1. Wetin mek i impɔtant fɔ mek wi no di tɛm ɛn wetin de apin arawnd wi? Gi wan ɛgzampul. (Luk di pikchɔ nia dis atikul in taytul.)

DI KƆNVƐNSHƆN de kam bigin. Di chiaman go na di stej ɛn wɛlkɔm ɔlman. Di myuzik go bigin ple jisnɔ. Di pipul dɛn no se tɛm dɔn rich fɔ mek dɛn fɛn dɛn sidɔm ples. Dɛn want fɔ lisin to di fayn fayn myuzik ɛn dɛn rili want fɔ yɛri di tɔk dɛn. Bɔt sɔntɛm sɔm pipul dɛn de we nɔ de pe atɛnshɔn to di chiaman ɔ notis se di myuzik de ple. So dɛn nɔ no se di kɔnvɛnshɔn de kam bigin, ɛn stil dɛn de waka waka ɔ de tɔk to dɛn padi dɛn. Dis kayn tin kin sho wetin kin apin we wi nɔ no di tɛm ɔ wetin de apin arawnd wi. Dis na impɔtant lɛsin fɔ wi bikɔs i nɔ go te igen plɛnti tin dɛn go bigin fɔ apin ɛn wi fɔ rɛdi fɔ wetin gɛt fɔ apin. Wetin na dɛn tin dɛn de?

2. Wetin mek Jizɔs bin tɛl in disaypul dɛn fɔ “waydawek”?

² Jizɔs Krays bin wɔn in disaypul dɛn se dɛn fɔ waydawek ɛn rɛdi fɔ di tɛm we “di wɔl de dɔn.” I bin tɛl dɛn se: “Una fɔ waydawek, una fɔ de wach, bikɔs una nɔ no ustɛm dɛn tin ya go bi.” Afta dat i tɔk bɔku tɛm se: “Una fɔ waydawek.” (Matyu 24:​3; Rid Mak 13:​32-37.) Di stori we Matyu bin rayt  sho bak se Jizɔs bin wɔn in disaypul dɛn bɔt dis. Jizɔs bin tɛl dɛn se: “Una fɔ waydawek, bikɔs una nɔ no di de we una Masta go kam.” Ɛn igen i wɔn dɛn se: “Una fɔ rɛdi ɔltɛm, bikɔs Mɔtalman Pikin go kam di tɛm we una nɔ mekɔp se i go kam.” Dɔn i ripit to dɛn bak se: “Una fɔ waydawek, bikɔs una nɔ no di de ɔ di awa we Mɔtalman Pikin go kam.”—Matyu 24:​42-44; 25:​13.

3. Wetin mek wi fɔ pe atɛnshɔn pan di wɔnin we Jizɔs bin gi?

³ Jiova Witnɛs dɛn de pe atɛnshɔn pan di wɔnin we Jizɔs bin gi. Wi no se wi de na “di tɛm we di ɛnd go kam” ɛn di trɔbul we go pas ɔl di wan dɛn we dɔn bi go kam jisnɔ! (Daniɛl 12:​4; Matyu 24:​21) Jɔs lɛk aw Jizɔs bin dɔn tɔk, Jiova in pipul dɛn de prich bɔt di Kiŋdɔm ɔlsay na di wɔl. Dɔn wi de si wɔ, siknɛs, atkwek, ɛn angri na plɛnti ples dɛn. Rilijɔn dɛn de fɛt dɛnsɛf, plɛnti bad bad tin dɛn de apin, ɛn fɛt-fɛt de bi tide pas aw i bin de bi trade. (Matyu 24:​7, 11, 12, 14; Lyuk 21:​11) Wi rili de wet fɔ di tɛm we Jizɔs go kam fɔ du ɔl wetin in Papa want fɔ du.—Mak 13:​26, 27.

4. (a) Wetin mek wi biliv se Jizɔs no di tɛm we Amagɛdɔn go kam? (b) Pan ɔl we wi nɔ no ustɛm da big trɔbul go bigin, wetin wi no se go apin?

