1. Us gud tin dɛn we bɔku yɔŋ wan dɛn dɔn ɔlrɛdi du?

 ƐNI ia, bɔku yɔŋ wan dɛn de baptayz. Yusɛf dɔn baptayz? If yu dɔn baptayz, yu Kristian brɔda ɛn sista dɛn gladi fɔ yu, ɛn Jiova sɛf gladi! (Prɔv. 27:​11) Tek tɛm tink smɔl bɔt wetin yu ɔlrɛdi dɔn du. Yu dɔn tek tɛm stɔdi di Baybul fɔ lɔng tɛm. Di stɔdi we yu de stɔdi dɔn mek yu biliv se di Baybul na Gɔd in Wɔd. Bɔt pantap dat, yu dɔn kam fɔ no ɛn lɛk di Wan we rayt di Baybul. Bikɔs yu rili lɛk Jiova, dat dɔn mek yu dɔn gi yu layf to am ɛn baptayz. Yu dɔn disayd fɔ du di rayt tin!

2. Wetin wi go tɔk bɔt insay dis atikul?

 ² Wan dawt nɔ de se Setan bin dɔn de tray fɔ tɛst yu fet bɔku we dɛn as yu bin de tray fɔ baptayz. Bɔt as yu de big, yu go gɛt nyu tɛst dɛn. Setan go de tray fɔ mek yu lɔv fɔ Jiova nɔ strɔng igen ɛn mek yu lɛf fɔ sav Am. (Ɛfi. 4:​14) Yu nɔ fɔ alaw dat fɔ apin. Wetin go ɛp yu fɔ mek yu kɔntinyu fɔ de biɛn Jiova ɛn kip di prɔmis we yu bin dɔn mek fɔ sav am? Yu nid fɔ kɔntinyu fɔ go bifo ɛn “tray tranga wan” fɔ bi machɔ Kristian. (Ibru. 6:​1) Bɔt aw yu go ebul fɔ du dat?

3. Wetin ɔlman we na Kristian nid fɔ du afta i baptayz?

³ Afta wi dɔn baptayz, wi ɔl nid fɔ fala apɔsul Pɔl in advays we i bin gi to di Kristian dɛn na Ɛfisɔs. I bin ɛnkɔrej dɛn fɔ bi “machɔ” Kristian dɛn. (Ɛfi. 4:​13) Dat min se dɛn bin nid fɔ ‘kɔntinyu fɔ go bifo.’ Wi go ebul fɔ ɔndastand wetin Pɔl min bay di we aw i bin kɔmpia di we aw wi de go bifo as Kristian to di we aw pikin de gro. Kombra dɛn kin lɛk dɛn yɔŋbebi ɛn gladi fɔ am. Bɔt i nɔ go kɔntinyu fɔ bi pikin sote go. As tɛm de go, i go nid fɔ lɛf fɔ “biev lɛk pikin.” (1 Kɔr. 13:​11) Na di sem tin bak fɔ Kristian dɛn. Afta wi baptayz, wi nid fɔ kɔntinyu fɔ go bifo pan Gɔd biznɛs. Lɛ wi tɔk bɔt sɔm tin dɛn we go ɛp wi fɔ du dat.

4. Us kwaliti go ɛp wi fɔ bi machɔ Kristian? Ɛksplen. (Filipians 1:​9)

⁴ Kɔntinyu fɔ lɛk Jiova mɔ ɛn mɔ. Yu ɔlrɛdi lɛk Jiova pasmak. Bɔt yu go ebul fɔ lɛk am mɔ ɛn mɔ. Aw? Apɔsul Pɔl bin sho wi wan we na Filipians 1:​9. (Rid.) Pɔl bin pre fɔ lɛ di Kristian dɛn na Filipay gɛt lɔv “mɔ ɛn mɔ.” So wi go ebul fɔ lɛk Jiova mɔ ɛn mɔ. Wi go ebul fɔ du dat bay we wi no “di kɔrɛkt tin ɛn . . . rili ɔndastand” wetin wi de lan. Di mɔ wi de sabi Jiova, na di mɔ wi de lɛk am ɛn gladi fɔ di kayn pɔsin we i bi ɛn di we aw i de du tin. Wi go rili want fɔ du wetin go mek i gladi, ɛn wi nɔ go ɛva want fɔ du ɛnitin we go mek in at pwɛl. Wi de tray tranga wan fɔ no wetin i want ɛn aw wi go ebul fɔ du am.

5-6. Aw wi go ebul fɔ lɛk Jiova mɔ ɛn mɔ? Ɛksplen.

