1, 2. (a) Wetin mek i mek sɛns fɔ de na Jiova in say? (b) Wetin wi go tɔk bɔt insay dis atikul?

I MEK sɛns fɔ de nia Jiova. Nɔbɔdi nɔ de we gɛt pawa pas am, we gɛt sɛns pas am, ɛn we lɛk wi pas aw i lɛk wi! Na tru se wi kin want fɔ de biɛn am ɔltɛm ɛn de na in say. (Sam 96:​4-6) Bɔt sɔm pan di wan dɛn we bin de wɔship Gɔd nɔ bin ebul fɔ du dat.

² Insay dis atikul, wi go tɔk bɔt sɔm ɛgzampul dɛn bɔt pipul dɛn we bin se dɛn de na Jiova in say bɔt we bin de du tin dɛn we Jiova nɔ lɛk. Di impɔtant lɛsin we wi kin lan frɔm dɛn ɛgzampul go ɛp wi fɔ kɔntinyu fɔ de biɛn Jiova.

3. Wetin mek Jiova bin tray fɔ ɛp Ken? Wetin Jiova bin tɛl am?

³ Fɔ ɛgzampul, tink bɔt Ken. I nɔ bin de wɔship lay lay gɔd dɛn, bɔt stil Jiova nɔ bin gladi fɔ in wɔship. Wetin mek? Jiova bin si se Ken gɛt wikɛd tin dɛn na in at. (Jɔn  In Fɔs Lɛta 3:​12) Jiova bin wɔn Ken se: “If yu bin du wetin rayt, a nɔ bin fɔ tek yu sakrifays? Bɔt bikɔs yu nɔ du wetin rayt, sin de na yu domɔt de wet fɔ yu, bɔt yu fɔ tray nɔ fɔ kɔmit sin.” (Jɛnɛsis 4:​6, 7) Jiova bin de tɛl Ken klia wan se if i de du wetin rayt ɛn disayd fɔ de na in say, insɛf go de na Ken in say.

4. Wetin Ken bin du we i bin gɛt di chans fɔ de na Jiova in say?

⁴ If Ken bin chenj di we aw i de tink, Jiova bin fɔ dɔn gladi fɔ in wɔship. Bɔt Ken nɔ bin lisin to Gɔd, ɛn di rɔŋ we aw i bin de tink bɔt insɛf nɔmɔ bin mek i du di rɔŋ tin. (Jems 1:​14, 15) We Ken bin yɔŋ, sɔntɛm i nɔ bin ɛva tink se i go de agens Jiova. Bɔt naw, i nɔ de lisin to Gɔd in wɔnin, i tɔn in bak pan am, ɛn i kil in yon brɔda!

5. Wetin wi kin tink bɔt we go mek Jiova nɔ gladi fɔ wi?

⁵ Jɔs lɛk Ken, sɔmbɔdi we na Kristian tide kin se i de wɔship Jiova bɔt rili i de du tin dɛn we Jiova et. (Jud In Lɛta 11) I kin du di prichin wok ɛn i kin atɛnd di mitin ɔltɛm. Bɔt i kin stil alaw wetin i de tink bɔt mami ɛn dadi biznɛs di we aw Gɔd nɔ want, di we aw i want fɔ gɛt ɔltin fɔ insɛf, ɔ di we aw i et ɔda pɔsin fɔ kɔntrol di we aw i de tink. (Jɔn In Fɔs Lɛta 2:​15-17; 3:​15) Dɛn kayn we ya we pɔsin de tink kin mek i du bad tin dɛn. Ɔda pipul dɛn nɔ kin no wetin wi de tink ɔ du, bɔt Jiova in kin no. I kin no if wi nɔ rili de na in say.—Rid Jɛrimaya 17:​9, 10.

6. Aw Jiova de ɛp wi fɔ stɔp fɔ du wetin bad?

⁶ Ivin we wi mek mistek, Jiova nɔ de giv ɔp pan wi wantɛm wantɛm. If wi de go na bad say, Jiova de tɛl wi se: “Una kam bak to mi ɛn a go kam bak to una.” (Malakay 3:​7, NW) Jiova no se wi gɛt sɔm bad abit dɛn we wi nid fɔ lɛf. Bɔt i want wi fɔ tinap tranga wan ɛn stɔp fɔ du wetin bad. (Ayzaya 55:​7) If wi du dat, i prɔmis se i go ɛp wi ɛn gi wi di trɛnk we wi nid fɔ stɔp fɔ du wetin bad.—Jɛnɛsis 4:​7.

