1. Wetin mek Jizɔs bin beg Jiova fɔ protɛkt in disaypul dɛn?

 DI NƐT bifo Jizɔs day, i bin pre wan spɛshal prea to in Papa we de na ɛvin. I bin beg Jiova fɔ protɛkt in disaypul dɛn. (Jɔn 17:​15, 20) As wi no, Jiova in yay de pan in pipul dɛn ɔltɛm. I dɔn de kia fɔ dɛn ɛn protɛkt dɛn. Bɔt Jizɔs bin no se Setan go de agens in disaypul dɛn bad bad wan. Jizɔs bin no bak se dɛn go nid Jiova in ɛp fɔ mek dɛn go ebul fɔ tinap agens Setan in wikɛd atak dɛn.

2. Akɔdin to Sam 33:​18-20, wetin mek wi nɔ nid fɔ fred we wi gɛt prɔblɛm dɛn?

² Dis wɔl we Setan de kɔntrol de mek tru Kristian dɛn gɛt bɔku prɔblɛm dɛn tide. Wi de gɛt prɔblɛm dɛn we kin mek wi at pwɛl ɛn ivin tɛst di we aw wi de biɛn Jiova. Bɔt as wi go si insay dis atikul, wi nɔ gɛt natin fɔ fred. Jiova in yay de pan wi. I de si di prɔblɛm dɛn we de mit wi, ɛn i rɛdi ɔltɛm fɔ ɛp wi fɔ bia dɛn. Lɛ wi tɔk bɔt tu Baybul ɛgzampul dɛn we de sho aw Jiova in “yay de pan ɔl udat abop pan am.”—Rid Sam 33:​18-20.

3. Ustɛm wi kin fil se na wi wangren de?

³ Pan ɔl we wi gɛt bɔku brɔda ɛn sista dɛn na di kɔngrigeshɔn, sɔntɛnde wi kin fil se na wi wangren de. Fɔ ɛgzampul, yɔŋ wan dɛn kin fil se na dɛn wangren de we dɛn kin ɛksplen wetin dɛn biliv to dɛn klasmet dɛn na skul ɔ we dɛn muf go na nyu kɔngrigeshɔn. Sɔntɛm sɔm pan wi nɔ kin gladi ɔ wi at kin pwɛl, ɛn wi kin fil se nɔbɔdi nɔ de fɔ ɛp wi as wi de bia dɛn we dɛn ya aw wi de fil. I go bi  se wi kin fred fɔ tɔk to ɔda pipul dɛn bɔt aw wi de fil bikɔs wi de wɔri se dɛn nɔ go ɔndastand wi. Ɛn sɔntɛnde, wi kin ivin wɔnda if ɛnibɔdi rili bisin bɔt wi. Ilɛk wetin na di rizin we mek wi de fil se na wi wangren de, sɔntɛnde wi kin fil bak lɛk se nɔbɔdi nɔ de fɔ ɛp wi ɛn wi kin wɔri. Jiova nɔ ɛva want wi fɔ fil da we de. Wetin mek wi se so?

4. Wetin mek prɔfɛt Ilayja bin tɔk se na in “waŋren lɛf”?

⁴ Tink bɔt Ilayja we na bin fetful man, in ɛgzampul. Jezibɛl bin swɛ se i go kil am, so i bin dɔn pas 40 dez we i bin de rɔn fɔ in layf. (1 Kiŋ 19:​1-9) Faynali, we in wangren bin de na wan kev, i bin tɛl Jiova se na in na di “waŋren [prɔfɛt we] lɛf.” (1 Kiŋ 19:​10) Ɔda prɔfɛt dɛn bin de na di land. Fɔ ɛgzampul, Obadaya bin sev 100 prɔfɛt dɛn fɔ mek Jezibɛl nɔ kil dɛn. (1 Kiŋ 18:​7, 13) So wetin mek Ilayja bin fil se na in wangren de? Fɔ se i bin tink se ɔl di prɔfɛt dɛn we Obadaya bin sev dɔn day? Fɔ se i bin fil se na in wangren de bikɔs nɔbɔdi nɔ bin jɔyn am fɔ sav Jiova afta di Beal tɛst na Mawnt Kamɛl? Fɔ se i bin fil se nɔbɔdi nɔ no aw in layf bin de pan denja ɔ nɔbɔdi nɔ bisin bɔt am? Di akawnt nɔ ɛksplen ɔltin bɔt aw Ilayja bin de fil. Bɔt wetin wi no na dat Jiova bin ɔndastand wetin mek Ilayja bin fil se na in wangren de, ɛn I bin no aw fɔ ɛp am.

