1, 2. (a) Wetin sɔm pipul dɛn kin se we dɛn yɛri se Gɔd gɛt ɔganayzeshɔn? (b) Wetin wi go tɔk bɔt insay dis atikul?

WE I kam pan rilijɔn biznɛs, sɔm pipul dɛn kin se: “Yu nɔ nid ɔganayzeshɔn fɔ tɛl yu wetin fɔ du. Di tin nɔmɔ we yu nid na padi biznɛs wit Gɔd.” Yu tink se dis na tru? Wetin sho se dis nɔto tru?

² Insay dis atikul, wi go lan aw Jiova ɔganayz we i de du tin ɛn wi go si aw i de ɔganayz in pipul dɛn. Wi go tɔk bak bɔt wetin wi fɔ du we Jiova in ɔganayzeshɔn tɛl wi fɔ du sɔntin. (Fɔs Lɛta Fɔ Kɔrint 14:​33, 40) Insay di apɔsul dɛn tɛm, Jiova in pipul dɛn bin de fala wetin di Baybul se ɛn dɛn bin ebul fɔ prich di gud nyuz na bɔku bɔku say dɛn. Jɔs lɛk dɛn, wisɛf de alaw di Baybul fɔ gayd wi tide. Ɛn wi de du wetin Gɔd in ɔganayzeshɔn tɛl wi fɔ du. Dis dɔn mek wi dɔn ebul fɔ prich di gud nyuz ɔlsay na di wɔl. Dɔn wi de kip di kɔngrigeshɔn klin ɛn wi de mek shɔ se pis ɛn wanwɔd de na di kɔngrigeshɔn.

3. Wetin mek yu biliv se Jiova na Gɔd we ɔganayz?

³ We wi wach di tin dɛn we Jiova Gɔd mek, wi de si klia wan se in na Gɔd we ɔganayz. I “yuz in sɛns fɔ mek di wɔl na di sabi  we i gɛt i yuz fɔ put di skay usay i de.” (Prɔvabs 3:​19) Bɔku tin dɛn de we Jiovde mek we wi nɔ no bɔt. Fɔ tru, “na smɔl tin nɔmɔ wi dɔn yɛri bɔt am!” (Job 26:​14, NW ) Pan ɔl we na jɔs smɔl pan di tin we Jiova mek wi sabi, wi no klia wan se dɛn rili ɔganayz. (Sam 8:​3, 4) Di bɔku bɔku sta dɛn we de ɔp di skay ɔganayz we dɛn de muv. Ɛn tink bɔt di we aw di planɛt dɛn na wi solar system de go rawnd di san. Dis wɔndaful tin de apin bikɔs Jiova ɔganayz di we aw di planɛt ɛn sta dɛn fɔ muv. We wi tink bɔt aw i dɔn “tek tɛm mek di ɛvin” ɛn di wɔl, wi want fɔ prez am, wɔship am, ɛn kɔntinyu de biɛn am.—Sam 136:​1, 5-9, NW.

4. Wetin mek sayɛnsman dɛn nɔ ebul fɔ ansa impɔtant kwɛsyɔn dɛn?

⁴ Sayɛnsman dɛn dɔn yuz bɔku pan di tin dɛn we dɛn dɔn lan ɔp spes ɛn na dis wɔl fɔ mek wi layf bɛtɛ. Bɔt dɛn nɔ ebul fɔ ansa bɔku impɔtant kwɛstyɔn dɛn. Fɔ ɛgzampul, sayɛnsman dɛn we de stɔdi di tin dɛn we de ɔp spes nɔ ebul fɔ tɛl wi aw di wɔl bigin ɔ wetin mek mɔtalman, animal, ɛn plant dɛn de na di wɔl. Ɛn bɔku pipul nɔ ebul fɔ ɛksplen wetin mek mɔtalman rili want fɔ de sote go. (Ɛkliziastis 3:​11) Wan rizin we mek pipul dɛn nɔ gɛt ansa to dɛn kwɛstyɔn ya na bikɔs sayɛnsman dɛn ɛn ɔda pipul dɛn de se Gɔd nɔ de ɛn dɛn de tich se ɔltin kam bay chans. Bɔt Gɔd gi wi di ansa dɛn insay in Buk, we na di Baybul.