7. Aw Sɔlɔmɔn bin pwɛl in padi biznɛs wit Jiova?

⁷ We Sɔlɔmɔn bin yɔŋ, i bin gɛt gud padi biznɛs wit Jiova. Gɔd bin mek Sɔlɔmɔn gɛt bɔku sɛns ɛn i bin gi am wan impɔtant wok fɔ bil wan fayn tɛmpul na Jerusɛlɛm. Bɔt Sɔlɔmɔn bin pwɛl in padi biznɛs wit Jiova. (Fɔs Kiŋ 3:​12; 11:​1, 2) Gɔd in Lɔ bin tɔk se di kiŋ nɔ fɔ “gɛt plɛnti wɛf, bikɔs dat go mek in at kɔmɔt pan PAPA GƆD.” (Ditarɔnɔmi 17:​17) Sɔlɔmɔn nɔ bin obe dis lɔ. So i bin ɛndɔp fɔ gɛt 700 wɛf ɛn 300 galfrɛn dɛn! (Fɔs Kiŋ 11:​3) Bɔku pan dɛn uman dɛn ya na bin fɔrina dɛn we bin de wɔship lay lay gɔd dɛn. So Sɔlɔmɔn nɔ bin obe Gɔd in lɔ bak we se dɛn nɔ fɔ mared uman dɛn we nɔto Izrɛlayt dɛn.—Ditarɔnɔmi 7:​3, 4.

8. Aw Sɔlɔmɔn bin ɔfɛnd Jiova?

⁸ Smɔl smɔl, Sɔlɔmɔn nɔ bin lɛk Jiova in lɔ dɛn igen. I bin ɛndɔp fɔ du bad bad tin dɛn. I bil ɔlta dɛn fɔ di lay lay uman gɔd we nem Ashtorɛt ɛn fɔ di lay lay man gɔd we nem Kɛmɔsh, dɔn i bin de wɔship dɛn lay lay gɔd dɛn ya wit in wɛf dɛn. Sɔlɔmɔn bin ivin bil dɛn ɔlta dɛn ya na wan mawnten we  bin de bifo Jerusɛlɛm, usay i bin dɔn bil Jiova in tɛmpul! (Fɔs Kiŋ 11:​5-8; Sɛkɛn Kiŋ 23:​13) Sɔntɛm Sɔlɔmɔn bin de ful insɛf bay we i bin de tink se Jiova nɔ go bisin bɔt di bad tin dɛn we i bin de du wans i kin mek sakrifays na di tɛmpul.

9. Wetin apin we Sɔlɔmɔn nɔ bin lisin to di wɔnin we Gɔd bin gi am?

⁹ Jiova nɔ de ɛva tɔn in bak pan sin. Di Baybul se: “PAPA GƆD [“Jiova,” NW] vɛks bad bad wan pan Sɔlɔmɔn we i tɔn in bak pan in we na di PAPA GƆD we Izrɛl de wɔship.” Gɔd bin tray fɔ ɛp Sɔlɔmɔn. Jiova bin “apia to am tu tɛm. Ivin we i bin dɔn wɔn Sɔlɔmɔn nɔ fɔ wɔship ɔda gɔd dɛn i nɔ yɛri in wɔd.” Dis bin mek, Gɔd vɛks pan am ɛn i nɔ sɔpɔt am igen. Jiova nɔ bin alaw Sɔlɔmɔn in pikin dɛn fɔ rul di wan ol Izrɛl igen, ɛn dɛn bin de gɛt siriɔs prɔblɛm dɛn fɔ lɔng lɔng tɛm.—Fɔs Kiŋ 11:​9-13.

10. Wetin kin pwɛl wi fayn padi biznɛs wit Jiova?

¹⁰ If wi pik padi dɛn we nɔ ɔndastand ɔ rɛspɛkt Gɔd in lɔ dɛn, dɛn go chenj di we aw wi de tink ɛn pwɛl wi padi biznɛs wit Jiova. Dɛn padi dɛn ya kin de insay di kɔngrigeshɔn, bɔt dɛn nɔ gɛt tayt padi biznɛs wit Jiova. Ɔ sɔntɛm dɛn kin bi wi fambul dɛn, neba dɛn, wokmet dɛn, ɔ skulmet dɛn we nɔ de wɔship Jiova. If di pipul dɛn we wi de kip kɔmpin wit nɔ de fala Jiova in  lɔ dɛn, dɛn kin mek wi bigin fɔ du wetin dɛn de du ɛn dat kin mek wi lɔs wi fayn padi biznɛs wit Gɔd.

