1. Aw Jiova bin sho insɛf to Mozis? Wetin mek dis impɔtant?

WAN tɛm Gɔd bin sho insɛf to Mozis bay we i tɛl am in nem ɛn sɔm pan in kwaliti dɛn we i gɛt. Jiova bin fɔ dɔn tɔk mɔ bɔt di pawa ɔ sɛns we i gɛt, bɔt bifo dat i tɔk fɔs bɔt di masi ɛn sɔri-at we i gɛt. (Rid Ɛksodɔs 34:​5-7.) Mozis bin nid fɔ no if Jiova go sɔpɔt am. So Jiova bin tɔk mɔ bɔt in kwaliti dɛn we de sho se i rili want fɔ ɛp in savant dɛn. (Ɛksodɔs 33:​13) Aw yu fil we yu no se Jiova rili bisin bɔt yu? Dis atikul go tɔk mɔ bɔt sɔri-at, we min fɔ sɔri fɔ ɔda pipul dɛn we de sɔfa ɛn dis kin mek wi rili want fɔ ɛp dɛn.

2, 3. (a) Wetin sho se na kɔmɔn tin fɔ lɛ wi sho sɔri-at? (b) Wetin mek wi fɔ want fɔ no wetin di Baybul tɔk bɔt sɔri-at?

² Jiova na Gɔd we gɛt sɔri-at ɛn i mek mɔtalman lɛk aw i tan. So na kɔmɔn tin fɔ mɔtalman fɔ bisin bɔt ɔda pipul dɛn. Ivin di wan dɛn we nɔ sabi Jiova kin sho se dɛn gɛt sɔri-at. (Jɛnɛsis 1:​27) Insay di Baybul, bɔku ɛgzampul dɛn de de bɔt pipul dɛn we dɔn sho se dɛn gɛt  sɔri-at. Fɔ ɛgzampul, we tu uman dɛn bin de fɛt fɔ wan pikin, dɛn bin kɛr di kes go to Sɔlɔmɔn. Fɔ lɛ Sɔlɔmɔn no udat pan dɛn tu uman dɛn ya rili bɔn di pikin, i tɛst dɛn bay we i tɛl wan pan in sojaman dɛn fɔ sheb di pikin midul. Di pikin in mama bin rili sɔri fɔ in pikin, so i beg di kiŋ fɔ lɛ i gi di pikin to di ɔda uman. (Fɔs Kiŋ 3:​23-27) Wan ɔda ɛgzampul bɔt sɔri-at na Fɛro in gyal pikin. We i fɛn Mozis we na bin bebi, i bin no se Mozis na Ibru ɛn dɛn fɔ kil am. Bɔt i “sɔri” fɔ am ɛn i disayd fɔ tek Mozis ɛn mɛn am lɛk in yon bɔy pikin.—Ɛksodɔs 2:​5, 6.

³ Wetin mek wi fɔ lan mɔ bɔt sɔri-at? Na bikɔs Jiova want lɛ wi falamakata am. (Lɛta Fɔ Ɛfisɔs 5:​1) Pan ɔl we Gɔd mek wi di we we wi go sho sɔri-at, wi nɔ pafɛkt ɛn dis kin mek wi bisin bɔt wisɛf nɔmɔ. Sɔntɛnde, i nɔ kin izi fɔ wi fɔ disayd fɔ ɛp ɔda pipul dɛn ɔ fɔ bisin bɔt wisɛf nɔmɔ. Wetin go ɛp wi fɔ sho se wi rili bisin bɔt ɔda pipul dɛn? Fɔs, lɛ wi tɔk bɔt aw Jiova ɛn ɔda pipul dɛn dɔn sho se dɛn gɛt sɔri-at. Sɛkɔn, lɛ wi si aw wi kin falamakata di we aw Gɔd de sho sɔri-at ɛn wetin mek i fayn fɔ lɛ wi du so.

4. (a) Wetin mek Jiova bin sɛn enjɛl dɛn fɔ go na Sɔdɔm? (b) Wetin wi lan frɔm di tin we bin apin to Lɔt ɛn in famili?