5. Us we dɛn mɔtalman abop pan di lɔ dɛn we dɛn kɔl laws of nature?

⁵ Jiova mek bɔku lɔ dɛn we de kɔntrol plɛnti tin dɛn na di wɔl. Sayɛnsman dɛn kɔl dɛn lɔ ya di laws of nature. Dɛn lɔ ya nɔ de chenj. Ilɛktrishian, plɔmba, injinia, paylɔt, sɔjɔn, ɛn ɔda pipul dɛn abop pan dɛn lɔ ya fɔ du dɛn wok. Fɔ ɛgzampul, ɔl mɔtalman at de na di sem pat na di bɔdi, so sɔjɔn no usay fɔ fɛn di at pan ɔl in peshɛnt dɛn. Ɛn ɔlman no se if pɔsin jomp kam dɔŋ na ay ples, i go fɔdɔm ɛn ivin day. Wi de obe di lɔ dɛn we Jiova mek fɔ kɔntrol plɛnti tin dɛn na di wɔl. Fɔ ɛgzampul, wi de obe di lɔ we dɛn kɔl gravity, bikɔs wi nɔ want fɔ day.

6. Aw wi no se Jiova want pipul dɛn fɔ ɔganayz we dɛn de wɔship am?

⁶ Di we aw Jiova ɔganayz di tin dɛn we de ɔp spes ɛn di wɔl rili wɔndaful. Fɔ tru, i want in pipul dɛn fɔ ɔganayz we dɛn de wɔship am. Infakt, Jiova dɔn gi wi di Baybul fɔ tich wi aw fɔ wɔship am. Na we wi fala wetin in ɔganayzeshɔn ɛn di Baybul de tɛl wi nɔmɔ go mek wi satisfay ɛn gɛt gladi at.

7. Wetin wi kin lan frɔm di we aw dɛn rayt di Baybul?

⁷ Fɔ tru, di Baybul na spɛshal gift frɔm Gɔd. Sɔm masta sabi bukman dɛn se di Baybul na jɔs sɔm Ju pipul dɛn ɛn Kristian buk dɛn we mɔtalman dɛn put togɛda. Bɔt na Gɔd bin disayd udat go rayt di buk dɛn, ustɛm dɛn go rayt dɛn, ɛn wetin dɛn go rayt. Na dat mek ɔl di buk dɛn na di Baybul de ɛp wi fɔ ɔndastand Gɔd in mɛsej. Frɔm Jɛnɛsis to Rɛvɛleshɔn, di Baybul sho se wan “pikin” go mek di wɔl bi Paradays bak. Ɛn wi dɔn lan se dis “pikin” na Krays Jizɔs ɛn na in Kiŋdɔm go pruv se na Jiova gɛt di rayt fɔ rul ɔlman.—Rid Jɛnɛsis 3:​15; Matyu 6:​10; Rɛvɛleshɔn 11:​15.

8. Us we dɛn di Izrɛlayt dɛn bin rili ɔganayz?

⁸ Di Izrɛlayt dɛn bin fala di lɔ we Gɔd gi dɛn ɛn dat bin mek dɛn rili ɔganayz. Fɔ ɛgzampul, dɛn bin ɔganayz “uman dɛn we bin de sav na di Tɛnt domɔt.” (Ɛksodɔs 38:​8) Dɛn bin tɛl di Izrɛlayt dɛn bak aw fɔ muv dɛn kamp ɛn di tabanakul di we we ɔganayz. Leta, Kiŋ Devid bin ɔganayz di  prist ɛn Livayt dɛn fɔ du wan patikyula wok na di tɛmpul. (Fɔs Kronikul 23:​1-6; 24:​1-3) Jiova bin blɛs di Izrɛlayt dɛn we dɛn obe am. Dɛn bin ɔganayz ɛn dɛn bin gɛt kolat ɛn wanwɔd.—Ditarɔnɔmi 11:​26, 27; 28:​1-14.

