1. Pan ɔl we na Jiova de pantap ɔlman, wetin i dɔn kɔl ɔda pipul dɛn fɔ du?

NA Jiova de pantap ɔlman. Na in mek ɔltin, ɛn di sɛns ɛn pawa we i gɛt nɔ de dɔn. Afta we i ɛp Job fɔ ɔndastand dis, Job tɔk se: “A no se natin nɔ de we yu nɔ ebul du, ɛn nɔbɔdi nɔ go ebul tap ɛnitin we yu wan du.” (Job 42:​2) Jiova kin du ɛnitin we i want fɔ du, ɛn i nɔ nid ɛnibɔdi fɔ ɛp am. Bɔt na lɔv de mek i kɔl ɔda pipul dɛn fɔ wok wit am fɔ mek wetin i want bi.

2. Us impɔtant wok we Jiova bin gi Jizɔs fɔ du?

² Jiova mek in Pikin, Jizɔs, fɔs bifo i mek ɛnibɔdi ɛn ɛni ɔda tin. Dɔn i alaw in Pikin fɔ ɛp am mek ɔl di ɔda tin dɛn. (Jɔn 1:​2, 3, 18) Di apɔsul Pɔl bin rayt bɔt Jizɔs se: “Tru Krays, Gɔd mek ɔl wetin de na ɛvin ɛn dis wɔl, dɛn tin we wi de si ɛn dɛn wan we wi nɔ de si; ivin dɛn spirit sɛf we gɛt pawa ɛn we de rul. Tru Krays, Gɔd mek ɔltin we de na ɛvin ɛn dis  wɔl ɛn ɔltin de fɔ ɔna Krays.” (Lɛta Fɔ Kɔlɔse 1:​15-17) So Jiova nɔ bin jɔs gi in Pikin impɔtant wok fɔ du bɔt i tɛl ɔda pipul dɛn bɔt dis. Dis na big big ɔnɔ!

3. Wetin Jiova bin kɔl Adam fɔ du? Wetin mek?

³ Jiova dɔn kɔl mɔtalman dɛn bak fɔ wok wit am. Fɔ ɛgzampul, i bin alaw Adam fɔ gi ɔl di animal dɛn nem. (Jɛnɛsis 2:​19, 20) Jɔs imajin di gladi we Adam bin gladi we i de du di wok! I bin tek tɛm fɔ stɔdi aw di animal dɛn tan ɛn aw dɛn de du tin, dɔn afta dat i fɛn nem gi dɛn wan bay wan. Na Jiova bin dɔn mek ɔl di animal dɛn, so insɛf fɔ dɔn gi dɛn nem. Bɔt i bin alaw Adam fɔ gi ɔl di animal dɛn nem bikɔs i want fɔ sho am se i lɛk am. Gɔd bin gi Adam wan ɔda wok bak, dat na fɔ lɛ i mek di wan ol wɔl bi Paradays. (Jɛnɛsis 1:​27, 28) Bɔt leta Adam bin disayd fɔ lɛf fɔ wok wit Gɔd, ɛn dat bin mek in ɛn ɔl in pikin dɛn sɔfa.—Jɛnɛsis 3:​17-19, 23.

4. Aw ɔda pipul dɛn bin wok wit Gɔd fɔ mek wetin i want bi?

⁴ Leta, Gɔd kɔl ɔda pipul dɛn bak fɔ wok wit am. Noa bin bil wan big bot we mek in ɛn in famili sev di tɛm we da Ebi Ebi Ren bin kam. Mozis bin pul di Izrɛlayt dɛn kɔmɔt na Ijipt. Jɔshwa bin kɛr di Izrɛlayt dɛn go na di land we Gɔd bin dɔn prɔmis dɛn. Sɔlɔmɔn bin bil di tɛmpul na Jerusɛlɛm. Meri bin bi Jizɔs in mama. Ɔl dɛn fetful pipul dɛn ya ɛn plɛnti ɔda wan dɛn bin wok wit Jiova fɔ mek wetin i want bi.

