1. Wetin kin kam na wi maynd we wi tink bɔt ɔl di tin dɛn we Jiova mek?

WE WI tink bɔt ɔl di tin dɛn we Jiova mek, sɔntɛm wi go fil lɛk Devid, we na wan pan di man dɛn we rayt di sam buk, we bin pre ɛn aks se: “Wɛn a tink bɔt di tin dɛn ɔp klawd we yu tek yu an mek, di mun ɛn di sta dɛn we yu put na di skay, i kin mek a tink se udat na mɔtalman we yu bisin bɔt am bifo a se mi we yu [bisin] bɔt?” (Sam. 8:3, 4) Jɔs lɛk Devid, sɔntɛm wi go tink bɔt aw wi smɔl we wi kɔmpia wisɛf to di sta dɛn we Jiova mek ɛn sɔprayz fɔ no se Jiova de pe atɛnshɔn to wi. Bɔt wi go lan se Jiova nɔ bin jɔs bisin bɔt di fɔs mɔtalman dɛn we i bin mek, we na Adam ɛn Iv, bɔt i bin mek dɛn bi pat ɔf in famili.

2. Wetin Jiova bin want Adam ɛn Iv dɛn fɔ du?

² Adam ɛn Iv na bin Jiova in fɔs pikin dɛn na di wɔl, ɛn Jiova na bin dɛn Papa we de na ɛvin we rili lɛk dɛn. I bin gi dɛn wok fɔ du. Gɔd bin tɛl dɛn se: “Una bɔn bɔku pikin dɛn, fɔ mek una de ɔlsay na di wɔl ɛn kɔntrol di wɔl.” (Jɛn. 1:28) I bin want dɛn fɔ bɔn pikin dɛn ɛn kia fɔ di wɔl. If Adam ɛn Iv bin fɔ dɔn obe ɛn du wetin Gɔd tɛl dɛn fɔ du, dɛn ɛn dɛn pikin dɛn bin fɔ kɔntinyu fɔ de na Gɔd in famili sote go.

3. Wetin mek wi go se Adam ɛn Iv bin gɛt impɔtant wok na Jiova in famili?

³ Adam ɛn Iv bin gɛt impɔtant wok na Jiova in famili. Na Sam 8:5 (NWT), na dis Devid bin se bɔt aw Jiova mek mɔtalman: “Yu mek enjɛl dɛn pas am smɔl, ɛn yu gi am glori ɛn ɔnɔ we tan lɛk krawn.” Na tru se Jiova nɔ  gi mɔtalman di sem pawa, sɛns, ɛn kwaliti dɛn we enjɛl dɛn gɛt. (Sam 103:20) Bɔt dɛn pawaful enjɛl dɛn de jɔs “pas mɔtalman smɔl.” Jɔs imajin dat! We Jiova bin mek wi fɔs mama ɛn papa, i bin gi dɛn wɔndaful layf.

4. Wetin bin apin to Adam ɛn Iv we dɛn nɔ bin obe Jiova, ɛn wetin wi go tɔk bɔt insay dis atikul?

 ⁴ I sɔri fɔ no se bikɔs Adam ɛn Iv nɔ bin obe Jiova, dɛn nɔ bin kɔntinyu fɔ de na In famili. Dis dɔn briŋ big big prɔblɛm pan dɛn pikin dɛn, as wi go lan leta na dis atikul. Bɔt wetin Jiova want nɔ chenj. I want mɔtalman dɛn we de obe am fɔ bi in pikin dɛn sote go. Fɔs, lɛ wi tɔk bɔt aw Jiova dɔn ɔnɔ wi. Wi go tɔk bak bɔt wetin wi go du naw fɔ sho se wi want fɔ de na Gɔd in famili. Dɔn, wi go tɔk bɔt di blɛsin dɛn we Jiova in pikin dɛn na dis wɔl go ɛnjɔy sote go.