9. Aw di kɔngrigeshɔn dɛn we bin de insay di apɔsul dɛn tɛm bin ɔganayz?

⁹ Di kɔngrigeshɔn dɛn bak we bin de insay di apɔsul dɛn tɛm bin ɔganayz. Dɛn bin gɛt gɔvnin bɔdi, dat na sɔm man dɛn we bin de tɛl di kɔngrigeshɔn dɛn wetin fɔ du. Fɔs, na di apɔsul dɛn nɔmɔ bin mekɔp di gɔvnin bɔdi. Leta ɔda ɛlda dɛn bin jɔyn dɛn. (Di Apɔsul Dɛn Wok [Akt] 6:​1-6; 15:​6) Jiova bin gayd sɔm gɔvnin bɔdi mɛmba dɛn ɛn ɔda wan dɛn we bin de wok nia dɛn fɔ rayt lɛta dɛn fɔ advays ɛn tɛl di kɔngrigeshɔn dɛn wetin fɔ du. (Fɔs Lɛta To Timoti 3:​1-13; Taytɔs 1:​5-9) Aw di kɔngrigeshɔn dɛn bin bɛnifit we dɛn du wetin di gɔvnin bɔdi tɛl dɛn?

10. Wetin bin apin we di kɔngrigeshɔn dɛn insay di apɔsul dɛn tɛm du wetin di gɔvnin bɔdi tɛl dɛn? (Luk di pikchɔ nia dis atikul in taytul.)

¹⁰ Rid Di Apɔsul Dɛn Wok [Akt] 16:​4, 5, NW. Insay di apɔsul dɛn tɛm, sɔm brɔda dɛn bin de go na di kɔngrigeshɔn dɛn fɔ tɛl dɛn “wetin di apɔsul dɛn ɛn di ɛlda dɛn na Jerusɛlɛm dɔn disayd,” dat na di gɔvnin bɔdi. Di kɔngrigeshɔn dɛn bin du wetin dɛn tɛl dɛn ɛn dat bin mek dɛn gɛt fet “mɔ ɛn mɔ ɛn kɔntinyu fɔ go bifo.” Wetin wi kin lan frɔm dɛn ɛgzampul we go ɛp wi tide na wi kɔngrigeshɔn?

11. Wetin ɛlda ɛn ministerial savant dɛn fɔ du we Gɔd in ɔganayzeshɔn tɛl dɛn fɔ du sɔntin?

¹¹ Wetin Branch Kɔmiti ɔ Kɔntri Kɔmiti mɛmba dɛn, sakit ovasia dɛn, ɛlda dɛn, ɛn ministerial savant dɛn fɔ du we Jiova in ɔganayzeshɔn tɛl dɛn fɔ du sɔntin? Ɔl dɛn man ya we dɛn pik fɔ obe. Infakt, Jiova in yon Buk tɛl wi ɔl fɔ obe di wan dɛn we de bifo wi. (Ditarɔnɔmi 30:​16; Di Ibru Pipul Dɛn 13:​7, 17) Di wan dɛn we de biɛn Jiova nɔ trangayes, ɛn dɛn nɔ de grɔmbul we dɛn tɛl dɛn fɔ du sɔntin. Wi nɔ go want fɔ bi lɛk Dayɔtrɛfes, we nɔ bin gɛt wan rɛspɛkt fɔ di brɔda dɛn we bin de bifo na di kɔngrigeshɔn. (Rid Jɔn In Tɔd Lɛta 9, 10.) We wi du wetin dɛn tɛl wi, wi de ɛp fɔ lɛ wanwɔd ɛn kolat kɔntinyu fɔ de na di kɔngrigeshɔn. So wi kin aks wisɛf dɛn kwɛstyɔn dɛn ya: ‘A de ɛnkɔrej mi brɔda ɛn sista dɛn nɔ fɔ kɔmɔt biɛn Jiova? A kin du wetin Gɔd in ɔganayzeshɔn tɛl wi fɔ du kwik kwik wan?’

