1. Wetin Devid bin tɔk bɔt aw Jiova ɔmbul?

YU TINK se wi fɔ rili se Jiova ɔmbul? Yɛs, wi fɔ se so. Devid bin rayt se: “Yu kɔba mi ɛn pul mi pan trɔbul yu ansa mi prea [“yu put yusɛf dɔŋ,” NWT] ɛn mek mi ed big.” (2 Sam. 22:​36) Sɔntɛm Devid bin de tink bɔt di de we prɔfɛt Samiɛl bin kam na in papa in os fɔ anɔynt di nɛks kiŋ na Izrɛl. Devid in papa bin gɛt et bɔypikin dɛn ɛn na in na bin di las wan; bɔt stil, na in Jiova bin pik fɔ bi kiŋ afta Kiŋ Sɔl.—1 Sam. 16:​1, 10-13.

2. Wetin wi go lan insay dis atikul?

² I go mɔs bi se Devid bin gri wit wetin wan ɔda man we rayt di sam buk bin tɔk bɔt Jiova. I bin se: “I kin gɛt fɔ bɛn dɔŋ fɔ luk, fɔ mek i si wetin de bi na ɛvin ɛn ath. I de pul poman kɔmɔt pan po ɛn mek am bi pɔsin, i go tan lɛkɛ pɔsin we ɔlman go rɛspɛkt.” (Sam 113:​6-8) Insay dis atikul, fɔs wi go lan impɔtant lɛsin dɛn bɔt aw wi fɔ put wisɛf dɔŋ bay we wi tɔk bɔt difrɛn tɛm dɛn we Jiova bin sho dis kwaliti. Dɔn wi go lan bak frɔm Kiŋ Sɔl, prɔfɛt Daniɛl, ɛn Jizɔs bɔt aw fɔ put wisɛf dɔŋ.

3. Aw Jiova de trit wi? Wetin dis de sho?

³ Jiova de sho se i ɔmbul bay di we aw i de trit mɔtalman dɛn we nɔ pafɛkt we de wɔship am. I kin gladi we wi de wɔship am ɛn i kin tek wi as in padi. (Sam 25:​14) Jiova mek in Pikin kam day fɔ wi sin dɛn so dat i go pɔsibul fɔ lɛ wi bi in padi. Dis sho se Jiova rili gɛt sɔri-at!

4. Wetin Jiova dɔn gi wi? Wetin mek?

 ⁴ Tink bɔt wan ɔda we aw Jiova de sho se i ɔmbul. Bikɔs Jiova na di Wan we mek ɔltin, i bin fɔ dɔn mek wi wan kayn we we wi nɔ bin fɔ ebul disayd fɔ wisɛf wetin wi want na layf. Bɔt i nɔ du dat. I mek wi lɛk aw i tan, ɛn i gi wi fridɔm fɔ disayd wetin wi want fɔ du. Pan ɔl we wi smɔl ɛn wik na in yay, i want fɔ lɛ wi sav am wit ɔl wi at bikɔs wi lɛk am ɛn wi no se wi go gɛt bɛnifit we wi obe am. (Dit. 10:​12; Ayz. 48:​17, 18) Wi fɔ gladi fɔ dis kayn we aw Jiova sho se i ɔmbul!

5. Aw Jiova de tich wi fɔ put wisɛf dɔŋ? (Luk di pikchɔ na di frɔnt pej.)

⁵ Jiova de tich wi aw fɔ put wisɛf dɔŋ bay di we aw i de trit wi. Jiova na di Wan we gɛt sɛns pas ɔlman na di wan ol wɔl. Bɔt pan ɔl dat, i rɛdi fɔ tek wetin ɔda pɔsin se. Fɔ ɛgzampul, Jiova bin alaw in Pikin fɔ ɛp am we i bin de mek ɔltin. (Prɔv. 8:​27-30; Kol. 1:​15, 16) Pan ɔl we Jiova na di ɔlmayti, i kin alaw ɔda pipul dɛn fɔ ɛp am wit in wok. Fɔ ɛgzampul, i pik Jizɔs fɔ bi di Kiŋ na di Kiŋdɔm, ɛn I go gi sɔm pawa to di 144,000 mɔtalman dɛn we go rul wit Jizɔs. (Lyuk 12:​32) Jiova dɔn ɔlrɛdi tren Jizɔs fɔ bi Kiŋ ɛn Ay Prist. (Ibru. 5:​8, 9) I dɔn tren di wan dɛn we de rul wit Jizɔs bak, bɔt i nɔ gi dɛn dis wok ɛn kɔntrol aw dɛn fɔ du di wok. I biliv se dɛn go du wetin i want.—Rɛv. 5:​10.