⁵ Wi go ebul fɔ lɛk Jiova mɔ ɛn mɔ bay we wi sabi in Pikin, we bin falamakata in Papa in kwaliti dɛn pafɛkt wan. (Ibru. 1:​3) Di bɛst we aw wi go sabi Jizɔs na we wi stɔdi di 4 Gɔspɛl dɛn. If yu nɔ bigin yet fɔ rid di Baybul ɛvride, yu nɔ tink se i go fayn fɔ lɛ yu bigin naw? As yu de rid di stori dɛn bɔt Jizɔs, pe atɛnshɔn pan in kwaliti dɛn. In na pɔsin we bin izi fɔ tɔk to; i bin lɛk smɔl pikin dɛn, ɛn i bin de tot dɛn. (Mak 10:​13-16) I bin de trit in disaypul dɛn fayn; dɛn bin de fil fri fɔ tɔk wetin dɛn tink we dɛn de wit am. (Mat. 16:​22) We i kam to dɛn tin ya, wi si se Jizɔs bin falamakata in Papa we de na ɛvin. Jiova bak na pɔsin we rili izi fɔ tɔk to. Wi go ebul fɔ pre to am. We wi de pre to am, wi kin tɛl am ɔl wetin de na wi at. Wi biliv tranga wan se i nɔ go kɔndɛm wi. I lɛk wi ɛn i bisin bɔt wi.—1 Pit. 5:​7.

⁶ Jizɔs bin de sɔri fɔ pipul dɛn. Apɔsul Matyu bin rayt se: “We i si di krawd, i sɔri fɔ dɛn bikɔs pipul dɛn bin de trit dɛn bad ɛn dɛn nɔ bin bisin bɔt dɛn lɛk ship dɛn we nɔ gɛt shɛpad.” (Mat. 9:​36) Aw Jiova de fil? Jizɔs bin se: “Mi Papa we de na ɛvin nɔ ivin want lɛ wan pan dɛn smɔl wan ya day.” (Mat. 18:​14) Dɛn wɔd ya de rili mek wi gladi bikɔs dɛn de sho wi se Jiova rili lɛk wi. Di mɔ wi de sabi Jizɔs, na di mɔ wi de lɛk Jiova.

7. We yu spɛn tɛm wit machɔ Kristian dɛn, aw dat go ɛp yu?

⁷ Yu go ebul lan bak fɔ sho mɔ lɔv ɛn fɔ bi machɔ Kristian mɔ ɛn mɔ bay we yu de spɛn tɛm wit machɔ brɔda ɛn sista dɛn na yu kɔngrigeshɔn, ɛn we yu de tray fɔ sabi dɛn. Tray fɔ notis di we aw dɛn gladi. Dɛn nɔ ɛva rigrɛt di disayd we dɛn disayd fɔ sav Jiova. Aks dɛn lɛ dɛn tɛl yu bɔt sɔm ɛkspiriɛns dɛn we dɛn dɔn gɛt as dɛn de sav Jiova. We yu gɛt impɔtant tin fɔ disayd, aks dɛn fɔ advays. Mɛmba se  ‘usay advaysa dɛn de, bɛtɛ go de de.’—Prɔv. 11:​14.

8. Wetin yu go du if yu stat fɔ dawt wetin di Baybul se?

⁸ Tray fɔ pul ɛni dawt we yu gɛt na yu maynd. Lɛk aw wi bin dɔn tɔk na  paregraf 2, Setan go tray fɔ stɔp yu fɔ mek yu nɔ gɛt strɔng fet ɛn lɛ yu nɔ kɔntinyu fɔ kam nia Jiova. Sɔntɛm wan we aw i go want fɔ du dat na bay we i de mek yu dawt sɔm pan di tin dɛn we yu dɔn lan na di Baybul. Fɔ ɛgzampul, i go bi se as tɛm de go, yu go mit sɔm pipul dɛn we go tray fɔ mek yu biliv se nɔto Gɔd mek ɔltin; layf jɔs kam bay chans. I go bi se yu nɔ bin dɔn ɛva tink bɔt dis we yu bin smɔl, bɔt naw we yu dɔn big, sɔntɛm dɛn go de tich yu bɔt am na skul. Sɔntɛm di tin dɛn we yu ticha dɛn de tɔk go luk mek sɛns. Bɔt i go bi se dɛn nɔ ɛva tray fɔ no if Pɔsin rili de we mek ɔltin. Mɛmba di prinsipul we de na Prɔvabs 18:​17 we se: “Udat fɔs le kɔmplen kin tan lɛk i gɛt rayt, te dɛn yɛri di ɔda pati in stori.” Bifo yu jɔs biliv ɔl di tin dɛn we yu de yɛri na skul, yu fɔ tray fɔ stɔdi wetin Gɔd in Wɔd se gud gud wan. Du risach na wi pɔblikeshɔn dɛn. Tɔk to brɔda ɛn sista dɛn we bin biliv se layf kam bay chans. * Aks dɛn wetin mek dɛn biliv tranga wan se Pɔsin de we mek ɔltin ɛn i lɛk wi. Dɛn tin  dɛn ya we yu go tɔk wit dɛn go ɛp yu fɔ fɛn pruf dɛn we de sho se Pɔsin de we mek ɔltin.

