1, 2. Wetin mek Gɔd nɔ bin want Sɔl fɔ bi kiŋ igen? (Luk di pikchɔ nia dis atikul in taytul.)

WE JIOVA bin pik Sɔl fɔ bi kiŋ, Sɔl bin no se nɔto ɔltin i go ebul fɔ du. (Fɔs Samiɛl 9:1, 2, 21; 10:20-24) Bɔt afta i bi kiŋ, i bigin du tin dɛn we i nɔ gɛt rayt fɔ du. Wan tɛm, bɔku bɔku Filistin dɛn kam fɔ fɛt di Izrɛlayt dɛn. Di prɔfɛt Samiɛl bin dɔn tɛl Sɔl se i go kam mek sakrifays to Jiova. Bɔt bifo Samiɛl kam, bɔku pan di Izrɛlayt dɛn fred, ɛn dɛn bigin fɔ lɛf Sɔl. Sɔl nɔ bin ebul wet igen fɔ Samiɛl, so i go mek di sakrifays fɔ insɛf. Sɔl nɔ bin gɛt rayt fɔ du dis ɛn Jiova nɔ bin gladi.—Fɔs Samiɛl 13:5-9.

² We Samiɛl kam, i tɔk pan Sɔl bikɔs i nɔ obe Jiova. Bɔt Sɔl nɔ bin tink se na bad tin i dɔn du. I tray fɔ mek ɛkskyuz, ɛn i ivin blem ɔda pipul dɛn fɔ di mistek we i dɔn mek. (Fɔs Samiɛl 13:10-14) Frɔm da tɛm de, Sɔl bigin fɔ du bɔku ɔda tin dɛn we i nɔ bin gɛt rayt fɔ du. So Jiova nɔ bin want  fɔ mek i bi kiŋ igen. (Fɔs Samiɛl 15:22, 23) Sɔl bin bigin fayn bɔt i ɛnd bad.—Fɔs Samiɛl 31:1-6.

3. (a) Na tru se nɔto ɔltin wi ebul fɔ du, bɔt wetin bɔku pipul dɛn tink bɔt dat? (b) Us kwɛstyɔn dɛn wi go gɛt ansa to?

³ Tide, bɔku pipul dɛn fil se dɛn nɔ go ɛnjɔy dɛn layf ɔ gɛt wok we de pe dɛn bɔku mɔni if dɛn de tink se nɔto ɔltin dɛn ebul fɔ du. Dɛn de bost bɔt dɛnsɛf bikɔs dɛn want fɔ mek lɛk se dɛn bɛtɛ pas ɔda pipul dɛn. Fɔ ɛgzampul, wan aktɔ ɛn pɔlitishian we bɔku pipul dɛn sabi bin tɔk se: “Natin nɔ de we a nɔ ebul du; a op se a go ebul du ɔltin.” Bɔt wetin mek i impɔtant fɔ lɛ Kristian dɛn go de mɛmba se nɔto ɔltin dɛn ebul fɔ du? Wetin dis min? Wetin i nɔ min? Wi go ansa ɔl dɛn kwɛstyɔn dɛn ya insay dis atikul. Ɛn insay di nɛks atikul, wi go si wetin go ɛp wi fɔ de mɛmba se nɔto ɔltin wi ebul fɔ du, pan ɔl we i nɔ kin izi fɔ du am.

4. Wetin kin mek wi du tin we wi nɔ gɛt rayt fɔ du?

⁴ Di Baybul sho se pɔsin we de du tin we i nɔ gɛt rayt fɔ du na pɔsin we nɔ ɔmbul. (Rid Prɔvabs 11:2.) Devid bin beg Jiova se: “Nɔ alaw yu savant fɔ de du tin dɛn we i nɔ gɛt rayt fɔ du.” (Sam 19:13, NW) Wetin kin mek wi du tin we wi nɔ gɛt rayt fɔ du? Sɔntɛm na bikɔs wi nɔ peshɛnt ɛn wi prawd. I go mɔs bi se wi ɔl dɔn du sɔntin we wi nɔ gɛt rayt fɔ du bikɔs wi nɔ pafɛkt. Bɔt as wi dɔn si frɔm Kiŋ Sɔl in ɛgzampul, if wi tɔn am abit, Jiova nɔ go gladi. Sam 119:21 se Jiova “nɔ de tɔlaret udat de kak.” Wetin mek?

