1, 2. (a) Wetin mek plɛnti pipul dɛn sabi di wɔd dɛn we de na Ditarɔnɔmi 6:​4? (b) Wetin mek Mozis bin tɔk dɛn wɔd dɛn de?

FƆ LƆNG tɛm naw di Ju pipul dɛn dɔn de yuz di wɔd dɛn we de na Ditarɔnɔmi 6:​4 insay wan spɛshal prea we dɛn de pre. Dɛn kɔl dis prea Shima we na di fɔs wɔd we de na di Ibru vas. Bɔku Ju pipul dɛn de rid dis prea ɛnide na mɔnin ɛn ivintɛm fɔ sho se na Gɔd wangren dɛn go wɔship sote go.

² Dɛn wɔd dɛn de, de pan di las tɔk we Mozis bin tɛl di Izrɛlayt dɛn. Insay di ia 1473 bifo Krays kam, di Izrɛlayt dɛn bin de na Moab de rɛdi fɔ krɔs di Jɔdan Riva ɛn go kapchɔ di land we Jiova bin prɔmis dɛn. (Ditarɔnɔmi 6:​1) Mozis bin dɔn de lid di pipul dɛn fɔ 40 ia ɛn i want mek dɛn gɛt kɔrej so dat dɛn go ebul fɔ dil wit di prɔblɛm dɛn we go mit dɛn tumara bambay. Dɛn bin nid fɔ abop pan dɛn Gɔd we na Jiova ɛn de fetful wan to am. So di las tin we Mozis bin tɔk bin ɛnkɔrej dɛn fɔ du dat. Afta we Mozis bin dɔn tɔk bɔt di tɛn kɔmandmɛnt dɛn ɛn ɔda lɔ dɛn we Jiova bin dɔn  gi, Mozis bin mɛmba di pipul dɛn bɔt di pawaful wɔd dɛn we de na Ditarɔnɔmi 6:​4, 5. (Rid.)

3. Us kwɛstyɔn dɛn we wi go tɔk bɔt insay dis atikul?

³ Di Izrɛlayt dɛn bin no se Jiova we na dɛn Gɔd na in “waŋren.” Di Izrɛlayt dɛn we bin fetful bin de wɔship wangren Gɔd, dat na dɛn gret granpa dɛn Gɔd. So wetin mek Mozis bin mɛmba dɛn se Jiova we na dɛn Gɔd na in “waŋren”? Aw dis tin we Mozis mɛmba di Isrɛlayt dɛn gɛt sɔntin fɔ du wit di lɔ we se wi fɔ lɛk Gɔd wit ɔl wi at, ɔl wi sol, ɛn ɔl wi trɛnk? Ɛn aw di wɔd dɛn we de na Ditarɔnɔmi 6:​4, 5 go ɛp wi tide?

4, 5. (a) Wetin di Baybul min we i se Jiova na in “waŋren”? (b) Aw Jiova difrɛn frɔm di gɔd dɛn na di ɔda neshɔn dɛn?

⁴ I Spɛshal. We di Baybul se Jiova na in “waŋren,” dat min se Jiova spɛshal, nɔbɔdi nɔ ikwal to am ɔ tan lɛk am. Wetin mek Mozis bin yuz dɛn wɔd de? I nɔ bin du dat fɔ pruv se di triniti rɔng. Na Jiova mek ɔltin we de na ɛvin ɛn na dis wɔl ɛn na in de rul di wan ol wɔl. Na in na di wangren tru Gɔd ɛn no ɔda gɔd nɔ de we tan lɛk am. (Sɛkɛn Samiɛl 7:​22) So wetin Mozis bin tɔk de mɛmba di Izrɛlayt dɛn se na Jiova nɔmɔ dɛn fɔ wɔship. Dɛn nɔ fɔ falamakata di pipul dɛn we bin de arawd dɛn we de wɔship lay lay gɔd dɛn. Dɛn pipul dɛn de biliv se dɛn gɔd dɛn ebul fɔ kɔntrol tin dɛn lɛk di san, ren, mun, ɛn ɔda tin dɛn.

