1, 2. Aw bɔku pipul dɛn kin si dɛn wok?

BƆKU pipul dɛn fil se na di wok we dɛn de du na in de mek dɛn impɔtant ɔ nɔ impɔtant. Na sɔm kɔntri dɛn, we yu de tray fɔ no sɔmbɔdi, i kɔmɔn fɔ aks am se: “Uskayn wok yu de du?”

² Sɔntɛnde, we di Baybul de tɛl wi bɔt pipul dɛn, i kin tɛl wi bak bɔt di kayn wok we dɛn de du. Fɔ ɛgzampul, i se “Matyu we bin de gɛda taks,” “Saymɔn we de wok dɛn bif kanda,” ɛn “Lyuk, da dɔkta we wi lɛk.” (Matyu 10:3; Di Apɔsul Dɛn Wok [Akt] 10:6; Lɛta Fɔ Kɔlɔse 4:14) Ɔda tɛm dɛn, di Baybul tɔk bɔt di wok dɛn we Jiova dɔn gi pipul dɛn fɔ du. Tink bɔt Kiŋ Devid, di prɔfɛt Ilayja, ɛn di apɔsul Pɔl. Dɛn man ya bin lɛk di wok we Jiova bin gi dɛn. Wisɛf fɔ lɛk ɛni wok we Jiova gi wi fɔ du.

3. Wetin mek di wan dɛn we dɔn ol fɔ tren di wan dɛn we yɔŋ? (Luk di pikchɔ nia dis atikul in taytul.)

 ³ Wi lɛk fɔ wok fɔ Jiova ɛn wi lɛk wi wok dɛn. Bɔku pan wi de rili ɛnjɔy wi wok ɛn wi op fɔ kɔntinyu fɔ du am as lɔng as wi ebul. Bɔt o ya, we pipul dɛn kin ol, dɛn nɔ kin ebul fɔ du ɔl wetin dɛn bin dɔn yus fɔ du we dɛn bin yɔŋ. (Ɛkliziastis 1:4) Dis nɔ kin izi fɔ Jiova in pipul dɛn. Tide, di prichin wok de kɔntinyu fɔ go bifo, ɛn Jiova in ɔganayzeshɔn de yuz di ilɛktronik tin dɛn we dɛn de mek fɔ lɛ bɔku pipul dɛn yɛri di gud nyus. Bɔt sɔntɛnde, i nɔ kin izi fɔ mek di wan dɛn we dɔn ol lan fɔ du tin nyu we. (Lyuk 5:39) Ɛn bak, i nɔmal fɔ lɛ pipul dɛn nɔ gɛt bɛtɛ trɛnk igen as dɛn de ol. (Prɔvabs 20:29) So i rili mek sɛns fɔ mek di wan dɛn we dɔn ol tren di yɔŋ wan dɛn fɔ du mɔ wok na Jiova in ɔganayzeshɔn.—Rid Sam 71:18.

4. Wetin mek i nɔ kin izi fɔ sɔm pipul dɛn fɔ gi wok to yɔŋ wan dɛn? (Rid di bɔks we gɛt di taytul, “ Wetin Mek I Nɔ Kin Izi fɔ Gi Wok to Ɔda Pipul Dɛn.”)

⁴ I nɔ kin izi ɔltɛm fɔ gi wok to yɔŋ wan dɛn. I kin mek di brɔda dɛn at pwɛl we dɛn no se dɛn de kam lɔs dɛn wok we dɛn rili lɛk. Dɛn nɔ kin gladi we dɛn tink se dɛn de kam lɛf di spɛshal wok we dɛn de ɛnjɔy. Ɔ dɛn kin wɔri se if dɛn nɔ dayrɛkt di wok, dɛn nɔ go du am fayn. Sɔntɛm dɛn kin fil se dɛn nɔ gɛt tɛm fɔ tren ɔda pipul dɛn. Bɔt yɔŋ brɔda dɛn fɔ peshɛnt we dɛn nɔ gi dɛn mɔ wok fɔ du.

5. Us kwɛstyɔn dɛn wi go tɔk bɔt na dis atikul?

⁵ So wetin mek i impɔtant fɔ lɛ dɛn ol wan dɛn ɛp di yɔŋ wan dɛn fɔ du mɔ wok. Aw dɛn go du dis? (Sɛkɛn Lɛta To Timoti 2:2) Ɛn wetin mek di yɔŋ wan dɛn nid fɔ tink di rayt we, we dɛn de wok wit dɛn ol brɔda dɛn we sabi di wok ɛn lan frɔm dɛn? Fɔ bigin, lɛ wi si aw Kiŋ Devid bin rɛdi in bɔy pikin fɔ wan impɔtant wok.

