te i mared. In ɛn in wɛf kin ple wan gem usay dɛn de aks dɛnsɛf kwɛstyɔn dɛn frɔm di Baybul. In wɛf bin rili sabi di Baybul ɛn i bin de ansa di kwɛstyɔn dɛn izi wan. Bɔt plɛnti tɛm Rɔbɔt nɔ bin de sabi di ansa dɛn ɛn dat bin de mek i shem. I tɔk se: “I bin tan lɛk se a nɔ sabi natin. A tɛl misɛf se, ‘If a want fɔ tek di lid pan Gɔd biznɛs na mi famili, a nid fɔ du sɔntin.’” Ɛn na dat i bin du. Rɔbɔt bin tɔk bak se: “A stɔdi di Baybul, a stɔdi, ɛn a stɔdi gud gud wan, ɛn ɔltin bigin klia to mi. A bigin fɔ ɔndastand di Baybul ɛn di tin we pas ɔl na dat, a bin kam fɔ gɛt tayt padi biznɛs wit Jiova.”

3. (a) Wetin wi lan frɔm Rɔbɔt in stori? (b) Us impɔtant pɔynt dɛn wi go kam tɔk bɔt?

 ³ Wi kin lan impɔtant lɛsin dɛn frɔm Rɔbɔt in stori. Wi kin no sɔm tin dɛn na di Baybul, atɛnd di mitin dɛn ɔltɛm, ɛn du di prichin wok, bɔt dis nɔ min se wi na pɔsin we de mɛmba Gɔd pan ɛnitin we wi de du. Ɔ i go bi se wi dɔn du ɔl wetin wi ebul fɔ bi pɔsin we de mɛmba Gɔd pan ɛnitin we wi de du, bɔt we wi chɛk wisɛf, wi go si se wi nid fɔ du mɔ. (Lɛta Fɔ Filipay 3:​16) Insay dis atikul, wi go ansa dɛn tri impɔtant kwɛstyɔn dɛn ya: (1) Wetin go ɛp wi fɔ no if wi na pɔsin we de mɛmba Gɔd pan ɛnitin we wi de du? (2) Aw wi go kɔntinyu fɔ bi pɔsin we de mɛmba Gɔd pan ɛnitin we wi de du? (3) We wi bi pɔsin we de mɛmba Gɔd pan ɛnitin we wi de du, aw dat go ɛp wi na layf?

4. Udat dɛn di advays na Lɛta Fɔ Ɛfisɔs 4:​23, 24 de fɔ?

⁴ We wi bin stat fɔ sav Gɔd, wi bin mek sɔm chenj dɛn we bin afɛkt ɛnitin we wi de du na layf. Dɛn chenj dɛn ya nɔ bin dɔn di tɛm we wi baptayz. Di Baybul tɛl wi se: “Una fɔ chenj di we aw una de tink ɛn kɔntinyu fɔ tink di rayt we ɔltɛm.” (Lɛta fɔ Ɛfisɔs 4:​23, 24, NW.) Bikɔs wi nɔ pafɛkt, wi nid fɔ de kɔntinyu fɔ mek sɔm chenj dɛn. Ivin if wi dɔn sav Jiova fɔ lɔng lɔng tɛm, wi stil nid fɔ kɔntinyu fɔ mek wi padi biznɛs wit am tayt mɔ ɛn mɔ.—Lɛta Fɔ Filipay 3:​12, 13.

5. Us kwɛstyɔn dɛn go ɛp wi fɔ no if wi na pɔsin we de mɛmba Gɔd pan ɛnitin we wi de du?

⁵ Ilɛksɛf wi yɔŋ ɔ wi ol, wi nid fɔ de chɛk wisɛf fɔ no udat wi rili bi. Wi kin aks wisɛf dɛn kwɛstyɔn dɛn ya: ‘A de si se a dɔn de go bifo pan Gɔd biznɛs ? A de falamakata Krays? Aw di abit we a gɛt ɛn di we aw a de biev na di mitin de sho di kayn pɔsin we a bi? Aw di tin dɛn we a de tɔk de sho wetin a rili want na layf? Aw di we aw a de stɔdi, drɛs, ɛn di we aw a de biev we dɛn gi mi advays de sho di kayn pɔsin we a rili bi? Wetin a kin du we dɛn tɛmt mi fɔ du di rɔng tin? Mi na machɔ Kristian?’ (Lɛta Fɔ Ɛfisɔs 4:​13) Dɛn kwɛstyɔn dɛn ya go ɛp wi fɔ no if wi na pɔsin we de mɛmba Gɔd pan ɛnitin we wi de du.

