Di apɔsul Pɔl bin no se di lay lay tin dɛn we Setan de tɔk rili bad. Bɔt nɔtɔ ɔl Kristian dɛn no bɔt dis denja. Fɔ ɛgzampul, i go bi se sɔm pan di Kristan dɛn we bin de na Kɔrint bin de fil se dɛn tinap tranga wan na di trut ɛn Setan nɔ go ebul dɛn. (Fɔs Lɛta Fɔ Kɔrint 10:​12) Na dat mek Pɔl bin wɔn dɛn se: “A de fred mek sɔm ɔda tin dɛn nɔ go na una ed we go mek una nɔ de fɔ Krays in wangren, jɛs lɛkɛ aw di snek bin tek kɔni sɛns mek Iv ful.”—Sɛkɛn Lɛta Fɔ Kɔrint 11:​3.

Di tin dɛn we Pɔl tɔk sho se i impɔtant fɔ mek wi nɔ abop tumɔs pan wisɛf. Fɔ win di fɛt agɛns Setan in lay lay tɔk dɛn, yu fɔ sabi aw dɛn rili bad ɛn protɛkt yusɛf frɔm dɛn.

Insay dis atikul, lay lay tɔk na tɔk dɛn we nɔ kɔrɛkt ɔ tɔk we de ful pɔsin ɔ we de kɔntrol di we aw pɔsin de tink ɛn du tin. Di buk we gɛt di taytul Propaganda and persuasion, se dɛn lay lay tɔk dɛn ya na tɔk dɛn we “nɔ rili gud, we de kɔz prɔblɛm, ɛn we nɔ fia.” Pipul dɛn se dɛn tɔk dɛn ya na tɔk dɛn “we nɔ kɔrɛkt, we de ful pɔsin, ɛn na tɔk dɛn we de kɔntrol pɔsin in maynd.”

Lay lay tɔk dɛn rili bad bikɔs smɔl smɔl dɛn kin ambɔg di we aw wi de tink we wi nɔ go ebul fɔ notis. Wi go kɔmpia lay lay tɔk dɛn to gas we gɛt pɔyzin we wi nɔ de si ɔ smɛl. Vans Pakad, we na wan masta sabi bukman we stɔdi bɔt aw mɔtalman de biev,  bin se lay lay tɔk dɛn kin ambɔg di aw wi de biev “fawe pas aw wi go no se i dɔn ambɔg wi.” Wan ɔda masta sabi bukman tɔk se lay lay tɔk dɛn kin mek pipul dɛn biev di kayn we we rili bad ɛn we nɔ de sho wan sɛns. Dat dɔn mek dɛn kin dɔnawe wit wan ol trayb, dɛn kin fɛt wɔ, ɛn pipul dɛn kin sɔfa bikɔs dɛn de na wan rilijɔn ɔ dɛn gɛt wan patikyula kɔlɔ.—Easily Led—A History of Propaganda.

If mɔtalman ebul fɔ ful wi wit lay lay tɔk dɛn, wetin wi go tɔk bɔt Setan? I dɔn stɔdi di we aw mɔtalman de biev frɔm di tɛm we Gɔd mek wi. Dɔn bak na “Setan de rul di wan ol wɔl,” so i kin yuz ɛni tin na di wɔl fɔ ful pipul dɛn. (Jɔn In Fɔs Lɛta 5:​19; Jɔn 8:​44) Setan dɔn ‘blaynd’ bɔku pipul dɛn maynd wit in lay lay tɔk dɛn so dat i go “mek di ol wɔl ful.” (Sɛkɛn Lɛta Fɔ Kɔrint 4:​4; Rɛvɛleshɔn 12:​9) Aw yu go tinap tranga wan fɔ mek Setan nɔ ful yu?

