1. Udat dɛn ɛp fɔ mek di kɔngrigeshɔn na Filipay?

WE DI apɔsul Pɔl, Saylas, Lyuk, ɛn Timoti bin rich na Filipay we bin de ɔnda di Roman gɔvmɛnt, dɛn bin mit bɔku pipul dɛn we bin want fɔ no mɔ bɔt di Kiŋdɔm mɛsej. Dɛn 4 brɔda dɛn ya we bin gɛt zil bin ɛp fɔ mek wan nyu kɔngrigeshɔn, ɛn ɔl di disaypul dɛn bin bigin fɔ mit togɛda. I go bi se na wan nays sista we nem Lidia in os dɛn bin de mit.—Akt 16:​40.

2. Us prɔblɛm dɛn di kɔngrigeshɔn bin gɛt?

² I nɔ tu te, dis nyu kɔngrigeshɔn bin bigin fɔ gɛt prɔblɛm dɛn. Setan mek pipul dɛn we et di trut bigin fɛt agens di prichin wok we Pɔl ɛn in kɔmpin dɛn bin de du. Dɛn bin arɛst Pɔl ɛn Saylas, bit dɛn bad bad wan, ɛn put dɛn na jel. Afta we dɛn fri dɛn na prizin, dɛn bin go fɛn di nyu disaypul dɛn ɛn ɛnkɔrej dɛn. Afta dat, Pɔl, Saylas, ɛn Timoti bin kɔmɔt na di siti ɛn dɛn bin lɛf Lyuk de. Wetin di nyu brɔda ɛn sista dɛn go du naw? Jiova bin ɛp dɛn wit in oli spirit, so dɛn bin kɔntinyu fɔ sav am wit zil. (Fil. 2:​12) Pɔl bin gɛt gud rizin fɔ gladi fɔ dɛn!

3. Frɔm wetin de na Lɛta Fɔ Filipay 1:​9-11, wetin Pɔl bin pre bɔt?

³ Afta lɛk tɛn ia, Pɔl bin rayt lɛta to di kɔngrigeshɔn na Filipay. As yu de rid da lɛta de, yu go si klia wan di kayn we aw Pɔl bin lɛk in Kristian brɔda dɛn. I bin rayt se: “A lɛk una wit ɔl mi at lɛkɛ aw Jizɔs Krays lɛk wi.” (Fil. 1:​8) I rayt dɛn se i de pre fɔ dɛn. I beg Jiova fɔ ɛp dɛn fɔ lɛ  dɛn lɛk dɛnsɛf mɔ ɛn mɔ, fɔ lɛ dɛn mek shɔ ɔf di tin dɛn we rili impɔtant, fɔ lɛ pipul dɛn nɔ blem dɛn fɔ ɛnitin, fɔ lɛ dɛn nɔ ɔfɛn ɔda pipul dɛn, ɛn fɔ kɔntinyu fɔ de du gud tin dɛn. Tide, wisɛf kin lan bɔku tin frɔm di fayn wɔd dɛn we Pɔl bin tɔk. So lɛ wi rid wetin Pɔl rayt to di brɔda ɛn sista dɛn na Filipay. (Rid Lɛta Fɔ Filipay 1:​9-11.) Wi go tɔk bɔt di tin dɛn we Pɔl bin rayt bɔt ɛn wi go tɔk bɔt aw wi go du di tin we i tɔk.

4. (a) Frɔm wetin de na Jɔn In Fɔs Lɛta 4:​9, 10, aw Jiova dɔn sho di kayn we aw i lɛk wi? (b) Uskayn we wi fɔ lɛk Gɔd?

⁴ Jiova sho se i rili lɛk wi bay we i sɛn in Pikin fɔ day fɔ wi sin dɛn. (Rid Jɔn In Fɔs Lɛta 4:​9, 10.) Di lɛk we Gɔd lɛk wi de mek wisɛf lɛk am. (Rom 5:​8) Uskayn we wi fɔ lɛk Gɔd? Jizɔs bin ansa da kwɛstyɔn de we i bin tɛl wan Faresi se: “Yu fɔ lɛk Jiova we na yu Gɔd wit ɔl yu at, wit ɔl yu layf, ɛn wit ɔl yu maynd.” (Mat. 22:​36, 37, NW) Wi want fɔ lɛk Gɔd wit ɔl wi at. Ɛn wi want fɔ kɔntinyu fɔ lɛk am mɔ ɛn mɔ. Pɔl bin tɛl di brɔda ɛn sista dɛn na Filipay se dɛn fɔ ‘lɛk Gɔd ɛn dɛn kɔmpin mɔtalman mɔ ɛn mɔ.’ Wetin wi go du fɔ lɛ wi go kɔntinyu fɔ lɛk Gɔd mɔ ɛn mɔ?

