“A si wan ay chia we kiŋ kin sidɔm pan, a si sɔmbɔdi sidɔm pan am. Di pɔsin in fes bin de shayn lɛkɛ dayamɔn ɛn lɛkɛ wan ɔda shayn ston we dɛn kɔl rubi. Rembo we de shayn lɛkɛ da fayn ston we dɛn kɔl ɛmirald bin de rawnd di ay chia.”—Rɛvɛleshɔn 4:​2, 3.

“Ɛn ɔlsay bin brayt rawnd am. Di braytnɛs we bin de rawnd am bin tan lɛk rembo we kin de na di klawd we ren kɔt. Na so i fiba lɛk we PAPA GƆD [“Jiova,” NW] in glori kin apia.”—Izikɛl 1:​27, 28.

Jiova we de pantap ɔlman yuz tin dɛn we wi go tink bɔt lɛk ston dɛn we de shayn, renbo, ɛn chia we kiŋ kin sidɔm fɔ sho Jɔn ɛn Izikɛl dɛn vishɔn dɛn ya. Dɛn vishɔn dɛn ya sho se Jiova na Gɔd we pawaful. Dɛn mek wi no se di say we Jiova de na ples we rili fayn ɛn kolat de de.

Di we aw dɛn vishɔn dɛn ya tɔk bɔt Gɔd gri wit wetin wan pan di man dɛn we rayt di sam buk tɔk we i se: Jiova “na big PAPA GƆD ɛn i fit fɔ prez we wi fɔ fred pas dɛn ɔda gɔd dɛn. Ɔl ɔda gɔd na tin dɛn we mɔtalman mek fɔ pre to bɔt na PAPA GƆD mek di ɛvin ɛn ɔl wetin de de. We yu luk PAPA GƆD, yu no se na Kiŋ da wande as yu si di tin dɛn nɔmɔ nain os, yu no se i gɛt trɛnk ɛn i fayn fɔ luk.”—Sam 96:​4-6.

Pan ɔl we na Jiova gɛt pawa pas ɔlman, i tɛl wi fɔ pre to am ɛn i prɔmis se i go lisin to wi. (Sam 65:​2) Gɔd rili lɛk wi ɛn bisin bɔt wi. Na dat mek apɔsul Jɔn bin rayt se: “Gɔd na di wan we nɔ de tap fɔ lɛk ɔltɛm ɛn nain de lɛk aw pɔsin fɔ lɛk fɔ tru.”—Jɔn In Fɔs Lɛta 4:​8.

“Gɔd in spirit bin de wit Stivin, i luk ɔp na ɛvin, i si Gɔd in layt de shayn ɛn i si Jizɔs tinap na Gɔd in raytan. Stivin tɛl di pipul dɛn se, ‘A si di klawd opin ɛn a si mɔtalman Pikin tinap na Gɔd in raytan!’”—Di Apɔsul Dɛn Wok [Akt] 7:​55, 56.

Bifo Stivin si dis vishɔn, di Ju big man dɛn we i de tɔk to bin dɔn mek dɛn kil Jizɔs. Di vishɔn we i si sho se Jizɔs dɔn gɛt layf bak, i dɔn go na ɛvin ɛn Jiova dɔn ɔnɔ am. Di apɔsul Pɔl bin rayt bɔt dis we i se: Jiova “gi layf bak to Krays ɛn mek i sidɔm na in raytan na ɛvin, pantap ɔl ɔda gɔvmɛnt, pawa, masta ɛn nem na dis wɔl ɛn di wan we de kam.”—Lɛta Fɔ Ɛfisɔs 1:​20, 21, NW.

Apat frɔm di ay pozishɔn we Jizɔs gɛt, di Baybul sho wi se Jizɔs rili bisin bɔt mɔtalman jɔs lɛk Jiova. Di tɛm we Jizɔs bin de prich na di wɔl, i mɛn di wan dɛn we sik, ɛn ivin di wan dɛn we dɔn sik fɔ lɔng tɛm, ɛn i gi layf bak to di wan  dɛn we bin dɔn day. Di gi we i gi in layf fɔ wi, sho se i rili lɛk Gɔd ɛn mɔtalman. (Lɛta Fɔ Ɛfisɔs 2:​4, 5) I nɔ go te igen, Jizɔs we tinap na Gɔd in raytan, go yuz in pawa fɔ briŋ bɔku blɛsin to mɔtalman dɛn we de du wetin Gɔd want ɔlsay na di wɔl.