6. Wetin bak go ɛp wi fɔ no if wi na pɔsin we de mamba Gɔd pan ɛnitin we wi de du?

⁶ Sɔntɛnde, wi nid ɔda pipul dɛn fɔ ɛp wi fɔ no if wi na pɔsin we de mɛmba Gɔd pan ɛnitin we wi de du. Di apɔsul Pɔl bin ɛksplen se pɔsin we de du wetin in bɔdi ɔ at tɛl am fɔ du ɛn we nɔ bisin bɔt Gɔd na pɔsin we nɔ no se di tin we i de du na layf nɔ de mek Gɔd gladi. Bɔt pɔsin we de mɛmba Gɔd pan ɛnitin we i de du no aw Gɔd de si sɔntin. I no se Jiova nɔ lɛk pɔsin we de du wetin in bɔdi ɔ at tɛl am fɔ du. (Fɔs Lɛta Fɔ Kɔrint 2:​14-16; 3:​1-3) Ɛlda dɛn we de tink lɛk aw Krays de tink kin no kwik kwik wan we brɔda ɔ sista de  stat fɔ du di tin dɛn we in bɔdi ɔ at tɛl am fɔ du, ɛn dɛn kin tray fɔ ɛp dɛn. If di ɛlda dɛn de tray fɔ ɛp yu, yu tink se yu go gri fɔ mek dɛn ɛp yu ɛn chenj? If wi du dat, wi go sho se wi rili want fɔ bi pɔsin we de mɛmba Gɔd pan ɛnitin we wi de du.—Ɛkliziastis 7:​5, 9.

7. Aw wi no se fɔ lan di tin dɛn we de na di Baybul nɔ jɔs du?

⁷ Nɔto jɔs wetin wi de lan frɔm di Baybul go mek wi go bifo pan Gɔd biznɛs. Kiŋ Sɔlɔmɔn bin no bɔku tin bɔt Jiova, ɛn dɛn bin ivin rayt sɔm pan di tru tin dɛn we Sɔlɔmɔn bin tɔk insay di Baybul. Bɔt as tɛm de go, in padi biznɛs wit Jiova nɔ bin tayt igen, ɛn i nɔ bin kɔntinyu fɔ de fetful wan. (Fɔs Kiŋ 4:​29, 30; 11:​4-6) So, wetin wi nid fɔ ad pan di tin dɛn we wi dɔn lan frɔm di Baybul? Wi nid fɔ kɔntinyu fɔ gɛt fet mɔ ɛn mɔ. (Lɛta Fɔ Kɔlɔse 2:​6, 7) Aw wi go du dis?

8, 9. (a) Wetin go ɛp wi fɔ kɔntinyu fɔ gɛt strɔng fet? (b) Wetin wi dɔn plan fɔ du we wi de stɔdi ɛn tink gud gud want bɔt wetin wi de lan? (Luk di pikchɔ nia dis atikul in taytul.)

⁸ Insay di fɔstɛm Kristian dɛn tɛm, Pɔl bin ɛnkɔrej Kristian dɛn fɔ “go bifo ɛn lan dɛn tin we bigman fɔ lan.” (Di Ibru Pipul Dɛn 6:​1) Aw wi kin fala dis advays tide? Wan impɔtant we aw wi go du dis na bay we wi de stɔdi di buk we nem How to Remain in God’s Love. Dis go ɛp yu fɔ ɔndastand aw fɔ yuz di advays [prinsipul] dɛn frɔm di Baybul. If yu bin dɔn stɔdi da buk de, ɔda buk dɛn de bak we yu go stɔdi we go ɛp yu fɔ gɛt strɔng fet. (Lɛta Fɔ Kɔlɔse 1:​23) Wi nid bak fɔ tink gud gud wan bɔt wetin wi dɔn lan ɛn aks Jiova fɔ ɛp wi fɔ si aw wi go du di tin dɛn we wi de lan.

⁹ We wi de stɔdi ɛn tink gud gud wan bɔt wetin wi de rid, wi gol na fɔ tray tranga wan fɔ du wetin Jiova want ɛn fɔ obe am. (Sam 40:​8; 119:​97) Wi nɔ want bak fɔ alaw ɛnitin we go stɔp wi fɔ kɔntinyu fɔ go bifo pan Gɔd biznɛs.—Taytɔs 2:​11, 12.