⁵ Fɔ ɛgzampul, di Ijipshian dɛn bin de wɔship di gɔd fɔ di san we nem Ra, di gɔd fɔ di skay we nem Nɔt, di gɔd fɔ di wɔl we nem Jɛb, di gɔd fɔ di Riva Nayl we nem Api, ɛn plɛnti animal dɛn. Jiova bin sho se i gɛt pawa pas ɔl dɛn lay lay gɔd dɛn ya we i bin briŋ kam tɛn bad bad tin dɛn pan di Ijipshian dɛn. Di men gɔd we di Kenanayt dɛn bin de wɔship nem Beal, dat na di lay lay gɔd we dɛn biliv se mek ɔltin gɛt layf. Dɛn bin biliv bak se na in na di gɔd fɔ di skay, di ren, ɛn big big briz. Na bɔku ples dɛn, pipul dɛn bin abop pa Beal fɔ protɛkt dɛn. (Di Nɔmba Dɛm 25:​3) So di Izrɛlayt dɛn fɔ mɛmba se Jiova we na di tru Gɔd spɛshal. Jiova na in “waŋren.”—Ditarɔnɔmi 4:​35, 39.

6, 7. Wetin na di ɔda minin fɔ “waŋren”? Aw Jiova dɔn sho se na in “waŋren”?

⁶ I Nɔ De Chenj ɛn I Nɔ De Kɔmɔt Biɛn In Pipul Dɛn. Di wɔd “waŋren” insay wetin di Baybul tɔk we i se na Jiova na di “waŋren PAPA GƆD,” min bak se di tin dɛn we Jiova want fɔ du ɛn wetin i dɔn prɔmis na tin dɛn we wi fɔ abop pan ɔltɛm. Jiova nɔ de se wan tin dɔn i min ɔda tin ɛn i nɔ de chenj. Ɔltɛm i fetful, i nɔ de chenj, i de tɔk tru, ɛn i nɔ de kɔmɔt biɛn in pipul dɛn.  Fɔ ɛgzampul, i bin prɔmis Ebraam se in pikin dɛn go de na di land we i bin dɔn prɔmis dɛn. Ɛn Jiova bin du bɔku mirekul dɛn so dat i go du wetin i bin dɔn se. Ivin afta 430 ia we Jiova bin dɔn mek dis prɔmis, wetin i bin prɔmis nɔ bin chenj.—Jɛnɛsis 12:​1, 2, 7; Ɛksodɔs 12:​40, 41.

⁷ Afta lɔng lɔng tɛm, Jiova bin kɔl di Izrɛlayt dɛn in witnɛs dɛn ɛn i bin tɛl dɛn se: “Mi na di sem Wan. No ɔda Gɔd nɔ bin de bifo mi, ɛn no ɔda wan nɔ go de afta mi.” Jiova bin mek am klia se wetin i want nɔ de ɛva chenj we i bin tɔk bak se: “Mi na di sem Wan, a nɔ de chenj.” (Ayzaya 43:​10, 13, NW; 44:​6, NW; 48:​12, NW) Na big big ɔnɔ di Izrɛlayt dɛn bin gɛt fɔ sav di Gɔd we nɔ de chenj ɛn we nɔ de ɛva kɔmɔt biɛn pɔsin! Tide, wisɛf gɛt da sem ɔnɔ de.—Malakay 3:​6; Jems 1:​17.

8, 9. (a) Wetin Jiova want mek in pipul dɛn we de wɔship am du? (b) Aw Jizɔs bin ɛp wi fɔ ɔndastand se wetin Mozis bin tɔk, rili impɔtant?

⁸ Mozis bin mɛmba di Izrɛlayt dɛn se di lɛk we Gɔd lɛk dɛn ɛn di we aw i de kia fɔ dɛn, nɔ go ɛva chenj. So Jiova want lɛ dɛn wɔship in wangren ɛn dɛn fɔ lɛk am wit ɔl dɛn at, ɔl dɛn sol, ɛn ɔl dɛn trɛnk. Mama ɛn papa dɛn fɔ tich dɛn pikin dɛn bɔt Jiova ɛnitɛm we dɛn gɛt chans so dat na Jiova nɔmɔ dɛn pikin dɛnsɛf go wɔship.—Ditarɔnɔmi 6:​6-9.