5. Wetin go ɛp wi fɔ lɛk Gɔd mɔ ɛn mɔ?

⁵ Wi nid fɔ no Gɔd fɔ lɛ wi go lɛk am. Di Baybul se: “Ɛni bɔdi we nɔ lɛk in kɔmpin, na pɔsin we nɔ no Gɔd bikɔs Gɔd na di wan we nɔ de tap fɔ lɛk ɔltɛm ɛn nain de lɛk aw pɔsin fɔ lɛk fɔ tru.” (Jɔn In Fɔs Lɛta 4:​8) Di apɔsul Pɔl bin ɛksplen se wi go lɛk Jiova mɔ ɛn mɔ we wi no di tru tin dɛn bɔt am ɛn ɔndastand aw i de si tin dɛn. (Fil. 1:​9) We wi jɔs stat fɔ stɔdi di Baybul, wi bin bigin fɔ lɛk Gɔd pan ɔl we wi nɔ bin no ɔltin bɔt am. Bɔt di mɔ we wi de lan bɔt Jiova, na di mɔ wi de lɛk am. Na dat mek i impɔtant fɔ mek wi stɔdi di Baybul ɔltɛm ɛn fɔ tink gud gud wan bɔt wetin wi de rid.—Fil. 2:​16.

6. Frɔm wetin de na Jɔn In Fɔs Lɛta 4:​11, 20, 21, wetin wi lan bɔt aw fɔ sho lɔv mɔ ɛn mɔ?

⁶ Di we aw Gɔd rili lɛk wi go mek wisɛf lɛk wi brɔda dɛn. (Rid Jɔn In Fɔs Lɛta 4:​11, 20, 21.) Sɔntɛm wi go de tink se i izi fɔ lɛk wi brɔda ɛn sista dɛn. Afta ɔl, wi de wɔship Jiova ɛn wi de tray fɔ falamakata in fayn kwaliti dɛn. Wi de falamakata Jizɔs in ɛgzampul we bin so lɛk wi dat i gi in layf fɔ wi. Bɔt sɔntɛnde, i nɔ kin izi fɔ wi fɔ obe di lɔ we se wi fɔ lɛk wisɛf. Lɛ wi tɔk bɔt wan ɛgzampul we bin apin insay di kɔngrigeshɔn na Filipay.

7. Wetin wi lan frɔm di advays we Pɔl bin gi to Yuodia ɛn Sintiki?

⁷ Yuodia ɛn Sintiki na sista dɛn we bin rili gɛt zil ɛn dɛn bin de “wok an to an” wit di apɔsul Pɔl. Bɔt sɔntɛm, dɛn bin gɛt af-af cham-mɔt we mek dɛn nɔto bin padi dɛn igen. Insay di lɛta we Pɔl bin rayt to di kɔngrigeshɔn usay dɛn sista dɛn ya bin de, i bin kɔl dɛn nem dɛn ɛn i bin tɛl dɛn klia wan se dɛn “fɔ gɛt wanwɔd.” (Fil. 4:​2, 3) Pɔl bin si am bak se i impɔtant fɔ mek i tɛl di wan ol kɔngrigeshɔn se: “Una nɔ fɔ grɔmbul ɛn una nɔ fɔ agyu wɛn una de du ɛnitin.” (Fil. 2:​14) Dis advays we Pɔl bin gi go mɔs dɔn ɛp dɛn fetful sista dɛn ya, ɛn ɔda brɔda ɛn sista dɛn we de na di kɔngrigeshɔn fɔ lɛk dɛnsɛf mɔ ɛn mɔ.

