Ɛp “Trenja” dɛn fɔ ‘Gladi we Dɛn de Sav’ Jiova
“PAPA GƆD [“Jiova,” NW] bisin bɔt di trenja.”—SAM 146:9.
SIŊ DƐN: 17, 109
1, 2. (a) Us prɔblɛm dɛn dɔn mit sɔm pan wi brɔda ɛn sista dɛn? (b) Us kwɛstyɔn dɛn dis mek wi aks?
WAN brɔda we nem Lije bin tɔk se: “Wi famili bin de na asɛmbli we wɔ bigin na Burundi. Wi bin de si pipul dɛn de rɔn ɛn ɔda wan dɛn de shut. Na wi 11 wi mama ɛn papa bɔn. Wi di pikin dɛn togɛda wit wi mama ɛn papa rɔn fɔ wi layf wit di smɔl tin dɛn we wi bin ebul fɔ tek. Sɔm na mi famili bin ebul fɔ rich na wan rɛfyuji kamp na Malawi. Di rod fɔ rich de bin lɔng lɛk 1,000 mayl so. Wi we lɛf biɛn bin skata.”
2 I pas 65 milyɔn rɛfyuji dɛn arawnd di wɔl we dɔn lɛf dɛn os bikɔs wɔ de na dɛn kɔntri ɔ pipul dɛn de mek dɛn sɔfa. Frɔm we dɛn bigin fɔ kɔnt rɛfyuji dɛn, na dis nɔmba bɔku pas ɔl. * (Luk di futnot.) Bɔku pan dɛn rɛfyuji ya na Jiova Witnɛs dɛn. Bɔku pan dɛn de we dɛn fambul dɛn dɔn day ɛn we dɔn lɔs ɔl wetin dɛn gɛt. Us ɔda prɔblɛm dɛn dɔn mit dɛn? Aw wi go ɛp wi brɔda ɛn sista dɛn fɔ sav Jiova ɛn kɔntinyu fɔ gladi we dɛn kayn prɔblɛm ya mit dɛn? (Sam 100:2) Wetin na di bɛst we fɔ prich to rɛfyuji dɛn we nɔ no Jiova?
RƐFYUJI LAYF
3. Aw Jizɔs ɛn bɔku pan in disaypul dɛn bin bi rɛfyuji?
3 Jizɔs ɛn in mama ɛn papa bin bi rɛfyuji na Ijipt afta Jiova in enjɛl wɔn Josɛf se Kiŋ Ɛrɔd want fɔ kil Jizɔs. Dɛn bin de na Ijipt te Ɛrɔd day. (Matyu 2:13, 14, 19-21) Leta, Jizɔs in disaypul dɛn ɔl bin rɔnawe kɔmɔt na Jerusɛlɛm. “Sɔm go Judia, sɔm go Sameria” bikɔs pipul dɛn bin de mek dɛn sɔfa bad bad wan. (Di Apɔsul Dɛn Wok [Akt] 8:1) Jizɔs bin no se sɔntin go mek bɔku pan di wan dɛn we de fala am lɛf dɛn os. I bin se: “Wɛn dɛn mek una sɔfa na wan tɔŋ, una fɔ rɔn go na di ɔda tɔŋ.” (Matyu 10:23) Fɔ rɔnawe kɔmɔt na yu os nɔ kin izi ilɛksɛf rizin de fɔ du dat.
4, 5. Us prɔblɛm dɛn rɛfyuji dɛn kin gɛt (a) we dɛn de rɔnawe? (b) we dɛn de na rɛfyuji kamp?
4 Rɛfyuji dɛn kin gɛt difrɛn prɔblɛm dɛn we dɛn kin rɔnawe kɔmɔt na dɛn os ɔ we dɛn de na rɛfyuji kamp. Lije in smɔl brɔda dɛn we nem Gad bin tɔk se: “Wi bin waka fɔ lɔng lɔng tɛm ɛn wi bin si bɔku bɔku dedebɔdi dɛn na rod. A bin ol 12 ia. Mi fut dɛn bin swɛl bad bad wan we mek a tɛl mi famili fɔ lɛf mi biɛn ɛn go. Mi papa nɔ bin want fɔ lɛf mi na di rebɛl dɛn an so i tot mi. Wi bin de pre to Jiova ɛn abop pan am ɛnide, ɛn dat bin ɛp wi. Sɔntɛnde, na mango dɛn we de gro na rod nɔmɔ wi bin de it.”—Lɛta Fɔ Filipay 4:12, 13.
