1. Us big big ɔnɔ wi gɛt?

NA BIG big ɔnɔ wi gɛt fɔ de na Jiova in kɔngrigeshɔn! Di kɔngrigeshɔn tan lɛk Paradays usay wi de ɛnjɔy pis ɛn gladi-at. Us wok yu gɛt na di kɔngrigeshɔn?

2. Us ɛgzampul we apɔsul Pɔl bin yuz insay sɔm lɛta dɛn we Gɔd bin yuz in spirit fɔ mek i rayt?

² Wi kin lan mɔ bɔt dis wok frɔm di ɛgzampul we apɔsul Pɔl bin yuz insay sɔm lɛta dɛn we Gɔd bin yuz in spirit fɔ mek i rayt. Insay ɛniwan pan dɛn lɛta dɛn de, Pɔl kɔmpia di kɔngrigeshɔn to mɔtalman bɔdi. Dɔn i kɔmpia ɔlman we de na di kɔngrigeshɔn to di difrɛn pat dɛn we de na di bɔdi.—Rom. 12:​4-8; 1 Kɔr. 12:​12-27; Ɛfi. 4:​16.

3. Us tri lɛsin dɛn wi go tɔk bɔt insay dis atikul?

³ Insay dis atikul, wi go tɔk bɔt tri impɔtant lɛsin dɛn we wi go lan frɔm di ɛgzampul we Pɔl bin yuz. Fɔs, wi go lan se wi ɔl gɛt wok * na Jiova in kɔngrigeshɔn. Sɛkɔn, wi go tɔk bɔt wetin wi kin du if wi nɔ ebul fɔ ɔndastand di wok we wi gɛt na di kɔngrigeshɔn. Ɛn tɔd, wi go tɔk bɔt wetin mek wi fɔ pe atɛnshɔn pan di wok we Jiova dɔn gi wi na di kɔngrigeshɔn.

4. Wetin Romans 12:​4, 5 de tich wi?

⁴ Di fɔs lɛsin we wi lan frɔm di ɛgzampul we Pɔl bin yuz na dat wi ɔl gɛt impɔtant wok na Jiova in famili. Pɔl bin stat fɔ tɔk bɔt di ɛgzampul bay we i se: “Jɔs lɛk aw wan bɔdi kin gɛt bɔku pat dɛn, bɔt ɔl di pat dɛn nɔ de du di sem wok, na so bak pan ɔl we wi bɔku, wi na wan bɔdi we gɛt wanwɔd wit Krays, ɛn wi na pat dɛn we jɔyn togɛda.” (Rom. 12:​4, 5) Wetin Pɔl bin min? I bin de tray fɔ se pan ɔl we wi ɔl gɛt difrɛn wok na di kɔngrigeshɔn, wi ɔl gɛt valyu.

5. Us “gift” dɛn Jiova dɔn gi di kɔngrigeshɔn?

⁵ We yu de tink bɔt di wan dɛn we gɛt wok na di kɔngrigeshɔn, sɔntɛm na di wan dɛn we de oba wi fɔs yu go tink bɔt. (1 Tɛs. 5:​12; Ibru. 13:​17) Na tru se Jiova dɔn yuz Jizɔs fɔ gi “sɔm man dɛn as gift” to In kɔngrigeshɔn. (Ɛfi. 4:​8) Dɛn “man dɛn” ya na di Gɔvnin Bɔdi mɛmba dɛn, di wan dɛn we de ɛp di Gɔvnin Bɔdi, Branch Kɔmiti mɛmba dɛn, sakit ovasia dɛn, di wan dɛn we de tich na tiokratik skul dɛn, kɔngrigeshɔn ɛlda dɛn, ɛn ministerial savant dɛn. Na di oli spirit pik ɔl dɛn brɔda dɛn ya fɔ kia fɔ Jiova in ship dɛn ɛn fɔ wok tranga wan fɔ ɛp di kɔngrigeshɔn.—1 Pit. 5:​2, 3.

