1. Aw di we aw di pipul dɛn na di wɔl de tink bɔt dɛnsɛf nɔmɔ kin afɛkt di we aw wi de put wisɛf dɔŋ?

WETIN mek i nɔ izi fɔ du wetin wi de lan frɔm Gɔd in Wɔd? Wan rizin na bikɔs if wi want fɔ du wetin rayt, wi nid fɔ put wisɛf dɔŋ. Insay dis las dez we wi de, i nɔ izi fɔ mek wi kɔntinyu fɔ put wisɛf dɔŋ, bikɔs bɔku pipul dɛn we de arawnd wi “de mɛmba dɛnsɛf nɔmɔ, dɛn go want ɔltin, dɛn go de bost ɛn dɛn go prawd,” ɛn “dɛn nɔ go ebul kɔntrol dɛnsɛf.” (Sɛkɛn Lɛta To Timoti 3:​1-3) As Gɔd in savant dɛn, wi no se i bad fɔ biev dis kayn we, bɔt i kin tan lɛk se di wan dɛn we de biev dis kayn we de go bifo ɛn dɛn kin rili ɛnjɔy dɛn layf. (Sam 37:​1; 73:​3) Wi go de ivin aks wisɛf se: ‘I rili mek sɛns fɔ put wetin ɔda pipul dɛn want bifo wetin a want? If a put misɛf dɔŋ, pipul dɛn go stil rɛspɛkt mi?’ (Lyuk 9:​48) If wi alaw di we aw pipul dɛn na di wɔl de tink bɔt dɛnsɛf nɔmɔ fɔ afɛkt wi, dat go ambɔg di tayt padi biznɛs we wi gɛt wit wi brɔda dɛn ɛn dat go mek i nɔ go izi fɔ ɔda pipul dɛn fɔ no se wi na Kristian dɛn. Bɔt we wi stɔdi bɔt Gɔd  in savant dɛn we bin put dɛnsɛf dɔŋ ɛn wi falamakata dɛn, wi go bɛnifit.

2. Wetin wi go lan frɔm Gɔd in fetful savant dɛn we bin de trade trade?

² Wetin bin ɛp Gɔd in fetful savant dɛn we bin de trade trade fɔ bi in padi dɛn? Aw dɛn bin mek i gladi? Aw dɛn bin gɛt di trɛnk fɔ du wetin rayt? We wi rid bɔt dɛn ɛgzampul na di Baybul ɛn tink gud gud wan bɔt wetin wi de rid, dat de mek wi fet strɔng mɔ ɛn mɔ.

3, 4. (a) Aw Jiova de tich wi? (b) Wetin mek i nɔ du fɔ jɔs lan bɔt sɔntin fɔ mek wi fet kɔntinyu fɔ strɔng?

³ Jiova de gi wi wetin wi nid fɔ kɔntinyu fɔ gɛt strɔng fet. Wi de gɛt trenin ɛn fayn advays dɛn frɔm di Baybul, wi buk ɛn magazin dɛn, wi wɛbsayt, JW TV, ɛn wi mitin ɛn asɛmbli dɛn. Bɔt Jizɔs bin tɛl wi se wi nɔ fɔ jɔs lan bɔt sɔntin. Ɔda tin de we wi fɔ du. I bin tɔk se: “Mi yon it na fɔ dɔn di wok we di wan we sɛn mi gi mi fɔ du, ɛn fɔ du ɔl wetin i want.”—Jɔn 4:​34.

⁴ Fɔ du Gɔd in wok bin tan lɛk it fɔ Jizɔs. Gud it de mek wi fil gud ɛn mek wi bɔdi fayn. Semweso, wi fet go strɔng we wi de du wetin Gɔd want. Fɔ ɛgzampul, yu ɛva go fɔ mitin fɔ fil savis taya taya wan bɔt afta we yu dɔn fɔ prich yu fil fayn ɛn gladi?