12. Aw dɛn de pik ɛlda ɛn ministerial savant dɛn?

¹² I nɔ tu te yet, we di Gɔvnin Bɔdi chenj aw dɛn fɔ pik ɛlda ɛn ministerial savant dɛn na ɔl di kɔngrigeshɔn dɛn. “Questions From Readers” insay di Novɛmba 15, 2014 Wachtawa ɛksplen se, insay di apɔsul dɛn tɛm, di gɔvnin bɔdi bin gi di travlin ovasia dɛn di rayt fɔ pik ɛlda ɛn ministerial savant dɛn. So frɔm Sɛptɛmba 2014, di sakit ovasia dɛn dɔn de pik ɛlda ɛn ministerial savant dɛn. We di ɛlda dɛn na wan kɔngrigeshɔn tɛl di sakit ovasia se wan brɔda fit fɔ sav as ɛlda ɔ ministerial savant, di sakit ovasia kin tray fɔ no am ɛn in famili. Fɔ ɛgzampul, i kin wok wit di brɔda na fil savis. (Fɔs Lɛta To Timoti 3:​4, 5) Dɔn na di mitin we di sakit ovasia kin gɛt wit di ɛlda dɛn, dɛn kin tek tɛm wach di skripchɔ dɛn we tɔk bɔt di kwaliti dɛn we ɛlda ɔ ministerial savant fɔ gɛt.—Fɔs Lɛta To Timoti 3:​1-10, 12, 13; Pita In Fɔs Lɛta 5:​1-3.

13. Aw wi go sho se wi rɛdi fɔ du wetin di ɛlda dɛn de tɛl wi?

¹³ Di ɛlda dɛn de yuz di Baybul fɔ tɛl wi  wetin fɔ du bikɔs dɛn want fɔ protɛkt ɛn kia fɔ di kɔngrigeshɔn. Wi nid fɔ du wetin dɛn de tɛl wi bikɔs na fɔ wi yon gud. (Fɔs Lɛta To Timoti 6:​3) Insay di apɔsul dɛn tɛm, sɔm pipul dɛn “nɔ want du natin.” Dɛn nɔ bin de wok atɔl, pas fɔ put mɔt pan tin dɛn we nɔto dɛn biznɛs. Di ɛlda dɛn bin tray fɔ kɔrɛkt dɛn, bɔt dɛn nɔ gri fɔ chenj. Pɔl tɛl di kɔngrigeshɔn aw fɔ trit dɛn kayn pipul dɛn de. I bin se: “Una fɔ no di kayn pɔsin we i bi ɛn una nɔ fɔ miks wit am.” Dɛn nɔ fɔ tek am as dɛn ɛnimi bɔt dɛn fɔ stɔp fɔ spɛnd tɛm wit am. (Sɛkɛn Lɛta Fɔ Tɛsalonayka 3:​11-15) Tide sɛf, di ɛlda dɛn de tray fɔ ɛp sɔmbɔdi we nɔ de fala di advays dɛn we Gɔd gi wi. Wan ɛgzampul na pɔsin we dɔn kip sɔmbɔdi we nɔ de sav Jiova. (Fɔs Lɛta Fɔ Kɔrint 7:​39) If di pɔsin nɔ gri fɔ chenj, di ɛlda dɛn kin disayd fɔ gi tɔk ɛn ɛksplen aw di tin we di pɔsin dɔn disayd fɔ du kin mek ɔda pipul dɛn tɔk bad bɔt di kɔngrigeshɔn. If di ɛlda dɛn gi dis kayn tɔk na yu kɔngrigeshɔn, wetin yu go du? If yu no udat na di pɔsin, yu go lɛf fɔ spɛnd tɛm wit am? If yu du so, yu go ɛp am fɔ no se di tin we i dɔn disayd fɔ du go ambɔg am ɛn i nɔ go mek Jiova gladi, ɛn dat go mek i chenj. ^[1]—Luk di ɛndnot ɔnda di las paregraf.