6. Frɔm wetin de na 1 Tɛsalonians 2:​6-8, wetin di brɔda dɛn we di oli spirit dɔn pik de du?

⁶ Na oli spirit de pik brɔda dɛn fɔ du difrɛn wok dɛn. Jɔs lɛk aw di difrɛn pat dɛn na di bɔdi lɛk di an ɛn di fut dɛn de wok fɔ bɛnifit di bɔdi, na so brɔda dɛn we di oli spirit dɔn pik de wok tranga wan fɔ bɛnifit di kɔngrigeshɔn. Dɛn nɔ de tray fɔ mek ɔda pipul dɛn prez dɛn. Bifo dat, dɛn de du dɛn bɛst fɔ ɛp di brɔda ɛn sista dɛn. (Rid 1 Tɛsalonians 2:​6-8.) Wi de tɛl Jiova tɛnki fɔ dɛn brɔda dɛn ya we de put wetin ɔda brɔda ɛn sista dɛn nid bifo dɛn yon!

7. Us blɛsin dɛn we bɔku pan di wan dɛn we de yuz bɔku pan dɛn tɛm fɔ prich de ɛnjɔy?

⁷ Dɛn kin pik sɔm brɔda ɛn sista dɛn na di kɔngrigeshɔn fɔ sav as mishɔnari, spɛshal payɔnia, ɔ rɛgyula payɔnia. Infakt, sɔm brɔda ɛn sista dɛn we de ɔlsay na di wɔl dɔn tek di wok fɔ prich ɛn mek pipul dɛn bi Jizɔs in disaypul as di wok we dɛn dɔn disayd fɔ yuz bɔku pan dɛn tɛm fɔ du. Bikɔs ɔf dat, dɛn dɔn ɛp bɔku pipul dɛn fɔ bi Jizɔs Krays in disaypul dɛn. Pan ɔl we i bi se bɔku pan dɛn brɔda ɛn sista dɛn ya nɔ gɛt bɔku mɔni ɛn prɔpati, Jiova dɔn gi dɛn bɔku blɛsin dɛn. (Mak 10:​29, 30) Wi rili lɛk dɛn ɛn wi gladi fɔ we dɛn de na wi kɔngrigeshɔn!

8. Wetin mek ɔl di wan dɛn we de prich di gud nyuz gɛt valyu to Jiova?

⁸ Fɔ se na di wan dɛn we de oba wi ɛn di wan dɛn we de yuz bɔku pan dɛn tɛm fɔ du di prichin wok nɔmɔ gɛt wok insay di kɔngrigeshɔn? Nɔ, nɔto dɛn nɔmɔ! Ɔl di pɔblisha dɛn we de prich di gud nyuz impɔtant to Gɔd ɛn di kɔngrigeshɔn. (Rom. 10:​15; 1 Kɔr. 3:​6-9) Infakt, di tin we impɔtant pas ɔl to di kɔngrigeshɔn na fɔ mek pipul dɛn bi Jizɔs Krays in disaypul. (Mat. 28:​19, 20; 1 Tim. 2:​4) Ɔl di wan dɛn we de prich de tray tranga wan fɔ mek dis wok bi di tin we impɔtant pas ɔl na dɛn layf.—Mat. 24:​14.

9. Wetin mek wi valyu wi Kristian sista dɛn?

 ⁹ Jiova sho se i rɛspɛkt sista dɛn bay we i gi dɛn impɔtant wok na di kɔngrigeshɔn. I valyu wɛf dɛn, mama dɛn, uman dɛn we dɛn man dɔn day, ɛn sista dɛn we nɔ mared we de sav am fetful wan. Bɔku tɛm, di Baybul kin tɔk bɔt uman dɛn we bin de mek Gɔd gladi. Ɛn wi kin lan bɔt di fayn we aw dɛn bin de du gud wok, ɛn sho se dɛn gɛt sɛns, fet, zil, maynd, ɛn fri-an. (Lyuk 8:​2, 3; Akt 16:​14, 15; Rom. 16:​3, 6; Fil. 4:​3; Ibru. 11:​11, 31, 35) Wi de tɛl Jiova plɛnti tɛnki fɔ wi Kristian sista dɛn we gɛt dɛn sem fayn kwaliti dɛn ya!