⁴ Di Baybul gɛt bɔku ɛgzampul dɛn bɔt aw Jiova dɔn sho sɔri-at. Fɔ ɛgzampul, tink bɔt wetin bin apin to Lɔt. Lɔt na man we bin de du wetin Gɔd want. Bɔt in at bin rili pwɛl ɛn “i nɔ bin lɛk” di bad tin dɛn we di pipul dɛn na Sɔdɔm ɛn Gomora bin de du. Dɛn pipul ya nɔ bin gɛt wan rɛspɛkt fɔ Gɔd ɛn so Jiova bin disayd se dɛn fɔ day. (Pita In Sɛkɛn Lɛta 2:​7, 8) Jiova bin sɛn enjɛl dɛn fɔ go tɛl Lɔt se i de kam dɔnawe wit Sɔdɔm ɛn Gomora, so i nid fɔ rɔnawe kɔmɔt insay da siti de. Di Baybul tɔk se: “Lɔt bigin drɛg fut. Bɔt PAPA GƆD sɔri fɔ am, so di tu man dɛn kapu Lɔt, in wɛf ɛn in tu gyal pikin dɛn bonikali ɛn drɛg dɛn kɔmɔt na di siti.” (Jɛnɛsis 19:​16) Jɔs lɛk aw Jiova bin ɔndastand Lɔt in prɔblɛm, wisɛf fɔ biliv tranga wan se i de ɔndastand ɛnikayn prɔblɛm we de mit wi.—Ayzaya 63:​7-9; Jems 5:​11, Pita In Sɛkɛn Lɛta 2:​9.

5. Aw Gɔd in Wɔd go tich wi fɔ sho sɔri-at?

⁵ Jiova dɔn tich in pipul dɛn bak fɔ sho sɔri-at. Tink bɔt wan pan di lɔ dɛn we i bin gi di Izrɛlayt dɛn. I bin se, if pɔsin lɛnt mɔni to in kɔmpin, di pɔsin we dɛn lɛnt mɔni to kin tek di pɔsin in klos fɔ sho se i go pe bak di mɔni. (Rid Ɛksodɔs 22:​26, 27.) Bɔt dis pɔsin we dɛn lɛnt mɔni to fɔ gi bak di klos to di pɔsin we lɛnt di mɔni to am we di san go dɔŋ so dat da pɔsin de go gɛt klos  fɔ wɛr na nɛt ɛn i nɔ go fil kol. Sɔmbɔdi we nɔ gɛt sɔri-at nɔ go want fɔ gi di klos bak, bɔt Jiova bin tich in pipul dɛn se dɛn fɔ gɛt sɔri-at. Wetin wi lan frɔm di lɔ we Jiova gi in pipul dɛn? Nɔ ɛva tɔn yu bak pan yu kɔmpin Kristian we i nid sɔntin. We wi ebul fɔ ɛp wi brɔda ɔ sista dɛn we de sɔfa, wi fɔ du am.—Lɛta Fɔ Kɔlɔse 3:​12; Jems 2:​15, 16; rid Jɔn In Fɔs Lɛta 3:​17.

6. Wetin wi lan frɔm di we aw Jiova sho sɔri-at to di Izrɛlayt dɛn pan ɔl we dɛn bin de du bad tin?

⁶ Jiova bin sɔri fɔ di Izrɛlayt dɛn ivin we dɛn bin de du bad tin dɛn. Wi rid se Jiova “we na dɛn Papa fasin fɔ sɛn to dɛm bay in mɛsenja dɛm bikɔs i gɛt sɔri at fɔ in pipul dɛm ɛn in dwɛlin ples.” (Sɛkɛn Kronikul 36:​15) Semweso, wi fɔ sɔri fɔ dɛn wan dɛn we nɔ sabi Jiova yet bɔt we stil gɛt di chans fɔ lɛf di bad tin dɛn we dɛn de du ɛn kam bi Gɔd in padi. Jiova nɔ want ɛnibɔdi fɔ day di tɛm we i go kam jɔj. (Pita In Sɛkɔn Lɛta 3:​9, NW) So we tɛm stil de, i fayn fɔ lɛ wi prich di mɛsej we de wɔn ɔlman ɛn ɛp bɔku bɔku pipul dɛn fɔ kam bɛnifit frɔm dis sɔri-at we Gɔd gɛt.

7, 8. Wetin mek wan famili bin biliv se Jiova de sho sɔri-at fɔ dɛn?

