Wi Go Gɛt Gladi At we Wi Liv Simpul Layf
DANIƐL ƐN MIRIAM bin mared insay Sɛptɛmba 2000, ɛn dɛn bin de na Basilona, insay Spen. Daniɛl bin ɛksplen se: “Di wok we wi bin de du, bin de mek wi ebul fɔ it na dɛn pɔsh rɛstɔrant dɛn, travul go ovasi, ɛn wɛr fayn klos dɛn. Wi bin ebul bak fɔ de go fil savis fast-fast.” Bɔt sɔntin bin apin.
Na wan kɔnvɛnshɔn insay 2006, Daniɛl bin lisin to wan tɔk usay di spika aks se: “Wi de du ɔl wetin wi ebul fɔ ɛp di wan dɛn we de ‘staga fɔ go usay dɛn want fɔ kil dɛn,’ so dat dɛn go de na di rod fɔ gɛt layf we go de sote go?” (Prɔvabs 24:11, NW) Insay dis tɔk dɛn bin se na wi gɛt di wok fɔ prich di Baybul in mɛsej, bikɔs nain nɔmɔ go mek pipul dɛn sev. (Di Apɔsul Dɛn Wok [Akt] 20:26, 27) Daniɛl bin mɛmba aw i bin fil. I se: “A bin fil lɛk se na mi Jiova bin de tɔk to.” Di spika bin tɔk bak se wi go gladi mɔ we wi du mɔ fɔ sav Jiova. Daniɛl bin no se dat na tru bikɔs i bin de si se Miriam we bin dɔn bigin fɔ payɔnia, bin rili gladi.
Dis tɔk bin rili afɛkt Daniɛl ɛn dat bin mek i disayd se i go mek big chenj na in layf. I bigin fɔ yuz smɔl tɛm fɔ wok, i bigin fɔ payɔnia, ɛn i tink bɔt aw in ɛn Miriam go gɛt gladi at if dɛn go de na say usay dɛn nid mɔ pipul dɛn fɔ prich bɔt di Kiŋdɔm.
FƆS I NƆ BIN IZI; BƆT DƐN BIN GƐT GUD NYUS
Insay Me, 2007, Daniɛl ɛn Miriam bin lɛf di wok we dɛn bin de du ɛn go de na Panama usay dɛn bin dɔn go waka. Di say we dɛn bin de prich bin gɛt bɔku ayland dɛn we de na di Bukas dɛl Toro Achipɛlago na di Karebian Si. Bɔku pan di pipul dɛn we bin de de na bin Guaymi pipul dɛn. Daniɛl ɛn Miriam bin tink se dɛn go de na Panama fɔ lɛk et mɔnt ɛn ebul fɔ yuz di mɔni we dɛn bin dɔn kip.
Dɛn bin yuz bot ɛn baysikul fɔ travul na di ayland dɛn. Dɛn bin stil mɛmba di fɔstɛm we dɛn bin rayd dɛn baysikul fɔ lɛk 30 kilomita (20 mayl) ɔp dɛn ay ay il we ples wam. Daniɛl bin so taya dat i lɛf smɔl fɔ mek i fent. Bɔt di Guaymi pipul dɛn we dɛn bin go mit, na pipul dɛn we lɛk fɔ du gud to trenja dɛn, mɔ we Daniɛl ɛn Miriam bin dɔn lan sɔm wɔd dɛn insay dɛn langwej. I nɔ tu te, dɛn bin gɛt 23 Baybul stɔdi dɛn.
Wetin bin apin we dɛn mɔni dɔn? Daniɛl se: “Wata sɛtul na wi yay we wi bigin tink fɔ go bak na Spen. Wi bin rili fil am we wi no se wi de kam lɛf wi Baybul stɔdi dɛn.” Bɔt afta wan mɔnt, dɛn bin gɛt gud nyus. Miriam se: “Dɛn bin invayt wi fɔ bi spɛshal payɔnia dɛn. Wi bin rili gladi fɔ kɔntinyu fɔ de na di say usay wi bin go ɛp fɔ prich!”
DI TIN WE MEK DƐN RILI GLADI
Bikɔs dɛn bin ajɔst sɔm tin dɛn na di ɔganayzeshɔn, dat bin mek Daniɛl ɛn Miriam lɛf fɔ sav as spɛhal payɔnia insay 2015. Wetin dɛn go du naw? Dɛn bin abop pan di prɔmis we de na Sam 37:5 we se: “Lɛf yusɛf gi PAPA GƆD [“Jiova,” NW] ɛn trɔs am; ɛn i go mɔs ɛp yu.” Dɛn bin fɛn wok so dat dɛn go ebul fɔ sɔpɔt dɛnsɛf we dɛn de rɛgyula payɔnia, ɛn naw dɛn de sav na wan kɔngrigeshɔn na Veraguas insay Panama.
Daniɛl se: “Bifo wi kɔmɔt na Spen, wi nɔ bin shɔ se wi go ebul fɔ liv simpul layf. Naw, wi no se wi ebul fɔ du dat ɛn wi gɛt ɔl wetin wi rili nid.” Wetin dɔn mek dɛn rili gladi? Dɛn se: “We wi ebul fɔ ɛp pipul dɛn we ɔmbul fɔ lan bɔt Jiova, dat mek wi gɛt gladi at we wi nɔ go kɔmpia to ɛni ɔda tin!”
