1. Wetin wi ɔl want mek ɔda pipul dɛn du to wi?

AW YU go fil we pɔsin we yu sabi ɛn gɛt rɛspɛkt fɔ fɔgɛt yu nem ɔ, wetin at pas ɔl na we i nɔ ivin mɛmba yu? Dis kin rili mek yu fil bad. Wetin mek? Na bikɔs wi ɔl want fɔ mek pipul dɛn gladi fɔ wi. Bɔt wi nɔ jɔs want dɛn fɔ sabi wi nem. Wi want dɛn fɔ no di kayn pɔsin we wi bi ɛn fɔ gladi fɔ wetin wi dɔn du.—Di Nɔmba Dɛm 11:​16; Job 31:​6.

2, 3. Wetin kin apin we wi want ɔda pipul dɛn fɔ gladi fɔ wi? (Luk di pikchɔ nia dis atikul in taytul.)

² Bɔt if wi nɔ tek tɛm, dis kayn we aw wi kin fil fɔ lɛ pipul dɛn gladi fɔ wi kin bi prɔblɛm. Di pipul dɛn we de na Setan in wɔl go mek wi want fɔ lɛ bɔku pipul dɛn sabi wi ɛn fɔ lɛ wi fil se wi impɔtant. If dat apin, wi nɔ de gi wi Papa, Jiova Gɔd, di prez ɛn wɔship we i fit fɔ gɛt.—Rɛvɛleshɔn 4:​11, NW.

³ Insay Jizɔs in tɛm, sɔm pan di bigman dɛn pan Gɔd  biznɛs bin gɛt di rɔŋ we fɔ lɛ pipul dɛn no dɛn ɛn gladi fɔ dɛn. Jizɔs bin wɔn in disaypul dɛn se: “Una fɔ tek tɛm wit dɛn Ju Lɔ ticha ya. Dɛn na pipul we lɛk fɔ wɛr dɛn lɔng gawn fɔ mek ɔlman no se dɛn na bigman ɛn dɛn lɛk fɔ mek pipul tɛl dɛn adu na dɛn ples we plɛnti pipul gɛda. Wɛn dɛn go na di Ju mitin os, dɛn kin lɛk fɔ sidɔm na dɛn bɛnch we de bifo ɛn wɛn dɛn go pati, dɛn kin lɛk fɔ sidɔm na dɛn ples we dɛn bigman de sidɔm.” I bin kɔntinyu fɔ tɔk se: “Gɔd go pɔnish dɛn pas aw i go pɔnish ɔda pipul.” (Lyuk 20:​46, 47) Bɔt Jizɔs bin prez wan po uman we in man bin dɔn day fɔ we i put tu smɔl kɔyn dɛn insay di mɔni bɔks, pan ɔl we sɔntɛm no ɔda pɔsin nɔ bin notis wetin dis uman bin du. (Lyuk 21:​1-4) Dis sho klia wan se di we aw Jizɔs de si pɔsin rili difrɛn frɔm di we aw ɔda pipul dɛn de si am. Dis atikul go ɛp wi fɔ no di rayt we aw wi fɔ si pɔsin, we min se wi fɔ si di pɔsin di we aw Jiova Gɔd want wi fɔ si am.

4. Uskayn we yu tink se na di bɛst we fɔ lɛ dɛn no yu? Wetin mek?

⁴ Wetin na di bɛst we fɔ lɛ pipul dɛn no wi? Nɔto di we aw plɛnti pipul dɛn de tray fɔ mek dɛn no dɛn, bay we dɛn de lan bɔku buk, we dɛn bi big biznɛsman, ɔ we bɔku pipul dɛn sabi dɛn pan di we aw dɛn kin de ɛnjɔy dɛnsɛf. Pɔl bin ɛksplen wetin dis min bay we i tɔk se: “We una dɔn no Gɔd, ɔ a fɔ se, Gɔd dɔn no una; wetin mek una want tɔn bak go bi slev to di spirit dɛn we nɔ gɛt pawa ɛn we nɔ min natin? Wetin mek una want go bi dɛn slev bak?” (Lɛta Fɔ Galeshya 4:​9) Na big big ɔnɔ wi gɛt fɔ mek Gɔd, we gɛt di rayt fɔ rul di wan ol wɔl ‘no wi’! Jiova no udat wi bi, i lɛk wi, ɛn i want wi fɔ kam nia am. Jiova mek wi so dat wi go bi in padi dɛn.—Ɛkliziastis 12:​13, 14.

