1, 2. (a) Wetin mek yɔŋ wan dɛn we na Kristian de win di fɛt we dɛn gɛt agens Setan ɛn in dɛbul dɛn? (Luk di pikchɔ nia dis atikul in taytul.) (b) Wetin wi go tɔk bɔt?

DI APƆSUL PƆL bin kɔmpia Kristian dɛn to sojaman dɛn. Wi de fɛt wɔ, ɛn wi ɛnimi dɛn rial! Bɔt wi wɔ nɔto agens wi kɔmpin mɔtalman; na agens Setan ɛn in dɛbul dɛn. Dɛn dɔn de fɛt wɔ fɔ lɔng lɔng tɛm ɛn dɛn rili sabi fɔ fɛt wɔ. So i go tan lɛk se wi nɔ go ebul fɔ win dis wɔ, mɔ if wi na yɔŋ pɔsin. Yu tink se yɔŋ wan dɛn go ebul win dis wɔ agens dɛn pawaful ɛnimi dɛn ya? Yɛs, dɛn go ebul, ɛn dɛn go win! Wetin mek wi se so? Na bikɔs na Jiova de gi dɛn pawa. Dɔn lɛk sojaman dɛn we rili tren, dɛn de ‘wɛr di klos we Gɔd gi dɛn fɔ tek fɛt’ so dat dɛn go rɛdi fɔ go fɛt wɔ.—Rid Lɛta Fɔ Ɛfisɔs 6:​10-12.

² We Pɔl bin yuz dis ɛgzampul, i go mɔs bin se i bin  de tink bɔt di tin dɛn we di Roman sojaman dɛn bin de wɛr fɔ fɛt. (Di Apɔsul Dɛn Wok [Akt] 28:​16) Insay dis atikul, wi go tɔk bɔt da ɛgzampul de. Wi go tɔk bak bɔt wetin sɔm yɔŋ wan dɛn dɔn tɔk bɔt aw i nɔ izi fɔ wɛr ɛniwan pan dɛn tin ya we Gɔd gi wi fɔ fɛt, ɛn di bɛnifit we dɛn dɔn gɛt we dɛn wɛr dɛn tin ya.

3, 4. Aw di tru tin dɛn we wi de lan na di Baybul tan lɛk di Roman sojaman dɛn bɛlt?

³ Rid Lɛta Fɔ Ɛfisɔs 6:​14. Roman sojaman in bɛlt gɛt ayɛn pan am we de protɛkt di sojaman in wes ɛn kip in ebi ayɛn plet fɔ mek i nɔ kɔmɔt. Sɔm bɛlt dɛn gɛt bak strɔng klip dɛn fɔ put sɔd ɛn wan ɔda smɔl nɛf we dɛn kɔl daga. We sojaman tay in bɛlt tayt tayt wan, i de gɛt maynd we i de go fɛt wɔ.

⁴ Lɛk di bɛlt we dɛn de yuz fɔ go fɛt wɔ, na so di trut we wi de lan frɔm Gɔd in Wɔd de protɛkt wi frɔm lay lay tichin dɛn. (Jɔn 8:​31, 32; Jɔn In Fɔs Lɛta 4:​1) Di mɔ we wi de lɛk di tru tin dɛn we wi de lan frɔm Gɔd in Wɔd, na di mɔ i go izi fɔ wi fɔ liv wi layf di we aw Gɔd want ɔ fɔ wɛr wi “ayɛn plet.” (Sam 111:​7, 8; Jɔn In Fɔs Lɛta 5:​3) Dɔn, di mɔ we wi de ɔndastand di trut gud gud wan, na di mɔ wi go ebul fɔ tinap tranga wan agens wi ɛnimi dɛn fɔ wetin wi de lan.—Pita In Fɔs Lɛta 3:​15.

