TRADE TRADE, a mɛmba wan mɔnin we di ples bin kol na Brukins, na Sawt Dikɔda, insay Amɛrika. A bin si se i nɔ go te igen, di ples go bigin fɔ rili kɔl. A bin de wit sɔm pipul dɛn na wan fam os we bin kol, ɛn wi bin de trimbul. Wi bin tinap nia wan big kɔntena we gɛt wata, ɛn di wata bin kol! Mek a tɛl una smɔl bɔt mi layf so dat una go ɔndastand wetin mek wi bin de na da ples de.

A bɔn Mach 7, 1936. Na wi 4 mi mama ɛn papa bin bɔn, ɛn na mi na di las wan. Wi bin de na wan smɔl fam os na di ist say na Sawt Dikɔda. Fɔ mek fam bin impɔtant na mi famili, bɔt nɔto bin di tin we impɔtant pas ɔl. Insay 1934, mi mama ɛn papa bin baptayz fɔ bi Jiova Witnɛs. Dɛn bin dɔn gi dɛn layf to Jiova, so fɔ du wetin i want bin impɔtant to dɛn pas ɛni ɔda tin. Mi papa we nem Klarɛn, ɛn leta mi ɔnkul we nem Alfrɛd, bin sav as kɔmni savant (we dɛn de kɔl naw kɔdinetɔ fɔ di ɛlda dɛn na di kɔngrigeshɔn) na wi smɔl kɔngrigeshɔn insay, Kɔndɛk, na Sawt Dikɔda.

Wi famili bin de go mitin ɔltɛm ɛn wi bin de prich frɔm os to os fɔ tɛl ɔda pipul dɛn bɔt di wɔndaful op we wi gɛt tumara bambay. Mi mama ɛn papa dɛn ɛgzampul ɛn di trenin we dɛn gi wi bin ɛp wi fɔ lɛk Jiova. Mi ɛn mi sista we nem Dorati, bin bigin fɔ prich we wi ol 6 ia. Insay 1943, a bin jɔyn di Tiokratik Ministri Skul we bin jɔs bigin.

 Kɔnvɛnshɔn ɛn Asɛmbli bin rili impɔtant na wi layf. A mɛmba wan kɔnvɛnshɔn we wi bin gɛt insay 1949 na Syu Fɔls, na di sawt pat na Dikɔda. Brɔda Grant Syuta bin gi wan tɔk we gɛt di taytul “It Is Later Than You Think!” I bin tɔk mɔ se ɔl di wan dɛn we dɔn baptayz nid fɔ yuz dɛn layf fɔ prich di gud nyus bɔt Gɔd in Kiŋdɔm. Afta dat, a bin pre to Jiova fɔ tɛl am se a dɔn gi am mi layf fɔ sav am. A bin baptayz di nɛks sakit asɛmbli na Brukins, Novɛmba 12, insay 1949. Na dat mek a bin de na da kol fam os, we a bin tɔk bɔt fɔs. Na wi 4 bin de wet fɔ baptayz insay da big kɔntena we dɛn mek wit ayɛn.

A bin disayd fɔ payɔnia. A bin bigin Janwari 1, 1952, di tɛm we a bin ol 15 ia. Di Baybul se: “Di wan we de waka wit pɔsin we gɛt sɛns go gɛt sɛns,” ɛn a bin gɛt bɔku pipul dɛn na mi famili we bin gɛt sɛns ɛn we bin de sɔpɔt mi di tɛm we a bin disayd fɔ payɔnia. (Prɔvabs 13:​20, NW) Bɔku tɛm, a bin de go prich wit mi ɔnkul we nem Juliɔs, we bin ol 60 ia. Pan ɔl we i bin big pas mi fa fawe, wi bin de ɛnjɔy fɔ prich togɛda. A bin lan bɔku tin dɛn frɔm am ɛn frɔm di tin dɛn we in bin ɛkspiriɛns na in layf. Dorati insɛf bin bi payɔnia.