9. Wetin yu lan frɔm Mɛlisa in ɛkspiriɛns?

⁹ Wan sista we nem Mɛlisa bin stɔdi fɔ no if pɔsin de we mek ɔltin, ɛn dat bin ɛp am fɔ pul di dawt we i bin gɛt na in maynd. * I se: “We wi de go skul, di we aw wi ticha dɛn kin ɛksplen se layf kam bay chans kin mek i luk lɛk se na tru. Fɔs, a nɔ bin want fɔ du risach bikɔs a bin de fred se di tin dɛn we a go lan go mek a kam fɔ si se layf kam bay chans. Bɔt a bin tink to misɛf se Jiova nɔ jɔs want wi fɔ biliv tin dɛn bɔt am we wi nɔ gɛt pruf. So a bigin fɔ du risach. A rid di buk we nem Is There a Creator Who Cares About You? ɛn di brosho dɛn we nem Was  Life Created? ɛn The Origin of Life—Five Questions Worth Asking. Dɛn tin dɛn ya na bin jɔs wetin a nid. A wish a bin fɔ dɔn rid dɛn bifo dis tɛm.”

10-11. Wetin go ɛp yu fɔ lɛ yu nɔ du wetin dɛn de prɛzhɔ yu fɔ du? (1 Tɛsalonians 4:​3, 4)

¹⁰ Nɔ gri fɔ du bad tin. We yu yɔŋ, yu kin bigin fil fɔ du mami ɛn dadi biznɛs bad bad wan, ɛn sɔntɛnde, ɔda pipul dɛn kin tray fɔ prɛzhɔ yu fɔ lɛ yu du mami ɛn dadi biznɛs di we aw Gɔd nɔ want. Na dat Setan want yu fɔ du. Wetin go ɛp yu fɔ lɛ yu nɔ du wetin dɛn de prɛzhɔ yu fɔ du? (Rid 1 Tɛsalonians 4:​3, 4.) We yu de pre to Jiova, tɛl am aw yu de rili fil, ɛn beg am lɛ i ɛp yu fɔ tinap tranga wan lɛ yu nɔ du wetin dɛn de tɛmt yu fɔ du. (Mat. 6:​13) Mɛmba se Jiova want fɔ ɛp yu, i nɔ want fɔ kɔndɛm yu. (Sam 103:​13, 14) Di Baybul bak go ɛp yu. Mɛlisa, we wi bin dɔn tɔk bɔt, bin de fɛt fɔ lɛ i pul bad tin dɛn na in maynd. I se: “We a bin de rid di Baybul ɛvride, dat bin ɛp mi fɔ lɛ a nɔ giv-ɔp. I bin de mek a mɛmba se na Jiova gɛt mi, ɛn a want fɔ sav am.”—Sam 119:​9.

¹¹ Nɔ tray fɔ sɔlv yu prɔblɛm dɛn bay yusɛf. Tɔk to yu mama ɛn papa dɛn bɔt di tin we yu de fɛt wit. Na tru se i nɔ izi fɔ tɔk bɔt dɛn kayn tin dɛn ya, bɔt i rili impɔtant fɔ lɛ yu du dat. Mɛlisa se: “A bin pre to Jiova fɔ lɛ i ɛp mi fɔ gɛt maynd, dɔn a tɔk to mi papa bɔt mi prɔblɛm. Afta a du dat, mi at bin rili kol. A bin no se Jiova gladi fɔ mi.”

