1. Wetin kin mek sɔm pipul dɛn fit fɔ gɛt ɔnɔ? Wetin wi go lan na dis atikul?

AW WI go sho ɔnɔ to pipul dɛn? Wi go du so bay we wi de gi dɛn wi atɛnshɔn ɛn sho dɛn rɛspɛkt. Bɔku tɛm wi kin ɔnɔ di wan dɛn we dɔn du sɔntin we mek wi fɔ ɔnɔ dɛn ɔ we gɛt impɔtant asaynmɛnt ɔ pozishɔn. Insay dis atikul, wi go lan bɔt udat dɛn wi fɔ gi ɔnɔ ɛn wetin mek wi fɔ du dat.

2, 3. (a) Wetin mek Jiova fit fɔ mek wi ɔnɔ am? (Luk di pikchɔ nia dis atikul in taytul.) (b) Udat na di Ship na Rɛvɛleshɔn 5:​13? Wetin mek wi fɔ ɔnɔ am?

² Rɛvɛleshɔn 5:​13 tɔk se “di wan we sidɔm pan di ay chia we kiŋ kin sidɔm pan ɛn di Ship” fit fɔ mek wi ɔnɔ dɛn. “Di wan we sidɔm pan di ay chia we kiŋ kin sidɔm” na Jiova. Insay Rɛvɛleshɔn chapta 4, di enjɛl dɛn na ɛvin mek wi no wan rizin we mek Jiova, we na “di Wan we de sote go,” fit fɔ mek wi ɔnɔ am. Dɛn se: “Jiova wi Gɔd, yu  fit fɔ gɛt di prez, di ɔnɔ ɛn di pawa bikɔs na yu mek ɔltin, ɛn yu mek ɔltin bikɔs na dat yu want.”—Rɛvɛleshɔn 4:​9-11, NW.

³ “Di Ship” na Rɛvɛleshɔn 5:​13 na Jizɔs Krays. Aw wi no? Di tɛm we i bin de na dis wɔl, dɛn bin kɔl am di “Ship we de pul sin kɔmɔt na di wɔl!” (Jɔn 1:​29, NW) Us ɔda kiŋ de we dɔn ɛva gri fɔ day fɔ sev di wan dɛn we i de rul? Dis na gud rizin fɔ mek wi ɔnɔ am. Jizɔs fit fɔ mek wi ɔnɔ am bikɔs “in na di Kiŋ fɔ ɔl di wan dɛn we de rul as kiŋ ɛn di Masta fɔ ɔl di wan dɛn we de rul as masta.” (Fɔs Lɛta To Timoti 6:​14-16, NW) Sɔntɛm yu de fil lɛk dɛn bɔku bɔku pawaful enjɛl dɛn na ɛvin we de siŋ se: “Di Ship we dɛn bin kil, fit fɔ mek wi sho se i gɛt pawa, i jɛntri, i gɛt sɛns, i gɛt trɛnk, i gɛt ɔna, i wɔndaful, ɛn wi fɔ prez am.”—Rɛvɛleshɔn 5:​12.

4. Wetin mek i mek sɛns fɔ lɛ wi ɔnɔ Jiova ɛn Krays?

⁴ Jɔn 5:​22, 23 se Jiova dɔn mek Krays di jɔj fɔ ɔl mɔtalman. Dat na wan men rizin we mek wi fɔ ɔnɔ Jizɔs. Ɛn we wi du dat, wi de ɔnɔ Jiova. We wi disayd fɔ ɔnɔ Jizɔs ɛn in Papa, wi go gɛt layf we go de sote go.—Rid Sam 2:​11, 12.

5. Wetin mek ɔlman fit fɔ gɛt ɔnɔ ɛn rɛspɛkt?

⁵ Gɔd mek mɔtalman “lɛkɛ insɛf.” (Jɛnɛsis 1:​27) We min se bɔku pipul dɛn gɛt kwaliti dɛn we fiba lɛk Gɔd. Fɔ ɛgzampul, mɔtalman dɛn ebul fɔ lɛk, du gud ɛn sho sɔri at. We Gɔd mek mɔtalman i gi am kɔnshɛns we de mek i no wetin rayt ɛn wetin rɔng, wetin ɔnɛs ɛn wetin nɔ ɔnɛs, wetin fayn ɛn wetin nɔ fayn. (Lɛta Fɔ Rom 2:​14, 15) Bɔku pipul dɛn lɛk tin dɛn we klin ɛn fayn ɛn want fɔ de wit ɔda pipul dɛn wit kolat. Dis nɔ fɔ sɔprayz wi, bikɔs Jiova na Gɔd we ɔganayz ɛn na Gɔd we gɛt kolat. Wi dɔn si klia wan se Jiova mek mɔtalman fɔ falamakata am pan bɔku tin dɛn. Fɔ dis rizin, mɔtalman fit fɔ gɛt ɔnɔ ɛn rɛspɛkt.—Sam 8:​5.