8. Wetin mek i nɔ kin izi fɔ lɛk wi brɔda dɛn? Wetin go ɛp wi?

 ⁸ Sɔntɛnde, i nɔ kin izi fɔ wi fɔ lɛk wi brɔda dɛn bikɔs wi go du wetin Yuodia ɛn Sintiki bin du, dat na fɔ pe atɛnshɔn pan di bad tin we wi brɔda dɛn kin du. Wi ɔl kin mek mistek ɛvride. If wi kɔntinyu fɔ pe atɛnshɔn pan di mistek dɛn we ɔda pipul dɛn de mek, i nɔ go izi fɔ mek wi lɛk dɛn. Fɔ ɛgzampul, if wan brɔda fɔgɛt fɔ kam ɛp wi fɔ klin di Kiŋdɔm Ɔl, sɔntɛm wi go vɛks. If wi bigin fɔ kɔnt ɔl di ɔda mistek dɛn we wi no se dis brɔda dɔn mek, wi go kɔntinyu fɔ vɛks ɛn wi nɔ go lɛk am bɛtɛ igen. If yu gɛt dis kayn prɔblɛm wit sɔmbɔdi na di kɔngrigeshɔn, i gud fɔ tink bɔt dis: Jiova de si di mistek dɛn we wi ɛn wi brɔda de mek. Bɔt pan ɔl dat, i stil lɛk wi ɛn wi brɔda. Na dat mek wi nid fɔ falamakata Jiova in lɔv ɛn kɔntinyu fɔ tink bɔt di gud kwaliti dɛn we wi brɔda dɛn gɛt. We wi tray tranga wan fɔ lɛk wi brɔda dɛn, na di mɔ wi de gɛt wanwɔd wit dɛn.—Fil. 2:​1, 2.

9. Wetin na sɔm pan di “tin dɛn we rili impɔtant” we Pɔl bin tɔk na in lɛta to di Kristian dɛn na Filipay?

⁹ Di oli spirit bin ɛp Pɔl fɔ tɛl di brɔda dɛn na Filipay ɛn ɔl ɔda Kristian dɛn fɔ “mek shɔ ɔf di tin dɛn we rili impɔtant.” (Fil. 1:​10, NW) Dɛn impɔtant tin dɛn ya na fɔ tek Jiova in nem as sɔntin we oli, fɔ mek wetin i want bi, ɛn fɔ mek pis ɛn wanwɔd de na di kɔngrigeshɔn. (Mat. 6:​9, 10, NW; Jɔn 13:​35) We dɛn tin dɛn ya rili impɔtant to wi, wi de pruv se wi lɛk Jiova.

10. Wetin wi fɔ du fɔ mek wi nɔ gɛt badnem pan ɛnitin we wi de du?

¹⁰ Pɔl bin tɔk bak se wi ‘nɔ fɔ gɛt badnem pan ɛnitin we wi de du.’ Dis nɔ min se wi fɔ pafɛkt. Wi nɔ go se wi nɔ fɔ gɛt wan bɔt jɔs lɛk aw Jiova nɔ gɛt wan bɔt. Bɔt Jiova go si wi as pipul dɛn we nɔ gɛt wan bɔt if wi du wi bɛst fɔ lɛk am mɔ ɛn mɔ ɛn fɔ mek shɔ ɔf di tin dɛn we rili impɔtant. Wan we we wi go sho se wi lɛk ɔda pipul dɛn na we wi du ɔl wetin wi ebul fɔ mek wi nɔ du sɔntin we go pwɛl ɔda pipul dɛn padi biznɛs wit Jiova.

11. Wetin mek wi fɔ avɔyd nɔ fɔ du sɔntin we go ambɔg ɔda pipul dɛn?

¹¹ Di advays we se wi nɔ fɔ du ɛnitin we go ambɔg ɔda pipul dɛn padi biznɛs wit Jiova rili siriɔs. Aw wi go du sɔntin we go ambɔg ɔda pɔsin? Wi go du dat bay wetin wi de pik fɔ ɛnjɔy wisɛf, di kayn klos dɛn we wi de pik fɔ wɛr, ɔ ivin di kayn wok we wi de disayd fɔ du. Sɔntɛm wetin wi de du nɔ bad. Bɔt if wetin wi disayd fɔ du de afɛkt ɔda pɔsin in kɔnshɛns ɛn i mek i nɔ gɛt bɛtɛ fet igen, dat na siriɔs tin. If wi mek wan pan wi fetful brɔda dɛn pwɛl dɛn padi biznɛs wit Jiova, dat go wɔs pas we dɛn ɛng big ston na wi nɛk ɛn trowe wi na di si.—Mat. 18:​6.

