1. Us spɛshal rizin wi gɛt we mek wi gladi?

WI RILI gladi fɔ yɛri we Gɔd in savant dɛn de mek dɛn layt shayn! Last ia, Jiova in pipul dɛn bin du pas 10,000,000 Baybul stɔdi dɛn. Ɛn bɔku bɔku pipul dɛn we want fɔ no mɔ bin kam di Mɛmorial ɛn lan bɔt aw Jiova lɛk wi bay we i gi in wangren Pikin fɔ kam day fɔ wi.—Jɔn In Fɔs Lɛta 4:​9.

2, 3. (a) Wetin nɔ de stɔp wi fɔ shayn lɛk “layt”? (b) Wetin wi go tɔk bɔt na dis atikul?

² Jiova Witnɛs dɛn de tɔk bɔku difrɛn langwej dɛn ɔlsay na di wɔl. Bɔt dis nɔ de stɔp wi fɔ prez Jiova as wan famili. (Rɛvɛleshɔn 7:​9) Ilɛk us langwej wi de tɔk ɔ usay wi de, wi de shayn lɛk “layt” na di wɔl.—Lɛta Fɔ Filipay 2:​15.

³ Wi prichin wok we wi de du, di wanwɔd we wi gɛt, ɛn we wi no se Jiova in de nɔ de fa igen, ɔl de briŋ prez to Jiova. Aw wi go mek wi layt shayn dɛn tri we dɛn ya?—Rid Matyu 5:​14-16.

4, 5. (a) We wi de du wi prichin wok, aw wi kin mek wi layt shayn? (b) Wetin kin apin we wi smayl ɛn tɔk fayn to pipul dɛn? (Luk di pikchɔ nia dis atikul in taytul.)

⁴ Wan impɔtant we we wi de mek wi layt shayn na bay we wi de prich ɛn mek disaypul dɛn. (Matyu 28:​19, 20) Insay di 1925 Wachtawa atikul we gɛt di taytul “Light in the Darkness,” dɛn bin rayt se insay di las dez nɔbɔdi nɔ go de fetful wan to di Lɔd if i nɔ tek “di chans fɔ mek in layt shayn.” Dɔn di atikul bin se: “I fɔ du dis bay we i de tɛl pipul dɛn di gud nyuz ɔlsay na di wɔl, ɛn bay we i de du tin dɛn we de mek in layt shayn.” (Di Wach Tawa, Jun 1, 1925) Nɔto wi prichin wok nɔmɔ de briŋ prez to Jiova bɔt di we aw wi de biev bak de briŋ prez to am. Bɔku pipul dɛn kin notis wi we wi de prich. We wi smayl to dɛn ɛn grit dɛn fayn wan, i de ɛp dɛn fɔ tink gud bɔt wi ɛn di Gɔd we wi de wɔship.

⁵ Jizɔs bin tɛl in disaypul dɛn se: “Ɛni os we una go, una fɔ se, ‘Mek Gɔd blɛs una.’” (Matyu 10:​12) Di say usay Jizɔs bin de prich, na bin kɔmɔn tin fɔ lɛ pipul dɛn kɔl strenja dɛn insay dɛn os. Bɔt pipul dɛn nɔ de du dis igen na bɔku say dɛn tide. Bɔku tɛm, pipul dɛn kin fred ɔ ivin vɛks we dɛn si strenja na dɛn domɔt. Bɔt if wi de smayl ɛn tɔk fayn to dɛn, dis go mek dɛn fil fayn. We yu de yuz di kat fɔ du pɔblik prichin, yu dɔn ɛva notis se we yu smayl ɛn grit pipul dɛn fayn dat de mek dɛn fil gud ɛn kam tek wi buk dɛn? Dɛn kin ivin stat fɔ tɔk to wi!

6. Wetin bin ɛp wan ol brɔda ɛn in wɛf fɔ kɔntinyu fɔ du di prichin wok?

⁶ Wan man ɛn in wɛf na Ingland nɔ bin de ebul fɔ go os to os fɔ prich lɛk aw dɛn bin de du trade. Dis na bikɔs dɛn bin dɔn ol ɛn dɛn gɛt wɛlbɔdi prɔblɛm. So dɛn bin put tebul we gɛt wi buk ɛn magazin dɛn frɔnt dɛn os. Dɛn bin de nia wan skul, so dɛn bin de put buk ɛn magazin dɛn we go fayn fɔ mama ɛn papa dɛn we de kam tek dɛn pikin dɛn. Sɔm mama ɛn papa dɛn dɔn tek buk dɛn lɛk Questions Young People Ask—Answers That Work, Vɔlyum 1 ɛn 2. Wan payɔnia sista bin de jɔyn dis ol brɔda ɛn in wɛf. Di mama ɛn papa dɛn notis se dis payɔnia sista bin rili nays ɛn dis ol brɔda ɛn in wɛf bin rili want fɔ ɛp pipul dɛn. Wan pɔsin dɔn ivin stat fɔ stɔdi di Baybul.

