1-3. Wetin i min fɔ sav Jiova ‘wit ɔl wi at’? Gi wan ɛgzampul.

WI ƆL nɔ pafɛkt ɛn wi kin mek mistek. Wi tɛl Jiova tɛnki fɔ we i mek i pikin day fɔ wi sin dɛn ɛn i rɛdi fɔ fɔgiv wi. So if wi put wisɛf dɔŋ ɛn chenj, wi kin aks am fɔ mek i fɔgiv wi. Wi fɔ biliv se Jiova nɔ go “pɔnish wi lɛk aw i fɔ pɔnish wi.” (Sam 103:​10) Stil, wi fɔ sav ‘Jiova wit ɔl wi at.’ (Fɔs Kronikul 28:​9) Aw wi go du dis pan ɔl we wi nɔ pafɛkt?

² Wan tin we go ɛp wi, na we wi kɔmpia di we aw Kiŋ Esa ɛn Kiŋ Amazaya bin liv dɛn layf. Dɛn tu kiŋ ya bin du gud tin dɛn, bɔt dɛn bin mek mistek bak bikɔs dɛn nɔ pafɛkt. Bɔt di Baybul se “Esa bin du wetin Gɔd want wit ɔl in at te i day.” (Sɛkɛn Kronikul 15:​16, 17; 25:​1, 2; Prɔvabs 17:​3) I bin de tray ɔltɛm fɔ du wetin go mek Jiova in at gladi ɛn i bin ‘sav am wit ɔl in at.’ (Fɔs Kronikul 28:​9) Bɔt Amazaya nɔ bin sav Jiova ‘wit ɔl  in at.’ Afta i dɔnawe wit Gɔd in ɛnimi dɛn, i bin kɛr dɛn lay lay gɔd dɛn go ɛn i bigin fɔ wɔship dɛn.—Sɛkɛn Kronikul 25:​11-16.

³ Pɔsin we de sav Gɔd ‘wit ɔl in at’ rili lɛk Jiova ɛn want fɔ sav am sote go. Insay di Baybul, di wɔd “at” min di kayn pɔsin we wi rili bi insay. I min bak di we aw wi de tink, wetin wi lɛk, wetin wi go lɛk fɔ du wit wi layf, ɛn wetin mek wi kin du di tin dɛn we wi de du. Pan ɔl we wi nɔ pafɛkt, wi go ebul fɔ wɔship Jiova wit ɔl wi at. Wi de sav am bikɔs wi rili want fɔ du dat, nɔto bikɔs wi fɔ du dat ɔ bikɔs na jɔs abit we wi dɔn gɛt.—Sɛkɛn Kronikul 19:​9.

4. Wetin wi de kam tɔk bɔt?

⁴ Wi go ɔndastand klia wan wetin i min fɔ sav Gɔd wit ɔl wi at we wi tink bɔt sɔm tin dɛn we apin na Kiŋ Esa in layf ɛn ɔda tri fetful kiŋ dɛn we bin rul na Juda. Dɛn kiŋ dɛn ya na Jɛoshafat, Ɛzikaya, ɛn Josaya. Pan ɔl we dɛn 4 kiŋ ya bin mek mistek, dɛn stil bin du wetin Jiova want. Jiova bin si se na wit ɔl dɛn at dɛn sav am. Wetin mek Gɔd bin si dɛn da kayn we de, ɛn aw wi go falamakata dɛn?

