1, 2. (a) Aw Jizɔs bin fil bɔt Gɔd in Lɔ? (b) Aw di Ju lɔ ticha dɛn ɛn di Faresi dɛn bin de ɛksplen di Lɔ di rɔŋ we?

JIZƆS lɛk di Lɔ we Gɔd bin gi Mozis. Ɛn dat nɔ sɔprayz wi, bikɔs di Lɔ kɔmɔt frɔm in Papa Jiova, we na di pɔsin we impɔtant pas ɔl na Jizɔs in layf. Insay Sam 40:​8, di Baybul tɛl wi di kayn we aw Jizɔs lɛk Gɔd in Lɔ we i se: “A de ɛnjɔy fɔ du wetin yu want a de kip yu lɔ na mi at so a go obe am.” Di tin dɛn we Jizɔs bin de tɔk ɛn du bin sho se Gɔd in Lɔ pafɛkt, i de bɛnifit wi, ɛn ɔl wetin i de tɔk de bi.—Matyu 5:​17-19.

² I go bi se Jizɔs bin de fil bad we i bin de si di Ju lɔ ticha dɛn ɛn Faresi dɛn de ɛksplen in Papa in Lɔ di rɔŋ we, ɛn mek am tranga wan fɔ di pipul dɛn. I bin tɛl dɛn se: “Una de gi wan pat pan tɛn pat pan ɔltin we una gɛt, ivin dɛn smɔl tin lɛkɛ siminji, jinja ɛn patmɛnji,” we min se dɛn bin de rili tek tɛm fɔ obe ɔl di smɔl smɔl tin dɛn bɔt di Lɔ. So wetin na bin di prɔblɛm? Jizɔs bin ɛksplen se: “Una nɔ de gri du di rayt tin we di Lɔ se una fɔ du. Tin lɛkɛ dɛn wan ya so: fɔ du di rayt tin to pipul, fɔ sɔri fɔ pipul ɛn fɔ tru to pipul.” (Matyu 23:​23) Di di Faresi dɛn nɔ bin ɔndastand wetin di lɔ min,  ɛn dɛn bin de tink se dɛn bɛtɛ pas ɔda pipul dɛn. Bɔt Jizɔs in bin ɔndastand wetin di lɔ min ɛn i bin no wetin ɔl di lɔ dɛn bin de tɔk bɔt Jiova.

3. Wetin wi go tɔk bɔt insay dis atikul?

³ As Kristian dɛn, wi nɔ de ɔnda di Lɔ we Gɔd bin gi Mozis. (Lɛta Fɔ Rom 7:​6) So wetin mek Jiova bin put in Lɔ insay in Wɔd, di Baybul? I want wi fɔ ɔndastand ɛn ɛksplen “di impɔtant tin dɛn” na di Lɔ, ɔ di lɛsin ɛn advays [ɔ prinsipul] dɛn we de na di Lɔ. Fɔ ɛgzampul, us lɛsin dɛn wi lan frɔm di we aw dɛn arenj di tɔŋ dɛn we pɔsin fɔ rɔn go if i mistek kil sɔmbɔdi? Insay di atikul we de bifo dis wan, wi bin lan lɛsin dɛn bay we wi stɔdi bɔt wetin di pɔsin we mistek kil sɔmbɔdi fɔ du. Insay dis atikul, wi go lan bɔt wetin dɛn tɔŋ dɛn we pɔsin fɔ rɔn go if i mistek kil sɔmbɔdi tich wi bɔt Jiova ɛn aw wi kin falamakata in kwaliti dɛn. Wi go ansa tri kwɛstyɔn dɛn lɛk: Aw di tɔŋ dɛn we pɔsin fɔ rɔn go if i mistek kil sɔmbɔdi sho se Jiova gɛt sɔri at? Wetin dɛn tich wi bɔt di we aw Gɔd valyu layf? Ɛn aw dɛn sho se Gɔd de du tin tret? As wi de tɔk bɔt ɛni wan pan dɛn kwɛstyɔn dɛn ya, tray fɔ si aw yu go falamakata yu Papa we de na ɛvin.—Rid Lɛta Fɔ Ɛfisɔs 5:​1.

4, 5. (a) Wetin dɛn bin du fɔ mek am izi fɔ rɔn go na di tɔŋ we pɔsin fɔ go if i mistek kil sɔmbɔdi? Wetin mek? (b) Wetin dis tich wi bɔt Jiova?