7. Aw yu go ɛp rɛfyuji dɛn na yu eria?

⁷ Dis biɛn tɛm, bɔku pipul dɛn dɔn rɔnawe kɔmɔt na di say we dɛn bin de fɔ go de na ɔda kɔntri dɛn as rɛfyuji. Wetin yu go du fɔ ɛp rɛfyuji dɛn na yu eria fɔ lan bɔt Jiova? Fɔs, yu fɔ lan aw fɔ grit insay dɛn langwej. Fɔ ɛp yu du dis, yu kin yuz di JW Language ap we go ɛp yu fɔ lan smɔl smɔl wɔd dɛn we go mek dɛn want fɔ tɔk to yu. Dɔn yu kin  yuz di jw.org wɛbsayt fɔ sho dɛn fim ɛn buk dɛn we de insay dɛn langwej.—Ditarɔnɔmi 10:​19.

8, 9. (a) Aw di mitin we wi kin gɛt insay di wik de ɛp wi? (b) Aw mama ɛn papa dɛn kin ɛp dɛn pikin dɛn fɔ du mɔ we dɛn de kɔmɛnt na mitin?

⁸ Jiova de gi wi wetin wi nid fɔ ɛp wi fɔ prich fayn. Fɔ ɛgzampul, di tin dɛn we wi de lan na wi Layf ɛn Prichin Wok Mitin de ɛp wi fɔ gɛt mɔ kɔnfidɛns fɔ mek ritɔn visit ɛn stat Baybul stɔdi dɛn.

⁹ We pipul dɛn atɛnd wi mitin fɔ di fɔstɛm, dɛn kin rili kɔle pan di kɔmɛnt we di smɔl pikin dɛn de mek. Yu kin tich yu pikin dɛn fɔ kɔmɛnt insay dɛn yon wɔd. Sɔm pipul dɛn dɔn kam na di trut bikɔs dɛn yɛri we pikin dɛn de ɛksplen wetin dɛn biliv simpul wan frɔm dɛn at.—Fɔs Lɛta Fɔ Kɔrint 14:​25.

10. Aw famili wɔship de ɛp famili dɛn fɔ gɛt wanwɔd mɔ ɛn mɔ?

¹⁰ We wi de tray tranga wan fɔ tren wi famili fɔ wok togɛda wit wanwɔd ɛn pis, dat de briŋ prez to Jiova. Fɔ ɛgzampul, if yu na pɔsin we gɛt pikin dɛn, arenj fɔ de du Famili Wɔship ɛni wik. Bɔku famili dɛn kin wach di JW TV program togɛda, ɛn afta we dɛn dɔn wach am, dɛn kin tɔk bɔt aw dɛn go du di tin dɛn we dɛn dɔn lan. Mɛmba se di tin we smɔl pikin dɛn nid difrɛn frɔm wetin pikin dɛn we dɔn pas 12 ia nid. Du ɔl wetin yu ebul fɔ ɛp  ɔlman na di famili fɔ rili bɛnifit frɔm di famili wɔship.—Sam 148:​12, 13.

11-13. Aw wi go ɛp wi kɔngrigeshɔn fɔ gɛt wanwɔd mɔ ɛn mɔ?

¹¹ Ilɛksɛf yu na yɔŋ pɔsin, yu kin ɛp fɔ mek ɔlman na di kɔngrigeshɔn fil gud. Wan we we yu kin du dis na bay we yu de mek padi wit brɔda ɛn sista dɛn we dɔn ol. Yu kin aks dɛn fɔ tɛl yu wetin dɔn ɛp dɛn fɔ kɔntinyu fɔ sav Jiova fɔ lɔng tɛm naw. Dɛn kin mek yu lan bɔku fayn fayn lɛsin dɛn. Dis go ɛnkɔrej yu ɛn dɛn. Ɛn ivin wi ɔl, ilɛksɛf wi yɔŋ ɔ ol kin mek di wan dɛn we de kam na wi Kiŋdɔm Ɔl fɔ di fɔstɛm fil fayn. Yu kin grit dɛn, smayl to dɛn fayn, ɛp dɛn fɔ fɛn sidɔm ples, ɛn sho dɛn to ɔda pipul dɛn. Mek lɛ dɛn fil gud.

