1, 2. Wetin mek tin nɔ izi fɔ Gɔd in savant dɛn tide? (Luk di pikchɔ nia dis atikul in taytul.)

BƆKU dɔktɔ ɛn nɔs dɛn de wok arawnd pipul dɛn we gɛt bad bad sik dɛn we de prɛd. Dɛn de kia fɔ sikman dɛn bikɔs dɛn want fɔ ɛp dɛn. Bɔt dɛn nid bak fɔ protɛkt dɛnsɛf fɔ mek dɛn nɔ go gɛt di sik we dɛn de tray fɔ mɛn. Dis sem tin de apin to wi we na Jiova in savant dɛn. Bɔku pan wi de wok ɔ de liv wit pipul dɛn we dɛn abit ɛn di we aw dɛn de biev rili difrɛn frɔm di we aw Gɔd want wi fɔ de. Dis nɔ kin rili izi fɔ wi.

² Insay di las dez fɔ lɛ dis wɔl dɔn, pipul dɛn we nɔ lɛk Gɔd nɔ de gri fɔ obe di lɔ dɛn we i dɔn gi wi bɔt wetin rayt ɛn wetin rɔng. Di apɔsul Pɔl bin tɔk bɔt di bad abit dɛn we pipul dɛn go gɛt we i bin rayt lɛta to Timoti. Pɔl bin tɔk se dɛn bad abit dɛn ya go bɔku mɔ ɛn mɔ we di tɛm de nia fɔ mek dis wɔl dɔn. (Rid Sɛkɛn Lɛta To Timoti 3:​1-5, 13.) Pan ɔl we wi go sɔprayz fɔ si dɛn bad abit ya, wi go stil bigin fɔ falamakata di we aw di pipul dɛn we de arawnd wi  de tink, tɔk, ɛn du tin. (Prɔvabs 13:​20) Insay dis atikul, wi go si aw dɛn abit dɛn ya difrɛn frɔm di abit dɛn we Gɔd in pipul dɛn gɛt. Wi go si bak wetin wi go du fɔ protɛkt wisɛf frɔm dɛn bad abit dɛn de as wi de ɛp pipul dɛn fɔ no bɔt Jiova.

3. Uskayn pipul dɛn Sɛkɛn Lɛta To Timoti 3:​2-5 tɔk bɔt?

³ Pɔl bin rayt se insay di las dez tin “go tranga.” Dɔn i tɔk bɔt 19 bad abit dɛn we go kɔmɔn insay wi tɛm. Dɛn abit dɛn ya fiba di wan dɛn we Pɔl bin tɔk bɔt insay Lɛta Fɔ Rom 1:​29-31, bɔt di list insay in lɛta we i rayt to Timoti i yuz wɔd dɛn we wi nɔ go si ɛni ɔda say insay di Kristian Grik Skripchɔ dɛn. Pɔl bin bigin wit dɛn wɔd dɛn ya “pipul go . . . ” Bɔt nɔto ɔlman go gɛt dɛn bad abit dɛn ya we Pɔl bin tɔk bɔt. Di abit ɔ di we aw tru Kristian dɛn de biev rili difrɛn frɔm ɔda pipul dɛn.—Rid Malakay 3:​18.

4. Wetin i min fɔ prawd bad bad wan?

⁴ Afta we Pɔl dɔn tɔk se bɔku pipul dɛn go lɛk dɛnsɛf ɛn dɛn go lɛk mɔni, i kɔntinyu fɔ tɔk se pipul dɛn go de bost, dɛn go kak, ɛn dɛn go prawd bad bad wan. Bɔku tɛm, pipul dɛn we gɛt dɛn abit dɛn ya kin tink se dɛn bɛtɛ pas ɔda pipul dɛn. I kin bi se na bikɔs dɛn fayn, dɛn ebul fɔ du sɔntin, di tin dɛn we dɛn gɛt, ɔ udat dɛn bi na layf. Dɛn kayn pipul dɛn ya kin want fɔ mek ɔda pipul dɛn kɔle dɛn ɔltɛm. Wan masta sabi bukman bin rayt bɔt da kayn pɔsin de se: “Insay in at i gɛt wan smɔl ɔlta usay i de butu bifo insɛf.” Sɔm pipul kin tɔk se fɔ mek prawd na tin we rili bad, ɛn ivin dɛn wan dɛn we prawd nɔ lɛk fɔ si we ɔda pipul dɛn de mek prawd.