⁴ We wi kin go fɔ kɔnvɛnshɔn, wi kin no di tɛm we ɛni program fɔ bigin. Bɔt i impɔtant fɔ no di rayt tɛm we da big trɔbul go bigin. We Jizɔs bin de na di wɔl i bin se: “Nɔbɔdi nɔ no di de ɔ di awa we dɛn tin ya go bi. Gɔd in enjɛl dɛnsɛf ɛn Gɔd in Pikin insɛf nɔ no di de ɔ di awa, na di Papa in wangren no di de ɛn di awa we dat go bi.” (Matyu 24:​36) Bikɔs na Jizɔs go de bifo na di wɔ we dɛn kɔl Amagɛdɔn, sɔntɛm i go dɔn sabi naw ustɛm dis wɔ go apin. (Rɛvɛleshɔn 19:​11-16) Bɔt stil, wi nɔ no di de ɔ di tɛm we di wɔl go dɔn. Na dat mek i rili impɔtant fɔ mek wi waydawek. Jiova dɔn disayd ustɛm i go want mek da big trɔbul go bigin, ɛn ɛvride di tɛm de kam nia mɔ ɛn mɔ. Di Baybul se: “I go bi ma.” (Rid Abakɔk 2:​1-3.) Wetin mek wi biliv se dis go apin?

5. Gi wan ɛgzampul fɔ sho se wetin Jiova kin tɔk kin apin di tɛm we i fɔ bi.

⁵ Wetin Jiova tɔk kin apin di rayt tɛm! Fɔ ɛgzampul, tink bɔt di tɛm we i bin fri in pipul dɛn kɔmɔt na Ijipt. Dat na bin Naysan 14 insay di ia 1513 bifo Krays. Leta Mozis bin rayt bɔt dis de. I bin se: “Na di vɛri de we mek dɛn fo ɔndrɛd ɛn tati ia ɔl di Izrɛlayt famili dɛn kɔmɔt na Ijipt.” (Ɛksodɔs 12:​40-42) Insay Naysan 14 insay di ia 1943 bifo Krays, di prɔmis we Jiova bin mek to Ebraam fɔ se i go blɛs in pikin dɛn bin ol wata. Dat na bin 430 ia bifo Jiova fri di Izrɛlayt dɛn. (Lɛta Fɔ Galeshya 3:​17,18) Leta wan ɔda tɛm, Jiova tɛl Ebraam se: “No naw fɔ tru tru se, yu jɛnareshɔn dɛn go bi trenja na ɔda kɔntri; dɛn go bi slev de ɛn dɛn go trit dɛn bad fɔ fo ɔndrɛd ia.” (Jɛnɛsis 15:​13; Di Apɔsul Dɛn Wok 7:​6) Di 400 ia bin bigin insay di ia 1913 bifo Krays we Ishmɛl bin bigin fɔ trit Izak bad. I dɔn di sem de we Jiova bin pul di Izrɛlayt dɛn kɔmɔt na Ijipt. (Jɛnɛsis 21:​8-10; Lɛta Fɔ Galeshya 4:​22-29) Fɔ lɔng tɛm, Jiova bin dɔn pik di de we i go fri in pipul dɛn!

6. Wetin mek wi shɔ se Jiova go sev in pipul dɛn?

⁶ Jɔshwa na bin wan pan di Izrɛlayt we  bin kɔmɔt na Ijipt. Afta lɔng tɛm dɔn pas i bin mɛmba di Izrɛlayt dɛn se: “Ɔldo in layf nɔ lɔŋ igen, bɔt dɛn fɔ mɛmba ɔltɛm na dɛn at ɛn sol se natin nɔ de we PAPA GƆD bin se i go du we i nɔ du.” (Jɔshwa 23:​2, 14) Jiova dɔn prɔmis fɔ sev in pipul dɛn di tɛm we da big trɔbul go kam ɛn fɔ gi dɛn layf we go de sote go na di nyu wɔl. Ɛn wi shɔ se dis prɔmis go mɔs bi. So if wi want fɔ de na di nyu wɔl, wi fɔ waydawek.

7, 8. (a) Uskayn wok wachman dɛn bin gɛt trade trade? Us lɛsin wi kin lan frɔm dat? (b) Gi wan ɛgzampul we de sho wetin kin apin we wachman slip di tɛm we i de wok.