⁷ Tide, bɔku pan Jiova in savant dɛn dɔn bɛnifit frɔm in sɔri-at we i de sho. Fɔ ɛgzampul, insay di ia 1990 na Bɔznia, difrɛn difrɛn trayb dɛn bin de fɛt ɛn kil dɛnsɛf. Wan famili wit dɛn 12 ia ol bɔbɔ we wi go kɔl Milan bin de de. Milan, in brɔda, dɛn mama ɛn papa, ɛn ɔda Witnɛs dɛn bin de travul insay wan bɔs de kɔmɔt na Bɔznia fɔ go na Sabia. Dɛn bin de go kɔnvɛnshɔn, usay Milan in mama ɛn papa go baptayz. We dɛn rich di bɔda, sɔm sojaman dɛn bin si se dis famili bin de tɔk difrɛn langwej ɛn dɛn bin mek dɛn kam dɔŋ di bɔs. Dɔn dɛn bin alaw di ɔda brɔda dɛn fɔ go wit di bɔs. Di sojaman dɛn nɔ bin lɛf di famili fɔ go fɔ tu dez. Dɔn di ɔfisa we bin de oba dɛn bin kɔl dɛn bigman ɛn aks am wetin fɔ du wit dɛn. Di famili bin tinap nia dɛn ɛn dɛn yɛri we dɛn bigman de tɛl am se, “Jɔs kɛr dɛn go ɛn shut dɛn!”

⁸ Di tɛm we di sojaman dɛn bin de tɔk, na in tu strenja dɛn kam mit di famili. Dɛn tɛl dɛn saful wan na dɛn yes se dɛn na Jiova Witnɛs dɛn ɛn dɛn brɔda dɛn we bin de na di bɔs dɔn tɛl dɛn wetin apin. Di tu Witnɛs dɛn bin tɛl Milan ɛn in brɔda fɔ go insay dɛn motoka so dat dɛn go krɔs di bɔda bikɔs di sojaman dɛn nɔ de chɛk pikin dɛn pepa. Dɛn brɔda ya tɛl Milan in mama ɛn papa fɔ pas biɛn di chɛk pɔynt ɛn mit dɛn na di ɔda say. Milan bin rili fred, i nɔ bin no if i fɔ kray ɔ laf. In mama ɛn papa bin aks se, “Yu tink se dɛn go jɔs mek wi go lɛk dat?” Bɔt as dɛn de waka de go, i bin tan lɛk se di sojaman dɛn nɔ de ivin si dɛn. Milan ɛn in brɔda bin mit dɛn mama ɛn papa na di ɔda say na di bɔda, ɛn dɛn bin go di kɔnvɛnshɔn. Dɛn bin biliv tranga wan se na Jiova ansa dɛn prea! Wi no frɔm di Baybul se nɔto ɔltɛm Jiova kin protɛkt in savant dɛn da kayn we de. (Di Apɔsul Dɛn Wok [Akt] 7:​58-60) We dis bin apin, Milan bin tɔk se:  “I tan lɛk se di enjɛl dɛn bin blaynd di sojaman dɛn yay ɛn Jiova bin sev wi.”—Sam 97:​10.

9. Aw Jizɔs bin fil we i si di krawd we bin de fala am? (Luk di pikchɔ nia dis atikul in taytul.)

⁹ Jizɔs bin sho di bɛst ɛgzampul bɔt sɔri-at. I bin sɔri fɔ di pipul dɛn bikɔs “dɛn bin kɔnfyus ɛn dɛn nɔ bin ebul fɔ ɛp dɛnsɛf, jɛs lɛkɛ ship we nɔ gɛt shɛpad fɔ mɛn dɛn.” So wetin Jizɔs bin du? “I bigin fɔ lan dɛn plɛnti tin.” (Matyu 9:​36; rid Mak 6:​34.) Bɔt di Faresi dɛn nɔ bin gɛt sɔri-at, ɛn dɛn nɔ bin de ɛp di pipul dɛn. (Matyu 12:​9-14; 23:​4; Jɔn 7:​49) Yu rili want fɔ ɛp pipul dɛn ɛn tich dɛn bɔt Jiova jɔs lɛk Jizɔs?

10, 11. Yu tink se wi fɔ sho sɔri-at pan ɔltin? Ɛksplen.