5. Wetin mek wi fɔ tɔk di tru ɔltɛm?

⁵ Bikɔs di tru tin dɛn na Gɔd in Wɔd rili impɔtant to wi, na dat mek wi de obe wetin di Baybul se ɛn wi de tɔk tru ɔltɛm. Lay na wan pan di men tin dɛn we Setan de yuz fɔ fɛt wi. Lay de mek di pɔsin we de tɔk am ɛn di wan we de biliv am fil bad. (Jɔn 8:​44) So pan ɔl we wi nɔ pafɛkt, wi de tray wi bɛst fɔ lɛ wi nɔ lay. (Lɛta Fɔ Ɛfisɔs 4:​25) Dis nɔ kin izi. Abigɛl we ol 18 ia bin tɔk se: “Nɔto ɔltɛm i mek sɛns fɔ tɔk di tru, mɔ we yu no se if yu lay dat go pul yu pan trɔbul.” So wetin mek Abigɛl bin de tray fɔ tɔk tru ɔltɛm? I tɔk se: “We a de tɔk di tru, a gɛt klin kɔnshɛns bifo Jiova. Mi mama, papa, ɛn mi padi dɛn kin biliv mi ɔltɛm.” Viktoria we ol 23 ia bin tɔk se: “We yu de tɔk di tru ɛn tinap fɔ wetin yu biliv, dɛn kin siz advantej pan yu. Bɔt yu go bɛnifit ɔltɛm: Yu go gɛt kɔnfidɛns, yu go kam nia Jiova mɔ ɛn mɔ, ɛn di wan dɛn we lɛk yu go rɛspɛkt yu mɔ ɛn mɔ.” Yu si wetin mek i impɔtant ɔltɛm fɔ “mek ɔl wetin tru bi di bɛlt” we yu de wɛr?

6, 7. Wetin mek dɛn kɔmpia di tin dɛn we Jiova want wi fɔ du to ayɛn plet we sojaman dɛn bin de yuz?

⁶ Bɔku tɛm, di ayɛn plet we Roman sojaman dɛn bin de wɛr bin gɛt smɔl  smɔl ayɛn dɛn we dɛn kin bɛn fɔ kɔba di chɛst. Dɛn kin jɔyn dɛn to wan lɛda bɛlt we gɛt ayɛn uk ɛn bɔkul dɛn. Di sojaman in sholda kin gɛt ɔda smɔl smɔl ayɛn dɛn we dɛn jɔyn pan lɛda. Di ayɛn plet de mek di sojaman nɔ de ebul fɔ muv bɛtɛ, ɛn i go nid fɔ de chɛk chɛk am ɔltɛm fɔ mek shɔ se di ayɛn dɛn de fayn. Bɔt i de protɛkt in at ɛn ɔda pat dɛn na in bɔdi frɔm sɔd ɔ di shap ɛj we aro gɛt!

⁷ Di tin dɛn we Jiova want wi fɔ du tan lɛk da ayɛn plet we de protɛkt wi at ɔ di pɔsin we wi rili bi. (Prɔvabs 4:​23) No sojaman nɔ de we go giwe in ayɛn plet fɔ di wan we dɛn nɔ yuz strɔng tin fɔ mek. Semweso, wi nɔ go ɛva alaw wetin wi tink se rayt fɔ mek wi nɔ du wetin Jiova se na di rayt tin fɔ du. Wi nɔ gɛt di sɛns fɔ protɛkt wi at. (Prɔvabs 3:​5, 6) Na dat mek ɔltɛm wi fɔ chɛk wi “ayɛn plet” fɔ si if i stil de protɛkt wi.

