Tray fɔ Sho Sɔri-At to “Ɔlman”
WE Jizɔs bin de tich in disaypul dɛn aw fɔ prich di gud nyuz, i bin wɔn dɛn se nɔto ɔltɛm pipul dɛn go lisin to dɛn. (Lyuk 10:3, 5, 6, NW) Na di sem tin de apin we wi de prich. Sɔm pan di pipul dɛn we wi de mit kin rud ɔ dɛn kin ivin vɛks bad bad wan. Ɛn we dɛn kin biev dis kayn we, i nɔ kin izi fɔ lɛ wi sɔri fɔ dɛn ɛn want fɔ prich to dɛn.
Pɔsin we gɛt sɔri-at de si wetin ɔda pipul dɛn nid ɛn di prɔblɛm dɛn we dɛn gɛt, i kin sɔri fɔ dɛn, ɛn want fɔ ɛp dɛn. Bɔt wetin yu tink se go apin if wi nɔ gɛt sɔri-at fɔ di pipul dɛn we wi kin go prich to? Wi nɔ go gɛt bɛtɛ zil igen, we min se wi nɔ go gladi fɔ prich to dɛn, ɛn wi nɔ go ebul fɔ ɛp dɛn. Wi kin kɔmpia di zil we wi gɛt fɔ prich to faya. Fɔ lɛ faya go kech fayn fayn wan, i nid bɔku briz. Semweso, fɔ lɛ wi rili gɛt zil, wi nid fɔ gɛt sɔri-at!—Fɔs Lɛta Fɔ Tɛsalonayka 5:19.
Aw wi go lan fɔ sho sɔri-at pan ɔl we i nɔ izi? Lɛ wi tɔk bɔt tri ɛgzampul dɛn we wi fɔ falamakata: Jiova, Jizɔs, ɛn di apɔsul Pɔl.
FALAMAKATA DI WE AW JIOVA DE SHO SƆRI-AT
Frɔm trade trade, pipul dɛn bin dɔn de lay bad bad wan pan Jiova. Bɔt i de kɔntinyu fɔ du “gud to pɔsin we nɔ de tɛl tɛnki ɛn to pɔsin we wikɛd.” (Lyuk 6:35) Aw Jiova de sho se i gud to pipul dɛn? I de bia wit ɔlman. Jiova want mek “ɔlman” sev. (Fɔs Lɛta To Timoti 2:3, 4) Pan ɔl we Gɔd et wetin bad, pipul dɛn layf valyu to am ɛn i nɔ want ɛniwan pan dɛn fɔ day.—Pita in Sɛkɔn Lɛta 3:9, NW.
Jiova no se Setan rili sabi fɔ mek pipul dɛn biliv lay lay tɔk dɛn. (Sɛkɔn Lɛta fɔ Kɔrint 4:3, 4, NW) Dɛn dɔn tich bɔku pipul dɛn lay lay tin dɛn bɔt Gɔd frɔm we dɛn smɔl. So di we we dɛn de tink ɛn fil de mek i nɔ izi fɔ dɛn fɔ tek di trut. Bɔt Jiova want fɔ ɛp dɛn. Aw wi no dis?
Fɔ ɛgzampul, tink bɔt di we aw Jiova bin fil bɔt di pipul dɛn we bin de na Ninivɛ. Pan ɔl we dɛn bin lɛk fɛt fɛt, Jiova bin tɛl Jona se: “Wetin mek mi nɔ fɔ sɔri fɔ di pipul dɛn na Ninivɛ, da big big siti de we gɛt pas wan ɔndrɛd ɛn twɛnti tawzin pipul de we nɔ no dɛn lɛftan frɔm dɛn raytan?” (Jona 4:11) Jiova bin rili sɔri fɔ dɛn pipul dɛn de we nɔ bin no di tru tin bɔt am. So i bin sɛn Jona fɔ go wɔn dɛn.
Wi de fil di sem we lɛk aw Jiova de fil bɔt pipul dɛn. Dɛn layf rili valyu. Jɔs lɛk Jiova, wi rili want fɔ ɛp dɛn fɔ lan bɔt am pan ɔl we i kin tan lɛk se dɛn nɔ want fɔ tek di trut.
FALAMAKATA DI WE AW JIZƆS DE SHO SƆRI-AT
Jɔs lɛk in Papa, Jizɔs bin de rili fil sɔri fɔ pipul dɛn “bikɔs dɛn bin kɔnfyus ɛn dɛn nɔ bin ebul fɔ ɛp dɛnsɛf, jɛs lɛkɛ dɛn ship we nɔ gɛt shɛpad fɔ mɛn dɛn.” (Matyu 9:36) Jizɔs bin ɔndastand wetin mek dat bin de apin to di pipul dɛn. Na bikɔs di bigman dɛn pan Gɔd biznɛs bin de trit dɛn bad ɛn tich dɛn lay lay tin dɛn. Pan ɔl we Jizɔs bin no se bɔku pan di pipul dɛn we bin de kam fɔ lisin to am, nɔ go bi in disaypul dɛn, i bin stil de tich dɛn bɔku tin dɛn.—Mak 4:1-9.