6, 7. Aw Jiova Witnɛs dɛn difrɛn frɔm bɔku pipul dɛn we dɛn de sho ɔnɔ to ɔda pipul dɛn?

⁶ Wi no se wi fɔ ɔnɔ ɔda pipul dɛn, bɔt i nɔ kin izi fɔ no uskayn ɔnɔ wi fɔ gi dɛn. Dis na bikɔs i kin izi fɔ lɛ mɔtalman we nɔ pafɛkt tink ɔ du tin lɛk in kɔmpin mɔtalman dɛn na Setan in wɔl. Bɔku pipul dɛn kin tek sɔm man ɔ uman dɛn as dɛn aydɔl. Bifo dɛn gi dɛn ɔnɔ ɛn rɛspɛkt di we aw Jiova want, dɛn kin gi dɛn pasmak ɔnɔ ɛn trit dɛn lɛk gɔd dɛn. Dɛn kin drɛs ɛn biev lɛk dɛn pɔlitishian dɛn, pipul dɛn we de bifo pan Gɔd biznɛs, pipul dɛn we de pan spɔt biznɛs, dɛn wan dɛn we de akt fim, ɛn ɔda pipul we bɔku pipul dɛn sabi.

⁷ Tru Kristian dɛn no se i nɔ go fayn fɔ ɔnɔ mɔtalman dɛn da we de. Pan ɔl di pipul dɛn we dɔn ɛva liv na dis wɔl na Jizɔs nɔmɔ dɔn sɛt pafɛkt ɛgzampul fɔ wi fɔ falamakata. (Pita In Fɔs Lɛta 2:​21) Wi nid fɔ mɛmba se “ɔlman dɔn sin, dɛn nɔ bi igen lɛkɛ aw dɛn bin fɔ bi, if dɛn bin stil de klos Gɔd.” (Lɛta Fɔ Rom 3:​23) No mɔtalman nɔ de we fit fɔ mek wi wɔship. We wi gi ɔnɔ to  mɔtalman pas di we aw wi fɔ du am, i kin mek Jiova nɔ gladi.

8, 9. (a) Aw Jiova Witnɛs dɛn de si gɔvmɛnt wokman dɛn? (b) Wetin go mek wi nɔ obe dɛn?

⁸ Sɔm pipul dɛn de we fit fɔ mek wi ɔnɔ ɛn rɛspɛkt fɔseka udat dɛn bi. Fɔ ɛgzampul, tink bɔt gɔvmɛnt wokman dɛn ɛn wetin dɛn de du fɔ yu. Dɛn de ɛp fɔ mek di eria sef fɔ dɛn pipul dɛn ɛn dɛn de mek di pipul dɛn na dɛn kɔntri gɛt di tin dɛn we dɛn nid. Bɔku bɛnifit dɛn de we wi de gɛt frɔm di wok we dɛn de du. Di apɔsul Pɔl bin se wi fɔ tek dɛn gɔvmɛnt wokman dɛn as pipul dɛn “we de rul na di kɔntri.” I bin tɔk bak se wi fɔ fala dɛn lɔ dɛn: “Una fɔ pe dɛn ɔl wetin una gɛt fɔ pe dɛn; una fɔ pe ɛni taks we di gɔvmɛnt se una fɔ pe, ɛn una fɔ rɛspɛkt ɔl una rula dɛn.”—Lɛta Fɔ Rom 13:​1, 7.

⁹ As Jiova Witnɛs dɛn, wi want fɔ du ɔl wetin wi ebul fɔ sho rɛspɛkt fɔ dɛn gɔvmɛnt wokman dɛn. Na tru se ɔl kɔntri gɛt dɛn yon we aw dɛn de du tin, so wi fɔ no se wetin govmɛnt wokman dɛn go want wi fɔ du na wan kɔntri go difrɛn frɔm wetin ɔda gɔvmɛnt wokman dɛn na ɔda kɔntri go want wi fɔ du. Bɔt stil, wi want fɔ du wetin gɔvmɛnt wokman dɛn tɛl wi fɔ du as dɛn de du dɛn wok. Bɔt, if dɛn tɛl wi fɔ du sɔntin we Jiova nɔ want, wi nɔ go du am. If dɛn kayn tin ya apin, wi go obe ɛn ɔnɔ Jiova nɔto mɔtalman.—Rid Pita In Fɔs Lɛta 2:​13-17.