5. Aw Jiova in fetful savant dɛnsɛf bin mek prawd?

⁵ Jiova nɔ lɛk pɔsin we prawd. Di Baybul tɔk se sɔmbɔdi we prawd na “pɔsin we fil tu gud bɔt insɛf.” (Prɔvabs 6:​16, 17) Infakt, we pɔsin prawd, dat de push am fa frɔm Gɔd. (Sam 10:​4) Setan na pɔsin we prawd. (Fɔs Lɛta To Timoti 3:​6) I sɔri fɔ no se ivin sɔm pan Jiova in fetful savant dɛn dɔn bigin fɔ mek prawd. Fɔ ɛgzampul, Kiŋ Uzaya we bin de rul na Juda bin fetful to Jiova fɔ lɔng tɛm. Bɔt di Baybul se: “We Kiŋ Uzaya bin dɔn sidɔm na pawa gud gud wan, i bigin mek prawd, we briŋ in dawnfɔl. I bin fɔls to PAPA GƆD [“Jiova,” NW] we na in Gɔd.” Uzaya bin go na di tɛmpul ɛn bɔn insɛns, dis na tin we i nɔ bin gɛt rayt fɔ du. Leta, wan fetful Kiŋ we nem Ɛzikaya insɛf bin mek prawd, pan ɔl we na fɔ shɔt tɛm nɔmɔ i bin du dat.—Sɛkɛn Kronikul 26:​16; 32:​25, 26.

6. Wetin fɔ dɔn mek Devid prawd? Bɔt wetin mek i kɔntinyu fɔ put insɛf dɔŋ?

⁶ Sɔm pipul dɛn kin mek prawd bikɔs dɛn fayn, bɔku pipul dɛn sabi dɛn, dɛn sabi fɔ siŋ myuzik, dɛn gɛt trɛnk, ɔ ɔda pipul dɛn de kɔle dɛn. Devid bin gɛt ɔl dɛn tin ya, bɔt i bin kɔntinyu fɔ put insɛf dɔŋ te i day. Fɔ ɛgzampul, afta Devid kil Golayath, Kiŋ Sɔl bin tɛl Devid se i fɔ mared in gyal pikin. Bɔt Devid bin tɛl am se: “In na natin ɛn in famili sɛf nɔto ɛnitin fɔ mek [pɔsin] lɛkɛ in bi di Kiŋ in sɔnɛnlɔ.” (Fɔs Samiɛl  18:​18) Wetin bin ɛp Devid fɔ kɔntinyu fɔ put insɛf dɔŋ? I bin no se ɛni kwaliti we i gɛt, ɛnitin we i ebul fɔ du, ɛn ɛni wok we i gɛt na bikɔs Gɔd put insɛf dɔŋ ɛn pe atɛnshɔn to am. (Sam 113:​5-8) Devid bin no se ɛni gud tin we i gɛt kɔmɔt frɔm Jiova.—Luk Fɔs Lɛta Fɔ Kɔrint 4:​7.