¹² If dɛn gi yu di wok fɔ kɔndɔkt mitin fɔ fil savis, yu kin ɛp di ol wan dɛn fɔ kɔntinyu fɔ mek dɛn layt shayn brayt wan. Mek shɔ se dɛn gɛt fayn say fɔ prich. Arenj fɔ mek yɔŋ pipul dɛn wok wit dɛn. Di ol brɔda ɛn sista dɛn ɛn dɛn wan dɛn we gɛt wɛlbɔdi prɔblɛm kin fil bad we dɛn nɔ ebul fɔ prich lɛk aw dɛn bin de prich trade. Bɔt dɛn go fil gud mɔ we dɛn no se yu bisin bɔt dɛn ɛn ɔndastand wetin de apin to dɛn. Ilɛk ɔmɔs ia dɛn ol ɔ ɔmɔs ia dɛn dɔn tek na di trut, di gud tin dɛn we yu de du fɔ dɛn kin ɛnkɔrej dɛn fɔ kɔntinyu fɔ prich wit zil.—Lɛvitikɔs 19:​32.

¹³ Di Izrɛlayt dɛn bin de ɛnjɔy fɔ wɔship Jiova togɛda. Kiŋ Devid bin tɔk se: “I fayn ɛn i swit wɛn PAPA GƆD in pipul gɛda wit wan at fɔ wɔship am!” (Rid Sam 133:​1, 2.) I bin kɔmpia dis wanwɔd we dɛn gɛt to anɔyntin ɔyl we de mek di bɔdi frɛsh ɛn smɛl fayn. Semweso, wi kin mek wi brɔda ɛn sista dɛn fil gud bay we wi de trit dɛn fayn ɛn du gud to dɛn. Dis go mek di kɔngrigeshɔn gɛt wanwɔd mɔ ɛn mɔ. Yu nɔ tink se i fayn fɔ mek yu no di brɔda ɛn sista dɛn insay yu kɔngrigeshɔn gud gud wan?—Sɛkɛn Lɛta Fɔ Kɔrint 6:​11-13.

14. Aw yu layt go shayn na di eria we yu de?

¹⁴ Yu layt kin shayn ilɛk usay yu de. Di we aw yu de du gud kin mek yu neba dɛn want fɔ lan mɔ bɔt Jiova. Aks yusɛf dɛn kwɛstyɔn dɛn ya: ‘Wetin mi neba dɛn tink bɔt mi? Mi os nit ɛn klin? Mi os de mek di eria we a de luk fayn? Mi na pɔsin we de ɛp mi neba? Aks ɔda Jiova Witnɛs dɛn aw di we aw dɛn de du gud ɛn dɛn fayn ɛgzampul dɔn afɛkt dɛn fambul dɛn, dɛn neba dɛn, dɛn wokmet dɛn, ɔ skulmet dɛn.—Lɛta Fɔ Ɛfisɔs 5:​9.

15. Wetin mek wi nid fɔ waydawek?

¹⁵ If wi want fɔ kɔntinyu fɔ mek wi layt shayn brayt wan, wi nid fɔ no di tɛm we wi de. Jizɔs bin tɛl in disaypul  dɛn bɔku tɛm se dɛn fɔ “waydawek.” (Matyu 24:​42; 25:​13; 26:​41) If wi de fil se di gret tribyuleshɔn stil de fa, dat go mek wi nɔ go de yuz ɛni chans we wi gɛt fɔ ɛp ɔda pipul dɛn fɔ lan bɔt Jiova. (Matyu 24:​21) Bifo wi layt shayn brayt wan, i go jɔs de dɔl mɔ ɛn mɔ ɛn i go ivin ɔt.

16, 17. Wetin yu go du fɔ mek yu kɔntinyu fɔ tink bɔt di tɛm we wi de naw?

