IF YU want fɔ no di tɛm, wetin yu go du? I go mɔs bi se yu go wach yu wɔch ɔ yu klok. Fɔ ɛgzampul, yu go si se na af pas wan. Wetin yu go tɛl yu padi if i aks yu se, “Ɔmɔs oklok naw?”

Wɛl, di ansa gɛt fɔ du wit usay yu de. Fɔ ɛgzampul, yu go tɛl am, “Na 1:​30” ɔ yu go se “af pas wan.” Na sɔm ples dɛn yu go se, “I dɔn lɛf 30 minit fɔ lɛ i tu oklok.”

Aw pipul dɛn bin de sho tɛm di tɛm we dɛn bin de rayt di Baybul? Dɛn bin gɛt pas wan we. Di Ibru Skripchɔ gɛt wɔd dɛn lɛk “mɔnin,” “aftanun,” “sansan tɛm,” ɛn “ivin tɛm.” (Jɛnɛsis 8:​11; 19:​27; 43:​16; Ditarɔnɔmi 28:​29; Fɔs Kiŋ 18:​26) Bɔt sɔntɛnde, di Baybul kin yuz patikyula wɔd dɛn.

Insay di Izrɛlayt dɛn tɛm, na bin kɔmɔn tin fɔ gɛt wachman dɛn, mɔ na nɛt. Di Izrɛlayt dɛn bin sheb di nɛt to tri pat. Di Jɔj Dɛm 7:​19, tɔk bɔt arawnd “twɛlv na nɛt.” Arawnd di tɛm we dɛn bɔn Jizɔs, di Ju dɛn bin de sheb di nɛt to 4 pat, jɔs lɛk aw di Grik ɛn di Roman pipul dɛn bin de du.

Di Gɔspɛl dɛn tɔk bɔt dɛn tɛm dɛn ya bɔku tɛm. Fɔ ɛgzampul, di Baybul tɔk se “midul nɛt bay tri oklok,” Jizɔs waka pantap wata fɔ go mit in disaypul dɛn.—Matyu 14:​25.

Jizɔs bin de tɔk bɔt ɔl di 4 pat dɛn we dɛn sheb di nɛt, di tɛm we i bin de tɛl in apɔsul dɛn nɔ fɔ slip bikɔs dɛn ‘nɔ no di tɛm we dɛn masta go kam; dɛn nɔ no if i go kam midul nɛt, ivintɛm, ali mɔnin, ɔ wɛn mɔnin dɔn go fa lili bit.’ (Mak 13:​35) Di fɔs pat na “ivintɛm” we na frɔm di tɛm we di san de go dɔŋ to arawnd nayn oklok na nɛt. Di sɛkɔn pat, we na “midul nɛt,” na frɔm arawnd nayn oklok na nɛt to twɛlv oklok. Di tɔd pat we na “ali mɔnin” ɔ we “fɔl kro” na frɔm twɛlv oklok to arawnd tri oklok na mɔnin. I go mɔs bi se na arawnd di tɛm we fɔl kin kro na in dɛn bin arɛst Jizɔs. (Mak 14:​72) Di nɔmba 4 pat na we “mɔnin dɔn go fa lili bit,” dat na frɔm tri oklok na mɔnin to di tɛm we di san de kɔmɔt.

So pan ɔl we pipul dɛn we bin de da tɛm de nɔ bin gɛt klok ɔ wɔch lɛk di wan dɛn we wi gɛt tide, dɛn bin gɛt we fɔ no tɛm.