1. Wetin yɔŋ wan dɛn fɔ disayd fɔ du fɔ tumara bambay? Wetin go ɛp dɛn fɔ mek dɛn nɔ wɔri tumɔs? (Luk di pikchɔ nia dis atikul in taytul.)

UNA dɛn yɔŋ wan dɛn, una go mɔs gri se we pɔsin want travul, i go fayn fɔ mek di pɔsin plan usay i de go. Layf tan lɛk we pɔsin de travul, ɛn di tɛm we yu fɔ plan usay yu want fɔ go na we yɔŋ. Na tru se i nɔ kin izi fɔ plan dɛn kayn tin dɛn de. Wan titi we nem Ɛda tɔk se: “A kin fred we a kin mɛmba se na mi gɛt fɔ disayd wetin a want fɔ du na layf te go.” If yu de fil dis kayn we, mɛmba wetin Jiova bin tɔk we i se: “Nɔ fred, bikɔs mi na yu Gɔd; a go gi yu trɛnk, a go ɛp yu.”—Ayzaya 41:​10.

2. Aw yu no se Jiova want fɔ mek yu plan fɔ du sɔntin we go mek yu gladi tumara bambay?

² Jiova de ɛnkɔrej yu fɔ yuz sɛns we yu de plan fɔ tumara bambay. (Ɛkliziastis 12:​1; Matyu 6:​20) I want mek yu gladi. Yu kin si dis klia wan we yu yɛri, si, ɛn tes di tin dɛn we i dɔn mek. Ɔda we dɛn de bak we Jiova de kia fɔ wi. I de advays wi ɛn i de tich wi di bɛst we fɔ liv.  So i nɔ kin gladi we pipul dɛn nɔ de fala in advays. I de tɛl di wan dɛn we nɔ de fala in advays se una ‘pik fɔ du tin dɛn we a nɔ go gladi fɔ. A de tɛl una, mi wokman dɛn go gladi, bɔt una go shem; a de tɛl una, mi wokman dɛn go siŋ bikɔs dɛn at gladi.’ (Ayzaya 65:​12-14). We wi disayd fɔ du di rayt tin dɛn na layf, wi de briŋ prez to Jiova.—Prɔvabs 27:​11

3. Wetin Jiova want yu fɔ du?

³ Wetin Jiova want yu fɔ du? Fɔ lɛ yu go gladi, yu nid fɔ no udat na Jiova ɛn wɔship am. Na da we de Jiova mek mɔtalman. (Sam 128:​1; Matyu 5:​3) Animal dɛn jɔs de fɔ it, drink, ɛn bɔn pikin dɛn. Bɔt Jiova want yu fɔ plan yu layf di kayn we we go mek yu gladi ɛn bɛtɛ na layf. Di Wan we mek yu na “Gɔd we lɛk ɔlman,” na “Gɔd we gladi ɔltɛm,” ɛn i mek mɔtalman “lɛkɛ insɛf.” (Sɛkɛn Lɛta Fɔ Kɔrint 13:​11; Fɔs Lɛta To Timoti 1:​11, NW; Jɛnɛsis 1:​27) Yu go gladi we yu falamakata wi Gɔd we lɛk ɔlman. Di Baybul se: “Di pɔsin we de gi gɛt blɛsin pas di pɔsin we de gɛt.” (Di Apɔsul Dɛn Wok [Akt] 20:​35) Na so i kin apin. Dis dɔn ɛva apin to yu? Jiova want ɛnitin we yu de plan fɔ du tumara bambay fɔ bi tin we de sho se yu lɛk am ɛn yu lɛk ɔda pipul dɛn.—Rid Matyu 22:​36-39.

4, 5. Wetin bin mek Jizɔs gladi?

⁴ Jizɔs Krays sɛt di bɛst ɛgzampul fɔ yɔŋ wan dɛn. I go mɔs bi se we i bin smɔl, i bin de ple ɛn ɛnjɔy insɛf. Jɔs lɛk wetin Gɔd in Wɔd se, “tɛm de fɔ laf,” ɛn “tɛm de fɔ gladi.” (Ɛkliziastis 3:​4) Jizɔs bin kam nia Jiova bay we i bin de stɔdi di skripchɔ dɛn. We i bin ol 12 ia, di wan dɛn we bin de tich na di tɛmpul bin kɔle “di we we i bin de ansa kwɛshɔn ɛn di sɛns we i bin gɛt.”—Lyuk 2:​42, 46, 47.