5. Aw wi go ɔnɔ Gɔd fɔ we i gi wi kwaliti dɛn we i gɛt?

⁵Jiova ɔnɔ wi bay we i mek wi lɛk aw insɛf tan. (Jɛn. 1:26, 27, NWT) Bikɔs Gɔd mek wi lɛk aw insɛf tan, wi ebul fɔ gɛt ɛn sho bɔku pan in wɔndaful kwaliti dɛn lɛk lɔv, sɔri-at, fɔ bi pɔsin we nɔ de kɔmɔt biɛn in kɔmpin, ɛn fɔ du wetin rayt. (Sam 86:15; 145:17) We wi tray fɔ gɛt dɛn kwaliti dɛn de, wi de ɔnɔ Jiova ɛn pruv se wi gladi fɔ wetin i du fɔ wi. (1 Pit. 1:14-16) We wi du sɔntin we de mek wi Papa we de na ɛvin gladi, dat de mek wi fil fayn. Dɔn bak, bikɔs wi gɛt di kwaliti dɛn we Jiova gɛt, wi go ebul fɔ bi di kayn pipul dɛn we i want na in famili.

6. Aw Jiova bin ɔnɔ mɔtalman di tɛm we i mek di wɔl?

⁶Jiova mek spɛshal ples fɔ lɛ wi de. Lɔng lɔng tɛm bifo Jiova mek di fɔs man, i bin dɔn mek di wɔl fɔ mɔtalman. (Job 38:4-6; Jɛr. 10:12) Bikɔs Jiova gud ɛn i gɛt fri-an, i mek bɔku fayn tin dɛn fɔ lɛ wi ɛnjɔy. (Sam 104:14, 15, 24) Tɛm dɛn bin de we i bin de tink bɔt di tin dɛn we i dɔn mek, ɛn i bin si se dɛn “gud.” (Jɛn. 1:10, 12, 31) I ɔnɔ mɔtalman bay we i mek am “bɔsman oba” ɔl di fayn tin dɛn we i bin dɔn mek na di wɔl. (Sam 8:6) Di tin we Gɔd want na fɔ mek pafɛkt mɔtalman dɛn kia fɔ di tin dɛn we i dɔn mek na di wɔl ɛn fɔ lɛ dɛn ɛnjɔy fɔ du dat sote go. Yu kin tɛl Jiova tɛnki ɔltɛm fɔ da wɔndaful prɔmis de?

7. Aw Jɔshwa 24:15 sho se mɔtalman gɛt fridɔm fɔ disayd wetin i want fɔ du?

⁷Jiova dɔn gi wi di fridɔm fɔ disayd wetin wi want fɔ du. I lɛf to wi fɔ disayd aw wi go liv wi layf. (Rid Jɔshwa 24:15.) Wi Gɔd lɛk wi, ɛn i kin gladi we wi disayd fɔ sav am. (Sam 84:11; Prɔv. 27:11) Wi kin yuz wi fridɔm fɔ du bɔku fayn tin dɛn. Lɛ wi tɔk bɔt di ɛgzampul we Jizɔs sɛt fɔ wi.

8. Gi wan ɛgzampul bɔt aw Jizɔs bin yuz in fridɔm.

⁸ Wi go falamakta Jizɔs bay we wi disayd fɔ put wetin ɔda pipul dɛn want bifo wi yon. Wan de, we Jizɔs ɛn in apɔsul dɛn bin dɔn taya bad bad wan, dɛn bin go na wan kwayɛt ples usay dɛn bin op se dɛn go rɛst. Bɔt dɛn nɔ bin ebul fɔ rɛst. Bɔku bɔku pipul dɛn bin fɛn dɛn, ɛn dɛn bin rili want fɔ mek Jizɔs tich dɛn. Jizɔs nɔ bin vɛks. Bifo dat, i sɔri fɔ di pipul dɛn. So wetin  Jizɔs bin du? “I bigin fɔ tich dɛn bɔku tin.” (Mak 6:30-34) We wi falamakata Jizɔs bay we wi de yuz wi tɛm ɛn ɛnaji fɔ ɛp ɔda pipul dɛn, wi de briŋ prez to wi Papa we de na ɛvin. (Mat. 5:14-16) Dɔn bak, wi de sho Jiova se wi want fɔ de na in famili.