5. Wetin wi fɔ du fɔ mek Gɔd no wi?

⁵ Wi no se Mozis na bin Jiova in padi. We i bin de beg Jiova in bin tɔk se: “Duya, if fɔ tru, tru se yu lɛk mi, tɛl mi wetin yu mekɔp fɔ lɛ a go de sav yu ɛn pliz yu.” Jiova tɛl am se: “A go du wetin yu se bikɔs a no yu gud gud fashin ɛn a lɛk yu.” (Ɛksodɔs 33:​12-17) Jiova kin no ɔltin bɔt wi wan bay wan. Bɔt wetin wi go du fɔ bi Jiova in padi? Wi fɔ lɛk am ɛn gi wi layf to am.—Rid Fɔs Lɛta Fɔ Kɔrint 8:​3.

6, 7. Wetin go mek wi lɔs wi padi biznɛs wit Jiova?

⁶ Wi nid fɔ kɔntinyu fɔ gɛt tayt padi biznɛs wit wi Papa we de na ɛvin. Jɔs lɛk di fɔstɛm Kristian dɛn we bin de Galeshya, wi fɔ stɔp fɔ bi slev to dɛn tin dɛn “we nɔ min natin” na dis wɔl, lɛk di tin dɛn we di wɔl de gi we go mek wi go bifo na layf ɛn we go mek bɔku pipul dɛn no wi. (Lɛta Fɔ Galeshya 4:​9) Di Kristian dɛn we bin de na Galeshya bin dɔn kam fɔ no Gɔd, ɛn Gɔd bin dɔn no dɛn. Bɔt Pɔl bin tɔk se dɛn sem brɔda dɛn ya bin de “tɔn bak” fɔ bi slev to tin dɛn we nɔ min natin. So Pɔl bin de aks dɛn se: ‘Wetin mek una dɔn tɔn bak ɛn bi slev to di sem fulish tin dɛn ɛn tin dɛn we nɔ min natin?’

⁷ Fɔ se dis sem tin kin apin to wi? Yɛs, i kin apin. Jɔs lɛk Pɔl, we wi kam na di  trut, i go bi se wi dɔn lɛf sɔm tin dɛn we wi bin de du we mek bɔku pipul dɛn no wi ɛn we bin de mek wi go bifo na Setan in wɔl. (Rid Lɛta Fɔ Filipay 3:​7, 8.) I go bi se yu lɛf skɔlaship, gud wok, ɔ di chans fɔ lɛ yu mek bɔku mɔni. Ɔ sɔntɛm yu fɔ dɔn bi pɔsin we bɔku pipul dɛn no ɔ yu fɔ dɔn bi jɛntriman bikɔs yu sabi myuzik ɔ yu sabi du spɔt. Bɔt yu lɛf ɔl dɛn chans dɛn de. (Di Ibru Pipul Dɛn 11:​24-27) I nɔ go rili mek sɛns if wi rigrɛt fɔ we wi disayd fɔ du di rayt tin ɛn fɔ fil se wi layf fɔ dɔn bɛtɛ if wi bin dɔn rɔnata dɛn tin dɛn de! Dɛn kayn tin dɛn de kin mek wi go bak to di tin dɛn na di wɔl. Na dɛn tin dɛn de di Baybul kɔl tin dɛn “we nɔ gɛt pawa ɛn we nɔ min natin?” *—Luk di futnot.

8. Wetin go mek wi kɔntinyu fɔ mek Jiova no wi?

⁸ We wi de du di tin dɛn we go mek Jiova no wi, aw dat go mek wi nɔ want di pipul dɛn we de na di wɔl fɔ no wi? Wi nid fɔ pe atɛnshɔn pan tu impɔtant tin dɛn. Fɔs, Jiova kin no ɔltɛm di wan dɛn we de sav am fetful wan. (Rid Di Ibru Pipul Dɛn 6:​10; 11:​6) Jiova de si ɔl in fetful savant dɛn as pipul dɛn we rili valyu to am, so Jiova nɔ go fɔgɛt ɛni wan pan dɛn. Jiova no di wan dɛn we na in yon ɔltɛm. (Sɛkɔn Lɛta to Timoti 2:​19, NW) Jiova “sabi wetin di wan dɛn we de waka tret de du” ɛn i no aw fɔ sev dɛn.—Sam 1:​6, NW; Pita in Sɛkɔn Lɛta 2:​9, NW.