5. Wetin mek i nɔ fayn fɔ du tin we wi nɔ gɛt rayt fɔ du?

⁵ Fɔs, if wi du sɔntin we wi nɔ gɛt rayt fɔ du, wi de sho se wi nɔ gɛt rɛspɛkt fɔ Jiova, we na wi Gɔd ɛn we de rul wi. Sɛkɔn, we wi du tin dɛn we wi nɔ gɛt rayt fɔ du, wi go mɔs gɛt cham-mɔt ɔ agyu wit ɔda pipul dɛn. (Prɔvabs 13:10) Ɛn tɔd, wi go tan lɛk fulman we ɔda pipul dɛn no se wi dɔn du sɔntin we wi nɔ gɛt rayt fɔ du. (Lyuk 14:8, 9) Dis dɔn sho wi wetin mek Jiova want lɛ wi mɛmba se nɔto ɔltin wi ebul fɔ du.

6, 7. Aw pɔsin we no se nɔto ɔltin i ebul fɔ du tan lɛk pɔsin we ɔmbul?

⁶ Pɔsin we no se nɔto ɔltin i ebul fɔ du jɔs tan lɛk pɔsin we ɔmbul. Ɛn pɔsin we ɔmbul na sɔmbɔdi we nɔ prawd; i de tek am se ɔda pipul dɛn bɛtɛ pas am. (Lɛta Fɔ Filipay 2:3) I no se sɔm tin dɛn de we i nɔ ebul fɔ du, ɛn i de put insɛf dɔŋ ɛn gri we i mek mistek. I rɛdi fɔ lisin to ɔda pipul dɛn ɛn lan frɔm dɛn. Pɔsin we ɔmbul de rili mek Jiova gladi.

⁷ Di Baybul sho se dis kayn pɔsin no se sɔm tin dɛn de we i nɔ ebul fɔ du ɔ we i nɔ gɛt rayt fɔ du. Dis de ɛp am fɔ rɛspɛkt ɔda pipul dɛn ɛn trit dɛn fayn.

8. Aw wi nɔ fɔ de tink if wi want fɔ de mɛmba se nɔto ɔltin wi ebul fɔ du?

 ⁸ Bɔt, sɔntɛnde wi nɔ kin ivin no we wi de du sɔntin we wi nɔ gɛt rayt fɔ du. Aw dis kin bi? Wi kin bigin fil se wi impɔtant pas ɔda pipul dɛn bikɔs wi ɔ di wan dɛn we wi sabi gud gud wan gɛt impɔtant wok dɛn na di kɔngrigeshɔn. (Lɛta Fɔ Rom 12:16) Ɔ wi kin bigin du tin dɛn fɔ mek ɔda pipul dɛn notis wi. (Fɔs Lɛta To Timoti 2:9, 10) Wi kin ivin bigin fɔ tɛl pipul dɛn wetin dɛn fɔ du ɔ wetin dɛn nɔ fɔ du.—Fɔs Lɛta Fɔ Kɔrint 4:6.

9. Wetin dɔn mek sɔm pipul dɛn du tin we dɛn nɔ gɛt rayt fɔ du? Gi wan ɛgzampul na di Baybul.

⁹ Wi go bigin du tin dɛn we wi nɔ gɛt rayt fɔ du, if wi nɔ kɔntrol di we aw wi de tink. Bɔku pipul dɛn dɔn du tin we dɛn nɔ gɛt rayt fɔ du bikɔs dɛn want lɛ ɔda pipul dɛn prez dɛn, dɛn de jɛlɔs ɔda pipul dɛn, ɔ dɛn nɔ kɔntrol dɛn wamat. Dis bin apin to sɔm pipul dɛn we di Baybul tɔk bɔt, lɛk Absalɔm, Uzaya, ɛn Nɛbyukadnɛza. Jiova bin mek dɛn no klia wan se dɛn nid fɔ put dɛnsɛf dɔŋ.—Sɛkɛn Samiɛl 15:1-6; 18:9-17; Sɛkɛn Kronikul 26:16-21; Daniɛl 5:18-21.