5. Aw wi go bɛnifit we wi gɛt sɛns?

⁵ We wi du wetin Jiova de tɛl wi fɔ du, wi de sho se wi gɛt sɛns. (Jems 3:​13) Ɛn bɔku gud tin dɛn de apin to di wan dɛn we gɛt sɛns. Di Baybul se: “Natin nɔ de we tan lɛk sɛns. . . . Sɛns tan lɛkɛ tik we de gi lɔŋ layf to dɛn wan we gɛt am; i fayn fɔ udat gɛt sɛns.” (Prɔvabs 3:​13-18) Jizɔs bin se: “We una dɔn no dat, una go gɛt big blɛsin if una du wetin a tɛl una fɔ du.” (Jɔn 13:​17) Jizɔs in disaypul dɛn go gladi wans dɛn de du wetin Jizɔs de tɛl dɛn fɔ du. Dɛn bin de fala in tichin ɛn in ɛgzampul te dɛn day.

6. Wetin mek wi nid fɔ kɔntinyu fɔ de du wetin wi de lan?

⁶ Tide, wisɛf nid fɔ kɔntinyu fɔ du wetin wi de lan. Tink bɔt wokman we sabi du in wok, gɛt in tul dɛn, ɛn matirial dɛn we i de yuz fɔ wok. Dɛn tin dɛn de go ɛp am fɔ bi gud wokman if nɔmɔ i yuz dɛn. I go gɛt bɔku ɛkspiriɛns, bɔt i nid fɔ kɔntinyu fɔ de du wetin i dɔn lan if i stil want fɔ bi gud wokman. Semweso, di fɔstɛm we wi bin lan di trut, wi bin gladi bikɔs wi bin du wetin wi de rid frɔm di Baybul. Bɔt fɔ mek wi kɔntinyu fɔ gɛt gladi-at, ɛvride wi nid fɔ de du wetin Jiova de tich wi.

7. Wetin wi fɔ du fɔ lan frɔm di ɛgzampul dɛn na di Baybul?

⁷ Insay dis atikul, wi go tɔk bɔt sɔm tin dɛn we kin apin we kin mek i nɔ izi fɔ mek wi kɔntinyu fɔ put wisɛf dɔŋ. Wi go lan bɔt aw Gɔd in fetful savant dɛn we bin de trade bin kɔntinyu fɔ put dɛnsɛf dɔŋ. Bɔt in nɔ jɔs du fɔ rid sɔntin bɔt dɛn. Wi fɔ tink bɔt wetin wi de rid ɛn du am.

8, 9. Frɔm wetin de na Di Apɔsul Dɛn Wok [Akt] 14:​8-15, wetin wi lan bɔt di we aw Pɔl bin put insɛf dɔŋ? (Luk di pikchɔ nia dis atikul in taytul.)

⁸ Gɔd want ɔlkayn pipul dɛn fɔ “sev ɛn mek dɛn no wetin tru.” (Fɔs Lɛta To  Timoti 2:​4) Aw yu de si ɔl di pipul dɛn we nɔ lan di trut yet? Di apɔsul Pɔl bin prich to pipul dɛn we bin dɔn no sɔntin bɔt Jiova. Bɔt i bin prich bak to pipul dɛn we bin de wɔship lay lay gɔd dɛn. Fɔ prich to dɛn pipul dɛn de, de sho if Pɔl bin ɔmbul ɔ if i nɔ ɔmbul. Aw?

