“I De Gi di Wan We Wik Pawa”
Wi iatɛks fɔ 2018: “Di wan dɛn we abop pan Jiova go gɛt trɛnk bak.”—AYZAYA 40:31, NW.
1. Wetin na sɔm prɔblɛm dɛn we wi fɔ bia wit? Wetin mek Jiova gladi fɔ in fetful savant dɛn? (Luk di pikchɔ nia dis atikul in taytul.)
LAYF na dis wɔl nɔ izi. Fɔ ɛgzampul, bɔku pan wi brɔda ɛn sista dɛn de sɔfa bikɔs dɛn sik bad bad wan. Ɔda wan dɛn we dɔn big, de kia fɔ dɛn fambul dɛn we dɔn ol. Stil, ɔda wan dɛn de we de wok tranga wan fɔ lɛ dɛn famili gɛt di tin dɛn we dɛn nid pan ɔl we i nɔ izi. Ɛn wi no se nɔto wan pan dɛn prɔblɛm dɛn ya nɔmɔ bɔku pan una gɛt, una gɛt bɔku ɔda prɔblɛm dɛn we de mit una di sem tɛm! Dis kin tek plɛnti pan una tɛm, trɛnk, ɛn mɔni. Bɔt una biliv tranga wan se Jiova go ɛp una. Una no se tin go bɛtɛ bikɔs dat na wetin Jiova dɔn prɔmis. Una fet go rili mek Jiova gladi!
2. Aw Ayzaya 40:29 dɔn ɛnkɔrej wi? Us siriɔs mistek wi kin mek?
2 Yu kin fil se di prɔblɛm dɛn we yu gɛt nɔ izi fɔ yu fɔ bia? If yu de fil da we de, mɛmba se nɔto yu wan. Sɔm pan Gɔd in fetful savant we bin de trade bin de fil di sem we. (Fɔs Kiŋ 19:4; Job 7:7) Wetin bin ɛp dɛn fɔ kɔntinyu fɔ bia? Dɛn bin abop pan Jiova fɔ gi dɛn trɛnk. Di Baybul se Gɔd de “gi di wan we wik pawa.” (Ayzaya 40:29) I sɔri fɔ no se, sɔm pan Gɔd in pipul dɛn tide tink se di bɛst we fɔ bia dɛn prɔblɛm dɛn na we dɛn stɔp fɔ sav Jiova fɔ sɔm tɛm. Dɛn de tink se fɔ sav Jiova na tranga tin fɔ du ɛn nɔto blɛsin. So dɛn kin stɔp fɔ rid di Baybul, fɔ go di mitin dɛn, ɛn fɔ go fil savis. Dis na wetin Setan want fɔ mek dɛn du.
3. (a) Wetin wi go du fɔ mek wi nɔ alaw Setan fɔ stɔp wi fɔ mek wi nɔ gɛt bɛtɛ trɛnk igen? (b) Wetin wi go tɔk bɔt na dis atikul?
3 Setan nɔ want wi fɔ kɔntinyu fɔ bia. Ɛn i no se wi kin ebul fɔ bia if wi rili de wok tranga wan fɔ sav Jiova. So we yu fil se yu dɔn taya ɛn yu at pwɛl bad bad wan, nɔ kɔmɔt nia Jiova. Na fɔ kam nia am. Di Baybul se: “I go mek yu tinap tranga wan, i go mek yu strɔng.” (Pita in Fɔs Lɛta 5:10, NW; Jems 4:8) Insay dis atikul, wi go lan na Ayzaya 40:26-31 bɔt aw Jiova gɛt di pawa fɔ gi wi trɛnk. Wi go tɔk bak bɔt tu tin dɛn we kin mek wi nɔ gɛt bɛtɛ zil igen fɔ sav Jiova. Ɛn wi go lan bɔt aw di advays dɛn we de na di Baybul kin ɛp wi fɔ bia we wi fala dɛn.