5. Aw Jiova bin ɛp Ilayja fɔ no se nɔto in wangren de?

⁵ Jiova bin du difrɛn tin dɛn fɔ ɛp Ilayja. I bin ɛnkɔrej Ilayja fɔ tɔk. Tu tɛm I bin aks Ilayja se: ‘Wetin yu de du ya?’ (1 Kiŋ 19:​9, 13) Ɛnitɛm we Jiova aks Ilayja da kwɛstyɔn de, I bin de lisin we Ilayja bin de tɔk bɔt aw i de fil. Jiova bin ansa Ilayja bay we I mek i no se I de wit am, ɛn I rili pawaful. I bin ɛp Ilayja bak fɔ no se bɔku ɔda Izrɛlayt dɛn de we stil de wɔship Am. (1 Kiŋ 19:​11, 12, 18) Wan dawt nɔ de se Ilayja bin fil fayn afta i dɔn tɛl Jiova aw i de fil, ɛn we i yɛri wetin Jiova se. Jiova bin gi Ilayja  difrɛn difrɛn wok dɛn we impɔtant. I bin tɛl am fɔ anɔynt Azaɛl as kiŋ na Siria, Jeu as kiŋ na Izrɛl, ɛn Ilaysha as prɔfɛt. (1 Kiŋ 19:​15, 16) We Jiova bin gi Ilayja dɛn wok dɛn ya, i bin ɛp am fɔ pe atɛnshɔn pan tin dɛn we go ɛp am. Gɔd bin gi am bak tayt padi, we na Ilaysha. Aw Jiova go ɛp yu we yu de fil se na yu wangren de?

6. Wetin yu go pre bɔt we yu de fil se na yu wangren de? (Sam 62:​8, NWT)

⁶ Jiova want yu fɔ pre to am. I de si di prɔblɛm dɛn we yu gɛt, ɛn i want yu fɔ no se i go lisin to yu ɛnitɛm we yu pre to am. (1 Tɛs. 5:​17) I kin gladi fɔ lisin to di wan dɛn we de wɔship am. (Prɔv. 15:​8) Wetin yu go pre bɔt we yu de fil se na yu wangren de? Tɛl Jiova aw yu de fil, jɔs lɛk aw Ilayja bin du. (Rid Sam 62:​8, NWT.) Tɛl am bɔt di tin dɛn we de mek yu wɔri ɛn aw dɛn de mek yu fil. Aks Jiova fɔ ɛp yu fɔ bia wit di we aw yu de fil. Fɔ ɛgzampul, if yu fil se na yu wangren de ɛn yu de fred we yu klasmet dɛn aks yu kwɛstyɔn dɛn bɔt wetin yu biliv, aks Jiova fɔ gi yu di maynd we yu nid fɔ tɔk. Yu kin ivin aks am fɔ gi yu sɛns fɔ tek tɛm ɛksplen wetin yu biliv. (Lyuk 21:​14, 15) If yu at pwɛl, aks Jiova fɔ ɛp yu fɔ tɔk wit wan machɔ Kristian bɔt dat. Yu kin aks Jiova fɔ ɛp di wan we yu de go tɔk to fɔ lisin to yu ɛn ɔndastand aw yu de fil. Tɛl Jiova aw yu de fil, si aw i de ansa yu prea dɛn, ɛn gri fɔ mek ɔda pipul dɛn ɛp yu. We yu du dat, yu nɔ go kɔntinyu fɔ fil se na yu wangren de.