⁹ Jiova nɔ de ɛva chenj di tin dɛn we i want fɔ du, so i nɔ go ɛva chenj di tin dɛn we i want di pipul dɛn we de wɔship am fɔ du. If wi want fɔ mek Jiova gladi fɔ wi we wi de wɔship am, na in nɔmɔ wi fɔ wɔship ɛn wi fɔ lɛk am wit ɔl wi at, maynd, ɛn trɛnk. Jizɔs bin se dis lɔ impɔtant pas ɔl. (Rid Mak 12:​28-31.) Lɛ wi lan bɔt aw wi go sho se wi biliv se Jiova we na wi Gɔd, na in “waŋren.”

10, 11. (a) Uskayn we wi go sho se na Jiova nɔmɔ wi de wɔship? (b) Aw di yɔŋ Ibru man dɛn we bin de na Babilɔn sho se na Jiova nɔmɔ dɛn de wɔship?

¹⁰ Na Jiova wangren na wi Gɔd. Wi go sho dat bay we na in nɔmɔ wi de wɔship. Wi nɔ fɔ wɔship ɔda gɔd dɛn ɔ miks di wɔship we wi de wɔship Jiova wit lay lay tin dɛn. In nɔto jɔs gɔd we pas ɔl di ɔda gɔd dɛn ɔ we gɛt pawa pas dɛn ɔl. In na di tru Gɔd. Ɛn na in nɔmɔ wi fɔ wɔship.—Rid Rɛvɛleshɔn 4:​11.

¹¹ Insay di Baybul buk we nem Daniɛl, wi rid bɔt yɔŋ Ibru man dɛn lɛk Ananaya, Mishɛl, Azaraya, ɛn Daniɛl. Dɛn bin sho Jiova se na in nɔmɔ dɛn de wɔship we dɛn nɔ bin gri fɔ it di it dɛn we Gɔd in lɔ bin se nɔ fayn fɔ it. Ɛn Daniɛl in tri padi dɛn nɔ bin gri fɔ butu to di aydɔl we Nɛbukanɛza bin mek wit gold. To dɛn, na Jiova kam fɔs. Dɛn bin de biɛn Jiova ɔltɛm.—Daniɛl 1:​1–3:​30.

12. Wetin wi fɔ tek tɛm nɔ fɔ du we wi de wɔship Jiova?

¹² Na Jiova wi fɔ put fɔs na wi layf. If wi want fɔ wɔship in wangren, wi fɔ tek tɛm mek ɔda tin dɛn nɔ tek di ples we Jiova gɛt na wi layf. Wetin na dɛn tin dɛn de? Insay di Tɛn Kɔmandmɛnt,  Jiova bin se in pipul dɛn nɔ fɔ wɔship ɔda gɔd dɛn. Dɛn nɔ fɔ put an pan ɛnitin we gɛt fɔ du wit aydɔl wɔship. (Ditarɔnɔmi 5:​6-10) Tide, bɔku we dɛn de we pipul dɛn kin wɔship aydɔl, ɛn sɔm pan dɛn nɔ kin izi fɔ no. Bɔt Jiova nɔ chenj di tin dɛn we i want wi fɔ du. Stil, na Jiova na di “waŋren” Gɔd. Lɛ wi si aw wi go ebul fɔ avɔyd aydɔl wɔship tide.

13. Wetin na sɔntin dɛn we go mek wi nɔ lɛk Jiova igɛn?

¹³ Na Lɛta Fɔ Kɔlɔse 3:​5 (rid) wi rid bɔt tin dɛn we go pwɛl wi tayt padi biznɛs wit Jiova. Wi si se we pɔsin want ɔltin fɔ insɛf, dat gɛt sɔntin fɔ du wit aydɔl wɔship. Aw dat kin bi? We wi rili want sɔntin, lɛk fɔ gɛt bɔku mɔni ɔ fɔ liv pɔsh layf, dat kin kɔntrol wi layf lɛk gɔd we gɛt pawa. Ɔl di sin dɛn we dɛn tɔk bɔt na Lɛta Fɔ Kɔlɔse 3:​5 gɛt sɔntin fɔ du wit we pɔsin want ɔltin fɔ insɛf, ɛn dat na wan we fɔ wɔship aydɔl. So if wi rili want fɔ gɛt dɛn tin dɛn ya, wi go bigin fɔ lɛk dɛn pas aw wi lɛk Gɔd. Dɔn, Jiova nɔ go bi wangren Gɔd to wi igen. So wi nɔ go ɛva want dat fɔ apin to wi.