12. Wetin go ɛp yu fɔ disayd fɔ du di rayt tin dɛn?

¹² Alaw Baybul prinsipul dɛn fɔ gayd yu. Di mɔ we yu de big, na di mɔ yu mama ɛn papa dɛn go gi yu fridɔm fɔ disayd fɔ du tin dɛn fɔ yusɛf. Bɔt bɔku tin dɛn stil de we yu nɔ sabi yet. Aw yu go avɔyd fɔ mek mistek we go ambɔg yu padi biznɛs wit Jiova? (Prɔv. 22:​3) Wan sista we nem Kari ɛksplen wetin bin ɛp am fɔ disayd fɔ du di rayt tin dɛn. I bin kam fɔ no se machɔ Kristian dɛn nɔ nid lɔ fɔ ɔltin. I se: “A bin nid fɔ ɔndastand Baybul prinsipul dɛn, nɔto jɔs di lɔ dɛn na di Baybul.” We yu de rid di Baybul, aks yusɛf dɛn kwɛstyɔn dɛn ya: ‘Wetin dis vas de tɛl mi bɔt di we aw Jiova de tink? Fɔ se dis vas gɛt prinsipul dɛn we go ɛp mi fɔ du di rayt tin? If na so i bi, aw a go bɛnifit we a du wetin di Baybul de tich mi?’ (Sam 19:​7; Ayz. 48:​17, 18) We yu de rid di Baybul ɛn tink gud wan bɔt in prinsipul dɛn, i go izi fɔ lɛ yu disayd fɔ du tin dɛn we de mek Jiova gladi. Di mɔ we yu de kɔntinyu fɔ bi machɔ Kristian, na di mɔ yu go notis se yu nɔ nid lɔ fɔ ɔltin bikɔs yu go ɔndastand di we aw Jiova de tink bɔt tin dɛn.

13. Aw gud padi dɛn go ɛp yu? (Prɔvabs 13:​20)

¹³ Pik padi dɛn we lɛk Jiova. Lɛk aw wi bin dɔn tɔk, yu padi dɛn go ɛp yu fɔ bi machɔ Kristian. (Rid Prɔvabs 13:​20.) Wan sista we nem Sera bin kam fɔ notis se i nɔ gladi bɛtɛ igen. Bɔt sɔntin bin apin we bin ɛp am fɔ mek i gladi bak. Sera se: “A bin fɛn gud padi dɛn di rayt tɛm. Mi ɛn wan yɔŋ sista bin de stɔdi Di Wachtawa ɛvri wik. Wan mi ɔda padi bin ɛp mi fɔ bigin kɔmɛnt na mitin. Bikɔs dɛn mi padi dɛn ya bin ɛp mi, a bigin ol mi pasɔnal stɔdi ɛn prea wit tu an. A stat fɔ gɛt tayt padi biznɛs wit Jiova, ɛn a bigin gladi bak.”

14. Aw Juliɛn bin ebul fɔ gɛt gud padi dɛn?

¹⁴ Aw yu go ebul fɔ bi padi to pipul dɛn we go ɛp yu? Juliɛn, we na ɛlda naw, tɔk se: “We a bin yɔŋ, a bin kam fɔ gɛt gud  padi dɛn we a bin de go fil savis. Dɛn mi padi dɛn ya bin gɛt zil, ɛn dɛn bin ɛp mi fɔ si se a go rili ebul fɔ ɛnjɔy di prichin wok. A stat fɔ mek di ful-taym savis mi gol. A bin kam fɔ si bak se di rizin we mek a nɔ bin ebul gɛt bɔku gud padi dɛn na bikɔs a bin jɔs de fɛn padi dɛn we wi ɔl na di sem ej. Leta, a kam fɔ gɛt gud padi dɛn bak na Bɛtɛl. Dɛn ɛgzampul bin ɛp mi fɔ bigin pik di rayt we fɔ ɛnjɔy misɛf, ɛn dis bin mek a kam nia Jiova mɔ ɛn mɔ.”

15. We i kam to padi biznɛs, us wɔnin Pɔl bin gi Timoti? (2 Timoti 2:​20-22)

¹⁵ Wetin yu go du if yu kam fɔ no se pɔsin de na di kɔngrigeshɔn we nɔto gud padi fɔ yu? Pɔl bin no se sɔm brɔda dɛn we bin de insay di fɔstɛm Kristian dɛn tɛm nɔ bin de tink ɔ du tin lɛk Kristian, so i bin wɔn Timoti lɛ i nɔ go nia dɛn. (Rid 2 Timoti 2:​20-22.) Wi rili valyu wi padi biznɛs wit Jiova. Wi dɔn wok tranga wan fɔ kam nia wi Papa we de na ɛvin, so wi nɔ fɔ bi padi to pipul dɛn we go ambɔg wi padi biznɛs wit am.—Sam 26:​4.

