1-3. (a) Ustɛm wi go se dɛn rayt Sam 147? (b) Wetin wi go lan frɔm Sam 147?

BƆKU TƐM wi kin prez sɔmbɔdi we i du ɔ se sɔntin we rili mek wi gladi. Semweso, wi gɛt bɔku rizin fɔ prez Jiova Gɔd! Wi de prez am bikɔs i rili gɛt pawa ɛn wi de si in pawa pan di tin dɛn we i mek. Wi de prez am bak fɔ di kayn lɔv we i gɛt fɔ wi ɛn wi si dat bay we i sɛn in wangren Pikin fɔ kam day fɔ fri wi frɔm sin ɛn day.

² We wi rid Sam 147, wi de si klia wan se di man we rayt am bin rili want fɔ prez Jiova. I de ɛnkɔrej ɔda pipul dɛn bak fɔ prez Gɔd wit am.—Rid Sam 147:​1, 7, 12.

³ Wi nɔ no udat rayt Sam 147. Bɔt i go mɔs bi se di pɔsin we rayt am bin de di tɛm we di Izrɛlayt dɛn bin de go bak na Jerusɛlɛm afta we Jiova dɔn fri dɛn frɔm Babilɔn. (Sam 147:​2) Di pɔsin we rayt dis Sam bin prez Jiova bikɔs I mek In pipul dɛn kam bak na dɛn yon land fɔ wɔship Am. Dɔn i bin gi ɔda rizin dɛn bak fɔ mek wi prez Jiova.  Wetin na dɛn rizin dɛn de? Us rizin dɛn yu gɛt fɔ ala “Aleluja!,” ɔ “Prez Ja!”?—Sam 147:​1, NW, futnot.

4. Aw di Izrɛlayt dɛn bin fil we Kiŋ Sayrɔs fri dɛn? Wetin mek?

⁴ Imajin aw di Izrɛlayt dɛn bin de fil we dɛn bin kech dɛn ɛn kɛr dɛn go na Babilɔn. Di wan dɛn we kɛr dɛn go de bin de provok dɛn ɛn de tɛl dɛn se: “Una siŋ wan pan una siŋ dɛn we una kin siŋ na Zayɔn.” Bɔt di Ju pipul dɛn nɔ bin fil fɔ siŋ. Dɛn nɔ bin gladi bikɔs Jerusɛlɛm bin dɔn pwɛl. (Sam 137:​1-3, 6) Dɛn at bin rili pwɛl ɛn dɛn bin nid kɔrej. Bɔt Jiova bin ɛp in pipul dɛn jɔs lɛk aw i bin dɔn tɔk. Aw i du dat? Na bay we i yuz Kiŋ Sayrɔs we na bin kiŋ na Pashia fɔ dɔnawe wit Babilɔn. Sayrɔs tɔk bɔt Jiova se: “I dɔn put am to mi se a fɔ bil os fɔ am na Jerusɛlɛm.” Sayrɔs bin tɛl di Izrɛlayt dɛn bak se: “Ɛni wan pan una pan ɔl in pipul dɛm, mek in Gɔd de wit am. Lɛ i go.” (Sɛkɛn Kronikul 36:​23) Dis go dɔn gi kɔrej to di Izrɛlayt dɛn we bin de na Babilɔn!

5. Wetin di man we bin rayt Sam 147 tɔk bɔt aw Jiova de kɔrej wi?

⁵ Jiova nɔ bin jɔs ɛnkɔrej di wan ol neshɔn bɔt i bin de kɔrej di pipul dɛn bak wan bay wan. Jiova de du di sem tin tide. Di man we rayt Sam 147 bin rayt se Gɔd “de mɛn ɔl dɛn wan dɛn we dɛn at sik ɛn lɛ dɛn no se ɔltin nɔ dɔn fɔ dɛn.” (Sam 147:​3) So wi shɔ se Jiova bisin bɔt wi we wi sik ɔ we wi at pwɛl. Jiova rɛdi fɔ kɔrej wi ɛn ɛp wi fɔ bia wit di tin dɛn we de mek wi at pwɛl. (Sam 34:​18; Ayzaya 57:​15) I de gi wi di sɛns ɛn trɛnk we wi nid so dat wi go ebul fɔ bia wit ɛni prɔblɛm we go mit wi.—Jems 1:​5.