5. Wetin Esa bin du we i bi kiŋ?

⁵ Esa na bin di tɔd kiŋ we bin rul na Juda afta dɛn sheb Izrɛl to 2 kiŋdɔm, wan kiŋdɔm bin de na Izrɛl ɛn di ɔda kiŋdɔm bin de na Juda. We Esa bin bi kiŋ na Juda, i bin mekɔp in maynd fɔ stɔp lay lay wɔship ɛn di dɔti we aw dɛn bin de du mami ɛn dadi biznɛs we Gɔd nɔ want na in kiŋdɔm. I pwɛl pwɛl di lay lay gɔd dɛn we di pipul dɛn bin de wɔship ɛn drɛb ɔl di wan dɛn we bin de du mami ɛn dadi biznɛs na di tɛmpul. Esa bin ivin pul in grani kɔmɔt na in chia “as Mami Kwin bikɔs insɛf bin de mek lay lay gɔd fɔ wɔship.” (Fɔs Kiŋ 15:​11-13) Esa bin ɛnkɔrej di pipul dɛn bak fɔ tray fɔ no ‘wetin Jiova want, obe di lɔ, ɛn du ɔl wetin i tɛl dɛn.’ Esa bin du ɔl wetin i ebul fɔ ɛp ɔda pipul dɛn fɔ wɔship Jiova.—Sɛkɛn Kronikul 14:​4.

6. Wetin Esa bin du we di Itiopian dɛn kam fɔ fɛt di pipul dɛn na Juda?

⁶ Insay di fɔs tɛn ia we Esa rul, nɔbɔdi nɔ kam fɔ fɛt am so pis bin de na in kiŋdɔm na Juda. Dɔn di Itiopian dɛn kam wit wan milyɔn sojaman dɛn ɛn tri ɔndrɛd chariɔt dɛn fɔ fɛt di pipul dɛn na Juda. (Sɛkɛn Kronikul 14:​1, 6, 9, 10) Wetin Esa bin du? I nɔ bin gɛt wan dawt se Jiova go sev in pipul dɛn. So i pre to Jiova mek i ɛp dɛn fɔ win di fɛt. (Rid Sɛkɛn Kronikul 14:​11.) Sɔntɛnde, Jiova kin  mek in pipul dɛn win dɛn ɛnimi dɛn pan fɛt pan ɔl we di kiŋ dɛn nɔ bin fetful to am. I bin de du dis fɔ sho se na in na di tru Gɔd. (Fɔs Kiŋ 20:​13, 26-30) Bɔt insay Esa in tɛm, Jiova bin ɛp in pipul dɛn bikɔs Esa bin abop pan am. Jiova bin ansa Esa in prea, ɛn dɛn win di fɛt. (Sɛkɛn Kronikul 14:​12, 13) Leta, Esa bin mek wan siriɔs mistek we i nɔ aks Jiova fɔ ɛp am, bifo dat i aks di kiŋ na Sirya fɔ ɛp am. (Fɔs Kiŋ 15:​16-22) Pan ɔl dat, Jiova bin si se Esa lɛk am. ‘I mek shɔ se ɔl in at de wit Jiova te i day.’ Aw wi go falamakata Esa in gud ɛgzampul?—Fɔs Kiŋ 15:​14.

7, 8. Aw yu go falamakata Esa?

⁷ Aw wi go no if wi de sav Jiova wit ɔl wi at? Wi fɔ aks wisɛf kwɛstyɔn dɛn lɛk: ‘A go obe Jiova ivin we i nɔ izi? A dɔn mekɔp mi maynd nɔ fɔ du ɛnitin we go mek di kɔngrigeshɔn nɔ klin?’ Tink bɔt di kayn maynd we Esa bin nid fɔ pul in grani kɔmɔt na in chia as mami kwin. Sɔntɛnde, yu go nid fɔ gɛt maynd lɛk Esa. Fɔ ɛgzampul, lɛ wi se wan pɔsin na wi famili ɔ wi tayt padi sin ɛn nɔ gri fɔ chenj, dɔn dɛn disfɛloship am na di kɔngrigeshɔn. Yu go mekɔp yu maynd nɔ fɔ spɛn tɛm wit da pɔsin de? Wetin yu go du?