10. Wetin mek wi nɔ fɔ de jɔj ɔda pipul dɛn? Gi wan ɛgzampul na di Baybul.

¹⁰ Ɔda rizin dɛn de we mek pipul dɛn nɔ kin mɛmba se nɔto ɔltin dɛn gɛt rayt fɔ du. Tink bɔt Abimɛlɛk ɛn Pita. (Jɛnɛsis 20:2-7; Matyu 26:31-35) Fɔ se dɛn man ya bin du tin we dɛn nɔ gɛt rayt fɔ du? Ɔ yu tink se dɛn bin du am bikɔs dɛn nɔ bin no di tru ɔ dɛn nɔ bin tink bifo dɛn du am? Bikɔs wi nɔ no wetin de na pipul dɛn at, wi nɔ fɔ jɔj ɔda pipul dɛn.—Rid Jems 4:12.

11. Wetin wi nid fɔ ɔndastand?

¹¹ Pɔsin we no se nɔto ɔltin i ebul fɔ du, ɔndastand di wok we i gɛt na Gɔd in ɔganayzeshɔn. Jiova na Gɔd we ɔganayz. I dɔn gi ɔlman na di kɔngrigeshɔn in yon wok we i fɔ du. Dɛn nid wi ɔl na di kɔngrigeshɔn. So Jiova dɔn gi wi ɔl sɛns ɛn mek wi no difrɛn tin dɛn we wi ebul fɔ du gud gud wan, ɛn i de alaw wi fɔ disayd aw wi go yuz dɛn. If wi no se nɔto ɔltin wi ebul fɔ du, wi go du di tin dɛn we Jiova dɔn mek wi sabi, di we aw in want lɛ wi du am. (Lɛta Fɔ Rom 12:4-8) Wi no se Jiova want wi fɔ du dɛn tin ya fɔ prez am ɛn fɔ ɛp ɔda pipul dɛn.—Rid Pita In Fɔs Lɛta 4:10.

12, 13. Wetin wi fɔ mɛmba if tin bigin fɔ chenj we wi de sav Jiova?

¹² Sɔntɛnde, as wi de sav Jiova, dɛn kin chenj di wok we wi de du. Fɔ ɛgzampul, tink bɔt di difrɛn tɛm dɛn we Jiova chenj di wok we Jizɔs bin de du. Fɔs, Jizɔs in wan bin de wit in Papa. (Prɔvabs 8:22) As tɛm de go, i ɛp Jiova fɔ mek di enjɛl dɛn, di wɔl, ɛn mɔtalman. (Lɛta Fɔ Kɔlɔse 1:16) Leta Jiova sɛn am na di wɔl. Dɛn bɔn am as bebi ɛn leta in tɔn big man. (Lɛta Fɔ Filipay 2:7) Afta Jizɔs day, i bin go bak na ɛvin, ɛn insay 1914 i bi Kiŋ na Gɔd in Kiŋdɔm. (Di Ibru Pipul Dɛn 2:9) Ɛn tumara bambay, afta we i dɔn rul as Kiŋ fɔ wan tawzin ia, i go gi di Kiŋdɔm bak to Jiova so dat ‘Gɔd go de oba ɔlman.’—Fɔs Lɛta Fɔ Kɔrint 15:28.

