Kwɛstyɔn Dɛn We Pipul Dɛn Kin Aks
Yu tink se Kristian dɛn fɔ kip gɔn lɛk pistul ɔ ɔntingɔn fɔ protɛkt dɛnsɛf frɔm bad pipul dɛn?
Kristian dɛn kin fala di advays dɛn we de na di Baybul fɔ fɛn we fɔ protɛkt dɛnsɛf. Dɛn advays ya sho se i bad fɔ lɛ Kristian dɛn yuz gɔn lɛk pistul, ɔntingɔn ɔ ɛni ɔda kayn gɔn fɔ protɛkt dɛnsɛf frɔm bad pipul dɛn. Tink bɔt dɛn pɔynt dɛn ya:
Mɔtalman layf impɔtant to Jiova. Devid bin rayt bɔt Jiova se: “Na yu de gi layf.” (Sam 36:9) So if ɛni Kristian disayd fɔ yuz gɔn fɔ protɛkt insɛf ɔ in prɔpati, i fɔ mek shɔ se i du ɔl wetin i ebul fɔ mek i nɔ gɛt blɔd na in ed, we min se i nɔ fɔ kil ɔda pɔsin.—Ditarɔnɔmi 22:8; Sam 51:14.
Na tru se ɛnitin we pɔsin yuz fɔ protɛkt insɛf kin mek i kil ɔda pɔsin. Bɔt i izi fɔ kil pɔsin wit gɔn ilɛksɛf yu min am ɔ yu nɔ min am. * (Luk di futnot.) Di pɔsin sɛf we de kam atak kin fred, so if i si gɔn dat go mek tin wɔs ɛn sɔntɛm wan pɔsin go mɔs kil in kɔmpin.
We Jizɔs tɛl in disaypul dɛn fɔ kɛr go sɔd di nɛt bifo i day, i nɔ bin tɛl dɛn se dɛn fɔ du dat fɔ protɛkt dɛnsɛf. (Lyuk 22:36, 38) Bifo dat Jizɔs bin want fɔ tich dɛn wan lɛsin fɔ se: Di wan dɛn we de fala am nɔ fɔ yuz ɛnitin fɔ fɛt, ivin if bɔku bɔku pipul dɛn kam atak dɛn wit tin dɛn fɔ fɛt. (Lyuk 22:52) Afta we Pita bin kɔt di ay prist in slev in yes, Jizɔs bin tɛl Pita se: “Put yu sɔd bak nain ples.” Dɔn Jizɔs bin gi wan advays we de gayd Kristian dɛn bak tide. I se: “Ɛnibɔdi we fɛt wit sɔd, na sɔd dɛn go tek kil am.”—Matyu 26:51, 52.
Mayka 4:3 tɔk se Gɔd in pipul dɛn “go nak nak dɛn sɔd fɔ mek tin fɔ yuz na fam, ɛn dɛn spia, dɛn go mek i bi nɛf fɔ kɔt na fam.” Bɔku pipul dɛn no se tru Kristian dɛn nɔ de pan fɛt-fɛt. Dɛn de fala di advays we Gɔd gi we di apɔsul Pɔl bin rayt se “if pɔsin du una bad, una nɔ fɔ tɔn di bad gi am bak” ɛn “una fɔ du ɔl wetin una ebul fɔ du so dat una kin de kwayɛt wan wit ɔlman.” (Lɛta Fɔ Rom 12:17, 18) Pan ɔl we bɔku prɔblɛm dɛn bin mit Pɔl lɛk we “tifman” dɛn atak ami nɔ bin ɛva du tin we de agɛns di advays dɛn we di Baybul gi fɔ protɛkt insɛf. (Sɛkɛn Lɛta Fɔ Kɔrint 11:26) Bifo dat i bin abop pan Gɔd ɛn i no se di fayn advays dɛn we de na di Baybul “bɛtɛ pas fɔ gɛt tin dɛn fɔ tek fɛt.”—Ɛkliziastis 9:18.
Layf impɔtant fa fawe to Kristian dɛn pas prɔpati. Wi no se “nɔto di plɛnti tin dɛn we pɔsin gɛt go mek di pɔsin gɛt di tru layf.” (Lyuk 12:15) So if wi tɔk fayn wan to tifman we gɛt gɔn ɛn i stil nɔ stɔp, wi fɔ fala di advays we Jizɔs gi wi we se: “Nɔ chalenj pɔsin we wikɛd.” Dis min se wi fɔ alaw am mek i tek ɛnitin we i want. (Matyu 5:39, 40, NW; Lyuk 6:29) * (Luk di futnot.) I fayn fɔ lɛ wi avɔyd ɛnitin we go mek bad pɔsin put yay pan wi. I nɔ go izi fɔ lɛ dɛn atak wi if wi fala di advays we de na di Baybul ɛn avɔyd “dɛn tin we pɔsin kin want bad bad wɛn i si dɛn.” (Jɔn In Fɔs Lɛta 2:16) If wi neba dɛn no se wi na Jiova Witnɛs dɛn we nɔ de mek plaba, dat kin protɛkt wi.—Prɔvabs 18:10.
