1, 2. (a) Aw sɔm mama ɛn papa dɛn kin fil we dɛn pikin want fɔ baptayz? (b) Wetin mek dɛn kin aks di wan dɛn we want fɔ baptayz if dɛn dɔn gi dɛn layf to Jiova? (Luk di pikchɔ nia dis atikul in taytul.)

MARIA in mama ɛn papa bin de wach we dɛn gyal pikin bin tinap wit ɔda pipul dɛn we bin want fɔ baptayz. Di brɔda we bin de gi di tɔk bin aks tu kwɛstyɔn dɛn. Maria bin ansa lawd ɛn klia wan. Jɔs afta dat, i bin baptayz.

² Maria in mama ɛn papa bin rili gladi fɔ we dɛn pikin dɔn gi in layf to Jiova ɛn baptayz. Bɔt bifo dis tɛm, Maria in mama bin de wɔri smɔl. I bin de aks insɛf se: ‘Maria nɔ tu smɔl fɔ baptayz? I rili ɔndastand se fɔ gi in layf to Jiova na siriɔs tin? Fɔ se i fɔ wet smɔl bifo i baptayz?’ Bɔku mama ɛn papa dɛn we lɛk dɛn pikin dɛn kin aks dɛnsɛf dɛn sem kwɛstyɔn dɛn ya we dɛn pikin dɛn want fɔ baptayz. (Ɛkliziastis 5:​5) Infakt, di tin we wi kin disayd fɔ du we impɔtant pas ɔl na fɔ gi wi layf to Jiova ɛn  baptayz.—Luk di bɔks we gɛt di taytul “Yu Dɔn Gi Yu Layf to Jiova?”

3, 4. (a) Aw di apɔsul Pita tich wi se baptizim na tin we rili impɔtant? (b) Wetin mek Pita kɔmpia baptizim to di bil we Noa bil di ak? (Luk di pikchɔ nia dis atikul in taytul.)

³ Di apɔsul Pita bin kɔmpia baptizim to di ak we Noa bin bil. I bin tɔk se: “Di baptayz we wi de baptayz” we fiba di ak we Noa bin bil de “sev wi.” (Rid Pita In Fɔs Lɛta 3:​20, 21, NW.) Di ak bin mek ɔlman no se Noa bin rili want fɔ du wetin Gɔd want wit ɔl in at. Noa bin du di wok we Jiova bin gi am fɔ du fetful wan. Bikɔs Noa bin gɛt fet pan Gɔd, dat bin mek Jiova sev in ɛn in famili di tɛm we da Ebi Ebi Ren bin kam. Wetin Pita bin de tray fɔ tich wi?

⁴ We pipul dɛn bin de si di ak, dɛn bin no se Noa bin gɛt fet pan Gɔd. Semweso, we pipul dɛn de si pɔsin de baptayz, dɛn de no se i dɔn gi in layf to Gɔd bikɔs i gɛt fet pan Krays we bin dɔn gɛt layf bak. Lɛk Noa, di wan dɛn we de baptayz de obe Gɔd ɛn dɛn de du di wok we i dɔn gi dɛn fɔ du. Ɛn jɔs lɛk aw Jiova bin sev Noa di tɛm we da Ebi Ebi Ren bin kam, na so bak i go sev in savant dɛn we dɔn baptayz ɛn we nɔ de kɔmɔt biɛn am di tɛm we i go dɔnawe wit dis wikɛd wɔl. (Mak 13:​10; Rɛvɛleshɔn 7:​9, 10) Fɔ tru, i rili impɔtant fɔ mek wi gi wi layf to Jiova ɛn baptayz. Infakt, if sɔmbɔdi de westɛm fɔ baptayz, dat go mek i lɔs di chans fɔ gɛt layf we go de sote go.

5. Wetin wi go lan insay dis atikul?

⁵ Naw we wi dɔn no se baptizim na  tin we rili siriɔs, wi nid fɔ no di ansa to dɛn tri kwɛstyɔn dɛn ya: Wetin di Baybul tɔk bɔt baptizim? Wetin pɔsin fɔ du bifo i baptayz? Wetin mek wi fɔ de mɛmba ɔltɛm se baptizim na tin we rili impɔtant we wi de tich wi pikin dɛn ɛn wi Baybul studɛnt dɛn?

6, 7. (a) Wetin di baptayz we Jɔn bin de baptayz min? (b) Udat in baptizim difrɛn frɔm ɔda baptizim dɛn? Wetin mek?