6. Aw wi go bɛnifit frɔm wetin de na Sam 147:​4? (Luk di pikchɔ nia dis atikul in taytul.)

⁶ Di man we rayt Sam 147 bin luk up di skay ɛn si di sta dɛn. Dɔn i se Jiova no “ɔmɔs [sta] fɔ de ɛn i no dɛn ɔl nem.” (Sam 147:​4) Di man we rayt Sam 147 bin si di sta dɛn, bɔt i nɔ rili no ɔmɔs sta dɛn de na di skay. Tide, sayɛnsman dɛn no se na bɔku bɔku sta dɛn de na wi galaksi. Ɛn na bɔku bɔku galaksi dɛn de na di wan ol wɔl! Mɔtalman nɔ go ebul fɔ kɔnt ɔl di sta dɛn, bɔt di Wan we mek dɛn ebul. Infakt, i no di sta dɛn wan bay wan ɛn i gi dɛn ɔl nem. (Fɔs Lɛta Fɔ Kɔrint 15:​41) Di Gɔd we no usay ɔl di sta dɛn de, no yu bak. I no usay yu kin de ɔltɛm, aw yu kin fil, ɛn wetin yu nid!

7, 8. (a) Wetin Jiova ɔndastand bɔt wi? (b) Gi wan ɛgzampul we sho se Jiova gɛt sɔri at.

⁷ Jiova ɔndastand wetin de apin to yu, ɛn i gɛt di pawa fɔ ɛp yu wit yu prɔblɛm dɛn. (Rid Sam 147:​5.) Yu go de fil se di prɔblɛm we yu gɛt rili mɔna ɛn yu nɔ go ebul fɔ bia wit am. Gɔd  ɔndastand wetin yu nɔ ebul fɔ du, “i nɔ de fɔgɛt se na dɔti i tek mek wi.” (Sam 103:​14) Wi nɔ pafɛkt, so wi kin mek di sem mistek dɛn ɔltɛm ɛn wi at kin pwɛl. Wi dɔn rigrɛt sɔm tin dɛn we wi bin dɔn tɔk, sɔm we dɛn aw wi bin fil, ɛn aw wi bin dɔn jɛlɔs ɔda pipul dɛn! Jiova nɔ de mek mistek bɔt i rili ɔndastand aw wi kin fil.—Ayzaya 40:​28.

⁸ Yu dɔn si aw Jiova bin ɛp yu fɔ bia wit prɔblɛm we bin mit yu? (Ayzaya 41:​10, 13) Dis bin apin to wan payɔnia sista we nem Kayokio. Afta i muf go na wan kɔngrigeshɔn, i at bin rili pwɛl. Bɔt aw Kayokio bin no se Jiova ɔndastand in prɔblɛm dɛn? Na di nyu kɔngrigeshɔn we i go, bɔku pipul dɛn bin de de we ɔndastand aw i de fil. I bin fil se Jiova de se to am: “A lɛk yu, nɔto jɔs bikɔs yu na payɔnia, bɔt na bikɔs yu na mi pikin ɛn yu dɔn gi yusɛf to mi. A want fɔ mek yu ɛnjɔy layf as wan pan mi Witnɛs dɛn!” Aw Jiova dɔn sho yu se “natin nɔ de we i nɔ ɔndastand”?

9, 10. Us impɔtant we we Jiova go ɛp wi? Gi wan ɛgzampul.

⁹ Wi ɔl nid tin dɛn fɔ it, klos fɔ wɛr, ɛn say fɔ slip. Sɔntɛm yu go de wɔri bikɔs yu nɔ gɛt bɛtɛ tin fɔ it. Bɔt Jiova bin mek di wɔl di kayn we we bɔku tin fɔ it go de fɔ ɔlman, ivin fɔ dɛn “yɔŋ bɔd . . . ɛnitɛm we dɛn kray aŋri.” (Rid Sam 147:​8, 9.) If Jiova de fid di yɔŋ bɔd dɛn, wi shɔ se i go gi wi wetin wi nid fɔ mek wi kɔntinyu fɔ liv.—Sam 37:​25.