“As a bin de luk, nain dɛn kan put tron dɛn ɛn di wan we bin dɔn de lɔlɔntɛm, kam sidɔm; . . . Tawzin tawzin pipul [“enjɛl,” NW] bin de wok fɔ am; ɛn tɛn tawzin tayms tɛn tawzin” bin tinap bifo am.—Daniɛl 7:​9, 10.

Insay dis vishɔn, Daniɛl nɔ jɔs si wan enjɛl na ɛvin bɔt i bin si bɔku bɔku ɛnjɛl dɛn. Da vishɔn de go dɔn mek Daniɛl kɔle! Enjɛl dɛn na spirit pipul dɛn we gɛt sɛns ɛn pawa. Dɛn de bay rank. Tu pan di rank dɛn na di chɛrɔb dɛn ɛn di Siraf dɛn. Di wɔd “enjɛl” de insay di Baybul pas 250 tɛm so.

Enjɛl dɛn nɔto mɔtalman dɛn we bin dɔn liv na dis wɔl. Gɔd bin dɔn mek enjɛl dɛn lɔng lɔng tɛm bifo i mek mɔtalman. Di tɛm we Gɔd bin de mek di wɔl, di enjɛl dɛn bin de wach ɛn dɛn bin gladi.—Job 38:​4-7.

Wan we we enjɛl dɛn de wok fɔ Gɔd na we dɛn de jɔyn an fɔ du di wok we impɔtant pas ɔl ɔda wok dɛn na di wɔl; dat na fɔ prich di gud nyus bɔt Gɔd in Kiŋdɔm. (Matyu 24:​14) Gɔd bin sho wan vishɔn to apɔsul Jɔn bɔt aw di enjɛl dɛn go jɔyn an pan dis wok. Jɔn bin tɔk se: “A si wan ɔda enjɛl de flay ɔp ɔp, i bin de tɛl pipul di Gud Nyuz we go de sote go, dɛn pipul ya kɔmɔt na ɔl dɛn trayb, ɔl dɛn neshɔn ɛn dɛn de tɔk ɔl dɛn difrɛn langwej, blakman o, wetman o, ɔl de pan dɛn.” (Rɛvɛleshɔn 14:​6) Enjɛl dɛn nɔ de tɔk to pipul dɛn lɛk aw dɛn bin de du trade, bɔt dɛn de dayrɛkt di wan dɛn we de prich di gud nyus to pipul dɛn we want fɔ du wetin Gɔd want.

“Wa fɔdɔm na ɛvin, Maykɛl ɛn in enjɛl dɛn go fɛt di dragɔn, di dragɔn insɛf fet bak wit in yon mɛsenja dɛn; bɔt Maykɛl ɛn in enjɛl dɛn win di dragɔn ɛn dɛn nɔ gri mek di dragɔn ɛn in mɛsenja dɛn tap na ɛvin igen.  Dɛn drɛb di big dragɔn kɔmɔt na ɛvin, ib am dɔŋ na wɔl! Nain na da snek we dɛn kɔl Debul ɔ Setan, we bin de mek di ol wɔl ful. Dɛn ib am dɔŋ na [di] wɔl, wit ɔl in mɛsenja dɛn.”—Rɛvɛleshɔn 12:​7-9.

Ɛvin nɔto ples we pis bin de ɔltɛm. We Gɔd jɔs mek mɔtalman, wan enjɛl we bin want lɛ dɛn wɔship am tɔn in bak pan Gɔd ɛn kam fɔ bi Setan we min “pɔsin we de agens ɔda pɔsin.” Leta, ɔda enjɛl dɛn jɔyn am ɛn kam fɔ bi dɛbul dɛn. Bikɔs dɛn lɛk fɔ du wetin bad, dɛn de agens Jiova ɛn dɛn de mek bɔku pipul dɛn nɔ de du wetin Jiova want.