⁴ Jiova bin arenj fɔ lɛ di siks tɔŋ dɛn we pɔsin fɔ rɔn go if i mistek kil sɔmbɔdi de na say we izi fɔ go. I bin tɛl di Izrɛlayt dɛn fɔ pik tri tɔŋ dɛn na ɔl tu di say dɛn na di Jɔdan. Wetin mek? So dat di pɔsin we mistek kil in kɔmpin go rɔn go na wan pan dɛn tɔŋ dɛn de kwik ɛn izi wan. (Di Nɔmba Dɛm 35:​11-14) Di rod dɛn fɔ go na dɛn tɔŋ dɛn ya bin fayn. (Ditarɔnɔmi 19:​3) Di Ju pipul dɛn bin put sayn dɛn na rod fɔ ɛp di pɔsin we mistek kil in kɔmpin fɔ fɛn di tɔŋ dɛn. Dɛn tɔŋ ya de fɔ pɔsin we mistek kil sɔmbɔdi, so ɛni Izrɛlayt we mistek kil sɔmbɔdi nɔ fɔ go ayd na ɔda land usay dɛn go tɛmt am fɔ wɔship lay lay gɔd dɛn.

⁵ Tink bɔt dis: Jiova bin tɛl di Ju pipul dɛn se dɛn fɔ kil ɛnibɔdi we kil in kɔmpin. Bɔt i bin mek we bak fɔ lɛ dɛn sho sɔri at ɛn protɛkt di wan dɛn we mistek kil sɔmbɔdi. Wan masta sabi bukman we stɔdi di Baybul bin tɔk se: “Ɛvri tin bin rili klia, simpul, ɛn izi.”  Jiova nɔto wikɛd jɔj we de luk fɔ we dɛn fɔ pɔnish in savant dɛn. Bifo dat, i de ‘rili sɔri fɔ wi.’—Lɛta Fɔ Ɛfisɔs 2:​4.

6. Yu tink se di Faresi dɛn falamakata Jiova fɔ sho sɔri at? Ɛksplen.

⁶ Di Faresi dɛn nɔ bin rɛdi fɔ sho sɔri at to ɔda pipul dɛn. Fɔ ɛgzampul, dɛn nɔ bin de gri fɔ fɔgiv sɔmbɔdi we dɔn mek mistek pas tri tɛm. Fɔ sho se dis kayn we we dɛn bin de biev bin bad, Jizɔs bin yuz wan ɛgzampul bɔt wan Faresi we bin de pre nia wan man we de gɛda taks. Di Faresi bin se: “Gɔd, a tɛl yu tɛnki bikɔs a nɔ tan lɛkɛ dɛn ɔda pipul; dɛn de rog, dɛn nɔ de du rayt, ɛn dɛn de lɛf dɛn mared wɛf ɔ man go fɛn ɔda pɔsin na trit. A tɛl yu tɛnki we a nɔ tan lɛkɛ dis man ya sɛf we de gɛda taks.” Wetin na bin Jizɔs in pɔynt? Di Faresi dɛn bin de luk di ɔda pipul dɛn se “dɛn nɔ de waka tret,” ɛn dɛn tink se dɛn nɔ nid fɔ sɔri fɔ dɛn.—Lyuk 18:​9-14.

7, 8. (a) Aw yu go falamakata Jiova fɔ sho sɔri at? (b) Wetin mek wi fɔ put wisɛf dɔŋ fɔ lɛ wi fɔgiv ɔda pipul dɛn?

⁷ Nɔ falamakata di Faresi dɛn, falamakata Jiova ɛn sho sɔri at. (Rid Lɛta Fɔ Kɔlɔse 3:​13.) Mek am izi fɔ lɛ ɔda pipul dɛn aks yu fɔ fɔgiv dɛn. (Lyuk 17:​3, 4) Aks yusɛf dɛn kwɛstyɔn dɛn ya: ‘I izi fɔ lɛ a fɔgiv ɔda pipul dɛn kwik kwik wan, pan ɔl we dɛn de ɔfɛnd mi bɔku bɔku tɛm? A rɛdi fɔ mek pis wit di pɔsin we dɔn ɔfɛnd mi ɔ du bad tin to mi?’

