DI TƆPIK NA DI FRƆNT PEJ—DI STORI BƆT AW DƐN NƆ EBUL FƆ PWƐL DI BAYBUL
Wan Impɔtant Stori we Wi Rili Nid fɔ No Bɔt
No ɔda buk nɔ de we difrɛn rilijɔn dɛn de yuz we yu go kɔmpia wit di Baybul. Fɔ lɔng tɛm, no ɔda buk nɔ de we dɔn ɛp bɔku pipul dɛn fɔ no wetin fɔ biliv. Ɛn no ɔda buk nɔ de we bɔku pipul dɛn dɔn stɔdi gud gud wan ɛn we dɛn dɔn kɔndɛm.
Fɔ ɛgzampul, masta sabi bukman dɛn kin dawt se di Baybul we wi de yuz naw nɔ gɛt di raytin dɛn frɔm dɛn fɔs fɔstɛm pepa dɛn. Wan masta sabi bukman we de stɔdi bɔt rilijɔn bin se: “Wi nɔ go shɔ se na di kɔrɛkt tin dɛn we de na dɛn fɔs fɔstɛm pepa dɛn wi dɔn rayt bak. Di kɔpi dɛn we de naw gɛt bɔku mistek dɛn, ɛn dɛn bin mek bɔku pan dɛn kɔpi ya afta we dɛn bin dɔn mek di fɔs fɔstɛm pepa dɛn so dat mek dɛn gɛt bɔku tin dɛn we mek dɛn difrɛn.”
Bikɔs sɔm pipul dɛn kɔmɔt na difrɛn rilijɔn dɛn, dat de mek dɛn dawt di Baybul. Fɔ ɛgzampul, Fezal bin mɛn na famili we nɔto Kristian ɛn dɛn bin tich am se di Baybul na oli buk bɔt i dɔn chenj. I bin se: “Dat bin mek a bin de dawt we pipul dɛn want fɔ tɔk to mi bɔt di Baybul. Apat frɔm dat, dɛn nɔ gɛt di fɔs fɔstɛm Baybul. Dɛn dɔn chenj am!”
Yu tink se i rili mata if di Baybul dɔn chenj ɔ i nɔ chenj? Wɛl, tink bɔt dɛn kwɛstyɔn dɛn ya: Yu tink se yu go biliv di fayn fayn tin dɛn we di Baybul dɔn prɔmis fɔ tumara bambay if yu de dawt if dɛn prɔmis ya de na dɛn fɔs fɔstɛm pepa dɛn? (Lɛta Fɔ Rom 15:4) Yu tink se yu go fala di advays dɛn we de na di Baybul we yu want fɔ disayd bɔt us wok fɔ du, aw fɔ manej yu famili, ɔ aw fɔ wɔship Gɔd, if di Baybul dɛn we dɛn kɔpi we de naw gɛt bɔku mistek dɛn?
Pan ɔl we di fɔs fɔstɛm Baybul dɛn nɔ de igen, wi kin stil yuz di wan dɛn we dɛn bin dɔn mek trade trade, wit di fɔs fɔstɛm pepa dɛn we dɛn rayt di Baybul pan. Aw dɛn fɔs fɔstɛm pepa dɛn de we dɛn rayt di Baybul pan nɔ bin rɔtin, pipul dɛn bin de tray fɔ pwɛl dɛn, ɛn dɛn nɔ ebul fɔ chenj di raytin dɛn we de de? Aw di pwɛl we dɛn nɔ ebul fɔ pwɛl dɛn fɔs fɔstɛm pepa dɛn we dɛn rayt di Baybul pan go mek yu biliv ɛn nɔ dawt di tru tin dɛn we de na di Baybul we wi de yuz naw? Mek wi tɔk bɔt di ansa dɛn to dɛn kwɛstyɔn dɛn ya na di stori bɔt aw dɛn nɔ ebul fɔ pwɛl di Baybul.
