1, 2. Afta we Pita bin dɔn fishin ol nɛt, us lɛsin i bin lan?

SƐVIN pan Jizɔs in disaypul dɛn bin de fishin ol nɛt na di Si we de na Galili. Bɔt dɛn nɔ bin ebul kech wan fish. Naw do dɔn klin, ɛn Jizɔs we bin dɔn gɛt layf bak bin tinap na di bich de wach dɛn. Dɔn Jizɔs se, “‘Una sɛn una chen na una raytan say, una go kech fish.’ So dɛn sɛn di chen na di say we Jizɔs tɛl dɛn; dɛn nɔ ebul drɔ di nɛt kam insay di bot, bikɔs di fish dɛn bin tu plɛnti.”—Jɔn 21:​1-6.

² Jizɔs bin gi in disaypul dɛn bred ɛn fish fɔ it da mɔnin tɛm de. Afta dat, i tɔn to Saymɔn Pita ɛn aks am se: “Saymɔn, Jɔn in pikin, yu lɛk mi pas dɛn wan ya?” Jizɔs bin no se Pita lɛk fɔ fishin. I go bi se Jizɔs bin de aks Pita if i lɛk am ɛn if i lɛk wetin i bin dɔn tich am pas aw i lɛk fɔ fishin. Pita bin ansa Jizɔs se: “Masta, yu no se a rili lɛk yu.” (Jɔn 21:​15, NW) Frɔm da de de, Pita bin de du tin  dɛn we sho se i min wetin i bin tɔk. I bin sho se i lɛk Krays bay we i bin yuz ɔl in tɛm fɔ du di prichin wok, ɛn i bin kam fɔ bi impɔtant pɔsin na di Kristian kɔngrigeshɔn.

3. Wetin Kristian dɛn fɔ tek tɛm wit?

³ Wetin wi kin lan frɔm di tin we Jizɔs bin tɛl Pita? Wi fɔ tek tɛm lɛ natin nɔ ambɔg di lɛk we wi lɛk Krays. Jizɔs bin no se tin nɔ go izi fɔ wi insay dis tɛm we wi de ɛn i bin no bak se wi go gɛt prɔblɛm dɛn, ɛn bɔku tin go mek wi wɔri. We Jizɔs bin pul di parebul bɔt da fama, i bin se sɔm pipul dɛn go gri wit di mɛsej bɔt “Gɔd in rul” ɛn dɛn go gɛt zil. Bɔt as tɛm de go “di waala ɛn di jɛntri we dɛn want na dis wɔl” go “kil di wɔd na dɛn at,” ɛn dɛn pipul dɛn ya nɔ go gɛt di kayn zil we dɛn bin gɛt fɔs. (Matyu 13:​19-22; Mak 4:​19) If wi nɔ tek tɛm, di tin dɛn we de mek wi de wɔri na layf kin mek wi nɔ ebul sav Jiova bɛtɛ. So Jizɔs bin wɔn in disaypul dɛn se: “Una fɔ bikyaful, mek una nɔ jɛs sidɔm de ɛnjɔy dɛn pati ɛn drɔnk. Una nɔ fɔ put una at tumɔs pan wetin fɔ wɛr ɛn wetin una fɔ it.”—Lyuk 21:​34.

4. Wetin go ɛp wi fɔ no if wi rili lɛk Krays? (Luk di pikchɔ nia dis atikul in taytul.)

⁴ Jɔs lɛk Pita, wi kin sho se wi lɛk Krays bay we wi de put di prichin wok fɔs na wi layf. Aw wi go mek shɔ se wi de kɔntinyu fɔ du dis? Wi fɔ aks wisɛf dɛn kwɛstyɔn dɛn ya: ‘Wetin a lɛk pas ɔl ɔda tin na mi layf? A kin gladi we a de sav Jiova ɔ na we a kin de du ɔda tin dɛn kin mek a gladi?’ Fɔ mek wi go ebul fɔ ansa dɛn kwɛstyɔn dɛn ya, lɛ wi tɔk bɔt tri tin dɛn we kin mek wi nɔ lɛk Krays bɛtɛ wan igen. Dɛn tin dɛn ya na wok, di we aw wi de ɛnjɔy wisɛf, ɛn bɔku prɔpati.