5. Us wok wi ɔl go ebul fɔ du? Jiova bin nid fɔ kɔl wi pan dis wok? (Luk di pikchɔ nia dis atikul in taytul.)

⁵ Tide, Jiova de kɔl wi fɔ du ɔl wetin wi ebul fɔ du fɔ sɔpɔt in Kiŋdɔm. Bɔku we dɛn de fɔ sav Gɔd. Pan ɔl we wi ɔl nɔ go ebul fɔ sav am di sem we, wi ɔl ebul fɔ prich di gud nyus bɔt di Kiŋdɔm. Jiova insɛf sɛf fɔ dɔn du dis wok. Insɛf sɛf fɔ dɔn tɔk frɔm ɛvin to pipul dɛn na dis wɔl. Jizɔs bin se Jiova kin ivin mek di ston dɛn tɛl ɔda pipul dɛn bɔt di Kiŋ na In Kiŋdɔm. (Lyuk 19:​37-40) Bɔt Jiova alaw wi fɔ “jɔyn an fɔ du .  . . in wok.” (Fɔs Lɛta Fɔ Kɔrint 3:​9) Di apɔsul Pɔl bin rayt se: “Wi we de wok wit Gɔd de beg una mek una nɔ mek di gud we Gɔd gud to una go fɔ natin.” (Sɛkɛn Lɛta Fɔ Kɔrint 6:​1) Na big big ɔnɔ fɔ lɛ Gɔd kɔl wi fɔ wok wit am. Lɛ wi si sɔm rizin dɛn we mek dis kin mek wi rili gladi.

6. Aw Gɔd in fɔs Pikin bin fil we i bin de wok wit in Papa?

⁶ Jiova Gɔd in pipul dɛn kin gladi ɔltɛm we dɛn de wok wit am. Bifo Gɔd in fɔs Pikin kam na dis wɔl, i bin tɔk se: “We PAPA GƆD bigin du in wok, na mi fɔs i mek bifo i mek ɛnitin . . . A bin de mek i gladi ɛvride, ɛn misɛf bin gladi fɔ de wit am.” (Prɔvabs 8:​22, 30) We Jizɔs bin de wok wit in Papa, i bin gladi bikɔs i bin de du bɔku tin dɛn ɛn i bin no se in Papa lɛk am. Bɔt we wi naw?

7. Wetin mek di prichin wok kin mek wi gladi?

⁷ Jizɔs bin se wi kin gladi we wi gi pɔsin sɔntin ɛn we pɔsin gi wi sɔntin. (Di Apɔsul Dɛn Wok [Akt] 20:​35) Wi bin gladi we wi lan di tru tin bɔt Jiova, bɔt wetin go mek wi gladi bak we wi tɛl ɔda pipul dɛn bɔt di trut? Na we wi si se dɛn rili gladi we dɛn ɔndastand wetin di Baybul de tich ɛn bigin fɔ gɛt tayt padi biznɛs wit Gɔd. Wi kin gladi we wi si dɛn de chenj di we aw dɛn de tink ɛn di we aw  dɛn de liv dɛn layf. Di prichin wok na di wok we impɔtant pas ɔl ɔda wok dɛn. Ɛn no ɔda wok nɔ de we go mek wi gladi rich di prichin wok. Dis wok de mek am pɔsibul fɔ lɛ di wan dɛn we kam fɔ bi Gɔd in padi gɛt layf we go de sote go.—Sɛkɛn Lɛta Fɔ Kɔrint 5:​20.

8. Wetin sɔm pipul dɛn dɔn se we dɛn de wok wit Jiova?

⁸ We wi ɛp ɔda pipul dɛn fɔ lan bɔt Gɔd, wi no se wi de du wetin Jiova want ɛn i gladi fɔ di tray we wi de tray fɔ sav am. Dis de mek wisɛf gladi. (Rid Fɔs Lɛta Fɔ Kɔrint 15:​58.) Mako, we de na Itali, se: “A gɛt gladi at we mɔni nɔ de bay we a kam fɔ no se a de gi Jiova mi bɛst, ɛn a nɔ de gi mi bɛst to pɔsin we go fɔgɛt wetin a dɔn du kwik kwik wan.” Semweso, Franko, we in bak de na Itali, tɔk se: “Jiova de yuz in Wɔd ɛn ɔda tin dɛn we de ɛp wi fɔ kam nia am, fɔ mɛmba wi ɛvride se i lɛk wi ɛn ɛnitin we wi du fɔ am impɔtant, ilɛksɛf wetin wi de du tan lɛk natin to wi. Na dat mek a gladi we a de wok wit Gɔd ɛn i dɔn rili mek mi layf bɛtɛ.”