DI WAN DƐN WE ABOP PAN JIOVA GO GƐT TRƐNK BAK
4. Us lɛsin wi lan frɔm Ayzaya 40:26?
Jiova go gi yu di trɛnk we yu nid fɔ ɛp yu fɔ bia yu prɔblɛm dɛn
4 Rid Ayzaya 40:26. Nɔbɔdi nɔ ebul fɔ kɔnt ɔl di sta dɛn na dis wan ol wɔl. Sayɛnsman dɛn biliv se i pas 400 bilyɔn sta dɛn we de arawnd wi. Ɛn Jiova gi ɔl dɛn sta dɛn ya nem. Wetin dis tich wi bɔt Jiova? If Jiova kia fɔ di sta dɛn we nɔ gɛt layf, tink bɔt aw i kin fil bɔt yu! Yu de sav am, nɔto bikɔs yu fɔ sav am, bɔt na bikɔs yu lɛk am. Wi Papa na ɛvin no ɔltin bɔt yu. Di Baybul se Gɔd “insɛf no ɔmɔs ia de na una ed.” (Matyu 10:30) Jiova want wi fɔ no se i “bisin bɔt udat de du wetin in want.” (Sam 37:18) Fɔ tru, Jiova de si ɔl di prɔblɛm dɛn we yu gɛt, ɛn i de gi yu di trɛnk we yu nid fɔ ɛp yu fɔ bia dɛn ɔl.
5. Wetin mek wi biliv tranga wan se Jiova ebul fɔ gi wi trɛnk?
5 Rid Ayzaya 40:28. Na Jiova gɛt ɔl di pawa. Fɔ ɛgzampul, tink bɔt di kayn pawa we i gi di san. Wan man we kin rayt bɔt sayɛns we nem Devid Bodanis bin tɔk se, ɛvri minit di san de gi wi bɔku bɔku pawa we kin tan lɛk we dɛn ib bɔku atɔmik bɔm dɛn. Wan ɔda pɔsin we de stɔdi bɔt sayɛns bin se di kayn pawa we di san de gi insay jɔs wan sɛkɔn, go mek ɔlman gɛt layt na di wan ol wɔl fɔ lɛk 200,000 ia! Fɔ tru, Jiova we gi di san pawa fɔ gi layt, go gi wi di trɛnk we wi nid fɔ bia wit wi prɔblɛm dɛn.
6. Aw di tin dɛn we Jizɔs de tich bin de mek pɔsin blo? Aw dis dɔn afɛkt wi?
6 Rid Ayzaya 40:29. Wi kin rili gladi we wi de sav Jiova. Jizɔs bin tɛl in disaypul dɛn se: “Una opin una at fɔ di tru tin dɛn we a de lan una.” Ɛn i bin kɔntinyu fɔ tɔk se: “If una du dat, una go blo. Dɛn tin we a de lan una nɔ at fɔ lan ɛn dɛn tin we a de gi una fɔ du nɔ at fɔ du.” (Matyu 11:28-30) Ɛn dis na tru! Sɔntɛnde, wi kin taya we wi kin lɛf os fɔ atɛnd mitin ɔ fɔ go fil savis. Bɔt aw wi kin fil we wi kin kam bak na os? Wi kin fil fayn ɛn rɛdi fɔ bia wit wi prɔblɛm dɛn. Fɔ tru, di tin dɛn we Jizɔs dɔn tich wi nɔ at fɔ lan.