¹³ Wisɛf gɛt fɔ de si bɔku chenj dɛn na wi layf. Sɔntɛm di tin dɛn we wi de  disayd fɔ du kin mek wi wok chenj. Fɔ ɛgzampul, sɔntɛm wi nɔ bin mared, bɔt leta wi disayd fɔ mared. Ɔ sɔntɛm wi bɔn pikin dɛn. Leta, wi go disayd fɔ mek chenj dɛn so dat wi go ebul fɔ yuz ɔl wi tɛm fɔ sav Jiova. Sɔntɛnde, di tin dɛn we de apin to wi kin mek wi wok chenj. Wi go ebul fɔ du mɔ, ɔ wi nɔ go ebul fɔ du bɛtɛ. Bɔt ilɛksɛf wi yɔŋ ɔ ol, wi gɛt wɛlbɔdi ɔ wi nɔ gɛt, Jiova no di bɛst we aw wi kin ebul fɔ sav am. I nɔ de fil se wi fɔ du wetin wi nɔ ebul fɔ du. Ɛn i rili gladi wit ɛnitin we wi du fɔ am.—Di Ibru Pipul Dɛn 6:10.

14. If wi no se nɔto ɔltin wi ebul fɔ du, aw dat go ɛp wi fɔ satisfay ɛn gladi fɔ ɛni wok?

¹⁴ Jizɔs bin gladi fɔ ɛni wok we Jiova gi am, ɛn wisɛf fɔ gladi fɔ wi yon wok. (Prɔvabs 8:30, 31) Pɔsin we no se nɔto ɔltin i ebul fɔ du de satisfay wit in wok dɛn we i gɛt na di kɔngrigeshɔn. I nɔ de put in atɛnshɔn pan wetin ɔda pipul dɛn de du. Bifo dat, i de satisfay wit di wok we i gɛt insay Gɔd in ɔganayzeshɔn. I de si am as wok we kɔmɔt frɔm Jiova. Pɔsin we no se nɔto ɔltin i ebul fɔ du de rɛspɛkt ɔda pipul dɛn, ɛn i kin gladi fɔ ɛp dɛn. I no se Jiova dɔn gi dɛnsɛf wok.—Lɛta Fɔ Rom 12:10.

15. Wetin wi lan frɔm Gidiɔn in ɛgzampul?

¹⁵ Gidiɔn na man we bin no se nɔto ɔltin i ebul fɔ du ɛn dis na fayn ɛgzampul fɔ wi. We Jiova bin pik Gidiɔn fɔ sev Izrɛl frɔm di Midianayt dɛn, i bin tɔk se: “Aw in we na di las wan na di grup we wik pas ɔl na di Manasɛ fambul, go ebul fri Izrɛl.” (Di Jɔj Dɛm 6:15) Bɔt Gidiɔn bin abop pan Jiova, ɛn  i bin gri fɔ du di wok. Dɔn Gidiɔn bin mek shɔ se i ɔndastand gud wan wetin Jiova want am fɔ du, ɛn i pre fɔ lɛ Jiova ɛp am. (Di Jɔj Dɛm 6:36-40) Gidiɔn na man we bin gɛt trɛnk ɛn maynd, bɔt i bin gɛt sɛns bak ɛn i bin de tek tɛm. (Di Jɔj Dɛm 6:11, 27) Leta we di pipul dɛn bin want am fɔ mek i rul dɛn, i nɔ gri fɔ du am. Afta i dɔn du wetin Jiova tɛl am fɔ du, i go bak na in os.—Di Jɔj Dɛm 8:22, 23, 29.

16, 17. Aw pɔsin we no se nɔto ɔltin i ebul fɔ du go go bifo pan Gɔd biznɛs?