6-7. Wetin wi kin lan frɔm wi Papa we de na ɛvin we wi de gi wok to ɔda pipul dɛn?

⁶ If wi Papa we de na ɛvin we nɔ nid ɛnibɔdi fɔ ɛp am de gi wok to ɔda pipul dɛn, yu nɔ tink se wi fɔ du di sem tin? Fɔ ɛgzampul, yu na ɛlda na di kɔngrigeshɔn ɔ na yu de oba yu famili?  If na so i bi, falamakata Jiova in ɛgzampul bay we yu de gi wok to ɔda pipul dɛn, ɛn we yu du dat nɔ tray fɔ kɔntrol aw dɛn de du di wok. We yu falamakata Jiova, di wok de go bifo, yu go tren ɔda pipul dɛn ɛn ɛp dɛn fɔ gɛt kɔnfidɛns. (Ayz. 41:​10) Us ɔda tin we di wan dɛn we de oba pipul dɛn kin lan frɔm Jiova?

⁷ Di Baybul sho wi se Jiova kin want fɔ no wetin di enjɛl dɛn tink bɔt sɔntin. (1 Kiŋ 22:​19-22) Mama ɛn papa dɛn, aw una go falamakata Jiova in ɛgzampul? If nid de, aks yu pikin dɛn wetin dɛn tink bɔt aw fɔ du sɔntin. Ɛn if wetin dɛn tɔk fayn, yu kin du wetin dɛn se.

8. Aw Jiova bin sho se i peshɛnt bay di we aw i trit Ebraam ɛn Sera?

⁸ Wan ɔda we aw Jiova de sho se i ɔmbul na bay we i de peshɛnt. Fɔ ɛgzampul, Jiova kin peshɛnt wit in savant dɛn we dɛn de tek tɛm aks am kwɛstyɔn bɔt wetin i dɔn disayd fɔ du. I bin lisin we Ebraam bin de tɛl am se i nɔ tink se i fɔ dɔnawe wit di pipul dɛn na Sɔdɔm ɛn Gomɔra. (Jɛn. 18:​22-33) Ɛn mɛmba aw Jiova bin trit Sera we na Ebraam in wɛf. I nɔ bin vɛks we Sera bin laf we I prɔmis am se i go gɛt bɛlɛ pan ɔl we i dɔn ol. (Jɛn. 18:​10-14) Bifo dat, i bin trit Sera wit rɛspɛkt.

9. Wetin ɛlda dɛn ɛn mama ɛn papa dɛn kin lan frɔm Jiova in ɛgzampul?

⁹ Ɛlda dɛn ɛn mama ɛn papa dɛn, wetin una kin lan frɔm Jiova in ɛgzampul? Wetin yu kin du we yu pikin ɔ pɔsin na di kɔngrigeshɔn nɔ gri wit wetin yu disayd fɔ du? Yu kin kɔrɛkt am wantɛm wantɛm? Ɔ yu kin tray fɔ ɔndastand wetin mek i nɔ gri wit yu? Pipul dɛn na di famili ɛn di kɔngrigeshɔn kin rili bɛnifit we di wan dɛn we de oba dɛn de falamakata Jiova. Wi dɔn de tɔk bɔt aw fɔ put wisɛf dɔŋ frɔm Jiova in ɛgzampul. Naw, lɛ wi si wetin wi go lan bɔt aw wi fɔ put wisɛf dɔŋ frɔm di ɛgzampul dɛn we de na di Baybul.

10. Aw Jiova de yuz ɔda pipul dɛn ɛgzampul fɔ tich wi?

¹⁰ Bikɔs Jiova na wi Bɛst “Ticha,” i dɔn gi wi ɛgzampul dɛn na in Wɔd di Baybul fɔ tich wi. (Ayz. 30:​20, 21) Wi kin lan frɔm di stori dɛn we de na di Baybul bɔt pipul dɛn we bin gɛt kwaliti dɛn we mek Gɔd gladi, ɛn wan pan dɛn kwaliti dɛn ya na we dɛn bin put dɛnsɛf dɔŋ. Wi kin lan bak frɔm wetin apin to di wan dɛn we nɔ sho se dɛn gɛt dɛn fayn kwaliti dɛn ya.—Sam 37:​37; 1 Kɔr. 10:​11.