11. Wetin go ɛp wi fɔ tek tɛm pik wi padi dɛn?

¹¹ Rid Fɔs Lɛta Fɔ Kɔrint 15:​33. Bɔku pipul dɛn gɛt sɔm gud kwaliti dɛn. Ɛn nɔto ɔltɛm di wan dɛn we nɔ de wɔship Jiova kin du bad tin dɛn. Sɔntɛm yu go no pipul dɛn we tan lɛk dat. Fɔ se dis min se dɛn na gud padi dɛn? Wɛl, aw dɛn go afɛkt yu padi biznɛs wit Jiova? Yu tink se dɛn go ɛp yu fɔ kam nia Gɔd? Wetin rili impɔtant to dɛn pipul dɛn? Wetin dɛn kin tɔk bɔt? Dɛn kin tɔk ɔltɛm bɔt di letɛst drɛsin dɛn, ɛnjɔymɛnt, mɔni, fon, tablɛt, kɔmpyuta, ɛn ɔda tin dɛn? Ɔltɛm dɛn kin de fɛn fɔlt pan ɔda pipul dɛn? Dɛn kin lɛk fɔ pul dɛn rud rud jok dɛn? Jizɔs bin wɔn wi se: “Wetin di at ful wit nain di mɔt de tɔk.” (Matyu 12:​34) If yu kam fɔ no se di pipul dɛn we yu de spɛn tɛm wit de ambɔg yu padi biznɛs wit Jiova, du sɔntin bɔt dat! Ridyus di tɛm we yu kin spɛn wit dɛn, ɛn if i kam pan kam, stɔp yu padi biznɛs wit dɛn.—Prɔvabs 13:​20.

12. (a) Wetin Jiova bin tɛl di Izrɛlayt dɛn jɔs afta dɛn kɔmɔt na Ijipt? (b) Wetin di Izrɛlayt dɛn bin se we Gɔd bin tɛl dɛn fɔ de biɛn am?

¹² Wi kin lan bak frɔm wetin bin apin afta we Jiova fri di Izrɛlayt dɛn frɔm Ijipt. We di pipul dɛn bin gɛda bifo Mawnt Saynay, Jiova bin sho insɛf to dɛn wan pawaful we! Dɛn bin si dak klawd, laytin, smok, dɛn yɛri tɛnda de krak, ɛn lawd nɔys we tan lɛk ɔn. (Ɛksodɔs 19:​16-19) Dɛn bin yɛri Jiova de anawns to dɛn se i “nɔ want wan rayval.” I prɔmis se i go de biɛn di wan dɛn we lɛk am ɛn we de obe in lɔ dɛn. (Rid Ɛksodɔs 20:​1-6.) Jiova bin mek di Izrɛlayt dɛn no se if dɛn de na in say, insɛf go de na dɛn say. If yu bin de na da krawd de, aw yu bin fɔ fil we yu yɛri Jiova de tɔk dɛn wɔd dɛn de? Yu go mɔs ansa lɛk di Izrɛlayt dɛn we bin tɔk se “dɛn go du ɔl wetin PAPA GƆD se.” (Ɛksodɔs 24:​3) Bɔt i nɔ bin tu te sɔntin bin apin we bin tɛst di Izrɛlayt dɛn if dɛn stil de biɛn Gɔd. Wetin bin apin?

13. Wetin bin tɛst di Izrɛlayt dɛn if dɛn stil de biɛn Gɔd?

¹³ Di Izrɛlayt dɛn bin fred we dɛn si di kayn pawaful we aw Gɔd sho insɛf to dɛn, so Mozis bin go ɔp na Mawnt Saynay ɛn tɔk to Jiova fɔ dɛn. (Ɛksodɔs 20:​18-21) Bɔt tɛm bin de go ɛn Mozis nɔ bin kam bak na di kamp. I bin tan lɛk se di pipul dɛn nɔ bin gɛt pɔsin fɔ lid dɛn na di ɛmti land usay pɔsin nɔ go ebul fɔ liv. Wetin dɛn go du? I go bi se di Izrɛlayt dɛn bin rili abop pan dɛn mɔtalman lida we na Mozis. Dɛn bin wɔri ɛn dɛn bin tɛl Erɔn se: “As fɔ Mozis we pul dɛn kɔmɔt na Ijipt, dɛn nɔ no wetin dɔn apin to am; so, lɛ in di Erɔn mek gɔd fɔ dɛn we go de lid dɛn.”—Ɛksodɔs 32:​1, 2.