7. Wetin yu lan frɔm Mɔrisio in ɛgzampul?

⁷ Jiova dɔn gi wi ɔl impɔtant wok fɔ du. Na fɔ biliv se i de si ɛn i valyu ɔl wetin yu de du na di kɔngrigeshɔn ɛn di prichin wok. (Sam 110:​3) If yu bizi de du dis wok, aw dat go ɛp yu we yu de fil se na yu wangren de? Tink bɔt wan yɔŋ brɔda we nem Mɔrisio in ɛgzampul. * Jɔs afta i baptayz, wan pan in bɛst padi dɛn bigin lɛf di trut smɔl smɔl te i stɔp fɔ sav Jiova. Mɔrisio se: “We a bin si am de lɛf Jiova smɔl smɔl, dat bin afɛkt di kɔnfidɛns we a gɛt pan misɛf. A bin de wɔnda if a go ebul du wetin a dɔn vaw to Jiova ɛn kɔntinyu fɔ de pat pan in famili. A bin fil se na mi wangren de, ɛn a bin de tink se nɔbɔdi nɔ go ɔndastand aw a de fil.” Wetin bin ɛp Mɔrisio? I se: “A bigin fɔ du mɔ na di prichin wok. Dat bin ɛp mi fɔ mek a lɛf fɔ tink bɔt misɛf ɛn aw a de fil. We a bin de go prich wit di brɔda ɛn sista dɛn, i bin mek a gladi, ɛn a nɔ bin de fil se na mi wangren de igen.” Fɔ tru, ivin we wi nɔ de prich fes-to-fes wit  wi brɔda ɛn sista dɛn, wi fet de strɔng we wi de yuz difrɛn we dɛn fɔ prich wit dɛn, lɛk lɛta raytin ɛn tɛlifon witnɛsin. Wetin bak bin ɛp Mɔrisio? I kɔntinyu fɔ tɔk se: “A bin de du mɔ wok bak na di kɔngrigeshɔn. A bin de du mi bɛst fɔ pripia ɛn fɔ du studɛnt pat dɛn na di mitin dɛn. Dɛn asaynmɛnt dɛn de bin de mek a no se Jiova valyu mi, ɛn di brɔda ɛn sista dɛnsɛf valyu mi.”

8. Aw siriɔs prɔblɛm dɛn kin afɛkt wi?

⁸ Wi no se prɔblɛm dɛn go mit wi insay dis las dez. (2 Tim. 3:​1) Bɔt stil, sɔntɛm wi go sɔprayz bikɔs ɔf di tɛm we wan patikyula prɔblɛm go mit wi ɔ bikɔs ɔf di we aw di prɔblɛm de. Sɔntɛm wantɛm wantɛm, wi go gɛt mɔni prɔblɛm, sɔntɛm wi dɔktɔ go tɛl wi se wi gɛt siriɔs wɛlbɔdi prɔblɛm, ɔ sɔntɛm sɔmbɔdi we wi lɛk go day. Dɛn tɛm dɛn de, wi kin strɛs ɛn wi at kin rili pwɛl, mɔ if i tan lɛk se as wan prɔblɛm dɔn, ɔda wan de kam; ɔ wi de gɛt bɔku prɔblɛm dɛn di sem tɛm. Bɔt mɛmba se Jiova in yay de pan wi, ɛn i go ɛp wi fɔ bia ɛni prɔblɛm we mit wi wit kɔnfidɛns.

9. Tɔk bɔt sɔm prɔblɛm dɛn we bin mit Job.

⁹ Tink bɔt aw Jiova bin ɛp Job we na bin fetful man. Insay shɔt tɛm, i bin gɛt bɔku prɔblɛm dɛn we nɔ bin rili izi fɔ am. Insay wangren de, Job bin kam fɔ no bɔt bad bad tin dɛn we mek in animal dɛn day, in savant dɛn day, ɛn di tin we wɔs pas ɔl na dat ivin in pikin dɛn we i rili lɛk, dɛn ɔl day. (Job 1:​13-19) Jɔs afta dat, we Job in at bin stil pwɛl, i bin kam gɛt bad bad sik we bin de rili mɔna am. (Job 2:​7) Di tin dɛn we bin de apin to Job bin so bad dat Job bin tɔk se: “A et mi layf: a dɔn taya wit dis layf.”—Job 7:​16.

10. Aw Jiova bin gi Job wetin i nid fɔ bia in prɔblɛm dɛn? (Luk di pikchɔ na di frɔnt pej.)

¹⁰ Jiova in yay bin de pan Job. Bikɔs Jiova bin lɛk Job, dat bin mek I gi am wetin i nid fɔ bia in prɔblɛm dɛn ɛn kɔntinyu fɔ fetful. Jiova tɔk to Job. I mɛmba am bɔt di pasmak sɛns we I gɛt, ɛn di lɛk we I lɛk di tin dɛn we I mek. I tɛl am bɔt bɔku wɔndaful animal dɛn. (Job 38:​1, 2; 39:​9, 13, 19, 27; 40:​15; 41:​1, 2) Jiova bin yuz bak wan fetful yɔŋman we nem Ilayu fɔ ɛp Job fɔ gɛt trɛnk ɛn fɔ bia in prɔblɛm dɛn. Ilayu bin ɛp Job fɔ no se Jiova de blɛs In savant dɛn ɔltɛm fɔ we dɛn de bia. Bɔt Jiova bin ɛp Ilayu bak fɔ gi Job gud advays dɛn. Ilayu bin ɛp Job fɔ stɔp fɔ tink bɔt insɛf tumɔs, ɛn i mɛmba am se wi rili smɔl we wi kɔmpia wisɛf to di Wan we mek di wan ol wɔl. (Job 37:​14) Dɔn bak, Jiova bin gi Job sɔntin fɔ du. I bin tɛl am fɔ mek i pre fɔ in tri padi dɛn we bin dɔn sin. (Job 42:​8-10) Aw Jiova de ɛp wi tide we wi gɛt prɔblɛm dɛn we de rili mɔna wi?