9. Gi ɛgzampul dɛn fɔ sho aw Jiova bin sho se i lɛk in pipul dɛn.

⁹ Sɔntɛnde, Jiova kin yuz spɛshal we fɔ sho ɔda pipul dɛn se i gladi fɔ in pipul dɛn. (Sɛkɛn Kronikul 20:​20, 29) Fɔ ɛgzampul, tink bɔt di we aw Jiova bin sev in pipul dɛn na di Rɛd Si di tɛm we Fɛro in pawaful sojaman dɛn bin de rɔnata dɛn. (Ɛksodɔs 14:​21-30; Sam 106:​9-11) Dis tin we bin apin bin mek di pipul dɛn kɔle ɛn ivin afta 40 ia, pipul dɛn we bin de na da pat de na di wɔl bin stil de tɔk bɔt wetin bin apin. (Jɔshwa 2:​9-11) I rili fayn fɔ lɛ wi de mɛmba aw Jiova bin lɛk in pipul dɛn ɛn aw i bin yuz in pawa fɔ sev dɛn trade, bikɔs i nɔ go te igen Gɔg we de na Megɔg go atak wi. (Izikɛl 38:​8-12) Da tɛm de, wi go rili gladi fɔ we wi mek lɛ Gɔd gladi fɔ wi nɔto di pipul dɛn na di wɔl.

10. Us ɔda tin wi fɔ pe atɛnshɔn pan?

¹⁰ Di sɛkɔn tin we wi fɔ pe atɛnshɔn to na dat Jiova kin yuz we dɛn we wi nɔ kin ɛva tink bɔt fɔ sho se i sabi wi. Jiova nɔ de blɛs di wan dɛn we de du gud jɔs fɔ lɛ ɔda pipul dɛn prez dɛn. Wetin mek? Na bikɔs Jizɔs bin tɔk se we ɔda pipul dɛn prez dɛn, dat na dɛn pe. (Rid Matyu 6:​1-5.) Bɔt Jiova de si “sikrit wan” wetin di wan dɛn we de du  gud, bɔt we ɔda pipul dɛn nɔ de prez dɛn, de du. I de notis wetin dɛn de du ɛn i go pe dɛn, ɔ blɛs dɛn fɔ dat. Ɛn sɔntɛnde, Jiova kin blɛs in savant dɛn di kayn we we dɛn nɔ de tink se i go blɛs dɛn. Lɛ wi tɔk bɔt sɔm ɛgzampul dɛn.

11. Aw Jiova bin mek ɔda pipul dɛn no bɔt Meri?

¹¹ Jiova bin pik wan yɔŋ uman we bin ɔmbul we nem Meri fɔ bi Jizɔs in mama. Meri bin de na wan smɔl tɔŋ we nem Nazarɛt, dis tɔŋ ya bin de fawe frɔm Jerusɛlɛm usay di fayn fayn tɛmpul de. (Rid Lyuk 1:​26-33.) Wetin mek Jiova bin pik Meri? Enjɛl Gebrɛl bin tɛl Meri se “Gɔd dɔn blɛs yu.” Wi go si klia wan se Meri bin rili gɛt tayt padi biznɛs wit Jiova frɔm wetin i bin leta tɛl wan in fambul we nem Ilizabɛt. (Lyuk 1:​46-55) Jiova bin dɔn de wach Meri, ɛn bikɔs Meri bin fetful to am, dat bin mek i blɛs am di we we i nɔ bin de tink.

12, 13. Aw dɛn bin ɔnɔ Jizɔs di tɛm we dɛn bɔn am ɛn di tɛm we Meri bin kɛr am go na di tɛmpul afta 40 dez?

