Yu De Alaw Jiova fɔ Protɛkt Yu?
“PAPA GƆD [“Jiova,” NW] de sev in yon pipul ɔltɛm; i nɔ de kɔmɔt biɛn udat abop pan am.”—SAM 34:22.
1. Bikɔs wi nɔ pafɛkt, aw bɔku pan Gɔd in savant dɛn kin fil?
DI APƆSUL Pɔl bin rayt se: “Mi na man we sɔri!” (Lɛta Fɔ Rom 7:24, NW) Tide, bɔku pan Gɔd in fetful savant dɛn kin fil bad ɛn dɛn at kin pwɛl jɔs lɛk aw Pɔl bin fil. Wetin mek? Na bikɔs wi ɔl de sin ɛn wi nɔ pafɛkt. So na dat mek pan ɔl we wi kin want fɔ du wetin Jiova want i nɔ kin izi. So wi at kin pwɛl we wi nɔ kin ebul du wetin Jiova want. Sɔm Kristian dɛn we kin dɔn du bad bad tin kin tink se Jiova nɔ go ɛva fɔgiv dɛn.
2. (a) Aw Sam 34:22 sho se Gɔd in savant dɛn nɔ fɔ ɛva tink se i nɔ go fɔgiv dɛn fɔ di bad tin dɛn we dɛn du? (b) Wetin wi go lan insay dis atikul? (Luk di bɔks we se “ Us Lɛsin ɔ Minin dɛn Gɛt?”)
2 Di Baybul ɛp wi fɔ no se if wi abop pan Jiova, wi nɔ nid fɔ fil se Jiova nɔ go ɛva fɔgiv wi. (Rid Sam 34:22.) Bɔt wetin i min fɔ mek Jiova protɛkt wi? Wetin wi fɔ du if wi want fɔ lɛ Jiova sɔri fɔ wi ɛn fɔgiv wi? Wi kin ebul no di ansa dɛn fɔ dɛn kwɛstyɔn dɛn ya we wi lan bɔt di arenjmɛnt we Gɔd bin mek fɔ di Izrɛlayt dɛn we bin de trade trade. Dis arenjmɛnt na fɔ mek dɛn gɛt tɔŋ dɛn we pɔsin go rɔn go if i mistek kil sɔmbɔdi. Jiova bin mek dis arenjmɛnt ɔnda di Lɔ agrimɛnt, we bin chenj insay Pɛntikɔst 33. Bɔt di Lɔ bin kɔmɔt frɔm Jiova. So frɔm di we aw Jiova bin arenj dɛn tɔŋ ya bin mek wi no aw i de si bad tin, di pipul dɛn we de du bad, ɛn di wan dɛn we dɔn lɛf fɔ du bad. Fɔs, lɛ wi no wetin mek di Izrɛlayt dɛn bin gɛt tɔŋ dɛn we pɔsin go rɔn go if i mistek kil sɔmbɔdi, ɛn wetin dɛn tɔŋ dɛn de bin de fɔ.
“UNA PIK TƆŊ DƐN WE PƆSIN GO RƆN GO IF I MISTEK KIL SƆMBƆDI”
3. Wetin di Izrɛlayt dɛn fɔ du to pɔsin we kil?
3 Jiova bin rili bisin bɔt ɛnibɔdi we dɛn kil. If wan Izrɛlayt kil sɔmbɔdi, di pɔsin we day in fambul gɛt rayt fɔ kil di wan we kil am. (Di Nɔmba Dɛm 35:19) Na da we de di wan we kil de pe wit in layf fɔ di pɔsin we i dɔn kil. If dɛn nɔ kil da pɔsin de kwik, di land we Gɔd bin dɔn Prɔmis dɛn go dɔti ɔ i nɔ go oli igen. Jiova bin tɛl dɛn se: ‘Una nɔ fɔ dɔti di land we una de’ bay we pɔsin de kil in kɔmpin.—Di Nɔmba Dɛm 35:33, 34.