⁸ Fɔ lɛ wi fɔgiv, wi nid fɔ put wisɛf dɔŋ. Di Faresi dɛn bin tink se dɛn bɛtɛ pas ɔlman, so dɛn nɔ bin rɛdi fɔ fɔgiv. Bɔt as Kristian dɛn, wi fɔ put wisɛf dɔŋ ɛn tek ‘ɔda pipul dɛn se dɛn bɛtɛ pas wi’ ɛn fɔgiv dɛn wit ɔl wi at. (Lɛta Fɔ Filipay 2:​3) Wi kin aks wisɛf, ‘A de falamakata Jiova ɛn sho se a ɔmbul?’ If wi put wisɛf dɔŋ, i go izi fɔ lɛ ɔda pipul dɛn aks wi fɔ lɛ wi fɔgiv dɛn ɛn i go izi fɔ wi fɔ fɔgiv dɛn. Yu fɔ kwik fɔ sho sɔri at ɛn nɔ vɛks kwik.—Ɛkliziastis 7:​8, 9.

9. Aw Jiova bin ɛp di Izrɛlayt dɛn fɔ ɔndastand se dɛn fɔ si layf as sɔntin we oli?

⁹ Wan men rizin we mek Jiova bin arenj tɔŋ dɛn we pɔsin fɔ rɔn go if i mistek kil sɔmbɔdi, na fɔ protɛkt di Izrɛlayt dɛn fɔ lɛ dɛn nɔ gɛt blɔd na dɛn ed bay we dɛn de kil inosɛnt pipul dɛn. (Ditarɔnɔmi 19:​10) Jiova valyu layf, ɛn i et pɔsin we de kil. (Prɔvabs 6:​16, 17) Bikɔs in na Gɔd we oli ɛn de du tin tret, i bisin bɔt dɛn wan we de mistek kil pɔsin. Na tru se dɛn fɔ sɔri fɔ pɔsin we mistek kil in kɔmpin. Bɔt fɔs, i gɛt fɔ ɛksplen to di ɛlda dɛn wetin apin. If di ɛlda dɛn jɔj am se na mistek i mistek kil in kɔmpin, di pɔsin we kil gɛt fɔ de na di tɔŋ we pɔsin fɔ rɔn go if i mistek kil sɔmbɔdi te di ay prist day. Dat min se di  pɔsin we kil gɛt fɔ de na da tɔŋ de te i day. Dis arenjmɛnt bin tich di Izrɛlayt dɛn se dɛn fɔ si layf as sɔntin we oli. Fɔ ɔnɔ di Wan we gi layf, dɛn nid fɔ du ɔl wetin dɛn ebul fɔ avɔyd ɛnitin we go put ɔda pipul dɛn layf pan denja.

10. Frɔm wetin Jizɔs bin tɔk, aw di Ju lɔ ticha dɛn ɛn di Faresi dɛn bin sho se dɛn nɔ valyu ɔda pipul dɛn layf?

¹⁰ Jiova nɔ bin tan lɛk di Ju lɔ ticha dɛn ɛn di Faresi dɛn we nɔ bin valyu ɔda pipul dɛn layf. Jizɔs bin tɛl dɛn se: “Una dɔn lɔk di ples we pipul fɔ go fɔ lan bɔt Gɔd ɛn kɛr di ki go. Una nɔ de go insay ɛn una nɔ gri fɔ mek ɔda pipul go insay.” (Lyuk 11:​52) Wetin Jizɔs bin min? Di Ju lɔ ticha dɛn ɛn di Faresi dɛn bin gɛt di wok fɔ ɛksplen Gɔd in Wɔd to di pipul dɛn ɛn ɛp dɛn fɔ gɛt layf we go de sote go. Bɔt dɛn bin tray fɔ stɔp pipul dɛn fɔ lɛ dɛn nɔ fala Jizɔs “we gɛt pawa fɔ gi tru layf.” (Di Apɔsul Dɛn Wok [Akt] 3:​15) Dɛn bin de lid di pipul dɛn to di say we go mek dɛn lɔs dɛn layf bay di tin we dɛn bin de du. Di Ju lɔ ticha dɛn ɛn di Faresi dɛn bin prawd ɛn dɛn bin jɔs bisin bɔt dɛnsɛf nɔmɔ, dɛn nɔ bin bisin bɔt ɔda pipul dɛn layf. Dɛn nɔ bin lɛk ɔda pipul dɛn ɛn dɛn bin wikɛd!