¹² We dɛn bɔn Jizɔs, udat Jiova bin tɛl se dɛn dɔn bɔn Jizɔs? I nɔ tɛl di bigman dɛn ɔ di rula dɛn na Jerusɛlɛm ɛn Bɛtliɛm. Bifo dat, i bin sɛn enjɛl dɛn fɔ go tɛl di shɛpad dɛn we bin de kia fɔ dɛn ship na wan fil nia Bɛtliɛm. (Lyuk 2:​8-14) Dɔn, dɛn shɛpad dɛn ya bin go fɛn di yɔŋ bebi. (Lyuk 2:​15-17) I go mɔs bi se Meri ɛn Josɛf bin sɔprayz fɔ si di kayn we we dɛn bin ɔnɔ Jizɔs. Di we aw Jiova de du tin difrɛn frɔm di kayn we aw Setan de du tin. We Setan bin sɛn pipul dɛn we de stɔdi di sta dɛn fɔ go fɛn Jizɔs ɛn in mama ɛn papa, ɔlman na Jerusɛlɛm bin kam no se dɛn dɔn bɔn Jizɔs, ɛn dis bin mek bɔku prɔblɛm dɛn bi. (Matyu 2:​3) Leta, dat bin mek dɛn kil bɔku bɔku inosɛnt pikin dɛn.—Matyu 2:​16.

¹³ Di Lɔ we Jiova bin gi di Izrɛlayt dɛn bin se we uman bɔn bɔypikin, afta 40 dez, di mama fɔ mek sakrifays to  Jiova. So Meri bin travul siks mayl frɔm Bɛtliɛm fɔ go na Jerusɛlɛm wit Josɛf ɛn Jizɔs. (Lyuk 2:​22-24) I go bi se we dɛn bin de go, Meri bin de wɔnda if di prist go du spɛshal sɔntin fɔ ɔnɔ Jizɔs. Dɛn bin ɔnɔ Jizɔs, bɔt na di kayn we aw Meri nɔ bin de ɛva tink. Fɔ anawns se na Jizɔs go bi di Mɛsaya ɔ Krays, Jiova bin pik Simiɔn, we na man we bin “de waka tret ɛn du ɔl wetin Gɔd want,” ɛn wan uman prɔfɛt we nem Ana. Ana na bin wan 84 ia ol uman we in man bin dɔn day.—Lyuk 2:​25-38.

14. Aw Jiova bin blɛs Meri?

¹⁴ Yu tink se Jiova bin kɔntinyu fɔ mek ɔda pipul dɛn no bɔt Meri fɔ we i bin mɛn Jizɔs ɛn kia fɔ am? Yɛs, i bin du dat. Gɔd bin mek shɔ se dɛn rayt sɔm pan di tin dɛn we Meri bin tɔk ɛn du insay di Baybul. I tan lɛk se Meri nɔ bin ebul fɔ travul wit Jizɔs di tɛm we i bin de prich fɔ tri ɛn af ia. Sɔntɛm na bikɔs in man bin dɔn day, so i bin gɛt fɔ de na Nazarɛt. So Meri bin mis bɔku fayn fayn tin dɛn we ɔda pipul dɛn bin ɛnjɔy wit Jizɔs. Bɔt i bin de wit Jizɔs di tɛm we i bin de day. (Jɔn 19:​26) Leta, Meri bin de wit Jizɔs in disaypul dɛn na Jerusɛlɛm bifo dɛn gɛt di oli spirit insay di ia Pɛntikɔs. (Di Apɔsul Dɛn Wok [Akt] 1:​13, 14) I go mɔs bi se dɛn bin anɔynt Meri wit di ɔda disaypul dɛn togɛda. If na so i bi, dat min se Meri gɛt di chans fɔ de wit Jizɔs sote go na ɛvin. Dis na wɔndaful blɛsin fɔ am, bikɔs i sav Gɔd fetful wan!