8. Wetin mek wi fɔ obe Jiova in lɔ dɛn?

⁸ Sɔntɛnde, yu kin fil se di tin dɛn we Jiova want wi fɔ du go mek yu nɔ gɛt fridɔm igen ɔ i go stɔp yu fɔ du tin dɛn we yu want fɔ du? Daniɛl we ol 21 ia bin tɔk se: “Mi ticha dɛn ɛn ɔda studɛnt dɛn kin provok mi bikɔs a de liv mi layf bay wetin di Baybul se. Fɔ sɔm tɛm, a nɔ bin gɛt kɔnfidɛns ɛn mi at bin rili pwɛl.” Bɔt aw Daniɛl de fil naw? I tɔk se: “As tɛm de go, a si di bɛnifit we pɔsin de gɛt if i liv in layf bay wetin Jiova se. Sɔm pan mi ‘padi dɛn’ bigin fɔ tek drɔgs; ɔda wan dɛn nɔ bin ebul fɔ dɔn skul. I sɔri fɔ si di kayn we aw dɛn de liv dɛn layf. Jiova de rili protɛkt wi.” Madisin we ol 15 ia tɔk se: “I nɔ rili izi fɔ mek a kɔntinyu fɔ du wetin Jiova want ɛn nɔ du wetin mi kɔmpin dɛn tink se na ɛnjɔymɛnt ɔ na fayn tin.” So wetin Madisin bin du? I tɔk se: “A kin mɛmba misɛf se Jiova in nem de pan mi ɛn ɛnitin we dɛn yuz fɔ tɛmt mi na jɔs wan we we Setan de yuz fɔ shut mi. Ɛnitɛm a nɔ gri fɔ du wetin bad, a kin fil gud bɔt misɛf.”

9-11. (a) Uskayn sus di Baybul tɔk se Kristian dɛn fɔ wɛr? (b) Wetin go ɛp wi fɔ fil gud we wi de prich?

⁹ Rid Lɛta Fɔ Ɛfisɔs 6:​15. Roman sojaman nɔ go ɛva go fɛt wɔ if i nɔ wɛr sus. Dɛn kin yuz tri lɛda dɛn fɔ mek dɛn sus, so di sus dɛn kin rili strɔng. Bɔt dɛn sus dɛn ya kin fayn fɔ wɛr, so di sojaman go waka wit kɔnfidɛns ɛn i nɔ go slipul ɛn fɔdɔm.

¹⁰ Di sus dɛn we di Roman soja dɛn de wɛr, de ɛp dɛn fɔ win we dɛn go fɛt wɔ. Semweso, di sus we wi de wɛr de ɛp wi fɔ prich di “gud yus, we de anawns bɔt pis.” (Ayzaya 52:​7; Lɛta Fɔ Rom 10:​15) Stil, wi kin rili nid maynd fɔ prich. Bo we ol 20 ia tɔk se: “A bin de fred fɔ prich to mi klasmet dɛn. A tink se  a bin de shem. We a de tink bɔt dɛn tɛm dɛn de, a nɔ no wetin mek a bin de shem. Naw a gladi fɔ prich to mi kɔmpin dɛn.”

¹¹ Bɔku yɔŋ wan dɛn we na Kristian dɔn kam fɔ no se dɛn kin fil fayn we dɛn de prich if dɛn pripia gud gud wan bifo tɛm. Bɔt wetin yu go du fɔ pripia? Julia we ol 16 ia tɔk se: “A kin gɛt buk ɛn magazin dɛn insay mi skulbag ɔltɛm, ɛn a kin lisin to wetin mi klasmet dɛn de tɔk bɔt aw dɛn fil ɛn wetin dɛn biliv. Dat kin ɛp mi fɔ tink bɔt aw fɔ ɛp dɛn. We a pripia, a kin tɔk to dɛn bɔt wetin rili go bɛnifit dɛn.” Makɛnzi we ol 23 ia tɔk se: “If yu na gud pɔsin ɛn yu na pɔsin we de lisin, yu go ebul no wetin de apin to yu kɔmpin dɛn. A kin mek shɔ se a dɔn rid ɔl di buk dɛn ɔ wach di fim dɛn we dɛn dɔn mek fɔ yɔŋ wan dɛn. Bay da we de, a kin ebul fɔ sho sɔntin to mi kɔmpin dɛn insay di Baybul ɔ na jw.org wɛbsayt we go ɛp dɛn.” We yu pripia gud gud wan, i tan lɛk we yu wɛr “sus” we du fɔ yu.

12, 13. Wetin na sɔm pan Setan in “ɔt aro” dɛn?

¹² Rid Lɛta Fɔ Ɛfisɔs 6:​16. Roman sojaman kin ol big big shild. Di shild de kɔba am frɔm in sholda to in ni ɛn i de protɛkt am frɔm sɔd, spia, ɛn aro dɛn.