Nɔ fil bad if sɔmbɔdi nɔ lisin to yu di fɔs tɛm
Sɔm tin kin apin to pɔsin na layf we kin mek i chenj di we aw i de biev
We pipul dɛn biev bad we to wi we wi go prich, wi fɔ tray fɔ ɔndastand wetin mek dɛn biev da kayn we de. Sɔntɛm dɛn gɛt bad we we dɛn de tink bɔt di Baybul ɔ bɔt Kristian dɛn bikɔs dɛn dɔn si se bɔku pan di wan dɛn we de kɔl dɛnsɛf Kristian de du bad bad tin dɛn. Ɔda pipul dɛn dɔn yɛri lay lay tin dɛn bɔt wetin wi biliv. Stil ɔda pipul dɛn de fred se dɛn fambul dɛn ɔ di pipul dɛn na dɛn eria go provok dɛn if dɛn si dɛn de tɔk to wi.
Sɔm pipul dɛn we wi kin mit kin dɔn gɛt bad bad tin dɛn we dɔn apin to dɛn ɛn dat kin rili afɛkt dɛn. Wan mishɔnari we nem Kim bin tɔk se wɔ dɔn mit bɔku pan di pipul dɛn we de na di say usay i de prich, ɛn dɛn dɔn lɔs ɔltin we dɛn gɛt. Dɛn nɔ gɛt no op fɔ tumara bambay. Dɛn at rili pwɛl ɛn dɛn nɔ trɔst nɔbɔdi. Bɔku tɛm, di pipul dɛn we de na dis eria kin tray fɔ stɔp Jiova Witnɛs dɛn fɔ lɛ dɛn nɔ prich. Wan tɛm, dɛn bin ivin atak Kim we i bin de prich.
Aw Kim bin kɔntinyu fɔ sho sɔri-at pan ɔl we pipul dɛn bin de trit am bad? Ɔltɛm Kim bin de tray fɔ mɛmba wetin de na Prɔvabs 19:11 we tɔk se: “Udat gɛt sɛns nɔ de vɛks kwik.” We i de tink bɔt wetin dɔn apin to di pipul dɛn na di say usay i de prich, dat bin de ɛp am fɔ lɛ i sɔri fɔ dɛn. Ɛn nɔto ɔlman we i kin mit kin trit am bad. Na dis sem say i gɛt fayn fayn ritɔn visit dɛn.
Wi kin aks wisɛf se: ‘If a nɔ bin no di trut, wetin a bin fɔ du if Jiova Witnɛs dɛn kam prich to mi? Fɔ ɛgzampul, wetin wi bin fɔ du if wi bin dɔn yɛri bɔku lay lay tin dɛn bɔt Jiova Witnɛs dɛn? Sɔntɛm wisɛf fɔ dɔn biev bad we ɛn wi nid fɔ lɛ dɛn sɔri fɔ wi. Jizɔs bin tɔk se wi fɔ trit ɔda pipul dɛn di we aw wi want fɔ mek dɛn trit wi. So wi fɔ tray fɔ ɔndastand di we aw ɔda pipul dɛn de fil ɛn fɔ bia wit dɛn pan ɔl we i nɔ izi.—Matyu 7:12.
FALAMAKATA DI WE AW PƆL BIN DE SHO SƆRI-AT
Di apɔsul Pɔl bin de sho sɔri-at ivin fɔ di pipul dɛn we bin de du bad bad tin dɛn to am we i bin de prich. Wetin mek? Na bikɔs i bin de mɛmba aw insɛf bin de trit pipul dɛn bad. I bin tɔk se: “Fɔstɛm a bin de tɔk bad bɔt am, a bin de fɛt in pipul dɛn ɛn a bin de kɔs am; bɔt Gɔd sɔri fɔ mi bikɔs a nɔ bin no wetin a de du di tɛm we a nɔ bin biliv pan Krays yet.” (Fɔs Lɛta To Timoti 1:13) Pɔl bin no se Jiova ɛn Jizɔs dɔn rili sɔri fɔ am. Pɔl bin ɔndastand wetin mek di pipul dɛn want fɔ stɔp di prichin wok we i bin de du, bikɔs insɛf bin dɔn fil da kayn we de.