11. Wetin wi kin lan frɔm Sɔl in bad ɛgzampul?

¹¹ Tink bɔt wetin bin apin to Kiŋ Sɔl. I bin put insɛf dɔŋ di tɛm we i bin yɔŋ. I bin no se nɔto ɔltin i ebul fɔ du ɛn i bin ivin fred fɔ tek mɔ wok. (1 Sam. 9:​21; 10:​20-22) Bɔt afta sɔm tɛm, Sɔl bigin fɔ du tin dɛn we i nɔ gɛt rayt fɔ du. Ɛn i bigin fɔ du dis jɔs afta we i bi kiŋ. Wan tɛm, Sɔl nɔ bin peshɛnt wet fɔ prɔfɛt Samiɛl. I nɔ bin abop pan Jiova fɔ se i go fɛt fɔ in pipul dɛn. Bifo dat, i bin mek sakrifays pan ɔl we i nɔ gɛt rayt fɔ du dat. Dat bin mek Jiova nɔ bin gladi fɔ am ɛn i nɔ kɔntinyu fɔ bi kiŋ igen. (1 Sam. 13:​8-14) Wi go sho se wi gɛt sɛns if wi lan frɔm dis bad ɛgzampul ɛn nɔ du tin dɛn we wi nɔ gɛt rayt fɔ du.

12. Aw Daniɛl bin sho se i de put insɛf dɔŋ?

 ¹² Sɔl bin sɛt bad ɛgzampul, bɔt tink bɔt di gud ɛgzampul we prɔfɛt Daniɛl bin sɛt fɔ wi. Frɔm we Daniɛl bin smɔl te i day, i bin kɔntinyu fɔ put insɛf dɔŋ ɛn abop pan Jiova ɔltɛm fɔ gayd am. Fɔ ɛgzampul, we Jiova bin yuz Daniɛl fɔ ɛksplen wetin Nɛbyukadnɛza in drim min, i nɔ bin se na bay insɛf i du am. Bifo dat, na Jiova i gi ɔl di prez. (Dan. 2:​26-28) Wetin na di lɛsin we wi lan? If wi brɔda dɛn de ɛnjɔy di tɔk dɛn we wi de gi, ɔ wi de du wɛl na di prichin wok, wi want fɔ mɛmba se wi fɔ gi ɔl di prez to Jiova. Wi fɔ mɛmba se wi nɔ go ebul du dɛn tin dɛn ya if Jiova nɔ ɛp wi. (Fil. 4:​13) We wi du dat, wi de falamakata Jizɔs in fayn ɛgzampul. Wetin mek wi se so?

13. Wetin wi kin lan frɔm wetin Jizɔs tɔk na Jɔn 5:​19, 30?

¹³ Pan ɔl we Jizɔs na Gɔd in Pikin ɛn i pafɛkt, i bin stil abop pan Jiova. (Rid Jɔn 5:​19, 30.) I nɔ bin ɛva tray fɔ tek in Papa we de na ɛvin in pawa. Filipians 2:​6 tɛl wi se Jizɔs “nɔ ɛva tink se i fɔ tek Gɔd in pozishɔn ɛn mek insɛf ikwal to Gɔd.” Bikɔs Jizɔs de put insɛf ɔnda in Papa, i bin no se nɔto ɔltin i ebul fɔ du ɛn i bin sho se i rɛspɛkt wetin in Papa de du.

14. Wetin Jizɔs bin du we dɛn tɛl am fɔ du sɔntin we i nɔ gɛt rayt fɔ du?

¹⁴ Tink bɔt wetin Jizɔs bin du we Jems ɛn Jɔn ɛn dɛn mama bin aks am fɔ sɔntin we i nɔ gɛt di rayt fɔ gi dɛn. Jizɔs nɔ bin westɛm fɔ tɛl dɛn se na in Papa we de na ɛvin nɔmɔ go disayd udat go sidɔm na in rayt an ɛn in lɛft an na di Kiŋdɔm. (Mat. 20:​20-23) Jizɔs bin put insɛf dɔŋ ɛn sho se nɔto ɔltin i gɛt rayt fɔ du. I nɔ ɛva du sɔntin we Jiova nɔ tɛl am fɔ du. (Jɔn 12:​49) Aw wi go falamakata Jizɔs in fayn ɛgzampul?

15-16. Aw wi go fala di advays we de na 1 Kɔrintians 4:​6?

¹⁵ Wi go falamakata Jizɔs in ɛgzampul fɔ put wisɛf dɔŋ bay we wi fala di advays we de na 1 Kɔrintians 4:​6. Da vas de se: “Na di tin dɛn we dɛn dɔn rayt na in una fɔ fala.” So we pɔsin aks wi fɔ advays, wi  nɔ fɔ ɛva fos am fɔ du wetin wi tink ɔ jɔs tɛl am di fɔs tin we kam na wi maynd. Bifo dat, wi fɔ sho am di advays dɛn we de na di Baybul ɛn wi buk ɛn magazin dɛn. We wi du dat, wi de sho se nɔto ɔltin wi gɛt rayt fɔ du. We wi put wisɛf dɔŋ, wi de sho se di Ɔlmayti Gɔd de “jɔj di rayt we.”—Rɛv. 15:​3, 4.