10. Aw Jiova in savant dɛn we bin de trade bin sɛt gud ɛgzampul fɔ wi tide?

¹⁰ Wi kin lan frɔm Jiova in savant dɛn trade, we bin ɔnɔ gɔvmɛnt dɛn ɛn dɛn wokman dɛn. Josɛf ɛn Meri na wan gud ɛgzampul. We di Roman gɔvmɛnt bin want fɔ no ɔmɔs pipul dɛn bin de liv na di land, Josɛf ɛn Meri bin travul go na Bɛtliɛm fɔ go rɛgista pan ɔl we Meri in bɛlɛ bin dɔn trɔng fɔ bɔn. (Lyuk 2:​1-5) Apɔsul Pɔl insɛf na bin pɔsin we bin de rɛspɛkt dɛn rula dɛn. We dɛn bin lay pan am se i du sɔntin we bad, i bin sho rɛspɛkt we i bin de ɛksplen wetin apin to Kiŋ Ɛrod Agripa ɛn Fɛstɔs, we na bin di Roman gɔvnɔ na Judia.—Di Apɔsul Dɛn Wok [Akt] 25:​1-12; 26:​1-3.

11, 12. (a) Wetin mek wi nɔ de gi spɛshal ɔnɔ to di bigman dɛn pan Gɔd biznɛs? (b) Wetin bin apin we wan Witnɛs na Ɔstria bin sho rɛspɛkt to wan pɔlitishian?

¹¹ We dɛn bigman dɛn pan Gɔd biznɛs? Wi fɔ gi dɛn spɛshal ɔnɔ? Wi fɔ gi dɛn di sem kayn ɔnɔ we wi de gi to ɛnibɔdi. Bɔt i go rɔng fɔ mek wi gi dɛn spɛshal ɔnɔ ivin if na dat dɛn want. Wetin mek? Bikɔs lay lay riligɔn nɔ de tich di tru bɔt Gɔd ɛn in Wɔd, di Baybul. Jizɔs bin kɔndɛm dɛn lay lay ticha dɛn pan Gɔd biznɛs ɛn kɔl dɛn ipokrit ɛn bad lida dɛn. (Matyu 23:​23, 24) Bɔt i nɔ rɔng fɔ mek wi gi spɛshal rɛspɛkt ɛn ɔnɔ to gɔvmɛnt wokman dɛn. Bikɔs wi dɔn de du dis, dat dɔn mek dɛn ɛp wi sɔntɛm dɛn de.

¹² Wan pan dɛn gɔvmɛnt wokman dɛn de na Dɔktɔ Hɛrich Glesna, we na wan pɔlitishian na Ɔstria. Insay Wɔl Wɔ Tu di Nazi gɔvmɛnt bin ol am. In ɛn wan Jiova Witnɛs we nem Liopold Ɛnglaytna, we kɔmɔt Ɔstria ɛn we bin gɛt zil fɔ prich, bin mitɔp pan  wan tren we dɛn put dɛn fɔ go na wan kamp usay di Nazi gɔvmɛnt bin de kɛr dɛn prizina dɛn go. Brɔda Ɛnglaytna bin tɔk wit rɛspɛkt to Dɔktɔ Glesna ɛn tɛl am wetin i biliv. Ɛn Dɔktɔ Glesna tek tɛm lisin to am. We di wɔ bin dɔn, Glesna bin de yuz in pawa fɔ ɛp Jiova Witnɛs dɛn na Ɔstria. I go bi se yu no bɔt ɔda ɛgzampul dɛn bɔt di gud tin dɛn we dɔn apin we Kristian dɛn sho rɛspɛkt to gɔvmɛnt wokman dɛn.