⁹ Di fɔstɛm we Pɔl bin go du in mishɔnari wok, in ɛn Banabas bin go na wan siti we dɛn kɔl Listra. Di pipul dɛn we bin de na Likionia bin trit Pɔl ɛn Banabas lɛk pipul dɛn we rili spɛshal ɛn dɛn bin gi dɛn dɛn lay lay gɔd dɛn nem dɛn we na Zus ɛn Amis. Dat bin fulɔp Pɔl ɛn Banabas dɛn yay? Fɔ se dɛn bin si dis as fayn tin we dɛn tink bɔt di we aw dɛn bin dɔn mek dɛn sɔfa na di tu siti dɛn we dɛn bin dɔn de go? Fɔ se dɛn bin tink se ɔl dɛn tin ya go ɛp mɔ pipul dɛn fɔ lisin to di gud nyuz? Nɔ! Pɔl ɛn Banabas nɔ gladi bɔt dat ɛn dɛn bin ala se: “Wetin mek una de du dɛn tin ya? Wi na mɔtalman lɛkɛ unasɛf!”—Di Apɔsul Dɛn Wok [Akt] 14:​8-15.

10. Wetin mek Pɔl ɛn Banabas nɔ bin fil se dɛn impɔtant pas di pipul dɛn na Likionia?

¹⁰ We Pɔl ɛn Banabas bin tɔk se dɛnsɛf na mɔtalman dɛn, dat min se dɛnsɛf nɔ pafɛkt. Dɛn nɔ bin min se di we aw dɛn de wɔship ɛn di we aw di pipul dɛn na Likionia de wɔship na di sem. Na Gɔd bin sɛn Pɔl ɛn Banabas as mishɔnari dɛn. (Di Apɔsul Dɛn Wok [Akt] 13:​2) Dɛn bin dɔn anɔynt dɛn wit di oli spirit ɛn dɛn gɛt wɔndaful op. Bɔt dat nɔ fɔ mek dɛn fil se dɛn impɔtant. Dɛn bin no se dɛn pipul dɛn de kin gɛt di op fɔ go na ɛvin if dɛn lisin to di gud nyuz.

11. Aw wi go put wisɛf dɔŋ lɛk Pɔl we wi de prich?

¹¹ Lɛ wi tɔk bɔt di fɔs we aw wi go sho se wi ɔmbullɛk Pɔl. Wi nɔ fɔ ɛva tink se di wok we wi gɛt fɔ prich ɔ di tin dɛn we Jiova de ɛp wi fɔ du de mek wi spɛshal. Wi kin aks wisɛf dɛn kwɛstyɔn dɛn ya: ‘Aw a de fil bɔt di pipul dɛn na di eria usay a de prich? Fɔ se sɔm pipul dɛn de we a nɔ lɛk na di eria usay a de prich?’ Ɔlsay na di wɔl, Jiova Witnɛs dɛn de tray fɔ fɛn pipul dɛn we want fɔ lisin to di gud nyuz. Sɔm pan dɛn de tray tranga wan fɔ lan di langwej ɔ di kɔstɔm we sɔm pipul dɛn gɛt we ɔda pipul dɛn kin tink se dɛn nɔ impɔtant. Bɔt dɛn nɔ de ɛva tink se dɛn impɔtant pas di pipul dɛn we dɛn de prich to. Bifo dat, dɛn de tray fɔ ɔndastand pipul dɛn wan bay wan so dat dɛn go ɛp bɔku pipul dɛn fɔ lisin to di Kiŋdɔm mɛsej.

12. Aw Ɛpafras bin sho se i rili bisin bɔt ɔda pipul dɛn?

¹² Di sɛkɔn we we wi go sho se wi ɔmbul na we wi de pre fɔ wi brɔda ɛn sista dɛn, we gɛt fet jɔs lɛk wi. (Pita In Sɛkɛn Lɛta 1:​1) Na dat Ɛpafras bin du. Na tri tɛm nɔmɔ di Baybul tɔk bɔt am. We dɛn bin arɛst Pɔl ɛn kip am na in os na Rom, i bin rayt to di Kristian dɛn na Kɔlɔse, ɛn tɔk bɔt Ɛpafras se: “I de pre fɔ una wit ɔl in at.” (Lɛta Fɔ Kɔlɔse 4:​12) Ɛpafras bin sabi di brɔda dɛn gud gud wan, ɛn i bin rili bisin bɔt dɛn. Pɔl bin kɔl am “Ɛpafras, we wi ɔl tu de jel,” so Ɛpafras bin gɛt in yon prɔblɛm dɛn. (Faylimɔn 23) Bɔt i bin stil bisin  bɔt ɔda pipul dɛn ɛn i bin de du sɔntin fɔ ɛp dɛn. Ɛpafras bin de pre fɔ in brɔda ɛn sista dɛn, i bin de ivin kɔl dɛn nem dɛn, ɛn wisɛf kin du di sem tin tide. Dɛn kayn prea dɛn ya kin rili pawaful.—Sɛkɛn Lɛta Fɔ Kɔrint 1:​11; Jems 5:​16.