6. Wetin Kiŋ Devid bin want fɔ du? Wetin Jiova bin tɛl am?

⁶ Fɔ lɔng tɛm, dɛn bin want fɔ kil Devid, so i bin gɛt fɔ de kɔmɔt na wan ples ɛn go na ɔda ples. Bɔt afta i bi kiŋ, i bin de na fayn os. So i bin tɛl prɔfɛt Netan se: “Luk ya, na sida tik os mi tap, bɔt PAPA GƆD [“Jiova,” NW] in Ak ɔf di Kɔvinant de ɔnda tɛnt.” Devid want fɔ bil fayn fayn tɛmpul fɔ Jiova. Netan bin tɛl am se: “Du ɔl wetin de na yu at, bikɔs PAPA GƆD de wit yu.” Bɔt nɔto dat Jiova bin want. I tɛl Netan fɔ tɛl Devid se: “Yu nɔ go bil os fɔ mi fɔ tap.” Pan ɔl we Jiova bin prɔmis Devid se i go de wit am ɔltɛm, Devid kam fɔ no se na wan pan in bɔy pikin dɛn go bil di tɛmpul. Wetin Devid bin du?—Fɔs Kronikul 17:1-4, 8, 11, 12; 29:1.

7. Wetin Devid bin du we Jiova tɛl am se nɔto in go bil di tɛmpul?

⁷ Devid bin rili want fɔ bil tɛmpul fɔ Jiova, so in at go dɔn pwɛl pasmak we Jiova tɛl am dat. Bɔt pan ɔl  dat i bin stil sɔpɔt di wok we in pikin Sɔlɔmɔn go du. Devid bin ɛp fɔ ɔganayz di wokman dɛn ɛn gɛda ayɛn, kɔpa, silva, gold, ɛn wud. I nɔ bin wɔri bɔt udat go gɛt di tɛnki fɔ di tɛmpul we dɛn go bil, we dɛn bin leta kam fɔ sabi as Sɔlɔmɔn in tɛmpul. Bifo dat, i bin ɛnkɔrej Sɔlɔmɔn we i tɛl am se: “Naw, mi pikin, mek Jiova de wit yu, ɛn mek ɛnitin we yu de du kɔmɔt fayn ɛn bil Jiova we na yu Gɔd, in os, jɔs lɛk aw i bin dɔn tɔk bɔt yu.”—Fɔs Kronikul 22:11, 14-16, NW.

8. Wetin go dɔn mek Devid fil se Sɔlɔmɔn nɔ fit fɔ bil di tɛmpul? Bɔt wetin Devid bin du?

⁸ Rid Fɔs Kronikul 22:5. Devid go dɔn fil se Sɔlɔmɔn nɔ rɛdi yet fɔ dayrɛkt da kayn impɔtant wok. Di tɛmpul “fɔ fayn bad bad wan” ɛn Sɔlɔmɔn bin “yɔŋ ɛn nɔ gɛt ɛkspiriɛns.” Bɔt Devid bin no se Jiova go ɛp Sɔlɔmɔn fɔ du dis spɛshal wok. So Devid bin du ɔl wetin i ebul fɔ ɛp am fɔ rɛdi fɔ dis big big wok.

9. Wetin go mek ol wan dɛn fil fayn fɔ gi wok dɛn to ɔda pipul dɛn? Gi wan ɛgzampul.

⁹ Brɔda dɛn we dɔn ol nɔ fɔ fil bad we dɛn nid fɔ gi sɔm wok dɛn to yɔŋ wan dɛn. Wi ɔl no se di tin we impɔtant pas ɔl tide na Jiova in wok. We wi tren yɔŋ wan dɛn fɔ du wok na Jiova in ɔganayzeshɔn, wi de ɛp fɔ du Jiova in wok. Tink bɔt dis. Sɔntɛm we yu bin smɔl, yu bin de wach yu papa we i de drayv in motoka. As yu de big, i ɛksplen to yu wetin i bin de du. Tɛm kam we yu gɛt yu laysin ɛn yusɛf bigin fɔ drayv. Bɔt stil yu papa  bin de gi yu advays. Sɔntɛnde una kin drayv bay tɔn. Bɔt as yu papa de ol, na yu de drayv naw. Yu papa bin vɛks? Nɔ, sɔntɛm i bin gladi we yu de drayv am. Semweso, brɔda dɛn we dɔn ol kin gladi we dɛn si se yɔŋ wan dɛn we dɛn dɔn tren rɛdi fɔ du wok dɛn na Jiova in ɔganayzeshɔn.

