Rɛoboam in papa we nem Sɔlɔmɔn na bin kiŋ na Izrɛl fɔ 40 ia. (Fɔs Kiŋ 11:​42) Afta we Sɔlɔmɔn day, Rɛoboam bin travul frɔm Jerusɛlɛm to Shikɛm fɔ mek i go bi kiŋ. (Sɛkɛn Kronikul 10:​1) Fɔ se Rɛoboam bin de fred fɔ bi di nɛks kiŋ? Ɔlman bin no Sɔlɔmɔn fɔ di bɔku bɔku sɛns we i bin gɛt. I nɔ go te igen, Rɛoboam go sho if i gɛt di sɛns fɔ sɔlv prɔblɛm dɛn we nɔ izi.

Di Izrɛlayt dɛn bin de sɔfa, so dɛn bin sɛn pipul dɛn fɔ go tɛl Rɛoboam wetin dɛn want am fɔ du. Dɛn tɛl Rɛoboam se: “In papa bin mek dɛn de wok lɛk slev, bɔt if in pul da lod de na dɛn ed, dɛn go wok wit am.”—Sɛkɛn Kronikul 10:​3, 4.

Dis na tin we nɔ bin izi fɔ Rɛoboam fɔ disayd. If i du wetin di pipul dɛn want, in, in fambul dɛn, ɛn ɔl di pipul dɛn we de na di pales nɔ go gɛt sɔm pan di tin dɛn we dɛn de ɛnjɔy igen. Bɔt if i nɔ gri fɔ du wetin di pipul dɛn tɛl am, dɛn go tɔn dɛn bak pan am. Wetin i bin du? Fɔs, i bin tɔk to di bigman dɛn we bin ɛp in papa. Dɛn bin advays am fɔ lisin to di pipul dɛn. Bɔt afta dat, Rɛoboam bin go tɔk to in kɔmpin dɛn we dɛn ɔl de di sem ej ɛn i bin disayd fɔ trit di pipul dɛn bad. Di Baybul se: “Bifo dat, di advays we in kamaranks dɛn gi am se, in papa bin gi pipul dɛn ebi lod fɔ tot, bɔt in go gi dɛn di wan we pas dat; in papa bin de flag dɛn wit ratlan in go tek tik wok dɛn, na da advays de i fala.”—Sɛkɛn Kronikul 10:​6-14.

Wi lan ɛni lɛsin frɔm dis? Tide, wi gɛt bɔku big wan dɛn we dɔn sav Jiova fɔ lɔng tɛm ɛn we kin ɛp wi fɔ disayd fɔ du di rayt tin. Lɛ wi gɛt sɛns ɛn lisin to dɛn.—Job 12:​12.

Rɛoboam bin gɛda di sojaman dɛn fɔ fɛt di trayb dɛn we bin tɔn dɛn bak pan am. Bɔt Jiova bin sɛn in prɔfɛt we nem Shɛmaya fɔ tɛl dɛn se:  “Dɛn nɔ fɔ mistek fɔ go fɛt dɛn brɔda dɛn. Lɛ dɛn ɔl go om bikɔs nain mek ɔl wetin de bi so bi.”—Fɔs Kiŋ 12:​21-24. *—Luk di futnot.

Yu tink se i bin izi fɔ mek Rɛoboam lisin to Jiova? Wetin pipul dɛn go tink bɔt dɛn nyu kiŋ? I bin dɔn tɛl dɛn se i go pɔnish dɛn wit “tik,” bɔt naw i nɔ go du ɛnitin to di pipul dɛn we kɔmɔt biɛn am! (Luk Sɛkɛn Kronikul 13:​7.) Bɔt ilɛk wetin di pipul dɛn tink bɔt di kiŋ, in ɛn in sojaman dɛn bin “yɛri wetin PAPA GƆD, [“Jiova,” NW] se ɛn tɔn bak go na dɛn os.”

Us lɛsin wi lan frɔm dis? I mek sɛns ɔltɛm fɔ lɛ wi obe Gɔd ivin if pipul dɛn de provok wi we wi de du dat. Gɔd go blɛs wi ɔltɛm we wi de obe.—Ditarɔnɔmi 28:​2.

Yu tink se Gɔd bin blɛs Rɛoboam fɔ we i obe? Rɛoboam bin stil de rul as kiŋ fɔ Juda ɛn Bɛnjamin, ɛn i bin disayd fɔ bil nyu siti dɛn na dɛn say dɛn de. I bin bil bak sɔm siti dɛn strɔng wan pas ɔl di ɔda wan dɛn. (Sɛkɛn Kronikul 11:​5-12) Di tin we impɔtant pas ɔl na dat fɔ sɔm tɛm, Rɛoboam bin obe Jiova in lɔ dɛn. Bikɔs di tɛn-trayb kiŋdɔm bin stat fɔ wɔship lay lay gɔd dɛn, bɔku pipul dɛn bin de travul go na Jerusɛlɛm fɔ go sɔpɔt Rɛoboam ɛn fɔ tru wɔship. (Sɛkɛn Kronikul 11:​16, 17) Bikɔs Rɛoboam bin obe Jiova, in kiŋdɔm bin strɔng pas di ɔda kiŋdɔm.