13. Aw yu go falamakata Ɛpafras we yu de pre?

¹³ Tink bɔt sɔmbɔdi we yu go want fɔ kɔl in nem we yu de pre. I go bi se yu u sabi padi dɛn na di kɔngrigeshɔn ɔ yu fambul dɛn we gɛt prɔblɛm dɛn. Sɔntɛm dɛn gɛt fɔ disayd bɔt tin dɛn we nɔ rili izi fɔ dɛn ɔ sɔntin de tɛmt dɛn we i nɔ izi fɔ dɛn fɔ tinap tranga wan. Yu kin pre bak fɔ brɔda dɛn, we dɛn nem de na jw.org insay wan atikul we nem “Jehovah’s Witnesses Imprisoned for Their Faith.” (Luk ɔnda NEWSROOM > LEGAL DEVELOPMENTS.) Yu kin pre bak fɔ di wan dɛn we dɛn fambul dɔn day, di wan dɛn we de na say we atkwɛk, ebi ebi ren, ɔ big big briz dɔn jɔs apin, ɛn di wan dɛn we gɛt mɔni prɔblɛm. Bɔku brɔda ɛn sista dɛn de we nid wi prea! We wi pre fɔ dɛn, wi de sho se wi nɔ jɔs bisin bɔt wisɛf bɔt wi bisin bɔt ɔda pipul dɛn. (Lɛta Fɔ Filipay 2:​4) Jiova de lisin to dɛn kayn prea dɛn de!

14. Wetin mek Jiova na di bɛst pɔsin we de lisin?

¹⁴ Di tɔd we we wi go sho se wi ɔmbul na bay we wi de lisin. Jems 1:​19 tɛl wi se ‘wi fɔ shap wi yes fɔ lisin.’ Jiova na di bɛst pɔsin we de lisin. (Jɛnɛsis 18:​32; Jɔshwa 10:​14) Fɔ ɛgzampul, rid wetin de na Ɛksodɔs 32:​11-14. (Rid.) Jiova bin alaw Mozis fɔ tɔk bɔt aw i de fil, pan ɔl we nid nɔ bin de fɔ lɛ i du dat. Yu tink se yu go tek tɛm lisin to sɔmbɔdi we nɔ kin tɛl yu di rayt tin ɛn fala wetin i se? Bɔt Jiova de tek tɛm lisin to ɔl di wan dɛn we de pre to am wit fet.

15. Aw wi go falamakata Jiova bay we wi de ɔnɔ ɔda pipul dɛn?

 ¹⁵ Aks yusɛf dɛn kwɛstyɔn dɛn ya: ‘If Jiova rili ɔmbul ɛn i de lisin to pipul dɛn lɛk di we aw i bin lisin to Ebraam, Rechɛl, Mozis, Jɔshwa, Manoa, Ilayja, ɛn Ɛzikaya, misɛf nɔ fɔ tray fɔ du di sem tin? A kin ɔnɔ ɔl mi brɔda dɛn bay we a de lisin to dɛn ɛn fala wetin dɛn se if nid de? Ɛnibɔdi de na mi kɔngrigeshɔn ɔ na mi famili we a go nid fɔ lisin to mɔ? Wetin a go du bɔt dat?’—Jɛnɛsis 30:​6; Di Jɔj Dɛm 13:​9; Fɔs Kiŋ 17:​22; Sɛkɛn Kronikul 30:​20.