10. Wetin Mozis nɔ bin want fɔ insɛf? Wetin i bin want fɔ ɔda pipul dɛn?

¹⁰ Wi fɔ tek tɛm nɔ fɔ jɛlɔs ɔda pipul dɛn fɔ di wok we dɛn de du. Wi kin lan frɔm wetin Mozis bin du we sɔm Izrɛlayt dɛn bigin fɔ biɛv lɛk prɔfɛt dɛn. (Rid Di Nɔmba Dɛm 11:24-29, NW.) Jɔshwa bin want fɔ stɔp dɛn, bɔt Mozis tɛl am se: “Yu de jɛlɔs fɔ mi? Nɔ jɛlɔs fɔ mi, a wish Jiova in pipul dɛn ɔl na bin prɔfɛt ɛn Jiova go put in spirit pan dɛn!” Mozis bin no se Jiova de dayrɛkt di wok. Mozis nɔ bin want ɔnɔ fɔ insɛf, bifo dat, i bin want mek Jiova in savant dɛn ɔl gɛt wok fɔ du. We wi? Wi kin gladi we ɔda pipul dɛn gɛt wok fɔ du na Jiova in ɔganayzeshɔn?

11. We i kam fɔ gi wok to ɔda pipul dɛn, wetin wan brɔda bin se?

¹¹ Bɔku brɔda dɛn dɔn wok tranga wan na Jiova in ɔganayzeshɔn fɔ lɔng lɔng tɛm ɛn dɛn dɔn tren yɔŋ wan dɛn fɔ du mɔ wok dɛn. Fɔ ɛgzampul, lɛ wi tɔk bɔt wan brɔda we nem Pita. Insay di 74 ia we i bin de yuz ɔl in tɛm fɔ sav Jiova, i bin wok na wan branch ɔfis na Yurop fɔ 35 ia. Fɔ lɔng tɛm, na in na bin di ovasia fɔ di Savis Dipatmɛnt. Bɔt dɛn bin gi dis wok to Pɔl, wan yɔŋ brɔda we Pita bin dɔn tren. Yu tink se Pita in at bin pwɛl we dɛn du dis? Nɔ, Pita se: “A gladi fɔ no se brɔda dɛn de we dɛn dɔn tren fɔ du mɔ wok ɛn we de du dɛn wok dɛn de fayn.”

12. Wetin wi kin lan frɔm Rɛoboam in ɛgzampul?

¹² We Sɔlɔmɔn in pikin we nem Rɛoboam bi kiŋ, i bin aks di wan dɛn we dɔn ol fɔ gi am advays bɔt aw i fɔ du in nyu wok. Bɔt i nɔ fala dɛn advays! Bifo dat, i fala di advays we di yɔŋ man dɛn we dɛn ɔl grɔ ɔp gi am. We i du dat, na bad tin bin apin. (Sɛkɛn Kronikul 10:6-11, 19) Wetin  wi kin lan? Wi lan se i mek sɛns fɔ aks di wan dɛn we dɔn ol ɛn we sabi mɔ pas wi fɔ advays. Yɔŋ wan dɛn nɔ fɔ fil se pawpa dɛn fɔ kɔntinyu fɔ du tin di sem we lɛk aw dɛn dɔn de du am trade. Bɔt dɛn fɔ rɛspɛkt di advays we di ol wan dɛn de gi ɛn dɛn nɔ fɔ kwik fɔ fil se di we aw dɛn de du tin nɔ fayn.

13. Aw di yɔŋ wan dɛn fɔ wok togɛda wit di ol wan dɛn?

¹³ Sɔntɛnde, dɛn kin gi di yɔŋ wan dɛn di wok we di ol wan dɛn bin de du. I go mek sɛns fɔ dɛn fɔ lan frɔm dɛn ol wan dɛn ya. Insay di ɛgzampul we wi bin dɔn tɔk bɔt, afta we Pɔl bin tek Pita in ples as ovasia na wan dipatmɛnt na Bɛtɛl, i bin tɔk se, “A bin de tek tɛm aks Pita fɔ advays, ɛn a ɛnkɔrej ɔda pipul dɛn na di dipatmɛnt fɔ du di sem tin.”

14. Wetin wi lan frɔm di we aw Timoti ɛn apɔsul Pɔl bin de wok togɛda?

¹⁴ Pɔl bin ol pas Timoti fa fawe, bɔt dɛn bin wok togɛda fɔ lɔng tɛm. (Rid Lɛta Fɔ Filipay 2:20-22.) Pɔl bin tɛl di Kristian dɛn na Kɔrint se: “A de sɛn Timoti to una, bikɔs na mi pikin we a lɛk ɛn i fetful to di Masta. I go mɛmba una di we aw a de tich bɔt Krays Jizɔs, jɔs lɛk aw a de tich ɔlsay na ɔl di kɔngrigeshɔn dɛn.” (Fɔs Lɛta Fɔ Kɔrint 4:17, NW) Frɔm wetin Pɔl se, wi si se in ɛn Timoti bin de wok fayn wan togɛda ɛn dɛn bin de sɔpɔt dɛnsɛf. Pɔl bin tek in tɛm fɔ tich Timoti “di we aw [i] de tich bɔt Krays Jizɔs,” ɛn Timoti bin lan gud gud wan. Pɔl bin lɛk Timoti ɛn i bin biliv se i go kia fɔ di brɔda ɛn sista dɛn we bin de na Kɔrint. Ɛlda dɛn go falamakata apɔsul Pɔl we dɛn de tren ɔda brɔda dɛn fɔ de bifo na di kɔngrigeshɔn.