⁶ Di fɔs pɔsin we wi lan bɔt na di Baybul we bin de baptayz pipul dɛn na Jɔn. (Matyu 3:​1-6) Wetin mek pipul dɛn bin de go to am fɔ mek i baptayz dɛn? Dɛn bin de du dat fɔ sho se dɛn dɔn ripɛnt, we min se, dɛn gri se dɛn nɔ bin de obe di Lɔ we Gɔd bin gi Mozis ɛn dɛn rili fil sɔri fɔ dat. Bɔt di baptizim we Jɔn du we bin impɔtant pas ɔl bin gɛt difrɛn minin. Jɔn bin gɛt big big ɔnɔ fɔ baptayz Jizɔs, we na Gɔd in pafɛkt Pikin. (Matyu 3:​13-17) Jizɔs nɔ bin ɛva sin. So i nɔ bin nid fɔ ripɛnt. (Pita In Fɔs Lɛta 2:​22) So wetin mek Jizɔs bin baptayz? I bin baptayz fɔ sho se i rɛdi fɔ yuz in layf fɔ du wetin Gɔd want.—Di Ibru Pipul Dɛn 10:​7.

⁷ Afta we Jizɔs bin dɔn bigin fɔ prich, in disaypul dɛn bin bigin fɔ baptayz ɔda pipul dɛn. (Jɔn 3:​22; 4:​1, 2) Dɛn pipul dɛn bak bin baptayz bikɔs dɛnsɛf dɔn ripɛnt. Bɔt we Jizɔs day ɛn gɛt layf bak, di wan dɛn we bin want fɔ bi in disaypul bin nid fɔ baptayz fɔ difrɛn rizin.

8. (a) Afta we Jizɔs bin gɛt layf bak, wetin i bin tɛl di wan dɛn we de fala am fɔ du? (b) Wetin mek Kristian dɛn nid fɔ baptayz?

⁸ Insay di ia 33, jɔs afta we Jizɔs gɛt layf bak, i bin tɔk to lɛk 500 man, uman, ɛn sɔntɛm pikin dɛn. I mɔs bi se na dis tɛm ya i bin tɔk se: “Una go ɔlɔbɔt na di wɔl ɛn mek di pipul dɛn bi mi lanin bɔy dɛn; una baptayz dɛn wit di pawa we Papa Gɔd ɛn in Pikin ɛn in Spirit gi una. Una lan dɛn fɔ du ɔl wetin a dɔn tɛl una.” (Matyu 28:​19, 20; Fɔs Lɛta Fɔ Kɔrint 15:​6) Jizɔs bin tɛl di wan dɛn we de fala am fɔ mek disaypul dɛn. Ɛnibɔdi we want fɔ bi in disaypul, fɔ baptayz. (Matyu 11:​29, 30) Fɔ sav Gɔd di we we i want, pɔsin nid fɔ gri se na Jizɔs, Gɔd de yuz fɔ du wetin I want. Dɔn da pɔsin de go baptayz di we aw Gɔd want. Di Baybul gɛt bɔku tin dɛn fɔ pruv se Jizɔs in fɔstɛm disaypul dɛn bin no aw impɔtant i bi fɔ baptayz. Dɛn nɔ bin tink se dɛn fɔ wet ɛn baptayz leta.—Di Apɔsul Dɛn Wok [Akt] 2:​41; 9:​18; 16:​14, 15, 32, 33.

9, 10. Wetin wi kin lan frɔm di baptayz we di man we bin kɔmɔt na Itiopia ɛn Pɔl bin baptayz?

⁹ Rid Di Apɔsul Dɛn Wok [Akt] 8:​35, 36. Wan man we bin kɔmɔt na Itiopia we bin dɔn disayd fɔ wɔship lɛk aw di Ju pipul dɛn de wɔship, bin de go bak na in kɔntri we i dɔn fɔ wɔship na di tɛmpul na Jerusɛlɛm. Jiova in enjɛl bin sɛn Filip fɔ go prich to am ɛn Filip bin tich am “Gud Nyuz bɔt Jizɔs.” Wetin di man we bin kɔmɔt na Itiopia bin du? I bin kam fɔ no se i rili impɔtant fɔ gɛt fet pan Jizɔs, ɛn  i bin want fɔ du wetin Jiova want Kristian dɛn fɔ du. So i disayd fɔ baptayz wantɛm wantɛm.

