1, 2. Wetin mek po pipul dɛn go de ɔltɛm?

TIDE, tin rili tranga na di wɔl. Sɔm pipul dɛn gɛt bɔku mɔni ɛn ɔda pipul dɛn nɔ gɛt, so dis dɔn mek layf nɔ izi atɔl. Fɔ ɛgzampul, i nɔ izi fɔ mek bɔku yɔŋ pipul dɛn gɛt wok. Sɔm pipul dɛn kin put dɛn layf pan denja fɔ go na ɔda kɔntri dɛn usay bɔku pipul dɛn we gɛt mɔni de. Bɔt ivin na kɔntri dɛn usay bɔku jɛntriman dɛn de, bɔku po pipul dɛn de de. Ɔlsay na di wɔl, di wan dɛn we jɛntri de jɛntri mɔ ɛn mɔ, ɛn di wan dɛn we po de po mɔ ɛn mɔ. Sɔm ripɔt dɛn se, wan mɔni man go gɛt di kayn mɔni we 99 pipul dɛn gɛt we yu put dɛn togɛda. Dis dɔn sho klia wan se sɔm pipul dɛn gɛt bɔku mɔni we dɛn go yuz te dɛn day ɛn ɔda pipul dɛnsɛf na dɛn famili layn go ebul fɔ yuz am ɛn i nɔ go stil dɔn, we i bi se bɔku ɔda pipul dɛn de we rili po. Jizɔs bin no dis na dat mek i se: “Dɛn pipul we nɔ gɛt natin de wit una ɔltɛm.” (Mak 14:​7) Wetin mek dis kayn tin ya so de apin?

² Jizɔs bin no se na Gɔd in Kiŋdɔm nɔmɔ go ebul fɔ pul dɛn wikɛd biznɛsman dɛn ɛn di we aw dɛn de du biznɛs na dis wɔl. Di Baybul sho se biznɛsman dɛn, pipul dɛn we de pan pɔlitiks ɛn rilijɔn, dɛn ɔl de pat pan Setan in wɔl.  (Rɛvɛleshɔn 18:​3) Gɔd in pipul dɛn ebul fɔ pul an kɔmɔt pan pɔlitiks ɛn lay lay rilijɔn. Bɔt bɔku pan Gɔd in pipul dɛn nɔ rili ebul fɔ pul an kɔmɔt pan di we aw pipul dɛn de du biznɛs na Setan in wɔl.

3. Us kwɛstyɔn dɛn wi go kam tɔk bɔt?

³ As Kristian dɛn, wi nid fɔ tink gud wan bɔt aw wi de fil bɔt di we aw pipul dɛn de du biznɛs na di wɔl. Fɔ du dis, wi fɔ aks wisɛf dɛn kwɛstyɔn dɛn ya: ‘Aw a go yuz di prɔpati dɛn we a gɛt fɔ sho se a fetful to Gɔd? Wetin a go du fɔ mek a nɔ pe atɛnshɔn tumɔs pan di we aw dɛn de du biznɛs na di wɔl? Wetin sho se Gɔd in pipul dɛn tide rili abop pan am?’

4, 5. (a) Wetin bin apin to di man we de oba in masta in prɔpati? (b) Wetin Jizɔs bin tɛl in disaypul dɛn fɔ du?

⁴ Rid Lyuk 16:​1-9. Jizɔs in stori bɔt di man we de oba in masta in prɔpati fɔ mek wi ɔl tink gud gud wan. Pipul dɛn bin tɛl di masta se di man we de oba in prɔpati de west in mɔni, ɛn in masta bin disayd fɔ sak am. * (Luk di futnot.) Bɔt di man we bin de oba in masta in prɔpati bin tink gud wan ɛn du tin wit sɛns. Bifo dɛn sak am, i bin mek padi wit pipul dɛn we go ebul fɔ ɛp am leta. Jizɔs nɔ bin pul dis stori bikɔs i want in disaypul dɛn fɔ du tin we nɔ rayt fɔ mek dɛn go gɛt wetin dɛn want. Na dat pipul dɛn de du na di wɔl. Bifo dat, Jizɔs bin yuz dis stori fɔ tich in disaypul dɛn wan impɔtant lɛsin.

