1. Wetin mek Jiova bigin fɔ mek tin dɛn?

TƐM bin de we na Jiova in wangren bin de. Bɔt dis nɔ bin mek in at pwɛl, bikɔs i nɔ nid pɔsin fɔ de nia am fɔ mek i gladi. Bɔt stil, Gɔd bin want fɔ mek ɔda pipul dɛn ɛnjɔy layf. So bikɔs Jiova gɛt lɔv, i bigin fɔ mek tin dɛn.—Sam 36:​9; 1 Jɔn 4:​19.

2. Aw Jizɔs ɛn di enjɛl dɛn bin fil we Jiova bin mek ɔda tin dɛn?

² Fɔs, i bin mek in Pikin we bin ɛp am fɔ wok. So na in ɛn dis in fɔs Pikin bin “mek ɔl di ɔda tin dɛn.” Wan pan di tin dɛn we dɛn mek na di bɔku bɔku enjɛl dɛn. (Kol. 1:​16) Jizɔs bin rili gladi fɔ wok wit in Papa. (Prɔv. 8:​30) Ɛn di enjɛl dɛnsɛf bin gladi. Dɛn bin si we Jiova ɛn Jizɔs we na man we sabi wok, bin de mek di ɛvin ɛn di wɔl. Aw di enjɛl dɛn bin sho se dɛn gladi? Dɛn “bigin prez Gɔd lawd wan ɛn klap dɛn an dɛn” we i bin de mek di wɔl, ɛn dɛn kɔntinyu fɔ prez am we dɛn si ɔl di tin dɛn we i mek. Dɛn bin prez am mɔ di tɛm we i mek mɔtalman. (Job 38:​7, NWT; Prɔv. 8:​31) Ɔl dɛn tin dɛn ya we Jiova mek de sho se i lɛk wi ɛn i gɛt sɛns.—Sam 104:​24; Rom. 1:​20.

3. Frɔm wetin de na 1 Kɔrintians 15:​21, 22, wetin Jizɔs in day go du fɔ wi?

³ Jiova bin want fɔ lɛ mɔtalman de sote go na dis wɔl we i bin mek fayn wan. Bɔt we Adam ɛn Iv bin tɔn dɛn bak pan dɛn Papa we lɛk dɛn, dɛn bin mek sin ɛn day kam na di wɔl. (Rom. 5:​12) Wetin Jiova bin du? I nɔ westɛm fɔ tɔk wetin i go du fɔ sev mɔtalman. (Jɛn. 3:​15) I se i go mek in Pikin kam day so dat Adam ɛn Iv dɛn pikin dɛn go fri frɔm sin ɛn day. Ɛn dat go mek i gi layf we go de sote go to ɛnibɔdi we disayd fɔ  sav am.—Jɔn 3:​16; Rom. 6:​23; rid 1 Kɔrintians 15:​21, 22.

4. Us kwɛstyɔn dɛn wi go tɔk bɔt insay dis atikul?

⁴ We Gɔd prɔmis se i go gi layf bak to di wan dɛn we dɔn day, dat de mek wi aks bɔku kwɛstyɔn dɛn. Fɔ ɛgzampul, aw Jiova gɛt fɔ gi layf bak to pipul dɛn? Wi go ebul mɛmba wi fambul ɛn padi dɛn we dɛn gɛt layf bak? We pipul dɛn go dɔn gɛt layf bak, aw dat go mek wi gladi? Ɛn aw dis op go mek wi sho se wi gladi fɔ di lɛk we Jiova lɛk wi, di sɛns we i gɛt, ɛn we i de peshɛnt? Lɛ wi tɔk bɔt dɛn kwɛstyɔn dɛn ya wan bay wan.

5. Wetin mek wi fɔ biliv se ɔlman nɔ go gɛt layf bak di sem tɛm?

⁵ We Jiova gɛt fɔ yuz in Pikin fɔ gi layf bak to bɔku bɔku pipul dɛn we dɔn day, wi nɔ fɔ tink se dɛn ɔl go gɛt layf bak di sem tɛm. Wetin mek? Bikɔs if dɛn ɔl gɛt layf di sem tɛm, kɔnfyushɔn go de na di wɔl. Ɛn Jiova na pɔsin we ɔganayz. I no se fɔ mek pis de, ɔltin fɔ ɔganayz. (1 Kɔr. 14:​33) Jiova Gɔd bin peshɛnt ɛn yuz in sɛns we i bin de wok wit Jizɔs fɔ mek di wɔl smɔl smɔl bifo i mek mɔtalman. Jizɔs insɛf go sho dɛn sem kwaliti dɛn de insay di Wan Tawzin ia we i go de wok wit di wan dɛn we go sev afta Amagɛdɔn fɔ mek di wɔl go fayn fɔ di wan dɛn we go gɛt layf bak.