15. Aw Jiova bin sho se i gladi fɔ Jizɔs di tɛm we i bin de na di wɔl?

¹⁵ Jizɔs nɔ bin want di bigman dɛn pan Gɔd biznɛs ɔ pan pɔlitiks fɔ ɔnɔ am. Bɔt tri tɛm, Jiova bin tɔk frɔm ɛvin ɛn mek in Pikin no se i lɛk am. Dat go dɔn rili ɛnkɔrej Jizɔs. Jɔs afta we Jizɔs bin baptayz na di Jɔdan Riva, Jiova bin tɔk se: “Dis na mi Pikin we a lɛk, a gladi fɔ am.” (Matyu 3:​17) I go mɔs bi se na  Jizɔs ɛn Jɔn we bin de baptayz pipul dɛn nɔmɔ bin yɛri dɛn wɔd dɛn ya. Dɔn lɛk wan ia so bifo Jizɔs day, tri pan in apɔsul dɛn bin yɛri we Jiova tɔk bɔt Jizɔs se: “Dis na mi Pikin we a lɛk bad, a gladi fɔ am, una lisin wetin i de tɛl una.” (Matyu 17:​5) Dɔn, jɔs sɔm dez bifo Jizɔs day, Jiova bin tɔk bak to in Pikin frɔm ɛvin.—Jɔn 12:​28.

16, 17. Aw Jiova bin ɔnɔ Jizɔs di kayn we we i nɔ bin de tink se i go bi?

¹⁶ Jizɔs bin no se pipul dɛn go kɔl am pɔsin we de tɔk bad bɔt Gɔd ɛn i go day shemful day. Bɔt pan ɔl dat, i bin pre fɔ lɛ wetin Gɔd want bi nɔto wetin in want. (Matyu 26:​39, 42) “I bia di tɛm we dɛn bin nel am na di stik” bikɔs i bin want lɛ in Papa no am, nɔto di pipul dɛn na di wɔl. (Di Ibru Pipul Dɛn 12:​2, NW) Aw Jiova bin mek lɛ ɔda pipul dɛn no se i gladi fɔ Jizɔs?

¹⁷ We Jizɔs bin de na di wɔl, i bin pre fɔ mek i gɛt di ɔnɔ we i bin gɛt di tɛm we i bin de na ɛvin wit in Papa. (Jɔn 17:​5) Di Baybul nɔ tɔk ɛnisay se Jizɔs bin op fɔ gɛt wetin pas dat. I nɔ bin de tink se i fɔ gɛt spɛshal blɛsin fɔ we i bin de du wetin Jiova want na di wɔl. Bɔt wetin Jiova bin du? I bin ɔnɔ Jizɔs di kayn we we i nɔ bin de tink se i go bi. We Jiova bin gi Jizɔs layf bak, Jiova bin mek “i sidɔm na ples we sho se nain impɔtant pas ɔl” na ɛvin. Jiova bin gi Jizɔs spirit bɔdi we nɔ de ɛva day; tin we no ɔda pɔsin nɔ ɛva gɛt bifo dis tɛm! * (Luk di futnot.) (Lɛta Fɔ Filipay 2:​9; Fɔs Lɛta To Timoti 6:​16) Na wɔndaful we Jiova blɛs Jizɔs fɔ we i sav am fetful wan!

18. Wi want mek Jiova gladi fɔ wi nɔto di pipul dɛn na di wɔl. Wetin go ɛp wi fɔ du dat?

¹⁸ Wi want mek Jiova gladi fɔ wi, nɔto di pipul dɛn na di wɔl. Wetin go ɛp wi fɔ du dat? Wi fɔ de mɛmba se ɔltɛm Jiova no in savant dɛn we de sav am fetful wan, ɛn i de blɛs dɛn di kayn we we dɛn nɔ de tink se i go bi. Wi nɔ go ebul fɔ imajin aw Jiova go blɛs wi tumara bambay! Bɔt as wi de bia di prɔblɛm dɛn na dis wikɛd wɔl te da tɛm de rich, wi fɔ de mɛmba se dis wɔl go dɔn jisnɔ. So ɛni sabi we di pipul dɛn na dis wɔl sabi wi go dɔn jisnɔ. (Jɔn In Fɔs Lɛta 2:​17) Bɔt wi Papa we lɛk wi we na Jiova nɔ go ɛva fɔgɛt wi wok ɛn di lɛk we wi lɛk am bikɔs i de du wetin rayt ɔltɛm. (Di Ibru Pipul Dɛn 6:​10) I go mɔs sho se i gladi fɔ wi ɛn sɔntɛm i go du am di kayn we we wi nɔ bin de ɛva tink se i go du am!