5. Us wok Jiova gi di wan dɛn we de oba dɛn famili?

⁵ Pita nɔ bin jɔs lɛk fɔ fishin. Na da wok de i bin de du fɔ kia fɔ in famili. Semweso, Jiova dɔn tɛl di wan dɛn we de oba dɛn famili se na dɛn gɛt di wok fɔ sɔpɔt dɛn famili. (Fɔs Lɛta To Timoti 5:​8) Dɛn fɔ wok tranga wan fɔ mek dɛn go ebul fɔ du dat. Bɔt insay dis las dez, di wok we pɔsin de du kin mek i wɔri.

6. Wetin kin mek di wan dɛn we de wok strɛs?

⁶ Bɔku pipul dɛn de fɛn wok fɔ du, bɔt di wok dɛn we de nɔ bɔku. Dis dɔn mek i nɔ izi fɔ fɛn wok. Bɔku pipul dɛn fil se dɛn nid fɔ wok fɔ lɔng tɛm pan ɔl we sɔntɛnde dɛn nɔ kin pe dɛn bɛtɛ. Tide, biznɛs man dɛn want fɔ mek bɔku tin dɛn fɔ sɛl, bɔt na smɔl wokman dɛn, dɛn de yuz fɔ du di wok. So di wan dɛn we de wok kin strɛs, dɛn kin taya bad bad wan, ɛn dɛn kin ivin sik. Bɔku pipul dɛn de fred se dɛn go lɔs dɛn wok if dɛn nɔ du ɔl wetin dɛn bɔs tɛl dɛn fɔ du.

7, 8. (a) Udat wi fɔ de biɛn pas ɛni ɔda pɔsin? (b) Us impɔtant tin wan brɔda na Tayland bin kam fɔ no bɔt in wok?

 ⁷ Bikɔs wi na Kristian dɛn, wi de biɛn Jiova pas ɛni ɔda pɔsin, ivin wi bɔs dɛn. (Lyuk 10:​27) Wi de wok fɔ gɛt wetin wi nid ɛn fɔ sɔpɔt wi prichin wok. Bɔt if wi nɔ tek tɛm, di wok dɛn we wi de du na wi wokin ples go mek wi nɔ gɛt bɛtɛ tɛm fɔ sav Jiova. Wi kin lan frɔm wan brɔda na Tayland. I bin se: “Mi wok na fɔ mek kɔmpyuta dɛn we dɔn pwɛl ɛn a bin rili de ɛnjɔy am, bɔt a bin de spɛn bɔku tɛm pan mi wok. Dat bin mek a nɔ gɛt bɛtɛ tɛm fɔ sav Jiova. A kam fɔ no se if a want fɔ put Gɔd in Kiŋdɔm fɔs na mi layf, a nid fɔ chenj di kayn wok we a de du.” Wetin dis brɔda bin du?

⁸ I kɔntinyu fɔ tɔk se: “A plan misɛf fɔ lɛk wan ia, dɔn a disayd fɔ bigin sɛl ays krim na strit. We a jɔs bigin, a nɔ bin de gɛt bɛtɛ mɔni ɛn mi at bin pwɛl. We a si mi kɔmpin dɛn we wi ɔl bin de wok, dɛn bin de laf mi ɛn aks mi wetin mek a tink se fɔ sɛl ays krim bɛtɛ pas fɔ wok wit kɔmpyuta dɛn na ɔfis we gɛt ia kɔndishɔn. A pre to Jiova, ɛn a aks am mek i ɛp mi fɔ bia ɛn fɔ mek a ebul du wetin a dɔn plan fɔ du, dat na fɔ yuz mɔ pan mi tɛm fɔ sav am. I nɔ tu te, tin bigin bɛtɛ fɔ mi. A kam ɔndastand uskayn ays krim mi kɔstɔma dɛn lɛk ɛn a bigin fɔ mek fayn ays krim. I nɔ tu te, ɔl mi ays krim bin de dɔn ɛvride. Fɔ tru, a de gɛt mɔ mɔni naw pas di tɛm we a bin de wok wit kɔmpyuta dɛn. Dis dɔn mek a gladi naw pas aw a bin gladi trade, bikɔs mi wok nɔ de mek a strɛs ɛn wɔri lɛk trade. Ɛn di tin we impɔtant mɔ na dat, naw a dɔn kam nia Jiova mɔ ɛn mɔ.”—Rid Matyu 5:​3, 6.