10. Wetin yɔŋ wan dɛn go du fɔ kɔntinyu fɔ go bifo pan Gɔd biznɛs?

¹⁰ If yu na yɔŋ pɔsin, yu gɛt ɛnitin we yu want fɔ du fɔ go bifo pan Gɔd biznɛs?  Wan brɔda we de wok na Bɛtɛl kin tɔk plɛnti tɛm to yɔŋ wan dɛn we de kam baptayz na ɛni sakit asɛmbli, ɛn i kin aks dɛn bɔt di tin dɛn we dɛn want fɔ du fɔ go bifo pan Gɔd biznɛs. Dis brɔda kin si se bɔku pan dɛn dɔn tink gud gud wan bɔt aw dɛn want fɔ sav Jiova tumara bambay. Sɔm pan dɛn dɔn plan fɔ yuz bɔku pan dɛn tɛm fɔ sav Jiova ɔ fɔ muf go na say dɛn we dɛn nid mɔ pɔblisha dɛn. Bɔt sɔm pan dɛn nɔ bin no aw fɔ ansa dis brɔda in kwɛstyɔn. Fɔ se dɛn de fil se dɛn nɔ nid fɔ go bifo pan Gɔd biznɛs? If yu na yɔŋ pɔsin, aks yusɛf dɛn kwɛstyɔn dɛn ya: ‘A de atɛnd di mitin dɛn ɛn go fil savis jɔs bikɔs mi mama ɛn papa want mi fɔ go? Ɔ a gɛt tayt padi biznɛs wit Gɔd?’ Ilɛksɛf wi ol ɔ yɔŋ, wi ɔl fɔ gɛt sɔntin we wi want fɔ du fɔ go bifo pan Gɔd biznɛs. Dɛn tin dɛn ya go ɛp wi fɔ kɔntinyu fɔ go bifo pan Gɔd biznɛs mɔ ɛn mɔ.—Ɛkliziastis 12:​1, 13.

11. (a) Wetin wi nid fɔ du fɔ mek wi go bifo pan Gɔd biznɛs? (b) Us ɛgzampul we de na di Baybul we wi fɔ falamakata?

¹¹ Afta we wi dɔn no di say dɛn we wi nid fɔ du mɔ, wi fɔ stat fɔ mek sɔm chenj dɛn. Dis rili impɔtant bikɔs na in go mek wi liv ɔ day. (Lɛta Fɔ Rom 8:​6-8) Jiova nɔ de tink se wi fɔ pafɛkt, ɛn i de gi wi in oli spirit fɔ ɛp wi. Bɔt wisɛf sɛf nid fɔ wok tranga wan.Brɔda Jɔn Ba, we na bin Gɔvnin Bɔdi mɛmba, bin tɔk bɔt Lyuk 13:​24 se: “Bɔku pipul dɛn nɔ go ebul fɔ ɛnta di smɔl get bikɔs dɛn nɔ de wok tranga tranga wan fɔ kɔntinyu fɔ go bifo pan Gɔd biznɛs.” Wi nid fɔ tan lɛk Jekɔp,  we bin fɛt wan enjɛl ɛn nɔ bin giv-ɔp pas te i blɛs am. (Jɛnɛsis 32:​26-28) Pan ɔl we wi kin ɛnjɔy fɔ stɔdi di Baybul, wi nɔ fɔ tink se di Baybul tan lɛk novɛl we wi de rid fɔ ɛnjɔy wisɛf. Wi nid fɔ tray tranga wan fɔ fɛn di tru tin dɛn we de na di Baybul we rili valyu ɛn we go ɛp wi.

12, 13. (a) Wetin go ɛp wi fɔ du wetin Lɛta Fɔ Rom 15:​5 tɔk bɔt? (b) Aw Pita in ɛgzampul ɛn di advays we i gi wi go ɛp wi? (c) Wetin yu go du fɔ mek yu kɔntinyu fɔ go bifo pan Gɔd biznɛs? (Luk di bɔks we se “Wetin Yu Go Du fɔ Go Bifo pan Gɔd Biznɛs?”)