⁷ Wi kin lan lɛsin frɔm di wachman dɛn we bin de gayd di siti dɛn trade trade. Bɔku pan dɛn siti ya, lɛk Jerusɛlɛm, na ay ay wɔl bin de rawnd dɛn so dat ɛnimi dɛn nɔ go ebul go insay. Wachman dɛn kin de pantap dɛn wɔl dɛn de, ɛn we dɛn de ɔp de, dɛn kin si ɔlsay na di siti. Ɔda wachman dɛn kin de na di siti in get. Dɛn man dɛn ya kin waydawek ol de ɛn nɛt, ɛn if dɛn si ɛnimi dɛn de kam dɛn kin wɔn di pipul dɛn na di siti. (Ayzaya 62:​6) Dɛn no se i impɔtant fɔ lɛ dɛn waydawek ɛn tek tɛm wach fɔ no wetin de apin. If dɛn nɔ du dat, bɔku pipul dɛn go day.—Izikɛl 33:​6.

⁸ Josifɔs, we bin de rayt di Ju pipul dɛn istri, bin ɛksplen bɔt aw di Roman sojaman dɛn bin ɛnta Jerusɛlɛm insay di ia 70 afta Krays. Di wachman dɛn we bin de wach wan say pan di siti bin de slip. Dis bin mek di Roman sojaman dɛn bin ebul fɔ ɛnta di siti. Dɛn go na di tɛmpul, put faya pan am, ɛn pwɛl di wan ol Jerusɛlɛm. Dat na bin di las pat pan da big trɔbul we di Ju pipul dɛn bin ɛva si.

9. Wetin plɛnti pipul dɛn nɔ no tide?

⁹ Plɛnti gɔvmɛnt dɛn tide kin put sojaman dɛn fɔ gayd dɛn bɔda dɛn ɛn dɛn kin gɛt kɔmpyuta program dɛn fɔ ɛp fɔ protɛkt dɛn bɔda. Dɛn gɔvmɛnt dɛn ya kin wach fɔ ɛnibɔdi ɔ ɛnitin we go want fɔ ambɔg dɛn kɔntri. Bɔt dɛn dɛn nɔ no se wan pawaful gɔvmɛnt de na ɛvin we pas ɔl ɔda gɔvmɛnt dɛn, ɛn we di rula na Krays Jizɔs. I nɔ go te igen, da gɔvmɛnt de go fɛt wit ɔl dɛn gɔvmɛnt ya na dis wɔl. (Ayzaya 9:​6, 7; 56:​10; Daniɛl 2:​44) Wi de wet fɔ da de de fɔ kam ɛn wi want fɔ rɛdi wisɛf fɔ am. So wi de pe atɛnshɔn pan di tin dɛn we di Baybul bin tɔk ɛn kɔntinyu fɔ sav Jiova fetful wan.—Sam 130:​6.

10, 11. (a) Wetin wi fɔ tek tɛm lɛ wi nɔ du? Wetin mek? (b) Wetin mek yu biliv se na Setan de mek pipul dɛn nɔ de gri wit wetin di Baybul bin dɔn tɔk?

¹⁰ Tink bɔt wan wachman we waydawek ol nɛt. Bɔt we tɛm want rich fɔ lɛ do klin, i nɔ bin izi fɔ am fɔ waydawek bikɔs i bin dɔn taya. Semweso, wi de na di tɛm we di wɔl want dɔn. Ɛn di mɔ we di tɛm de kam nia fɔ lɛ di wɔl dɔn, na di mɔ i nɔ go izi fɔ lɛ wi waydawek. Bɔt i go bad if wi nɔ kɔntinyu fɔ de wach! Lɛ wi tɔk bɔt tri tin dɛn we kin mek wi nɔ waydawek.