14. Us wɔnin we di apɔsul Jɔn bin gi wi we i kam pan di we aw wi fɔ lɛk Gɔd?

¹⁴ Di apɔsul Jɔn bin ɛp wi fɔ ɔndastand sɔntin we fiba dis wan. I bin wɔn wi se if ɛnibɔdi lɛk di tin dɛn we de na dis wɔl dat na “di bad we de na pɔsin in at we de mek i put at pan sɔm tin dɛn, dɛn tin we pɔsin kin want bad bad wɛn i si dɛn, ɛn ɔl dɛn tin na di wɔl we de mek pɔsin prawd,” dat de sho se di pɔsin “nɔ lɛk Gɔd we na di Papa.” (Jɔn In Fɔs Lɛta 2:​15, 16) So wi nid fɔ de chɛk wisɛf ɔltɛm fɔ si if wi lɛk di wɔl. Wi go kam fɔ si se wi dɔn bigin fɔ de lɛk ɛnjɔymɛnt, pipul dɛn, ɛn di we aw pipul dɛn na di wɔl de drɛs. Ɔ wi go want fɔ gɛt “big tin” dɛn we wi lan bɔku buk. (Jɛrimaya 45:​4, 5) Di nyu wɔl nɔ de fa igen. So wi nid fɔ mɛmba di pawaful wɔd dɛn we Mozis bin tɔk! If wi ɔndastand ɛn rili biliv se Jiova we na wi Gɔd na in “waŋren,” na in nɔmɔ wi go wɔship ɛn wi go sav am di we aw i want.—Di Ibru Pipul Dɛn 12:​28, 29.

15. Wetin mek Pɔl bin mɛmba Kristian dɛn se Jiova na in wangren?

¹⁵ We di Baybul se Jiova na in “waŋren” dat de ɛp wi fɔ ɔndastand se Jiova want mek ɔl in savant dɛn gɛt wanwɔd ɛn du di sem tin dɛn we i want dɛn fɔ du. Insay di fɔstɛm Kristian dɛn tɛm, di kɔngrigeshɔn bin gɛt Ju pipul dɛn, Grik pipul dɛn, Roman pipul dɛn, ɛn pipul dɛn we kɔmɔt ɔda neshɔn dɛn. Dɛn bin gɛt difrɛn we dɛn aw dɛn mɛn, difrɛn we fɔ du tin, ɛn difrɛn tin dɛn we dɛn want fɔ du. Dat bin mek i nɔ bin izi fɔ lɛ sɔm pan dɛn gri wit di nyu we fɔ wɔship ɛn lɛf di tin dɛn we dɛn bin de  du. So Pɔl bin nid fɔ mɛmba dɛn se na wangren Gɔd Kristian dɛn gɛt, dat na Jiova.—Rid Fɔs Lɛta Fɔ Kɔrint 8:​5, 6.

16, 17. (a) Us wɔd dɛn we Ayzaya bin tɔk we dɔn de apin tide? Wetin dis dɔn ɛp wi fɔ gɛt? (b) Wetin go pwɛl di wanwɔd we wi gɛt?

¹⁶ Wetin yu go se bɔt di Kristian kɔngrigeshɔn tide? Di prɔfɛt Ayzaya bin se “di tɛm go kam” we pipul dɛn na ɔl di neshɔn dɛn go kam togɛda fɔ wɔship Jiova. Dɛn go tɔk se: “I go tich wi in we so wisɛf go waka aw i want wi fɔ waka.” (Ayzaya 2:​2, 3) Wi gladi fɔ si se di wɔd dɛn we Ayzaya bin tɔk dɔn de apin tide! Wi brɔda ɛn sista dɛn kɔmɔt difrɛn say dɛn, dɛn de tɔk difrɛn langwej dɛn, ɛn dɛn gɛt difrɛn kɔlchɔ dɛn. Bɔt wi gɛt wanwɔd we wi de wɔship Jiova. Stil bikɔs wi difrɛn, sɔntɛnde wi kin gɛt prɔblɛm dɛn.