11. (a) Aw di apɔsul Pɔl bin sho se i valyu ɛn rɛspɛkt layf jɔs lɛk Jiova? (b) Wetin go ɛp wi fɔ falamakata Pɔl ɛn gɛt zil we wi de du di prichin wok?

¹¹ Aw wi go falamakata Jiova ɛn nɔ tan lɛk di Ju lɔ ticha dɛn ɛn di Faresi dɛn? Wi go du dis bay we wi valyu ɛn rɛspɛkt layf. Di apɔsul Pɔl bin du dis bay we i bin de prich to bɔku bɔku pipul dɛn bɔt di gud nyuz bɔt Gɔd in Kiŋdɔm. Na dat mek i bin se: “Una fɔ blem unasɛf if Gɔd kɔndɛm una mek una day.” (Rid Di Apɔsul Dɛn Wok [Akt] 20:​26, 27.) Bɔt yu tink se Pɔl bin de prich bikɔs i nɔ want di pipul dɛn blɔd na in ed ɔ na bikɔs Jiova bin tɛl am se i fɔ prich? Nɔ. Pɔl bin lɛk di pipul dɛn. I bin si dɛn layf as sɔntin we valyu, ɛn i bin want mek dɛn gɛt layf we go de sote go. (Fɔs Lɛta Fɔ Kɔrint 9:​19-23) Wisɛf fɔ si layf di sem we aw Jiova de si am. Jiova want mek ɔlman ripɛnt so dat dɛn go gɛt layf. (Pita In Sɛkɔn Lɛta 3:​9, NW) Fɔ falamakata Jiova, wi nid fɔ lɛk ɔda pipul dɛn. If wi de sho sɔri at, dat go ɛp wi fɔ prich wit zil ɛn i go mek wi gɛt gladi at we wi de du am.

12. Wetin mek i impɔtant fɔ lɛ Gɔd in pipul dɛn protɛkt dɛnsɛf?

¹² Fɔ rɛspɛkt layf lɛk aw Jiova rɛspɛkt am, wi nid fɔ no aw wi go protɛkt wisɛf ɛn ɔda pipul dɛn. Wi fɔ tek tɛm drayv ɛn wok sef wan, ivin we wi de bil, we wi de mek di say dɛn we dɔn pwɛl, ɔ we wi de travul fɔ go na di say dɛn we wi de wɔship Jiova. Fɔ sɔm pipul dɛn, we dɛn de wok dɛn kin want fɔ dɔn kwik kwik ɔ dɛn nɔ kin want fɔ lɔs bɔku mɔni. Bɔt bɔku aksidɛnt kin apin we dɛn kin du dis. So pipul dɛn layf ɛn wɛlbɔdi wan rili impɔtant pas mɔni ɛn tɛm. Wi Gɔd de du wetin rayt ɔltɛm, ɛn wi want fɔ tan lɛk am. Di ɛlda dɛn nid fɔ tink bɔt aw dɛn go protɛkt dɛnsɛf ɛn ɔda pipul dɛn frɔm denja. (Prɔvabs 22:​3) If wan ɛlda mɛmba yu bɔt di lɔ dɛn we kin protɛkt pɔsin frɔm denja, yu fɔ lisin to am. (Lɛta Fɔ Galeshya 6:​1) Wi fɔ valyu ɛn rɛspɛkt layf jɔs lɛk aw Jiova de du, ɛn ‘no blɔd nɔ go de na yu ed.’

13, 14. Aw di ɛlda dɛn we bin de na Izrɛl fɔ falamakata Jiova fɔ du tin tret?

¹³ Jiova bin kɔmand di ɛlda dɛn na Izrɛl fɔ falamakata di we aw i de du tin  tret. Fɔs, di ɛlda dɛn bin nid fɔ chɛk ɔl di tin dɛn we go pruv if na tru ɔ na lay. Dɔn, dɛn bin gɛt fɔ tek tɛm tink fɔ no wetin mek di pɔsin kil in kɔmpin, aw di pɔsin we kil de biev, ɛn wetin di pɔsin bin dɔn de du trade. Dat go ɛp dɛn fɔ disayd if dɛn go sɔri fɔ am ɔ dɛn nɔ go sɔri fɔ am. Di ɛlda dɛn gɛt fɔ no if di pɔsin we kil bin et in kɔmpin ɛn if i min fɔ kil am. (Rid Di Nɔmba Dɛm 35:​20-24.) If witnɛs dɛn bin de de, dɛn go nid lɛk tu pan dɛn bifo dɛn kɔndɛm di pɔsin we kil.—Di Nɔmba Dɛm 35:​30.