6. Frɔm wetin de na Akt 24:​15, udat dɛn Jiova go gi layf bak?

⁶ Di tin we impɔtant pas ɔl na dat di wan dɛn we go sev afta Amagɛdɔn go tich di wan dɛn we go gɛt layf bak bɔt Gɔd in Kiŋdɔm ɛn di tin dɛn we Jiova want wi fɔ du. Wetin mek? Bikɔs plɛnti  pan di pipul dɛn we go gɛt layf bak go bi “di wan dɛn we nɔ du wetin rayt.” (Rid Akt 24:​15.) Dɛn go gɛt fɔ chenj bɔku tin dɛn na dɛn layf so dat dɛn go bɛnifit frɔm Krays in day ɛn gɛt layf we go de sote go. Jɔs tink bɔt di bɔku wok we go de fɔ tich bɔku bɔku pipul dɛn we nɔ no Jiova. Fɔ se dɛn go tich dɛn wan bay wan lɛk aw wi de stɔdi pipul dɛn tide? Fɔ se dɛn go gi dɛn nyu wan dɛn ya kɔngrigeshɔn usay dɛn go tren dɛn fɔ tich di ɔda wan dɛn we go gɛt layf bak afta dɛn? Wi go gɛt fɔ wet fɔ si wetin go apin. Bɔt wi no se bay di tɛm we Krays in Wan Tawzin Ia Rul go dɔn, “di wɔl go no bɔt PAPA GƆD [“Jiova,” NWT] bɛtɛ bɛtɛ wan, lɛk we si ful.” (Ayz. 11:​9) Wi go gɛt bɔku wok we wi go de ɛnjɔy fɔ du da tɛm de!

7. Wetin mek Gɔd in pipul dɛn go sho sɔri-at we dɛn de tich di wan dɛn we go gɛt layf bak?

⁷ Insay di Wan Tawzin Ia we Krays go de rul, Jiova in pikin dɛn na di wɔl go nid fɔ kɔntinyu fɔ chenj tin dɛn na dɛn layf fɔ mek Jiova gladi. So dɛn ɔl go sho se dɛn de rili sɔri fɔ di wan dɛn we go gɛt layf bak as dɛn de ɛp dɛn fɔ chenj di bad we aw dɛn bin de tink ɛn du di tin dɛn we Jiova want. (1 Pit. 3:​8) Di wan dɛn we go gɛt layf bak go gladi fɔ de wit Jiova in pipul dɛn bikɔs dɛn ɔmbul, ɛn dɛnsɛf “de tray tranga wan fɔ sev.”—Fil. 2:​12.

8. Wetin mek i mek sɛns fɔ tink se di wan dɛn we go wɛlkɔm dɛn fambul ɛn padi dɛn we bin dɔn day go mɛmba dɛn?

⁸ Bɔku rizin dɛn de we mek wi tink se di wan dɛn we go wɛlkɔm di wan dɛn we go gɛt layf bak go mɛmba dɛn fambul ɛn padi dɛn we bin dɔn day. Fɔ ɛgzampul, bikɔs ɔf di we aw Jiova bin gi layf bak to pipul dɛn trade, i tan lɛk se I go mek pipul dɛn bak so dat di we aw dɛn de tɔk, di we aw dɛn de tink, ɛn di we aw dɛn luk lɛk, go de di sem we lɛk aw dɛn bin de bifo dɛn day. Mɛmba se Jizɔs bin kɔmpia day to slip, ɛn we pipul dɛn go gɛt layf bak i go tan lɛk dɛn de wek dɛn frɔm slip. (Mat. 9:​18, 24; Jɔn 11:​11-13) We pɔsin grap pan slip, di we aw i luk ɛn di we aw i de tɔk nɔ kin chenj, ɛn i de mɛmba wetin bin apin bifo i go slip. Tink bɔt Lazarɔs in ɛgzampul. I bin dɔn day fɔ 4 dez, so in bɔdi bin dɔn bigin fɔ rɔtin. Bɔt we Jizɔs bin gi am layf bak, in sista dɛn mɛmba am, ɛn Lazarɔs insɛf bin mɛmba dɛn.—Jɔn 11:​38-44; 12:​1, 2.