¹⁰ Di tin we impɔtant pas ɔl na dat Jiova de gi wetin wi nid fɔ mek wi kɔntinyu fɔ gɛt fet mɔ ɛn mɔ, ɛn i de gi wi “kol at, we mɔtalman nɔ ebul ɔndastand.” (Lɛta Fɔ Filipay 4:​6, 7) Wan brɔda we nem Mutso ɛn in wɛf bin si aw Jiova ɛp dɛn. We wan big big atkwek bin mek bɔku bɔku wata kɔmɔt na di si kam na di land na Jepan insay di ia 2011, dɛn bin ebul fɔ sev dɛn layf bay we dɛn klem ɔp di ruf na dɛn os. Dɛn bin lɔs ɔl wetin dɛn gɛt da de de. Da nɛt de dɛn slip insay wan dak, kol rum we de na di sɛkɔn flɔ na dɛn os. Na mɔnin, dɛn luk fɔ sɔntin we go ɛnkɔrej dɛn. Di wangren tin we dɛn ebul fɔ fɛn na di 2006 Yearbook of Jehovah’s Witnesses. We Mutso de tɔn di pej dɛn, i bin si di taytul “The Deadliest Tsunamis Ever Recorded.” Da pat de tɔk bɔt wan atkwek we bin apin na Sumatra insay 2004 we bin bad-ɔf pas ɔl di ɔda atkwek dɛn we dɔn mek bɔku bɔku wata kɔmɔt na di si. Mutso ɛn in wɛf bin de kray as dɛn de rid di stori bɔt dɛn brɔda ɛn sista dɛn. Dɛn fil lɛk se Jiova de gi dɛn di kɔrej we dɛn bin rili nid. Bɔt ɔda we dɛn de we Jiova bin kia fɔ dɛn. Dɛn Kristian brɔda dɛn we bin de ɔda say dɛn na Jepan bin gi dɛn tin fɔ it ɛn klos fɔ wɛr. Bɔt wetin bin ɛp dɛn mɔ na we Jiova in ɔganayzeshɔn sɛn brɔda dɛn fɔ kam ɛnkɔrej dɛn na dɛn kɔngrigeshɔn. Mutso se: “I bin tan lɛk se Jiova bin de nia wi. I bin rili bisin bɔt wi. Dat bin ɛnkɔrej wi!” Gɔd de gi wi wetin wi nid fɔs fɔ mek wi go kɔntinyu fɔ gɛt fet mɔ ɛn mɔ, dɔn i de gi wi wetin wi nid fɔ kɔntinyu fɔ liv.

11. Wetin wi nid fɔ du fɔ bɛnifit frɔm di ɛp we Gɔd de ɛp wi?

¹¹ Jiova de “ɛp udat de dɔŋ fɔ grap.” I lɛk wi ɛn i rɛdi ɔltɛm fɔ ɛp wi. (Sam 147:​6a) Aw wi go bɛnifit frɔm di ɛp we Jiova de ɛp wi? Wi nid fɔ gɛt tayt padi biznɛs wit am. Fɔ mek wi go gɛt tayt padi biznɛs wit am, wi nid fɔ put wisɛf dɔŋ. (Zɛfinaya 2:​3) Di wan dɛn we put dɛnsɛf dɔŋ abop pan Jiova fɔ kɔrɛkt ɛnitin we nɔ rayt ɛn mek dɛn nɔ sɔfa igen. Jiova rili gladi fɔ dɛn.

12, 13. (a) Fɔ mek Gɔd ɛp wi, wetin wi fɔ avɔyd? (b) Udat dɛn Jiova de gladi fɔ?

¹² Gɔd de “mek di bad man lɛf na grɔn.” (Sam 147:​6b) Wi nɔ want dis fɔ apin to wi! Wi want Gɔd fɔ sho wi in lɔv we nɔ de ɛva dɔn. So wi fɔ et wetin  i et. (Sam 97:​10) Fɔ ɛgzampul, wi fɔ et mami ɛn dadi biznɛs di we aw Gɔd nɔ want. Dis mins se wi fɔ avɔyd ɛnitin we go mek wi du am, lɛk fɔ de wach dɛn rud rud pikchɔ dɛn ɔ fim dɛn. (Sam 119:​37; Matyu 5:​28) Dis nɔ rili izi, bɔt we wi du ɔl wetin wi ebul fɔ avɔyd am, dat go mek Jiova blɛs wi.

¹³ Wi nɔ go ebul fɛt fɔ avɔyd dɛn tin ya bay wisɛf. Wi fɔ abop pan Jiova. Yu tink se i go gladi if wi abop pan tin dɛn we mɔtalman dɛn kin tɔn to fɔ ɛp? Nɔ. Nɔto di “trɛnk we pɔsin in ɔs gɛt fɔ fɛt,” impɔtant to Jiova. Yu tink se wi fɔ abop pan wi yon trɛnk ɔ pan ɔda pipul dɛn? Nɔ. Nɔto “aw pɔsin kin rɔn impɔtant” to Jiova. (Sam 147:​10) Bifo dat, wi nid fɔ kɔntinyu fɔ pre to Jiova fɔ ɛp wi ɛn beg am fɔ mek wi lɛf wi bad abit dɛn. Jiova nɔ go ɛva taya fɔ yɛri dɛn kayn prea dɛn de. Jiova “lɛk pipul we de fred ɛn rɛspɛkt am, we abop pan am bikɔs in lɔv nɔ de chenj.” (Sam 147:​11) Bikɔs in na Gɔd we nɔ de kɔmɔt biɛn in savant dɛn ɛn i lɛk wi, wi no se i go kɔntinyu fɔ ɛp wi fɔ mek wi go ebul fɔ avɔyd di bad bad tin dɛn we wi kin want fɔ du.