7. Wetin go ɛp wi fɔ sho se wi ɔmbul?

⁷ Jɔs lɛk Devid, Jiova in pipul dɛn tide de tray fɔ put dɛnsɛf dɔŋ. Wi gladi fɔ no se Jiova we de pantap ɔlman de put insɛf dɔŋ. (Sam 18:​35) Wi want fɔ du wetin dɛn wɔd ya se: “Una gɛt sɔri at fɔ una kɔmpin, una fɔ de du gud to una kɔmpin, una nɔ fɔ tink se una bɛtɛ pas ɔda pipul, una nɔ fɔ dil wit ɔda pipul tranga wan, ɛn una fɔ de bia wit pipul.” (Lɛta Fɔ Kɔlɔse 3:​12) Wi no bak se lɔv nɔ go mek wi ‘prawd ɔ fil se wi bɛtɛ pas’ ɔda pipul dɛn. (Fɔs Lɛta Fɔ Kɔrint 13:​4) We ɔda pipul dɛn si se wi ɔmbul, dɛnsɛf go want fɔ no bɔt Jiova. Jɔs lɛk aw maredman we nɔ de sav Jiova go kam nia am bay di fayn we aw in wɛf we de sav Jiova de biev, na so pipul dɛn go kam nia Jiova bay di we aw dɛn de si Gɔd in savant dɛn de put dɛnsɛf dɔŋ.—Pita In Fɔs Lɛta 3:​1.

8. (a) Tide, aw sɔm pipul dɛn kin fil we pikin nɔ de obe in mama ɛn papa? (b) Wetin di Baybul tɛl pikin dɛn fɔ du?

⁸ Pɔl bin ɛksplen aw pipul dɛn go de trit dɛn kɔmpin dɛn insay di las dez. I bin rayt se pikin dɛn nɔ go de obe dɛn mama ɛn papa. Tide, bɔku buk, fim, ɛn tɛlivishɔn program dɛn kin mek lɛk se na nɔmal tin fɔ lɛ pikin dɛn nɔ obe dɛn mama ɛn papa. Bɔt di tru tin na dat, we pikin nɔ de obe in mama ɛn papa dat de briŋ prɔblɛm na di famili dɛn we mekɔp ɛni sosayti. Mɔtalman dɔn no dis fɔ lɔng tɛm. Fɔ ɛgzampul, trade trade insay Gris, we bɔy pikin nak in mama ɛn papa, i nɔ go gɛt ɛni rayt na di eria we i de. Wan pan di lɔ dɛn we di Roman pipul dɛn bin gɛt na dat, ɛnibɔdi we nak in papa, dɛn go pɔnish am di sem we aw dɛn de pɔnish pɔsin we kil. Di Ibru ɛn Grik Skripchɔ dɛn tɛl pikin dɛn fɔ obe dɛn mama ɛn papa dɛn.—Ɛksodɔs 20:​12; Lɛta Fɔ Ɛfisɔs 6:​1-3.

9. Wetin go ɛp pikin dɛn fɔ obe dɛn mama ɛn papa dɛn?

⁹ Wetin go ɛp pikin dɛn fɔ obe dɛn mama ɛn papa pan ɔl we dɛn kɔmpin dɛn we de arawnd dɛn nɔ de obe? We pikin dɛn de tink bɔt ɔl di gud tin dɛn we dɛn mama ɛn papa dɛn dɔn du fɔ dɛn, dat fɔ mek dɛn gladi ɛn want fɔ obe dɛn. Yɔŋ wan dɛn nid bak fɔ ɔndastand se Gɔd we na di Papa fɔ ɔlman, want dɛn fɔ obe dɛn mama ɛn papa dɛn. We yɔŋ wan dɛn de tɔk gud tin bɔt dɛn mama ɛn papa dɛn, dat de ɛp dɛn kɔmpin dɛn fɔ rɛspɛkt dɛn yon mama ɛn papa dɛn mɔ ɛn mɔ. Fɔ tru, if  mama ɛn papa dɛn nɔ lɛk dɛn pikin dɛn, i nɔ go izi fɔ lɛ dɛn pikin dɛn obe dɛn. Bɔt we pikin no se in mama ɛn papa dɛn rili lɛk am, dat de ɛp am fɔ obe dɛn ilɛksɛf i nɔ izi. Wan brɔda we nem Ɔstin tɔk se: “Pan ɔl we bɔku tɛm a kin want fɔ du tin mi yon we, mi mama ɛn papa kin tɛl mi wetin-ɛn-wetin dɛn want mi fɔ du, dɛn kin ɛksplen wetin mek dɛn want mi fɔ du wetin dɛn de tɛl mi, ɛn wi kin tɔk ɔltɛm. Dis dɔn ɛp mi fɔ de obe dɛn. A si se dɛn rili bisin bɔt mi, ɛn dat dɔn mek a want fɔ du wetin go mek dɛn gladi.”

