1. Wetin wi ɔl want fɔ wi fambul dɛn?

WAN sista we nem Pɔlin * bin tɔk se: “Frɔm di tɛm we a lan di trut, a bin want ɔlman na mi famili fɔ de wit mi na Paradays. A bin want mi man we nem Wen, ɛn mi smɔl bɔypikin fɔ jɔyn mi fɔ sav Jiova.” Yusɛf gɛt fambul dɛn we nɔ sabi ɛn lɛk Jiova yet? Yu go mɔs de fil di sem we lɛk aw Pɔlin bin fil bɔt in famili.

2 Us kwɛstyɔn dɛn wi go tɔk bɔt insay dis atikul?

² Wi nɔ go ebul fos wi fambul dɛn fɔ tek di trut, bɔt wi go ebul ɛnkɔrej dɛn fɔ lisin to di Baybul in mɛsej. (2 Tim. 3:​14, 15) Wetin mek wi fɔ prich to wi fambul dɛn? Wetin mek wi fɔ tray fɔ ɔndastand aw dɛn de fil? Wetin wi go du fɔ ɛp wi fambul dɛn fɔ lɛk Jiova lɛk aw wi lɛk am? Aw ɔlman na wi kɔngrigeshɔn go ɛp wi?

3. Frɔm wetin de na Pita in Sɛkɔn Lɛta 3:​9 (NW), wetin mek wi fɔ prich to wi fambul dɛn?

³ I nɔ go te igen, Jiova go dɔnawe wit dis wɔl. Na jɔs “di wan dɛn we rili sho se dɛn want fɔ gɛt layf we go de sote go” go sev. (Akt 13:​48, NW) Wi kin spɛn bɔku tɛm ɛn ɛnaji fɔ prich to pipul dɛn we wi nɔ sabi na di eria we wi de, so na nɔmal tin fɔ mek wi want fɔ prich to wi  fambul dɛn so dat dɛnsɛf go sav Jiova wit wi. Wi Papa we lɛk wi, Jiova “nɔ want ɛnibɔdi fɔ day, i want mek ɔlman ripɛnt.”—Rid Pita in Sɛkɔn Lɛta 3:​9, NW.

4. Us mistek wi kin mek we wi de prich to wi fambul dɛn?

⁴ Wi nid fɔ mɛmba se wi gɛt di rayt we ɛn di rɔŋ we fɔ prich di Kiŋdɔm mɛsej. Fɔ ɛgzampul, wi kin tek tɛm tɔk we wi de prich to sɔmbɔdi we wi nɔ sabi, bɔt sɔntɛm wi nɔ kin tek tɛm tɔk we wi de prich to wi fambul dɛn.

5. Wetin wi fɔ mɛmba bifo wi prich to wi fambul dɛn?

⁵ We wi tink bɔt di fɔstɛm we wi bin tray fɔ prich to wi fambul dɛn, bɔku pan wi go fil bad bɔt di we aw wi bin du am ɛn wi go wish se wi bin fɔ dɔn du am ɔda we. Di apɔsul Pɔl bin advays Kristian dɛn se: “Una fɔ de tɔk gud wɔd dɛn ɔltɛm; lɛ una wɔd dɛn tan lɛk sɔntin we dɛn sizin wit sɔl, so dat una go no aw fɔ ansa ɔlman.” (Kɔl. 4:​5, 6, NW) I gud fɔ lɛ wi mɛmba dis advays we wi de tɔk to wi fambul dɛn. If wi nɔ du dat, wi go ɛndɔp fɔ ɔfɛn dɛn bifo wi ɛp dɛn fɔ lisin to wi.

6-7. Gi wan ɛgzampul we de sho wetin mek i impɔtant fɔ mek wi tray fɔ ɔndastand wi man ɔ wi wɛf we nɔ de sav Jiova.

⁶ Tray fɔ ɔndastand aw dɛn de fil. Pɔlin we wi bin dɔn tɔk bɔt bin tɔk se: “Fɔs, a bin jɔs want fɔ tɔk to mi man bɔt Gɔd ɛn di Baybul. Wi nɔ bin de tɔk bɔt ɛni ɔda tin.” Bɔt Pɔlin in man, Wen, nɔ bin sabi bɔku tin bɔt di Baybul ɛn i nɔ bin de ɔndastand wetin Pɔlin bin de tɔk bɔt. To  Wen, i bin tan lɛk se ɔl wetin Pɔlin bin de tink bɔt na in rilijɔn. I bin de wɔri se Pɔlin de jɔyn wan bad bad kɔlt ɛn na ful dɛn de ful am.