⁵ We Jizɔs big, i bin de gladi fɔ du wetin Gɔd tɛl am fɔ du. Fɔ ɛgzampul, Gɔd bin want am fɔ “tɛl dɛn po pipul di Gud Nyuz,” ɛn fɔ tɛl “dɛn blɛnyay pipul se dɛn go si.” (Lyuk 4:​18) Sam 40:​8 tɔk bɔt aw Jizɔs bin fil we i se: “A de ɛnjɔy fɔ du wetin yu want.” Jizɔs bin de ɛnjɔy fɔ tich pipul dɛn bɔt in Papa. (Rid Lyuk 10:​21.) Wan tɛm, afta we Jizɔs tɔk to wan uman bɔt aw fɔ wɔship Gɔd di rayt we, i bin tɛl in disaypul dɛn se: “Mi yon it na fɔ dɔn di wok we di wan we sɛn mi gi mi fɔ du, ɛn fɔ du ɔl wetin i want.” (Jɔn 4:​31-34) Jizɔs bin gladi bikɔs i bin sho se i lɛk Gɔd ɛn ɔda pipul dɛn. Yu go gɛt gladi at, if yu bak du di sem tin.

6. Wetin mek i fayn fɔ tɔk to ɔda pipul dɛn bɔt wetin yu go want fɔ du?

⁶ Bɔku Kristian dɛn bin stat fɔ payɔnia we dɛn yɔŋ, ɛn dis dɔn mek dɛn gladi. Yu nɔ tink se i go fayn fɔ tɔk to sɔm pan dɛn bɔt wetin yu plan fɔ  du? Di Baybul se: “If yu nɔ gɛt bɔku advays yu plan go fel yu, bɔt if yu gɛt bɔku advays, bɛtɛ go fala yu.” (Prɔvabs 15:​22) Sɔntɛm dɛn brɔda ɛn sista dɛn ya go tɛl yu se wetin yu go lan we yu de payɔnia go ɛp yu na layf te go. Jizɔs bin lan bɔku tin dɛn frɔm in Papa we in bin de na ɛvin. Dɔn, i bin kɔntinyu fɔ lan we i bin de du di prichin wok na dis wɔl. I bin gladi we i bin de prich di gud nyuz to ɔda pipul dɛn ɛn i bin stil fetful pan ɔl we i nɔ bin izi fɔ am. (Rid Ayzaya 50:​4; Di Ibru Pipul Dɛn 5:​8; 12:​2) Lɛ wi si wetin mek yu go gladi we yu yuz bɔku pan yu tɛm fɔ sav Jiova.

7. Wetin mek bɔku yɔŋ wan dɛn de ɛnjɔy fɔ mek disaypul dɛn?

⁷ Jizɔs bin tɛl wi fɔ go ‘mek di pipul dɛn bi in lanin bɔy dɛn’ ɛn wi fɔ tich dɛn. (Matyu 28:​19, 20) If yu plan fɔ mek di prichin wok bi di men tin we yu de du, yu go satisfay ɛn yu go briŋ prez to Gɔd. Lɛk ɛni ɔda wok, yu nid tɛm fɔ sabi du am gud gud wan. Wan brɔda we nem Timoti we stat fɔ payɔnia we i pas twɛlv ia se: “A lɛk fɔ yuz bɔku pan mi tɛm fɔ sav Jiova bikɔs na dis we a go sho se a lɛk am. We a bigin fɔ payɔnia, a nɔ bin gɛt pipul dɛn fɔ stɔdi di Baybul wit. Bɔt leta a go na ɔda eria, ɛn insay wan mɔnt a stat fɔ stɔdi pipul dɛn. Wan pan dɛn bigin fɔ kam na Kiŋdɔm Ɔl. Afta a go di Skul fɔ Brɔda dɛn we Nɔ Mared, dɛn bin sɛn mi go ɔda say usay a bin stat fɔ stɔdi 4 pipul dɛn. A lɛk fɔ tich pipul dɛn, ɛn si aw di oli spirit de ɛp dɛn fɔ chenj.” * (Luk di futnot.)—Fɔs Lɛta Fɔ Tɛsalonayka 2:​19.