10, 11. (a) Us bad abit dɛn we pipul dɛn gɛt we de sho se dɛn nɔ lɛk ɔda pipul dɛn? (b) Aw tru Kristian dɛn de sho se dɛn lɛk ɔda pipul dɛn?

¹⁰ Pɔl bin tɔk bɔt ɔda abit dɛn we de sho se pipul dɛn nɔ lɛk dɛn kɔmpin dɛn. Afta we Pɔl bin dɔn tɔk se pikin dɛn “nɔ go de obe dɛn mama ɛn papa,” i bin tɔk bak se pipul dɛn nɔ go de tɛl tɛnki. Dis na tru, bikɔs pipul dɛn we nɔ de tɛl tɛnki nɔ valyu di gud tin dɛn we ɔda pipul dɛn de du fɔ dɛn. Pɔl bin tɔk bak se pipul dɛn nɔ go de waka stret wit dɛn kɔmpin. Dɛn nɔ go gri pan ɛnitin, dis min se dɛn nɔ go want fɔ mek pis wit ɔda pipul dɛn. Dɛn go de tɔk bad bɔt Gɔd ɛn dɛn go de kɔmɔt biɛn dɛn kɔmpin, dat min se dɛn go de tɔk tin we nɔ fayn ɛn bad bad tin bɔt pipul dɛn ɛn ivin bɔt Gɔd. Ɛn dɛn go de lay bad bad wan pan pɔsin fɔ pwɛl in nem. *—Luk di futnot.

¹¹ Jiova in savant dɛn rili difrɛn frɔm bɔku pipul dɛn na di wɔl bikɔs dɛn rili lɛk ɔda pipul dɛn. Dis na tru bɔku tɛm. Infakt, Jizɔs bin tɔk se di wangren Lɔ we Gɔd bin gi Mozis we impɔtant pas di lɔ fɔ lɛk ɔda pipul dɛn na di lɔ fɔ lɛk Gɔd. (Matyu 22:​38, 39) Jizɔs bin tɔk bak se pipul dɛn go no udat na tru Kristian dɛn if dɛn de sho se dɛn lɛk dɛnsɛf. (Rid Jɔn 13:​34, 35.) Tru Kristian dɛn go ivin lɛk dɛn ɛnimi dɛn.—Matyu 5:​43, 44.

12. Aw Jizɔs bin sho se i lɛk ɔda pipul dɛn?

¹² Jizɔs bin sho se i rili lɛk ɔda pipul dɛn. I bin de du dis bay we i de travul go siti to siti fɔ tɛl ɔda pipul dɛn di gud nyuz bɔt Gɔd in Kiŋdɔm. I bin de mɛn dɛn wan dɛn we blaynd, dɛn wan dɛn we nɔ de waka, dɛn wan dɛn we gɛt lɛprɔsi, ɛn dɛn wan dɛn we dɛf. I bin de gi layf bak to di wan dɛn we dɔn day. (Lyuk 7:​22) Jizɔs bin ivin gi in layf fɔ sev mɔtalman, pan ɔl we bɔku pipul dɛn bin et am. Jizɔs bin rili falamakata di kayn lɔv we in Papa gɛt. Jiova Witnɛs dɛn ɔlsay na di wɔl de falamakata Jizɔs ɛn dɛn de sho se dɛn lɛk ɔda pipul dɛn.