Jizɔs bin tich wi se simpul we de fɔ tinap tranga wan fɔ mek Setan nɔ ful wi. I se: “No wetin tru bɔt Gɔd, ɛn dat go mek una fri.” (Jɔn 8:​31, 32) Pan wɔ, sojaman nid fɔ no usay i go gɛt nyuz we rili tru bikɔs di ɛnimi go want fɔ tɔk lay lay tin fɔ ful am. So usay yu go lan di tru bɔt Gɔd? Jiova dɔn gi wi in Wɔd, di Baybul. Insay di Baybul, wi go lan wetin wi nid fɔ du fɔ tinap tranga wan fɔ mek Setan nɔ ebul wi.—Sɛkɛn Lɛta To Timoti 3:​16, 17.

Fɔ tru, Setan no dis. So i de yuz di wɔl we i de kɔntrol fɔ mek wi nɔ pe atɛnshɔn ɛn fɔ mek wi nɔ gɛt kɔrej fɔ rid ɛn stɔdi di Baybul. Nɔ mek Setan ful yu wit in “kɔni”! (Lɛta Fɔ Ɛfisɔs 6:​11) Wi nɔ jɔs nid fɔ lan af-af tin dɛn frɔm di Baybul. Wi nid fɔ tray tranga wan fɔ no mɔ bɔt di trut. (Lɛta Fɔ Ɛfisɔs 3:​18) Noam Chɔmski we na pɔsin we de rayt buk tɔk se, “Nɔbɔdi nɔ go put tru tin na yu bren. Na sɔntin we yu fɔ tray fɔ lan fɔ yusɛf.” So “tray fɔ lan fɔ yusɛf” bay we yu de tek tɛm “rid wetin rayt na Gɔd in Buk” ɛvride.—Di Apɔsul Dɛn Wok [Akt] 17:​11.

Setan nɔ want fɔ mek yu tink gud gud wan ɛn ɔndastand klia wan di tru bɔt wetin yu de yɛri. Wetin mek? Na bikɔs i no se we lay lay tin dɛn bɔku, “dat na di bɛst we” fɔ mek pipul dɛn “at pwɛl so dat dɛn go lɛf fɔ tink gud wan bɔt di tru.” (Media and Society in the Twentieth Century) Nɔ jɔs biliv ɛnitin we yu de yɛri we yu nɔ tink gud wan bɔt am.  (Prɔvabs 14:​15) Gɔd gi wi di “pawa fɔ de si fa ɛn ɔndastand” ɛn “fɔ tink gud wan,” so yuz dɛn fɔ kɔntinyu fɔ gɛt mɔ fet.—Prɔvabs 2:​10-15; Lɛta Fɔ Rom 12:​1, 2, NW.

Sojaman dɛn we lay lay tɔk kin ful kin fred ɛn dɛn nɔ kin want fɔ fɛt. Lay lay tɔk dɛn kin ivin mek dɛn fɛt dɛnsɛf ɔ push dɛnsɛf fawe frɔm dɛn kɔmpin dɛn. Wan Jaman jɛnɛral bin se lay lay tɔk na wan rizin we mek dɛn bin win Jamani pan fɛt insay Wɔl Wɔ Wan. I se di pipul dɛn bin lisin tumɔs to dɛn lay lay tɔk dɛn de, ɛn i bin tan lɛk se na dɛn tɔk ya bin de kɔntrol dɛn. Na di sem tin Setan de du fɔ ambɔg di wanwɔd we Kristian dɛn gɛt tide. Fɔ ɛgzampul, i kin tray fɔ mek af-af cham-mɔt de bitwin di brɔda ɛn sista dɛn na di kɔngrigeshɔn. Ɔ i kin tray fɔ mek dɛn lɛf Jiova in ɔganayzeshɔn bay we i de mek dɛn tink se di ɔgaynayzeshɔn nɔ de du tin di rayt we ɔ i dɔn du sɔntin we bad.