9. Wetin mek di wan dɛn we go gɛt layf bak nɔ go gɛt pafɛkt maynd ɛn bɔdi wantɛm wantɛm?

⁹ Jiova dɔn prɔmis se we Krays de rul, nɔbɔdi nɔ go se: “A nɔ wɛl.” (Ayz. 33:​24; Rom. 6:​7) So di wan dɛn we go gɛt layf bak go gɛt wɛlbɔdi. Bɔt nɔto wantɛm wantɛm dɛn go pafɛkt. If dɛn pafɛkt wantɛm wantɛm, i nɔ go izi fɔ mek dɛn fambul ɛn padi dɛn mɛmba dɛn. I tan lɛk se ɔlman go pafɛkt smɔl smɔl insay di Wan Tawzin Ia we Krays go de rul. Na we di wan tawzin ia dɔn, na in Jizɔs go gi di Kiŋdɔm bak to in Papa. Da tɛm de, ɔl di wok we Jiova go want lɛ dɛn du insay di Kiŋdɔm go dɔn dɔn, ivin di wok fɔ mek mɔtalman pafɛkt.—1 Kɔr. 15:​24-28; Rɛv. 20:​1-3.

10. We pipul dɛn go gɛt layf bak, wetin dat go mek yu du?

¹⁰ Imajin aw i go tan lɛk we yu de wɛlkɔm yu fambul ɛn padi dɛn we bin dɔn day. Yu tink se di we aw yu go gladi go mek yu laf ɔ kray? Ɔ yu go so gladi dat yu go want fɔ siŋ fɔ prez Jiova? Wan tin we wi no na dat wi go sho se wi rili lɛk wi Papa ɛn in Pikin we lɛk wi, bikɔs dɛn dɔn mek am pɔsibul fɔ lɛ pipul dɛn gɛt layf bak.

11. Frɔm wetin Jizɔs tɔk na Jɔn 5:​28, 29, wetin go apin to di wan dɛn we go du wetin Gɔd want?

¹¹ Imajin aw di wan dɛn we go gɛt layf bak go gladi as dɛn de lɛf dɛn ol abit dɛn ɛn du wetin Gɔd want. Jiova go alaw di wan dɛn we go mek dɛn chenj dɛn ya fɔ de na Paradays sote go. Bɔt i nɔ go alaw di wan dɛn we go tɔn dɛn bak pan am fɔ kɔntinyu fɔ de na Paradays ɛn ambɔg di pis we go de de.—Ayz. 65:​20; rid Jɔn 5:​28, 29.

12. Aw Jiova go blɛs ɔl di wan dɛn we go de na dis wɔl?

¹² We di Kiŋdɔm go de rul, Gɔd in pipul dɛn go si se wetin Prɔvabs 10:​22 tɔk na tru. I se: “Na PAPA GƆD [“Jiova,” NWT] in gres [“blɛsin,” NWT] go mek yu jɛntri, ilɛk yu wok tranga te yu nɔ go jɛntri.” Jiova in spirit go ɛp dɛn fɔ lɛ dɛn jɛntri na Gɔd in yay, we min se dɛn go tan lɛk Krays mɔ ɛn mɔ ɛn dɛn go de pafɛkt smɔl smɔl. (Jɔn 13:​15-17; Ɛfi. 4:​23, 24) Ɛvride dɛn go de gɛt wɛlbɔdi, ɛn dɛn go de mek Jiova gladi mɔ ɛn mɔ. Wi go rili gladi fɔ de na di wɔl da tɛm de. (Job 33:​25) Bɔt we yu de tink bɔt di tɛm we pipul dɛn go gɛt layf bak, aw dat go ɛp yu naw?