¹⁶ Apat frɔm we wi de ɔnɔ Jiova, ɔda gud rizin dɛn de fɔ mek wi put wisɛf dɔŋ. We wi put wisɛf dɔŋ, dat go mek wi gɛt gladi-at ɛn trit ɔda pipul dɛn fayn. Wi de kam lan naw bɔt aw dat go pɔsibul.

17. Wetin mek pipul dɛn we de put dɛnsɛf dɔŋ kin gɛt gladi-at?

¹⁷ We wi put wisɛf dɔŋ, dat go mɔs mek wi gɛt gladi-at. Wetin mek? We wi no se nɔto ɔltin wi ebul fɔ du, wi go gladi fɔ ɛnitin we ɔda pipul dɛn go du fɔ ɛp wi. Fɔ ɛgzampul, tink bɔt di tɛm we Jizɔs bin mɛn dɛn tɛn man dɛn we bin gɛt lɛprɔsi. Na wangren wan bin kam bak fɔ tɛl Jizɔs tɛnki fɔ we i mɛn di bad bad sik we i bin gɛt. Dis na sɔntin we di man nɔ bin fɔ ɛva du fɔ insɛf. Na dat mek i bin tɛl Jizɔs tɛnki fɔ we i ɛp am, ɛn i prez Gɔd fɔ dat.—Lyuk 17:​11-19.

18. We wi put wisɛf dɔŋ, aw dat go ɛp wi fɔ trit ɔda pipul dɛn fayn? (Romans 12:​10)

¹⁸ Pipul dɛn we ɔmbul kin ebul trit ɔda pipul dɛn fayn ɛn dɛn kin gɛt tayt padi biznɛs wit ɔda pipul dɛn. Wetin mek? Bikɔs dɛn no se ɔda pipul dɛn gɛt fayn kwaliti dɛn, ɛn dɛn kin gɛt kɔnfidɛns pan dɛn. Pipul dɛn we ɔmbul kin gladi we ɔda pipul dɛn du wɛl wit ɛni wok we dɛn gɛt, ɛn dɛn nɔ kin westɛm fɔ tɛl dɛn tɛnki ɛn ɔnɔ dɛn.—Rid Romans 12:​10.

19. Wetin na sɔm rizin dɛn we mek wi nɔ fɔ mek prawd?

 ¹⁹ Pipul dɛn we prawd difrɛn frɔm pipul dɛn we de put dɛnsɛf dɔŋ. I kin at fɔ lɛ prawd pipul dɛn tɛl ɔda pipul dɛn tɛnki, bifo dat dɛn kin want lɛ dɛn prez dɛn. Bɔku tɛm, dɛn kin kɔmpia dɛnsɛf wit ɔda pipul dɛn ɛn tray fɔ sho se dɛn bɛtɛ pas dɛn. Dɛn nɔ de tren ɔda pipul dɛn ɔ gi dɛn wok fɔ du. Bifo dat, dɛn kin tink se if ɔda pɔsin du sɔntin i nɔ go kɔmɔt fayn, pas dɛn du am fɔ dɛnsɛf. Pɔsin we prawd de mek lɛk se i impɔtant pas ɔda pipul dɛn ɛn i kin jɛlɔs if ɔda pɔsin du wɛl pas am. (Gal. 5:​26) I nɔ kin izi fɔ lɛ dɛn kayn pipul dɛn de gɛt tru tru padi dɛn. If wi notis se wi dɔn bigin mek prawd, wi fɔ rili pre to Jiova fɔ mek i ɛp wi so dat wi go ebul fɔ ‘chenj di we aw wi de tink’ fɔ lɛ dis bad abit nɔ kɔntinyu fɔ de insay wi.—Rom. 12:​2.

20. Wetin mek wi fɔ put wisɛf dɔŋ?

²⁰ Wi rili gladi fɔ Jiova in fayn ɛgzampul! Wi kin si se i ɔmbul bay di we aw i de trit in savant dɛn, ɛn wi want fɔ falamakata am. Apat frɔm dat, wi want fɔ falamakata Jiova in savant dɛn na di Baybul we bin put dɛnsɛf dɔŋ. I go fayn fɔ mek ɔltɛm wi gi Jiova di glori ɛn di ɔnɔ we i fit fɔ gɛt. (Rɛv. 4:​11) If wi du ɔl dɛn tin ya, wi go kɔntinyu fɔ bi Jiova in padi sote go bikɔs i lɛk pipul dɛn we de put dɛnsɛf dɔŋ.