¹¹ Setan de ful pipul dɛn. Na in na “di wan we de rul dis wɔl.” Jɔs bifo Jizɔs day, i bin mɛmba in disaypul dɛn tri tɛm bɔt dis. (Jɔn 12: 31; 14:​30; 16:​11) Setan dɔn yuz lay lay rilijɔn fɔ ful pipul dɛn. Na dat mek tide bɔku pipul dɛn nɔ de gri wit wetin di Baybul bin dɔn tɔk we sho klia wan se i nɔ go te igen dis wɔl go dɔn.  (Zɛfinaya 1:​14) Dis dɔn sho klia wan se “Setan dɔn blɛn dɛn yay” fɔ mek dɛn nɔ biliv. (Sɛkɛn Lɛta Fɔ Kɔrint 4:​3-6) Dis dɔn mek, we wi de tɛl pipul dɛn se i nɔ go te igen di wɔl de kam dɔn, ɛn na Krays de rul naw, bɔku pan dɛn nɔ kin want fɔ lisin. Bɔku tɛm, dɛn kin tɔk se, “A nɔ want fɔ yɛri.”

12. Wetin mek wi nɔ fɔ alaw Setan fɔ ful wi?

¹² Pan ɔl we bɔku pipul dɛn nɔ want fɔ no wetin di Baybul bin dɔn tɔk se go apin, wi nɔ fɔ alaw dat fɔ mek wi at pwɛl. Wi no wetin mek i impɔtant fɔ mek wi go kɔntinyu fɔ waydawek. Pɔl bin tɔk to in brɔda dɛn se: “Unasɛf no gud wan se di Masta go kam.” I tɔk bak se: “Lɛkɛ aw tifman kin kam na nɛt.” (Rid Fɔs Lɛta Fɔ Tɛsalonayka 5:​1-6.) Jizɔs bin wɔn wi se: “Unasɛf fɔ rɛdi ɔltɛm bikɔs Mɔtalman Pikin go kam tɛm we una nɔ mekɔp.” (Lyuk 12:​39, 40) I nɔ go te igen Setan go ful pipul dɛn bay we i go mek dɛn tink se “ɔltin rayt, natin nɔ de fɔ fred” na di wɔl. Dɔn Jiova in de go kam jɔs lɛk dat ɛn dɛn go rili shɔk. Bɔt we wisɛf? If wi want fɔ rɛdi fɔ da de de ɛn wi nɔ want fɔ alaw Setan fɔ ful wi lɛk ɔda pipul dɛn “wi fɔ waydawek ɛn wi fɔ soba.” Na dat mek wi fɔ de rid Gɔd in Wɔd ɛnide ɛn tink gud wan bɔt wetin Jiova de tɛl wi.

13. Aw di spirit we de na di wɔl de afɛkt mɔtalman? Aw wi go avɔyd di bad we aw pipul dɛn de tink na di wɔl?

¹³ Na di spirit we de na di wɔl de kɔntrol di we aw pipul dɛn de tink. Bɔku pipul dɛn tide kin tink se dɛn nɔ nid fɔ no bɔt Gɔd. (Matyu 5:​3) Bɔt, dɛn de yuz ɔl dɛn tɛm ɛn trɛnk fɔ gɛt bɔku pan di tin dɛn we di wɔl de gi dɛn. (Jɔn In Fɔs Lɛta 2:​16) Dɔn, bɔku bɔku ɛnjɔyment dɛn de naw pas aw i bin de fɔstɛm. Dis de mek pipul dɛn lɛk ɛnjɔymɛnt mɔ ɛn i de mek dɛn du ɛnitin we dɛn fil fɔ du. (Sɛkɛn Lɛta To Timoti 3:​4) Dɛn tin ya de pul bɔku pipul dɛn maynd pan di tin dɛn we impɔtant pas ɔl, ɛn dɛn nɔ de tink bɔt dɛn padi biznɛs wit Gɔd. Na dat mek Pɔl bin mɛmba Kristian dɛn se “di tɛm we wi fɔ wek, dɔn kam” so dɛn nɔ fɔ put dɛn maynd pan di tin dɛn we dɛn want ɔ nid fɔ satisfay dɛnsɛf.—Lɛta Fɔ Rom 13:​11-14.