4. Wetin kin apin if pɔsin mistek kil in kɔmpin?
4 Bɔt wetin go apin if wan Izrɛlayt mistek kil in kɔmpin? Pan ɔl we i nɔ min fɔ kil am, i stil gɛt di pɔsin we i kil in blɔd na in ed. (Jɛnɛsis 9:5) We dɛn kayn tin ya kin apin, Jiova bin se dɛn fɔ sɔri fɔ da kayn pɔsin de. Di pɔsin we kil in kɔmpin fɔ rɔnawe frɔm di wan we i kil in fambul dɛn ɛn i fɔ go na wan pan di siks tɔŋ dɛn we de fɔ pɔsin we mistek kil in kɔmpin. Dɛn go protɛkt am if dɛn alaw am fɔ de insay di tɔŋ. Bɔt i gɛt fɔ de insay da tɔŋ de te di ay prist day.—Di Nɔmba Dɛm 35:15, 28.
5. Aw di we aw Jiova arenj di tɔŋ dɛn ɛp wi fɔ no am gud gud wan?
5 Nɔto mɔtalman bin tɛl di Izrɛlayt dɛn fɔ pik tɔŋ dɛn we pɔsin go rɔn go if i mistek kil sɔmbɔdi. Na Jiova bin tɛl dɛn fɔ du dat. I bin tɛl Jɔshwa se: “Tɛl di Izrɛlayt dɛn, ‘Una pik tɔŋ dɛn we pɔsin go rɔn go if i mistek kil sɔmbɔdi.’” Dɛn bin de si dɛn tɔŋ ya as oli ples. (Jɔshwa 20:1, 2, 7, 8) Na Jiova bin disayd se dɛn tɔŋ ya fɔ spɛshal. So dis arenjmɛnt de ɛp wi fɔ no bɔt Jiova gud gud wan. Fɔ ɛgzampul, i de ɛp wi fɔ ɔndastand di we aw Jiova de sɔri fɔ wi. Ɛn i tich wi bɔt di we aw wi go alaw Jiova fɔ protɛkt wi tide.
I FƆ GO “ƐKSPLEN” TO DI ƐLDA DƐN
6, 7. (a) Ɛksplen aw di ɛlda dɛn bin de jɔj di pɔsin we mistek kil in kɔmpin? (Luk di pikchɔ nia dis atikul in taytul.) (b) Wetin mek i mek sɛns fɔ lɛ di pɔsin we kil tɔk to di ɛlda dɛn?
6 If wan Izrɛlayt mistek kil pɔsin, i fɔ rɔn go na di tɔŋ dɛn we pɔsin fɔ rɔn go if i mistek kil sɔmbɔdi, ɛn i fɔ “ɛksplen” wetin apin to di elda dɛn na di get. Di ɛlda dɛn go wɛlkɔm am. (Jɔshwa 20:4) Afta sɔm tɛm, dɛn go sɛn di pɔsin we kil fɔ go bak na di tɔŋ usay i kil fɔ lɛ di ɛlda dɛn go jɔj am. (Rid Di Nɔmba Dɛm 35:24, 25.) If di ɛlda dɛn si se i nɔ du am bay wilful, dɛn go mek i go bak na di tɔŋ usay i bin dɔn rɔnawe go.
7 Wetin mek di pɔsin we rɔnawe bin nid fɔ tɔk to di ɛlda dɛn? Di ɛlda dɛn go mek shɔ se ɔl di pipul dɛn we de na Izrɛl du di rayt tin, ɛn dɛn go ɛp di pɔsin we kil fɔ bɛnifit frɔm di we aw Jiova de sɔri fɔ mɔtalman. Wan masta sabi bukman we stɔdi di Baybul bin rayt se, if di pɔsin we rɔnawe nɔ go to di ɛlda dɛn, dɛn go kil am. I tɔk bak se na di wan we mistek kin pɔsin fɛn in day fɔ insɛf bikɔs i nɔ obe Gɔd in lɔ. Di pɔsin we mistek kil in kɔmpin fɔ beg mek dɛn ɛp am, ɛn i fɔ gri fɔ tek di ɛp we dɛn de gi so dat i go kɔntinyu fɔ de alayf. If i nɔ go na wan pan di tɔŋ dɛn we pɔsin fɔ rɔn go if i mistek kil sɔmbɔdi, di wan we i kil, in fambul, go gɛt rayt fɔ kil am.
8, 9. Wetin mek Kristian we dɔn sin siriɔs wan fɔ tɔk to di ɛlda dɛn?