We Rɛoboam in kiŋdɔm bin dɔn strɔng, i bin du sɔntin. I bin stɔp fɔ obe Jiova in lɔ dɛn ɛn bigin fɔ wɔship lay lay gɔd dɛn! Bɔt wetin mek i bin du dat? Fɔ se na in mama we na bin Amonayt mek i disayd fɔ du dat? (Fɔs Kiŋ 14:​21) Wɛl, wi nɔ no, bɔt ɔl di pipul dɛn bin fala in bad ɛgzampul. So Jiova bin alaw Kiŋ Shishak frɔm Ijipt fɔ kam fɛt ɛn win bɔku siti dɛn we bin de ɔnda di kiŋdɔm na Juda. Dis bin apin pan ɔl we Rɛoboam bin dɔn mek dɛn siti dɛn ya rili strɔng!—Fɔs Kiŋ 14:​22-24; Sɛkɛn Kronikul 12:​1-4.

Tin bin bad-ɔf we Shishak ɛn in sojaman dɛn bin kam fɔ atak Jerusɛlɛm usay Rɛoboam bin de rul. Na da tɛm de prɔfɛt Shɛmaya bin go tɛl Rɛoboam ɛn in prins dɛn Gɔd in mɛsej fɔ se: “Una tɔn una bak pan mi so misɛf dɔn tɔn mi bak pan una ɛn lɛf una gi Shishak.” Wetin Rɛoboam bin du? I bin du fayn tin! Di Baybul se: “Nain di bigman dɛn na Izrɛl ɛn di kiŋ put dɛnsɛf dɔŋ.” Dɛn tɔk se: “PAPA GƆD [“Jiova,” NW] raychɔs.” Dis bin mek Jiova sev Rɛoboam, ɛn dɛn nɔ bin dɔnawe wit Jerusɛlɛm.—Sɛkɛn Kronikul 12:​5-7, 12.

Afta dat, Rɛoboam bin kɔntinyu fɔ rul di kiŋdɔm na Juda. Bifo i day, i bin gi bɔku bɔku gift dɛn to in bɔy pikin dɛn. Sɔntɛm i bin du dis fɔ mek shɔ se dɛn nɔ kɔmɔt biɛn dɛn brɔda we na Abija we fɔ bi di nɛks kiŋ. (Sɛkɛn Kronikul 11:​21-23) We Rɛoboam bin du dis, i bin sho se i dɔn rili gɛt sɛns pas di tɛm we i bin yɔŋ.

Pan ɔl we Rɛoboam bin du sɔm gud tin dɛn, di Baybul se we i bin de rul“I du bad bad tin dɛn.” Wetin mek? Na bikɔs in at “nɔ bin de to PAPA GƆD [“Jiova,” NW].” So Jiova nɔ bin gladi wit am.—Sɛkɛn Kronikul 12:​14.

Wetin wi go lan frɔm Rɛoboam in stori? Sɔm tɛm dɛn de, i bin de obe Gɔd. Ɛn i bin du sɔm gud tin dɛn fɔ Jiova in pipul dɛn. Bɔt i nɔ bin gɛt tayt padi biznɛs wit Jiova, ɛn i nɔ bin rili want fɔ du tin dɛn we go mek Jiova gladi. Dis bin mek i stɔp fɔ du di rayt tin ɛn bigin fɔ wɔship lay lay gɔd dɛn. Sɔntɛm yu go de wɔnda: ‘We Rɛoboam bin gri fɔ du wetin Jiova bin tɛl am fɔ se na bikɔs i rili fil bad fɔ di mistek dɛn we i bin du ɛn i bin want fɔ mek Gɔd gladi? Ɔ fɔ se na di tin dɛn we ɔda pipul dɛn de tɔk mek i du am?’ (Sɛkɛn Kronikul 11:​3, 4; 12:​6) Leta i bin du bad tin bak. I bin rili difrɛn frɔm in granpa we na Kiŋ Devid! Na tru se Devid bin mek mistek. Bɔt i bin rili ripɛnt frɔm di siriɔs sin we i bin kɔmit. Ɛn te i day, i bin lɛk Jiova ɛn tru wɔship.—Fɔs Kiŋ 14:​8; Sam 51:​1, 17; 63:​1.

 Wi kin lan bɔku tin frɔm dis stori na di Baybul. I kin fayn we pipul dɛn kia fɔ dɛn famili ɛn du gud tin dɛn fɔ ɔda pipul dɛn. Bɔt fɔ gɛt Jiova in blɛsin, wi fɔ wɔship am di we aw i want, ɛn wi fɔ gɛt tayt padi biznɛs wit am.

Fɔ lɛ wi go ebul du dat, wi nid fɔ rili lɛk Jiova. Jɔs lɛk aw wi kin ad mɔ wud fɔ lɛ faya kech, na so wi nid fɔ stɔdi Gɔd in Wɔd ɔltɛm, tink gud wan bɔt wetin wi dɔn rid, ɛn nɔ taya fɔ pre fɔ lɛ wi go kɔntinyu fɔ lɛk Gɔd mɔ ɛn mɔ. (Sam 1:​2; Lɛta Fɔ Rom 12:​12) Ɛn di lɛk we wi lɛk Jiova go mek wi want fɔ du tin dɛn we go mek i gladi. I go mek bak wi rili fil bad we wi mek mistek ɛn wi go aks Jiova fɔ mek i fɔgiv wi. Dɔn wi nɔ go tan lɛk Rɛoboam bɔt wi go kɔntinyu fɔ wɔship Jiova fetful wan.—Jud 20, 21.