We a bin smɔl, mi mama ɛn papa dɛn bin de mek sakit ovasia ɛn dɛn wɛf dɛn kam de na os to wi. Wan brɔda ɛn in wɛf we bin rili ɛp mi na Jɛsi ɛn Lin Kantwɛl. Dɛn bin rili bisin bɔt mi ɛn dɛn bin de ɛnkɔrej mi. We dɛn kin go na kɔngrigeshɔn dɛn we de nia wi, dɛn kin tɛl mi fɔ go prich wit dɛn. A bin de rili ɛnjɔy fɔ spɛnd tɛm wit dɛn! A bin rili want fɔ bizi de du Jiova in wok jɔs lɛk dɛn ɛn payɔnia.

Wi ɔda sakit ovasia na bin Bod Mila. A bin ol 18 ia we in ɛn in wɛf we nem Juan bin kam na wi kɔngrigeshɔn. Da tɛm de, a bin nid fɔ gɛt mitin wit wan sojaman kɔmiti we go disayd if a fɔ jɔyn di ami. Dɛn bin want mi fɔ du wok we gɛt sɔntin fɔ du wit pɔlitiks ɔ wɔ, sɔntin we Jizɔs bin se wi nɔ fɔ put an pan. Bɔt a bin want fɔ prich di gud nyus bɔt Gɔd in Kiŋdɔm. (Jɔn 15:​19)  So a bin beg dɛn fɔ mek dɛn si mi as pɔsin we de prich.

A bin rili gladi we Brɔda Mila tɛl mi se i go jɔyn mi fɔ go di mitin we a bin gɛt wit di kɔmiti. In nɔto bin pɔsin we de shem, ɛn i nɔ de fred pɔsin. I bin sabi di Baybul gud gud wan. We i bin de wit mi, dat bin mek a rili gɛt kɔrej! Insay 1954, di kɔmiti bin gri fɔ mek a bi pɔsin we de prich. A bin fri naw fɔ du mɔ fɔ Jiova.

I nɔ bin tu te afta dat, dɛn bin invayt mi fɔ go wok na Bɛtɛl. Da tɛm de, dɛn bin de kɔl am Watchtower Farm. I bin de na Statin Ayland insay Nyu Yɔk. A bin wok de fɔ lɛk tri ia. A bin gɛt bɔku fayn ɛkspiriɛns dɛn bikɔs a bin wok wit bɔku brɔda ɛn sista dɛn we bin gɛt sɛns.

Di fam na Statin Ayland bin gɛt redio steshɔn we dɛn kɔl WBBR. Na Jiova Witnɛs dɛn bin gɛt am frɔm 1924 to 1957. Na lɛk 15 to 20 pan di Bɛtɛlayt dɛn bin de wok na di fam. Bɔku pan wi bin yɔŋ ɛn wi nɔ gɛt bɛtɛ ɛkspiriɛns. Bɔt wan ol anɔyntɛd brɔda we nem Ɛldɔn Wudwɔd bin de wok wit wi. I bin tan lɛk papa to wi ɛn i bin de tich wi bɔku fayn tin dɛn. Sɔntɛnde, we wi kin gɛt prɔblɛm wit wisɛf, Brɔda Wudwɔd kin se, “I wɔndaful fɔ no wetin di Lɔd dɔn du wit wetin i gɛt fɔ wok wit.”

Brɔda Frɛdrik W. Franz insɛf bin de wit wi ɛn i bin de ɛp wi ɔl. I bin gɛt sɛns ɛn i bin rili sabi di Baybul. I bin rili bisin bɔt wi ɔl. Na Ari Pitasin bin de kuk fɔ wi. I bin izi fɔ mek wi yuz in las nem pas fɔ yuz in rial nem we na Pepaporɔsulɔs. Insɛf na bin anɔyntɛd, ɛn i bin lɛk di prichin wok. Brɔda Pitasin bin de du in wok fayn na Bɛtɛl bɔt i nɔ bin de ɛva fɔgɛt bɔt di prichin wok. I bin de gi bɔku bɔku magazin dɛn ɛni mɔnt. Insɛf bin sabi di Baybul gud gud wan ɛn i bin de ansa bɔku pan wi kwɛstyɔn dɛn.

