1. Wetin mek yu biliv tranga wan se Gɔd in Wɔd gɛt pawa? (Luk di pikchɔ nia dis atikul in taytul.)

JIOVA in pipul dɛn biliv tranga wan se in wɔd ɔ in mɛsej we i sɛn to mɔtalman “gɛt layf ɛn i gɛt pawa.” (Di Ibru Pipul Dɛn 4:​12) Wi dɔn si aw di Baybul gɛt pawa na wi layf ɛn ɔda pipul dɛn layf. Bifo sɔm pipul dɛn bi Witnɛs, dɛn bin de tif, tek drɔgs, ɔ du mami ɛn dadi biznɛs di we aw Gɔd nɔ want. Ɔda pipul dɛn gɛt mɔni ɔ plɛnti pipul dɛn no dɛn bɔt stil dɛn de fil se dɛn layf nɔ gɛt ɛni minin. (Ɛkliziastis 2:​3-11) Wi gladi bikɔs bɔku pipul dɛn we nɔ bin gɛt op ɛn we nɔ bin no wetin fɔ du ɔ usay fɔ go dɔn gɛt op ɛn sɔntin we de gayd dɛn. Insay di Wachtawa, wi dɔn de ɛnjɔy fɔ rid bɔku pan dɛn kayn stori dɛn ya insay di atikul dɛn we gɛt di taytul “The Bible Changes Lives.” Ivin we dɛn dɔn bi Kristian, di Baybul de ɛp pipul dɛn fɔ kɔntinyu fɔ gɛt tayt padi biznɛs wit Jiova.

2. Insay di fɔstɛm Kristian dɛn tɛm, aw di pawa we Gɔd in Wɔd gɛt bin afɛkt pipul dɛn?

² Wi nɔ fɔ sɔprayz fɔ si se bɔku pipul dɛn de chenj gud  gud wan we dɛn lan di tru tin dɛn we de na di Baybul. Insay di fɔstɛm Kristian dɛn tɛm, wi brɔda ɛn sista dɛn we bin gɛt di op fɔ go de na ɛvin dɛnsɛf bin chenj ɛn lɛf dɛn bad abit dɛn. (Rid Fɔs Lɛta Fɔ Kɔrint 6:​9-11.) We Pɔl bin de tɔk bɔt dɛn wan dɛn we nɔ go de na Gɔd in Kiŋdɔm, i bin tɔk se: “Sɔm pan una bin tan lɛkɛ dɛn pipul ya.” Gɔd in Wɔd ɛn in oli spirit bin ɛp dɛn pipul ya fɔ chenj. Bɔt afta we dɛn dɔn bi Kristian, sɔm pan dɛn bin mek siriɔs mistek we bin afɛkt dɛn padi biznɛs wit Jiova. Fɔ ɛgzampul, di Baybul tɔk bɔt wan anɔyntɛd brɔda we dɛn bin disfɛloship. Leta, i bin chenj so dat i go kam bak na di Kristian kɔngrigeshɔn. (Fɔs Lɛta Fɔ Kɔrint 5:​1-5; Sɛkɛn Lɛta Fɔ Kɔrint 2:​5-8) Wi gladi fɔ no se wi brɔda ɛn sista dɛn dɔn ebul fɔ chenj ɛn lɛf bɔku pan dɛn bad abit dɛn we dɛn bin gɛt bikɔs Gɔd in Wɔd gɛt pawa.

3. Wetin wi go tɔk bɔt insay dis atikul?

³ Gɔd in Wɔd rili pawaful. We Jiova dɔn gi wi in Wɔd, di Baybul, wi fɔ mek shɔ se wi yuz am di rayt we. (Sɛkɛn Lɛta To Timoti 2:​15) Dis atikul go tɔk bɔt aw wi go yuz di pawa we di Baybul gɛt (1) na wi layf, (2) na wi prichin wok, ɛn (3) we wi de tich na stej. Di tin dɛn we wi go lan go ɛp wi fɔ sho se wi lɛk wi Papa we de na ɛvin ɛn wi gladi fɔ di Baybul, we de bɛnifit wi.—Ayzaya 48:​17.

