1. Wetin siŋ de ɛp wi fɔ du?

WAN pɔsin we bɔku pipul dɛn sabi we de rayt siŋ dɛn bin tɔk se: “We yu yɛri wɔd dɛn, i de mek yu tink. We yu yɛri myuzik, i de mek yu fil. Bɔt we yu siŋ, di wɔd dɛn de tɔch yu at.” Wi siŋ dɛn de sho se wi lɛk wi Papa we de na ɛvin we na Jiova. Dɛn de mek wi kam nia am mɔ ɛn mɔ. Dɔn wi dɔn kam fɔ no klia wan se fɔ siŋ na impɔtant tin insay wi wɔship, ilɛksɛf na wi wan de siŋ ɔ na wit wi brɔda ɛn sista dɛn.

2, 3. (a) Aw sɔm pipul dɛn kin fil bɔt fɔ siŋ lawd wan wit dɛn brɔda ɛn sista dɛn? (b) Us kwɛstyɔn dɛn wi go tɔk bɔt insay dis atikul?

² Aw yu kin fil we yu de siŋ lawd wan wit yu brɔda ɛn sista dɛn? Yu kin shem fɔ siŋ? Insay sɔm kɔlchɔ dɛn, man dɛn kin shem fɔ siŋ bifo ɔda pipul dɛn. Dis we aw dɛn kin biev kin afɛkt di kɔngrigeshɔn, mɔ if di ɛlda dɛn nɔ de gri fɔ siŋ ɔ if dɛn bizi de du ɔda tin dɛn we di brɔda ɛn sista dɛn de siŋ.—Sam 30:​12.

³ Fɔ siŋ na wan we we wi de wɔship Jiova. So wi nɔ fɔ go na do di tɛm we dɛn de siŋ ɔ mis da pat de na di mitin.  So i go fayn fɔ mek wi ɔl aks wisɛf dɛn kwɛstyɔn dɛn ya: ‘Aw a kin fil we a de siŋ na mitin? Wetin a go du if a de shem fɔ siŋ bifo ɔda pipul dɛn? Ɛn aw a go siŋ wit ɔl mi at?’

4, 5. Aw dɛn bin arenj fɔ siŋ insay di tɛmpul na Izrɛl trade trade?

⁴ Istri dɔn sho se di wan dɛn we bin de wɔship Jiova bin de yuz myuzik fɔ prez am. I fayn fɔ no se, di tɛm we di Izrɛlayt dɛn bin fetful to Jiova, fɔ siŋ na bin wan impɔtant tin pan dɛn wɔship. Fɔ ɛgzampul, we Devid bin de ɔganayz di we aw di tɛmpul fɔ de, i bin pik 4,000 Livayt dɛn fɔ de prez Jiova wit myuzik. Pan dɛn 4,000 Livayt dɛn ya, i bin pik 288 “we tren pan siŋ biznɛs ɛn gɛt skil” fɔ de siŋ prez to Jiova.—Fɔs Kronikul 23:​5; 25:​7.

⁵ Myuzik ɛn siŋ na bin impɔtant tin bak di tɛm we dɛn bin de gi di tɛmpul to Jiova. Di Baybul tɛl wi se: “Na di man dɛm we de blo di trɔmpɛt ɛn di wan dɛn we de siŋ . . .  de prez ɛn tɛl tɛnki to PAPA GƆD [“Jiova,” NW], ɛn wɛn dɛn bigin siŋ wit trɔmpɛt dɛn ɛn simbɔl dɛm ɛn ɔda myuzik instrumɛnt dɛm, . . . PAPA GƆD [“Jiova,” NW] in os fulɔp wit smok.” Imajin aw dis program bin mek di Izrɛlayt dɛn gɛt fet mɔ ɛn mɔ!—Sɛkɛn Kronikul 5:​13, 14; 7:​6.

6. We Nɛimaya bin bi gɔvnɔ na Jerusɛlɛm, wetin i bin du fɔ arenj myuzik ɛn pipul dɛn we fɔ siŋ?

⁶ Nɛimaya we bin mek di Izrɛlayt dɛn bil bak di wɔl dɛn na Jerusɛlɛm, insɛf bin ɔganayz di Livayt dɛn fɔ siŋ ɛn ple myuzik. Di we aw dɛn bin de ple di myuzik ɛn siŋ bin mek dɛn gi di wɔl dɛn to Jiova wit gladi at. Nɛimaya bin pik “tu big kwaya fɔ de tɛl tɛnki.” Di pipul dɛn na dikwaya bin de waka pantap di wɔl dɛn na di siti, sɔm de go na di lɛft an say ɛn sɔm dɛn go na di rayt an say. Dɔn, dɛn waka pantap di wɔl te dɛn kam mitɔp na di wɔl we de nia di tɛmpul. Di sawnd we dɛn bin de mek bin rili lawd ɛn pipul dɛn we de fa fawe sɛf bin de yɛri. (Nɛimaya 12:​27, 28, 31, 38, 40, 43) Wi shɔ se Jiova bin gladi fɔ in savant dɛn we dɛn bin de siŋ ɛn prez am wit ɔl dɛn at.