¹³ Wetin na di “ɔt aro” we Setan kin yuz fɔ shut yu? Sɔntɛm i go atak yu wit lay lay tin dɛn bɔt Jiova. Setan want yu fɔ fil se Jiova nɔ lɛk yu ɛn i nɔ bisin bɔt yu. Ayda we ol 19 ia tɔk se: “A bin de fil se Jiova nɔ de nia mi ɛn i nɔ want fɔ bi mi Padi.” Wetin i kin du we i fil da we de? Ayda tɔk se: “Di mitin dɛn de rili ɛp mi fɔ gɛt mɔ fet. A kin go de ɛn a nɔ kin ɛva gi kɔmɛnt, bikɔs a bin de tink se nɔbɔdi nɔ go want fɔ yɛri wetin a gɛt fɔ tɔk. Bɔt naw, a de pripia fayn ɛn tray fɔ ansa tu ɔ tri tɛm. I nɔ izi bɔt a kin fil fayn we a du am. Ɛn di brɔda ɛn sista dɛn rili de ɛnkɔrej mi. Ɛnitɛm a kɔmɔt na mitin, a kin no se Jiova lɛk mi.”

14. Wetin wi lan frɔm di tin we bin apin to Ayda?

¹⁴ Sojaman in shild na di sem sayz ɔltɛm. Bɔt as wi dɔn lan frɔm wetin bin apin to Ayda, wi fet nɔ fɔ tan lɛk dat. Wi fet kin gro ɔ i kin smɔl, i kin strɔng ɔ i kin wik. Na wi kin disayd aw wi fet fɔ de. (Matyu 14:​31; Sɛkɛn Lɛta Fɔ Tɛsalonayka 1:​3) Fɔ mek wi “shild” we na fet protɛkt wi, wi fɔ kɔntinyu fɔ mek i gro strɔng mɔ ɛn mɔ!

15, 16. Aw di op we wi gɛt tan lɛk ɛlmɛt?

¹⁵ Rid Lɛta Fɔ Ɛfisɔs 6:​17. Di Roman sojaman dɛn bin de wɛr ɛlmɛt fɔ protɛkt dɛn ed, dɛn nɛk, ɛn dɛn fes. Sɔntɛnde, di ɛlmɛt kin gɛt andul we di sojaman go yuz fɔ ol am.

¹⁶ Jɔs lɛk ɛlmɛt we de protɛkt sojaman in bren, we wi “no se Gɔd dɔn sev wi” dat de protɛkt wi. (Fɔs Lɛta Fɔ Tɛsalonayka 5:​8; Prɔvabs 3:​21) Op de ɛp wi fɔ put wi maynd pan di prɔmis dɛn we Gɔd dɔn mek ɛn nɔ fɔ alaw wi at fɔ pwɛl bikɔs wi gɛt prɔblɛm dɛn. (Sam 27:​1, 14; Di Apɔsul Dɛn Wok [Akt] 24:​15) Bɔt if wi want wi op fɔ protɛkt wi, i fɔ rial to wi. Wi fɔ wɛr wi “kyap” na wi ed, nɔto fɔ ol am na wi an!

17, 18. (a) Aw Setan kin mek wi pul wi ɛlmɛt? (b) Aw wi go pruv se wi nɔ de alaw Setan fɔ ful wi?

¹⁷ Aw Setan kin yuz kɔni fɔ mek wi pul wi ɛlmɛt na wi ed? Tink bɔt wetin i bin tray fɔ du to Jizɔs. Setan bin no se Jizɔs go bi di wan we go rul mɔtalman. Bɔt fɔs, Jizɔs bin gɛt fɔ sɔfa ɛn day. Ɛn i go gɛt fɔ wet fɔ Jiova in tɛm bifo i bi Kiŋ. So Setan bin gi am di chans fɔ mek i rul kwik kwik wan. Setan bin prɔmis Jizɔs se if i jɔs butu ɛn wɔship am, i go bigin fɔ rul di wɔl wantɛm wantɛm. (Lyuk 4:​5-7) Setan no bak se Jiova dɔn prɔmis fɔ gi wi wɔndaful tin dɛn na di nyu wɔl. Bɔt wi gɛt fɔ wet fɔ di tɛm we dis prɔmis ya go bi. Bɔt as wi de wet, wi go gɛt bɔku prɔblɛm dɛn. So Setan de sho wi tin dɛn we go mek wi liv gud layf naw. I want lɛ wi put di we aw wi go liv gud layf fɔs na wi layf ɛn put Gɔd in Kiŋdɔm sɛkɔn na wi layf.—Matyu 6:​31-33.