⁵ Jizɔs bin no se jɔs lɛk aw tin bin chenj kwik kwik wan fɔ da man we bin de oba in masta in prɔpati, na so tin nɔ go izi fɔ bɔku pan in disaypul dɛn we de na dis wɔl usay pipul dɛn nɔ de du tin tret. So i bin tɛl dɛn se: “Una yuz di valyu tin dɛn we una gɛt na dis wɔl fɔ mek padi dɛn.” Wetin mek? Na bikɔs we dɛn valyu tin dɛn de fel, Jiova ɛn Jizɔs, “go gi una ples we una go de sote go.” Wetin wi lan frɔm dis advays we Jizɔs gi?

6. Aw wi no se di we aw pipul dɛn de du biznɛs na Setan in wɔl nɔto tin we Gɔd want?

⁶ Pan ɔl we Jizɔs nɔ bin ɛksplen wetin mek i tɔk bɔt di valyu tin dɛn we de na “dis wɔl,” di Baybul mek wi no klia wan se fɔ gɛt bɔku bɔku mɔni frɔm di tin dɛn na di wɔl, na tin we Gɔd nɔ want. Fɔ ɛgzampul, Jiova bin gi Adam ɛn Iv pas wetin dɛn nid na di gadin we bin de na Idɛn. (Jɛnɛsis 2:​15, 16) Leta, we Gɔd bin gi in oli spirit to sɔm Kristian dɛn, “nɔbɔdi nɔ bin de se, ‘na mi wangren gɛt mi prɔpati,’ bɔt ɔlman bin de sheb wetin i gɛt wit di ɔda pipul dɛn.” (Di Apɔsul Dɛn Wok [Akt] 4:​32) Di prɔfɛt Ayzaya bin se tɛm go kam we mɔtalman go ɛnjɔy ɔl wetin de na di wɔl. (Ayzaya 25:​6-9; 65:​21, 22) Bɔt te da tɛm de rich, di wan dɛn we de fala Jizɔs go nid fɔ de tink gud wan ɛn du tin wit sɛns. Dɛn go nid fɔ yuz di tin dɛn we de na dis wɔl fɔ liv, bɔt dɛn fɔ tray tranga wan fɔ du wetin Gɔd want.

7. Us advays Jizɔs bin gi na Lyuk 16:​10-13?

⁷ Rid Lyuk 16:​10-13. Insay Jizɔs in stori, di man we bin de oba in masta in prɔpati dɛn bin mek padi dɛn fɔ bɛnifit insɛf. Bɔt Jizɔs nɔ bin want in disaypul dɛn fɔ mek padi wit in ɛn Jiova jɔs fɔ dɛn yon bɛnifit. I bin want fɔ mek wi ɔndastand se di we aw wi de yuz di valyu tin dɛn we wi gɛt na dis wɔl, go sho if wi fetful to Gɔd. Aw wi go du dat?

8, 9. Gi ɛgzampul dɛn bɔt aw sɔm Kristian dɛn dɔn sho se dɛn fetful wit di we aw dɛn de yuz di valyu tin dɛn we dɛn gɛt na dis wɔl.