14. Aw wi kin ɛp fɔ klin di kɔngrigeshɔn?

¹⁴ Gɔd in Wɔd tɛl wi wetin wi ɔl fɔ du so dat wi nɔ go alaw bad tin dɛn fɔ de apin na di kɔngrigeshɔn. Lɛ wi tɔk bɔt wetin bin apin na Kɔrint. Pɔl bin lɛk di brɔda ɛn sista dɛn we bin de de. I bin dɔn ɛp bɔku pan dɛn fɔ lan bɔt Gɔd. (Fɔs Lɛta Fɔ Kɔrint 1:​1, 2) Jɔs imajin aw Pɔl bin fil we i no se wan pan dɛn de du mami ɛn dadi biznɛs di we aw Gɔd nɔ want ɛn di brɔda dɛn alaw am fɔ de na di kɔngrigeshɔn! Pɔl tɛl di ɛlda dɛn fɔ “tek dis man ya gi Setan.” Dɛn fɔ pul da pɔsin de kɔmɔt na di kɔngrigeshɔn, we min se, dɛn fɔ disfɛloship am. (Fɔs Lɛta Fɔ Kɔrint 5:​1, 5-7, 12) Tide, di ɛlda dɛn kin disayd fɔ disfɛloship pɔsin bikɔs i dɔn sin siriɔs wan ɛn i nɔ gri fɔ chenj. We dat apin, wi go trit di pɔsin we dɛn disfɛloship lɛk aw di Baybul tɛl wi fɔ trit am? If wi du dat, wi de ɛp fɔ klin di kɔngrigeshɔn. Ɛn wi kin ɛp di pɔsin fɔ no se i nid fɔ chenj ɛn beg Jiova lɛ i fɔgiv am.

15. Aw wi kin mek pis de na di kɔngrigeshɔn?

¹⁵ Wan ɔda prɔblɛm bin de bak na Kɔrint. Sɔm pipul dɛn na di kɔngrigeshɔn bin de kɛr dɛn brɔda dɛn go na kɔt. Pɔl bin aks dɛn se: “I nɔ bin fɔ bɛtɛ fɔ mek pipul du una bad?” (Fɔs Lɛta Fɔ Kɔrint 6:​1-8) Tide, sɔm pipul dɛn na di kɔngrigeshɔn dɔn mek biznɛs agrimɛnt wit dɛn brɔda dɛn bɔt dɛn lɔs mɔni ɔ fil se dɛn brɔda dɛn kruk dɛn. So dɛn dɔn kɛr dɛn brɔda dɛn go na kɔt. Bɔt we dɛn kayn tin ya apin, i kin mek pipul dɛn tɔk bad bɔt Jiova ɛn in pipul dɛn. Ɛn i kin mek prɔblɛm de na di kɔngrigeshɔn. Gɔd in yon Buk ɛp wi fɔ no se wi fɔ tray ɔltɛm lɛ pis de bitwin wi ɛn wi brɔda dɛn, ivin if i min se wi go lɔs mɔni. ^[2] (Luk di ɛndnot ɔnda di las paregraf.) Infakt, Jizɔs  bin tɛl wi aw fɔ sɔlv siriɔs prɔblɛm dɛn. (Rid Matyu 5:​23, 24; 18:​15-17.) We wi du wetin Jizɔs tɛl wi, wi go mek pis ɛn wanwɔd de na di kɔngrigeshɔn.

