Dɛn tinap fɔ di enjɛl dɛn na ɛvin we bin ɛp fɔ pwɛl Jerusɛlɛm ɛn we go ɛp bak fɔ dɔnawe wit Setan in wikɛd wɔl insay Amagɛdɔn. Dis na nyu we aw wi dɔn ɔndastand dis vishɔn. Wetin mek wi ɔndastand am dis we?

Bifo di ia 607 bifo Krays, Jiova bin sho Izikɛl wan vishɔn bɔt wetin go apin insay Jerusɛlɛm bifo dɛn pwɛl am. Insay dis vishɔn, Izikɛl bin si bɔku bad bad tin dɛn de apin. Dɔn i si siks man dɛn we gɛt “wɛpɔn na dɛn an fɔ kil.” Wan man bin de wit dɛn bak we bin wɛr “linin” ɛn i bin gɛt “wan tin we . . . gɛt ink insay, di kayn we dɛn sɛktri dɛn kin gɛt.” (Izikɛl 8:​6-12; 9:​2, 3, NW) Dɛn tɛl di man fɔ go ɔlsay na di siti “ɛn mak di man dɛn we de blo kam dɔŋ ɛn pini fɔseka ɔl dɛn bad bad tin we di pipul dɛn de du na di land.” Dɔn dɛn tɛl di siks man dɛn we bin gɛt di wɛpɔn dɛn fɔ kil ɔl di wan dɛn na di siti we nɔ gɛt di mak. (Izikɛl 9:​4-7) Wetin wi kin lan frɔm dis vishɔn, ɛn udat na di man we bin gɛt wan tin we gɛt ink insay?

Izikɛl bin si dis vishɔn insay di ia 612 bifo Krays. Di tin we i si bin fɔs apin fayv ia leta we Jiova alaw di Babilonian sojaman dɛn fɔ pwɛl Jerusɛlɛm. We Jiova alaw dis, i yuz di Babilonian dɛn fɔ pɔnish in pipul dɛn we nɔ bin de obe am. (Jɛrimaya 25:​9, 15-18) Bɔt wetin bin apin to di Ju dɛn we nɔ bin miks pan ɔl di bad  bad tin dɛn we bin de apin insay di siti? Jiova bin mek shɔ se dɛn sev.

Insay di vishɔn, Izikɛl nɔ mak ɛnibɔdi tru tru wan ɔ ɛp fɔ pwɛl di siti. Bifo dat, na di enjɛl dɛn bin sho aw dɛn fɔ pwɛl Jerusɛlɛm. So dis vishɔn we Jiova bin sho Izikɛl de ɛp wi fɔ si wetin de apin na ɛvin. Jiova bin tɛl in enjɛl dɛn fɔ ɔganayz aw fɔ dɔnawe wit di wikɛd wan dɛn ɛn fɔ mek shɔ se dɛn sev di wan dɛn we de du wetin rayt. *

Dis tin we Izikɛl bin si go apin bak tumara bambay. Trade, wi bin de tɔk se di man we bin gɛt di tin we gɛt ink insay tinap fɔ di anɔyntɛd dɛn we stil de na dis wɔl. Wi bin se bak di pipul dɛn we dɛn mak se dɛn go sev na di wan dɛn we lisin ɛn obe di gud nyus we wi de prich. Dɛn biɛn tɛm ya, wi bin si klia wan se wi nid fɔ chenj di we aw wi bin de ɛksplen dis vishɔn we Izikɛl bin si. Wi dɔn lan na Matyu 25:​31-33 se na Jizɔs de jɔj pipul dɛn. I go du dis tumara bambay we da big trɔbul go de na di wɔl. Da tɛm de, di wan dɛn we i si as ship go sev, ɛn di wan dɛn we i si as got go day.

So, wetin wi lan frɔm Izikɛl in vishɔn? Lɛ wi si fayv lɛsin dɛn we wi go lan:

1. Bifo dɛn pwɛl Jerusɛlɛm, Izikɛl, Jɛrimaya, ɛn Ayzaya bin wɔn di pipul dɛn bɔt wetin gɛt fɔ apin na di siti. Dɛn bin tan lɛk wachman dɛn. Tide, Jiova de yuz sɔm anɔyntɛd Kristian dɛn we mekɔp wan smɔl grup fɔ tich in pipul dɛn ɛn wɔn ɔda pipul dɛn bifo da big trɔbul bigin. Infakt, Gɔd in pipul dɛn ɔl, dat na di wan dɛn we Krays de yuz in anɔyntɛd brɔda dɛn fɔ tich, de ɛp fɔ wɔn pipul dɛn.—Matyu 24:​45-47.

2. Izikɛl nɔ bin de mak di wan dɛn we go sev. Gɔd in pipul dɛn sɛf tide nɔ de du dat. Dɛn jɔs de prich ɛn wɔn pipul dɛn bɔt wetin gɛt fɔ apin tumara bambay. Di enjɛl dɛn de ɛp fɔ du di prichin wok ɔlsay na di wɔl.—Rɛvɛleshɔn 14:​6.

3. Di wan dɛn we bin sev insay Izikɛl in tɛm nɔ bin gɛt tru tru mak na dɛn fɔɛd. Tide di wan dɛnsɛf we go sev nɔ go gɛt tru tru mak. Wetin pipul dɛn fɔ du fɔ lɛ dɛn go sev we da big trɔbul go kam? We dɛn yɛri di wɔnin, dɛn fɔ lan fɔ falamakata Krays, gi dɛn layf to Gɔd, ɛn sɔpɔt Krays in brɔda dɛn fɔ prich di gud nyus. (Matyu 25:​35-40) We da big trɔbul go bigin, dɛn pipul dɛn ya go gɛt di mak, we min se dɛn go sev.

4. Di man we gɛt wan tin we gɛt ink insay tinap fɔ Jizɔs. We da big trɔbul bigin, Jizɔs go mak di bɔku bɔku pipul dɛn we i go si as ship. Dɔn dɛn go gɛt di chans fɔ de sote go na dis wɔl.—Matyu 25:​34, 46, NW. *

5. Tide di siks man dɛn we gɛt wɛpɔn dɛn fɔ kil, tinap fɔ di sojaman dɛn we de na ɛvin, na Jizɔs na dɛn lida. Dɛn go dɔnawe wit di neshɔn dɛn ɛn stɔp ɔl di bad tin dɛn we de apin.—Izikɛl 10:​2, 6, 7; Rɛvɛleshɔn 19:​11-21.

Di lɛsin dɛn we wi lan na dis vishɔn ɛp wi fɔ biliv se Jiova nɔ go kil di bad wan dɛn wit di gud wan dɛn. (Pita In Sɛkɔn Lɛta 2:​9; 3:​9, NW) Di lɛsin dɛn we wi dɔn lan de mek wi mɛmba bak se di prichin wok we wi de du insay wi yon tɛm rili impɔtant. Ɔlman nid fɔ yɛri di wɔnin bifo di ɛnd kam!—Matyu 24:​14.