⁸ Wan we fɔ sho se wi fetful wit di tin dɛn we wi gɛt, na we wi de gi wetin wi gɛt fɔ sɔpɔt di prichin wok we Jizɔs bin tɔk se go apin. (Matyu 24:​14) Wan smɔl titi na India bin gɛt wan smɔl kash bɔks usay i bin de put mɔni. I bin disayd nɔ fɔ bay tɔys so dat i go ebul fɔ de kip mɔni. We di kash bɔks fulɔp, i gi ɔl di mɔni we i bin dɔn kip fɔ mek dɛn go yuz am fɔ du di prichin wok. Wan brɔda na India gɛt kokonat fam. I gi bɔku bɔku kokonat to di Malayalam transleshɔn ɔfis we nɔ de na di branch. Bikɔs di ɔfis bin nid fɔ bay kokonat, di brɔda bin si am se di kokonat we i gi valyu pas if i bin fɔ gi mɔni. Di brɔda bin tink gud wan ɛn du tin wit sɛns. Semweso, sɔm brɔda dɛn na Gris kin gi ɔliv ɔyl, chiz, ɛn ɔda tin dɛn fɔ it to di Bɛtɛl famili.

⁹ Insay Sri Lanka, wan brɔda bin alaw fɔ mek dɛn de ol mitin ɛn asɛmbli dɛn na in land, ɛn i bin gi os to di wan dɛn we de yuz bɔku pan dɛn tɛm fɔ prich. Pan ɔl we dis min se di brɔda go lɔsis, i bin rili ɛp di pɔblisha dɛn we de de, we nɔ gɛt bɔku mɔni. Insay wan kɔntri we dɛn dɔn stɔp di prichin wok, di brɔda dɛn de yuz dɛn os dɛn as Kiŋdɔm Ɔl. Dis de mek di payɔnia dɛn ɛn ɔda pɔblisha dɛn we po ebul fɔ gɛt ples usay dɛn go de ol mitin we dɛn nɔ gɛt fɔ pe ɛnitin.

10. Wetin na sɔm bɛnifit dɛn we wi go gɛt we wi fri-an?

¹⁰ Dɛn ɛgzampul dɛn ya de sho se Gɔd in pipul dɛn fetful “pan lili tin.” (Lyuk 16:​10) Dɛn de yuz di prɔpati dɛn we dɛn gɛt fɔ ɛp ɔda pipul dɛn. Aw Jiova in padi dɛn de fil we dɛn du dɛn tin dɛn ya? Dɛn rili gladi bikɔs dɛn no se we dɛn gi wetin dɛn gɛt, dɛn go gɛt tru “tru jɛntri” na ɛvin. (Lyuk 16:​11) Wan sista we kin gi mɔni ɔltɛm fɔ ɛp di prichin wok bin se sɔm tin we i nɔ bin fil se go apin bin apin to am as tɛm de go. I ɛksplen se: “A kam fɔ no se di mɔ we a de gi wetin a gɛt, na di mɔ a de biev  fayn to pipul dɛn. A kin fɔgiv ɔda pipul dɛn, peshɛnt wit dɛn, a ebul fɔ bia we ɔda pipul dɛn du tin we kin mek mi at pwɛl, ɛn a kin tek di advays we ɔda pipul dɛn kin gi mi.” Bɔku pipul dɛn dɔn si se dɛnsɛf sɛf dɔn bɛnifit bikɔs dɛn fri-an.—Sam 112:​5; Prɔvabs 22:​9.

11. (a) Aw wi go sho se wi de tink gud wan ɛn wi de du tin wit sɛns we wi gɛt fri-an? (b) Wetin Gɔd in pipul dɛn de du tide? (Luk di pikchɔ nia dis atikul in taytul.)