⁸ Jɔs lɛk Esa, sɔm tɛm dɛn de wi go fil se ɔlman de agens wi. Sɔntɛm yu skulmet dɛn ɔ ticha dɛn de laf yu bikɔs yu na wan pan Jiova Witnɛs dɛn. Ɔ sɔntɛm yu kɔmpin dɛn na wok ples tink se yu nɔ gɛt sɛns we yu tek ɛkskyuz na wok ples fɔ go assɛmbli ɔ bikɔs yu nɔ de wok ova taym. We dɛn kayn tin ya apin, abop pan Gɔd jɔs lɛk aw Esa bin du. Pre to Jiova, nɔ fred, ɛn kɔntinyu fɔ du wetin rayt. Mɛmba se Gɔd bin ɛp Esa, ɛn i go ɛp yu bak.

9. Aw wi de mek Jiova gladi we wi de prich?

⁹ Esa nɔ bin jɔs de tink bɔt insɛf, i bin ɛnkɔrej ɔda pipul dɛn fɔ tray fɔ no ‘wetin Jiova want.’ Wisɛf de ɛp pipul dɛn fɔ wɔship Jiova. Jiova kin si we wi de tɔk bɔt am to ɔda pipul dɛn. I kin gladi we i si se wi de du dat bikɔs wi lɛk am ɛn wi bisin bɔt pipul dɛn ɛn dɛn tumara bambay!

10, 11. Aw wi go falamakata Jɛoshafɛt?

¹⁰ Esa in bɔy pikin we na Jɛoshafat bin “du ɔl wetin in papa Esa bin de du.” (Sɛkɛn Kronikul 20:​31, 32) Aw i bin du dat? Jɔs lɛk in papa, Jɛoshafat bin de ɛnkɔrej di pipul dɛn fɔ kɔntinyu fɔ wɔship Jiova. I bin sɛn man dɛn fɔ go na di siti dɛn na Juda fɔ tich pipul dɛn wetin de insay “di buk we PAPA GƆD [“Jiova,” NW] in  lɔ dɛn rayt.” (Sɛkɛn Kronikul 17:​7-10) I ivin go na di kiŋdɔm we bin de na di nɔt pat na Izrɛl to di pipul dɛn we bin de ɔp Ifrem in mawnten dɛn fɔ “briŋ dɛn kam bak” to Jiova. (Sɛkɛn Kronikul 19:​4) Jɛoshafat na bin kiŋ we “fɛn” Jiova “wit ɔl in at.”—Sɛkɛn Kronikul 22:​9.

¹¹ Tide, Jiova want mek pipul dɛn ɔlsay na di wɔl lan bɔt am, ɛn wi ɔl kin ɛp wit dis wok. Yu dɔn mekɔp yu maynd fɔ du dis wok ɛni mɔnt? Yu go lɛk fɔ tich ɔda pipul dɛn di Baybul so dat dɛnsɛf go bigin fɔ wɔship Jiova? Dis na sɔntin we yu kin pre bɔt? If yu tray yu bɛst, Jiova kin ɛp yu fɔ stat Baybul stɔdi. Yu go rɛdi fɔ stɔdi wit sɔmbɔdi pan ɔl we i min se yu go gɛt fɔ sakrifays sɔm pan yu fri taym? Ɛn jɔs lɛk we Jɛoshafat tray fɔ ɛp ɔda pipul dɛn fɔ bigin fɔ sav Jiova igen, wisɛf kin tray fɔ ɛp di wan dɛn we dɔn lɛf fɔ kam di mitin dɛn. Ɛn di ɛlda dɛn kin arenj bak fɔ go fɛn ɛn ɛp di wan dɛn we disfɛloship, we de na wan pan di say dɛn we di kɔngrigeshɔn kin prich ɛn we go dɔn lɛf di bad tin we i bin du.

12, 13. (a) We Jɛoshafat bin de fred, wetin i bin du? (b) Wetin mek wi fɔ fala Jɛoshafat in ɛgzampul?