¹² We wi du wi bɛst fɔ go bifo pan Gɔd biznɛs, Gɔd in oli spirit go ɛp wi fɔ chenj di we aw wi de tink. Smɔl smɔl, wi kin lan fɔ tink lɛk aw Krays de tink. (Lɛta Fɔ Rom 15:​5) Di oli spirit go ɛp wi fɔ pul kɔmɔt di bad tin dɛn we wi kin want fɔ du ɛn fɔ gɛt gud abit dɛn we de mek Gɔd gladi. (Lɛta Fɔ Galeshya 5:​16, 22, 23) If wi si se wi de put ɔl wi atɛnshɔn pan want want ɔ ɛnjɔymɛnt, wi nɔ fɔ giv-ɔp. Wi fɔ kɔntinyu fɔ aks Jiova fɔ gi wi in oli spirit fɔ ɛp wi fɔ put wi maynd pan di right tin. (Lyuk 11:​13) Mɛmba di apɔsul Pita. I nɔ bin de tink ɔltɛm lɛk aw Krays de tink. (Matyu 16:​22, 23; Lyuk 22:​34, 54-62; Lɛta Fɔ Galeshya 2:​11-14) Bɔt Pita nɔ bin giv-ɔp, ɛn Jiova bin ɛp am. Smɔl smɔl, Pita bin lan aw fɔ tink lɛk aw Krays de tink. Ɛn wisɛf kin du di sem tin.

¹³ Leta Pita bin tɔk bɔt sɔm patikyula kwaliti dɛn we go ɛp wi. (Rid Pita In Sɛkɛn Lɛta 1:​5-8.) Wi nid fɔ wok tranga wan fɔ ebul fɔ kɔntrol wisɛf, fɔ bia, fɔ lɛk wi brɔda dɛn, ɛn fɔ gɛt ɔda gud kwaliti dɛn. Ɛvride i fayn fɔ mek wi aks wisɛf dis kwɛstyɔn, ‘Us kwaliti a go tray fɔ gɛt tide we go ɛp mi fɔ kɔntinyu fɔ go bifo pan Gɔd biznɛs mɔ ɛn mɔ?’

14. If wi mɛmba Gɔd pan ɛnitin we wi de du, aw dat go ɛp wi?

¹⁴ If wi de tink lɛk aw Krays de tink, dat go afɛkt di we aw wi de biev na wokples ɔ na skul, aw wi de tɔk, ɛn di tin dɛn we wi kin disayd fɔ du ɛvride. Di tin dɛn we wi de disayd fɔ du de sho se wi de tray fɔ falamakata Krays. Bikɔs wi de mɛmba Gɔd pan ɛnitin we wi de du, wi nɔ want natin fɔ pwɛl wi padi biznɛs wit Jiova. We dɛn tɛmpt wi fɔ du sɔntin we nɔ rayt, di mɛmba we wi de mɛmba Gɔd pan ɛnitin we wi de du go ɛp wi fɔ tinap tranga wan ɛn du di rayt tin. Bifo wi disayd fɔ du ɛnitin, wi fɔ stɔp ɛn aks wisɛf dɛn kwɛstyɔn dɛn ya: ‘Us advays dɛn de na di Baybul we go ɛp mi? If dis kayn tin apin to Krays, wetin i go du? Wetin go mek Jiova gladi?’ Wi nid fɔ de tink dis kayn we ɔltɛm. So lɛ wi tɔk bɔt sɔm prɔblɛm dɛn we kin mit wi. Fɔ ɛni wan pan dɛn prɔblɛm dɛn ya, wi go tɔk bɔt aw di advays dɛn we de na di Baybul go ɛp wi fɔ disayd di rayt tin.

15, 16. We wi tink lɛk aw Krays de tink, aw dis go ɛp wi fɔ disayd di rayt tin (a) we wi want fɔ pik pɔsin fɔ mared? (b) we wi want fɔ pik padi dɛn?

¹⁵ We wi de pik pɔsin fɔ mared. Wetin Jiova want wi fɔ mɛmba we wi de disayd fɔ mared de na Sɛkɛn Lɛta Fɔ Kɔrint 6:​14, 15. (Rid.) Pɔl bin ɛp wi fɔ no klia wan se pɔsin we de mɛmba Gɔd pan ɛnitin we i de du nɔ de si tin di sem we lɛk pɔsin we de du wetin in bɔdi ɔ at tɛl am fɔ du. Dɛn ɔl tu nɔ de si tin di sem we. Aw dis advays go ɛp wi we wi want fɔ pik pɔsin fɔ mared?