9. Aw Jiova ɛn Jizɔs bin lɛk dɛnsɛf? Wetin mek?

⁹ We wi de wok wit di wan dɛn we wi lɛk, i de ɛp wi fɔ kam nia dɛn. Wi go kam fɔ no mɔ bɔt dɛn ɛn di gud kwaliti dɛn we dɛn gɛt. Wi go kam fɔ no wetin dɛn plan fɔ du we dɛn de sav Jiova ɛn aw dɛn de tray fɔ du am. Sɔntɛm Jizɔs bin wok wit Jiova pas ɔmɔs bilyɔn ia so. Dɛn bin so lɛk dɛnsɛf dat natin nɔ go ebul fɔ pwɛl di lɔv we de bitwin dɛn. Jizɔs bin ɛksplen aw in ɛn in Papa lɛk dɛnsɛf, we i se: “Mi ɛn mi Papa na wan.” (Jɔn 10:​30) Dɛn bin rili gɛt wanwɔd, ɛn dɛn bin de jɔyn an fɔ wok.

10. Wetin mek di prichin wok de mek wi kam nia Gɔd ɛn ɔda pipul dɛn?

¹⁰ Jizɔs bin beg Jiova fɔ protɛkt in disaypul dɛn. Wetin mek? Jizɔs bin pre se: “So dat dɛn ɔl go bi wan ɛn gɛt wan at lɛkɛ aw mi ɛn yu gɛt wan at.” (Jɔn 17:​11) We wi du wetin Gɔd want ɛn ɛp fɔ du di prichin wok, wi go kam fɔ rili ɔndastand in wɔndaful kwaliti dɛn. Wi go lan wetin mek i mek sɛns fɔ abop pan am ɛn du wetin i de tɛl wi. Ɛn we wi go nia Gɔd, insɛf go kam nia wi. (Rid Jems 4:​8.) Dɔn wi go kam nia wi brɔda ɛn sista dɛn bikɔs wi ɔl kin gɛt di sem kayn prɔblɛm dɛn, ɛn di sem kayn tin dɛn kin mek wi gladi. Wi go kam nia dɛn bak bikɔs wi ɔl plan fɔ du di sem tin we wi de sav Jiova. Wi de wok togɛda, gladi togɛda, ɛn bia togɛda. Wan sista na Briten we nem Ɔktevia, tɔk se: “We a de wok wit Jiova, dat de ɛp mi fɔ kam nia ɔda pipul dɛn.” I ɛksplen se dis na bikɔs i gɛt padi dɛn naw we dɛn ɔl de “du di sem tin ɛn tink di sem we.” Fɔ tru, wi ɔl de fil di sem we. We wi si di tray we  wi brɔda dɛn de tray fɔ du wetin Jiova want, i de mek wi kam nia dɛn.

11. Wetin mek wi go kam nia Jiova ɛn wi brɔda dɛn mɔ ɛn mɔ insay di nyu wɔl?

¹¹ Wi rili lɛk Gɔd ɛn wi brɔda dɛn naw, bɔt insay di nyu wɔl, wi go lɛk dɛn mɔ. Tink bɔt ɔl di fayn fayn wok dɛn we wi go du tumara bambay! Wi go gladi fɔ si di wan dɛn we bin dɔn day ɛn tich dɛn bɔt Jiova. Wi go wok bak fɔ mek di wan ol wɔl bi Paradays. Wi go rili gladi fɔ wok togɛda ɛn smɔl smɔl wi ɔl go pafɛkt we Krays go de rul. Ɔlman go kam nia Jiova ɛn in kɔmpin mɔtalman mɔ ɛn mɔ, ɛn Jiova go “satisfay” ɔltin we gɛt layf.—Sam 145:​16.