Kristian dɛn rɛspɛkt ɔda pipul dɛn kɔnshɛns. (Lɛta Fɔ Rom 14:21) Sɔm brɔda ɛn sista dɛn go shɔk ɔ dɛn nɔ go gɛt bɛtɛ fet igen if dɛn kam fɔ no se wan pan dɛn Kristian brɔda de yuz gɔn fɔ protɛkt insɛf frɔm bad pipul dɛn. Na tru se wi go gɛt laysin fɔ gɛt gɔn, bɔt bikɔs wi lɛk wi brɔda ɛn sista dɛn, wi nɔ go ɛva want fɔ du sɔntin we go mek dɛn nɔ gɛt bɛtɛ fet igen.—Fɔs Lɛta Fɔ Kɔrint 10:32, 33; 13:4, 5.
Kristian dɛn want fɔ sɛt fayn ɛgzampul fɔ ɔda pipul dɛn. (Sɛkɛn Lɛta Fɔ Kɔrint 4:2; Pita In Fɔs Lɛta 5:2, 3) If ɛni Kristian gɛt gɔn fɔ protɛkt insɛf frɔm bad pipul dɛn, di ɛlda dɛn go yuz di Baybul fɔ advays am. If di pɔsin disayd se i de kip di gɔn, da pɔsin de nɔ go bi gud ɛgzampul. Dat go mek i nɔ go gɛt no spɛshal wok insay di kɔngrigeshɔn. Dis sem advays de fɔ ɛni Kristian we want fɔ kɔntinyu fɔ du wok we de mek i ol gɔn. I go fayn if i tray fɔ fɛn ɔda wok. *—Luk di futnot.
Ɔl Kristian gɛt fɔ disayd aw i go protɛkt insɛf, in famili, in prɔpati dɛn, ɛn us wok i go du. Bɔt i fɔ fala di advays dɛn we de na di Baybul we i de disayd fɔ du dɛn kayn tin dɛn ya. Wi Gɔd we gɛt sɛns dɔn gi wi dɛn advays dɛn ya bikɔs i lɛk wi. Na dat mek Kristian we gɛt tayt padi biznɛs wit Jiova go disayd nɔ fɔ kip gɔn fɔ protɛkt insɛf frɔm bad pipul dɛn. Dɛn no se if dɛn abop pan Gɔd ɛn fala wetin di Baybul se, dɛn go de sef wan so te go.—Sam 97:10; Prɔvabs 1:33; 2:6, 7.
Di tɛm we da big big trɔbul go kam, Kristian dɛn go abop pan Jiova ɛn dɛn nɔ go tray fɔ fɛt fɔ dɛnsɛf
^ par. 5 Pɔsin we na Kristian go disayd fɔ gɛt gɔn (lɛk pistul ɔ ɔntingɔn) fɔ ɔntin bif fɔ it ɔ fɔ protɛkt insɛf frɔm bad bad animal dɛn. Ɛnitɛm we i nɔ de yuz di gɔn, i fɔ pul di bulɛt dɛn kɔmɔt insay di gɔn, ɔ i kin skata di gɔn ɛn kip am na say we sef. Na kɔntri dɛn we dɛn nɔ de alaw pɔsin fɔ gɛt gɔn ɔ usay di gɔvmɛnt pas lɔ se nɔbɔdi nɔ fɔ gɛt gɔn, Kristian dɛn fɔ obe da lɔ de.—Lɛta Fɔ Rom 13:1.
^ par. 8 Fɔ lan aw fɔ protɛkt yusɛf if pɔsin want fɔ rep yu, na fɔ rid di atikul we gɛt di taytul “How to Prevent Rape” we de na di Mach 8, 1993, Awake!
^ par. 10 If yu want fɔ no mɔ bɔt wok dɛn we go mek pɔsin yuz gɔn, na fɔ rid di Novɛmba 1, 2005, Wachtawa pej 31; ɛn di Julay 15, 1983, Wachtawa pej 25 ɛn pej 26.