13. Frɔm wetin de na Sam 139:​1-4, aw di gi we Jiova gɛt fɔ gi wi layf bak go sho se i sabi wi gud gud wan?

¹³ Jɔs lɛk aw wi bin dɔn tɔk, we Jiova go gi layf bak to pipul dɛn, i go mek dɛn mɛmba tin dɛn ɛn mek dɛn bi di sem kayn pipul dɛn we dɛn bin bi. Jɔs tink bɔt wetin dat min. I min se Jiova so lɛk yu dat i de notis ɛn mɛmba ɔl wetin yu de tink bɔt, aw yu de fil, ɛn wetin yu de tɔk ɛn du. So if i go gɛt fɔ gi yu layf bak, i go izi fɔ lɛ i mek yu jɔs lɛk aw yu bin de. Kiŋ Devid bin no se Jiova sabi wi ɔl gud gud wan. (Rid Sam 139:​1-4.) We wi ɔndastand se Jiova sabi wi gud gud wan, aw dat fɔ afɛkt wi naw?

14. We wi tink bɔt di we aw Jiova sabi wi gud gud wan, aw dat fɔ afɛkt wi?

¹⁴ We wi tink bɔt di we aw Jiova sabi wi gud gud wan, dat nɔ fɔ mek wi wɔri. Wetin mek? Mɛmba se Jiova rili bisin bɔt wi. I lɛk di difrɛn abit dɛn we wi gɛt we mek wi difrɛn frɔm ɔda pipul dɛn. I kin mɛmba ɔl di tin dɛn we dɔn apin to wi we mek wi bi di kayn pipul dɛn we wi bi. Dat de rili ɛnkɔrej wi. Wi nɔ fɔ ɛva fil se na wi wan de bikɔs Jiova de wit wi ɔltɛm, ɛn i de luk fɔ ɛni chans we i gɛt fɔ ɛp wi.—2 Kro. 16:​9.

15. Aw di op fɔ gɛt layf bak de sho se Jiova gɛt sɛns?

¹⁵ Bɔku tɛm, pipul dɛn kin fred we pɔsin tɔk se i go kil dɛn. Di wan dɛn we Setan de kɔntrol kin yuz dat fɔ fos pipul dɛn fɔ kɔmɔt biɛn dɛn padi dɛn ɔ lɛf fɔ du wetin rayt. Bɔt da kayn trɛtin de nɔ min natin to wi. Wi no se if wi ɛnimi dɛn  kil wi, Jiova go gi wi layf bak. (Rɛv. 2:​10) Wi biliv tranga wan se natin nɔ go mek wi lɛf fɔ sav Jiova. (Rom. 8:​35-39) Jiova dɔn sho se i rili gɛt sɛns bay we i gi wi di op fɔ gɛt layf bak! Bikɔs ɔf dis op, wi nɔ de fred if di wan dɛn we de biɛn Setan trɛtin wi se dɛn go kil wi if wi nɔ du wetin dɛn want. Dɔn bak, i de mek wi gɛt maynd fɔ kɔntinyu fɔ de biɛn Jiova.

16. Us kwɛstyɔn dɛn yu nid fɔ aks yusɛf? Aw di ansa dɛn go ɛp yu fɔ no if yu rili abop pan Jiova?

¹⁶ If Jiova in ɛnimi dɛn trɛtin yu se dɛn go kil yu, yu biliv se Jiova go gi yu layf bak? Aw yu go no dat? Wan we na we yu aks yusɛf dis kwɛstyɔn, ‘Di smɔl smɔl tin dɛn we a de disayd fɔ du ɛvride de sho se a abop pan Jiova?’ (Lyuk 16:​10) Wan ɔda kwɛstyɔn kin bi, ‘Di we aw a de yuz mi tɛm ɛn mɔni de sho se a biliv Jiova in prɔmis fɔ se i go gi mi di tin dɛn we a nid if a put in Kiŋdɔm fɔs?’ (Mat. 6:​31-33) If di ansa to dɛn kwɛstyɔn dɛn ya na yɛs, dat min se yu abop pan Jiova, ɛn yu go rɛdi fɔ ɛni tɛst we go kam yu we tumara bambay.—Prɔv. 3:​5, 6.

17. (a) Aw di op fɔ gɛt layf bak de sho se Jiova de peshɛnt? (b) Aw wi go sho se wi gladi fɔ we Jiova de peshɛnt?