12. Wetin wi lan frɔm wan payɔnia brɔda ɛn in wɛf dɛn ɛgzampul?

¹² Aw wan brɔda ɛn in wɛf we de payɔnia bin du wetin Jizɔs bin tɔk? Dis brɔda ɛn in wɛf bin de na wan kɔngrigeshɔn wit wan maredman ɛn in wɛf we jɔs baptayz, ɛn dɛn pipul dɛn ya we jɔs baptayz kɔmɔt na strikt famili usay dɛn nɔ de alaw bɔku tin. Dis nyu brɔda ɛn in wɛf biliv se Kristian dɛn nɔ fɔ go na sinima ivin fɔ go wach fim dɛn we nɔ bad. Dɛn bin rili fil bad we dɛn kam fɔ  no se dis payɔnia brɔda ɛn in wɛf bin dɔn wach wan fim. Afta dat, di payɔnia brɔda ɛn in wɛf bin stɔp fɔ go na sinima te dis nyu brɔda ɛn in wɛf ebul fɔ tren dɛn kɔnshɛns ɛn ɔndastand gud gud wan wetin rayt ɛn wetin bad. (Ibru 5:​14) We dis payɔnia brɔda ɛn in wɛf bin du dis, dɛn bin sho se dɛn lɛk dɛn nyu brɔda ɛn sista nɔto jɔs bay wetin dɛn de tɔk bɔt bay wetin dɛn de du.—Rom 14:​19-21; 1 Jɔn 3:​18.

13. Aw wi go mek pɔsin kɔmit sin?

¹³ Wan ɔda we we wi go du sɔntin we go ambɔg ɔda pipul dɛn na bay we wi mek dɛn sin. Aw wi kin du dat? Tink bɔt dis ɛgzampul. Afta we wan Baybul studɛnt bin dɔn tray tranga wan fɔ lɔng tɛm fɔ de kɔntrol insɛf nɔ fɔ de drink rɔm, i bin ebul fɔ stɔp. I bin disayd se i nɔ go drink rɔm igen. I bin mek bɔku chenj dɛn na in layf ɛn baptayz. Leta, wan brɔda bin invayt am pan wan gɛt-to-gɛda ɛn i gi am rɔm fɔ drink. Di brɔda bin tɛl am se: “Yu na Kristian naw; yu gɛt Jiova in spirit. Wan pan di kwaliti dɛn we di oli spirit de ɛp wi fɔ gɛt na fɔ ebul kɔntrol wisɛf. If yu ebul kɔntrol yusɛf, yu go ebul fɔ drink smɔl nɔmɔ.” I go rili bad if dis nyu brɔda lisin to da kayn advays de ɛn bigin fɔ drink bak!

14. Aw wi Kristian mitin dɛn de ɛp wi fɔ du di tin dɛn we de na Lɛta fɔ Filipay 1:​10 (NW)?

¹⁴ Wi Kristian mitin dɛn de ɛp wi fɔ du di tin dɛn we de na Lɛta fɔ Filipay 1:​10 (NW) difrɛn difrɛn we dɛn. Fɔs, di tin  dɛn we wi de lan na di mitin dɛn de sho wi wetin Jiova tink se impɔtant pas ɔl. Sɛkɔn, wi kin lan aw fɔ du di tin dɛn we wi de lan, so dat wi nɔ go gɛt fɔlt pan ɛnitin. Ɛn tɔd, di mitin dɛn de ɛp wi fɔ “kɔrej wi kɔmpin dɛn.” (Ibru 10:​24, 25) Di mɔ we wi brɔda dɛn de ɛnkɔrej wi, na di mɔ wi go kɔntinyu fɔ lɛk Gɔd ɛn wi brɔda dɛn mɔ ɛn mɔ. We wi lɛk Gɔd ɛn wi brɔda dɛn wit ɔl wi at, wi go du wi bɛst fɔ avɔyd fɔ du ɛnitin we go ambɔg wi brɔda dɛn.