12. Aw di prichin wok kin protɛkt wi?

¹² Wi nid fɔ protɛkt wi padi biznɛs wit Jiova. Wi de insay Setan in wɔl ɛn wi nɔ pafɛkt, so i kin izi fɔ lɛ wi bigin tink ɛn du tin lɛk di pipul dɛn na di wɔl. I jɔs tan lɛk we wi de swim na riva we gɛt kɔrɛnt we de kɛr wi go na say we wi nɔ want fɔ go. So wi nid fɔ yuz ɔl wi trɛnk fɔ swim na di say we wi want fɔ go. Semweso, wi nid fɔ wok tranga wan so dat wi nɔ go du tin lɛk di pipul dɛn na Setan in wɔl. Aw di prichin wok kin protɛkt wi? We wi de tɔk bɔt Jiova ɛn di tin dɛn we de na di Baybul, dis de ɛp wi fɔ put wi maynd pan di tin dɛn we impɔtant ɛn gud, wi nɔ go put wi maynd pan tin dɛn we go mek wi fet wik. (Lɛta Fɔ Filipay 4:​8) Di prichin wok kin mek wi gɛt mɔ fet bikɔs i de mek wi mɛmba di fayn fayn tin dɛn we Gɔd dɔn prɔmis ɛn di fayn advays dɛn we i de gi wi. Ɛn i de ɛp wi bak fɔ kɔntinyu fɔ gɛt di kwaliti dɛn we wi nid so dat wi go protɛkt wisɛf frɔm Setan ɛn in wɔl.—Rid Lɛta Fɔ Ɛfisɔs 6:​14-17.

13. Aw wan Witnɛs na Ɔstrelia fil bɔt di prichin wok?

¹³ We wi bizi de prich, stɔdi di Baybul, ɛn du tin dɛn fɔ ɔda pipul dɛn na di kɔngrigeshɔn, wi de protɛkt wisɛf bikɔs wi nɔ gɛt tɛm fɔ wɔri tumɔs bɔt wi yon prɔblɛm dɛn. Wan brɔda na Ɔstrelia we nem Joɛl, tɔk se: “Di prichin wok de ɛp mi fɔ no wetin rili de apin na di wɔl. I de mɛmba mi bɔt di prɔblɛm dɛn we de mit pipul dɛn ɛn di bɛnifit dɛn we a dɔn gɛt we a de fala di advays dɛn we de na di Baybul. Di prichin wok de ɛp mi fɔ put misɛf dɔŋ bikɔs i de gi mi di chans fɔ abop pan Jiova ɛn mi brɔda ɛn sista dɛn.”

14. Wetin mek we wi de kɔntinyu fɔ prich de sho se Gɔd in spirit de wit wi?

¹⁴ Di prichin wok de mek wi rili biliv se Gɔd in spirit de wit wi. Fɔ ɛgzampul, imajin se na yu wok fɔ gi pipul dɛn bred na yu eria. Dɛn nɔ de pe yu fɔ dis wok we yu de du, ɛn yu ivin gɛt fɔ spɛn yu yon mɔni fɔ du dis wok. Apat frɔm dat, bɔku pipul dɛn nɔ want di bred, ɛn sɔm pipul dɛn ivin et yu fɔ we yu de briŋ di bred kam to dɛn. Aw lɔng yu go kɔntinyu fɔ du dis wok? I nɔ go te, yu at go pwɛl, ɛn sɔntɛm yu go lɛf fɔ du di wok. Bɔt stil, bɔku pan wi kin kɔntinyu fɔ du di prichin wok, pan ɔl we wi kin yuz wi yon mɔni ɛn tɛm ɛn pan ɔl we pipul dɛn kin provok wi ɔ vɛks pan wi. Dis de sho se Gɔd in spirit de ɛp wi.