¹⁷ Jiova dɔn ɔlrɛdi disayd ustɛm i go dɔnawe wit dis wikɛd wɔl. (Mat. 24:​36) Jiova go kɔntinyu fɔ peshɛnt, ɛn i nɔ go dɔnawe wit di wɔl bifo di tɛm we i dɔn disayd se i go du am. I rili want fɔ gi layf bak to di wan dɛn we dɔn day, bɔt i de peshɛnt. (Job 14:​14, 15) I de wet te di rayt tɛm rich bifo i gi dɛn layf bak. (Jɔn 5:​28) Wi gɛt gud rizin dɛn fɔ gladi fɔ we Jiova de peshɛnt. Jɔs tink bɔt dis: Bikɔs Jiova de peshɛnt, wi ɛn bɔku ɔda pipul dɛn dɔn gɛt chans fɔ “ripɛnt.” (2 Pit. 3:​9) Jiova want fɔ mek bɔku bɔku pipul dɛn gɛt di chans fɔ gɛt layf we go de sote go. So lɛ wi sho se wi gladi fɔ we i de peshɛnt. Aw wi go du dat? Na bay we wi de du wi bɛst fɔ fɛn pipul dɛn we “rili sho se dɛn want fɔ gɛt layf we go de sote go,” ɛn ɛp dɛn fɔ lɛk Jiova ɛn sav am. (Akt 13:​48) Da tɛm de, dɛnsɛf go bɛnifit frɔm di peshɛnt we Jiova de peshɛnt jɔs lɛk aw wisɛf dɔn bɛnifit.

18. Wetin mek wi fɔ peshɛnt wit ɔda pipul dɛn?

 ¹⁸ Jiova go peshɛnt wet te di wan tawzin ia dɔn bifo i go ɛkspɛkt wi fɔ pafɛkt. Te da tɛm de rich, Jiova rɛdi fɔ fɔgiv wi sin dɛn. So wi fɔ falamakata in ɛgzampul ɛn pe atɛnshɔn pan di gud kwaliti dɛn we ɔda pipul dɛn gɛt ɛn peshɛnt wit dɛn. Tink bɔt wan sista in ɛgzampul. In man kin wɔri pasmak ɛn dat bin mek di man stɔp fɔ go mitin. Dis sista bin se: “Dat bin mek mi at pwɛl. Ɛn wi layf chenj kwik kwik wan bikɔs wi nɔ go ebul fɔ du ɔl wetin wi dɔn plan fɔ du as famili.” Bɔt bikɔs dis sista lɛk in man, i kɔntinyu fɔ peshɛnt wit am. I abop pan Jiova ɛn i nɔ ɛva giv-ɔp. Jɔs lɛk Jiova, i nɔ luk di prɔblɛm, bifo dat i pe atɛnshɔn pan in man in gud kwaliti dɛn. I se, “Mi man gɛt fayn kwaliti dɛn, ɛn i de du in bɛst fɔ mek i lɛf fɔ de wɔri.” I rili impɔtant fɔ mek wi peshɛnt wit di wan dɛn we de na wi famili ɔ wi kɔngrigeshɔn we de tray fɔ bia tin dɛn we nɔ izi fɔ dɛn!

19. Wetin wi fɔ mekɔp wi maynd fɔ du?

¹⁹ Jizɔs ɛn di enjɛl dɛn bin gladi we Jiova bin jɔs mek di wɔl. Bɔt imajin aw dɛn go gladi fɔ si we di wɔl go ful-ɔp wit pafɛkt pipul dɛn we lɛk Jiova ɛn we de sav am. Imajin aw di wan dɛn we go rul wit Jizɔs na ɛvin go gladi fɔ si we mɔtalman de bɛnifit frɔm di wok we dɛn de du. (Rɛv. 4:​4, 9-11; 5:​9, 10) Ɛn imajin aw i go tan lɛk we wi nɔ go ɛva kray igen bikɔs wi de fil pen, wi sik, wi at pwɛl, ɔ pɔsin we wi lɛk day, bɔt wi go kray bikɔs wi gladi. (Rɛv. 21:​4) Te da tɛm de rich, mekɔp yu maynd fɔ falamakata yu Papa we lɛk yu, we gɛt sɛns, ɛn we de peshɛnt. If yu du dat, yu go kɔntinyu fɔ gɛt gladi-at ilɛk us prɔblɛm mit yu. (Jems 1:​2-4) Wi rili gladi we Jiova dɔn prɔmis se di wan dɛn we dɔn day “go gɛt layf bak.”—Akt 24:​15.