Sɔntɛnde, Pɔl kin mit pipul dɛn we rili biliv di lay lay tin dɛn we dɛn kin dɔn tich dɛn. Aw dat bin mek i fil? Insay Di Apɔsul Dɛn Wok [Akt] 17:16 wi rid se we i bin de na Atɛns, i bin “vɛks we i si se di pipul dɛn bin gɛt plɛnti gɔd na di tɔŋ.” Bɔt Pɔl bin yuz da sem tin we bin mek i vɛks fɔ tich di pipul dɛn. (Di Apɔsul Dɛn Wok [Akt] 17:22, 23) I bin ajɔs di we aw i de prich, ɛn i bin tɔk difrɛn we to pipul dɛn we kɔmɔt na difrɛn say dɛn so dat “sɔm pipul mɔs sev.”—Fɔs Lɛta Fɔ Kɔrint 9:20-23.
Wi kin du wetin Pɔl bin du we wi de prich to pipul dɛn we de biev bad we to wi ɔ we biliv di rɔŋ tin. Wi kin yuz wetin wi no bɔt dɛn fɔ ɛp dɛn fɔ lan bɔt di “nyuz bɔt gud tin.” (Ayzaya 52:7) Wan sista we nem Dɔrɔti bin se: “Na di say usay wi de prich, bɔku pipul dɛn bin dɔn lan se Gɔd wikɛd ɛn i lɛk fɔ jɔj pipul dɛn. A kin tɛl dɛn kayn pipul dɛn de tɛnki fɔ di strɔng we aw dɛn biliv pan Gɔd, ɛn a kin drɔ dɛn maynd to wetin di Baybul se bɔt Jiova in fayn fayn kwaliti dɛn ɛn wetin i dɔn prɔmis fɔ du tumara bambay.”
“UNA FƆ DU GUD TO ƐNIBƆDI WE DU UNA BAD”
Di mɔ we di tɛm de nia fɔ lɛ dis wɔl dɔn, na di mɔ wi fɔ no se di we aw sɔm pipul dɛn de biev “go de wɔs mɔ ɛn mɔ.” (Sɛkɛn Lɛta To Timoti 3:1, 13) Bɔt di we aw dɛn de biev nɔ fɔ mek wi stɔp fɔ gladi ɔ fɔ sho sɔri-at we wi de prich. Jiova kin gi wi di trɛnk ‘fɔ du gud to ɛnibɔdi we du wi bad.’ (Lɛta Fɔ Rom 12:21) Wan payɔnia sista we nem Jɛsika bin tɔk se bɔku tɛm i kin mit pipul dɛn we prawd ɛn we de provok wi ɛn di mɛsej we wi de prich. Dis sista bin kɔntinyu fɔ tɔk se: “Dis kin mek pɔsin vɛks. We a kin stat fɔ tɔk, a kin pre kwayɛt wan to Jiova ɛn aks am fɔ mek i ɛp mi fɔ si di pɔsin lɛk aw in de si am.” Dis bin ɛp Jɛsika fɔ mek i nɔ pe atɛnshɔn pan di we aw i de fil, bifo dat, i de tink bɔt aw i go ɛp di pɔsin.
Wi de kɔntinyu fɔ luk fɔ di wan dɛn we want fɔ tek di trut
As tɛm de go sɔm pipul dɛn kin gri fɔ mek wi ɛp dɛn ɛn dɛn kin lan di trut
Wi fɔ tray bak fɔ ɛnkɔrej wi brɔda ɛn sista dɛn we wi de prich wit dɛn. Jɛsika se we i kin de fil savis wit ɔda pɔblisha dɛn ɛn dɛn trit wan pan dɛn bad, i kin tray nɔ fɔ pe atɛnshɔn to dat. Bifo dat i kin tɔk bɔt gud tin dɛn, lɛk di fayn tin we kin apin we wi de prich pan ɔl we sɔm pipul dɛn kin biev bad.
Jiova no gud gud wan se sɔntɛnde i nɔ kin izi fɔ wi fɔ prich. Bɔt Jiova kin rili gladi we wi kin falamakata di we aw i kin sho sɔri-at! (Lyuk 6:36) Bɔt fɔ tru, Jiova nɔ go kɔntinyu fɔ sho sɔri-at ɛn bia wit di pipul dɛn na dis wɔl sote go. Wi shɔ se Jiova no di rayt tɛm we i go mek ɔltin dɔn. Te da tɛm de rich, lɛ wi kɔntinyu fɔ prich ɔjɛnt wan. (Sɛkɔn Lɛta to Timoti 4:2, NW) So lɛ wi kɔntinyu fɔ prich wit zil ɛn gɛt tru tru sɔri-at fɔ “ɔlman.”