9. Us spɛshal gift Jiova gi mɔtalman?

⁹Jiova mek mɔtalman dɛn ebul fɔ bɔn pikin dɛn, ɛn i gi dɛn di wok fɔ tich dɛn pikin dɛn fɔ lɛk am ɛn sav am. If yu na mama ɔ papa, yu gladi fɔ dis spɛshal gift? Pan ɔl we Jiova rili blɛs di enjɛl dɛn, i nɔ gi dɛn dis big big ɔnɔ. So if yu na mama ɔ papa, na fɔ gladi ɔltɛm fɔ di ɔnɔ we yu gɛt fɔ mɛn pikin dɛn. Di impɔtant wok we mama ɛn papa dɛn gɛt as dɛn de mɛn dɛn pikin dɛn na fɔ “kɔrɛkt dɛn ɛn tren dɛn lɛk aw Jiova se.” (Ɛfi. 6:4; Dit. 6:5-7; Sam 127:3) Gɔd in ɔganayzeshɔn de ɛp mama ɛn papa dɛn bay we dɛn de gi dɛn bɔku tin dɛn we kɔmɔt frɔm di Baybul, lɛk wi pɔblikeshɔn dɛn, vidio dɛn, myuzik, ɛn atikul dɛn we de na wi wɛbsayt. Dis sho klia wan se wi Papa we de na ɛvin ɛn in Pikin rili lɛk di yɔŋ wan dɛn. (Lyuk 18:15-17) We mama ɛn papa dɛn de abop pan Jiova ɛn du dɛn bɛst fɔ kia fɔ dɛn pikin dɛn, dat de mek Jiova gladi. Ɛn dɛn kayn mama ɛn papa dɛn ya de ɛp dɛn pikin dɛn fɔ gɛt di op fɔ de na Jiova in famili sote go!

10-11. Wetin Jiova dɔn mek pɔsibul fɔ wi bikɔs ɔf Jizɔs in sakrifays?

¹⁰Jiova gi in Pikin we i rili lɛk so dat wi go de In famili bak. As wi bin dɔn tɔk na  paregraf 4, we Adam ɛn Iv bin sin, dɛn ɛn dɛn pikin dɛn nɔ kɔntinyu fɔ de na Jiova in famili. (Rom. 5:12) Adam ɛn Iv bin disayd nɔ fɔ obe Gɔd, so i fit fɔ mek Gɔd pul dɛn kɔmɔt na in famili. Bɔt wetin go apin to dɛn pikin dɛn? Jiova lɛk mɔtalman, so i mek we fɔ lɛ i go adɔpt dɛn pikin dɛn we obe am. I du dis bay we i sakrifays in wangren Pikin we insɛf sɛf mek, we na Jizɔs Krays. (Jɔn 3:16; Rom. 5:19) Jizɔs in sakrifays mek am pɔsibul fɔ lɛ Jiova adɔpt 144,000 fetful mɔtalman dɛn.​—Rom. 8:15-17; Rɛv. 14:1.

¹¹ Dɔn bak, ɔda bɔku bɔku fetful mɔtalman dɛn de we de obe Gɔd ɛn du wetin i want. Dɛn gɛt op fɔ de na Jiova in famili afta di las tɛst di tɛm we di 1,000 ia go dɔn. (Sam 25:14; Rom. 8:20, 21) Bikɔs dɛn gɛt da op de, dɛn ɔlrɛdi de kɔl Jiova, di Wan we mek dɛn, “Papa.” (Mat. 6:9) Di wan dɛn we go gɛt layf bak dɛnsɛf go gɛt di chans fɔ lan bɔt wetin Jiova want dɛn fɔ du. Dɔn bak, di wan dɛn we disayd fɔ du wetin i tɛl dɛn go leta de na in famili.

12. Us kwɛstyɔn wi de kam ansa?

¹² As wi dɔn lan, Jiova dɔn ɔlrɛdi du bɔku tin dɛn fɔ ɔnɔ mɔtalman. I dɔn ɔlrɛdi adɔpt anɔyntɛd Kristian dɛn as in pikin dɛn, ɛn i dɔn gi di wan dɛn we de pat ɔf di “bɔku bɔku pipul dɛn” di op fɔ bi in pikin dɛn insay di nyu wɔl. (Rɛv. 7:9) Wetin wi go du naw fɔ sho Jiova se wi want fɔ de na in famili sote go?

