NA Jɔshwa bin gɛt fɔ lid di Izrɛlayt dɛn go na di land we Gɔd bin dɔn prɔmis dɛn. Dis na tin we nɔ gɛt fɔ rili izi. Bɔt Jiova bin gi am trɛnk ɛn ɛnkɔrej am bay we i tɔk se: “Tinap lɛkɛ man.” I bin tɛl Jɔshwa se if i rid ɛn obe in Lɔ, dat go mek i disayd fɔ du di rayt tin ɛn i go go bifo.—Jɔshwa 1:​7, 8.

Wi de insay di tɛm we tin “traŋa,” so layf nɔ kin rili izi. (Sɛkɛn Lɛta To Timoti 3:​1) If wi want fɔ go bifo lɛk Jɔshwa, wi nid fɔ fala di advays we Jiova bin gi am. Wi nid fɔ rid di Baybul ɔltɛm ɛn yuz wetin wi dɔn lan fɔ disayd fɔ du di rayt tin.

I go mɔs bi se sɔm pan wi nɔ go sabi aw fɔ stɔdi, ɔ wi nɔ kin ɛnjɔy fɔ stɔdi. Bɔt fɔ stɔdi di Baybul yu wangren rili impɔtant. As yu de luk di bɔks we gɛt di taytul, “Tray Dɛn Pɔynt dɛn Ya,” yu go fɛn pɔynt dɛn we go ɛp yu fɔ bɛnifit we yu de stɔdi ɛn yu go ɛnjɔy am mɔ ɛn mɔ.

Wan pan di man dɛn we rayt di Sam buk bin siŋ se: “Mek a fala di rod we yu lɔ dɛn se a fɔ fala, bikɔs na da tɛm de a go gladi.” (Sam 119:​35) Yusɛf go ɛnjɔy we yu de stɔdi Gɔd in Wɔd. Yu go kam fɔ lan bɔku fayn fayn pɔynt dɛn as yu de kɔntinyu fɔ stɔdi di Baybul.

Pan ɔl we yu nɔ gɛt fɔ lid wan ol neshɔn lɛk aw Jɔshwa bin du, yu gɛt yu yon prɔblɛm dɛn. So jɔs lɛk Jɔshwa, stɔdi Gɔd in Wɔd ɛn obe am. If yu du dat, yu go ebul fɔ disayd di rayt tin ɛn yu go go bifo na layf.