7. Aw Jizɔs bin sho se fɔ siŋ na impɔtant tin we Kristian dɛn fɔ du we dɛn de wɔship Jiova?

⁷ Insay Jizɔs in tɛm, myuzik na bin wan impɔtant tin pan dɛn wɔship. Tink bɔt wetin bin apin di nɛt bifo Jizɔs day. Afta we Jizɔs bin mek di Ivintɛm It fɔ Mɛmba di Masta wit in disaypul dɛn, dɛn ɔl bin siŋ fɔ prez Jiova.—Rid Matyu 26:​30.

8. Aw di fɔstɛm Kristian dɛn bin sɛt fayn ɛgzampul bɔt aw fɔ prez Gɔd wit siŋ dɛn?

⁸ Di fɔstɛm Kristian dɛn bin sɛt fayn ɛgzampul bay we dɛn bin de siŋ fɔ prez Gɔd. Dɛn nɔ bin tan lɛk di Izrɛlayt dɛn we bin de go na di tɛmpul fɔ go wɔship Jiova, bɔt dɛn fɔstɛm Kristian ya bin de mit na dɛn os dɛn fɔ wɔship Jiova. Pan ɔl we dɛn os dɛn nɔ bin fayn lɛk di tɛmpul, di brɔda ɛn sista dɛn bin de stil siŋ wit ɔl dɛn at. Infakt, di apɔsul Pɔl bin tɛl in Kristian brɔda dɛn se: “Una kɔntinyu fɔ tich ɛn ɛnkɔrej  unasɛf wit sam dɛn. Una go de prez Gɔd, ɛn siŋ dɛn Gɔd siŋ dɛn fɔ sho se una gɛt tɛnki, ɛn una go de siŋ to Jiova na una at.” (Lɛta Fɔ Kɔlɔse 3:​16, NW) Wi fɔ de siŋ di siŋ dɛn we de na wi siŋbuk fɔ sho se wi “gɛt tɛnki.” Di siŋ dɛn na wan pan di it dɛn we “di slev we fetful ɛn gɛt sɛns” de gi wi “di rayt tɛm.”—Matyu 24:​45, NW.

9. (a) Wetin mek sɔm brɔda ɛn sista dɛn nɔ kin gri fɔ siŋ wit ɔl dɛn at na wi mitin ɛn asɛmbli dɛn? (b) Aw wi go siŋ fɔ prez Jiova? Udat dɛn fɔ de bifo fɔ siŋ? (Luk di pikchɔ nia dis atikul in taytul.)

⁹ Wetin na sɔm rizin dɛn we de mek yu nɔ de gri fɔ siŋ? Sɔntɛm, i go bi se fɔ siŋ nɔ kɔmɔn na yu famili ɔ yu kɔlchɔ. Ɔ sɔntɛm we yu lisin to pipul dɛn we tren fɔ siŋ na redio ɔ tɛlivishɔn, ɛn we yu kɔmpia di we aw dɛn de siŋ to di we aw yu de siŋ, dat de mek yu shem ɔ fil bad. Bɔt wi ɔl gɛt di wok fɔ siŋ ɛn prez Jiova. So yu fɔ ol yu siŋbuk ɔp, es yu ed, ɛn siŋ wit ɔl yu at! (Ɛzra 3:​11; rid Sam 147:​1.) Tide, bɔku Kiŋdɔm Ɔl dɛn gɛt tɛlivishɔn dɛn we de sho di wɔd dɛn na wi siŋ dɛn ɛn dis kin ɛp wi fɔ siŋ. Wi gladi fɔ no bak se insay di Kiŋdɔm Ministri Skul, ɛlda dɛn gɛt fɔ de siŋ Kiŋdɔm siŋ dɛn. Dis de sho se i impɔtant fɔ di ɛlda dɛn fɔ de bifo fɔ siŋ wit dɛn brɔda ɛn sista dɛn na di mitin dɛn.