8. Wetin sɔm yɔŋ wan dɛn dɔn du fɔ mek dɛn go prich to bɔku pipul dɛn?

⁸ Sɔm yɔŋ pipul dɛn dɔn lan ɔda langwej. Fɔ ɛgzampul, Jekɔp we kɔmɔt na Nɔt Amɛrika rayt se: “We a bin ol sɛvin ia, bɔku pan mi klas met dɛn na Viɛtnamiz pipul dɛn. So afta sɔm tɛm a plan fɔ lan dɛn langwej bikɔs a bin want fɔ tɛl dɛn bɔt Jiova. Plɛnti tɛm, a bin de lan di langwej bay we a de kɔmpia di Inglish Wachtawa ɛn di Viɛtnamiz Wachtawa. A mek padi dɛn bak na di Viɛtnamiz langwej kɔngrigeshɔn we de nia wi. We a ol 18 ia, a stat fɔ payɔnia. Leta, a go di Skul fɔ Brɔda dɛn we Nɔ Mared. Dis dɔn ɛp mi na di say we a de payɔnia rayt naw. Na mi na di wangren ɛlda na wan Viɛtnamiz-langwej grup. Bɔku Viɛtnamiz pipul dɛn de sɔprayz we a dɔn lan dɛn langwej. Dɛn kin gri fɔ lɛ a go insay dɛn os, ɛn bɔku tɛm a kin stɔdi di Baybul wit dɛn. Sɔm pan dɛn dɔn baptayz.”—Luk Di Apɔsul Dɛn Wok [Akt] 2:​7, 8.

9. Wetin di prichin wok de ɛp wi fɔ lan?

⁹ Di wok fɔ mek disaypul dɛn go tich yu fayn abit dɛn fɔ wok, aw yu ɛn ɔda pipul dɛn go tɔk fayn, aw fɔ gɛt maynd, ɛn aw fɔ tɛk tɛm tɔk ɔ du tin. (Prɔvabs 21:​5; Sɛkɛn Lɛta To Timoti 2:​24) Dis wok go mek yu gladi bikɔs yu  go lan aw fɔ pruv se yu biliv wetin di Baybul se. Yu go lan bak aw fɔ wok wit Jiova.—Fɔs Lɛta Fɔ Kɔrint 3:​9.

10. Aw yu go gɛt gladi at we yu de du di prichin wok pan ɔl we i nɔ izi fɔ du dat na di eria we yu de?

¹⁰ Yu go gɛt gladi at we yu de du di prichin wok ilɛksɛf di pipul dɛn we want fɔ stɔdi di Baybul na yu eria, nɔ bɔku. Fɔ mek disaypul dɛn, ɔlman na di kɔngrigeshɔn fɔ wok togɛda as tim. Pan ɔl we na wan brɔda ɔ sista go gɛt pɔsin we want fɔ bi disaypul, wi ɔl kin gladi bikɔs wi ɔl de luk fɔ pipul dɛn we want fɔ bi Jizɔs in disaypul. Fɔ ɛgzampul, Brandɔn we dɔn payɔnia fɔ nayn ia na say usay bɔku pipul dɛn nɔ de gri fɔ stɔdi the Baybul bin tɔk se: “A lɛk fɔ prich di gud nyuz bikɔs na dat Jiova tɛl wi fɔ du. A bin stat fɔ payɔnia jɔs afta a dɔn skul. A kin gladi fɔ ɛnkɔrej di yɔŋ brɔda dɛn na mi kɔngrigeshɔn ɛn a kin lɛk fɔ si we dɛn de go bifo pan Gɔd biznɛs. Afta we a atɛnd di Skul fɔ Brɔda dɛn we Nɔ Mared, dɛn bin gi mi nyu wok fɔ du as payɔnia. Na tru se a nɔ wande ɛp ɛnibɔdi na di say we a de prich fɔ baptayz, bɔt ɔda pipul dɛn dɔn du am. A gladi we a bin disayd fɔ yuz bɔku pan mi tɛm fɔ du di prichin wok.”—Ɛkliziastis 11:​6.