13. Udat dɛn mɔ fit fɔ mek wi sho ɔnɔ ɛn rɛspɛkt? Wetin mek?

¹³ Wi brɔda ɛn sista dɛn fit fɔ mek wi ɔnɔ ɛn rɛspɛkt dɛn. Mɔ so di brɔda dɛn we de bifo wi, lɛk di ɛlda dɛn, sakit ovasia dɛn, Branch Kɔmiti mɛmba dɛn, ɛn Gɔvnin Bɔdi mɛmba dɛn. (Rid Fɔs Lɛta To Timoti 5:​17.) Dɛn ɔl de kia fɔ Gɔd in pipul dɛn, ɛn di Baybul kɔl dɛn savant ya as ‘man dɛn we tan lɛk gift.’ (Lɛta Fɔ Ɛfisɔs 4:​8) So i mek sɛns fɔ mek wi ɔnɔ ɛn rɛspɛkt dɛn, ilɛk us kɔntri dɛn kɔmɔt, ɔmɔs buk dɛn lan, udat dɛn bi, ɔ ilɛksɛf dɛn gɛt mɔni ɔ nɔ gɛt mɔni. Di Kristian dɛn we bin de trade sɛt fayn ɛgzampul fɔ wi. Dɛn bin de ɔnɔ di wan dɛn we bin de bifo dɛn, ɛn wisɛf de du di sem tin tide. We wi de wit dɛn man dɛn ya, wi nɔ de trit dɛn lɛk se dɛn na enjɛl dɛn ɔ pipul dɛn we pawaful pas mɔtalman. Bɔt wi de rɛspɛkt ɛn ɔnɔ dɛn fɔ di tranga wok we dɛn de du ɛn we dɛn de put dɛnsɛf dɔŋ.—Rid Sɛkɛn Lɛta Fɔ Kɔrint 1:​24; Rɛvɛleshɔn 19:​10.

14, 15. Aw di ɛlda dɛn na di kɔngrigeshɔn dɛn difrɛn frɔm di bigman dɛn pan rilijɔn?

¹⁴ Dɛn kayn ɛlda dɛn de tan lɛk  shɛpad dɛn we ɔmbul. Dɛn nɔ want lɛ dɛn trit dɛn lɛk pipul dɛn we bɔku pipul dɛn na di wɔl sabi. Dɛn difrɛn frɔm di bigman dɛn pan rilijɔn tide ɛn di bigman dɛn pan rilijɔn insay Jizɔs in tɛm. We Jizɔs bin de tɔk bɔt dɛn, i bin se: “Wɛn dɛn go na pati, dɛn lɛk fɔ sidɔm na dɛn ples we dɛn bigman de sidɔm, ɛn wɛn dɛn go na di Ju mitin os, dɛn lɛk fɔ sidɔm na di bɛnch we de bifo. Wɛn dɛn go na di ples we ɔlman de gɛda, dɛn lɛk fɔ mek ɔlman nil dɔŋ fɔ tɛl dɛn adu.”—Matyu 23:​6, 7.

¹⁵ Di ɛlda dɛn de obe wetin Jizɔs bin tɔk we i se: “Una nɔ fɔ mek pipul kɔl una ‘Ticha,’ bikɔs na wangren Ticha una gɛt, ɛn una ɔl na brɔda ɛn sista. Ɛn una nɔ fɔ kɔl una kɔmpin Kristiɛn ‘Papa’ na dis wɔl, bikɔs na wangren Papa una gɛt we de na ɛvin. Una nɔ fɔ mek dɛn kɔl una ‘Masta,’ bikɔs na di Mɛsaya in wangren na una Masta. Di wan we want bi impɔtant pas una ɔl fɔ bi una savant. Ɛnibɔdi we put insɛf ɔp, Gɔd go put am dɔŋ, bɔt ɛnibɔdi we put insɛf dɔŋ, Gɔd go es am ɔp.” (Matyu 23:​8-12) We di ɛlda dɛn na ɔl di kɔngrigeshɔn dɛn ɔlsay na di wɔl put dɛnsɛf dɔŋ ɛn du wetin Jizɔs se, dɛn brɔda ɛn sista dɛn go lɛk dɛn, rɛspɛkt dɛn, ɛn ɔnɔ dɛn.

16. Wetin mek wi fɔ kɔntinyu fɔ wok tranga wan fɔ sho ɔnɔ?

¹⁶ I kin tek tɛm fɔ mek wi lan aw fɔ ɔnɔ ɔda pipul dɛn. Na so bak i bin bi fɔ dɛn Kristian dɛn we bin de trade. (Di Apɔsul Dɛn Wok [Akt] 10:​22-26; 3 Jɔn 9, 10) Bɔt i fayn fɔ mek wi lan fɔ ɔnɔ ɔda pipul dɛn. We wi ɔnɔ ɔda pipul dɛn di we aw Jiova want, wi go gɛt bɔku bɛnifit.