4. (a) Wetin wi go du fɔ lɛ Gɔd in Wɔd afɛkt wi? (b) Aw yu kin mek tɛm fɔ lɛ yu rid di Baybul?

⁴ Fɔ alaw Gɔd in Wɔd fɔ afɛkt wi, wi nid fɔ de rid am ɔltɛm. Wi fɔ tray fɔ rid am ɛvride. (Jɔshwa 1:​8) Bɔku pan wi rili bizi, bɔt wi nɔ fɔ alaw ɛnitin, ivin di wok dɛn we wi gɛt fɔ stɔp wi fɔ lɛ wi nɔ rid di Baybul. (Rid Lɛta Fɔ Ɛfisɔs 5:​15, 16.) Wi kin fɛn tɛm fɔ du am lɛk ali mɔnin, aftanun tɛm, ɔ ivin na nɛt. Wi gri wit wetin wan pan di man dɛn we rayt di Sam buk tɔk we i se: “A lɛk yu lɔ dɛn bad bad wan! Na de ɛn nɛt a de stɔdi dɛn.”—Sam 119:​97.

5, 6. (a) Wetin mek wi nid fɔ tink gud wan bɔt wetin wi de rid? (b) Aw di tink we wi de tink gud wan bɔt wetin wi de rid fɔ afɛkt wi? (c) Aw di rid we yu de rid di Baybul ɛn we yu de tink gud wan bɔt wetin yu dɔn rid, de bɛnifit yu?

⁵ Bɔt nɔto fɔ jɔs rid di Baybul nɔmɔ. Wi nid fɔ tek tɛm tink bɔt wetin wi de rid gud gud wan. (Sam 1:​1-3) Na dat go mek wi ebul fɔ du wetin wi de rid. So ilɛksɛf na di Baybul we dɛn print wi de rid ɔ wi de rid am na wi fon, tablet, ɔ kɔmpyuta, wi fɔ alaw Gɔd in Wɔd fɔ chenj wi ɛn wi fɔ du wetin rayt.

⁶ Aw wi go tink gud wan bɔt wetin wi de rid? We wi de rid di Baybul, i fayn fɔ lɛ wi de stɔp smɔl ɛn aks wisɛf kwɛstyɔn dɛn lɛk: ‘Wetin dis de tɛl mi  bɔt Jiova? Aw a de du di tin dɛn we a de rid? Us bad abit a stil nid fɔ lɛf?’ We wi tink gud wan bɔt Gɔd in Wɔd ɛn pre bɔt wetin wi de rid, wi go want fɔ du di tin dɛn we wi dɔn rid. Na da tɛm de wi go si di pawa we di Baybul gɛt na wi layf.—Sɛkɛn Lɛta Fɔ Kɔrint 10:​4, 5.

7. Aw wi kin yuz Gɔd in Wɔd gud gud wan we wi de prich?

⁷ I rili impɔtant fɔ lɛ wi de yuz Gɔd in Wɔd ɔltɛm we wi de prich ɛn tich ɔda pipul dɛn. Wan brɔda bin tɔk se, “If yu de prich frɔm os-to-os wit Jiova, na yu nɔmɔ go de tɔk ɔ yu go alaw Jiova fɔ de tɔk?” We wi de rid di Baybul to pɔsin, wi de sho se wi de alaw Jiova fɔ tɔk to am. We wi pik di rayt skripchɔ fɔ tɔk to pɔsin, i pawaful pas ɛnitin we wi go se. (Fɔs Lɛta Fɔ Tɛsalonayka 2:​13) Yu de tray fɔ rid di Baybul ɔltɛm we yu de prich?