5 Bɔku pan Lije in fambul dɛn bin tek lɔng tɛm na United Nations rɛfyuji kamp dɛn. Bɔt prɔblɛm dɛn bin de bak na dɛn kamp dɛn de. Lije we na sakit ovasia naw, tɔk se: “Bɔku pan di pipul dɛn nɔ bin gɛt wok. Dɛn bin de kongosa, drink te dɛn chak, ple gambul, tif, ɛn dɛn bin de du mami ɛn dadi biznɛs di we aw Gɔd nɔ want.” Di Witnɛs dɛn bin nid fɔ put ɔl dɛn maynd pan di mitin ɛn prichin wok so dat dɛn go protɛkt dɛnsɛf. (Di Ibru Pipul Dɛn 6:11, 12; 10:24, 25) Dɛn bin de tek tɛm yuz dɛn taym so dat dɛn go kɔntinyu fɔ tinap tranga wan na di trut, ɛn bɔku pan dɛn bin bigin fɔ payɔnia. Dɛn bin de mɛmba dɛnsɛf se tɛm go kam we dɛn go kɔmɔt na di rɛfyuji kamp jɔs lɛk aw di tɛm bin rich fɔ mek di Izrɛlayt dɛn kɔmɔt na di land we pɔsin nɔ go ebul fɔ liv. Dat bin ɛp dɛn fɔ kɔntinyu fɔ bia pan ɔl we tin nɔ bin izi.—Sɛkɛn Lɛta Fɔ Kɔrint 4:18.
SHO LƆV TO RƐFYUJI DƐN
6, 7. (a) Aw di lɛk we wi lɛk Gɔd go mek wi trit wi brɔda dɛn? (b) Gi wan ɛgzampul.
6 Di lɛk we wi “lɛk Gɔd” go mek wi sho lɔv to wi brɔda dɛn, mɔ we tin tranga fɔ dɛn. (Rid Jɔn In Fɔs Lɛta 3:17, 18.) Fɔ ɛgzampul, we di Kristian dɛn trade na Juda bin nid it bikɔs bad bad angri bin de usay dɛn de, di kɔngrigeshɔn bin du sɔntin fɔ ɛp dɛn. (Di Apɔsul Dɛn Wok [Akt] 11:28, 29) Apɔsul Pɔl ɛn Pita bin ɛnkɔrej di Kristian dɛn bak fɔ de du gud to dɛnsɛf. (Lɛta Fɔ Rom 12:13; Pita In Fɔs Lɛta 4:9) Jɔs lɛk we dɛn kin ɛnkɔrej wi fɔ du gud to wi brɔda ɛn sista dɛn we kin kɔmɔt ɔda ples ɛn kam to wi, na so bak wi fɔ du gud to wi brɔda ɛn sista dɛn we gɛt prɔblɛm ɔ we de sɔfa fɔseka dɛn fet! * (Luk di futnot.)—Rid Prɔvabs 3:27.
7 I nɔ tu te yet we bɔku bɔku Witnɛs dɛn dɔn lɛf dɛn os na di ist pat na Yukren bikɔs wɔ de de ɛn pipul dɛn de mek dɛn sɔfa. I sɔri fɔ no se dɛn kil sɔm pan dɛn. Bɔt di brɔda ɛn sista dɛn na ɔda pat dɛn na Yukren ɛn Rɔshia bin mek di brɔda ɛn sista dɛn we na rɛfyuji kam de na dɛn os dɛn. Insay dɛn tu kɔntri dɛn ya, di brɔda dɛn nɔ bin put an pan wɔ ɔ pɔlitiks bikɔs dɛn ɛn di pipul dɛn na di wɔl “nɔ de si wan we” ɛn dɛn bin kɔntinyu fɔ prich “di Gud Nyuz bɔt Jizɔs.”—Jɔn 15:19; Di Apɔsul Dɛn Wok [Akt] 8:4.
ƐP RƐFYUJI DƐN FƆ GƐT MƆ FET
8, 9. (a) Us prɔblɛm dɛn we rɛfyuji dɛn kin gɛt we dɛn go na ɔda kɔntri? (b) Wetin mek wi nid fɔ peshɛnt we wi de ɛp dɛn?