11. Us ɔda we dɛn bɔku yɔŋ pipul dɛn de sav Jiova?

¹¹ Bɔku tin dɛn de we wi go du fɔ sav Jiova. Fɔ ɛgzampul, bɔku yɔŋ wan dɛn de ɛp fɔ bil. Wi nid bɔku bɔku Kiŋdɔm Ɔl dɛn. Dɛn ples dɛn ya de briŋ prez to Jiova, so we wi de ɛp fɔ bil dɛn, wi kin rili gladi. Yu go gɛt gladi at bak we yu de wok wit yu brɔda ɛn sista dɛn. Yu go lan bɔku tin dɛn, lɛk aw fɔ wok fayn, aw fɔ wok sef wan, ɛn aw fɔ wok togɛda wit yu ovasia.

12. We pɔsin de payɔnia, aw dat de mek i ebul fɔ du ɔda tin dɛn fɔ Jiova?

¹² Wan brɔda we nem Kɛvin bin se: “Frɔm we a smɔl, a bin rili want fɔ yuz bɔku pan mi tɛm fɔ sav Jiova wande. So we a ol 19 ia, a bigin fɔ payɔnia. A bin de yuz smɔl pan mi tɛm fɔ wok wit wan brɔda we de bil so dat a go ebul kia fɔ misɛf. A lan fɔ ruf os, fɔ fiks winda, ɛn domɔt. Leta, a wok wit sɔm brɔda ɛn sista dɛn we bin de ɛp na say dɛn usay big big briz dɔn pwɛl. Wi bin de bil Kiŋdɔm Ɔl dɛn ɛn os dɛn fɔ di brɔda ɛn sista dɛn. We a yɛri se dɛn nid mɔ pipul dɛn fɔ bil na Sawt Afrika, a rayt se a want fɔ go ɛp dɛn ɛn dɛn bin kɔl mi fɔ go de. We a de na Afrika, a kin muv fast fast fɔ ɛp fɔ bil Kiŋdɔm Ɔl dɛn na difrɛn say dɛn. Di  brɔda ɛn sista dɛn we a bin de wok wit tan lɛk famili to mi. Wi bin de na di sem os, wi bin de stɔdi di Baybul togɛda, ɛn wi bin de wok togɛda. Ɛni wik, a kin gladi bak fɔ prich wit di brɔda ɛn sista dɛn we de na di say usay wi de bil. Di tin we a bin plan fɔ du we a smɔl, dɔn gi mi di kayn gladi at we a nɔ bin ɛva tink se a go gɛt.”

13. Wetin mek bɔku yɔŋ wan dɛn gladi we dɛn de wok fɔ Jiova na Bɛtɛl?

¹³ Sɔm pipul dɛn we bin de payɔnia de wok naw na Bɛtɛl. Yu go gɛt gladi at we yu wok na Bɛtɛl bikɔs ɔltin we yu de du de na fɔ Jiova. Di wan dɛn we de wok na Bɛtɛl de ɛp fɔ mek wi gɛt Baybul, buk, magazin dɛn, ɛn fim dɛn we de ɛp pipul dɛn fɔ lan di trut. Wan Bɛtɛlayt we nem Dɔstin se: “A bin ol 9 ia we a disayd se a go yuz bɔku pan mi tɛm fɔ sav Jiova, ɛn a bigin payɔnia we a dɔn skul. Afta wan ia siks mɔnt, dɛn kɔl mi fɔ go wok na Bɛtɛl. Na de a lan aw fɔ yuz printin mashin ɛn leta a lan aw fɔ wok pan kɔmpyuta. We a de na Bɛtɛl, a kin gladi fɔ yɛri bɔt aw di prichin wok de go bifo ɔlsay na di wɔl. A lɛk fɔ sav Jiova na Bɛtɛl bikɔs wetin wi de du de, de ɛp pipul dɛn fɔ kam nia Jiova mɔ ɛn mɔ.”