⁷ Pɔlin bin gri se fɔ sɔm tɛm, i bin de spɛn mɔ tɛm dɛn ivintɛm ɛn wikɛnd wit in brɔda ɛn sista dɛn na mitin, fɔ du di prichin wok, ɔ fɔ go fɛn dɛn na dɛn os. Pɔlin bin tɔk se: “Sɔntɛnde, Wen kin kam na os ɛn i nɔ mit nɔbɔdi ɛn i kin fil lɛk se na in wangren de.” Wi si klia wan se Wen bin de mis in wɛf ɛn in bɔypikin. I nɔ bin sabi di pipul dɛn we dɛn de wit, ɛn i bin tan lɛk se in wɛf in nyu padi dɛn bin impɔtant pas in. So wetin Wen bin du? I bin trɛtin fɔ dayvɔs Pɔlin. Yu ebul tink bɔt sɔm we dɛn we Pɔlin bin fɔ tray fɔ ɔndastand di we aw in man bin de fil?

8. Frɔm wetin de na Pita In Fɔs Lɛta 3:​1, 2, wetin na wan impɔtant tin we kin ɛp wi fambul dɛn?

⁸ Sɛt gud ɛgzampul. Bɔku tɛm, wetin wi de du kin afɛkt wi fambul dɛn pas wetin wi de tɔk. (Rid Pita In Fɔs Lɛta 3:​1, 2.) As tɛm de go, Pɔlin bin kam fɔ ɔndastand dat. Pɔlin bin tɔk se: “A no se Wen lɛk wi ɛn i nɔ rili want fɔ dayvɔs mi. Bɔt di trɛtin we i trɛtin mi ɛp mi fɔ no se a nid fɔ bigin du wetin Jiova tɔk bɔt mared. Bifo a jɔs de tɔk tɔk nɔmɔ, a nid fɔ sɛt fayn ɛgzampul bay wetin a de du.” Pɔlin bin stɔp fɔ de fos Wen fɔ tɔk bɔt di Baybul, bɔt i bigin fɔ tɔk to am bɔt ɔda tin dɛn we de apin. Wen bin kam fɔ si se Pɔlin nɔ bin de mek plaba igen, ɛn i si se in pikin bin de biev fayn pas aw i bin de biev trade. (Prɔv. 31:​18, 27, 28) We Wen wach gud gud wan, i si se di mɛsej na di  Baybul dɔn ɛp in famili, ɛn dat mek i bin rɛdi fɔ lisin to Gɔd in Wɔd.—1 Kɔr. 7:​12-14, 16.

9. Wetin mek wi fɔ kɔntinyu fɔ tray fɔ ɛp wi fambul dɛn?

⁹ Kɔntinyu fɔ tray fɔ ɛp yu fambul dɛn. Jiova sɛt di ɛgzampul fɔ wi. Di Baybul tɛl wi se “ɔltɛm” Jiova de gi pipul dɛn di chans fɔ lisin to di gud nyuz ɛn gɛt layf. (Jɛr. 44:​4) Ɛn di apɔsul Pɔl bin tɛl Timoti fɔ kɔntinyu fɔ ɛp ɔda pipul dɛn. Wetin mek? Na bikɔs i go sev insɛf ɛn di wan dɛn we de lisin to am. (1 Tim. 4:​16) Wi lɛk wi fambul dɛn, so wi want dɛn fɔ no di tru tin dɛn we de na Gɔd in Wɔd. Afta sɔm tɛm, di tin dɛn we Pɔlin bin de tɔk ɛn du bin afɛkt in famili. Tide, i gladi bikɔs in ɛn in man de sav Jiova togɛda. Dɛn ɔl tu na payɔnia, ɛn Wen de sav as ɛlda.