15. Wetin i min fɔ du “gud tin” dɛn?

¹⁵ Pɔl bin pre wit ɔl in at fɔ lɛ di brɔda dɛn na Filipay “du dɛn gud tin.” (Fil. 1:​11) Wi shɔ se dɛn “gud tin” dɛn ya na di lɛk we dɛn lɛk Jiova ɛn in pipul dɛn. I min bak fɔ tɔk to ɔda pipul dɛn bɔt di fet we dɛn gɛt pan Jizɔs ɛn di wɔndaful op we dɛn gɛt. Lɛta Fɔ Filipay 2:​15 yuz ɔda wɔd dɛn we na “fɔ tan lɛkɛ layt” na di wɔl. Dɛn wɔd dɛn ya mek wi mɛmba aw Jizɔs bin kɔl in disaypul dɛn, we i se dɛn na “di layt fɔ di pipul dɛn na di wɔl.” (Mat. 5:​14-16) I bin tɛl di wan dɛn we de fala am se dɛn fɔ mek disaypul dɛn, ɛn i bin se dɛn go “tɔk bɔt mi . . . ɔlɔbɔt na [di] wɔl.” (Mat. 28:​18-20; Akt 1:​8) Wi de du “gud tin” dɛn we wi tray tranga wan fɔ du dis impɔtant wok.

16. Aw Lɛta Fɔ Filipay 1:​12-14 sho se wi go stil ebul fɔ shayn lɛk layt ilɛksɛf wi gɛt prɔblɛm dɛn we de mɔna wi? (Luk di pikchɔ na di frɔnt pej.)

¹⁶ Ilɛk wetin de apin to wi, wi go stil ebul fɔ shayn lɛk layt na di wɔl. Sɔntɛnde, di tin dɛn we kin mek wi fil lɛk se wi nɔ go ebul fɔ prich kin bi tin dɛn we go gi wi chans fɔ prich. Fɔ ɛgzampul, di tɛm we dɛn bin arɛst Pɔl ɛn kip am na os, na da tɛm de i rayt di lɛta to di brɔda dɛn  na Filipay. Bɔt pan ɔl we Pɔl bin de na prizin i nɔ stɔp fɔ prich to di sojaman dɛn ɛn di wan dɛn we bin de kam fɛn am. Pɔl bin gɛt zil fɔ prich pan ɔl we tin nɔ bin izi fɔ am, ɛn dis bin mek di brɔda dɛn gɛt maynd ɛn dɛn “nɔ [bin] de fred fɔ tɔk Gɔd in wɔd.”—Rid Lɛta Fɔ Filipay 1:​12-14; 4:​22.

17. Aw sɔm brɔda ɛn sista dɛn dɔn ebul fɔ prich pan ɔl we i nɔ izi fɔ dɛn?

¹⁷ Bɔku brɔda ɛn sista dɛn dɔn sho se dɛn gɛt di sem maynd we Pɔl bin gɛt. Dɛn de na kɔntri dɛn usay dɛn nɔ de ebul fɔ prich fri wan ɔ frɔm os to os, so dɛn bin de fɛn ɔda we dɛn fɔ prich di gud nyuz. (Mat. 10:​16-20) Na wan pan dɛn kɔntri dɛn de, wan sakit ovasia bin tɔk se lɛ di pɔblisha dɛn prich to dɛn fambul dɛn, neba dɛn, skulmet dɛn, wokmet dɛn, ɛn pipul dɛn we dɛn sabi. Insay tu ia, di pɔblisha dɛn na di kɔngrigeshɔn bin bɔku. Sɔntɛm wi nɔ de na kɔntri usay dɛn dɔn stɔp wi fɔ prich fri wan. Bɔt wi go lan fayn lɛsin frɔm di ɛgzampul we wi brɔda ɛn sista dɛn sɛt: If yu du ɔl wetin yu ebul fɔ prich to ɔda pipul dɛn, Jiova go mɔs gi yu di trɛnk fɔ kɔntinyu fɔ prich ilɛksɛf i nɔ izi.—Fil. 2:​13.

18. Wetin wi fɔ mekɔp wi maynd fɔ du?

¹⁸ Naw na di tɛm we wi fɔ mekɔp wi maynd fɔ fala di advays we de na Pɔl in lɛta to di kɔngrigeshɔn na Filipay. Wi fɔ mek shɔ ɔf di tin dɛn we rili impɔtant, pipul dɛn nɔ fɔ blem wi fɔ ɛnitin, wi nɔ fɔ ɔfɛn ɔda pipul dɛn, ɛn wi fɔ de du gud. Dɔn, wi go kɔntinyu fɔ lɛk Gɔd ɛn wi kɔmpin mɔtalman dɛn ɛn briŋ ɔnɔ to wi Papa we lɛk wi, we na Jiova.