¹² Jɔs lɛk in papa we na Esa, Jɛoshafɛt bin abop pan Jiova we bɔku sojaman dɛn bin kam fɔ fɛt di pipul dɛn na Juda. (Rid Sɛkɛn Kronikul 20:​2-4.) I bin fred ɛn beg Jiova fɔ ɛp am. We i bin de pre, i tɛl Jiova se dɛn nɔ go ebul fɔ win di ɛnimi dɛn. I tɔk bak se i ɛn in pipul dɛn nɔ no wetin fɔ du. Jɛoshafat nɔ bin gɛt wan dawt se Jiova go ɛp dɛn. I bin tɔk se: “Wi de luk to yu.”—Sɛkɛn Kronikul 20:​12.

¹³ Jɔs lɛk Jɛoshafat, sɔntɛnde wi nɔ kin no wetin fɔ du we wi gɛt prɔblɛm, ɛn wi go ivin fred. (Sɛkɛn Lɛta Fɔ Kɔrint 4:​8, 9) Bɔt mɛmba wetin Jɛoshafat bin du. I bin tinap bifo ɔl di pipul dɛn ɛn pre to Jiova ɛn tɛl am aw dɛn nɔ gɛt bɛtɛ trɛnk fɔ fɛt. (Sɛkɛn Kronikul 20:​5) Di wan dɛn we de bifo di famili kin falamakata Jɛoshafat in ɛgzampul. Pre to Jiova mek i ɛp yu ɛn yu famili fɔ bia wit di prɔblɛm ɛn lɛ i ɛp yu fɔ no wetin fɔ du. Nɔ shem se yu famili go yɛri we yu pre dis we. Dɛn go kam fɔ no se yu abop pan Jiova. Jiova ɛp Jɛoshafat, ɛn i go ɛp yu bak.

14, 15. Aw Ɛzikaya bin abop pan Gɔd wit ɔl in at?

¹⁴ Ɛzikaya na bin wan ɔda kiŋ we “bin de wit PAPA GƆD [“Jiova,” NW] tigi tigi wan.” I bin du dis pan ɔl we in papa na bin bad ɛgzampul ɛn i bin de wɔship lay lay gɔd dɛn. Ɛzikaya bin “pwɛl pwɛl ɔl dɛn ay ples we dɛn mek fɔ de wɔship lay lay gɔd, ɛn brok da gɔd we nem Ashɛra in lay lay gɔd. I brok da bras snek we Mozis bin mek,” bikɔs di Izrɛlayt dɛn bin de wɔship am. Ɛzikaya bin sav Jiova wit ɔl in at. “I bin de fala di lɔ we PAPA GƆD [“Jiova,” NW] gi Mozis.”—Sɛkɛn Kiŋ 18:​1-6.

 ¹⁵ Di tɛm we Ɛzikaya bin de rul, di pawaful Asirian ami bin kam na Juda ɛn trɛtin se dɛn go dɔnawe wit Jerusɛlɛm. Di kiŋ na Asiria we nem Sɛnakarib, bin de provok Jiova ɛn tray fɔ mek Ɛzikaya sɔrɛnda. I nɔ bin izi fɔ Ɛzikaya da tɛm de, bɔt i bin abop pan Jiova wit ɔl in at ɛn pre to am fɔ ɛp am. I bin no se Gɔd gɛt pawa fa fawe pas di Asirian dɛn ɛn i go ebul sev in pipul dɛn. (Rid Ayzaya 37:​15-20.) Gɔd bin ansa Ɛzikaya in prea bay we i sɛn wan enjɛl fɔ kil 185,000 Asirian sojaman dɛn.—Ayzaya 37:​36, 37.

16, 17. Aw yu go falamakata Ɛzikaya?