10. Wetin mek wi nid fɔ peshɛnt?

¹⁰ Na fɔ peshɛnt. We wi disayd fɔ obe Gɔd, wi de chenj di we aw wi de liv wi layf ɛn di tin dɛn we wi biliv. We wi du dis, i nɔ kin izi fɔ lɛ wi fambul dɛn gri wit dɛn chenj dɛn ya we wi dɔn mek. Bɔku tɛm, di fɔs tin we dɛn go notis na we wi nɔ de jɔyn dɛn igen fɔ sɛlibret ɔlide dɛn we gɛt fɔ du wit lay lay rilijɔn, ɛn wi nɔ de put an pan ɛnitin we gɛt fɔ du wit pɔlitiks. Sɔm fambul dɛn kin vɛks pan wi fɔs. (Mat. 10:​35, 36) Wi nɔ fɔ tink se dɛn nɔ go ɛva chenj. If wi stɔp fɔ ɛp dɛn fɔ ɔndastand wetin wi biliv, i go tan lɛk se wi de jɔj dɛn se dɛn nɔ fit fɔ gɛt layf we go de sote go. Nɔto wi Jiova dɔn gi di wok fɔ jɔj pipul dɛn, na Jizɔs i dɔn gi da wok de. (Jɔn 5:​22) If wi peshɛnt, as tɛm de go wi fambul dɛn go rɛdi fɔ lisin to wi mɛsej.—Luk di bɔks we gɛt di taytul “ Yuz Wi Wɛbsayt fɔ Tich.”

11-13. Wetin wi lan frɔm di tin dɛn we Alis bin du fɔ ɛp in mama ɛn papa?

¹¹ Min wetin yu de tɔk bɔt tek tɛm tɔk am. (Prɔv. 15:​2) Lɛ wi tɔk bɔt Alis in ɛgzampul. Alis bin lan bɔt Jiova di tɛm we i bin de fa frɔm in mama ɛn papa na ɔda kɔntri. In mama ɛn papa nɔ biliv se Gɔd de ɛn dɛn an de pan pɔlitiks tigi tigi wan. I bin kam fɔ no se i nɔ fɔ westɛm fɔ tɛl dɛn bɔt di gud tin dɛn we i de lan. Alis tɔk se: “If yu westɛm fɔ tɛl yu fambul dɛn bɔt wetin yu biliv ɛn wetin yu de du, dis go mek dɛn shɔk pasmak.” I rayt lɛta dɛn to in mama ɛn papa fɔ aks dɛn wetin dɛn tink bɔt wetin di Baybul se pan tɔpik dɛn we i tink se dɛn go want fɔ no mɔ bɔt, lɛk lɔv. (1 Kɔr. 13:​1-13) I tɛl in mama ɛn papa tɛnki fɔ we dɛn mɛn am ɛn kia fɔ am, ɛn i sɛn gift dɛn fɔ dɛn. We i kin go fɛn in mama ɛn papa na dɛn os, i bin de du ɔl wetin i ebul fɔ ɛp in mama wit di os wok dɛn. Fɔs, in mama ɛn papa nɔ bin gladi we Alis tɛl dɛn bɔt di nyu tin dɛn we i biliv.

¹² We Alis kam de na os wit in mama ɛn papa, i kɔntinyu fɔ rid di Baybul ɛvride. Alis tɔk se: “Dis bin ɛp mi mama fɔ ɔndastand se di Baybul rili impɔtant to mi.” Da sem tɛm de, Alis in papa bin disayd fɔ lan sɔntin bɔt di Baybul so dat i go ɔndastand wetin mek in galpikin dɔn chenj di we aw i de tink, ɛn i bin want fɔ fɛn fɔlt wit di Baybul. Alis se: “A gi am wan Baybul, ɛn a rayt not to am pan di Baybul.” Wetin bin apin? Bifo Alis in papa fɛn fɔlt pan di Baybul, wetin i rid frɔm di Baybul bin rili tɔch in at.

¹³ Wi nid fɔ min wetin wi de tɔk pan ɔl we wi go tek tɛm tɔk am, ilɛksɛf wi go nid fɔ bia prɔblɛm dɛn. (1 Kɔr. 4:​12b)  Fɔ ɛgzampul, Alis bin nid fɔ bia bikɔs in mama nɔ bin gladi wit am. Alis se: “We a baptayz, Mɔm kɔl mi ‘bad pikin.’” Wetin Alis bin du? I tɔk se: “A nɔ avɔyd di prɔblɛm, bifo dat, a tek tɛm ɛksplen se a dɔn mekɔp mi maynd fɔ bi Jiova Witnɛs ɛn a go kɔntinyu wit wetin a dɔn disayd. A tray fɔ mek mi mama biliv gud gud wan se a rili lɛk am. Wi ɔl tu bin kray, ɛn a kuk fayn it fɔ am. Frɔm da tɛm de, mi mama bin stat fɔ gri se di Baybul de mek a bi bɛtɛ pɔsin.”