Nɔ alaw dat fɔ ful yu. Fala di advays we de na Gɔd in Wɔd ɛn kɔntinyu fɔ gɛt wanwɔd wit yu brɔda ɛn sista dɛn na di kɔngrigeshɔn. Fɔ ɛgzampul, di Baybul ɛnkɔrej wi fɔ kɔntinyu fɔ “padin” wi kɔmpin dɛn ɛn fɔ sɛtul af-af cham-mɔt kwik kwik wan. (Lɛta Fɔ Kɔlɔse 3:​13, 14; Matyu 5:​23, 24) I wɔn wi bak nɔ fɔ kip to wisɛf. (Prɔvabs 18:​1) Mek shɔ se yu rɛdi yusɛf gud gud wan fɔ tinap tranga wan agens Setan in lay lay tɔk dɛn. Aks yusɛf dɛn kwɛstyɔn dɛn ya, ‘Di las tɛm we wan pan mi brɔda dɛn ɔfɛnd mi, aw a bin biev? A bin biev di we we go mek Gɔd gladi ɔ na di we we go mek Setan gladi?’—Lɛta Fɔ Galeshya 5:​16-26; Lɛta Fɔ Ɛfisɔs 2:​2, 3.

Sojaman we nɔ kɔntinyu fɔ de biɛn in lida nɔ go fɛt gud wan. So ɛnimi dɛn kin yuz lay lay tɔk dɛn fɔ mek sojaman dɛn at pwɛl ɛn fɔ mek dɛn nɔ abop pan di wan dɛn we de oba dɛn. If di wan we de lid dɛn mek mistek, di ɛnimi dɛn go yuz dat ɛn se: “Una nɔ fɔ abop pan dɛn!” ɛn “Una nɔ mek dɛn put una pan trɔbul!” Na di sem tin Setan kin du. I de tray fɔ pwɛl wi at fɔ mek wi nɔ go abop pan di wan dɛn we Jiova de yuz fɔ lid wi.

Aw yu go protɛkt yusɛf? Mekɔp yu maynd fɔ kɔntinyu fɔ de na Jiova in ɔganayzeshɔn. Kɔntinyu fɔ sɔpɔt ɛn de biɛn di man dɛn we de lid Gɔd in pipul dɛn, pan ɔl we dɛn nɔ pafɛkt. (Fɔs Lɛta Fɔ Tɛsalonayka  5:​12, 13) Pipul dɛn we de tɔk lay lay tin dɛn fɔ ambɔg di kɔngrigeshɔn kin atak di ɔganayzeshɔn. (Taytɔs 1:​10) Pan ɔl we i go tan lɛk se wetin dɛn de tɔk na tru, “nɔ mek dɛn kɔnfyus una” kwik kwik wan. (Sɛkɛn Lɛta Fɔ Tɛsalonayka 2:​2) Fala di advays we Pɔl bin gi to Timoti we i se: “Nɔ lɛf fɔ biliv di tru tin dɛn we yu dɔn lan” ɛn mɛmba “dɛn wan we bin de tich yu.” (Sɛkɛn Lɛta To Timoti 3:​14, 15) Tink bɔt ɔl wetin dɔn pruv to yu se yu go ebul fɔ abop pan di fetful slev we Jiova dɔn yuz fɔ lɛk ɔndrɛd ia so naw fɔ tich wi di trut.—Matyu 24:​45-47; Di Ibru Pipul Dɛn 13:​7, 17.

Sɔm ɔda we dɛn we Setan de yuz fɔ ful wi nɔ ayd. Sɔntɛnde, i kin tray fɔ mek wi fred. Fɔ fred na “wan pan di tin dɛn we pipul dɛn dɔn yuz fɔ lɔng tɛm fɔ lay pan pipul dɛn.” (Easily Led—A History of Propaganda) Filip M. Telɔ we na wan British masta sabi bukman, bin rayt se, fɔ ɛgzampul di Asirian dɛn bin mek pipul dɛn fred ɛn dɛn bin de lay pan pipul dɛn so dat dɛn go ebul win dɛn ɛnimi dɛn pan fɛt. Setan kin yuz di fred we wi de fred mɔtalman, di fred we wi de fred fɔ sɔfa, ɛn di fred we wi de fred fɔ day fɔ mek wi stɔp fɔ sav Jiova.—Ayzaya 8:​12; Jɛrimaya 42:​11; Di Ibru Pipul Dɛn 2:​15.