16. Wetin mek Gɔd in pipul dɛn gɛt wanwɔd?

¹⁶ Jiova in Buk tɛl wi se: “I gud ɛn i fayn fɔ si we brɔda dɛn de togɛda wit wanwɔd!” (Sam 133:​1, NW) We di Izrɛlayt dɛn bin de obe Jiova, dɛn bin ɔganayz ɛn gɛt wanwɔd. Gɔd bin dɔn tɔk bɔt in pipul dɛn se: “A go mek dɛn gɛt wanwɔd, jɔs lɛk ship dɛn we de usay dɛn de kip dɛn.” (Mayka 2:​12, NW) Jiova bin dɔn tɔk se in pipul dɛn go lan di trut frɔm di skripchɔ dɛn ɛn dɛn go sav am wit wanwɔd. I bin se: “A go chenj di pipul dɛn langwej to wan klin langwej, so dat dɛn ɔl go kɔl Jiova in nem, ɛn wɔship am wit wanwɔd.” (Zɛfinaya 3:​9, NW) Wi rili gladi bikɔs wi ebul fɔ wɔship Jiova wit wanwɔd!

17. Wetin di ɛlda dɛn fɔ du if sɔmbɔdi na di kɔngrigeshɔn sin siriɔs wan?

¹⁷ If sɔmbɔdi sin siriɔs wan, di ɛlda dɛn fɔ advays am kwik kwik wan di we we de sho se dɛn lɛk am. Dɛn no se Jiova want lɛ dɛn protɛkt di kɔngrigeshɔn frɔm ɛnitin we bad ɛn mek lɛ i klin ɛn mek wanwɔd de de. (Prɔvabs  15:​3) Pɔl bin rili lɛk in brɔda dɛn we de na Kɔrint ɛn i bin de gi dɛn advays we dɛn nid am, jɔs lɛk aw wi rid insay di fɔs lɛta we i sɛn to dɛn. Wi no se di ɛlda dɛn we bin de de bin du wetin Pɔl tɛl dɛn kwik kwik wan, bikɔs afta sɔm mɔnt, i bin tɛl dɛn tɛnki insay di sɛkɔn lɛta we i bin rayt to dɛn. If wan brɔda “du ɛni bad tin” bifo i kam fɔ no, di ɛlda dɛn fɔ tek tɛm kɔrɛkt am.—Lɛta Fɔ Galeshya 6:​1.

18. (a) Aw di advays dɛn we de na Gɔd in Wɔd bin ɛp di kɔngrigeshɔn dɛn we bin de insay di apɔsul dɛn tɛm? (b) Wetin wi go tɔk bɔt insay di nɛks atikul?

¹⁸ Wi dɔn si klia wan se we di Kristian dɛn insay di apɔsul dɛn tɛm bin de du wetin Gɔd in Buk tɛl dɛn, dɛn kɔngrigeshɔn dɛn bin klin, dɛn bin gɛt pis ɛn wanwɔd. (Fɔs Lɛta Fɔ Kɔrint 1:​10; Lɛta Fɔ Ɛfisɔs 4:​11-13; Pita In Fɔs Lɛta 3:​8) Dis bin mek, dɛn brɔda ɛn sista dɛn de ebul fɔ prich di gud nyus “to ɔlman we de na di wɔl.” (Lɛta Fɔ Kɔlɔse 1:​23, NW) Tide sɛf, Jiova in pipul dɛn gɛt wanwɔd ɛn ɔganayz, ɛn dɛn de prich di gud nyus ɔlsay na di wɔl. Di nɛks atikul go pruv se di tin we dɛn rili want fɔ du na fɔ ɔnɔ Jiova we gɛt pawa pas ɔlman ɛn fɔ du wetin in Buk we na di Baybul se.—Sam 71:​15, 16.