14. Aw di Izrɛlayt dɛn bin ful dɛnsɛf? Wetin Jiova bin du?

¹⁴ Di Izrɛlayt dɛn bin no se i bad fɔ wɔship lay lay gɔd. (Ɛksodɔs 20:​3-5) Bɔt i bin tu kwik fɔ lɛ dɛn bigin wɔship di kaw pikin we dɛn mek wit gold! Pan ɔl we dɛn nɔ bin obe Jiova in lɔ,  dɛn bin de ful dɛnsɛf se dɛn stil de na Jiova in say. Erɔn bin ivin kɔl di wɔship we dɛn bin de wɔship dis kaw pikin as “big sɛlibreshɔn” to Jiova! Wetin Jiova bin du? I bin tɛl Mozis se di pipul dɛn “dɔn du bad, bad tin” ɛn “dɛn dɔn kɔmɔt na di rod we a sho dɛn fɔ waka.” Jiova bin rili vɛks so i bin ivin tɔk se i go dɔnawe wit di wan ol neshɔn.—Ɛksodɔs 32:​5-10.

15, 16. Aw Mozis ɛn Erɔn bin sho se dɛn rili de na Jiova in say? (Luk di pikchɔ nia dis atikul in taytul.)

¹⁵ Bɔt Jiova na Gɔd we gɛt sɔri-at. I bin disayd se i nɔ go dɔnawe wit di wan ol neshɔn. Bifo dat, i bin gi di Izrɛlayt dɛn di chans fɔ sho se dɛn want fɔ de na in say. (Ɛksodɔs 32:​14) We Mozis bin si di pipul dɛn de ala, de siŋ, ɛn dans bifo di lay lay gɔd, i bin skata di kaw pikin we dɛn mek wit gold ɛn gren am to pawda. Dɔn i ala se: “Ɔl dɛn wan we de na PAPA GƆD [“Jiova,” NW] in say una kam oba to mi!” Ɛn “ɔl dɛn wan we na Livay fambul krɔs go oba to Mozis.”—Ɛksodɔs 32:​17-20, 26.

¹⁶ Pan ɔl we na Erɔn bin mek di kaw pikin we dɛn mek wit gold, i bin ripɛnt, ɛn in wit di ɔda Livayt dɛn bin disayd fɔ de na Jiova in say. Dɛn fetful wan dɛn ya bin sho klia wan se dɛn nɔ de na di say we di bad wan dɛn de. Na bin di rayt tin dɛn du bikɔs leta da de de, bɔku pan di wan dɛn we bin wɔship di kaw pikin bin day. Bɔt di wan dɛn we bin de na Jiova in say bin sev, ɛn Gɔd bin prɔmis se i go blɛs dɛn.—Ɛksodɔs 32:​27-29.

17. Wetin wi lan frɔm wetin Pɔl bin rayt bɔt di kaw pikin we dɛn mek wit gold?

¹⁷ Yu tink se wi gɛt ɛni lɛsin fɔ lan frɔm dis tin we bin apin? Di apɔsul Pɔl bin tɔk se: “Ɔl dɛn tin ya na fɔ sho wi se wi nɔ fɔ want fɔ du dɛn bad tin, lɛkɛ dɛn pipul ya we a dɔn tɔk bɔt,” so dat wi nɔ go ɛva “pre to dɛn tin we mɔtalman mek.” Pɔl bin ɛksplen se “ɔl dɛn tin ya bi fɔ mek ɔda pipul dɛn si wetin go bi to dɛn, if dɛnsɛf du dɛn sem tin ya; ɛn dɛn rayt dɛn dɔŋ fɔ wi fɔ mek wi tek tɛm. Dis tɛm ya we wi dɔn liv fɔ si nɔ fa frɔm di tɛm we ɔltin na [di] wɔl go dɔn. Ɛnibɔdi we tink se i tinap, fɔ tek tɛm, mek i nɔ fɔdɔm.” (Fɔs Lɛta Fɔ Kɔrint 10:​6, 7, 11, 12) Jɔs lɛk aw Pɔl bin tɔk, ivin di wan dɛn we de wɔship Jiova kin du bad tin dɛn. Dɛn kin ivin de tink se Jiova stil gladi fɔ dɛn. Bɔt nɔto bikɔs pɔsin want fɔ bi Jiova in padi ɔ tɔk se i de biɛn am go min ɔltɛm se rili Jiova gladi fɔ am.—Fɔs Lɛta Fɔ Kɔrint 10:​1-5.