¹¹ Wisɛf kin tink gud wan ɛn du tin wit sɛns we wi yuz di tin dɛn we wi gɛt fɔ sɔpɔt ɔda pipul dɛn pan di prichin wok. So ilɛksɛf wi nɔ ebul fɔ yuz bɔku pan wi tɛm fɔ prich ɔ fɔ go na say we dɛn nid mɔ pipul dɛn fɔ prich, wi go stil du tin we go bɛnifit ɔda pipul dɛn. (Prɔvabs 19:​17) Fɔ ɛgzampul, we wi kin gi wetin wi gɛt, dat kin ɛp fɔ mek pipul dɛn gɛt mɔ buk, magazin, ɛn ɔda tin dɛn fɔ sɔpɔt di prichin wok na ples dɛn usay pipul dɛn we de kam na di trut rili po. Na kɔntri dɛn lɛk Kongo, Madagaska, ɛn Ruwanda, Baybul rili dia. Sɔntɛnde, pɔsin kin yuz di mɔni we dɛn de pe am fɔ wan wik ɔ fɔ wan mɔnt fɔ bay jɔs wan Baybul. Fɔ sɔm tɛm, wi brɔda dɛn kin nid fɔ disayd if dɛn fɔ bay tin fɔ it fɔ dɛn famili ɔ fɔ bay Baybul. Naw, bikɔs ɔda pipul dɛn de gi wetin dɛn gɛt fɔ sɔpɔt di prichin wok ɛn di ‘wan dɛn we jɛntri de ɛp di wan dɛn we po,’ Jiova in ɔganayzeshɔn ebul fɔ translet ɛn gi Baybul dɛn fri to ɔlman na di famili ɛn di wan dɛn we de stɔdi di Baybul. (Rid Sɛkɛn Lɛta Fɔ Kɔrint 8:​13-15.) So di wan dɛn we gɛt fri-an ɛn di wan dɛn we dɛn kin gi kin bi Jiova in padi.

12. Aw Ebraam bin sho se i abop pan Gɔd?

¹² Wisɛf kin bi Jiova in padi we wi nɔ put an pan di we aw pipul dɛn de du biznɛs na dis wɔl ɛn luk fɔ tru “tru jɛntri.” Na dat di fetful man Ebraam bin du. I bin obe Jiova ɛn lɛf di siti we nem Ɔ usay bɔku jɛntri bin de fɔ go de na tɛnt bikɔs i bin want fɔ bi Jiova in padi. (Di Ibru Pipul Dɛn 11:​8-10) Ebraam nɔ bin abop pan prɔpati, bɔt i bin abop pan Gɔd ɔltɛm. (Jɛnɛsis 14:​22, 23) Jizɔs bin ɛnkɔrej ɔda pipul dɛn fɔ falamakata di kayn fet we Ebraam bin gɛt. Wan de, i tɛl wan yɔŋ man we gɛt mɔni se: “If yu want bi pɔsin we fit na Gɔd yay fɔ gɛt layf we go de sote go, yu fɔ sɛl ɔl wetin yu gɛt ɛn gi dɛn pipul we nɔ gɛt natin, di mɔni; if yu du so, yu go jɛntri na ɛvin. Wɛn yu dɔn du dat dɔn, kam bak ɛn bi mi lanin bɔy.” (Matyu 19:​21) Da yɔŋ man de nɔ bin gɛt fet lɛk Ebraam. Bɔt ɔda pipul dɛn de we bin abop pan Gɔd.

13. (a) We Timoti bin de yuz bɔku pan in tɛm fɔ sav Jiova, us advays Pɔl bin gi am? (b) Aw wi go fala Pɔl in advays tide?