8 Sɔntin kin apin we kin mek sɔm rɛfyuji dɛn lɛf di say we dɛn de ɛn go liv na ɔda pat na dɛn kɔntri. Bɔt, bɔku rɛfyuji dɛn kin go na ɔda kɔntri we dɛn nɔ wande sabi. Na tru se di gɔvmɛnt dɛn go gi rɛfyuji dɛn tin dɛn fɔ it, klos fɔ wɛr, ɛn say fɔ de, bɔt prɔblɛm dɛn kin stil de. Fɔ ɛgzampul, di it dɛn kin difrɛn frɔm wetin dɛn dɔn yus fɔ it. Sɔm rɛfyuji dɛn we kɔmɔt na kɔntri dɛn we di wɛda ɔt nɔ kin no aw fɔ drɛs fɔ kol wɛda. Ɔda wan dɛn go gɛt fɔ lan aw fɔ yuz mashin dɛn we dɛn de mek tide.
9 Sɔm gɔvmɛnt dɛn mek program dɛn fɔ ɛp rɛfyuji dɛn fɔ ajɔst dɛnsɛf fɔ ebul liv na di nyu kɔntri we dɛn kam. Bɔt bɔku tɛm, dɛn kin tink se di rɛfyuji dɛn fɔ ebul kia fɔ dɛnsɛf afta sɔm mɔnt. Dis nɔ kin rili izi. Imajin di tin dɛn we dɛn want dɛn fɔ lan wantɛm wantɛm, tin dɛn lɛk: nyu lanwej, nyu kɔlchɔ, nyu lɔ dɛn bɔt aw fɔ pe bil ɛn taks dɛn, aw fɔ atɛnd skul, ɛn aw fɔ ivin tren dɛn pikin dɛn! Yu go peshɛnt ɛn sho rɛspɛkt we yu de ɛp wi brɔda ɛn sista dɛn we gɛt prɔblɛm dɛn lɛk dis?—Lɛta Fɔ Filipay 2:3, 4.
10. Aw wi go ɛp rɛfyuji dɛn fɔ gɛt mɔ fɛt we dɛn kam? (Luk di pikchɔ nia dis atikul in taytul.)
10 Sɔntɛnde, di pipul dɛn we gɛt pawa na di kɔntri kin mek i nɔ izi fɔ wi brɔda dɛn we na rɛfyuji fɔ mit wit di brɔda ɛn sista dɛn na di kɔngrigeshɔn we de na di kɔntri we dɛn go. Sɔm gɔvmɛnt ɔganayzeshɔn dɛn kin trɛtin se dɛn go stɔp fɔ ɛp wi brɔda dɛn. Dɛn kin se dɛn nɔ go alaw dɛn fɔ de na di kɔntri if dɛn nɔ gri fɔ tek wok we go mek dɛn nɔ ebul fɔ atɛnd di mitin dɛn. Bikɔs dɛn de fred ɛn fil se dɛn nɔ gɛt ɛnibɔdi fɔ ɛp dɛn, sɔm dɔn tek dɛn wok dɛn de. So wi nɔ fɔ westɛm fɔ mit wi rɛfyuji brɔda ɛn sista dɛn we dɛn kam. Dɛn nid fɔ si se wi kia fɔ dɛn. If wi ɛp ɛn kia fɔ dɛn, i go ɛp dɛn fɔ gɛt mɔ fet.—Prɔvabs 12:25; 17:17.
ƐP RƐFYUJI DƐN
11. (a) Wetin na di fɔs tin we rɛfyuji dɛn kin nid? (b) Aw rɛfyuji dɛn go sho se dɛn gladi fɔ wetin dɛn du fɔ dɛn?
11 Fɔs, wi go nid fɔ gi wi brɔda dɛn tin fɔ it, klos fɔ wɛr, ɔ ɔda tin dɛn we dɛn go nid. * (Luk di futnot.) Ivin smɔl gift dɛn lɛk nɛktay fɔ brɔda kin mek i gladi. Fɔ tru, rɛfyuji dɛn nɔ go want fɔ mɔna dɛn brɔda ɛn sista dɛn wit dɛn prɔblɛm dɛn, bɔt dɛn go want fɔ sho se dɛn gladi fɔ wetin dɛn de du fɔ dɛn. Dis go mek di brɔda dɛn we de du dɛn gud, gladi. Bɔt i rili impɔtant fɔ mek rɛfyuji dɛn tray fɔ kia fɔ dɛnsɛf. We dɛn du dis, i go mek dɛn gɛt rɛspɛkt ɛn tayt padi biznɛs wit dɛn brɔda dɛn. (Sɛkɛn Lɛta Fɔ Tɛsalonayka 3:7-10) Stil, rɛfyuji dɛn nid wi ɛp.