7. Gi wan ɛkspiriɛns we de sho se wetin de na Matyu 11:28-30 na tru.
7 Lɛ wi tɔk bɔt wetin bin apin to wan wi sista. Dis sista sik bad bad wan, i gɛt wan sik we dɛn kɔl fatig sindrɔm we kin mek in at pwɛl ɛn i kin mek i gɛt bad bad ed at. So sɔntɛnde, i nɔ kin rili izi fɔ lɛ dis sista atɛnd mitin. Bɔt wan de, afta we i tray tranga wan fɔ go mitin, i bin tɔk se: “Di tɔk na bɔt tin dɛn we kin mek pɔsin in at pwɛl. Di brɔda bin gi di tɔk fayn, ɛn i gi am wan kayn we we bin mek a kray. A bin kam fɔ no se a nid fɔ de atɛnd di mitin dɛn.” Dis sista bin rili gladi fɔ we i tray tranga fɔ atɛnd!
8, 9. Wetin di apɔsul Pɔl min we i bin rayt se: “Di tɛm we a nɔ ebul fɔ ɛp misɛf, na da tɛm de a gɛt Gɔd in pawa”?
8 Rid Ayzaya 40:30. Wi kin sabi fɔ du bɔku tin dɛn, bɔt nɔto ɔltin wi kin ebul fɔ du bikɔs wi nɔ kin gɛt bɛtɛ trɛnk. Dis na lɛsin we wi ɔl fɔ lan. Di apɔsul Pɔl bin ebul fɔ du bɔku tin dɛn, bɔt i nɔ bin ebul fɔ du ɔl di tin dɛn we i want fɔ du. We i bin tɛl Jiova bɔt aw i de fil, Jiova bin tɛl am se: “Mi pawa big pas ɔl na [yu] layf.” Pɔl bin ɔndastand wetin Jiova bin de tɛl am. Na dat mek i bin tɔk se: “Di tɛm we a nɔ ebul fɔ ɛp misɛf, na da tɛm de a gɛt Gɔd in pawa.” (Sɛkɛn Lɛta Fɔ Kɔrint 12:8-10) Wetin Pɔl bin min?
9 Pɔl bin kam fɔ no se nɔto ɔltin i ebul du fɔ insɛf. I nid pɔsin we gɛt bɔku pawa pas am. Gɔd in oli spirit go ebul fɔ gi am trɛnk ɛnitɛm we i wik. Ɛn i kin du mɔ tin pas dat. Gɔd in oli spirit bin de gi trɛnk to Pɔl bak fɔ mek i go ebul fɔ du di tin dɛn we i nɔ ebul fɔ du bay insɛf. Dis sem tin kin apin to wi. We Jiova gi wi in oli spirit, wi go rili gɛt trɛnk!
10. Aw Jiova bin ɛp Devid fɔ bia in prɔblɛm dɛn?
10 Devid bin si bɔku tɛm aw Gɔd in oli spirit bin gi am trɛnk. I bin siŋ se: “Yu de mek a ebul atak mi ɛnimi dɛn i lɛk aw dɛn plɛnti. A go ivin ebul fɔ klem ay wɔl we dɛn bil fɔ protɛkt dɛnsɛf bikɔs yu de wit mi.” (Sam 18:29) Jɔs lɛk ay wɔl we wi nɔ ebul fɔ klem, na so sɔntɛm dɛn de wi prɔblɛm dɛn kin rili big we wi nɔ ebul fɔ sɔlv fɔ wisɛf. Wi nid Jiova fɔ ɛp wi.
11. Aw di oli spirit de ɛp wi fɔ bia wi prɔblɛm dɛn?
11 Rid Ayzaya 40:31, NW. Nɔto di trɛnk we igul dɛn gɛt nɔmɔ dɛn kin yuz fɔ flay ɔp ɔp. Di wam briz we de go ɔp kin es di igul go ɔp di skay. Dis de mek di igul flay go fa ɛn nɔ yuz bɛtɛ ɛnaji. So we yu gɛt prɔblɛm we de rili mɔna yu, na fɔ tink bɔt di igul. Beg Jiova fɔ yuz in “oli spirit” fɔ gi yu mɔ trɛnk. (Jɔn 14:26) Wi kin aks Jiova ɛnitɛm fɔ gi wi in spirit. Wi kin aks Jiova fɔ ɛp wi mɔ we wi gɛt cham-mɔt wit wi brɔda ɛn sista dɛn na di kɔngrigeshɔn. Bɔt wetin mek dɛn kayn cham-mɔt ya kin de?