17. Us bɛnifit dɛn wi kin gɛt we wi sho ɔnɔ to pipul dɛn we gɛt pawa?

¹⁷ We wi ɔnɔ ɛn rɛspɛkt pipul dɛn we gɛt pawa na di eria we wi de, dɛn go mɔs ɛp wi fɔ gɛt rayt fɔ prich. Dɛn go ivin tink di rayt we bɔt wi prichin wok. Dis bin apin trade trade na Jamani we wan sista we nem Bagɛt go na in gyal pikin in skul gradyueshɔn. Di ticha dɛn tɛl Bagɛt se dɛn gladi we dɛn dɔn de gɛt Witnɛs pikin dɛn na dɛn klas fɔ lɔng tɛm naw. Dɛn se di Witnɛs pikin dɛn mek di skul bi bɛtɛ ples. Bagɛt bin tɛl dɛn se, “Wi de lan wi pikin dɛn fɔ biev di we aw Gɔd want, ɛn wan pan dɛn we dɛn de na fɔ sho rɛspɛkt fɔ ticha dɛn ɛn ɔnɔ dɛn.” Wan ticha se if ɔl pikin dɛn bin tan lɛk di Witnɛs dɛn, tichin wok fɔ dɔn izi. Di ticha dɛn bin de tink di rayt we bɔt di Witnɛs pikin dɛn ɛn dat bin mek afta sɔm wik  pas, wan pan di ticha dɛn bin go wan kɔnvɛnshɔn.

18, 19. Wetin wi fɔ mɛmba we wi de ɔnɔ ɛlda dɛn?

¹⁸ Di advays dɛn na Gɔd in Wɔd go ɛp wi fɔ ɔndastand aw fɔ sho ɔnɔ to di ɛlda dɛn na di kɔngrigeshɔn. (Rid Di Ibru Pipul Dɛn 13:​7, 17.) Wi fɔ tɛl dɛn tɛnki fɔ di tranga wok we dɛn de du. We wi de du wetin di ɛlda dɛn de tɛl wi fɔ du, dɛn go gladi we dɛn de du dɛn wok. Di Baybul tɔk bak se wi fɔ falamakata di fet we dɛn gɛt. Bɔt dis nɔ min se wi fɔ falamakata di sem we aw wan ɛlda we ɔlman no de drɛs, tɔk, ɛn tich. If wi de du dat, i go tan lɛk se wi de fala mɔtalman, we i bi se na Krays wi fɔ de fala. Wi fɔ mɛmba se ɛlda dɛn nɔ pafɛkt jɔs lɛk wi.

¹⁹ If wi de ɔnɔ ɛn rɛspɛkt di ɛlda dɛn ɛn nɔ trit dɛn lɛk pipul dɛn we bɔku pipul dɛn na di wɔl sabi, dis go ɛp dɛn. Aw dis go ɛp dɛn? I go izi fɔ dɛn fɔ put dɛnsɛf dɔŋ ɛn nɔ de tink se dɛn bɛtɛ pas ɔda pipul dɛn ɔ nɔ de tink se wetin dɛn de du rayt ɔltɛm.

20. Aw wi go bɛnifit we wi ɔnɔ ɔda pipul dɛn?

²⁰ We wi de ɔnɔ ɔda pipul dɛn dat go ɛp wi nɔ fɔ de tink bɔt wisɛf nɔmɔ ɛn i go ɛp wi fɔ put wisɛf dɔŋ we dɛn ɔnɔ wi. I go protɛkt wi bak bikɔs i go ɛp wi fɔ mek wi nɔ alaw natin fɔ ambɔg wi padi biznɛs wit Jiova if pɔsin we wi rɛspɛkt du sɔntin we wi nɔ bin de tink se i go du. Wan ɔda bɛnifit na dat, i go mek wi gɛt wanwɔd wit Jiova in ɔganayzeshɔn. Di ɔganayzeshɔn nɔ de gi ɛni mɔtalman pasmak ɔnɔ, ilɛksɛf in na Jiova Witnɛs ɔ nɔto Jiova Witnɛs.

21. Us bɛnifit de we pas ɔl we wi ɔnɔ ɔda pipul dɛn?

²¹ Di bɛnifit we pas ɔl we wi ɔnɔ ɔda pipul dɛn na dat i go mek Jiova gladi. Dat go sho se wi de du wetin Jiova want wi fɔ du ɛn wi go kɔntinyu fɔ bi fetful to am. Dɔn, Jiova go ansa Setan we se, nɔbɔdi nɔ go bi fetful to Jiova. (Prɔvabs 27:​11) Bɔku pipul dɛn na di wɔl nɔ no aw fɔ gi ɔnɔ to ɔda pipul dɛn di rayt we. Wi rili gladi we wi no aw fɔ ɔnɔ pipul dɛn di we aw Jiova want!