Aw wi kin ɛp wi brɔda ɛn sista dɛn we na rɛfyuji? (Luk na paregraf 11 to 13)
12, 13. (a) Aw wi kin ɛp rɛfyuji dɛn? (b) Gi wan ɛgzampul.
12 Wi nɔ nid fɔ gɛt bɔku mɔni fɔ ɛp rɛfyuji dɛn. Di tin we dɛn nid pas ɔl na wi lɔv ɛn wi tɛm we wi go spɛn wit dɛn. Fɔ ɛgzampul, yu kin sho dɛn aw fɔ tek transpɔt ɔ usay fɔ bay it dɛn we gud fɔ di bɔdi, bɔt we nɔ dia. Yu kin sho dɛn bak aw fɔ gɛt tul dɛn we dɛn go yuz fɔ wok ɔ aw fɔ lan wok dɛn we go ɛp dɛn fɔ de gɛt smɔl smɔl mɔni. Di tin we impɔtant pas ɔl na dat; yu kin ɛp dɛn fɔ
yus to di brɔda ɛn sista dɛn na dɛn nyu kɔngrigeshɔn. If yu ebul, yu kin ivin gi dɛn lift na yu motoka ɔ yu kin gi dɛn mɔni fɔ tek transpɔt fɔ go mitin. Dɔn, yu kin wok wit dɛn na fil savis ɛn ɛksplen to dɛn di bɛst we aw fɔ prich to di pipul dɛn na di eria.13 We 4 yɔŋ rɛfyuji dɛn bin kam na wan kɔngrigeshɔn, difrɛn ɛlda dɛn bin sho dɛn aw fɔ du sɔm tin dɛn. Tin dɛn lɛk aw fɔ drayv motoka, aw fɔ yuz kɔmpyuta fɔ tayp lɛta, ɛn aw fɔ fɛn wok. Di ɛlda dɛn bin sho dɛn bak aw dɛn fɔ yuz dɛn tɛm so dat dɛn go put Jiova in wok fɔs na dɛn layf. (Lɛta Fɔ Galeshya 6:10) I nɔ tu te, dɛn ɔl 4 bin bi payɔnia. Bikɔs di ɛlda dɛn bin ɛp dɛn, ɛn dɛnsɛf bin plan ɛn tray fɔ du mɔ fɔ Jiova, dɛn bin go bifo pan Gɔd biznɛs ɛn avɔyd Setan in wɔl.
14. (a) Wetin rɛfyuji dɛn nid fɔ avɔyd? (b) Gi wan ɛgzampul.
14 Jɔs lɛk ɔl ɔda tru Kristian dɛn, rɛfyuji dɛn nɔ nid fɔ alaw ɛnibɔdi ɔ ɛnitin fɔ mek dɛn tek prɔpati as sɔntin we impɔtant pas dɛn padi biznɛs wit Jiova. * (Luk di futnot.) Lije, we wi bin tɔk bɔt fɔs ɛn in brɔda ɛn sista dɛn bin mɛmba se di tɛm we dɛn bin de rɔn, dɛn papa bin tich dɛn impɔtant lɛsin dɛn bɔt fet. Dɛn bin tɔk se: “Wi papa tek tɛm trowe di tin dɛn we wi nɔ nid wan bay wan. Dɔn i es di ɛmti bag ɛn smayl ɛn tɔk se: ‘Yu si? Na dis nɔmɔ una nid!’”—Rid Fɔs Lɛta To Timoti 6:8.
GI RƐFYUJI DƐN DI TIN WE DƐN NID PAS ƆL
15, 16. (a) Aw wi go mek wi brɔda ɛn sista dɛn gɛt mɔ fet? (b) Aw wi go ɛp dɛn fɔ bia di pwɛl at we dɛn gɛt?