15. Aw Lɛta Fɔ Rom 12:3-5 go ɛp wi we dɛn mek chenj?

¹⁵ Wi de na di tɛm we wɔndaful tin dɛn de apin. Di pat pan Jiova in ɔganayzeshɔn we de na dis wɔl de go bifo mɔ ɛn mɔ pan bɔku tin dɛn. Dis min se tin dɛn gɛt fɔ kɔntinyu fɔ de chenj. Sɔm pan dɛn chenj ya kin afɛkt wi ɛn i nɔ kin izi fɔ wi. I go ɛp wi if wi put wisɛf dɔŋ ɛn put wi atɛnshɔn pan di gud tin we gɛt fɔ du wit di prichin wok ɛn nɔ jɔs de tink bɔt wetin wi want nɔmɔ. We wi du dis, wi go gɛt wanwɔd. Pɔl bin rayt to di Kristian dɛn na Rom se: “Una nɔ tink se una bɛtɛ pas aw una tan.” Dɔn i ɛksplen se jɔs lɛk we ɔl di pat dɛn na di bɔdi gɛt dɛn yon wok we dɛn de du, na so bak ɔlman na di kɔngrigeshɔn gɛt wok we i de du.—Lɛta Fɔ Rom 12:3-5.

16. Wetin ɔl Kristian fɔ du fɔ mek pis ɛn wanwɔd de na Jiova in ɔganayzeshɔn?

 ¹⁶ Jiova in pipul dɛn ɔl want fɔ sɔpɔt di Kiŋdɔm ɛn du ɛnitin we dɛn tɛl dɛn fɔ du. Brɔda dɛn we dɔn ol kin tren yɔŋ wan dɛn. Yɔŋ brɔda dɛn fɔ put dɛnsɛf dɔŋ ɛn sho rɛspɛkt we dɛn de du di wok we dɛn de gi dɛn. Ɛn brɔda dɛn we mared kin gladi we dɛn wɛf dɛn de sɔpɔt dɛn ivin we tin chenj. Dɛn uman dɛn ya kin falamakata Prisila, we bin de wok ɔltɛm wit in man we nem Akwila.—Di Apɔsul Dɛn Wok [Akt] 18:2.

17. Wetin Jizɔs bin tren in disaypul fɔ du?

¹⁷ Jizɔs bin sɛt di bɛst ɛgzampul bay we i bin rɛdi fɔ tren ɔda pipul dɛn. Jizɔs bin no se ɔda pipul dɛn go nid fɔ kɔntinyu di wok we i bin de du. I bin no se in disaypul dɛn nɔ pafɛkt. Bɔt i bin biliv se dɛn go kɛr di gud nyus go na bɔku say dɛn pas aw i bin dɔn du. (Jɔn 14:12) I bin tren dɛn fayn, ɛn dɛn bin ebul fɔ prich na ɛni kɔntri we dɛn ebul fɔ go.—Lɛta Fɔ Kɔlɔse 1:23.

18. Us wok wi gɛt fɔ du tumara bambay? Us wok wi gɛt fɔ du naw?

¹⁸ Afta we Jizɔs bin day, Jiova bin gi am layf bak ɛn gi am mɔ wok fɔ du ɛn mɔ pawa pas “ɔl ɔda gɔvmɛnt, pawa, masta ɛn nem na dis wɔl ɛn di wan we de kam.” (Lɛta Fɔ Ɛfisɔs 1:19-21, NW) Ilɛksɛf wi day fetful wan bifo Jiova kam wit Amagɛdɔn, wi go gɛt layf bak ɛn wi go gɛt plɛnti fayn fayn wok dɛn fɔ du na di nyu wɔl. Ɛn rayt naw, wi ɔl gɛt di wɔndaful wok fɔ prich di gud nyus ɛn mek disaypul dɛn. So i nɔ mata if wi yɔŋ ɔ ol, wi ɔl kin kɔntinyu fɔ “du Gɔd in wok ɔltɛm.”—Fɔs Lɛta Fɔ Kɔrint 15:58.