¹⁷ Fɔ ɛgzampul, aw yu kin fil bɔt di brɔda ɛn sista dɛn we gɛt difrɛn kɔlchɔ? Dɛn langwej we dɛn de tɔk, di we aw dɛn de drɛs, di we aw dɛn de biev, ɛn dɛn it dɛn, kin rili difrɛn frɔm yu yon. Yu kin avɔyd dɛn ɛn jɔs spɛn tɛm wit di wan dɛn we una ɔl de du tin di sem we? Na di say we yu de, aw yu kin  fil bɔt di ɛlda dɛn we yu ol pas ɔ di wan dɛn we gɛt difrɛn kɔlɔ ɔ difrɛn kɔlchɔ? If wi nɔ tek tɛm wi go alaw di difrɛn we aw wi de si tin dɛn fɔ afɛkt wi ɛn pwɛl di wanwɔd we wi gɛt.

18, 19. (a) Us advays de na Lɛta Fɔ Ɛfisɔs 4:​1-3? (b) Wetin wi go du fɔ mek di kɔngrigeshɔn kɔntinyu fɔ gɛt wanwɔd?

¹⁸ Aw wi go ebul fɔ avɔyd dɛn kayn prɔblɛm dɛn ya? Pɔl bin gi wan fayn advays to di Kristian dɛn we bin de na Ɛfisɔs. Ɛfisɔs na bin siti usay bɔku jɛntriman dɛn ɛn pipul dɛn we mɛn difrɛn we dɛn bin de. (Rid Lɛta Fɔ Ɛfisɔs 4:​1-3.) Pɔl bin tɔk bɔt kwaliti dɛn lɛk fɔ ɔmbul, nɔ fɔ de vɛks kwik, fɔ peshɛnt, ɛn gɛt lɔv. Dɛn kwaliti dɛn ya tan lɛk strɔng pila we de ɛp os fɔ tinap. Bɔtfɔ mek os go kɔntinyu fɔ fayn, di pipul dɛn nid fɔ wok tranga wan. Pɔl bin want di Kristian dɛn na Ɛfisɔs fɔ wok tranga wan so dat dɛn go kɔntinyu fɔ gɛt “di wanwɔd” we Gɔd in spirit de gi.

¹⁹ Wi ɔl fɔ du ɔl wetin wi ebul fɔ mek di kɔngrigeshɔn go kɔntinyu fɔ gɛt wanwɔd. Aw wi go ebul fɔ du dat? Fɔs, wi fɔ tray fɔ gɛt ɛn sho di kwaliti dɛn we Pɔl bin tɔk bɔt lɛk fɔ ɔmbul, nɔ fɔ de vɛks kwik, fɔ peshɛnt, ɛn fɔ gɛt lɔv. Sɛkɔn, wi nid fɔ wok tranga wan so dat wi “nɔ go de mek plaba wit [wi] kɔmpin.” We wi nɔ kin ɔndastand wisɛf, i tan lɛk smɔl smɔl krak dɛn we kin mek wanwɔd nɔ de, so wi fɔ wok tranga wan fɔ mek wi go ebul fɔ sɔlv dɛn prɔblɛm dɛn ya so dat wi go kɔntinyu fɔ gɛt pis ɛn wanwɔd.

20. Aw wi go sho se wi ɔndastand se Jiova we na wi Gɔd, na in wangren?

²⁰ Di wɔd dɛn we di Baybul tɔk we i se: “Na PAPA GƆD waŋren na dɛn Gɔd” rili pawaful. Di tin we Mozis bin tɛl di Izrɛlayt dɛn bin ɛp dɛn fɔ bia wit di prɔblɛm dɛn we dɛn bin gɛt we dɛn go fɔ kapchɔ di land we Jiova bin dɔn prɔmis dɛn. Dɛn wɔd dɛn de kin ɛp wisɛf fɔ sev we da big trɔbul go kam ɛn ɛp wi fɔ de na Paradays tumara bambay. Lɛ wi kɔntinyu fɔ wɔship Jiova nɔmɔ. Wi nid fɔ lɛk ɛn sav Jiova wit ɔl wi at, ɔl wi maynd, ɛn ɔl wi trɛnk ɛn wi nid fɔ wok tranga wan fɔ kɔntinyu fɔ mek pis ɛn wanwɔd de wit wi brɔda dɛn. If wi kɔntinyu fɔ du dɛn tin dɛn ya, Jizɔs go jɔj wi fɔ bi ship ɛn wi go si wetin i bin tɔk kam tru we i se: “Una kam, una we mi Papa dɔn blɛs! Una kam, tek di ples we una fɔ gɛt ɔnda Gɔd in rul, i bin dɔn rɛdi da ples de fɔ una frɔm we i mek di wɔl.”—Matyu 25:​34.