18. Wetin kin mek wi bigin fɔ kɔmɔt biɛn Jiova smɔl smɔl? Wetin na di tin dɛn we go mit wi?

¹⁸ We Mozis nɔ bin kam dɔŋ frɔm Saynay di tɛm we di Izrɛlayt dɛn bin de tink se i fɔ kam, dɛn bin bigin fɔ wɔri.  If dis wɔl nɔ dɔn di tɛm we wi de tink se i fɔ dɔn, wisɛf kin bigin fɔ wɔri. Wi go bigin fɔ tink se di fayn fayn tin dɛn we Jiova dɔn prɔmis fɔ du fɔ wi tumara bambay rili de fa fɔs ɔ i nɔ go ivin apin, ɛn sɔntɛm wi go bigin fɔ pe atɛnshɔn pan wetin wi want ɛn nɔto pan wetin Jiova want. If wi nɔ tek tɛm, wi go bigin fɔ kɔmɔt biɛn Jiova smɔl smɔl ɛn du tin dɛn we wi nɔ bin de ɛva tink se wi go du.

19. Wetin wi fɔ de mɛmba ɔltɛm? Wetin mek?

¹⁹ Jiova want wi fɔ obe am wit ɔl wi at ɛn fɔ wɔship in wangren. (Ɛksodɔs 20:​5) Wetin mek i want wi fɔ du dis? Na bikɔs i lɛk wi. If wi nɔ du wetin Jiova want, na wetin Setan want wi go de du, ɛn dat go ambɔg wi. Pɔl bin tɔk se: “Una nɔ go de drink drink we Gɔd dɔn blɛs, dɔn una de drink drink we pipul dɔn sakrifays to dɛbul. Semwe so, una nɔ go de it it we Gɔd dɔn blɛs, dɔn una go it tin we dɛn dɔn sakrifays to dɛbul.”—Fɔs Lɛta Fɔ Kɔrint 10:​21.

20. Aw Jiova kin ɛp wi ivin we wi mek mistek?

²⁰ Ken, Sɔlɔmɔn, ɛn di Izrɛlayt dɛn ɔl bin gɛt di chans fɔ ripɛnt ɛn chenj di we aw dɛn bin de biev. (Di Apɔsul Dɛn Wok [Akt] 3:​19) Dis sho klia wan se Jiova nɔ kwik fɔ taya pan pipul dɛn jɔs bikɔs dɛn de mek mistek. Tink bɔt aw i fɔgiv Erɔn. Tide, Jiova de wɔn wi fɔ protɛkt wi fɔ mek wi nɔ du wetin bad. I kin yuz di Baybul, wi buk ɛn magazin dɛn, ɛn ivin wi kɔmpin Kristian dɛn. We wi pe atɛnshɔn pan di wɔnin dɛn we Jiova de gi wi, dat go mek wi shɔ se i go sɔri fɔ wi.

21. Wetin wi fɔ du if sɔntin apin to wi we de sho if wi de biɛn Jiova ɔ wi nɔ de biɛn am?

²¹ Jiova gɛt rizin we mek i lɛk wi pan ɔl we wi nɔ fit fɔ mek i lɛk wi. (Sɛkɛn Lɛta Fɔ Kɔrint 6:​1) Wetin na da rizin de? I de gi wi chans fɔ “lɛf dɛn bad tin we wi want du na di wɔl, ɛn lan fɔ kɔntrol wisɛf.” (Rid Taytɔs 2:​11-14.) Insay dis wɔl we wi de, tin dɛn go de mit wi we go sho if wi de biɛn Jiova ɔ wi nɔ de biɛn am. Mekɔp yu maynd fɔ kɔntinyu fɔ de na Jiova in say, ɛn mɛmba se na ‘Jiova we na yu Gɔd, na in yu fɔ wɔship” ɛn “na in yu fɔ go nia.’—Dyutɔrɔnɔmi 10:​20, NW.