10. Wetin mek wi valyu wi brɔda ɛn sista dɛn we dɔn ol?

¹⁰ Wi gladi bak fɔ we wi gɛt bɔku ol wan dɛn na di kɔngrigeshɔn. Sɔm kɔngrigeshɔn dɛn gɛt ol brɔda ɛn sista dɛn we dɔn de sav Jiova fetful wan frɔm we dɛn smɔl. I go bi se sɔm ɔda wan dɛn lan bɔt Jiova we dɛn dɔn ol. Bɔt ilɛk ustɛm dɛn ol brɔda ɛn sista dɛn ya lan bɔt Jiova, dɛn stil de gɛt wɛlbɔdi prɔblɛm bikɔs ɔf ol ej. Ɛn sɔntɛnde, dɛn prɔblɛm ya kin mek dɛn nɔ ebul fɔ du ɔl wetin dɛn kin want fɔ du na di kɔngrigeshɔn ɛn di prichin wok. Bɔt stil, dɛn ol brɔda ɛn sista dɛn ya kin du wetin dɛn ebul na di prichin wok, ɛn yuz ɔl dɛn trɛnk fɔ ɛnkɔrej ɛn tren ɔda wan dɛn! Ɛn wi de rili bɛnifit frɔm dɛn ɛkspiriɛns. Dɛn rili gɛt valyu to Jiova ɛn to wi.—Prɔv. 16:​31.

11-12. Wetin di yɔŋ wan dɛn na yu kɔngrigeshɔn kin du we kin mek yu gladi?

¹¹ Tink bak bɔt wi yɔŋ wan dɛn. Bɔku tin nɔ kin izi fɔ dɛn we dɛn de gro ɔp na dis wikɛd wɔl we Setan de kɔntrol ɛn we ful-ɔp wit in bad bad aydia dɛn. (1 Jɔn 5:​19) Bɔt wi ɔl kin gladi we yɔŋ wan dɛn de gi kɔmɛnt na mitin, go fil savis, ɛn we dɛn nɔ de fred fɔ tɔk bɔt wetin dɛn biliv. Yɔŋ wan dɛn,  unasɛf gɛt impɔtant wok na Jiova in kɔngrigeshɔn!—Sam 8:​2.

¹² I nɔ kin izi fɔ lɛ sɔm pan wi brɔda ɛn sista dɛn biliv se dɛn gɛt wok na di kɔngrigeshɔn. Wetin go ɛp wi ɔl fɔ no se wi gɛt wok na di kɔngrigeshɔn? Lɛ wi si.

13-14. Wetin mek sɔm brɔda ɛn sista dɛn kin tink se dɛn nɔ gɛt valyu na di kɔngrigeshɔn?

¹³ Di sɛkɔn lɛsin we wi kin lan frɔm di ɛgzampul we Pɔl bin yuz de mek wi tink bɔt wan prɔblɛm we bɔku brɔda ɛn sista dɛn kin gɛt tide. I nɔ kin izi fɔ lɛ bɔku pan dɛn tink se dɛn gɛt wok na di kɔngrigeshɔn. Pɔl bin rayt se: “If di fut se, ‘Bikɔs mi nɔto an, a nɔ de pan di bɔdi,’ dat nɔ min se i nɔ de pan di bɔdi. Ɛn if di yes se, ‘Bikɔs mi nɔto yay, a nɔ de pan di bɔdi,’ dat nɔ min se i nɔ de pan di bɔdi.” (1 Kɔr. 12:​15, 16) Wetin na di lɛsin?

¹⁴ If yu kɔmpia yusɛf to ɔda pipul dɛn na di kɔngrigeshɔn, yu go bigin fɔ tink se yu nɔ gɛt valyu na di kɔngrigeshɔn. Sɔm pipul dɛn na di kɔngrigeshɔn sabi fɔ tich, sɔm sabi ɔganayz, ɔ ɔda wan dɛn sabi fɔ ɛnkɔrej dɛn brɔda ɛn sista dɛn. Sɔntɛm yu go de tink se yu nɔ sabi du dɛn wok dɛn de lɛk aw ɔda brɔda dɛn de du am. If yu de tink da we de, dis sho se yu ɔmbul ɛn yu no se nɔto ɔltin yu ebul fɔ du. (Fil. 2:​3) Bɔt yu fɔ tek tɛm. If ɔltɛm yu de kɔmpia yusɛf to ɔda pipul dɛn we sabi du sɔm patikyula tin dɛn, dat go mek yu at pwɛl. Ɛn jɔs lɛk aw Pɔl tɔk, sɔntɛm yu go ivin tink se yu nɔ gɛt no wok na di kɔngrigeshɔn. Wetin go mek yu lɛf fɔ tink da we de?