¹⁶ We wi de pik padi dɛn. Wetin Jiova  want wi fɔ mɛmba we wi de pik padi de na Fɔs Lɛta Fɔ Kɔrint 15:​33. (Rid.) Pɔsin we de mɛmba Gɔd pan ɛnitin we i de du nɔ go mek padi wit pipul dɛn we go mek i nɔ gɛt bɛtɛ fet igen. Tink bɔt aw yu go fala dis advays pan difrɛn prɔblɛm dɛn we yu go gɛt. Fɔ ɛgzampul, aw dis advays go ɛp yu we yu de yuz tin dɛn lɛk Fesbuk, Watsap, ɛn ɔda tin dɛn na di Intanɛt? Aw i go ɛp yu fɔ disayd if yu go ple gem na di Intanɛt wit pipul dɛn we yu nɔ wande sabi?

17-19. If yu na pɔsin we de mɛmba Gɔd pan ɛnitin, aw dat go ɛp yu fɔ (a) avɔyd tin dɛn we nɔ gɛt wan yus? (b) gɛt fayn gol dɛn? (c) sɛtul cham-mɔt?

¹⁷ Tin dɛn we kin mek wi nɔ go bifo pan Gɔd biznɛs. Wi gɛt wan impɔtant wɔnin na Di Ibru Pipul Dɛn 6:​1. (Rid.) Wetin na “dɛn bad tin we go mɛk dɛn day” we wi fɔ avɔyd? Dis na tin dɛn we wi kin du we nɔ gɛt wan yus, ɛn dɛn tin ya nɔ kin ɛp wi fɔ kɔntinyu fɔ go bifo pan Gɔd biznɛs. Dis wɔnin go ɛp wi fɔ ansa kwɛstyɔn dɛn lɛk: ‘Dis tin we a want fɔ du go bɛnifit mi ɔ gɛt ɛni valyu to mi? A fɔ put mi an pan dis biznɛs? Wetin mek a nɔ fɔ jɔyn ɛni grup we de tray fɔ chenj di we aw tin de bi na dis wɔl?’

¹⁸ Wi gol dɛn we wi de sav Gɔd. We Jizɔs bin de tɔk to sɔm pipul dɛn ɔp wan mawnten, i bin gi wan fayn advays bɔt wi gol dɛn we wi de sav Jiova. (Matyu 6:​33) Pɔsin we de mɛmba Gɔd pan ɛnitin we i de du de put di Kiŋdɔm fɔs na in layf. Dis advays ya go ɛp wi fɔ ansa kwɛstyɔn dɛn lɛk: ‘A fɔ go yunivasiti afta we a dɔn skul? A fɔ tek dis patikyula wok?’

¹⁹ Cham-mɔt. Pɔl in advays we i bin gi to di Kristian dɛn we bin de na Rom go ɛp wi we wi gɛt cham-mɔt wit ɔda pipul dɛn. (Lɛta Fɔ Rom 12:​18) Wi de falamakata Krays, ɛn na dat mek wi kin tray fɔ “de kwayɛt wan wit ɔlman.” Wetin wi go du we wi gɛt cham-mɔt wit ɔda pipul dɛn? I kin izi fɔ yu fɔ gri wit wetin ɔda pɔsin de tɛl yu? Ɔ dɛn no yu as pɔsin we de tray fɔ mek pis?—Jems 3:​18.

20. Wetin mek yu want fɔ bi pɔsin we de mɛmba Gɔd pan ɛnitin we yu de du?

²⁰ Dɛn ɛgzampul dɛn ya de sho aw di advays dɛn na di Baybul go ɛp wi fɔ disayd fɔ du tin dɛn we de sho se na Gɔd in oli spirit de gayd wi. If wi de mɛmba Gɔd pan ɛnitin we wi de du, wi go gɛt gladi at ɛn wi go satisfay. Rɔbɔt we wi bin dɔn tɔk bɔt bin tɔk se: “Afta we a dɔn gɛt tayt padi biznɛs wit Jiova, a bin bi gud papa ɛn maredman. A satisfay ɛn a gɛt gladi at.” If wi ɔl de tray tranga wan fɔ bi pɔsin we de mɛmba Gɔd pan ɛnitin we wi de du, dat go mek wisɛf ɛnjɔy bɔku bɛnifit. Wi go gɛt gladi at naw, ɛn tumara bambay wi go gɛt “da layf we na di tru layf.”—Fɔs Lɛta To Timoti 6:​19.