¹⁴ Afta we di ɛlda dɛn dɔn no di kɔrɛkt tin we bin apin, di ɛlda dɛn go tink bɔt di pɔsin insɛf sɛf, dɛn nɔ go jɔs tink bɔt wetin i dɔn du. Di ɛlda dɛn bin nid fɔ gɛt sɛns fɔ ɔndastand klia wan ɛn si wetin mek di pɔsin kil in kɔmpin. Di tin we pas ɔl na dat, di ɛlda dɛn nid Jiova in oli spirit fɔ ɛp dɛn fɔ gɛt sɛns, ɛn falamakata am fɔ sho sɔri at ɛn du tin tret.—Ɛksodɔs 34:​6, 7.

15. Aw di we aw Jizɔs bin de trit pipul dɛn bin difrɛn frɔm di Faresi dɛn?

¹⁵ Di Faresi dɛn nɔ bin de jɔj wit sɔri at. Dɛn bin de pe atɛnshɔn mɔ pan di bad tin we di pɔsin du ɛn dɛn nɔ bin de tray fɔ no di kayn pɔsin we i bi. We sɔm Faresi dɛn bin si Jizɔs de it na Matyu in os, dɛn bin aks di disaypul dɛn se: “Wetin mek una ticha de it wit dɛn kayn pipul ya?” Jizɔs bin ansa dɛn se: “Nɔto dɛn pipul we wɛl fɔ go to dɔkta, na dɛn pipul we sik. Una go ɛn fɛnɔt wetin dɛn bin min wɛn dɛn rayt na Gɔd in Buk se, ‘Gɔd want mek una sɔri fɔ ɔda pipul ɛn du dɛn gud, i nɔ want dɛn bif sakrifays we una de mek!’ A nɔ kam tɛl dɛn pipul we de du wetin di Lɔ we Gɔd gi Mozis se fɔ chenj dɛn layf, bɔt a kam tɛl dɛn pipul we de pan sin fɔ mek dɛn chenj dɛn layf.” (Matyu 9:​9-13) Fɔ se Jizɔs bin de tɔk fɔ dɛn wan we de pan sin? Wɛl, i nɔ bin de du dat. I want mek dɛn ripɛnt. Dat na wan pan di impɔtant tin dɛn we i bin de prich bɔt. (Matyu 4:​17) Jizɔs bin kam fɔ no se sɔm pan di “pipul we bin de gɛda taks” ɛn dɛn wan we “nɔ de kip di Ju Lɔ gud gud” wan bin want fɔ chenj. Dɛn nɔ bin go na Matyu in os fɔ it nɔmɔ. Dɛn bin go de bikɔs dɛn bin de fala Jizɔs. (Mak 2:​15) I sɔri fɔ no se, bɔku pan di Faresi dɛn nɔ bin de trit di pipul dɛn lɛk aw Jizɔs bin de trit dɛn. Dɛn nɔ bin biliv se pipul dɛn kin chenj, ɛn dɛn bin de luk dɛn se dɛn na pipul dɛn we nɔ go ɛva chenj so no op nɔ de fɔ dɛn. Dɛn bin difrɛn frɔm Jiova we de du tin tret ɛn i gɛt sɔri at!

16. Wetin di ɛlda dɛn we dɛn pik fɔ disayd wetin fɔ du we pɔsin kɔmit siriɔs sin fɔ tray fɔ no?

¹⁶ Tide, di ɛlda dɛn fɔ falamakata Jiova, we na Gɔd we “de du wetin rayt.” (Sam 37:​28) Fɔs, dɛn nid fɔ “fɛnɔt gud” gud wan fɔ pruv se fɔ tru di pɔsin dɔn kɔmit siriɔs sin. If dɛn kam fɔ no so di pɔsin kɔmit siriɔs sin, dɛn go fala di advays dɛn we de na di Baybul fɔ disayd wetin fɔ du. (Ditarɔnɔmi 13:​12-14) We dɛn pik dɛn fɔ disayd wetin fɔ du we pɔsin kɔmit siriɔs sin, dɛn fɔ tek tɛm fɔ no if di pɔsin we kɔmit di sin dɔn ripɛnt ɔ if i nɔ ripɛnt yet. Dis na tin we nɔ rili izi fɔ du. Fɔ ripɛnt gɛt fɔ du wit di we aw di pɔsin we kɔmit di sin de si wetin i dɔn du ɛn wetin de na in at. (Rɛvɛleshɔn 3:​3) Pɔsin we kɔmit siriɔs sin fɔ ripɛnt fɔ lɛ dɛn go sɔri fɔ am. *—Luk di futnot.