14. Wetin di man we rayt Sam 147 bin rili biliv?

¹⁴ Jiova prɔmis wi se i go ɛp wi we wi gɛt prɔblɛm dɛn. We di Izrɛlayt dɛn bin go bak na Jerusɛlɛm, di man we rayt Sam 147 bin tink bɔt aw Jiova bin de ɛp dɛn. I bin siŋ se: “I de ɛp di siti fɔ tinap fɔ insɛf ɛn de blɛs ɔl udat de insay di siti. I de mek pis de na di kɔntri.” (Sam 147:​13, 14) Bikɔs na Jiova go mek di siti in get strɔng, na dat mek di man we rayt Sam 147 fil sef. Ɛn dis mek i biliv gud gud wan se Jiova go protɛkt in pipul dɛn.

15-17. (a) Aw wi kin fil bɔt wi prɔblɛm dɛn sɔntɛnde? Aw Jiova de yuz in Wɔd fɔ ɛp wi? (b) Gi wan ɛgzampul we de sho se wetin Gɔd de tɔk fɔ ɛp wi, de apin “kwik kwik wan.”

¹⁵ Yu go mɔs wɔri bikɔs yu gɛt prɔblɛm dɛn, bɔt Jiova go gi yu di sɛns we yu nid fɔ bia. Di man we rayt Sam 147 bin tɔk bɔt Gɔd se: “Na tɔk  nɔmɔ i de tɔk; nechɔ obe am kwik kwik wan.” Dɔn i bin tɔk bak bɔt sno, dyu, ren we fiba smɔl smɔl ays blɔk, ɛn i tɔk se: “I kin so kol dat nɔbɔdi nɔ ebul bia am.” I kɔntinyu fɔ tɔk se we Jiova “tɔk nɔmɔ i kin mɛlt.” (Sam 147:​15-18) Wi Gɔd we no ɔltin ebul fɔ du ɛnitin. I go ɛp yu wit ɛni prɔblɛm we mit yu bikɔs i ebul fɔ kɔntrol ren we fiba ays blɔk ɛn sno.

¹⁶ Tide, Jiova de gayd wi wit in Wɔd, di Baybul. Di man we rayt Sam 147 bin se wetin Jiova de tɔk fɔ ɛp wi de apin “kwik kwik wan.” Gɔd de gayd wi di rayt we ɛn di rayt tɛm. Tink bɔt aw yu de bɛnifit frɔm di Baybul, di buk ɛn magazin dɛn we “di slev we fetful ɛn gɛt sɛns” de mek, di JW TV, di jw.org wɛbsayt, di ɛlda dɛn, ɛn yu brɔda ɛn sista dɛn. (Matyu 24:​45, NW) Yu dɔn si di we aw Jiova rɛdi fɔ gayd yu pan ɛnitin we yu de du?

¹⁷ Wan sista we nem Simɔn bin si aw Gɔd in Wɔd ɛp am. I bin fil lɛk se i nɔ gɛt wan valyu ɛn i bin de tink se Jiova nɔ gladi wit am. Bɔt we in at kin pwɛl, i kin pre to Jiova ɛn beg am fɔ mek i go ɛp am. I kɔntinyu bak fɔ stɔdi di Baybul. Simɔn bin se: “A nɔ ɛva si misɛf pan prɔblɛm we Jiova nɔ ɛp ɛn gayd mi.” Dis bin ɛp am fɔ si insɛf as sɔmbɔdi we valyu na Jiova in yay.

18. Wetin mek yu fil se Jiova de nia yu?

¹⁸ Di man we rayt Sam 147 bin no na di Izrɛlayt dɛn nɔmɔ we bin de trade trade Jiova bin pik fɔ bi in pipul dɛn, pan ɔl di neshɔn dɛn na di wɔl. Na dis neshɔn nɔmɔ bin de yɛri Gɔd in “lɔ” ɛn na dɛn nɔmɔ i bin de tɛl “wetin fɔ du.” (Rid Sam 147:​19, 20.) Tide, na big big ɔnɔ wi gɛt fɔ mek dɛn kɔl wi bay Gɔd in nem. Wi gladi fɔ we wi no am, fɔ we wi gɛt in Wɔd fɔ gayd wi, ɛn fɔ we wi ebul fɔ gɛt tayt padi biznɛs wit am. Yu gɛt bɔku bɔku rizin dɛn fɔ “Prez Ja!” ɛn fɔ ɛnkɔrej ɔda pipul dɛn fɔ du di sem tin lɛk aw di man we rayt Sam 147 bin du.