Na di fam, wi bin de mek frut ɛn vɛjitebul dɛn ɛn put dɛn na kan. Ɛni ia, na lɛk 42,600 lita frut ɛn vɛjitebul dɛn wi kin  put na kan fɔ di Bɛtɛlayt dɛn. A bin de wok wit Ɛta Ɔd. In na bin sista we gɛt sɛns. Na in bin de sho wi aw fɔ mek di frut ɛn vɛjitebul dɛn. Sɔm sista dɛn we bin de na di eria bin de kam wok wit wi, ɛn na Ɛta bin de ɔganayz wetin dɛn fɔ du. Pan ɔl we Ɛta bin sabi bɔku bɔt wetin fɔ du we wi de kan di tin dɛn, i bin de rɛspɛkt di brɔda dɛn we na bin ovasia dɛn na di fam. I bin sɛt fayn ɛgzampul fɔ wi ɔl.

Anjɛla Romano na bin wan yɔŋ sista we bin kam ɛp na di fam. Ɛta bin ɛp am we i bin kam na di trut. Mi ɛn Anji bin mared Epril 1958, ɛn fɔ 58 ia, wi ɔltu bin ɛnjɔy fɔ sav Jiova. Di we aw Anji bin de biɛn Jiova, dɔn rili ɛp wi mared fɔ go bifo. I gɛt sɛns, ɛn a kin rili abop pan am ilɛk uskayn prɔblɛm wi gɛt.

We di brɔda dɛn bin sɛl di WBBR redio steshɔn na Statin Aylan insay 1957, a bin wok na Bruklin Bɛtɛl fɔ smɔl tɛm. Dɔn mi ɛn Anji bin mared, so a bin lɛf Bɛtɛl. Wi bin payɔnia fɔ tri ia na Statin Aylan. Fɔ sɔm tɛm, a bin ivin wok fɔ di wan dɛn we bin gɛt di redio steshɔn, we dɛn bin de kɔl WPOW.

Mi ɛn Anji bin liv simpul layf so dat wi go ebul fɔ go ɛni say usay dɛn go nid wi fɔ prich. Dat bin mek insay 1961, wi bin tek wan inviteshɔn fɔ go sav as spɛshal payɔnia na Fɔls Siti, insay Nibraska. Bɔt we wi rich de, i nɔ tu te, dɛn bin invayt wi fɔ go na Sawt Lansin, na Nyu Yɔk, fɔ wan mɔnt fɔ go na di Kiŋdɔm Ministri Skul. Wi bin ɛnjɔy di trenin we wi bin gɛt, ɛn wi bin tink se afta di skul wi go go bak na Nibraska. So wi bin rili sɔprayz we wi bin gɛt wan ɔda nyu asaymɛnt. Wi de go sav as mishɔnari na Kambodya! Na fayn kɔntri we bin de na Sawt Eshya. We wi go de, wi bin si, yɛri, ɛn it tin dɛn we wi nɔ sabi. Wi rili want fɔ tɛl pipul dɛn di gud nyus bɔt di Kiŋdɔm.

Bɔt pɔlitiks bin chenj ɔltin na Kambodya, ɛn dat bin mek wi bin gɛt fɔ go na Sawt Viyɛtnam. Afta 2 ia, a bin rili sik, ɛn wi bin gɛt fɔ go bak na Amɛrika. A bin nid sɔm tɛm fɔ mek a fil bɛtɛ. We a bin bɛtɛ, wi bin bigin fɔ payɔnia bak.