¹³ Timoti na pɔsin we bin gɛt fet. Afta we Pɔl kɔl Timoti “Krays Jizɔs in soja man,” Pɔl tɛl am se: “Ɛni soja man we de na ami go want fɔ mek di ɔfisa we nain bɔs satisfay wit am, so i nɔ go miks  pan dɛn tin we dɛn pipul we nɔto soja man dɛn de du.” (Sɛkɛn Lɛta To Timoti 2:​3, 4) I pas wan milyɔn brɔda ɛn sista dɛn we de yuz bɔku pan dɛn tɛm fɔ prich. Dɛn ɛn Jizɔs in ɔda disaypul dɛn tide de du ɔl wetin dɛn ebul fɔ fala Pɔl in advays. Dɛn nɔ de gri fɔ put an pan di tin dɛn we pipul dɛn na di wɔl de advatayz. Dɛn de mɛmba di advays na di Baybul we se: “Yu we o dɛt de tɔn slev to udat yu trɔs to.” (Prɔvabs 22:​7) Setan want wi fɔ spɛn ɔl wi tɛm ɛn trɛnk fɔ put an pan di kayn we aw pipul dɛn na dis wɔl de du biznɛs. Sɔm pipul dɛn kin trɔs bɔku mɔni fɔ pe fɔ os, fɔ motoka, fɔ lan buk, ɔ ivin fɔ mared. If wi nɔ tek tɛm, wi go ɛnd-ɔp pan dɛt fɔ lɔng tɛm. Wi go sho se wi de du tin wit sɛns we wi liv simpul layf, avɔyd dɛt, ɛn nɔ spɛn bɔku mɔni. Dat go mek wi fri fɔ sav Gɔd; wi nɔ go bi slev to di kayn we aw pipul dɛn de fɛn mɔni tide na di wɔl.—Fɔs Lɛta To Timoti 6:​10.

14. Wetin wi fɔ mekɔp wi maynd fɔ du? Gi sɔm ɛgzampul dɛn.

¹⁴ Fɔ mek wi go ebul fɔ liv simpul layf, wi fɔ put Gɔd in Kiŋdɔm fɔs. Wan maredman ɛn in wɛf bin gɛt big biznɛs we bin de gi dɛn bɔku prɔfit. Bɔt dɛn bin want fɔ stat bak fɔ yuz bɔku pan dɛn tɛm fɔ prich. So dɛn sɛl dɛn biznɛs, dɛn bot, ɛn ɔda prɔpati dɛn. Dɔn dɛn go ɛp fɔ bil di wɔl ɛdkwata na Wɔwik, insay Nyu Yɔk. Dis bin rili spɛshal to dɛn bikɔs i min se dɛn go wok na Bɛtɛl wit dɛn gyal pikin ɛn in man, ɛn fɔ sɔm wik, dɛn go wok wit di uman in mɔdɛnlɔ ɛn fadɛnlɔ we dɛnsɛf bin de wok na Wɔwik. Wan sista we na payɔnia insay Kolorado, na Amɛrika, bin gɛt wok na bank we nɔ bin de tek ɔl in tɛm. In bɔsman dɛn bin gladi wit di we aw i de wok, so dɛn bin want fɔ gi am wok we i go yuz ɔl in tɛm ɛn dɛn go ad bɔku mɔni pan in salari. Bɔt bikɔs di wok nɔ go alaw am fɔ pe atɛnshɔn pan di prichin wok, i nɔ bin gri fɔ tek am. Dis na jɔs sɔm ɛgzampul dɛn we de sho di bɔku sakrifays dɛn we Jiova in savant dɛn de mek. We wi mekɔp wi maynd fɔ put Gɔd in Kiŋdɔm fɔs, dat de sho se wi valyu di tru tru jɛntri ɛn wi padi biznɛs wit Gɔd pas bɔku prɔpati.

15. Wetin go mek Gɔd gladi fɔ wi?

¹⁵ I nɔ min se na we wi gɛt bɔku prɔpati na in go mek Gɔd gladi fɔ wi. Jiova de blɛs di wan dɛn we de du “plɛnti plɛnti gud wok.” (Rid Fɔs Lɛta To Timoti 6:​17-19.) Fɔ ɛgzampul, wan sista we nem Lusia bin kam fɔ no se dɛn nid mɔ pipul dɛn fɔ prich na Albenia. * (Luk di futnot.) So i kɔmɔt na Itali ɛn go de na Albenia insay 1993. I nɔ bin gɛt wok bɔt i bin abop se Jiova go gi am wetin i nid. I lan fɔ tɔk di Albenian langwej ɛn i dɔn ɛp pas 60 pipul dɛn fɔ gi dɛn layf to Jiova. Di sem tin nɔ go apin to wi na di say usay wi de prich. Bɔt ɛnitin we wi du fɔ ɛp ɔda pipul dɛn fɔ lan bɔt Jiova ɛn bi in padi na sɔntin we wi fɔ valyu sote go.—Matyu 6:​20.