15 Nɔto it ɛn klos nɔmɔ rɛfyuji dɛn nid. Dɛn nid wi fɔ yuz di Baybul fɔ ɛp ɛn ɛnkɔrej dɛn. (Matyu 4:4) Di ɛlda dɛn kin ɛp di rɛfyuji dɛn bay we dɛn de mek dɛn gɛt di buk, magazin, ɛn ɔda tin dɛn insay dɛn yon langwej, ɛn ɛp dɛn bak fɔ mit wit brɔda ɛn sista dɛn we de tɔk dɛn langwej. Dis rili impɔtant bikɔs bɔku rɛfyuji dɛn dɔn lɛf dɛn famili, ples, ɛn kɔngrigeshɔn biɛn. Wi nid fɔ mek dɛn no se Jiova stil lɛk dɛn ɛn i de rili fil am fɔ dɛn. If wi nɔ du dis, di rɛfyuji dɛn go luk to ɔda pipul dɛn we dɛn ɔl kɔmɔt na di sem kɔntri fɔ ɛp dɛn. Ɛn dɛn pipul dɛn de nɔ de sav Jiova. (Fɔs Lɛta Fɔ Kɔrint 15:33) We wi mek dɛn fil fayn insay di kɔngrigeshɔn, wi de wok wit Jiova we “bisin bɔt . . . trenja” dɛn.—Sam 146:9.
16 Jizɔs ɛn in famili nɔ bin go bak na di ples we dɛn bin de fɔs bikɔs di wan dɛn we bin want fɔ du dɛn bad bin stil de na pawa. Nadis sem rizin kin mek rɛfyuji dɛn tide nɔ ebul fɔ go bak na di say usay dɛn kɔmɔt. Bɔt ɔda wan dɛn nɔ kin want fɔ go bak na dɛn kɔntri. Lije tɔk se bɔku mama ɛn papa dɛn we si we dɛn bin de rep ɛn kil dɛn fambul dɛn, nɔ want fɔ kɛr dɛn pikin dɛn go bak na dɛn kɔntri. Fɔ ɛp wi brɔda dɛn, wi nid fɔ sho dɛn se wi “lɛk” dɛn, wi “gɛt sɔri at” fɔ dɛn, ɛn wi nɔ fɔ “de mek prawd” pan dɛn. (Pita In Fɔs Lɛta 3:8) Di we aw dɛn dɔn mek sɔm rɛfyuji dɛn sɔfa dɔn mek dɛn nɔ de spɛn tɛm wit ɔda pipul dɛn, ɛn dɛn kin shem fɔ tɔk bɔt di we aw dɛn de sɔfa, mɔ if dɛn pikin dɛn de nia dɛn. I go fayn mek yu aks yusɛf dis kwɛstyɔn, ‘If na mi bin de sɔfa dis kayn we, aw a go want lɛ dɛn trit mi?’—Matyu 7:12.
WE WI DE PRICH TO RƐFYUJI DƐN WE NƆTO JIOVA WITNƐS
17. Aw di prichin wok we wi de du de ɛp rɛfyuji dɛn?
17 Bɔku rɛfyuji dɛn tide kɔmɔt na kɔntri dɛn usay dɛn nɔ de alaw wi fɔ prich. Wi tɛl wi brɔda ɛn sista dɛn we de prich wit zil tɛnki, bikɔs bɔku bɔku rɛfyuji dɛn dɔn yɛri “bɔt Gɔd in rul” fɔ di fɔstɛm na dɛn layf. (Matyu 13:19, 23) Wi mitin dɛn kin kɔrej bɔku rɛfyuji dɛn we “dɔn taya fɔ tot ebi lod” ɛn mek dɛn fil fayn. Dɛn kin tɔk kwik kwik wan se: “Gɔd de wit una na ya!”—Matyu 11:28-30; Fɔs Lɛta Fɔ Kɔrint 14:25.
18, 19. Aw wi go prich wit sɛns to rɛfyuji dɛn?
18 Wi nid fɔ yuz sɛns ɛn du tin “kɛlɛkɛlɛ” we wi de prich to rɛfyuji dɛn. (Matyu 10:16; Prɔvabs 22:3) We rɛfyuji dɛn de tɔk to yu na fɔ peshɛnt lisin, bɔt nɔ tɔk bɔt pɔlitiks. Wi fɔ du wetin di branch ɔfis tɛl wi ɛn wetin di wan dɛn we de oba dɛn tɛl wi so dat wi nɔ go put wisɛf ɔ ɔda pipul dɛn pan denja. Bikɔs rɛfyuji dɛn gɛt difrɛn rilijɔn dɛn ɛn biliv difrɛn tin dɛn, wi nid fɔ lan aw dɛn de tink ɛn fil, ɛn rɛspɛkt dat. Fɔ ɛgzampul, pipul dɛn na sɔm kɔntri dɛn rili biliv se uman dɛn fɔ drɛs fayn. So we wi want fɔ go prich to dɛn, i go fayn fɔ mek wi drɛs di we we nɔ go ɔfɛnd dɛn.