14. Us wɔnin de insay Lyuk 21:​34, 35?

¹⁴ Wi nɔ want di spirit we de na di wɔl fɔ kɔntrol di we aw wi de tink, bɔt na Gɔd in yon spirit wi want. Jiova dɔn yuz in spirit fɔ ɛp wi fɔ ɔndastand klia wan bɔt wetin gɛt fɔ apin. (Fɔs Lɛta Fɔ Kɔrint 2:​12) ^[1] (Rid di ɛndnot ɔnda di las paregraf.) Bɔt wi gɛt fɔ rili tek tɛm. Ivin kɔmɔn tin dɛn kin pul wi maynd pan di tin dɛn we fɔ mek wi sav Jiova. (Rid Lyuk 21:​34, 35.) Ɔda pipul dɛn kin tɛl wi se wi ful bikɔs wi biliv se wi de na di las dez. (Pita In Sɛkɛn Lɛta 3:​3-7) Bɔt wi  nɔ fɔ mek dɛn pwɛl wi at. Wi de si tin dɛn we de sho wi klia wan se i nɔ go te igen di wɔl go dɔn jisnɔ. If wi want fɔ lɛ Gɔd in spirit kɔntrol wi, wi fɔ jɔyn wi brɔda dɛn fɔ go mitin ɔltɛm.

15. Wetin bin apin to Pita, Jems, ɛn Jɔn? Aw dat kin apin to wisɛf?

¹⁵ Wi bad abit dɛn kin mek i nɔ izi fɔ lɛ wi de wach. Jizɔs bin ɔndastand se mɔtalman nɔ pafɛkt ɛn dɛn kin mek mistek dɛn. Tink bɔt wetin bin apin di nɛt bifo Jizɔs day. Pan ɔl we Jizɔs bin pafɛkt, i bin no se fɔ lɛ i de fetful wan, i nid fɔ pre to in Papa fɔ ɛp am. Jizɔs bin tɛl tri pan in apɔsul dɛn we na Pita, Jems, ɛn Jɔn fɔ waydawek we i de pre. Bɔt di apɔsul dɛn nɔ bin no wetin mek i rili impɔtant fɔ mek dɛn waydawek. Dɛn bin taya, ɛn dɛn bin want fɔ slip. Jizɔs insɛf bin taya, bɔt i bin waydawek fɔ pre to in Papa. Di apɔsul dɛnsɛf bin fɔ de pre da tɛm de.—Mak 14:​32-41.

16. Frɔm wetin Jizɔs bin tɔk na Lyuk 21:​36, aw wi go kɔntinyu fɔ “waydawek”?

¹⁶ Wetin go ɛp wi “fɔ waydawek” ɛn rɛdi fɔ Jiova in de? Wi nid fɔ rili gɛt zil fɔ kɔntinyu fɔ du wetin rayt. Bɔt nɔto dat nɔmɔ. Jɔs bifo Jizɔs day, i bin tɛl in disaypul dɛn se dɛn nid fɔ de pre to Jiova fɔ ɛp dɛn. (Rid Lyuk 21:​36.) Fɔ lɛ wi go waydawek insay dis las dez, wisɛf fɔ de pre to Jiova ɔltɛm.—Pita In Sɛkɛn Lɛta 4:​7.

17. Aw wi go shɔ se wi rɛdi fɔ wetin gɛt fɔ apin tumara bambay?

¹⁷ Jizɔs bin se di ɛnd go kam “di tɛm we una nɔ mekɔp se i go kam.” (Matyu 24:​44) So wi fɔ rɛdi ɔltɛm. Naw nɔ to di tɛm fɔ tray fɔ liv wi layf di we aw Setan in wɔl se wi go gɛt gladi at. Dat na drim we nɔ go ɛva apin. Bɔt Jiova ɛn Jizɔs dɔn yuz di Baybul fɔ tɛl wi aw wi fɔ waydawek. So lɛ wi pe atɛnshɔn to wetin di Baybul bin dɔn tɔk ɛn aw dɛn de apin. Ɛn lɛ wi ɔl kɔntinyu fɔ kam nia Jiova ɛn put in Kiŋdɔm fɔs na wi layf. Wi go rɛdi we di ɛnd kam. (Rɛvɛleshɔn 22:​20) Na dat go mek wi sev!