16. (a) Wetin go apin to di we aw pipul dɛn de du biznɛs tide na di wɔl? (b) Aw dat go afɛkt di we aw wi fɔ si prɔpati?

¹⁶ Jizɔs bin sho klia wan se di we aw  pipul dɛn de du biznɛs na dis wɔl go dɔn wande. I tɔk se ‘we dɛn jɛntri dɛn de go dɔn,’ nɔto ‘if dɛn dɔn.’ (Lyuk 16:​9) Insay dis las dez, mɔni dɔn dɔn na sɔm bank dɛn ɛn sɔm kɔntri dɛn gɛt siriɔs mɔni prɔblɛm. Bɔt i nɔ go te igen, tin go wɔs pas aw i de so. Pɔlitiks, rilijɔn, ɛn di kayn we aw pipul dɛn de du biznɛs na Setan in wɔl, nɔ go las. Di prɔfɛt Izikɛl ɛn Zɛfinaya bin se tɛm go kam we gold ɛn silva we impɔtant to pipul dɛn we de du biznɛs na dis wɔl, nɔ go gɛt wan valyu igen. (Izikɛl 7:​19; Zɛfinaya 1:​18) Aw wi go fil if di tɛm we wi de day wi kam fɔ no se wi dɔn sakrifays tru tru jɛntri fɔ di jɛntri we de na dis wɔl we nɔ go las? Wi go fil lɛk pɔsin we dɔn yuz ɔl in tɛm fɔ fɛn bɔku mɔni, dɔn leta i kam fɔ no se ɔl di mɔni we i dɔn wok fɔ na fek. (Prɔvabs 18:​11) Di jɛntri we de na dis wɔl nɔ go las. So lɛ wi yuz di jɛntri we wi gɛt na dis wɔl fɔ mek padi wit Jiova ɛn Jizɔs. Ɛnitin we wi du fɔ Jiova ɛn in Kiŋdɔm go mek wi gɛt tru tru gladi at.

17, 18. Wetin Gɔd in padi dɛn go ɛnjɔy tumara bambay?

¹⁷ We Gɔd in Kiŋdɔm kam, nɔbɔdi nɔ go pe os-rɛnt ɔ go trɔs. Tin fɔ it go de fri wan ɛn i go bɔku, ɛn wi nɔ go nid fɔ pe dɔktɔ dɛn ɔ mɛrɛsin. Jiova in padi dɛn go ɛnjɔy ɔl di gud tin dɛn we de na di wɔl. Wi go yuz gold, silva, ɛn ɔda valyu tin dɛn bikɔs dɛn fayn, nɔto fɔ mek pɔsin jɛntri. Bod, ston, ɛn ayɛn dɛn we gɛt valyu go de plɛnti fɔ mek wi go bil fayn fayn os dɛn. Wi padi dɛn go ɛp wi bikɔs dɛn want fɔ ɛp wi, nɔto bikɔs wi de pe dɛn. Ɔlman go gɛt ɔl di gud tin dɛn we de na di wɔl.

¹⁸ Dis na jɔs sɔm pan di blɛsin dɛn we de fɔ di wan dɛn we mek padi wit Jiova ɛn Jizɔs. Di wan dɛn we de wɔship Jiova na dis wɔl go rili gladi we dɛn go yɛri we Jizɔs de se: “Una kam, una we mi Papa dɔn blɛs! Una kam, tek di ples we una fɔ gɛt ɔnda Gɔd in rul, i bin dɔn rɛdi da ples de fɔ una frɔm we i mek di wɔl.”—Matyu 25:​34.