12, 13. (a) Wetin mek sɔntɛnde cham-mɔt kin de bitwin Kristian dɛn? (b) Wetin wi lan bɔt Jiova frɔm di tin dɛn we bin apin to Josɛf?
12 Wi kin gɛt cham-mɔt wit wi brɔda ɛn sista dɛn bikɔs wi ɔl nɔ pafɛkt. Sɔntɛnde, wi at kin wam bikɔs sɔmbɔdi tɔk ɔ du wi sɔntin, ɔ wi kin mek ɔda pipul dɛn vɛks pan wi. Dis nɔ kin izi fɔ wi. Bɔt i de gi wi di chans fɔ kɔntinyu fɔ de biɛn Jiova. Aw? Bay we wi de lan fɔ wok wit wanwɔd wit wi brɔda ɛn sista dɛn. Jiova lɛk dɛn pan ɔl we dɛn nɔ pafɛkt, so wisɛf fɔ lɛk dɛn.
Jiova nɔ bin ɛva lɛf Josɛf, ɛn i nɔ go ɛva lɛf yu (Luk paregraf 13)
13 Jiova kin alaw bad tin fɔ mit in savant dɛn we kin tɛst dɛn fet. Wi no dat frɔm wetin bin apin to Josɛf. We Josɛf na bin yɔŋ man, in stɛp-brɔda dɛn bin de jɛlɔs am. Dɛn bin sɛl am as slev ɛn dɛn bin kɛr am go na Ijipt. (Jɛnɛsis 37:28) Jiova bin si ɔl wetin bin de apin ɛn fɔ tru i bin de fil am we i de si dɛn de trit in padi, in fetful savant Josɛf, bad we. Bɔt pan ɔl dat, Jiova nɔ bin stɔp wetin bin de apin. Leta, we dɛn bin lay pan Josɛf se i want fɔ rep Pɔtifa in wɛf ɛn dɛn put am na jel, Jiova nɔ bin stil ɛp am. Bɔt i min se Jiova bin dɔn rili lɛf Josɛf? Nɔ, nɔto so i bi. Di Baybul se Jiova “bin de wit am ɛn i bin mek bɛtɛ fala am pan ɔl wetin i bin de du.”—Jɛnɛsis 39:21-23.
14. Us bɛnifit wi go gɛt we wi lɛf fɔ mek wam-at?
14 Wan ɔda ɛgzampul na Devid. Bɔku pipul dɛn de we dɛn nɔ trit bad yet lɛk aw dɛn bin trit Devid. Bɔt pan ɔl dat, Devid we na bin Gɔd in padi nɔ bin alaw insɛf fɔ vɛks pasmak. I bin rayt se: “Nɔ lɛ tin lɛk dat gi yu bɔn-at; dat go mek yu jɔs de vɛks ɛn i nɔ gud fɔ yu, i go mek yusɛf want fɔ du bad.” (Sam 37:8) Wan impɔtant rizin we mek wi fɔ stɔp fɔ de vɛks na bikɔs wi want fɔ falamakata Jiova. Gɔd “nɔ de pɔnish wi lɛk aw i fɔ pɔnish wi” fɔ di bad tin dɛn we wi de du, bɔt i de fɔgiv wi. (Sam 103:10) Ɔda bɛnifit dɛn de we wi kin gɛt we wi lɛf wam-at. Fɔ ɛgzampul, wam-at de mek wi gɛt wan sik we dɛn kɔl ay blɔd prɛshɔ ɛn wan ɔda sik we go ambɔg di we aw wi de blo. I kin damej wi liva ɛn wan pat pan wi bɔdi we dɛn kɔl pankrias, ɛn i kin ambɔg wi bɛlɛ. Dɔn, we yu at wam, yu nɔ kin ebul fɔ tink tret ɔltɛm. Wi go tɔk ɔ du sɔntin dɛn we go at ɔda pipul dɛn, ɛn dis kin mek wi at pwɛl fɔ lɔng tɛm. I go fayn fɔ mek wi de kol wi at. Di Baybul se: “Udat gɛt kolat de gɛt wɛl bɔdi.” (Prɔvabs 14:30) So wetin wi go du if ɔda pipul dɛn du wi sɔntin we de mek wi vɛks? Aw wi go mek pis wit wi brɔda ɛn sista dɛn? Wi kin fala di advays dɛn we de na di Baybul.