19 Wi want fɔ ɛp pipul dɛn we de sɔfa, ivin di wan dɛn we nɔ de wɔship Jiova. We wi de du dat, wi de falamakata di fayn ɛgzampul we wan Samɛritan bin sɛt na wan stori we Jizɔs bin pul. (Lyuk 10:33-37) Di bɛst we aw wi kin ɛp pipul dɛn na fɔ tich dɛn di gud nyus. Wan ɛlda we dɔn ɛp bɔku rɛfyuji dɛn bin tɔk se i impɔtant fɔ mek wi tɛl dɛn wantɛm wantɛm se wi na Jiova Witnɛs. Wi fɔ mek dɛn no se di men rizin we mek wi kam de na fɔ ɛp dɛn fɔ ɔndastand di wɔndaful op we de na di Baybul nɔto fɔ gi dɛn mɔni ɔ prɔpati.
GUD TIN DƐN WE GO MEK WI GLADI
20, 21. (a) Us gud tin kin apin we wi sho tru tru lɔv to rɛfyuji dɛn? (b) Wetin wi go tɔk bɔt insay di nɛks atikul?
20 Gud tin kin apin we wi sho tru tru lɔv to “trenja” dɛn. We wan sista we nem Alganɛsh in man day, i bin rɔnawe wit in siks pikin dɛn kɔmɔt na Ɛriteria bikɔs dɛn bin de mek dɛn sɔfa. Dis sista ɛn in pikin dɛn bin tek 8 dez de travul na dɛzat. Afta we dɛn dɔn travul fɔ lɔng tɛm, dɛn bin rich na Sudan taya taya wan. Di sista bin tɔk se: “Di brɔda dɛn na Sudan bin trit wi fayn lɛk se wi na dɛn fambul, dɛn bin gi wi tin fɔ it, klos fɔ wɛr, say fɔ slip, ɛn transpɔt.” I kɔntinyu fɔ tɔk se, “Udat dɛn go wɛlkɔm trenja dɛn na dɛn os bikɔs dɛn de wɔship di sem Gɔd? Na Jiova Witnɛs dɛn nɔmɔ kin du dat!”—Rid Jɔn 13:35.
21 Wetin wi go se bɔt di bɔku pikin dɛn we kam wit dɛn mama ɛn papa dɛn? Insay di nɛks atikul, wi go tɔk bɔt aw wi ɔl kin ɛp dɛn famili dɛn ya fɔ sav Jiova wit gladi at.
^ par. 2 Insay dis atikul, di wɔd “rɛfyuji” min pipul dɛn we dɔn lɛf dɛn os bikɔs wɔ de na dɛn kɔntri, ɔ pipul dɛn de mek dɛn sɔfa, ɔ tin dɛn lɛk atkwek, ebi ren, ɔ big big briz pwɛl di say we dɛn de. Di UNHCR (United Nations High Commissioner for Refugees) se we yu kɔnt 113 pipul dɛn na di wɔl, 1 go bi rɛfyuji.
^ par. 6 Rid di atikul we gɛt di taytul “Una Nɔ Fɔgɛt fɔ De Du Gud to Strenja Dɛn” insay di Ɔktoba 2016, Wachtawa, pej 8 to pej 12.
^ par. 11 Ɛlda dɛn nɔ fɔ westɛm fɔ fala wetin di Organized to Do Jehovah’s Will buk se na chapta 8, paregraf 30 we rɛfyuji kam na dɛn kɔntri. Ɛlda dɛn kin yuz jw.org fɔ rayt to dɛn yon branch fɔ mek dɛn go ebul tɔk to di kɔngrigeshɔn na di kɔntri usay di rɛfyuji bin de. Dɛn kin tek tɛm aks kwɛstyɔn dɛn bɔt di rɛfyuji in kɔngrigeshɔn ɛn prichin wok fɔ no if i bin de sav Jiova di rayt we.
^ par. 14 Rid di atikul dɛn we gɛt di taytul “Nɔbɔdi Nɔ Go Ebul Sav Tu Masta” ɛn “Jiova Go Ɛp Yu—Nɔ Fred!” insay di Epril 1, 2014, Wachtawa, pej 17 to pej 26.