¹⁶ Wi nid fɔ waydawek mɔ pas aw wi bin de trade. Di tin dɛn na di wɔl de kɔntinyu fɔ bad-ɔf ɛvride. Bɔt wi no se di ɛnd de kam di rayt tɛm we Jiova dɔn pik. (Matyu 24:​42-44) We wi de wet, wi nid fɔ peshɛnt ɛn put wi maynd pan di blɛsin dɛn we wi go gɛt tumara bambay. Rid di Baybul ɛvride, ɛn nɔ ɛva stɔp fɔ pre to Jiova. (Pita In Fɔs Lɛta 4:​7) Lan frɔm brɔda ɛn sista dɛn we dɔn sav Jiova fɔ lɔng tɛm. Fɔ ɛgzampul, yu kin rid bɔt ɛkspiriɛns dɛn we sɔm pipul dɛn bin dɔn gɛt, lɛk di atikul we gɛt di taytul “Seventy Years of Holding On to the Skirt of a Jew.” I de na di Epril 15, 2012, Wachtawa, pej 18 to pej 21.

 ¹⁷ Du di tin dɛn we de mek wi sav Jiova. Du gud tin fɔ ɔda pipul dɛn, ɛn spɛn tɛm wit yu brɔda ɛn sista dɛn. Dɔn yu go gladi, ɛn i go tan lɛk se tɛm de go kwik kwik wan. (Lɛta Fɔ Ɛfisɔs 5:​16) Jiova in pipul dɛn dɔn du bɔku tin dɛn insay di wan ɔndrɛd ia we dɔn pas. Ɛn tide, wi bizi pas aw wi bin dɔn ɛva bizi. Jiova in wok dɔn gro pas aw wi kin imajin. Wi layt de shayn brayt wan!

18, 19. Aw di ɛlda dɛn kin ɛp wi fɔ sav Jiova wit zil? Gi wan ɛgzampul.

¹⁸ Pan ɔl we wi de mek bɔku mistek dɛn, Jiova de stil alaw wi fɔ sav am. I dɔn gi wi di ɛlda dɛn insay di kɔngrigeshɔn fɔ ɛp wi ɛn dɛn man dɛn ya “tan lɛk gift.” (Rid Lɛta fɔ Ɛfisɔs 4:​8, 11, 12, NW.) So we di ɛlda dɛn go fɛn yu, yuz da chans de we yu gɛt fɔ lan frɔm dɛn sɛns ɛn di advays we dɛn go gi.

¹⁹ Fɔ ɛgzampul, na Ingland wan brɔda ɛn in wɛf bin de gɛt prɔblɛm na dɛn mared-os, ɛn dɛn bin aks tu ɛlda dɛn fɔ ɛp dɛn. Di wɛf bin fil se in man nɔ de de bifo fɔ sav Jiova. Di brɔda in bin de fil se in nɔto gud ticha ɛn i bin gri se i nɔ bin de arenj fɔ lɛ dɛn gɛt famili wɔship ɛni wik. Di ɛlda dɛn bin ɛp dis brɔda ɛn in wɛf fɔ tink bɔt Jizɔs in ɛgzampul. Dɛn bin ɛnkɔrej di man fɔ falamakata di we aw Jizɔs bin de kia fɔ in disaypul dɛn. Dɔn dɛn bin ɛnkɔrej di uman fɔ peshɛnt wit in man. Dɛn bin gi dɛn bak sɔm advays dɛn bɔt aw dɛn go gɛt famili wɔship wit dɛn tu pikin dɛn. (Lɛta Fɔ Ɛfisɔs 5:​21-29) Dis brɔda bin tray tranga wan fɔ bi gud pɔsin we de bifo in famili. Di ɛlda dɛn bin ɛnkɔrej am fɔ mek i nɔ giv ɔp ɛn fɔ mek i kɔntinyu fɔ abop pan Jiova in oli spirit. Di lɔv we di ɛlda dɛn bin sho dɛn ɛn di gud tin dɛn we dɛn du fɔ dɛn bin rili ɛp dis famili!

20. Wetin go apin we yu mek yu layt shayn?

²⁰ Di Baybul se: “I fayn fɔ di pɔsin we de fred ɛn rɛspɛkt PAPA GƆD, we de du wetin i want.” (Sam 128:​1) Yu go gɛt gladi at we yu mek yu layt shayn. So na fɔ tich ɔda pipul dɛn bɔt Gɔd, du ɔl wetin yu ebul fɔ ɛp yu famili ɛn yu kɔngrigeshɔn fɔ gɛt wanwɔd, ɛn kɔntinyu fɔ waydawek. Ɔda pipul dɛn go si yu fayn ɛgzampul ɛn dɛn go want bak fɔ gi prez to wi Papa, Jiova.—Matyu 5:​16.