8. Wetin mek wi nɔ jɔs nid fɔ rid di skripchɔ dɛn we wi de prich?

⁸ Fɔ rid wan vas na di Baybul to di wan dɛn we wi de prich to nɔ kin du. Bɔku pipul dɛn nɔ kin ɔndastand wetin di Baybul min. Na so i bin de apin insay di fɔstɛm Kristian dɛn tɛm ɛn i de apin bak tide. (Lɛta Fɔ Rom 10:​2) Wi nɔ fɔ tink se di pɔsin we wi de prich to ɔndastand di skripchɔ we wi dɔn rid. Wi kin ɛp di pɔsin bay we wi de ripit di men wɔd ɔ pɔynt we de na di vas ɛn wi kin ɛksplen wetin dɛn min. We wi du dis, Gɔd in Wɔd go tɔch di pɔsin in maynd ɛn in at.—Rid Lyuk 24:​32.

9. Aw wi go ɛp pipul dɛn fɔ rɛspɛkt di Baybul bay wetin wi de tɔk bifo wi rid di skripchɔ? Gi wan ɛgzampul.

⁹ Di tin we wi kin tɔk bifo wi rid di skripchɔ kin ɛp bak di pɔsin we wi de prich to fɔ rɛspɛkt di Baybul. Fɔ ɛgzampul, wi kin tɔk se, “Lɛ wi si wetin di Wan we mek ɔltin tɔk bɔt dis tɔpik.” Ɔ if yu de tɔk to sɔmbɔdi we nɔto Kristian, yu kin se: “Lɛ wi si wetin di Oli Buk dɛn tɛl wi.” If wi mit pɔsin we nɔ bisin bɔt rilijɔn, wi kin aks am se, “Yu dɔn ɛva yɛri dis wɔd we dɛn bin tɔk trade trade?” If wi mɛmba se ɔlman kɔmɔt na difrɛn rilijɔn ɛn gɛt difrɛn tin dɛn we dɛn biliv, wi go du ɔl wetin wi ebul fɔ mek di fɔs tin we wi de tɔk mek ɔda pipul dɛn want fɔ no mɔ bɔt di Baybul.—Fɔs Lɛta Fɔ Kɔrint 9:​22, 23.

10. (a) Wetin bin apin to wan brɔda? (b) Aw yu si di pawa we Gɔd in Wɔd gɛt na yu prichin wok?

¹⁰ Bɔku pipul dɛn dɔn kam fɔ no se Gɔd in Wɔd rili pawaful we dɛn de yuz am fɔ prich. Wan brɔda bin go fɛn wan pa we bin dɔn de rid wi magazin dɛn fɔ lɔng tɛm. Wan de, bifo di brɔda jɔs gi di pa di nyu Wachtawa, di brɔda bin disayd fɔ rid wan skripchɔ. I rid Sɛkɔn Lɛta Fɔ Kɔrint 1: 3, 4 (NW) we se:  “Di Papa we de sɔri fɔ wi ɛn di Gɔd we de kɔrej wi ɔltɛm . . . de kɔrej wi pan ɔl wi prɔblɛm dɛn.” Dɛn wɔd dɛn ya bin rili tɔch di pa in at so i aks di brɔda fɔ rid di skripchɔ bak. Dɔn di man bin se in ɛn in wɛf bin rili nid pɔsin fɔ ɛnkɔrej dɛn. Di skripchɔ we dis brɔda bin rid bin mek dis pa want fɔ no mɔ bɔt di Baybul. Fɔ yuz Gɔd in Wɔd na wi prichin wok rili pawaful!—Di Apɔsul Dɛn Wok [Akt] 19:​20.

11. Us wok di brɔda dɛn we de tich na stej gɛt?

¹¹ Wi lɛk fɔ atɛnd wi mitin, asɛmbli, ɛn kɔnvɛnshɔn dɛn. Di men rizin we mek wi de atɛnd na fɔ wɔship Jiova. Wi kin bɛnifit bak frɔm wetin wi de lan. Dis na di rizin we mek di brɔda we de tich na di stej gɛt big ɔnɔ ɛn i gɛt siriɔs wok. (Jems 3:​1) Dɛn fɔ mek shɔ se di tin dɛn we dɛn de tich fɔ kɔmɔt frɔm Gɔd in Wɔd. If yu gɛt dis kayn wok fɔ du, aw yu go yuz di pawa we di Baybul gɛt fɔ tɔch pipul dɛn at?