¹⁶ Leta, Ɛzikaya bin sik ɛn i bin lɛf smɔl fɔ mek i day. Insay da tranga tɛm de, Ɛzikaya bin beg Jiova fɔ mek i mɛmba aw i dɔn de fetful wan wit am ɛn fɔ mek i ɛp am. (Rid Sɛkɛn Kiŋ 20:​1-3.) Jiova bin yɛri Ɛzikaya in prea ɛn i bin mek i wɛl. Wi dɔn lan insay di Baybul se tide Gɔd nɔ de yuz mirekul fɔ mɛn wi sik dɛn ɔ fɔ mek wi gɛt lɔng layf. Bɔt jɔs lɛk Ɛzikaya, wisɛf kin abop pan Jiova fɔ ɛp wi. Wi kin tɛl am se: “O Jiova, a de beg yu, duya mɛmba aw a dɔn waka tret wan bifo yu wit ɔl mi at.” Yu biliv se Jiova go bisin bɔt yu ɔltɛm, ivin we yu sik?—Sam 41:​3.

¹⁷ Us ɔda we bak wi go falamakata Ɛzikaya? Sɔntɛm sɔntin de we wan ambɔg yu padi biznɛs wit Jiova ɔ we de mek yu nɔ gɛt bɛtɛ tɛm fɔ sav am. Fɔ ɛgzampul, bɔku pipul dɛn tide de trit dɛn kɔmpin mɔtalman lɛk se dɛn na gɔd. Dɛn de kɔle pan pipul dɛn we bɔku pipul dɛn sabi ɛn ɔda pipul dɛn we dɛn nɔ ivin sabi. Bɔku pan dɛn de spɛn plɛnti tɛm fɔ rid bɔt dɛn kayn pipul dɛn de ɛn wach dɛn pikchɔ dɛn. Ɔ plɛnti tɛm dɛn kin yuz Fesbuk, Watsap, Twita ɔ ɔda tin dɛn fɔ tɔk wit pipul dɛn na di Intanɛt. Na tru se wi kin ɛnjɔy fɔ yuz dɛn tin dɛn de fɔ tɔk wit wi fambul dɛn ɛn wi tayt padi dɛn. Bɔt wi kin wes pɛnti tɛm pan dɛn tin dɛn de. Wi go ivin bigin fɔ mek prawd if bɔku pipul dɛn de tɔk se dɛn lɛk wi pikchɔ dɛn ɔ di kɔmɛnt dɛn we wi put na di Intanɛt. Ɔ if wi kam fɔ no se sɔm dɔn lɛf fɔ luk dɛn pikchɔ dɛn de, wi kin vɛks. Bɔt wi kin lan frɔm Pɔl, Akwila, ɛn Prisila dɛn ɛgzampul. Yu tink se dɛn bin de spɛn tɛm de luk fɔ ɛni smɔl tin we pipul dɛn de du, mɔ di wan dɛn we nɔ de sav Jiova? Di Baybul se Pɔl bin “tek ɔl in tɛm de tɛl pipul wetin Jizɔs se.” Ɛn Akwila ɛn Prisila bin de spɛn dɛn tɛm fɔ prich ɛn ɛksplen “Gɔd yon We” kɔrɛkt wan to ɔda pipul dɛn. (Di Apɔsul Dɛn Wok [Akt] 18:​4, 5, 26) Wi kin aks wisɛf dɛn kwɛstyɔn ya: ‘A de tek tɛm nɔ fɔ trit mi kɔmpin mɔtalman lɛk gɔd? A de avɔyd fɔ spɛn bɔku tɛm pan tin dɛn we nɔ rili impɔtant?’—Rid Lɛta Fɔ Ɛfisɔs 5:​15, 16.

18, 19. Aw wi go tan lɛk Josaya?