¹⁰ Dis nɔ min se wi fɔ sho sɔri-at pan ɔltin. Fɔ ɛgzampul, i go bi se Kiŋ Sɔl bin de tink se i de sho sɔri-at we i nɔ bin kil di kiŋ na Amalɛk we nem Egag we na bin Gɔd in pipul dɛn ɛnimi. Dɔn Sɔl nɔ bin kil ɔl di Amalɛkayt dɛn animal dɛn. Bɔt Jiova bin dɔn tɛl Sɔl fɔ kil ɔl di Amalɛkayt dɛn ɛn ɔl dɛn animal dɛn. Bikɔs Sɔl nɔ bin du wetin Jiova want, Gɔd nɔ bin want am igen fɔ bi kiŋ. (Fɔs Samiɛl 15:​3, 9, 15) Jiova na Jɔj we de du di rayt tin. I no wetin de na pipul dɛn at, ɛn i no ustɛm fɔ sho sɔri-at. (Lamɛnteshɔn 2:​17; Izikɛl 5:​11) I nɔ go te igen i go jɔj ɔl di wan dɛn we nɔ de du wetin i want. (Sɛkɛn Lɛta Fɔ Tɛsalonayka 1:​6-10) Nɔto da tɛm de Jiova go sɔri fɔ di wikɛd wan dɛn. Bɔt we Jiova go dɔnawe wit dɛn, i go sho se i gɛt sɔri-at fɔ di wan dɛn we de du wetin i want bay we i go sev dɛn.

¹¹ Na tru se nɔto wi go jɔj di wan dɛn we go sev ɔ we go day. Bɔt wi nid fɔ du ɔl wetin wi ebul fɔ ɛp pipul dɛn. Us we dɛn wi kin sho se wi gɛt sɔri-at fɔ ɔda pipul dɛn? Dis na sɔm we dɛn we wi go ɛp dɛn.

12. Aw yu go sho sɔri-at bay di we aw yu de trit ɔda pipul dɛn?

¹² Ɛp pipul dɛn ɛvride. Jiova want fɔ lɛ Kristian dɛn sho se dɛn gɛt sɔri-at fɔ dɛn neba dɛn ɛn fɔ dɛn brɔda ɛn sista dɛn. (Jɔn 13:​34, 35; Pita In Fɔs Lɛta 3:​8) Wan we fɔ sho sɔri-at, na “fɔ sɔfa togɛda.” Pɔsin we gɛt sɔri-at de tray fɔ ɛp pipul dɛn we de sɔfa. So wi fɔ luk fɔ we dɛn fɔ ɛp ɔda pipul dɛn, lɛk fɔ ɛp dɛn fɔ du wok ɔ fɔ go sɔnsay fɔ dɛn.—Matyu 7:​12.

13. Wetin Gɔd in pipul dɛn kin du afta we bad bad tin lɛk atkwek ɔ ebi ren kin apin?

¹³ Ɛp pipul dɛn we de sɔfa. We wi de si we pipul dɛn de sɔfa bikɔs bad bad tin dɛn lɛk atkwek, ebi ren, big briz we de pwɛl ples de apin, wi want fɔ sho se wi gɛt sɔri-at fɔ dɛn. Bɔku pipul dɛn sabi Jiova Witnɛs dɛn as pipul dɛn we de ɛp ɔda pipul dɛn we dɛn tin  ya kin apin. (Pita In Fɔs Lɛta 2:​17) Fɔ ɛgzampul, insay 2011 wan Jepaniz sista bin de na wan eria usay atkwek apin ɛn bɔku bɔku wata bin kɔmɔt na di si. Dis sista bin tɔk se i bin “rili gladi ɛn gɛt kɔrej” we i si bɔku pan in brɔda ɛn sista dɛn we kɔmɔt na difrɛn say dɛn na Jepan ɛn ɔda kɔntri dɛn we kam fɔ mek dɛn os ɛn Kiŋdɔm Ɔl dɛn. I bin tɔk bak se: “Dis tin we apin, ɛp mi fɔ no se Jiova bisin. Ɛn mi kɔmpin Witnɛs dɛn bisin bɔt dɛnsɛf. Bɔku pan wi brɔda ɛn sista dɛn ɔlsay na di wɔl de pre fɔ wi.”