¹⁶ If pɔsin gri fɔ du nyu wok ɔ want fɔ du mɔ na di kɔngrigeshɔn, dat nɔ min se i nɔ no se nɔto ɔltin i ebul fɔ du. Di Baybul tɔk se i rili fayn fɔ mek pɔsin we de sav Jiova du mɔ fɔ wok fɔ in brɔda dɛn ɛn fɔ go bifo pan Gɔd biznɛs. (Fɔs Lɛta To Timoti 4:13-15) Bɔt yu tink se pas wi gɛt nyu wok bifo wi go bifo pan Gɔd biznɛs? Nɔ. Wi ɔl fɔ kɔntinyu fɔ go bifo pan Gɔd biznɛs bay we wi de tray fɔ gɛt gud abit dɛn mɔ ɛn mɔ ɛn du di wok dɛn we Jiova dɔn gi wi, so dat wi go ebul fɔ sav am fayn fayn wan ɛn ɛp ɔda pipul dɛn.

¹⁷ Pɔsin we no se nɔto ɔltin i ebul fɔ du, go tray fɔ no aw fɔ du di wok bifo i gri fɔ du am. I go pre bɔt am ɛn tink gud wan if i go ebul fɔ du di wok. I fɔ aks insɛf dis kwɛstyɔn: ‘If a tek dis wok, a go gɛt bɔku tɛm ɛn trɛnk fɔ du ɔda tin dɛn we impɔtant?’ If nɔto so i bi, i fɔ aks insɛf bak if ɔda pɔsin go ebul du sɔm wok dɛn we i de du. Afta i dɔn tink bɔt dis, if in na pɔsin we no se nɔto ɔltin i ebul fɔ du, i kin disayd se i nɔ go ebul fɔ du dis nyu wok fayn. If wi na pɔsin we no se nɔto ɔltin wi ebul fɔ du, wi go nid fɔ se nɔ.

18. (a) Wetin pɔsin we no se nɔto ɔltin i ebul fɔ du, go du we dɛn gi am nyu wok? (b) Aw Lɛta Fɔ Rom 12:3 go ɛp wi fɔ bi pɔsin we no se nɔto ɔltin i ebul fɔ du?

¹⁸ Jiova want wi fɔ ‘put wisɛf dɔŋ.’ (Mayka 6:8) So we dɛn gi wi nyu wok, wi fɔ aks Jiova fɔ ɛp wi, jɔs lɛk aw Gidiɔn bin du. Wi nid fɔ tink gud wan bɔt wetin Jiova de tɛl wi na di Baybul ɛn wetin in ɔganayzeshɔn tɛl wi fɔ du. Lɛ wi mɛmba se ɛnitin we wi ebul fɔ du we wi de sav Jiova nɔto bikɔs wi sabi du am bɔt na bikɔs Jiova ɔmbul ɛn i want fɔ ɛp wi. (Sam 18:35, NW) Pɔsin we no se nɔto ɔltin i ebul fɔ du ‘nɔ go tink se i bɛtɛ pas aw i tan.’—Rid Lɛta Fɔ Rom 12:3.

19. Wetin mek wi fɔ bi pɔsin we no se nɔto ɔltin i ebul fɔ du?

¹⁹ Pɔsin we no se nɔto ɔltin i ebul fɔ du, no se na Jiova nɔmɔ fɔ gɛt ɔl di prez bikɔs na in mek ɔltin ɛn na in wangren de oba ɔlman na di wɔl. (Rɛvɛleshɔn 4:11) If wi no se nɔto ɔltin wi ebul fɔ du, wi go gladi fɔ du ɛni wok we wi de wɔship Jiova. Wi go rɛspɛkt di we aw wi brɔda ɛn sista dɛn de fil ɛn dis go mek wi gɛt wanwɔd. Pɔsin we no se nɔto ɔltin i ebul fɔ du, de tink gud wan bifo i du sɔntin, so dis de mek i nɔ mek siriɔs mistek. Jiova kin rili gladi fɔ di wan dɛn we no se nɔto ɔltin dɛn ebul fɔ du. So na ɔl dis mek Gɔd in pipul dɛn de si am se i rili impɔtant fɔ lɛ dɛn no se nɔto ɔltin dɛn ebul fɔ du. Insay di nɛks atikul, wi go si aw wi go ebul kɔntinyu fɔ bi pɔsin we no se nɔto ɔltin i ebul fɔ du ilɛksɛf i nɔ izi.