¹⁸ Kiŋ Josaya insɛf bin obe Jiova in lɔ dɛn “wit ɔl in at.” (Sɛkɛn Kronikul 34:​31) Josaya na bin Ɛzikaya in gret granpikin. We in na bin bɔbɔ, “i bigin  fɔ fɛn in papa Devid in Gɔd.” Ɛn we i bin ol 20 ia, i bin stat fɔ pwɛl pwɛl ɔl di lay lay gɔd dɛn na Juda. (Rid Sɛkɛn Kronikul 34:​1-3.) Josaya bin tray tranga wan fɔ du wetin Jiova want pas bɔku ɔda kiŋ dɛn na Juda. Dɔn, wan de, di ay prist bin fɛn di buk we Gɔd in lɔ dɛn bin rayt pan na di tɛmpul. Sɔntɛn dis buk na bin di buk we Mozis insɛf sɛf bin rayt! We di sɛktri bin rid am to Josaya, i bin kam fɔ no se i nid fɔ du mɔ fɔ sav Jiova wit ɔl in at. I bin ɛnkɔrej ɔda pipul dɛn bak fɔ du di sem tin. Fɔseka dis, di pipul dɛn ‘nɔ lɛf fɔ fala Jiova,’ di tɛm we Josaya bin de alayf.—Sɛkɛn Kronikul 34:​27, 33.

¹⁹ If yu na yɔŋ pɔsin, yu kin falamakata Josaya ɛn kam fɔ no Jiova gud gud wan. I go bi se Josaya bin lan frɔm in granpa we na Kiŋ Manasɛ fɔ se Jiova rɛdi fɔ fɔgiv di wan dɛn we de chenj. Yusɛf kin lan frɔm di wan dɛn we dɔn ol na yu famili ɔ yu kɔngrigeshɔn. Dɛn go tɛl yu bɔt di plɛnti gud tin dɛn we Jiova dɔn du fɔ dɛn. Dɔn, mɛmba aw Josaya bin fil afta we i bin lan wetin di Skripchɔ dɛn se. I bin rɛdi fɔ du wetin Jiova want ɛn i bin du sɔntin fɔ chenj di bad tin dɛn we bin de apin wantɛm wantɛm. We yu de rid di Skripchɔ dɛn, yusɛf go rili mekɔp yu maynd fɔ obe Jiova. We yu du dis, yu padi biznɛs wit Jiova go tayt mɔ mɔ ɛn yu go rili gɛt galdi at. Dat go mek yu want fɔ tɛl ɔda pipul dɛn bɔt Jiova. (Rid Sɛkɛn Kronikul 34:​18, 19.) We yu stɔdi di Baybul, yu go kam fɔ no se mɔ tin dɛn de we yu nid fɔ du fɔ sav Gɔd. If na so i bi, du ɔl wetin yu ebul fɔ chenj, jɔs lɛk aw Josaya bin du.

20, 21. (a) Wetin-ɛn-wetin di 4 kiŋ dɛn we wi dɔn tɔk bɔt bin du? (b) Wetin wi go tɔk bɔt insay di nɛks atikul?

²⁰ Wetin wi lan frɔm dɛn 4 kiŋ ya we bin rul na Juda we bin sav Jiova wit ɔl dɛn at? Dɛn man dɛn ya bin mekɔp dɛn mayd fɔ du wetin Jiova want ɛn wɔship am te dɛn day. Dɛn bin abop pan am we pawaful ɛnimi dɛn bin kam fɔ fɛt dɛn. Di tin we pas ɔl, na we dɛn sav Jiova bikɔs dɛn lɛk am.

²¹ Pan ɔl we dɛn 4 kiŋ ya nɔ bin pafɛkt ɛn dɛn bin de mek mistek, Jiova bin stil gladi fɔ dɛn. Jiova bin si wetin de na dɛn at ɛn i bin no se dɛn rili lɛk am. Wisɛf nɔ pafɛkt ɛn wi kin mek mistek. Bɔt Jiova go gladi fɔ wi we i si se wi de sav am wit ɔl wi at. Insay di nɛks atikul wi go tɔk bɔt wetin wi go lan frɔm di mistek dɛn we dɛn kiŋ ya bin mek.