¹⁸ Bɔku yɔŋ Kristian dɛn de we nɔ alaw Setan fɔ ful dɛn. Fɔ ɛgzampul,  Kiana we ol 20 ia tɔk se: “A no se di wangren op we wi gɛt fɔ sɔlv wi prɔblɛm dɛn na Gɔd in Kiŋdɔm.” Aw dis op de afɛkt aw i de tink ɛn liv in layf? I de ɛp am fɔ mɛmba se na shɔt tɛm nɔmɔ di tin dɛn na di wɔl de fɔ. So bifo Kiana yuz ɔl in trɛnk ɛn tɛm pan tin dɛn na dis wɔl, i de yuz in tɛm ɛn trɛnk fɔ sav Jiova.

19, 20. Aw wi go lan fɔ yuz Gɔd in Wɔd gud gud wan?

¹⁹ Roman sojaman dɛn bin de yuz sɔd dɛn we bin lɔng lɛk 50 sɛntimita (20 inchis). Dɛn sojaman dɛn ya kin rili sabi yuz dɛn sɔd dɛn bikɔs dɛn de praktis fɔ yuz dɛn ɛvride.

²⁰ Di apɔsul Pɔl bin tɔk se Gɔd in Wɔd tan lɛk sɔd. Na Jiova dɔn gi wi am. Bɔt wi fɔ lan fɔ yuz am di rayt we so dat wi go ebul fɔ tɔk bɔt wetin wi biliv to ɔda pipul dɛn, ɔ fɔ ajɔst di we aw wi de tink. (Sɛkɛn Lɛta Fɔ Kɔrint 10:​4, 5; Sɛkɛn Lɛta To Timoti 2:​15) Wetin yu go du fɔ lɛ yu go sabi yuz di Baybul gud gud wan? Sibastian we ol 21 ia tɔk se: “We a kin de rid di Baybul, a kin rayt wan vas pan ɛni chapta we a rid. A want fɔ mek list we go gɛt di vas dɛn we a lɛk.” Dis bin ɛp am fɔ ɔndastand gud gud wan aw Jiova de tink. Daniɛl bin tɔk se: “We a de rid mi Baybul, a kin pik sɔm vas dɛn we a tink se a go yuz fɔ ɛp pipul dɛn we a go mit na fil savis. A dɔn si se pipul dɛn kin lisin gud gud wan we dɛn si di we aw yu lɛk di Baybul, ɛn we yu de du yu bɛst fɔ ɛp dɛn.”

21. Wetin mek wi nɔ fɔ fred Setan ɛn in dɛbul dɛn?

²¹ Di ɛgzampul dɛn we wi lan bɔt sɔm yɔŋ wan dɛn insay dis atikul, dɔn ɛp wi fɔ no se wi nɔ nid fɔ fred Setan ɛn in dɛbul dɛn. Na tru se dɛn gɛt pawa, bɔt dɛn nɔ gɛt pawa pas Jiova. Ɛn dɛn nɔ go de sote go. Insay di Wan Tawzin Ia we Krays gɛt fɔ rul, dɛn go put dɛn na jel ɛn dɛn nɔ go ebul fɔ du bad to ɛnibɔdi, dɔn afta dat, dɛn go dɔnawe wit dɛn. (Rɛvɛleshɔn 20:​1-3, 7-10) Wi no wi ɛnimi, in kɔni kɔni trik dɛn, ɛn wetin i plan fɔ du. Jiova go ɛp wi fɔ tinap tranga wan agens am!