13. Wetin wi go du fɔ de na Jiova in famili? (Mak 12:30)

¹³Sho se yu lɛk Jiova bay we yu de wɔship am wit ɔl yu at. (Rid Mak  12:30.) Gɔd dɔn gi wi bɔku gift dɛn. Wan pan di bɛst gift dɛn we i dɔn gi wi, na we wi ebul fɔ wɔship am. Wi go sho Jiova se wi lɛk am bay we wi de “obe in lɔ dɛn.” (1 Jɔn 5:3) Wan pan di lɔ dɛn we Jiova want wi fɔ obe na di wan we Jizɔs bin gi, dat na fɔ mek disaypul dɛn ɛn baptayz dɛn. (Mat. 28:19) Dɔn bak, i tɛl wi fɔ lɛk wi kɔmpin dɛn. (Jɔn 13:35) Jiova go mek di wan dɛn we de obe in lɔ dɛn de na in famili we de wɔship am ɔlsay na di wɔl.​—Sam 15:1, 2.

14. Aw wi go sho se wi lɛk ɔda pipul dɛn? (Matyu 9:36-38; Romans 12:10)

¹⁴Sho se yu lɛk ɔda pipul dɛn. Lɔv na Jiova in kwaliti we impɔtant pas ɔl. (1 Jɔn 4:8) Jiova bin dɔn sho se i lɛk wi bifo wi ivin no am. (1 Jɔn 4:9, 10) Wi go falamakata am we wi sho se wi lɛk ɔda pipul dɛn. (Ɛfi. 5:1) Wan fayn we we wi go sho se wi lɛk pipul dɛn na bay we wi ɛp dɛn fɔ lan bɔt Jiova naw we tɛm stil de. (Rid Matyu 9:36-38.) We wi du dat, wi go ɛp dɛn fɔ no wetin dɛn nid fɔ du fɔ mek dɛn go gɛt chans fɔ de na Jiova in famili. Afta pɔsin baptayz, wi fɔ kɔntinyu fɔ lɛk ɛn rɛspɛkt am. (1 Jɔn 4:20, 21) Aw wi go du dat? Wan ɛgzampul na we wi biliv se na gud rizin mek i kam na di trut. So if wi nɔ ɔndastand wetin mek i du sɔntin, wi nɔ go tink se i du am bikɔs i jɔs bisin bɔt insɛf. Bifo dat, wi go sho ɔnɔ to wi brɔda ɔ sista ɛn tink se i bɛtɛ pas wi.​—Rid Romans 12:10; Fil. 2:3.

15. To udat wi fɔ sho sɔri-at ɛn du gud?

¹⁵Sho se yu gɛt sɔri-at ɛn du gud to ɔlman. If wi want fɔ de na Jiova in famili sote go, wi fɔ du wetin Gɔd in Wɔd se. Fɔ ɛgzampul, Jizɔs bin tich se wi fɔ sho sɔri-at ɛn du gud to ɔlman, ivin wi ɛnimi dɛn. (Lyuk 6:32-36) Sɔntɛnde, dat nɔ kin izi fɔ du. If na so i bi, wi fɔ lan fɔ tink ɛn du tin lɛk Jizɔs. We wi du wi bɛst fɔ obe Jiova ɛn falamakata Jizɔs, wi de sho wi Papa we de na ɛvin se wi want fɔ de na in famili sote go.

16. Aw wi go protɛkt di gudnem we Jiova in famili gɛt?

¹⁶Protɛkt di gudnem we Jiova in famili gɛt. Insay famili, bɔku tɛm smɔl wan dɛn kin lan frɔm dɛn big wan dɛn. If di big wan de aplay Baybul prinsipul dɛn na in layf, i go bi gud ɛgzampul fɔ in smɔl wan. If di big wan disayd fɔ du wetin bad, sɔntɛm in smɔl wan go falamakata in bad ɛgzampul. Na di sem tin insay Jiova in famili. If Kristian we bin fetful disayd fɔ bi apɔstet ɔ bigin du mami ɛn dadi biznɛs di we aw Gɔd nɔ want ɔ ɔda bad bad tin dɛn, sɔntɛm ɔda wan dɛn go falamakata am ɛn du bad tin dɛn. Di wan dɛn we de du dat go pwɛl di gudnem we Jiova in famili gɛt. (1 Tɛs. 4:3-8) Wi nɔ fɔ fala bad ɛgzampul dɛn, ɛn wi nɔ fɔ alaw ɛnitin fɔ ambɔg wi padi biznɛs wit wi Papa we de na ɛvin we lɛk wi.