WE WI BRƆDA DƐN MEK WI AT PWƐL
15, 16. Wetin wi fɔ du we pɔsin du wi sɔntin we mek wi vɛks?
15 Rid Lɛta Fɔ Ɛfisɔs 4:26. Wi nɔ kin sɔprayz we pipul dɛn we nɔ de sav Jiova kin trit wi bad. Bɔt we wi Kristian brɔda ɔ sista ɔ we wi fambul tɔk ɔ du sɔntin we at wi, dat kin rili mek wi at pwɛl. Wetin wi go du if wi nɔ ebul fɔ fɔgɛt di tin we apin? Wi go kɔntinyu fɔ vɛks, sɔntɛm ivin fɔ lɔng tɛm? Ɔ wi go fala di fayn advays we de na di Baybul ɛn mek pis kwik kwik wan? Di mɔ wi wet fɔ tɔk to di ɔda pɔsin, na di mɔ i nɔ go izi fɔ wi fɔ mek pis.
16 Wetin yu go du if wan brɔda du yu sɔntin we mek yu vɛks ɛn yu nɔ ebul fɔ stɔp fɔ tink bɔt wetin apin? Wetin yu go du fɔ mek pis? Fɔs, yu kin pre to Jiova. Beg am fɔ ɛp yu fɔ mek yu go ebul fɔ tɔk fayn to yu brɔda. Mɛmba se, yu brɔda na wan pan Jiova in padi. (Sam 25:14, NW) Gɔd lɛk am. Jiova de trit in padi dɛn fayn, ɛn i want wisɛf fɔ du di sem tin. (Prɔvabs 15:23; Matyu 7:12; Lɛta Fɔ Kɔlɔse 4:6) Sɛkɔn, tek tɛm tink bɔt wetin yu go tɔk to yu brɔda. Yu nɔ fɔ tink se yu brɔda bin want fɔ mek yu vɛks. Sɔntɛm, na mistek i mistek ɔ na yu nɔ bin ɔndastand wetin rili apin. Gri se yusɛf du sɔntin we ad to di prɔblɛm. Yu go bigin di tɔk lɛk dis se, “Sɔntɛm na mi bin tek am big, bɔt we yu bin tɔk to mi yɛstade, a bin fil . . . ” If wetin una tɔk nɔ ɛp fɔ mek pis bitwin una tu, nɔ giv-ɔp, kɔntinyu fɔ de tɔk to am. Pre fɔ yu brɔda. Aks Jiova fɔ ɛp am, ɛn fɔ ɛp yu fɔ de luk fɔ di gud kwaliti dɛn we i gɛt. Yu fɔ biliv se Jiova go gladi fɔ di tray we yu de tray fɔ mek pis wit yu brɔda, we na wan pan Gɔd in padi.
WE WI DE FIL BAD BƆT DI BAD TIN WE WI BIN DƆN DU
17. Afta yu dɔn kɔmit siriɔs sin, aw Jiova go ɛp yu fɔ gɛt tayt padi biznɛs wit am bak? Wetin mek wi fɔ gri fɔ mek Jiova ɛp wi?