8 Tide, fɔ gɛt tayt padi biznɛs bak wit Jiova, Kristian we dɔn kɔmit siriɔs sin nid fɔ go tɔk to di ɛlda dɛn so dat dɛn go ɛp am. Wetin mek dis rili impɔtant? Fɔs, na Jiova arenj fɔ lɛ di ɛlda dɛn jɔj pɔsin we dɔn sin siriɔs wan. (Jems 5:14-16) Sɛkɔn, di ɛlda dɛn de fɔ ɛp pipul dɛn we dɔn sin fɔ gɛt padi biznɛs bak wit Gɔd ɛn fɔ ɛp dɛn fɔ lɛ dɛn nɔ ripit di sem tin we dɛn bin du. (Lɛta Fɔ Galeshya 6:1; Di Ibru Pipul Dɛn 12:11) Tɔd, dɛn pik ɛn tren di ɛlda dɛn fɔ ɛp di wan dɛn we dɔn sin siriɔs wan fɔ no se Jiova de fɔgiv dɛn ɛn fɔ mek dɛn at nɔ pwɛl ɔ fil bad. Jiova se dɛn ɛlda dɛn de tan “lɛk ples fɔ ayd wɛn briz de blo.” (Ayzaya 32:1, 2) Dis arenjmɛnt na wan we we Gɔd de sho se i de sɔri fɔ wi.
9 Bɔku pan Gɔd in savant dɛn kin fil fayn we dɛn tɔk to di ɛlda dɛn ɛn gri fɔ tek di ɛp we dɛn de gi dɛn. Fɔ ɛgzampul, wan brɔda we nem Daniɛl bin sin siriɔs wan, bɔt i nɔ bin go to di ɛlda dɛn fɔ sɔm mɔnt. I bin tɔk se: “Afta sɔm tɛm, a bin tink se natin nɔ de we di ɛlda dɛn go du igen fɔ ɛp mi.” Stil i bin de fred se sɔmbɔdi go no bɔt di bad tin we i dɔn du, ɛn i bin tink se ɛnitɛm we i de pre to Jiova i fɔ stat fɔ beg am fɔs bifo ɛni ɔda tin. Dɔn leta, i bin ɛnd ɔp fɔ aks di ɛlda dɛn fɔ ɛp am. We i mɛmba wetin bin dɔn apin, i bin se: “Fɔ tru, a bin de fred fɔ go mit dɛn. Bɔt afta sɔm tɛm, i bin tan lɛk se sɔmbɔdi dɔn pul ebi lod pan mi.” Daniɛl nɔ bin de fred igen fɔ tɔk to Jiova. Naw i dɔn gɛt klin kɔnshiɛns ɛn dis biɛn tɛm i dɔn bi ministerial savant.
RƆN GO NA WAN PAN DI TƆŊ DƐN!
10. Wetin di pɔsin we mistek kil fɔ du fɔ lɛ dɛn go fɔgiv am?
10 I bin impɔtant fɔ lɛ di pɔsin we mistek kil in kɔmpin rɔn go kwik kwik wan na wan pan di tɔŋ dɛn we de nia am, so dat dɛn go fɔgiv am. (Rid Jɔshwa 20:4.) Fɔ lɛ i go de alayf, i nid fɔ rɔn go na wan pan dɛn tɔŋ dɛn de ɛn kɔntinyu fɔ de de te di ay prist day. Dis na bin sakrifays fɔ di pɔsin we dɔn kil bikɔs i go lɛf biɛn in wok, in fayn fayn os, ɛn di fridɔm we i gɛt fɔ travul. * (Luk di futnot.) (Di Nɔmba Dɛm 35:25) Bɔt i bin bɛtɛ. If di pɔsin we kil lɛf di tɔŋ ɛnitɛm, i de sho se i nɔ bisin bɔt di pɔsin we i dɔn kil, ɛn i de put in yon layf pan denja.
11. Aw Kristian we dɔn ripɛnt go sho se i rili gladi fɔ di we aw Gɔd de sɔri fɔ am?
11 Tide, pɔsin we dɔn ripɛnt fɔ du di sem tin bak fɔ lɛ Gɔd go fɔgiv am. I fɔ stɔp fɔ du di bad tin we i de du. Dis min se i fɔ avɔyd ɛnitin we go mek i sin siriɔs wan. Di Baybul ɛksplen wetin Kristian dɛn we dɔn ripɛnt fɔ du. I se: “Una fɔ du di tin dɛn we sho se una dɔn lɛf fɔ du bad.” (Matyu 3:8) So if wi du ɔl wetin wi ebul fɔ du fɔ stɔp fɔ du bad, wi go sho Jiova se wi rili bisin bɔt di tin we apin to wi, ɛn wi nɔ de tink se i go sɔri fɔ wi wantɛm wantɛm.