15. Frɔm wetin de na 1 Kɔrintians 12:​4-11, wetin wi nid fɔ no bɔt ɛni gift we wi gɛt?

¹⁵ Tink bɔt dis: Jiova bin yuz in oli spirit fɔ gi sɔm fɔstɛm Kristian dɛn gift fɔ pafɔm mirekul, bɔt dɛn ɔl nɔ bin gɛt  di sem gift. (Rid 1 Kɔrintians 12:​4-11.) Jiova bin gi di Kristian dɛn difrɛn gift ɛn patikyula tin dɛn we dɛn bin sabi du, bɔt dɛn ɔl bin gɛt valyu. Tide, wi nɔ gɛt di gift we di oli spirit de gi fɔ pafɔm mirekul. Bɔt wi kin lan lɛsin frɔm dat. Wi ɔl nɔ go sabi du di sem tin dɛn, bɔt Jiova stil valyu wi ɔl.

16. Us advays we Pɔl bin gi we wi nid fɔ fala?

¹⁶ Bifo wi kɔmpia wisɛf to ɔda Kristian dɛn, wi nid fɔ fala di advays we Gɔd bin yuz in spirit fɔ mek apɔsul Pɔl rayt, we i se: “Lɛ ɔlman wach di tin dɛn we i de du, ɛn i go gɛt rizin fɔ gladi fɔ wetin i dɔn du. I nɔ fɔ kɔmpia insɛf wit ɔda pɔsin.”—Gal. 6:​4.

17. Aw wi go bɛnifit if wi fala Pɔl in advays?

¹⁷ If wi fala Pɔl in advays ɛn tink gud wan bɔt di tin dɛn we wi de du, sɔntɛm wi go bigin fɔ si se wi gɛt gift dɛn we ɔda pipul dɛn nɔ gɛt. Fɔ ɛgzampul, i go bi se wan ɛlda nɔ sabi gi fayn tɔk, bɔt i sabi aw fɔ mek disaypul. Ɔ i nɔ go sabi fɔ ɔganayz tin dɛn lɛk ɔda ɛlda dɛn na in kɔngrigeshɔn, bɔt i go bi se in na nays ɛlda ɛn pɔblisha dɛn kin fil fri fɔ aks am fɔ advays frɔm di Baybul. Ɔ sɔntɛm dɛn sabi am as ɛlda we lɛk fɔ du gud. (Ibru. 13:​2, 16) We wi si klia wan se wisɛf gɛt gift ɛn tin dɛn we wi sabi fɔ du, dat go mek wi fil gud bɔt di tin dɛn we wi de du fɔ ɛp na di kɔngrigeshɔn. Ɛn wi nɔ go jɛlɔs wi brɔda dɛn we gɛt gift we wi nɔ gɛt.

18. Wetin go ɛp wi fɔ du di tin dɛn we wi sabi fɔ du mɔ ɛn mɔ?

¹⁸ Ilɛk us wok wi de du na di kɔngrigeshɔn, wi ɔl fɔ tray fɔ du mɔ as wi de sav Jiova ɛn fɔ lan aw fɔ du di tin we wi sabi fɔ du mɔ ɛn mɔ. Fɔ mek wi go ebul du dɛn tin ya mɔ ɛn mɔ, Jiova de yuz in ɔganayzeshɔn fɔ tren wi. Fɔ ɛgzampul, we wi kin go mitin insay di wik, wi kin lan aw fɔ du mɔ na wi prichin wok. Yu de yuz di trenin we yu de gɛt na da mitin de?