¹⁰ Wan ɔda ɛgzampul na wan man we nem Sɔl we na bin Ju. Ɔl di Ju pipul dɛn bin dɔn gi dɛn layf to Gɔd, bɔt Jiova bin dɔn pul an pan di Ju pipul dɛn bikɔs dɛn nɔ bin de obe am. Sɔl bin biliv se di Ju pipul dɛn bin de stil sav Gɔd di rayt we, so i bin de mek di Kristian dɛn sɔfa. Bɔt wan de, Jizɔs we bin dɔn gɛt layf bak, bɔt we Sɔl bin fil se dɔn day, bin tɔk to am frɔm ɛvin. Wetin Sɔl bin du? I bin gladi fɔ di ɛp we wan Kristian disaypul we nem Ananayas bin ɛp am. Di Baybul tɔk se: “I nɔ te igen, nain dɛn baptayz am.” (Di Apɔsul Dɛn Wok [Akt] 9:​17, 18; Lɛta Fɔ Galeshya 1:​14) Leta dɛn bin kam fɔ no am as apɔsul Pɔl. Notis se as i ɔndastand se na Jizɔs Gɔd de yuz fɔ du wetin I want, Sɔl bin baptayz wantɛm wantɛm.—Rid Di Apɔsul Dɛn Wok [Akt] 22:​12-16.

11. (a) Tide, wetin de mek Baybul studɛnt dɛn de disayd fɔ baptayz? (b) Aw wi kin fil we pɔsin baptayz?

¹¹ Tide bak, na di sem tin kin apin to bɔku Baybul studɛnt dɛn, ilɛksɛf dɛn yɔŋ ɔ dɛn dɔn ol. Bikɔs dɛn lɛk ɛn biliv wetin di Baybul de se, dɛn rili want fɔ gi dɛn layf to Jiova ɛn baptayz. Infakt, di baptizim tɔk na spɛshal tɛm na ɛni asɛmbli ɛn kɔnvɛnshɔn. Jiova Witnɛs dɛn kin gladi we dɛn Baybul studɛnt dɛn de gri fɔ tek di trut ɛn disayd fɔ baptayz. Mama ɛn papa dɛn kin rili gladi we dɛn pikin dɛn de du di sem tin. Insay di 2017 savis ia, i pas 284,000 nyu wan dɛn we bin baptayz fɔ sho se dɛn dɔn gi dɛn layf to Jiova. (Di Apɔsul Dɛn Wok [Akt] 13:​48) Fɔ tru, dɛn ɔndastand klia wan se Kristian dɛn nid fɔ baptayz. Bɔt wetin dɛn fɔ du bifo dɛn baptayz?

12. Wetin pɔsin we de stɔdi di Baybul fɔ du bifo i baptayz?

¹² Bifo Baybul studɛnt dɛn baptayz, dɛn nid fɔ lan di tru tin bɔt Gɔd, wetin i want fɔ mɔtalman ɛn fɔ dis wɔl, ɛn wetin i bin dɔn du fɔ sev mɔtalman. (Fɔs Lɛta To Timoti 2:​3-6) Dɛn nid fɔ gɛt fet, we go ɛp dɛn fɔ obe Gɔd in lɔ dɛn ɛn stɔp fɔ du di tin dɛn we Gɔd et. (Di Apɔsul Dɛn Wok [Akt] 3:​19) Dis rili impɔtant bikɔs Jiova nɔ de gri fɔ lɛ pɔsin we de du wetin I et gi in layf to Am. (Fɔs Lɛta Fɔ Kɔrint 6:​9, 10) Bɔt mɔ de fɔ du. Di wan dɛn we want fɔ gi dɛn layf to Jiova nid fɔ de atɛnd di mitin dɛn, ɛn dɛn fɔ de prich di gud nyuz ɛn tich ɔda pipul dɛn ɔltɛm. Na dis ɛnibɔdi we want fɔ fala Krays fɔ du. (Di Apɔsul Dɛn Wok [Akt] 1:​8) Pɔsin we de stɔdi di Baybul fɔ du ɔl dɛn tin dɛn ya fɔs. Dɔn, i kin pre to Jiova fɔ gi in layf to am ɛn baptayz.

13. We wi de tich ɔda pipul dɛn, wetin mek wi fɔ mɛmba se dɛn nid fɔ baptayz fɔ bi tru Kristian dɛn?

¹³ We wi ɛp wi pikin dɛn ɛn ɔda pipul dɛn we wi de stɔdi di Baybul wit fɔ du dɛn tin dɛn ya, wi fɔ mɛmba se di wan dɛn we rili want fɔ fala Jizɔs fɔ baptayz. Dat go mek we di rayt tɛm rich, wi nɔ go fred fɔ tɛl dɛn wetin mek i impɔtant fɔ gi dɛn layf to Jiova ɛn baptayz. Wi want wi pikin dɛn ɛn ɔda pipul dɛn we wi de stɔdi di Baybul wit fɔ kɔntinyu fɔ de du wetin Jiova want te dɛn baptayz!