16. Uskayn gol dɛn yu fɔ sɛt?

¹⁶ Sɛt fayn gol dɛn. Pik gol dɛn we go ɛp yu fɔ gɛt strɔng fet ɛn bi machɔ Kristian mɔ ɛn mɔ. (Ɛfi. 3:​16) Fɔ ɛgzampul, sɔntɛm yu go disayd se yu nid fɔ du yu pasɔnal stɔdi ɛn Baybul ridin ɔltɛm. (Sam 1:​2, 3) Ɔ sɔntɛm yu go si se yu nid fɔ de pre mɔ ɛn mek yu prea dɛn kɔmɔt na yu at. Sɔntɛm bak, yu nid fɔ tek tɛm mɔ we i kam to di tin dɛn we yu de pik fɔ ɛnjɔy yusɛf ɔ aw yu de yuz yu tɛm. (Ɛfi. 5:​15, 16) We Jiova si se yu de tray tranga wan fɔ bi machɔ Kristian mɔ ɛn mɔ, dat go mek i gladi.

17. We yu de ɛp ɔda pipul dɛn, aw dat go bɛnifit yu?

¹⁷ Yu go ebul fɔ bi machɔ Kristian we yu de ɛp ɔda pipul dɛn. Jizɔs bin se: “We pɔsin gi, i de gladi mɔ pas we dɛn gi am.” (Akt 20:​35) Yu go rili gladi if yu yuz sɔm pan yu tɛm ɛn trɛnk fɔ ɛp ɔda pipul dɛn. Fɔ ɛgzampul, yu kin mek am yu gol fɔ ɛp di wan dɛn na yu kɔngrigeshɔn we ol ɛn di wan dɛn we sik. Sɔntɛm yu kin ɛp  dɛn fɔ go bay-bay ɔ yu kin sho dɛn aw fɔ yuz dɛn ilɛktronik tin dɛn. If yu na brɔda, sɛt di gol fɔ bi ministerial savant so dat yu go ɛp yu brɔda ɛn sista dɛn mɔ. (Fil. 2:​4) Yu go sho bak se yu lɛk di wan dɛn we nɔ de na di kɔngrigeshɔn bay we yu de prich di gud nyuz bɔt di Kiŋdɔm to dɛn. (Mat. 9:​36, 37) If i pɔsibul, na fɔ mek am yu gol fɔ de na ful-taym savis.

18. Aw ful-taym savis go ɛp yu fɔ kam nia Jiova mɔ ɛn mɔ?

¹⁸ Ful-taym savis go ɛp yu fɔ gɛt bɔku chans fɔ kam nia Jiova mɔ ɛn mɔ. If yu bi payɔnia, sɔntɛm yu go ebul fɔ atɛnd di Skul fɔ Pipul dɛn We De Prich bɔt Gɔd in Kiŋdɔm. I go bi se yu go ebul bak fɔ wok na Bɛtɛl ɔ fɔ ɛp fɔ bil di say dɛn we wi kin yuz fɔ wɔship Jiova. Wan yɔŋ payɔnia sista we nem Ketlin se: “We a bin de prich wit machɔ brɔda ɛn sista dɛn, dat na wan men tin we bin ɛp mi fɔ kam nia Jiova mɔ ɛn mɔ afta a baptayz. Dɛn ɛgzampul bin muv mi fɔ mek a de stɔdi di Baybul mɔ ɛn mɔ ɛn fɔ bi gud ticha.”

19. Us blɛsin dɛn yu go ɛnjɔy as yu de kɔntinyu fɔ bi machɔ Kristian?

¹⁹ Di mɔ we yu de tray fɔ bi machɔ Kristian, na di mɔ Jiova go blɛs yu wit bɔku gud tin dɛn. Yu nɔ go yuz yu trɛnk fɔ du tin dɛn we nɔ gɛt wan bɛnifit. (1 Jɔn 2:​17) Yu nɔ go gɛt di pen we pipul dɛn kin gɛt we dɛn disayd fɔ du di rɔng tin dɛn. Bifo dat, yu layf go kɔmɔt fayn ɛn yu go gɛt gladi-at. (Prɔv. 16:​3) Yu gud ɛgzampul go ɛnkɔrej yu kɔmpin Kristian dɛn, ilɛk dɛn yɔŋ ɔ ol. (1 Tim. 4:​12) Ɛn di tin we impɔtant pas ɔl na dat yu go gɛt di pis ɛn gladi-at we pɔsin kin gɛt we i no se i de mek Jiova gladi ɛn i gɛt tayt padi biznɛs wit am.—Prɔv. 23:​15, 16.