16. Wetin Kiŋ Devid bin du we Shimɛay bin trit am bad?

¹⁶ We wi put wisɛf dɔŋ dat kin ɛp wi bak fɔ kɔntrol wisɛf we ɔda pipul dɛn trit wi bad. (Lɛta Fɔ Ɛfisɔs 4:​2) Wi go lan wan fayn ɛgzampul bɔt dat na Sɛkɛn Samiɛl 16:​5-13. (Rid.) Shimɛay we na bin wan pan Kiŋ Sɔl in fambul bin tɔk bad bɔt Devid ɛn i bin atak in ɛn in savant dɛn. Devid bin fɔ dɔn stɔp Shimɛay, bɔt i nɔ bin du am. Bifo dat, i peshɛnt ɛn bia di bad tin dɛn we Shimɛay bin tɔk bɔt am. Aw Devid bin ebul fɔ kɔntrol insɛf da kayn we de? Wi go no bɔt dat bay we wi tek tɛm stɔdi wetin de na di nɔmba tri Sam.

17. Wetin bin ɛp Devid fɔ kɔntrol insɛf? Aw wi go falamakata am?

¹⁷ Devid bin rayt di nɔmba tri Sam we in pikin Absalɔm bin de tray fɔ kil am. Na insay dis tɛm Shimɛay bin atak Devid, bɔt i bin gɛt di trɛnk fɔ kɔntrol insɛf. Aw? Insay Sam 3:​4, Devid bin tɔk se: “A de kray lawd wan to PAPA GƆD [“Jiova,” NW] ɛn i de ansa mi frɔm in oli il.” We pipul dɛn trit wi bad, wi nid fɔ pre jɔs lɛk Devid. Dɔn Jiova go gi wi in oli spirit so dat wi go ebul bia. Yu tink se yu fɔ kɔntrol yusɛf mɔ, ɔ yu fɔ kɔntinyu fɔ fɔgiv ɔda pipul dɛn we dɛn trit yu bad? Yu biliv se Jiova bisin we i de si yu de sɔfa ɛn i go ɛp ɛn blɛs yu?

18. Aw wi go bɛnifit if wi du wetin Jiova de tɛl wi?

¹⁸ We wi du wetin wi no se rayt, wi go gɛt sɛns ɛn Jiova go blɛs wi. Di Baybul tɔk na Prɔvabs 4:​7 se: “Fɔ gɛt sɛns pas ɛni ɔda tin na [di] wɔl.” Pan ɔl we sɛns gɛt fɔ du wit wetin wi no, i nɔ jɔs min fɔ ɔndastand tin dɛn. I gɛt fɔ du wit di tin dɛn we wi de disayd fɔ du. Ivin anch dɛn de sho se dɛn gɛt sɛns bay we dɛn kin kip tin fɔ it fɔ ren sizin. (Prɔvabs 30:​24, 25) Krays, we dɛn kɔl “Gɔd in sɛns” de du wetin in Papa want ɔltɛm. (Fɔs Lɛta Fɔ Kɔrint 1:​24; Jɔn 8:​29) Gɔd go blɛs wi if wi bak sho se wi gɛt sɛns bay we wi de disayd fɔ du wetin rayt ɛn kɔntinyu fɔ put wisɛf dɔŋ. (Rid Matyu 7:​21-23.) So kɔntinyu fɔ wok tranga wan fɔ mek di kɔngrigeshɔn bi ples we ɔlman de sav Jiova fetful wan. Wi nid fɔ peshɛnt ɛn no se i kin tek tɛm fɔ mek wi du wetin wi no se rayt. Bɔt we wi du dat, wi de sho se wi ɔmbul ɛn we wi ɔmbul, wi go gɛt gladi-at naw ɛn sote go.