9. Wetin wi go du fɔ mek wi kɔntinyu fɔ tink di rayt we bɔt wok?

⁹ Jiova kin gladi we wi de wok tranga wan. Wi de bɛnifit we wi wok tranga wan. (Prɔvabs 12:​14) Bɔt wi nid fɔ tek tɛm mek wi wok nɔ impɔtant pas wi savis to Jiova. We Jizɔs bin de tɔk bɔt di tin dɛn we wi nid, i bin tɔk se: “Una fɔ put una at gud pan dɛn tin we impɔtant na di say we Gɔd de rul ɛn du di rayt tin we Gɔd want una fɔ du fɔs, da tɛm de i go gi una ɔl dɛn tin ya.” (Matyu 6:​33) Bɔt aw wi go ebul no if wi de tink di rayt we bɔt wi wok? Wi kin aks wisɛf dis kwɛstyɔn: ‘A de ɛnjɔy di wok we a de du pas di we aw a de ɛnjɔy fɔ sav Gɔd?’ We wi tink bɔt dis kwɛstyɔn, i go ɛp wi fɔ no klia wan wetin wi rili lɛk.

10. Us impɔtant lɛsin Jizɔs bin tich?

¹⁰ Jizɔs bin tich wi wetin fɔ de fɔs na wi layf. Wan tɛm, i bin go na Meri ɛn Mata dɛn os. Wantɛm wantɛm, Mata bigin fɔ kuk fɔ am, bɔt Meri bin sidɔm nia Jizɔs ɛn lisin to wetin i bin de tich. Mata bin grɔmbul se Meri nɔ de ɛp am.  Bɔt Jizɔs bin tɛl Mata se na ‘gud tin Meri de du ɛn nɔbɔdi nɔ go pul am na in an.’ (Lyuk 10:​38-42) Na impɔtant lɛsin Jizɔs bin de tich. Wi go sho se wi lɛk Krays ɛn wi nɔ jɔs de put wi atɛnshɔn pan di tin dɛn we wi nid, we wi disayd fɔ du di tin “we gud.” Dis min se, wi padi biznɛs wit Jiova fɔ bi di tin we impɔtant to wi pas ɛni ɔda tin na layf.

11. Wetin di Baybul se bɔt rɛst?

¹¹ Di tin dɛn we wi de du kin mek wi rili bizi, so sɔntɛnde, wi kin nid fɔ rɛst. Di Baybul se: “Di bɛst tin fɔ mɔtalman fɔ du, na fɔ it drink ɛn ɛnjɔy wetin i dɔn wok fɔ.” (Ɛkliziastis 2:​24) Jizɔs bin no se i impɔtant fɔ mek in disaypul dɛn rɛst. Fɔ ɛgzampul, we dɛn bin dɔn prich ol de, Jizɔs bin tɛl dɛn se: “Una lɛ wi go blo na ples we pipul nɔ de.”—Mak 6:​31, 32.

12. Wetin mek wi nid fɔ tek tɛm bɔt di we aw wi de ɛnjɔy wisɛf? Gi wan ɛgzampul.

¹² Di tin dɛn we wi kin du fɔ ɛnjɔy wisɛf kin ɛp wi fɔ rɛst. Bɔt wi fɔ tek tɛm mek di we aw wi de ɛnjɔy wisɛf nɔ bi di tin we impɔtant pas ɔl ɔda tin na wi layf. Insay di fɔstɛm Kristian dɛn tɛm, bɔku pan dɛn bin de se: “Mek wi it ɛn drink ɛn ɛnjɔy wisɛf naw, bikɔs wi go day jisnɔ.” (Fɔs Lɛta Fɔ Kɔrint 15:​32) Na dis sem kayn we pipul dɛn de biev tide. Fɔ ɛgzampul, wan yɔŋ man na Wɛstan Yurop bigin fɔ atɛnd mitin. Bɔt i bin lɛk fɔ ɛnjɔy insɛf tumɔs. So i bin lɛf fɔ de miks wit Jiova Witnɛs dɛn. Leta, i bin kam fɔ no se di bɔku tɛm we i bin de spɛn fɔ ɛnjɔy insɛf dɔn mek i dɔn gɛt bɔku prɔblɛm dɛn. I bigin fɔ stɔdi di Baybul bak, ɛn dis tɛm, i bin ebul fɔ bigin prich. Afta we i dɔn baptayz, i bin tɔk se: “Di wangren tin we a rigrɛt na dat a dɔn west bɔku tɛm bifo a kam fɔ no se a de gladi mɔ we a de sav Jiova pas we a de spɛn bɔku tɛm fɔ ɛnjɔy misɛf na dis wɔl.”