10. Wetin wi fɔ mɛmba if wi de fred fɔ siŋ lawd wan?

¹⁰ Bɔku pipul dɛn de fred fɔ siŋ lawd wan bikɔs dɛn de tink se dɛn vɔys lawd pasmak ɔ dɛn nɔ gɛt fayn vɔys. Bɔt tink bɔt dis, “Wi ɔl de du tin we nɔ rayt” ɔ de mistek we wi de tɔk, bɔt  dat nɔ de stɔp wi fɔ mek wi nɔ tɔk. (Jems 3:​2) So wetin mek wi fɔ alaw wi bad vɔys fɔ stɔp wi fɔ lɛ wi nɔ siŋ siŋ dɛn we de prez Jiova?

11, 12. Wetin go ɛp yu fɔ no aw fɔ siŋ fayn fayn wan?

¹¹ Sɔntɛm yu go de fred fɔ siŋ bikɔs yu nɔ no aw fɔ siŋ. Bɔt sɔm simpul tin dɛn de we yu kin du we go ɛp yu fɔ no aw fɔ siŋ. *—Luk di futnot.

¹² Yu kin siŋ wit strɔng lawd vɔys if yu lan aw fɔ kɔntrol di we aw yu de blo fayn wan. Jɔs lɛk aw kɔrɛnt de gi pawa to bɔlb fɔ layt, na so di briz we yu de blo de gi pawa to yu vɔys we yu de siŋ. Yu fɔ siŋ lawd wan lɛk aw yu de tɔk ɔ ivin lawd wan pas dat. (Luk di pɔynt dɛn we de insay di buk we nem Benefit From Theocratic Ministry School Education, pej 181 to pej 184, ɔnda di sɔbɛdin we se “Properly Control Your Air Supply.”) Infakt, sɔntɛnde di Baybul kin tɛl Jiova in savant dɛn fɔ “ala wit gladi at” we dɛn de siŋ to am. —Sam 33:​1-3.

13. Ɛksplen aw wi go ebul siŋ wit mɔ kɔnfidɛns?

¹³ Tray fɔ du dɛn tin ya we yu de du famili wɔship ɔ we yu de stɔdi yu wan: Pik wan pan di siŋ dɛn we yu lɛk frɔm wi siŋbuk. Rid di wɔd dɛn lawd wan wit strɔng vɔys ɛn wit kɔnfidɛns. Dɔn, nɔ stɔp we yu de tɔk ɔl di wɔd we de insay wan layn wit di sem vɔys. Dɔn wit di sem vɔys, siŋ di wɔd dɛn we de insay wan layn. (Ayzaya 24:​14) Yu vɔys go fayn we yu du dat, ɛn dat na gud tin. Nɔ alaw dat fɔ mek yu fred ɔ fɔ mek yu shem.

14. (a) Aw di opin we wi de opin wi mɔt big go ɛp wi fɔ siŋ? (Luk di bɔks we se “ Tin dɛn we Go Ɛp Yu fɔ Siŋ Fayn.”) (b) Us pɔynt yu tink se go ɛp yu fɔ sɔlv di prɔblɛm we yu gɛt wit yu vɔys?

¹⁴ Fɔ siŋ wit fayn vɔys, yu nid fɔ opin yu mɔt. So we yu de siŋ, opin yu mɔt big pas aw yu kin opin yu mɔt we yu de tɔk. Bɔt wetin yu go du if yu tink se yu nɔ gɛt strɔng vɔys ɔ yu vɔys shap pasmak? Yu kin fɛn sɔm pɔynt dɛn we go ɛp yu insay di bɔks we se “Overcoming Specific Problems,” we de insay di buk we nem  Benefit From Theocratic Ministry School Education, pej 184.

15. (a) Insay 2016, wetin dɛn bin anawns pan di mitin we di ɔganayzeshɔn kin gɛt wan tɛm pan ia? (b) Wetin mek dɛn mek nyu siŋbuk?

¹⁵ Insay 2016, ɔl di wan dɛn we bin atɛnd di mitin we di ɔganayzeshɔn kin gɛt wan tɛm pan ia, bin gladi we Brɔda Stivin Lɛt we na wan pan di Gɔvnin Bɔdi mɛmba dɛn bin anawns di nyu siŋbuk we in taytul na “Siŋ wit Gladi At” to Jiova. We Brɔda Lɛt bin de ɛksplen, i bin se wan rizin we mek wi nid nyu siŋbuk na bikɔs wi gɛt di nyu New World Translation of the Holy Scriptures. Dɛn chenj sɔm wɔd dɛn we de insay dis siŋbuk bikɔs dɛn wɔd ya nɔ de insay di New World Translation igen. Dɔn dɛn ad nyu siŋ dɛn bɔt di prichin wok ɛn di day we Jizɔs day fɔ wi. Ɛn bikɔs fɔ siŋ na wan impɔtant we fɔ wɔship Jiova, di Gɔvnin Bɔdi want fɔ mek ay kwaliti siŋbuk. So di kɔva na di sem wit di New World Translation.