13. Aw di lɔv we wi de sho to ɔda pipul dɛn de ɛp dɛn fɔ lan bɔt Jiova?

¹³ We wi sho se wi lɛk ɔda pipul dɛn, dat de mek dɛn want fɔ no bɔt wi Papa we de na ɛvin. Fɔ ɛgzampul, wan man we de na Tayland bin atɛnd wi kɔnvɛnshɔn. Dis man bin rili sɔprayz fɔ si di kayn lɔv we di brɔda ɛn sista dɛn bin gɛt fɔ dɛnsɛf. We i go na in os, i bin stat fɔ stɔdi di Baybul wit Jiova Witnɛs dɛn tu tɛm insay di wik. Dɔn i bigin fɔ prich to ɔl in fambul dɛn. Afta siks mɔnt, dis man bin du in fɔs Baybul ridin na Kiŋdɔm Ɔl. We wi, wi de sho se  wi lɛk ɔda pipul dɛn? Yu kin aks yusɛf dɛn kwɛstyɔn dɛn ya: ‘A de du ɔl wetin a ebul fɔ ɛp mi fambul dɛn, mi brɔda ɛn sista dɛn na di kɔngrigeshɔn, ɛn ɔda pipul dɛn we a de prich? A de tray fɔ si ɔda pipul dɛn di we aw Jiova de si dɛn?’

14, 15. Us bad abit dɛn we bɔku pipul dɛn gɛt? Aw sɔm pipul dɛn dɔn chenj dɛn bad abit dɛn?

¹⁴ Insay dis las dez, pipul dɛn gɛt ɔda bad abit dɛn bak we wi fɔ avɔyd. Fɔ ɛgzampul, bɔku pan dɛn nɔ lɛk fɔ du wetin gud. Dɛn et wetin gud ɛn dɛn ivin de tray fɔ stɔp ɛnibɔdi we lɛk fɔ du wetin gud. Dɛn kayn pipul dɛn de nɔ kin ebul fɔ kɔntrol dɛnsɛf, ɛn dɛn kin wayl. Sɔm pan dɛn tranga-yes. Dɛn nɔ de tink bifo dɛn du sɔntin ɛn dɛn nɔ kia if wetin dɛn de du de afɛkt ɔda pipul dɛn.

¹⁵ Bɔku pipul dɛn we bin wayl lɛk animal dɛn dɔn chenj dɛn bad abit dɛn. Di Baybul bin dɔn tɔk se dis kayn tin go apin. (Rid Ayzaya 11:​6, 7.) Wi dɔn rid na di Baybul se wayl animal dɛn lɛk wulf ɛn layɔn dɛn go de togɛda wit ship pikin ɛn kaw pikin dɛn, ɛn dɛn nɔ go du bad to dɛnsɛf. Wetin mek dɛn nɔ go du bad to dɛnsɛf? Di Baybul kɔntinyu fɔ tɔk se: “Di wɔl go no bɔt PAPA GƆD [“Jiova,” NW] bɛtɛ bɛtɛ wan.” (Ayzaya 11:​9) Animal dɛn nɔ go lan bɔt Jiova, so i min sɔntin. Dis tin we di Baybul tɔk min se pipul dɛn go chenj ɔ lɛf dɛn bad abit dɛn.