Nɔ alaw Setan fɔ du dat to yu! Jizɔs bin se: “Una nɔ fɔ fred dɛn pipul we de kil pɔsin, bɔt dɛn nɔ ebul du natin pas dat.” (Lyuk 12:​4) Biliv tranga wan se Jiova go kip in prɔmis fɔ kia fɔ yu, i go gi wi “di pawa fɔ du sɔntin we wi nɔ ebul fɔ du fɔ wisɛf,” ɛn i go ɛp yu fɔ tinap tranga wan agens Setan in atak dɛn.—Sɛkɛn Lɛta Fɔ Kɔrint 4:​7-9, NW; Pita In Fɔs Lɛta 3:​14.

Na tru se sɔntɛnde, yu go fil wik ɛn yu go fred. Bɔt mɛmba wetin Jiova bin se to Jɔshwa fɔ ɛnkɔrej am. I bin tɛl am se: “Mek i tinap lɛkɛ man, i nɔ fɔ fred natin ɛn i nɔ fɔ gɛt ɛni dawt nain maynd, bikɔs PAPA GƆD [“Jiova,” NW] we nain PAPA GƆD go de wit am ɛnisay we i de go.” (Jɔshwa 1:​9) If yu de wɔri, na fɔ pre to Jiova wantɛm wantɛm ɛn tɛl am di tin we de mek yu wɔri. Yu fɔ biliv se “Gɔd go gi una kol at, we mɔtalman nɔ ebul ɔndastand, we nɔ go mek ɛnitin wɔri una.” Dɔn yu go gɛt trɛnk fɔ tinap tranga wan agens ɔl di lay lay tin dɛn we Setan de tɔk ɛn du.—Lɛta Fɔ Filipay 4:​6, 7, 13.

Yu mɛmba di lay lay tin dɛn we di Asirian dɛn mɛsenja we na di Rabshakɛ bin tɔk fɔ lɛ i mek Gɔd in pipul dɛn fred? I bin want fɔ lɛ di pipul dɛn biliv se nɔbɔdi nɔ go ebul sev dɛn frɔm di Asiria dɛn an, ivin Jiova. Dɔn i tɔk se na Jiova tɛl dɛn fɔ pwɛl Jerusɛlɛm. Wetin Jiova bin tɔk? I bin tɛl di kiŋ na Jerusɛlɛm se: “Lɛ i nɔ fred, lɛ i nɔ yɛk sɛf, pan ɔl we di kiŋ na Asiria in bɔbɔ dɔn tɔk bad bɔt am.” (Sɛkɛn Kiŋ 18:​22-25; 19:​6) Dɔn wan nɛt i sɛn wan enjɛl fɔ kil 185,000 Asiria sɔjaman dɛn!—Sɛkɛn Kiŋ 19:​35.

Yu dɔn ɛva wach fim we de sho sɔmbɔdi we dɛn ful, bɔt i nɔ no se dɛn dɔn ful am? Yu bin want fɔ ala fɔ tɛl di pɔsin se: ‘Nɔ biliv wetin dɛn de se! Dɛn de lay pan yu!’ Naw imajin, di enjɛl dɛn de tɛl yu se: “Nɔ alaw Setan fɔ ful yu wit in lay lay tɔk dɛn!”

So nɔ lisin to Setan in lay lay tɔk dɛn. (Prɔvabs 26:​24, 25) Lisin to Jiova ɛn abop pan am pan ɔl wetin yu de du. (Prɔvabs 3:​5-7) l lɛk yu ɛn i de ɛnkɔrej yu se: “Mi pikin, sho se yu gɛt sɛns ɛn mek a gladi.” (Prɔvabs 27:​11) lf yu du dis, yu go ebul fɔ protɛkt yu maynd!