Setan ɛn in dɛbul dɛn wikɛd pasmak. Dɛn et mɔtalman ɛn dɛn dɔn mek bɔku pipul dɛn sɔfa na di wɔl. Fɔ ɛgzampul, Setan bin kil Job in savant dɛn ɛn in animal dɛn. Dɔn i kil Job in tɛn pikin dɛn bay we i mek “big big tinada . . . blo” te i ib di os we di pikin dɛn bin de insay. Afta dat, Setan “ib sik pan Job; sofut kɔba in wanol bɔdi frɔm ed to fut.”—Job 1:​7-19; 2:​7.

I nɔ go te igen, Gɔd go kil Setan. Bikɔs dɛn dɔn ib am dɔŋ na dis wɔl, i no se “na smɔl tɛm nɔmɔ lɛf fɔ am.” (Rɛvɛleshɔn 12:​12) Setan nɔ gɛt ɛni op, ɛn dat na gud nyus!

“Na yu blɔd yu tek bay mɔtalman bak fɔ Gɔd; dɛn mɔtalman ya kɔmɔt pan ɔl dɛn trayb ɛn ɔl dɛn difrɛn neshɔn na [di] wɔl, dɛn de tɔk ɔl dɛn difrɛn laŋwej, sɔm bin wayt, sɔm bin blak. Yu dɔn mek dɛn kam ɔnda Gɔd in rul ɛn bi pipul we de mek sakrifays to wi Gɔd, ɛn na dɛn go kam rul na dis wɔl.”—Rɛvɛleshɔn 5:​9, 10.

Jɔs lɛk aw Jizɔs bin gɛt layf bak na dis wɔl ɛn go na ɛvin, na di sem tin go apin to sɔm pipul dɛn. Jizɔs bin tɛl in fetful apɔsul dɛn se: “A de go rɛdi ples de fɔ una. . . . A go kam bak fɔ kam tek una go na di ples we a de, so dat unasɛf go” de de.—Jɔn 14:​2, 3.

Di wan dɛn we de go na ɛvin de go de fɔ rizin. Dɛn go jɔyn Jizɔs fɔ mek wan Kiŋdɔm gɔvmɛnt we go rul ɔl di wan dɛn we go de na di wɔl ɛn briŋ bɔku blɛsin fɔ dɛn. We Jizɔs bin de sho in disaypul dɛn aw fɔ pre, na dis Kiŋdɔm i bin tɛl dɛn fɔ pre fɔ we i tɔk se: “Wi Papa we de na ɛvin, mek ɔlman ɔnɔ yu nem. Lɛ yu Kiŋdɔm kam. Mek wetin yu want, bi na di wɔl lɛk aw yu want am na ɛvin.”—Matyu 6:​9, 10, NW.

“A yɛri lawd vɔys we kɔmɔt na di say we de chia we kiŋ kin sidɔm fɔ rul, bin de; I bin de tɔk se, ‘Gɔd dɔn kam fɔ tap to mɔtalman, . . . i go mek dɛn nɔ kray igen; dɛn nɔ go day igen; ebi at ɛn waala nɔ go de igen; nɔbɔdi nɔ go kray igen, bikɔs dɛn tin we bin de fɔs nɔ go de igen.’”—Rɛvɛleshɔn 21:​3, 4.

Dis vishɔn de tɔk bɔt di tɛm we Gɔd in Kiŋdɔm go dɔnawe wit Setan ɛn mek di wan ol wɔl bi Paradays. Na Jizɔs ɛn di wan dɛn we go gɛt layf bak fɔ go de na ɛvin go rul insay dis Kiŋdɔm. Di tin dɛn we de mek mɔtalman sɔfa nɔ go de igen. Ivin day nɔ go de igen.

Bɔt wetin wi go se fɔ di bɔku bɔku pipul dɛn we dɔn day ɛn we nɔ go gɛt layf bak fɔ go de na ɛvin? Tumara bambay, dɛn go gɛt layf bak ɛn gɛt di chans fɔ de sote go na Paradays na dis wɔl.—Lyuk 23:​43.