19. Wetin yu go du fɔ mek yu go ebul fɔ go di Skul fɔ Pipul dɛn We De Prich bɔt Gɔd in Kiŋdɔm?

¹⁹ Wan ɔda fayn we aw Jiova de tren wi na we i de yuz di Skul fɔ Pipul dɛn We De Prich bɔt Gɔd in Kiŋdɔm. Dis skul de fɔ brɔda ɛn sista dɛn we de yuz bɔku pan dɛn tɛm fɔ prich ɛn we ol 23 ia to 65 ia. Sɔntɛm yu go de tink se yu nɔ go ɛva ebul go di skul. Bɔt bifo yu bigin tink bɔt wetin mek yu nɔ go ebul go dis skul, tink bɔt wetin mek yu want fɔ go di skul. Dɔn mek plan we go ɛp yu fɔ go dis skul. If yu wok tranga wan Jiova go ɛp yu mek yu ebul fɔ go di skul.

20. Wetin wi kin lan frɔm Romans 12:​6-8?

²⁰ Di tɔd lɛsin we wi kin lan frɔm di ɛgzampul we Pɔl bin yuz de na Romans 12:​6-8. (Rid.) Pɔl tɔk bak na dɛn vas ya se ɔlman na di kɔngrigeshɔn gɛt difrɛn gift. Bɔt naw i se wi fɔ yuz ɛni gift we wi gɛt fɔ ɛp di kɔngrigeshɔn.

21-22. Us lɛsin wi lan frɔm Rɔbɔt ɛn Filiche?

²¹ Tink bɔt wetin apin to wan brɔda we nem Rɔbɔt. Afta we i dɔn wok na Bɛtɛl insay ɔda kɔntri, dɛn bin sɛn am fɔ wok na di Bɛtɛl we de na in yon kɔntri. Pan ɔl we dɛn tɛl am se nɔto bikɔs i du bad mek dɛn de sɛn am bak, i se: “A nɔ bin gladi fɔ sɔm tɛm bikɔs a bin tink se a nɔ du wɛl usay a bin de.  Sɔntɛnde, a bin want fɔ stɔp fɔ wok na Bɛtɛl.” Wetin bin ɛp am fɔ gɛt gladi-at bak? In kɔmpin ɛlda bin mɛmba am se Jiova kin tren wi usay wi bin de so dat wi go ebul fɔ du mɔ usay wi dɔn kam. Rɔbɔt kam fɔ si se i nid fɔ lɛf fɔ tink bɔt wetin dɔn pas ɛn bigin fɔ pe atɛnshɔn pan wetin i ebul fɔ du rayt naw.

²² Dis sem kayn tin bin apin to Brɔda Filiche Ɛpiskopo. In ɛn in wɛf bin gradyuet frɔm Giliad insay 1956, ɛn dɛn bin du sakit wok na Bolivia. Insay 1964, dɛn bɔn wan pikin. Filiche bin se: “Wi bin lɛk wi asaynmɛnt, so i nɔ bin izi fɔ lɛf am. Mi at bin pwɛl fɔ wan ol ia. Bɔt Jiova bin ɛp mi fɔ chenj di we aw a bin de tink ɛn fɔ bi gud papa.” Yu kin fil lɛk Rɔbɔt ɛn Filiche? Yu at kin pwɛl bikɔs yu nɔ de du di sem wok we yu bin de du trade na Jiova in ɔganayzeshɔn? If na so i bi, yu go gladi mɔ if yu pe atɛnshɔn pan wetin yu de du rayt naw fɔ sav Jiova ɛn yu brɔda dɛn. We yu kɔntinyu fɔ du yu wok ɛn yuz yu gift fɔ ɛp ɔda pipul dɛn, yu go gɛt gladi-at we yu de ɛp di kɔngrigeshɔn.

23. Wetin wi fɔ tek tɛm du? Wetin wi go tɔk bɔt insay di nɛks atikul?

²³ Jiova valyu wi ɔl. I want fɔ lɛ wi de na in famili. If wi de tek tɛm tink bɔt wetin wi go du fɔ ɛp wi brɔda ɛn sista dɛn ɛn tray tranga wan fɔ ɛp dɛn, i nɔ go izi fɔ lɛ wi fil se wi nɔ gɛt wok na di kɔngrigeshɔn. Bɔt wetin wi go se bɔt aw wi de si wi brɔda ɛn sista dɛn na di kɔngrigeshɔn? Aw wi go sho se wi lɛk ɛn rɛspɛkt dɛn? Wi go tɔk bɔt dat insay di nɛks atikul.