16. Aw di Baybul dɔn ɛp pipul dɛn fɔ chenj dɛn bad abit dɛn?

 ¹⁶ Bɔku pan wi brɔda ɛn sista dɛn bin wayl lɛk wulf bɔt naw dɛn gɛt pis wit ɔda pipul dɛn. Wi kin rid sɔm pan dɛn tru tru stori dɛn na di atikul we nem “The Bible Changes Lives” na jw.org. Di wan dɛn we dɔn kam fɔ no ɛn sav Jiova nɔ tan lɛk dɛn wan dɛn we de mek lɛk dɛn lɛk Gɔd biznɛs bɔt dɛn nɔ de du wetin i want. Dɛn kayn pipul dɛn de kin mek lɛk se dɛn de wɔship Gɔd, bɔt di we aw dɛn de biev de sho se dɛn nɔ de wɔship Gɔd. Bɔku pan Jiova in pipul dɛn bin wayl bɔt naw dɛn de liv dɛn layf lɛk aw di Baybul tɔk we i se: “Una fɔ liv di nyu layf we Gɔd dɔn gi una lɛkɛ aw i want. Pɔsin we liv dis kayn layf go du wetin rayt na Gɔd in yay ɛn ɔl wetin Gɔd tɛl am fɔ du.” (Lɛta Fɔ Ɛfisɔs 4:​23, 24) We pipul dɛn lan bɔt Gɔd, dɛn kin kam fɔ no se dɛn nid fɔ fala in lɔ dɛn. Dis kin ɛp dɛn fɔ chenj di tin dɛn we dɛn biliv, di we aw dɛn de tink, ɛn wetin dɛn de du. I nɔ izi fɔ chenj dɛn bad abit dɛn ya, bɔt Gɔd in spirit go ɛp dɛn wan dɛn we want fɔ du wetin go mek i gladi.

17. Aw wi go tek tɛm fɔ mek wi nɔ gɛt di bad abit dɛn we ɔda pipul dɛn gɛt?

¹⁷ I izi naw fɔ si di difrɛns bitwin di wan dɛn we de sav Gɔd ɛn di wan dɛn we nɔ de sav am. Wi fɔ tek tɛm fɔ lɛ wi nɔ gɛt di bad abit dɛn we dɛn wan dɛn we nɔ de sav Gɔd gɛt. Wi want fɔ du wetin Jiova de tɛl wi ɛn nɔ miks wit dɛn kayn pipul dɛn ya we Sɛkɛn Lɛta To Timoti 3:​2-5 tɔk bɔt. Na tru se wi nɔ go ebul fɔ avɔyd ɔl di wan dɛn we gɛt bad abit dɛn. Wi kin wok wit dɛn, go skul wit dɛn, ɔ de wit dɛn na di sem ples. Bɔt wi nɔ fɔ tink lɛk dɛn ɔ du tin lɛk dɛn. Wetin go ɛp wi fɔ du dat? Na bay we wi de stɔdi di Baybul ɛn pik padi dɛn we lɛk Jiova, dat go mek wi kɔntinyu fɔ gɛt tayt padi biznɛs wit am.

18. Aw di tin dɛn we wi de tɔk ɛn du go ɛp ɔda pipul dɛn fɔ lan bɔt Jiova?

¹⁸ Wi want bak fɔ ɛp ɔda pipul dɛn fɔ lan bɔt Jiova. Fɛn we dɛn fɔ prich, ɛn aks Jiova fɔ ɛp yu fɔ no di rayt tin we yu fɔ tɔk di rayt tɛm. Wi fɔ mek ɔda pipul dɛn no se wi na Jiova Witnɛs dɛn. Dɔn, di fayn we aw wi de biev go briŋ prez to Gɔd ɛn nɔto to wi. Jiova dɔn tich wi se wi fɔ “lɛf fɔ liv lɛkɛ pipul we nɔ no am, wi fɔ lɛf dɛn bad tin we wi want du na di wɔl, ɛn lan fɔ kɔntrol wisɛf, fɔ waka tret, ɛn fɔ waka wit am na dis wɔl.” (Taytɔs 2:​11-14) If wi falamakata Jiova ɛn du wetin i want wi fɔ du, ɔda pipul dɛn go si. Sɔm pan dɛn go ivin tɔk se: ‘Wi want fɔ go wit una bikɔs wi dɔn yɛri se, PAPA GƆD de wit una.’—Zɛkaraya 8:​23.