14. Wetin yu fɔ du naw so dat yu go pripia fɔ yuz bɔku pan yu tɛm fɔ sav Jiova?

¹⁴ Aw yu go pripia fɔ yuz bɔku pan yu tɛm fɔ sav Jiova? Yu nid fɔ gɛt Kristian kwaliti dɛn so dat yu go ebul fɔ sav Jiova di bɛst we. Stɔdi Gɔd in Wɔd ɔltɛm, tink gud wan bɔt wetin yu de rid, ɛn mek shɔ se yu gi kɔmɛnt na mitin. Yu kin tray fɔ tɔk to ɔda pipul dɛn bɔt di gud nyuz ivin we yu de go skul. Lan fɔ sho se yu rili bisin bɔt ɔda pipul dɛn bay we yu de tek tɛm aks dɛn wetin dɛn tink ɛn lisin to dɛn ansa dɛn. Dɔn, na fɔ rɛdi ɔltɛm fɔ du wok na di kɔngrigeshɔn, lɛk fɔ klin di Kiŋdɔm Ɔl ɛn fɔ mek di say dɛn we dɔn pwɛl. Jiova kin gladi fɔ yuz pipul dɛn we ɔmbul ɛn we rɛdi fɔ wok. (Rid Sam 110:​3; Di Apɔsul Dɛn Wok [Akt] 6:​1-3) Di apɔsul Pɔl bin kɔl Timoti fɔ sav as mishɔnari bikɔs ɔlman “bin de tɔk gud” bɔt am.—Di Apɔsul Dɛn Wok [Akt] 16:​1-5.

15. Wetin yu go du fɔ gɛt wok we go ɛp yu fɔ payɔnia?

¹⁵ Plɛnti pipul dɛn we de yuz bɔku pan dɛn tɛm fɔ sav Jiova nid fɔ gɛt wok. (Di Apɔsul Dɛn Wok [Akt] 18:​2, 3) Sɔntɛm yu kin lan wok we nɔ de tek lɔng tɛm. Dis go ɛp yu fɔ gɛt wok we nɔ de tek ɔl yu tɛm na di say usay yu de. Tɔk to yu sakit ovasia ɛn ɔda payɔnia dɛn bɔt yu plan dɛn, ɛn aks dɛn fɔ advays. Dɔn, jɔs lɛk aw di Baybul se, “put yu biznɛs na PAPA GƆD [“Jiova,” NW] in an, ɛn si we bɛtɛ de fala yu.”—Prɔvabs 16:​3; 20:​18.

16. We yu yuz bɔku pan yu tɛm fɔ sav Jiova, aw dat go mek yu rɛdi fɔ ɔda wok dɛn tumara bambay?

¹⁶ Yu fɔ biliv se Jiova want yu fɔ “gɛt” gladi at tumara bambay. (Rid Fɔs Lɛta To Timoti 6:​18, 19.) We yu yuz bɔku pan yu tɛm fɔ sav Jiova, dat go ɛp yu fɔ bi machɔ Kristian as yu de wok wit ɔda payɔnia dɛn fɔ sav Jiova. Plɛnti pipul dɛn dɔn si bak se we dɛn yuz bɔku pan dɛn tɛm fɔ sav Jiova di tɛm we dɛn yɔŋ, dat bin ɛp dɛn na dɛn mared-os. Bɔku tɛm, di wan dɛn we bin de payɔnia bifo dɛn mared kin kɔntinyu fɔ payɔnia togɛda wit dɛn man ɔ dɛn wɛf.—Lɛta Fɔ Rom 16:​3, 4.

17, 18. We yu plan fɔ du wetin go mek Jiova gladi, wetin di Baybul se i go du fɔ yu?

¹⁷ Sam 20:​4 tɔk se: “Lɛ PAPA GƆD [mek] yu gɛt ɔl wetin yu want ɛn lɛ bɛtɛ fala yu pan ɔl wetin yu plan fɔ du.” As yu de plan fɔ tumara bambay, tink bɔt wetin yu rili want fɔ du wit yu layf. Tink bɔt wetin Jiova de du insay wi yon tɛm ɛn wetin yu go ebul du fɔ am. Dɔn plan fɔ du wetin go mek i gladi.

¹⁸ We yu yuz yu layf fɔ sav Jiova ɛn ɔnɔ am, yu go gɛt gladi at. So “ɛnjɔy fɔ sav PAPA GƆD [“Jiova,” NW] ɛn i go gi yu wetin yu want.”—Sam 37:​4.