14. Wetin mek wi nɔ de fos ɛnibɔdi fɔ baptayz?

¹⁴ Na tru se, nɔbɔdi nɔ go fos in pikin ɔ in Baybul studɛnt fɔ baptayz. Jiova nɔ de fos ɛnibɔdi fɔ sav am. (Jɔn In Fɔs Lɛta 4:​8) We wi de tich ɔda pipul dɛn, wi fɔ ɛp dɛn fɔ ɔndastand wetin mek i impɔtant fɔ lɛ dɛn gɛt tayt padi biznɛs wit Jiova. Dɔn, if di Baybul studɛnt rili gladi fɔ lan di tru tin bɔt Gɔd ɛn i rili want fɔ du ɔl wetin tru Kristian fɔ du, i go want fɔ baptayz.—Sɛkɛn Lɛta Fɔ Kɔrint 5:​14, 15.

15, 16. (a) Fɔ se pɔsin fɔ rich wan patikyula ej bifo i baptayz? Ɛksplen (b) Wetin mek pɔsin we de stɔdi di Baybul fɔ baptayz as wan pan Jiova Witnɛs dɛn ivin if i bin dɔn baptayz na ɔda rilijɔn?

¹⁵ Nɔto pas pɔsin rich wan patikyula ej bifo i baptayz. Ɔlman difrɛn, ɛn sɔm pipul dɛn we de stɔdi di Baybul kin go bifo kwik kwik wan pas ɔda pipul dɛn. Bɔku pipul dɛn kin baptayz di tɛm we dɛn smɔl, ɛn as dɛn de big dɛn kin kɔntinyu fɔ de fetful wan to Jiova  te dɛn ol. Ɔda pipul dɛn kin dɔn ol bifo dɛn lan di tru tin dɛn na di Baybul ɛn baptayz. Sɔm pan dɛn kin dɔn ivin pas 100 ia!

¹⁶ Wan uman we bin de stɔdi di Baybul bin dɔn baptayz na difrɛn rilijɔn dɛn. Na dat mek i bin aks di pɔsin we bin de tich am di Baybul if i rili nid fɔ baptayz igen. In ticha bin sho am sɔm vas dɛn na di Baybul fɔ ansa in kwɛstyɔn. We di uman bin kam fɔ undastand wetin di Baybul se i fɔ du, i bin baptayz, pan ɔl we i bin ol lɛk 80 ia. Wetin wi lan frɔm dis ɛgzampul? We wi lan di trut bɔt wetin Jiova want fɔ du, na dat nɔmɔ go mek i gladi fɔ wi baptizim. So ilɛksɛf wi bin dɔn baptayz na ɔda rilijɔn, wi stil nid fɔ baptayz fɔ bi wan pan Jiova Witnɛs.—Rid Di Apɔsul Dɛn Wok [Akt] 19:​3-5.

17. Wetin pɔsin fɔ de tink bɔt di de we i baptayz?

¹⁷ Di de we pɔsin baptayz na tɛm we di pɔsin kin rili gladi. Bɔt na tɛm bak we di pɔsin fɔ tek tɛm tink bɔt wetin i min fɔ gi in layf to Jiova ɛn baptayz. Fɔ du ɔl di tin dɛn we tru Kristian fɔ du nɔ kin rili izi. Jizɔs in disaypul dɛn nɔ fɔ “liv fɔ dɛnsɛf nɔmɔ, bɔt dɛn go jɛs liv nɔmɔ fɔ di wan we dɔn day, we Gɔd mek rayz frɔm di grev fɔseka dɛn.”—Sɛkɛn Lɛta Fɔ Kɔrint 5:​15; Matyu 16:​24.

18. Us kwɛstyɔn dɛn wi go tɔk bɔt insay di nɛks atikul?

¹⁸ Jɔs lɛk aw wi dɔn lan insay dis atikul, di disayd we pɔsin de disayd fɔ bi tru Kristian na tin we rili siriɔs. Na dat mek Maria in mama bin aks insɛf di kwɛstyɔn dɛn we wi bin dɔn tɔk bɔt we wi stat dis atikul. If yu na pɔsin we gɛt pikin, yu kin aks yusɛf dɛn kwɛstyɔn dɛn ya: ‘Mi pikin dɔn rili rɛdi fɔ baptayz? Mi pikin no bɔt Jiova gud gud wan we mek i de gi in layf to Gɔd? Mi pikin fɔ lan buk gud gud wan ɛn gɛt wok bifo i baptayz? Wetin go apin if mi pikin baptayz ɛn leta i kɔmit siriɔs sin?’ Wi go tɔk bɔt dɛn tri kwɛstyɔn dɛn ya insay di nɛks atikul, ɛn wi go lan aw mama ɛn papa dɛn we na Kristian go tink di rayt we bɔt baptizim.