16, 17. Wetin bak dɛn dɔn chenj insay di nyu siŋbuk?

¹⁶ Fɔ mek di siŋbuk go izi fɔ wi, dɛn put di siŋ dɛn togɛda bay tɔpik. Fɔ ɛgzampul, di fɔs 12 siŋ dɛn de tɔk bɔt Jiova, di ɔda 8 siŋ dɛn de tɔk bɔt Jizɔs ɛn di day we i day fɔ wi, ɛn bɔku ɔda  tin dɛn. Dɛn dɔn mek list bɔt ɔl di tɔpik dɛn na di fɔs pej insay di siŋbuk. Fɔ ɛgzampul, if brɔda want fɔ pik siŋ we i de gi in pɔblik tɔk, dis go rili ɛp am.

¹⁷ Fɔ ɛp ɔlman fɔ siŋ wit ɔl dɛn at, dɛn dɔn chenj sɔm wɔd dɛn fɔ mek am izi fɔ ɔndastand di mɛsej klia wan we wi de siŋ. Dɔn, dɛn chenj wɔd dɛn we wi nɔ de yuz so nɔmɔ, lɛk “shall.” Semweso, di siŋ we gɛt di taytul “Long-Suffering” dɔn chenj to “Exercise Patience,” ɛn dɛn ajɔst di wɔd dɛn insay di siŋ bak. Ɛn i bin fayn bak we dɛn chenj di siŋ we gɛt di taytul “Guard Your Heart” we bin tan lɛk kɔmand to, “We Guard Our Hearts” we na stetmɛnt. Wetin mek? Na bikɔs trade we pɔsin bin de siŋ dis siŋ, di wɔd dɛn bin de tɛl ɔda pɔsin wetin fɔ du. Dis nɔ bin fayn fɔ di nyu wan dɛn, di wan dɛn we want fɔ no mɔ bɔt di Baybul, di yɔŋ wan dɛn, ɛn sista dɛn na di mitin, asɛmbli, ɛn kɔnvɛnshɔn dɛn. So na dat mek dɛn chenj di taytul ɛn wɔd dɛn.

18. Wetin mek wi fɔ lan di siŋ dɛn insay wi nyu siŋbuk? (Luk di futnot.)

¹⁸ Bɔku pan di siŋ dɛn insay di “Siŋ wit Gladi At” siŋbuk tan lɛk prea dɛn to Jiova. Dɛn siŋ ya de ɛp yu fɔ tɛl Jiova aw yu de fil. Ɔda siŋ dɛn de ɛnkɔrej wi fɔ “sho lɔv ɛn du wetin fayn.” (Di Ibru Pipul Dɛn 10:​24, NW) Wi want fɔ no di tyun, di bit, ɛn di wɔd dɛn pan wi siŋ dɛn. Wan we we wi kin du dis na bay we wi de lisin to di Kiŋdɔm siŋ dɛn we wi brɔda ɛn sista dɛn kin siŋ. Dɛn siŋ dɛn ya de na jw.org. We yu praktis dɛn siŋ dɛn ya na os, yu go lan aw fɔ siŋ dɛn wit kɔnfidɛns ɛn wit ɔl yu at. *—Luk di futnot.

19. Aw ɔlman go wɔship Jiova insay di kɔngrigeshɔn?

¹⁹ Memba se fɔ siŋ na wan impɔtant we fɔ wɔship Jiova. Na wan pawaful we fɔ sho se wi lɛk Jiova ɛn wi gladi fɔ ɔl wetin i dɔn du fɔ wi. (Rid Ayzaya 12:​5.) We wi de siŋ wit ɔl wi at, wi de ɛnkɔrej ɔda pipul dɛn fɔ du di sem tin. Ɔlman insay di kɔngrigeshɔn, ilɛksɛf na yɔŋ pɔsin, ol pɔsin, ɔ nyu wan insay di trut, kin wɔship Jiova dis kayn we. So nɔ stɔp fɔ siŋ wit ɔl yu at. Fala di advays we de na di Sam buk we se: “Siŋ to PAPA GƆD [“Jiova,” NW]!” So go de siŋ wit gladi at!—Sam 96:​1.