15. Wetin di prichin wok gɛt fɔ du wit wetin Jiova want fɔ mɔtalman?

¹⁵ Wetin di prichin wok gɛt fɔ du wit wetin Jiova want fɔ mɔtalman? Gɔd bin  want fɔ lɛ mɔtalman de na dis wɔl sote go, ɛn wetin i bin want nɔ chenj ivin we Adam bin sin. (Ayzaya 55:​11) Gɔd dɔn mek we fɔ pul wi pan sin ɛn day. Aw i du dis? Na we i mek Jizɔs kam na di wɔl ɛn day fɔ wi. Bɔt fɔ lɛ wi bɛnifit frɔm dis day we Jizɔs day fɔ wi, wi nid fɔ obe Gɔd. So Jizɔs bin tich pipul dɛn bɔt wetin Gɔd want dɛn fɔ du, ɛn i bin tɛl in disaypul dɛn fɔ du di sem tin. Tide, we wi de prich ɛn ɛp ɔda pipul dɛn fɔ bi Gɔd in padi, wi de wok wit Gɔd fɔ pul mɔtalman pan sin ɛn day.

16. Aw di prichin wok gɛt sɔntin fɔ du wit Gɔd in lɔ dɛn we pas ɔl ɔda lɔ?

¹⁶ We wi ɛp ɔda pipul dɛn fɔ gɛt layf we go de sote go, wi de sho se wi lɛk dɛn ɛn Jiova. Jiova “want mek ɔlman sev ɛn mek dɛn no wetin tru.” (Fɔs Lɛta To Timoti 2:​4) We wan Faresi aks Jizɔs uswan pan Gɔd in lɔ dɛn pas ɔl di ɔda wan dɛn, Jizɔs ansa am se: “‘Yu fɔ lɛk di Masta we na yu Gɔd wit ɔl yu at, wit ɔl yu layf ɛn wit ɔl yu maynd.’ Dis na di lɔ we pas ɔl di ɔda wan dɛn. Di ɔda lɔ we impɔtant nain dis: ‘Yu fɔ lɛk yu kɔmpin mɔtalman lɛkɛ aw yu lɛk yusɛf.’” (Matyu 22:​37-39) We wi de prich di gud nyus, wi de obe dɛn lɔ ya.—Rid Di Apɔsul Dɛn Wok [Akt] 10:​42.

17. Aw yu fil bɔt di ɔnɔ we yu gɛt fɔ prich di gud nyus?

¹⁷ Na big big blɛsin wi gɛt! Jiova dɔn gi wi wok we de gi wi gladi at, we de briŋ wi kam nia in ɛn wi brɔda dɛn, ɛn we de protɛkt wi padi biznɛs wit am. I de gi wi bak di chans fɔ sho se wi lɛk in ɛn ɔda pipul dɛn. Jiova gɛt bɔku bɔku savant dɛn ɔlsay na di wɔl, ɛn dɛn ɔl gɛt difrɛn tin dɛn we de mit dɛn na layf. Bɔt ilɛksɛf wi yɔŋ ɔ ol, wi jɛntri ɔ wi po, wi gɛt trɛnk ɔ wi nɔ gɛt trɛnk, wi de du ɔl wetin wi ebul du fɔ tɛl ɔda pipul dɛn bɔt wetin wi biliv. Wi ɔl de fil lɛk Chantɛl, na Frans we se: “Di Pɔsin we gɛt pawa pas ɔlman, we mek ɔltin, di Gɔd we gladi ɔltɛm, de tɛl mi se: ‘Go! Tɔk! Tɔk fɔ mi, tɔk frɔm yu at. A go gi yu trɛnk, a go gi yu mi Wɔd di Baybul, a go sɔpɔt yu frɔm ɛvin, a go gi yu pipul dɛn na di wɔl we go de wok wit yu, a go de gi yu trenin fɔ ɛp yu, ɛn tɛl yu wetin-ɛn-wetin yu fɔ du di rayt tɛm.’ Na big big ɔnɔ wi gɛt fɔ du wetin Jiova tɛl wi fɔ du ɛn fɔ wok wit am!”