11. Aw di Baybul de kɔrej wi di tɛm dɛn we wi gɛt prɔblɛm?

¹¹ Jiova nɔ de tɔk to wi dayrɛkt wan lɛk aw i bin tɔk to Job, bɔt I de yuz In Wɔd, di Baybul fɔ tɔk to wi. (Rom. 15:​4) I de kɔrej wi bay we i de gi wi op fɔ tumara bambay. Lɛ wi si sɔm tin dɛn we di Baybul tɔk we go kɔrej wi we wi gɛt prɔblɛm dɛn. Insay di Baybul, Jiova ɛp wi fɔ no se natin, ivin prɔblɛm dɛn we nɔ rili izi, “nɔ ebul mek [i] lɛf fɔ lɛk wi.” (Rom. 8:​38, 39) I ɛp wi fɔ no bak se i ‘de nia ɔl udat’ de pre to am. (Sam 145:​18) Jiova tɛl wi se if wi abop pan am, wi go ebul fɔ bia ɛni prɔblɛm ɛn gɛt gladi-at ivin we wi  de sɔfa. (1 Kɔr. 10:​13; Jems 1:​2, 12) Gɔd in Wɔd mɛmba wi bak se wi prɔblɛm dɛn na fɔ shɔt tɛm ɛn dɛn smɔl we wi kɔmpia am to di blɛsin dɛn we i go gi wi sote go. (2 Kɔr. 4:​16-18) Jiova de gi wi op fɔ se i go dɔnawe wit di wan dɛn we de kɔz ɔl wi prɔblɛm dɛn, dat na Setan di Dɛbul ɛn di wan dɛn we wikɛd lɛk am. (Sam 37:​10) Yu dɔn kram sɔm skripchɔ dɛn we go ɛp yu fɔ bia prɔblɛm dɛn we go mit yu tumara bambay?

12. Wetin Jiova ɛkspɛkt wi fɔ du if wi rili want fɔ bɛnifit frɔm in Wɔd?

¹² Jiova de ɛkspɛkt wi fɔ mek tɛm fɔ stɔdi di Baybul ɔltɛm ɛn fɔ tink gud gud wan bɔt wetin wi de rid. We wi de du wetin wi de lan, wi fet go strɔng mɔ ɛn mɔ, ɛn wi padi biznɛs wit wi Papa we de na ɛvin go tayt mɔ ɛn mɔ. We dat apin, wi go ebul fɔ gɛt trɛnk fɔ bia prɔblɛm dɛn. Jiova de gi bak in oli spirit to di wan dɛn we abop pan in Wɔd. Ɛn da spirit de go gi wi “di pawa we pas mɔtalman in yon” fɔ bia ɛni prɔblɛm.—2 Kɔr. 4:​7-10.

13. Aw di spirichwal it we “di slev we fetful ɛn gɛt sɛns” de gi wi de ɛp wi fɔ bia prɔblɛm dɛn?

¹³ Wit Jiova in ɛp, “di slev we fetful ɛn gɛt sɛns” de mek bɔku atikul dɛn, vidio dɛn, ɛn myuzik dɛn we go ɛp wi fɔ gɛt strɔng fet ɛn kɔntinyu fɔ de nia Jiova. (Mat. 24:​45) Wi nid fɔ yuz ɔltin we Jiova de gi wi gud gud wan. Dis biɛn tɛm, wan sista we de na Amɛrika bin tɔk bɔt aw i rili gladi fɔ ɔl dis spirichwal it. I bin se: “Insay di 40 ia we a dɔn sav Jiova, prɔblɛm dɛn dɔn de mit mi we de tɛst mi padi biznɛs wit Jiova.” I bin gɛt siriɔs prɔblɛm dɛn. Wan drayva we chak bin kil in granpa, in mama ɛn papa bin rili sik ɛn day, ɛn tu tɛm i bin gɛt kansa. Wetin bin ɛp am fɔ bia? I ɛksplen se: “Jiova dɔn de sho se i bisin bɔt mi. Di spirichwal it we i de yuz di slev we fetful ɛn gɛt sɛns fɔ gi wi dɔn ɛp mi fɔ bia. Bikɔs ɔf dat, jɔs lɛk Job, misɛf go se: ‘Te a day, a nɔ go ɛva lɛf fɔ sav Gɔd.’”—Job 27:​5, NWT.