12. Wetin pɔsin we na Kristian fɔ du fɔ lɛ Jiova kɔntinyu fɔ sɔri fɔ am?
12 Wetin Kristian nid fɔ stɔp fɔ du fɔ mek Jiova go kɔntinyu fɔ sɔri fɔ am? I fɔ rɛdi fɔ stɔp fɔ du tin dɛn we i de ɛnjɔy if dɛn tin dɛn de de mek i sin. (Matyu 18:8, 9) Fɔ ɛgzampul, if yu padi dɛn de mek yu de du tin dɛn we Jiova nɔ lɛk, yu go stɔp fɔ kip kɔmpin wit dɛn? If yu de si se i nɔ izi fɔ yu fɔ kɔntrol di we aw yu de drink rɔm, yu go avɔyd di tin dɛn we de mek yu drink bɔku rɔm? If i nɔ izi fɔ yu fɔ kɔntrol di we aw yu de tink ɔ fil fɔ du mami ɛn dadi biznɛs di we aw Gɔd nɔ want, yu nɔ tink se yu fɔ avɔyd fim dɛn, wɛbsayt dɛn, ɔ tin dɛn we yu kin du we kin mek yu tink bɔt dɔti tin dɛn? Mɛmba se, ɛni sakrifays we yu mek fɔ obe Jiova in lɔ dɛn nɔ go go fɔ natin. Di tin we wɔs pas ɔl na we wi de fil se Jiova dɔn lɛf wi. Ɛn di tin we impɔtant na we wi de ɛnjɔy Jiova in “lɔv we de sote go.”—Ayzaya 54:7, 8.
‘DƐN TƆŊ YA GO PROTƐKT UNA’
13. Ɛksplen wetin mek di pɔsin we kil go gɛt gladi at ɛn nɔ fred we i de na di tɔŋ we pɔsin fɔ rɔn go if i mistek kil sɔmbɔdi.
13 Di pɔsin we mistek kil in kɔmpin nɔ go day if i rɔn go insay dis tɔŋ. Jiova bin se dɛn tɔŋ ya go bi tɔŋ we “pɔsin we mistek kil in kɔmpin go rɔn go ayd.” (Jɔshwa 20:2, 3) Jiova nɔ bin tɛl di pipul dɛn fɔ jɔj di pɔsin we mistek kil in kɔmpin fɔ di sem kes tu tɛm. Dɔn, di pɔsin we day in fambul, nɔ fɔ go insay dis tɔŋ fɔ go kil di pɔsin we kil in fambul. Wans di pɔsin we kil in kɔmpin de insay dis tɔŋ, Jiova go protɛkt am. I nɔ de na jel. I kin wok, ɛp ɔda pipul dɛn, ɛn sav Jiova wit kolat. Fɔ tru, i go gɛt gladi at ɛn in layf go gɛt minin.
Yu fɔ biliv se Jiova go fɔgiv yu (Luk na paregraf 14 to 16)
14. Wetin pɔsin we na Kristian fɔ biliv?
14 Sɔm pan Gɔd in pipul dɛn we bin dɔn kɔmit siriɔs sin kin stil fil bad pan ɔl we dɛn dɔn ripɛnt. Sɔm kin ivin tink se Jiova nɔ go ɛva fɔgiv dɛn fɔ wetin dɛn bin du. If yu de fil da kayn we de, duya wi want mek yu biliv se we Jiova fɔgiv yu, i dɔn fɔgiv sote go. Yu nɔ nid fɔ fil bad igen. Na dis bin apin to Daniɛl we wi bin tɔk bɔt. Afta we di ɛlda dɛn bin kɔrɛkt am ɛn ɛp am fɔ lɛ i gɛt gud kɔnshiɛns bak, i bin fil gud. I tɔk se: “Mi at nɔ de pwɛl igen. Wans Jiova dɔn fɔgiv mi, ɔltin dɔn dɔn. Jɔs lɛk aw Jiova se, i de tek yu lod ɛn kɛr am go fa say. Yu nɔ go ɛva si dɛn igen.” Afta we di pɔsin we kil go insay di tɔŋ we pɔsin fɔ rɔn go if i mistek kil sɔmbɔdi, i nɔ go fred se di pɔsin we i kil in fambul go kam kil am. Semweso, afta we Jiova dɔn fɔgiv wi, wi nɔ fɔ fred se i go wande mɛmba bɔt wetin wi du ɛn pɔnish wi fɔ dat.—Rid Sam 103:8-12.