14. We wi dɔn disayd fɔ sav Jiova, wetin mek wi nɔ fɔ ɛva alaw wi fambul dɛn fɔ chenj dat?

¹⁴ Sɔntɛm, i go tek lɔng tɛm fɔ mek wi fambul dɛn ɔndastand gud gud wan se wi rili siriɔs fɔ sav Jiova. Fɔ ɛgzampul, we Alis bin disayd fɔ payɔnia ɛn nɔ du di wok we in mama ɛn papa bin want am fɔ du, in mama bin bigin fɔ kray bak. Bɔt Alis bin kɔntinyu fɔ tinap tranga wan. Alis tɔk se: “If yu givɔp we yu fambul dɛn de mɔna yu fɔ du sɔntin, dɛn go ebul yu pan ɔl ɔda tin dɛn. Bɔt if yu tek tɛm tɔk to dɛn fayn, sɔntɛm, sɔm pan dɛn go lisin to yu.” Na dat bin apin to Alis. Naw, in mama ɛn papa na payɔnia dɛn, ɛn in papa na ɛlda.

15. Frɔm wetin de na Matyu 5:​14-16 ɛn Pita In Fɔs Lɛta 2:​12, aw “di gud” tin dɛn we wi brɔda dɛn de du go ɛp wi fambul dɛn?

¹⁵ Jiova de yuz “di gud” tin dɛn we in savant dɛn de du fɔ briŋ pipul dɛn kam nia am. (Rid Matyu 5:​14-16; Pita In Fɔs Lɛta 2:​12.) If yu man ɔ wɛf nɔto Jiova Witnɛs, yu dɔn mek i mit wit di  brɔda ɛn sista dɛn na yu kɔngrigeshɔn? Pɔlin we wi bin tɔk bɔt fɔs bin invayt sɔm brɔda ɛn sista dɛn na in os so dat in man, Wen, go sabi dɛn. We Wen mɛmba aw wan brɔda bin ɛp am fɔ ɔndastand udat dɛn Jiova Witnɛs dɛn rili bi, i bin tɔk se: “I nɔ wok wan ol de jɔs fɔ kam wach gem wit mi. Ɛn dat mek a bigin tink se, ‘In na lɛk ɛni ɔda pɔsin!’”

16. Wetin mek wi fɔ invayt wi fambul dɛn fɔ go mitin?

¹⁶ Wan fayn we fɔ ɛp wi fambul dɛn na bay we wi invayt dɛn fɔ atɛnd mitin wit wi. (1 Kɔr. 14:​24, 25, NW) Di fɔs mitin we Wen bin atɛnd na di Mɛmorial, bikɔs na afta i kɔmɔt wok ɛn di program nɔ bin tu lɔng. Wen tɔk se: “A nɔ bin ɔndastand wetin dɛn tɔk, bɔt a mɛmba di pipul dɛn. Dɛn bin kam mit mi, dɛn wɛlkɔm mi, ɛn dɛn bin shek mi an fayn. A bin rili si se dɛn na gud pipul dɛn fɔ tru.” Wan maredman ɛn in wɛf bin dɔn de du gud to Pɔlin, dɛn bin dɔn de ɛp am wit in pikin na mitin ɛn na fil savis. So we Wen bin disayd se i nid fɔ ɔndastand mɔ bɔt di nyu tin dɛn we Pɔlin biliv, i bin aks dis maredman fɔ stɔdi di Baybul wit am.

17. Wetin wi nɔ fɔ blem wisɛf fɔ? Wetin mek wi nɔ fɔ ɛva givɔp pan wi fambul dɛn?

¹⁷ Wi op se ɔl wi fambul dɛn go jɔyn wi fɔ sav Jiova. Bɔt pan ɔl di tray we wi de tray fɔ ɛp dɛn fɔ kam sav Jiova, sɔntɛm dɛn nɔ go kam na di trut. If na so i bi, wi nɔ fɔ blem wisɛf fɔ wetin dɛn disayd fɔ du. Afta ɔl, wi nɔ go fos ɛnibɔdi fɔ gri wit wetin wi biliv. Bɔt if yu fambul dɛn si se yu gladi bikɔs yu de sav Jiova, dat go rili afɛkt dɛn. Pre fɔ dɛn. Tek tɛm tɔk to dɛn. Nɔ stɔp fɔ tray fɔ ɛp dɛn! (Akt 20:​20) Biliv tranga wan se Jiova go blɛs wetin yu de du. Ɛn if yu fambul dɛn disayd fɔ lisin to yu, dɛn go sev!