17, 18. Aw di ɛlda dɛn go no if sɔmbɔdi dɔn rili ripɛnt? (Luk di pikchɔ nia dis atikul in taytul.)

 ¹⁷ Jiova ɛn Jizɔs no gud gud wan di we aw pɔsin de fil ɛn tink bikɔs dɛn no wetin de na wi at. Bɔt di ɛlda dɛn nɔ no wetin de na wi at. So if yu na ɛlda, aw yu go no if sɔmbɔdi dɔn rili ripɛnt? Fɔs, pre to Jiova fɔ gi yu sɛns ɛn fɔ mek yu ebul ɔndastand. (Fɔs Kiŋ 3:​9) Sɛkɔn, yuz Gɔd in Wɔd, di buk ɛn magazin dɛn we di slev we fetful de gi wi fɔ ɛp yu fɔ no di difrɛns bitwin fɔ “fil sɔri fɔ di tin dɛn we de na di wɔl” ɛn fɔ “fil sɔri bikɔs i du tin we Gɔd nɔ want,” we sho se di pɔsin dɔn rili ripɛnt. (Sɛkɔn Lɛta Fɔ Kɔrint 7:​10, 11, NW) Luk aw di Baybul ɛksplen bɔt dɛn wan dɛn we ripɛnt ɛn dɛn wan dɛn we nɔ ripɛnt, ɛn tek tɛm tink bɔt aw dɛn fil, aw dɛn bin de tink, ɛn du tin.

¹⁸ Tɔd, tink bɔt di pɔsin, nɔ jɔs tink bɔt wetin i dɔn du. Wetin mek i dɔn tan so? Wetin mek i bin disayd fɔ du dis? Wetin i ebul fɔ du ɛn wetin i nɔ ebul fɔ du? Di Baybul bin tɔk se, Jizɔs we na in de oba di Kristian kɔngrigeshɔn, “nɔ go jɔj bay wetin in yay de si nɔmɔ, ɛn i nɔ go kɔrɛkt pipul dɛn bay wetin in yes de yɛri nɔmɔ. Na di rayt we i go jɔj di wan dɛn we po, ɛn i go kɔrɛkt di ɔmbul wan dɛn di we aw Gɔd want.” (Ayzaya 11:​3, 4, NW) Ɛlda dɛn, Jizɔs dɔn pik una fɔ kia fɔ in kɔngrigeshɔn, ɛn i go ɛp una fɔ jɔj di rayt we ɛn ɛp una fɔ sho sɔri at. (Matyu 18:​18-20) Wi rili gladi fɔ gɛt ɛlda dɛn we bisin bɔt wi! Dɛn de ɛp wi bak fɔ du tin di rayt we ɛn fɔ sho sɔri at fɔ wi brɔda ɛn sista dɛn.

19. Us lɛsin yu lan frɔm di tɔŋ dɛn we pɔsin fɔ rɔn go if i mistek kil sɔmbɔdi?

¹⁹ Di Lɔ we Gɔd bin gi Mozis mek wi ‘no ɔl wetin wi fɔ no ɛn ɔl wetin tru.’ I de tich wi bɔt Jiova ɛn in advays dɛn we de na di Baybul. (Lɛta Fɔ Rom 2:​20) Di tɔŋ dɛn we pɔsin fɔ rɔn go if i mistek kil sɔmbɔdi de tich di ɛlda dɛn aw fɔ “Jɔj fia wan,” ɛn dɛn de tich wi ɔl aw fɔ sho wi brɔda ɛn sista dɛn “lɔv we go de sote go ɛn sɔri fɔ dɛn.” (Zɛkaraya 7:​9, NW) Pan ɔl we wi nɔ de ɔnda di Lɔ, Jiova nɔ stil chenj. Fɔ jɔj fia wan ɛn fɔ sho sɔri at stil impɔtant to am. Na big big ɔnɔ wi gɛt fɔ wɔship dis kayn Gɔd. Lɛ wi falamakata in fayn kwaliti dɛn ɛn alaw am fɔ protɛkt wi!