15, 16. We yu no se Jizɔs na wi Ay Prist ɛn i gi in layf fɔ day fɔ wi, aw dat dɔn ɛp yu fɔ abop pan Gɔd mɔ ɛn mɔ?
15 Infakt, wi gɛt bɔku rizin pas di Izrɛlayt dɛn fɔ abop pan Jiova fɔ se i go sɔri fɔ wi. Afta we Pɔl dɔn tɔk se in na man we “sɔri” bikɔs i nɔ kin obe Jiova pan ɔltin, i tɔk se: “A tɛl Gɔd tɛnki tru Jizɔs Krays we na wi Masta!” (Lɛta Fɔ Rom 7:25) Wetin Pɔl bin min? Pan ɔl we Pɔl bin de fɛt fɔ mek i nɔ du dɛn bad tin dɛn we i kin want fɔ du ɛn pan ɔl we i bin dɔn sin trade, i bin dɔn ripɛnt. So i biliv se Jiova dɔn fɔgiv am bikɔs Jizɔs bin dɔn day fɔ wi. Bikɔs Jizɔs bin dɔn day fɔ wi, dat go mek wi gɛt klin kɔnshiɛns ɛn kolat. (Di Ibru Pipul Dɛn 9:13, 14) As wi Ay Prist, Jizɔs “gɛt pawa ɔltɛm fɔ sev dɛn pipul we de kam to Gɔd tru am. Bikɔs i gɛt layf we go de sote go, i de pre [“beg,” NW] bifo Gɔd ɔltɛm fɔ dɛn.” (Di Ibru Pipul Dɛn 7:24, 25) Trade trade, di ay prist bin de ɛp di Izrɛlayt dɛn fɔ biliv se Jiova go fɔgiv dɛn sin dɛn. Bikɔs Jizɔs na wi Ay Prist, dis fɔ mek wi gɛt bɔku rizin fɔ biliv se “i go sɔri fɔ wi ɛn i go sho wi aw i lɛk wi pan ɔl we wi nɔ fit fɔ gɛt am, ɛn i go ɛp wi di rayt tɛm.”—Di Ibru Pipul Dɛn 4:15, 16, NW.
16 Fɔ mek Jiova go protɛkt wi, wi nid fɔ biliv se Jizɔs day fɔ wi. Yu tink se di day we Jizɔs day na fɔ ɔlman? Biliv tranga wan se yu go bɛnifit frɔm di day we Jizɔs day fɔ wi. (Lɛta Fɔ Galeshya 2:20, 21) Biliv tranga wan se, na Jizɔs in day wan mek Jiova de fɔgiv yu sin dɛn. Biliv se di day we Jizɔs day fɔ wi dɔn gi yu op fɔ gɛt layf we go de sote go. Jizɔs in sakrifays na gift we Jiova dɔn gi yu!
17. Wetin mek yu fɔ alaw Jiova fɔ protɛkt yu?
17 Di tɔŋ dɛn we pɔsin fɔ rɔn go if i mistek kil sɔmbɔdi dɔn ɛp wi fɔ no aw Jiova de sɔri fɔ wi. Dis arenjmɛnt we Gɔd bin mek tich wi se layf na tin we valyu na in yay. I sho wi bak aw di ɛlda dɛn kin ɛp wi, wetin i min fɔ rili ripɛnt, ɛn wetin mek wi shɔ se Jiova de fɔgiv wi. Yu de alaw Jiova fɔ protɛkt yu? No ɔda say nɔ de we yu go fil sef! (Sam 91:1, 2) Insay di neks atikul, wi go si aw di tɔŋ dɛn we pɔsin go rɔn go if i mistek kil sɔmbɔdi kin ɛp wi fɔ falamakata Jiova we dɔn sɛt di ɛgzampul we pas ɔl fɔ du tin tret ɛn fɔ sho sɔri at.
^ par. 10 Sɔm masta sabi bukman dɛn we stɔdi bɔt di Ju pipul dɛn se, di pɔsin we kil, in famili kin go de wit am na di tɔŋ we pɔsin fɔ rɔn go if i mistek kil sɔmbɔdi.