17. Uskayn we wi nɔ fɔ tink, ɛn wetin mek?

¹⁷Abop pan Jiova ɛn nɔ abop pan prɔpati. Jiova prɔmis se i go gi wi tin fɔ it, klos fɔ wɛr, ɛn say fɔ de if wi kɔntinyu fɔ put in Kiŋdɔm fɔs ɛn du wetin i want. (Sam 55:22; Mat. 6:33) We wi biliv da prɔmis de, wi nɔ go tink se di mɔni ɛn prɔpati dɛn na dis wɔl go  protɛkt wi ɛn mek wi gladi. Wi no se di wangren we fɔ mek wi ebul gɛt tru tru pis, na we wi du wetin Jiova want. (Fil. 4:6, 7) Ilɛksɛf wi gɛt mɔni fɔ bay bɔku tin dɛn, wi fɔ tink if wi rili gɛt di tɛm ɛn trɛnk fɔ yuz ɛn kia fɔ dɛn tin dɛn de. Fɔ se wi go pe atɛnshɔn tumɔs pan di tin dɛn we wi gɛt? Wi fɔ mɛmba se Gɔd dɔn gi wi wok fɔ du insay in famili. Dat min se wi nɔ fɔ alaw ɔda tin fɔ tek wi atɛnshɔn. Fɔ tru, wi nɔ go want fɔ bi lɛk da yɔŋman we bin disayd nɔ fɔ fala Jizɔs bikɔs i bin rili lɛk in jɛntri. So i bin mis di chans fɔ sav Jiova ɛn fɔ bi wan pan in adɔptɛd pikin dɛn!​—Mak 10:17-22.

18. Us big big ɔnɔ ɛn us blɛsin dɛn di wan dɛn we de obe Jiova go ɛnjɔy sote go?

¹⁸ Mɔtalman dɛn we de obe Jiova go ɛnjɔy di ɔnɔ we pas ɔl, dat na di ɔnɔ fɔ lɛk ɛn wɔship Jiova sote go! Di wan dɛn we gɛt di op fɔ de na dis wɔl, dɛn bak go gladi fɔ kia fɔ dis fayn wɔl we Jiova bin mek fɔ bi di pafɛkt ples we dɛn go de. I nɔ go te igen, Gɔd in Kiŋdɔm go mek di wɔl ɛn ɔltin we de de, fayn bak. Jizɔs go sɔlv ɔl di prɔblɛm dɛn we apin bikɔs Adam ɛn Iv bin disayd fɔ lɛf Gɔd in famili. Jiova go gi layf bak to bɔku bɔku pipul dɛn ɛn gi dɛn di chans fɔ liv sote go wit pafɛkt wɛlbɔdi na dis wɔl we i go dɔn tɔn to Paradays. (Lyuk 23:42, 43) We mɔtalman dɛn we de sav Jiova gɛt fɔ pafɛkt, dɛn ɔl go gɛt di “glori ɛn ɔnɔ” we Devid bin rayt bɔt.—Sam 8:5, NWT.

19. Wetin wi fɔ mɛmba?

¹⁹ If yu de pat ɔf di “bɔku bɔku pipul dɛn,” yu gɛt wɔndaful op. Gɔd lɛk yu; i want yu fɔ de na in famili. So du ɔl wetin yu ebul fɔ mek i gladi. Go de mɛmba Gɔd in prɔmis dɛn ɛvride. Valyu di ɔnɔ we yu gɛt fɔ wɔship wi Papa we de na ɛvin we lɛk wi, ɛn valyu di chans we yu gɛt fɔ prez am sote go!