Insay Mach 1965, wi bin bigin fɔ du sakit wok. Fɔ 33 ia, mi ɛn Anji bin ɛnjɔy fɔ du sakit ɛn distrikt wok, ɛn wi bin ɛp bak fɔ ɔganayz kɔnvɛnshɔn dɛn. A bin de ɛnjɔy fɔ du dis wok bikɔs kɔnvɛnshɔn tɛm na tɛm we a kin rili gladi. Fɔ sɔm tɛm wi bin de go na difrɛn difrɛn kɔngrigeshɔn dɛn we bin de insay Nyu Yɔk ɛn ɔda say dɛn we de nia de. Wi bin de gɛt bɔku pan wi kɔnvɛnshɔn dɛn na Yanki Stediɔm.

Mi ɛn Anji bin gɛt bɔku nyu wok dɛn we nɔ bin izi fɔ du. Insay 1995, dɛn bin se mek  a tich na di Ministerial Training School. Afta tri ia, dɛn bin kɔl wi na Bɛtɛl. Afta 40 ia, a bin gladi fɔ kam bak na Bɛtɛl usay a bin bigin fɔ yuz ɔl mi tɛm fɔ sav Jiova. Fɔ sɔm tɛm, a bin wok na di Savis Dipatmɛnt ɛn mi na bin ticha bak na bɔku pan di skul dɛn. Insay 2007, di Gɔvnin Bɔdi bin mek di Tiokratik Skul Dipatmɛnt we de kia fɔ ɔl di skul dɛn we dɛn bin de gɛt na Bɛtɛl. Fɔ sɔm tɛm, mi na bin di ovasia fɔ da dipatmɛnt de.

Dis biɛn tɛm, dɛn dɔn chenj bɔku tin dɛn pan di skul dɛn we dɛn kin gɛt na Bɛtɛl. Insay 2008, dɛn bin bigin di Skul fɔ Kɔngrigeshɔn Ɛlda dɛn. Ɛn insay tu ia afta dat, i pas 12,000 ɛlda dɛn we dɛn bin tich na da skul de na Patasin ɛn Bruklin Bɛtɛl. Dɛn bin kɔntinyu fɔ gɛt da skul de na bɔku ɔda say dɛn. Insay 2010, dɛn bin chenj di Ministerial Training School to Baybul Skul fɔ Brɔda dɛn We Nɔ Mared, ɛn dɛn bin mek wan nyu skul we dɛn kɔl Baybul Skul fɔ di Wan dɛn We Mared.

Insay Sɛptɛmba 2014, dɛn bin jɔyn dɛn tu skul dɛn ya ɛn dɛn bin mek am Skul fɔ di Wan dɛn We De Prich bɔt di Kiŋdɔm. Di studɛnt dɛn kin bi pipul dɛn we mared, ɛn brɔda ɛn sista dɛn we nɔ mared. Bɔku pipul dɛn we de difrɛn say dɛn na di wɔl bin gladi fɔ yɛri se dɛnsɛf go gɛt dis skul na dɛn kɔntri. I rili fayn fɔ no se bɔku pipul dɛn go gɛt di chans fɔ go dis skul. Ɛn a rili gladi fɔ sabi bɔku pipul dɛn we dɔn mek bɔku chenj dɛn fɔ mek dɛn go ebul fɔ gɛt dis trenin.

We a tink bɔt mi layf frɔm di tɛm we a bin baptayz na da kol fam os, a kin tɛl Jiova tɛnki fɔ we i dɔn mek a sabi pipul dɛn we gɛt sɛns. Dɛn dɔn ɛp mi fɔ sabi am ɛn sav am fayn. Sɔm dɛn bin yɔŋ pas mi, ɛn sɔm dɛn bin ol pas mi. Ɛn bɔku pan dɛn bin gɛt kɔlchɔ dɛn we difrɛn frɔm mi yon. Bɔt frɔm di we aw dɛn bin de biev ɛn di we aw dɛn bin de du tin, mek a no se dɛn rili lɛk Jiova. A rili gladi fɔ gɛt bɔku padi dɛn we gɛt sɛns ɛn we a kin lan frɔm.