13. (a) Gi wan ɛgzampul we de sho wetin mek i nɔ fayn fɔ spɛn bɔku tɛm pan di we aw wi de ɛnjɔy wisɛf. (b) Wetin go ɛp wi fɔ tink di rayt we bɔt di we aw wi de ɛnjɔy wisɛf?

¹³ Wi fɔ ɛnjɔy wisɛf di we we go mek wi rɛst ɛn gɛt trɛnk fɔ du sɔntin. So ɔmɔs tɛm wi fɔ yuz fɔ ɛnjɔy wisɛf? Bɔku pipul dɛn lɛk fɔ it kek ɛn swit dɛn. Bɔt wi no se if wi it dɛn tin dɛn de ɔltɛm, wi nɔ go gɛt bɛtɛ wɛlbɔdi. If wi want fɔ gɛt wɛlbɔdi, wi fɔ it tin dɛn we fayn fɔ wi. Semweso, if wi spɛn bɔku tɛm fɔ ɛnjɔy wisɛf, dat go mek wi nɔ gɛt tayt padi biznɛs wit Jiova. Wetin go ɛp wi fɔ no if wi de tink di rayt we bɔt di we aw wi de ɛnjɔy wisɛf? Wan tin we wi fɔ du na fɔ rayt ɔmɔs tɛm wi kin tek insay di wik fɔ du tin dɛn we go ɛp wi fɔ gɛt tayt padi biznɛs wit Jiova, lɛk fɔ go mitin, fɔ prich, ɛn fɔ stɔdi di Baybul. Dɔn, wi kin rayt ɔmɔs tɛm wi spɛn insay da sem wik de fɔ ɛnjɔy wisɛf, lɛk fɔ wach gem, tɛlivishɔn, ɛn fɔ ple vidio gem dɛn. Wetin wi lan we wi kɔmpia di tu nɔmba dɛn? Wi go nid fɔ chenj di we aw wi de du tin?—Rid Lɛta Fɔ Ɛfisɔs 5:​15, 16.

14. Wetin go ɛp wi fɔ pik di rayt we fɔ ɛnjɔy wisɛf?

¹⁴ Jiova de alaw wi fɔ pik di we aw wi  want fɔ ɛnjɔy wisɛf, ɛn di wan dɛn we de oba di famili sɛf kin pik di we aw dɛn famili fɔ ɛnjɔy dɛnsɛf. Insay di Baybul, Jiova gi wi prinsipul dɛn we de sho wi aw i de tink. Dɛn prinsipul dɛn ya de ɛp wi fɔ disayd fɔ du di rayt tin. * (Luk di futnot.) Di Baybul se, “PAPA GƆD want” mek wi ɛnjɔy wisɛf di we we fayn. (Ɛkliziastis 3:​12, 13) Na tru se difrɛn pipul dɛn gɛt difrɛn kayn we aw dɛn lɛk fɔ ɛnjɔy dɛnsɛf. (Lɛta Fɔ Galeshya 6:​4, 5) Bɔt ilɛk uskayn we wi disayd fɔ ɛnjɔy wisɛf, wi fɔ stil tek tɛm. Jizɔs bin se: “Una at go de di say we una kip una jɛntri.” (Matyu 6:​21) Di lɛk we wi lɛk Jizɔs we na wi Kiŋ, fɔ mek wi tink, tɔk, ɛn du tin di we we de sho se di Kiŋdɔm na sɔntin we impɔtant to wi pas ɛni ɔda tin.—Lɛta Fɔ Filipay 1:​9, 10.

15, 16. (a) Wetin go apin if wi de fɛt fɔ gɛt bɔku prɔpati? (b) Us fayn advays Jizɔs bin gi bɔt bɔku prɔpati?