14. Aw yu go ɛp di wan dɛn we sik ɛn we dɔn ol?

¹⁴ Ɛp dɛn wan dɛn we sik ɛn we ol. We wi si pipul dɛn de sɔfa bikɔs dɛn sik ɔ dɛn dɔn ol, wi kin sɔri fɔ dɛn. Wi kin rili want fɔ si di tɛm we ɔl dɛn prɔblɛm ya go dɔn, so wi kin pre fɔ lɛ Gɔd in Kiŋdɔm kam. Bɔt as wi de wet, wi de du ɔl wetin wi ebul fɔ ɛp dɛn wan dɛn we sik ɛn we dɔn ol. Wan man we de rayt buk bin rayt se wande in mama we dɔn ol ɛn we bin gɛt wan sik we dɛn kɔl Alzima diziz, bin mɛs-ɔp insɛf. We i bin de tray fɔ klin insɛf, i yɛri di bɛl na in domɔt ring. Na di tu Jiova Witnɛs dɛn we bin de kam fɛn am bin de na di domɔt. Di tu sista dɛn bin aks am if i want mek dɛn ɛp am. Di mami bin se: “I shemful bɔt yɛs una kin ɛp mi.” Di sista dɛn bin ɛp am fɔ klin insɛf. Dɔn dɛn mek ti fɔ am  ɛn sidɔm smɔl fɔ tɔk wit am. Di mami in bɔy pikin bin rili gladi ɛn i bin tɔk se di Witnɛs dɛn de “du wetin dɛn de prich.” Yu tink se di we aw yu de sɔri fɔ di wan dɛn we sik ɛn di wan dɛn we ol de mek yu du ɔl wetin yu ebul fɔ ɛp dɛn?—Lɛta Fɔ Filipay 2:​3, 4.

15. Aw wi prichin wok de ɛp ɔda pipul dɛn?

¹⁵ Ɛp pipul dɛn fɔ no Jiova. Di bɛst we we wi kin ɛp pipul dɛn na fɔ tich dɛn bɔt Gɔd ɛn in Kiŋdɔm. Wan ɔda we na fɔ ɛp dɛn fɔ si wetin mek i fayn fɔ obe Jiova in lɔ dɛn. (Ayzaya 48:​17, 18) Di prichin wok na wɔndaful we fɔ sho se wi ɔnɔ Jiova ɛn fɔ sho se wi gɛt sɔri-at fɔ ɔda pipul dɛn. Yu tink se yu go du mɔ na di prichin wok?—Fɔs Lɛta To Timoti 2:​3, 4.

16. Us bɛnifit wi go gɛt we wi sho se wi gɛt sɔri-at?

¹⁶ Wan masta sabi bukman we stɔdi bɔt aw pɔsin kin fil ɛn biev bin tɔk se fɔ sho sɔri-at kin mek yu gɛt wɛlbɔdi ɛn gud padi biznɛs wit ɔda pipul dɛn. We yu de ɛp di wan dɛn we de sɔfa, yu go gɛt gladi at, yu gɛt mɔ op, yu nɔ go de fil se na yu wangren de, ɛn yu nɔ go de fil bad. Fɔ sho sɔri-at gud fɔ yu. (Lɛta Fɔ Ɛfisɔs 4:​31, 32) We lɔv de mek we ɛp ɔda pipul dɛn, wi go gɛt gud kɔnshɛns bikɔs wi no se wi de du wetin Jiova want wi fɔ du. Sɔri-at go ɛp wi fɔ bi gud mama ɛn papa, gud maredman ɛn uman, ɛn gud padi. Dɔn bɔku tɛm, ɔda pipul dɛn kin ɛp di wan dɛn we de sho sɔri-at fɔ ɔda pɔsin.—Rid Matyu 5:​7; Lyuk 6:​38.

17. Wetin mek wi want fɔ bi pɔsin we de sho sɔri-at?

¹⁷ Pan ɔl we wi de bɛnifit we wi sho sɔri-at, di men rizin we mek wi de sho se wi gɛt sɔri-at na bikɔs wi want fɔ falamakata Jiova, ɛn wi want fɔ briŋ prez to am. Na frɔm am lɔv ɛn sɔri-at kɔmɔt. (Prɔvabs 14:​31) Na in sɛt di bɛst ɛgzampul fɔ wi. So lɛ wi du ɔl wetin wi ebul fɔ falamakata Gɔd bay we wi de sho se wi gɛt sɔri-at. Dɔn wi go kam nia wi brɔda ɛn sista dɛn mɔ ɛn mɔ ɛn gɛt gud padi biznɛs wit ɔda pipul dɛn we de arawnd wi.—Lɛta Fɔ Galeshya 6:​10; Jɔn In Fɔs Lɛta 4:​16.