12. Aw di spika kin mek shɔ se in tɔk kɔmɔt frɔm di Baybul?

¹² Di Baybul fɔ bi wan pan di impɔtant tin dɛn we yu de yuz na di tɔk. (Jɔn 7:​16) So yu fɔ tek tɛm we yu de gi yu tɔk so dat di ɛkspiriɛns dɛn,  stori ɔ ɛgzampul dɛn nɔ go mek pipul dɛn nɔ pe atɛnshɔn to di Baybul. Dɔn mɛmba se fɔ rid frɔm di Baybul difrɛn frɔm we yu de tich frɔm di Baybul. Infakt, if yu rid bɔku skripchɔ dɛn, plɛnti pipul dɛn nɔ go ebul mɛmba dɛn. So tek tɛm pik di skripchɔ dɛn we yu want fɔ yuz. Dɔn tek yu tɛm fɔ rid, ɛksplen, gi ɛgzampul, ɛn sho aw fɔ du wetin yu dɔn rid. (Nɛimaya 8:​8) We wi tɔk de kɔmɔt frɔm awtlayn, wi fɔ mek shɔ se wi stɔdi di awtlayn gud wan ɛn di skripchɔ dɛn we wi de yuz. Tray fɔ ɔndastand aw di awtlayn ɛn di skripchɔ dɛn kɔnɛt. Dɔn yuz sɔm pan dɛn skripchɔ dɛn ya fɔ tich di pɔynt dɛn we de na di awtlayn. (Yu kin fɛn sɔm gud pɔynt dɛn na di buk we nem Benefit From Theocratic Ministry School Education stɔdi 21 to stɔdi 23.) Di tin we impɔtant pas ɔl na fɔ aks Jiova fɔ ɛp yu fɔ no aw fɔ ɛksplen di valyu tin dɛn we de na in Wɔd, di Baybul.—Rid Ɛzra 7:​10; Prɔvabs 3:​13, 14.

13. (a) Aw di skripchɔ we wan sista bin yɛri na mitin rili tɔch in at? (b) Aw di we aw dɛn de yuz di Baybul na mitin dɔn afɛkt yu?

¹³ Wan sista we de na Ɔstrelia bin tɔk se di tɛm we i bin smɔl, bɔku bad bad tin dɛn bin apin to am, ɛn ivin we leta i kam fɔ no Jiova, i stil nɔ bin rili biliv  se Jiova lɛk am. Na wan pan wi mitin dɛn, dis sista bin yɛri wan skripchɔ we bin rili tɔch in at. I bin tink gud wan bɔt dis skripchɔ ɛn stɔdi mɔ bɔt am, dat bin mek dis sista rid ɔda vas dɛn na di Baybul. Na da tɛm de i biliv tranga wan se Jiova lɛk am. * (Luk di futnot.) Yu dɔn ɛva go mitin, asɛmbli, ɔ kɔnvɛnshɔn we yu yɛri dɛn yuz wan patikyula skripchɔ we rili tɔch yu at?—Nɛimaya 8:​12.

14. Aw wi go sho se wi lɛk ɛn valyu Jiova in Wɔd?

¹⁴ Wi nɔ gladi fɔ we Jiova rayt in Wɔd, di Baybul fɔ wi? I prɔmis wi se in Wɔd go de sote go, ɛn i dɔn kip to da prɔmis de. (Pita In Fɔs Lɛta 1:​24, 25) So wi want fɔ mek shɔ se wi de rid di Baybul ɔltɛm, du di tin dɛn we wi de rid, ɛn yuz am fɔ ɛp ɔda pipul dɛn. We wi du dis, wi de sho se wi rili lɛk ɛn gladi fɔ dis valyu buk we wi gɛt, ɛn wetin pas ɔl, wi lɛk Jiova, di Gɔd we rayt di Baybul.