14. Aw Jiova de yuz wi brɔda ɛn sista dɛn fɔ sɔpɔt wi di tɛm we wi gɛt prɔblɛm? (1 Tɛsalonians 4:​9)

¹⁴ Jiova dɔn tren in pipul dɛn fɔ sho lɔv ɛn fɔ kɔrej dɛn brɔda ɛn sista dɛn di tɛm dɛn we dɛn gɛt prɔblɛm. (2 Kɔr. 1:​3, 4; rid 1 Tɛsalonians 4:​9.) Jɔs lɛk Ilayu, wi brɔda ɛn sista dɛn rili want fɔ ɛp wi fɔ  kɔntinyu fɔ fetful to Jiova we wi gɛt prɔblɛm. (Akt 14:​22) Fɔ ɛgzampul, tink bɔt aw Dayan in kɔngrigeshɔn bin ɛnkɔrej am ɛn ɛp am fɔ kɔntinyu fɔ de nia Jiova afta in man bin gɛt siriɔs wɛlbɔdi prɔblɛm. Dayan se: “I nɔ bin izi. Bɔt wi bin si aw Jiova bin sho se i lɛk ɛn bisin bɔt wi dɛn tɛm dɛn de. Wi kɔngrigeshɔn bin du bɔku tin fɔ sɔpɔt wi. Brɔda ɛn sista dɛn bin de kam fɛn wi, dɛn bin de kɔl wi na fon, ɛn dɛn bin de ɔg wi; ɔl dat bin ɛp wi fɔ bia. Bikɔs a nɔ de drayv, di brɔda ɛn sista dɛn mek shɔ se a ebul fɔ go di mitin dɛn ɛn fil savis ɛnitɛm we a ebul.” Wi rili gladi bikɔs wi gɛt brɔda ɛn sista dɛn na di kɔngrigeshɔn we gɛt lɔv.

15. Wetin mek wi shɔ se wi go ebul bia prɔblɛm dɛn?

¹⁵ Wi ɔl go gɛt prɔblɛm dɛn. Bɔt as wi dɔn lan, wi nɔ go ɛva bia dɛn prɔblɛm dɛn de wi wangren. Lɛk papa we lɛk in pikin dɛn, Jiova in yay de pan wi ɔltɛm. I de nia wi, i rɛdi fɔ lisin to wi we wi pre to am fɔ ɛp wi, ɛn i rili want fɔ sɔpɔt wi. (Ayz. 43:​2) Wi shɔ se wi go ebul bia wi prɔblɛm dɛn bikɔs as Gɔd we gɛt fri-an, i dɔn gi wi ɔl wetin wi nid fɔ bia dɛn. I dɔn gi wi di ɔnɔ fɔ pre to am, i dɔn gi wi di Baybul, bɔku spirichwal it dɛn, ɛn brɔda ɛn sista dɛn we gɛt lɔv fɔ ɛp wi di tɛm we wi nid dɛn ɛp.

16. Wetin wi go du fɔ mek Jiova kɔntinyu fɔ sho se i bisin bɔt wi?

¹⁶ Wi rili gladi fɔ gɛt Papa we de na ɛvin we in yay de pan wi! “Wi go gladi bikɔs ɔf ɔl wetin i du.” (Sam 33:​21) Wi go sho Jiova se wi gladi fɔ di bisin we i bisin bɔt wi bay we wi de yuz ɔl di tin dɛn we i dɔn gi wi fɔ ɛp wi. Dɔn bak, wisɛf nid fɔ du sɔntin fɔ mek Gɔd kɔntinyu fɔ sho se i bisin bɔt wi. Dis min se if wi kɔntinyu fɔ du wi bɛst fɔ obe Jiova ɛn du wetin fayn na in yay, in yay go de pan wi sote go.—1 Pit. 3:​12.