17 Sɔm pipul dɛn kin fil se dɛn nɔ fit fɔ sav Jiova bikɔs dɛn bin dɔn sin siriɔs wan. Pwɛl at kin mek wi nɔ gladi, wi nɔ gɛt kolat, ɛn trɛnk. I nɔ bin izi fɔ lɛ Kiŋ Devid stɔp fɔ fil bad bɔt di bad tin we Sam 32:3-5) If yu bin dɔn sin siriɔs wan, no se Jiova rɛdi fɔ fɔgiv yu. I want fɔ ɛp yu fɔ gɛt tayt padi biznɛs wit am bak. Bɔt yu nid fɔ lisin to di ɛlda dɛn we Jiova de yuz fɔ ɛp yu. (Prɔvabs 24:16; Jems 5:13-15) So nɔ westɛm! Yu nid fɔ du am if yu want fɔ gɛt layf we go de sote go. Bɔt wetin yu go du if yu at stil pwɛl fɔ di bad tin we yu bin dɔn du pan ɔl we Jiova go dɔn fɔgiv yu?
i bin dɔn du ɛn dis bin mek i tɔk se: “Wɛn a nɔ bin kɔnfɛs mi sin yet, i bin de mɔna mi; a bin jɛs de kray ol de, we a de pre. Ol de ɛn net PAPA GƆD nɔ bin de fil fɔ mi, pen de mɔna [mi] lɛk udat dɛn bit bad.” Bɔt i fayn fɔ no se, Devid bin gɛt kɔrej fɔ du wetin Jiova bin want in savant dɛn fɔ du. Devid bin rayt se: “A gri se a bin de mek rebɛl pan PAPA GƆD ɛn kɔnfɛs mi sin . . . , “yu fɔgiv mi ɛn nɔ pɔnish mi igen.” (18. Aw Pɔl in ɛgzampul go ɛp dɛn wan dɛn we tink se dɛn nɔ fit fɔ wɔship Jiova?
18 Tɛm bin de we di apɔsul Pɔl in at bin pwɛl fɔ di bad tin dɛn we i bin dɔn du. I bin tɔk se: “Ɔl dɛn ɔda apɔsul bɛtɛ pas mi; a nɔ fit sɛf fɔ lɛ dɛn kɔl mi apɔsul, bikɔs a bin de mek dɛn pipul we de waka wit Gɔd sɔfa.” Bɔt pan ɔl dat, Pɔl bin tɔk bak se: “Bɔt we Gɔd gud nɔmɔ, tide mi na apɔsul.” (Fɔs Lɛta Fɔ Kɔrint 15:9, 10) Jiova bin no se Pɔl nɔ pafɛkt. Bɔt i bin tek Pɔl fɔ udat i bi, ɛn i bin want am fɔ no dat. If yu rili fil sɔri fɔ wetin yu bin dɔn du ɛn yu dɔn tɔk to Jiova bɔt dat, ɛn ivin di ɛlda dɛn, Jiova go fɔgiv yu. Biliv tranga wan se Jiova dɔn fɔgiv yu, ɛn du tin we go sho se yu biliv!—Ayzaya 55:6, 7.
19. Wetin na di iatɛks fɔ 2018?
19 As wi de kam nia di tɛm we dis wikɛd wɔl go dɔn, prɔblɛm dɛn go de mit wi mɔ ɛn mɔ. Wi fɔ mɛmba se Jiova na di wan we de “gi di wan we wik, pawa, ɛn di wan we nɔ gɛt trɛnk, i de gi am mɔ trɛnk.” Yu tink se yu go du ɛnitin fɔ kɔntinyu fɔ sav Jiova fetful wan? (Ayzaya 40:29; Sam 55:22; 68:19) Ɛnitɛm we wi atɛnd di mitin dɛn na Kiŋdɔm Ɔl insay 2018, wi go de mɛmba dɛn wɔd ya frɔm wi iatɛks we se: “Di wan dɛn we abop pan Jiova go gɛt trɛnk bak.”—Ayzaya 40:31, NW.