¹⁵ Tide, bɔku pipul dɛn tink se dɛn fɔ gɛt di klos, fon, kɔmpyuta, ɛn ɔda tin dɛn we jɔs kɔmɔt. Dɛn lɛk fɔ gɛda bɔku prɔpati. Di we aw dɛn de liv dɛn layf de sho se na mɔni ɛn bɔku prɔpati impɔtant to dɛn pas ɛni ɔda tin. As Kristian, wetin impɔtant to yu pas ɛni ɔda tin?  Aks yusɛf dɛn kwɛstyɔn dɛn ya: ‘A de spɛn bɔku tɛm fɔ tink bɔt motoka ɔ tin dɛn we jɔs kɔmɔt, pas di we aw a de spɛn tɛm fɔ tink we a de pripia fɔ mitin? A dɔn alaw di tin dɛn we a de du ɛvride fɔ mek a nɔ gɛt bɛtɛ tɛm fɔ pre ɔ rid di Baybul?’ If wi nɔ tek tɛm, di we aw wi lɛk bɔku prɔpati go impɔtant pas di we aw wi lɛk Krays. Wi fɔ tink bɔt wetin Jizɔs bin tɔk we i se, wi “nɔ fɔ put at pan jɛntri.” (Lyuk 12:​15) Wetin mek Jizɔs bin tɔk dis?

¹⁶ Jizɔs bin tɔk se: “Nɔbɔdi nɔ go bi slev to tu masta di sem tɛm.” I tɔk bak se: “Una nɔ go de du Gɔd wok ɛn bi slev to mɔni, di sem tɛm.” Wi nɔ go ebul fɔ gi wi bɛst to Jiova ɛn di sem tɛm de tray tranga wan fɔ gɛt bɔku prɔpati. Jizɔs bin tɔk se di pɔsin “go lɛk wan masta, i nɔ go lɛk di ɔda wan.” (Matyu 6:​24) Bikɔs wi nɔ pafɛkt, wi fɔ kɔntinyu fɔ fɛt tranga wan mek wi nɔ alaw “wetin wi fil fɔ du,” lɛk fɔ gɛt bɔku prɔpati fɔ pwɛl wi padi biznɛs wit Jiova.—Lɛta Fɔ Ɛfisɔs 2:​3.

17. (a) Wetin mek i nɔ izi fɔ mek bɔku pipul dɛn tink di rayt we bɔt prɔpati? (b) Wetin go ɛp wi fɔ tink di rayt we bɔt prɔpati?

¹⁷ Bɔku pipul dɛn de tink bɔt wetin dɛn want ɛn aw fɔ ɛnjɔy dɛnsɛf nɔmɔ, ɛn dat de mek i nɔ kin izi fɔ mek dɛn tink di rayt we bɔt prɔpati. (Rid Fɔs Lɛta Fɔ Kɔrint 2:​14.) Bikɔs dɛn nɔ de tink di rayt we, i nɔ kin izi fɔ mek dɛn no wetin rayt ɛn wetin nɔ rayt. (Di Ibru Pipul Dɛn 5:​11-14) Dɛn go kɔntinyu fɔ lɛk prɔpati mɔ ɛn mɔ. Ɛn di mɔ we dɛn de gɛt na di mɔ dɛn go want. (Ɛkliziastis 5:​10) Bɔt sɔntin de we wi kin du fɔ mek wi nɔ de tink dis kayn we. We wi de rid Gɔd in Wɔd ɔltɛm, dat go ɛp wi fɔ mek wi nɔ de tink bɔt bɔku prɔpati. (Pita In Fɔs Lɛta 2:​2) Jizɔs bin de tink bɔt di sɛns we Jiova gɛt, ɛn dat bin ɛp am fɔ mek i nɔ gri fɔ du di bad tin dɛn we Setan bin de tɛmt am fɔ du. (Matyu 4: 8-10) Tide bak, if wisɛf nɔ want fɔ de tink bɔt bɔku prɔpati, wi fɔ fala di sɛns we de na Jiova Gɔd in Wɔd. If wi du dis, wi go sho Jizɔs se wi lɛk am pas aw wi lɛk prɔpati.

18. Wetin yu dɔn mekɔp yu maynd fɔ du?

¹⁸ We Jizɔs bin aks Pita se “yu lɛk mi pas dɛn wan ya?” I bin de tich Pita se, fɔ sav Jiova fɔ bi di men tin na in layf. I fayn fɔ no se Pita in nem min “Rɔk.” Wi kin kɔmpia di gud kwaliti dɛn we Pita gɛt to rɔk. (Di Apɔsul Dɛn Wok [Akt] 4:​5-20) Tide, wisɛf want fɔ kɔntinyu fɔ lɛk Krays gud gud wan. So wi fɔ mek shɔ se wi wok, di we aw wi de ɛnjɔy wisɛf, ɛn bɔku prɔpati nɔ ambɔg wi padi biznɛs wit Gɔd. Dɔn i go tan lɛk se wi de falamakata Pita fɔ tɔk se: “Masta, yu no se a rili lɛk yu.”